Թենիսի պրոֆեսիոնալների միությունը որոշում է կայացրել մրցաշրջանի վերսկսման վերաբերյալ։

Այսպիսով, ATP-ն և Միացյալ Նահանգների թենիսի միությունը համատեղ հայտարարի է եկել, որով նախատեսվում է օգոստոսի 14-ից վերսկսել մրցաշրջանը։ Տուրը վերսկսվելու է Վաշինգտոնում կայանալիք Citi Open մրցաշարով, ինչի հաջորդելու են Ցինցինատին և US Open-ը։

Օրացույցից պարզ է դառնում, որ անցկացվելու է նաև Մեծ սաղավարտի մյուս մրցաշարը՝ Ռոլան Գարոսը։

Թենիսի պրոֆեսիոնալների միությունն ու Կանանց թենիսի միությունը երկարաձգեցին մրցաշրջանի դադարը կապված Covid-19-ի համավարակի հետ։

«Թենիսի ընտանիքի առողջությունն ու լավ լինելը շարունակում է մնալ մեր առաջնահերթությունը որոշումներ կայացնելիս»,-ասել է ATP-ի նախագահ Անդրեա Գաուդենցին։

WTA-ի Twitter-յան պաշտոնական էջում տարածված հաղորդագրության մեջ ասվում է, որ հետագա որոշումները կայացվելու են հունիսին։

Հիշեցնենք, որ թենիսի մրցաշրջանը դադարեցված է Ինդիան-Ուելսից։

Տղամարդկանց թենիսի ֆեդերացիան՝ ATP-ն կհայտարարի կորոնավիրուսի պատճառով դադարը՝ մինչև հուլիս հետաձգելու մասին: Այս մասին հայտնում է Sport Journal ամսագիրը: Այս պահի դրությամբ դադարը սահմանված է մինչև հունիսի 13-ը:

Դադարի հետաձգումը կազդի մի շարք մրցաշարերի վրա. Նյուպորտի, Համբուրգի, Ատլանտայի և մի շարք այլ մրցաշարեր արդեն հետաձգվել են:

Հաղորդվում է, որ նման որոշման կարող է գալ նաև WTA-ը, սակայն ոչ մի պաշտոնական ինֆորմացիա չկա:

Ներկայումս աշխարհում անցկացվում են միայն ցուցադրական մրցաշարեր: Այս պահին Գերմանիայում երեք մրցաշար է պլանավորվել:

Թենիսի պրոֆեսիոնալների միությունն ու Կանանց թենիսային միությունը հնարավոր է նոր որոշում կայացնեն մրցաշրջանի դադարի երկարաձգման վերաբերյալ։

Ռուսաստանի թենիսի ֆեդերացիայի նախագահ Շամիլ Տարպիշևը նշել է, որ գալիք շաբաթվա ընթացքում կայանալիք խորհրդակցության ընթացքում քննարկվելու է դադարի հնարավոր երկարաձգման հարցը և ֆինանսական վնասների հարցը։

Ներկա պահին ATP-ի, WTA-ի և ITF-ի մրցաշարերը դադարեցված են մինչև հուլիսի 14-ը։ Չեղարկվել է Ուիմբլդոնը, Ռոլան Գարոսը տեղափոխվել է սեպտեմբերի վերջ, US Open-ի անցկացման կամ էլ հետաձգման վերաբերյալ որոշում է կայացվելու մինչև հունիսի վերջ։

ATP-ն կորոնավիրուսի պատճառով պայմանավորված դադարի ընթացքում բազմաթիվ տեսանյութերով փորձում է տոնուսի մեջ պահել թենիսի երկրպագուներին։

Այս անգամ Թենիսի պրոֆեսիոնալների ասոցիացիան ներկայացրել է Մեծ սաղավարտի մրցաշարերի 20-ակի չեմպիոն Ռոջեր Ֆեդերերի լավագույն հնարք-հարվածները։

«Ամենաանհավանական հնարք պահերը»,-վերնագրված է տեսանյութը։

Թենիսի պրոֆեսիոնալների միությունն ու Կանանց թենիսային միությունը աջակցել են շվեյցարացի թենիսիստ Ռոջեր Ֆեդերերի առաջարկը, որը կայանում էր երկու կառույցները միմյանց միացնելու մեջ։

ATP-ի ղեկավար Անդրեա Գաուդենցին ասել է, որ ներկայիս ճգնաժամը հնարավորություն է տալիս ստեղծելու մեկ միասնական կառույց, որը կմեծացնի երկրպագուների ներկայությունը խաղում ու առավել մրցակցային կսարքի թենիսը մյուս մարզաձևերի համեմատ։

«Վերջին շրջանում մեր երկու կառույցների միջև առկա համագործակցությունը միայն ամրացրեց իմ վստահությունը, որ սպորտը միասնաբար ներկայացնելու դեպքում մենք կմեծացնենք մեր պոտենցիալը ու օպտիմալ կերպով այն կներկայացնենք երկրպագուներին, որոնք դիտում են խաղերը ստադիոնում, հեռուստատեսությամբ կամ էլ համացանցով։

Այդ իսկ պատճառով աջակցում եմ խաղացողների գաղափարը։ Թենիսում տղամարդկանց ու կանանց մրցաշարերի միացումը մեր ամենաուժեղ կողմերից մեկն է։ Այլ սպորտերում նման դրսևորումներ քիչ կան։ Մենք անհամբերությամբ սպասում ենք WTA-ի հետ քննարկումներին հետագա անելիքների վերաբերյալ»,-Գաուդենցիի խոսքն է մեջբերում Tennis World USA-ը։

WTA-ի ղեկավար Սթիվ Սայմոնն էլ հայտարարել է, որ ուրախ է ATP-ի հետ մշտական կապի մեջ լինելու համար։

«Վաղուց եմ ասել, որ մենք ավելի լավը կդարձնենք մեր սպորտը, եթե համատեղ աշխատենք։ Վերջին շաբաթների ընթացքում այդ փաստը հաստատվել է»,-ասել է Սայմոնը։

Հիշեցնենք, որ օրեր առաջ թենիսային երկու գլխավոր կառույցների միացման վերաբերյալ առաջարկով էր հանդես եկել Ռոջեր Ֆեդերերը։

Ֆրանսիական L’Equipe-ը շաբաթներ առաջ հրապարակեց թենիսում ամենաազդեցիկ 10 մարդկանց ցանկը։ Ցուցակը գլխավորում էր Ռոջեր Ֆեդերերը։ Այս չորեքշաբթի շվեյցարացին ապացուցեց, որ ֆրանսիական ամսագիրը չէր սխալվել։ Ֆեդերերն առանց կասկածի ամենաազդեցիկ մարդն է թենիսի աշխարհում։

Twitter-ում արված մի գրառումով Ռոջերը «փոթորկեց» թենիսային մոլորակը։

«Հետաքրքիր է՝ միայն ե՞ս եմ մտածում, որ եկել է տղամարդկանց և կանանց թենիսի միավորման ու միասին գործելու ժամանակը: Ես չեմ խոսում կորտում միմյանց հետ մրցումների մասին, այլ խոսում եմ երկու կառավարող մարմինների միացման մասին»։

Ֆեդերերի հայտարարությանը արձագանքեցին բազմաթիվ խաղացողներ, մարզիչներ, լրագրողներ։ Չուշացավ Նադալի թվիթը․

«Ռոջե՛ր, ինչպես դու գիտես մեր խոսակցություններից, ես ամբողջությամբ համաձայն եմ, որ լավ կլիներ այս համաշխարհային ճգնաժամից դուրս գալ կանանց ու տղամարդկանց թենիսի միավորումով՝ որպես մեկ կազմակերպություն»,-գրեց Ռաֆան։

Ահա այսպես, մոլորակի երկու գլխավոր թենիսիստները համաձայն են։ Նշանակում է այս ծրագիրը պետք է կյանքի կոչել։ Բայց ամեն ինչ այդքան հեշտ ու հարթ չէ, ինչպես երևում է։

Կանանց թենիսի ամենաազդեցիկ դեմքը՝ Սերենա Ուիլյամսը ևս շատ արագ արձագանքեց շրջանառվող թեմային։ Ամերիկուհին գրեց, որ նման հարց քննարկվում է ու դեռ պետք չէր դա հանրայնացնել։ Ճիշտ է՝ շատ արագ Սերենան հեռացրեց իր թվիթը։

Ի՞նչ է այս ամենը նշանակում

Թենիսում գործում են երկու առանձին կառույցներ տղամարդկանց և կանանց թենիսի համար։ ATP-ին իրականացնում է տղամարդկանց տուրը, WTA-ը՝ կանանց։ Ազդեցության առումով ATP-ն միանշանակորեն գերազանցում է WTA-ին։ Տղամարդկանց թենիսը կոմերցիոն տեսանկյունից գերազանցում է կանանց խաղին։ ATP-ում ավելի շատ են մրցումային գումարները, հովանավորները, հանդիսականներն ու այսպես շարունակ։ Մինչդեռ կանանց տուրը մեծապես տարբերվում է տղամարդկանց տուրից։

Օրինակ, եթե այս տարի ATP Tour մրցաշարերի լուսաբանման Մեդիա իրավունքների իրացումից ստացված եկամուտներն, ըստ որոշ գնահատականների, լիարժեք մրցաշրջան անցկացնելու դեպքում՝ առանց Մեծ սաղավարտի մրցաշարերը հաշվի առնելու, կկազմեին մոտ 120 մլն դոլար, ապա WTA Tour-ի մոտ այդ ցուցանիշը չէր գերազանցի 50 մլն դոլարը:

Իհարկե, այստեղ պետք է արձանագրել նաև այն փաստը, որ այս պահին տղամարդկանց թենիսում արդեն երկար տարիներ ամենաբարձր մակարդակի վրա պայքարում են բոլոր ժամանակների լավագույն երեք թենիսիստները։ Կանանց մոտ նման բան չկա։ Երկրպագուներին առավել շատ հետաքրքրում է տղամարդկանց խաղը ու պատճառը միայն «Մեծ եռյակը» չէ։

ATP-ն իր զարգացվածության առումով բավականին զորեղ կառույց է։ WTA-ի հետ համեմատելիս բերենք մի պարզագույն օրինակ։ ATP-ն սոցիալական ցանցերի իր էջերում բավական ակտիվ է։ Երկրպագուները մշտապես տոնուսի մեջ են մնում։ Տղամարդկանց տուրը ժամանակ առ ժամանակ ծանոթացնում է իր ապագա աստղերի հետ։ Թերևս սրանով է բացատրվում այն, որ տղամարդկանց թենիսի երկրպագուները Ալեքսանդր Զվերևին կամ էլ Ստեֆանոս Ցիցիպասին գիտեին մինչև իրենց հաջողություններ գրանցելը։ Մինչդեռ WTA-ում այդպես չէ։

Կորոնավիրուսային ճգնաժամը թենիսում

Պատահական չէ, որ Ֆեդերերի հայտարարությունն ու մի շարք թենիսային դեմքերի՝ այդ հայտարարությանը միանալը տեղի ունեցավ հենց այս շրջանում։ Մարզական ողջ աշխարհի համար հիմա բարդ օրեր են։ Թենիսը բացառություն չէ։ Ընդհակառակը, այստեղ խնդիրները չափազանց լուրջ են։ Չեղարկված մրցաշարեր, կորցրած գումարներ ու հասունացող ճգնաժամ։ Թվում է, թե թենիսիստը չի կարող խնդիր ունենալ, բայց դա ամենևին էլ այդպես չէ։ Աշխարհի 111-րդ ռակետ Դենիս Կուդլան օրերս հայտարարել էր, որ չի կարողանում վճարել բնակարանի վարձը։ Մինչև այս, ճիշտ է, հետևել էր Ֆեդերերի, Ջոկովիչի և Նադալի համատեղ որոշումը, որի շնորհիվ աջակցություն էր ցուցաբերվելու թոփ-100-ից այն կողմ գտնվող թենիսիստներին։

Աջակցության փաթեթ են մշակել նաև ATP-ն, WTA-ն ու թենիսային մի շարք ֆեդերացիաներ։ Սակայն հիմա ֆինանսական լրջագույն խնդիրներ են առկա նաև ATP-ում ու WTA-ում։ Միջոցառումների չեղարկումները ֆինանսական լրջագույն կորուստներ են բերել կառույցներին։ Եվ իսկապես, այս ընթացքում միասնականորեն գործելը կարող է օգնել դուրս գալ ճգնաժամից ավելի ուժեղ, քան երբևէ։

Դեմ կարծիքներ

Ռոջեր Ֆեդերերի կոչին կտրականապես դեմ էր Նիկ Կիրիոսը։ Ավստրալացին գտնում է, որ կանանց ու տղամարդկանց տուրերը չպետք է միավորվեն։

Ամերիկուհի Ջեյմի Հեմփթոնը գրառում կատարեց՝ հիշեցնելով, որ տուրերի միավորման մասին առաջինը խոսել է Բիլի Ջին Քինգը, ու դա եղել է տասնյակ տարիներ առաջ։

«Իհարկե, աջակցությունը լավ է, բայց Բիլի Ջին Քինգը առաջարկել էր սա տասնյակ տարիներ առաջ։ Իսկ նա (Ֆեդերերը/խմբ․) վերցրել ու գրել է այդ մասին իր թվիթերում։ Հիշու՞մ եք, երբ մի անգամ Թրամփը մի լրագրողի հոդված էր հրապարակել։ Ամեն ինչ շատ նման է։ Ու եթե պատմության մեջ մնա, որ տղամարդն է առաջարկել միավորել երկու տուրերը, ես պայքարելու եմ»,-գրել է Հեմփթոնը։

Հեմփթոնի ռադիկալ գրառումը, իհարկե, տեղին չէր։ Թենիսի սիրահարները գիտեն, թե ով է Ֆեդերերը։ Նա սա չի գրել, որպեսզի հիշվի պատմության մեջ՝ որպես երկու տուրերը միմյանց միացրած մարդ։ Առհասարակ, երբ Ռոջերին հարցնում են, թե ինչպե՞ս կուզես, որ մարդիկ քեզ հիշեն, համեստ լեգենդը պատասխանում է․ պարզապես որպես լավ մարդ։

Թեմային անդրադարձավ նաև լեգենդար Բիլի Ջին Քինգը։ Ռոջերի հրապարակման տակ նա մեկնաբանություն թողեց հետևյալ բովանդակությամբ․

«Ես համաձայն եմ և ասում եմ սա 1970-ականներից սկսած։ Տղամարդկանց ու կանանց միավորված ձայնը թենիսում եղել է երկար ժամանակ է իմ տեսակետը այս սպորտի համար։ WTA-ի առանձին լինելը միշտ եղել է «Պլան Բ»։ Ես ուրախ եմ, որ մենք նույն էջում ենք։ Եկե՛ք անենք դա»։

Ո՞վ կտուժի և ո՞վ կշահի

Մի կողմից երկու տուրերն էլ կշահեն, քանի որ հնարավորություն կունենան այս բարդ ժամանակահատվածում օգնել միմյանց։ Մյուս կողմից կարևոր է, որ միասնական կառույցը գլխավորի ATP-ի ղեկավար կազմը։ Տարիների ընթացքում տղամարդկանց տուրը ցույց է տվել, որ ավելի պրոֆեսիոնալ ու ժամանակակից կառույց է, քան WTA-ը։ Իհարկե, տղամարդկանց թենիսի համար կլինեն նաև խնդիրներ։ WTA-ի հետ մեկ հարթության վրա լինելը որոշակիորեն կնվազեցնի ATP-ի՝ որպես կառույցի ազդեցությունը թենիսում և համաշխարհային սպորտում։

Ամեն դեպքում մեկ բան ակնհայտ է։ Կանանց և տղամարդկանց թենիսի միավորումը տվյալ ժամանակահատվածում կարող է կորոնավիրուսային համավարակի պայմաններում արդյունավետ լուծում դառնալ բազմաթիվ հարցերի համար։ Միևնույն ժամանակ կառույցների միավորումը առաջ է բերելու թենիսային օրացույցում և առհասարակ այս սպորտում բազմաթիվ նոր իրողություններ, որոնց հետ հաշվի նստել է պետք։

Այս տարվա սկզբում քննարկվում էր տղամարդկանց և կանանց խառը մրցաշար անցկացնելու մասին, որը իր բնույթով նման էր լինելու ATP Cup-ին (այն առաջին անգամ անցկացվեց այս տարի Ավստրալիայում)։ Սա գուցե ևս մեկ քայլ է դեպի երկու կառույցների միավորումը։ Միևնույն ժամանակ պետք է արձանագրել, որ թենիսի աշխարհում երկու ամենաազդեցիկ կառույցների միավորման հարցը քննարկվում է դեռևս սոցիալական ցանցերի մակարդակով։

Արամ Սահակյան

Մեծ սաղավարտի մրցաշարերի 20-ակի չեմպիոն Ռոջեր Ֆեդերերը Twitter-ի իր էջում կոչ է արել թենիսի երկու ամենաազդեցիկ կառույցներին՝ ATP-ին ու WTA-ին միավորվել այս բարդ օրերին։

«Հետաքրքիր է՝ միայն ե՞ս եմ մտածում, որ եկել է տղամարդկանց և կանանց թենիսի միավորման ու միասին գործելու ժամանակը:

Ես չեմ խոսում կորտում մրցումների մասին, այլ խոսում եմ երկու կառավարող մարմինների միացման մասին»,-գրել է Ռոջերը։

Շվեյցարացու հայտարարությանն արդեն արձագանքել են Պատրիկ Մուրատողլուն, Սիմոնա Հալեպը և ուրիշներ։

Տղամարդկանց թենիսի միցոցառումները իրականացվում է Պրոֆեսիոնալ թենիսիստների ասոցիացիայի (ATP) կողմից, մինչդեռ կանանցը՝ Կանանց թենիսի ասոցիացիայի (WTA) կողմից։

Չինաստանի Ուհան քաղաքում նախորդ տարվա վերջում բռնկված նոր տիպի կորոնավիրուսը խառնեց բոլորի պլանները։ COVID-19-ի տարածումը կանխարգելելու նպատակով աշխարհում բազմաթիվ միջոցառումներ են չեղարկվում կամ էլ հետաձգվում։ Տնտեսության, առողջապահության ու զբոսաշրջության ոլորտները կաթվածահար են գրեթե բոլոր երկրներում։

Այս ամենից չափազանց մեծ չափաբաժնով տուժում է նաև սպորտը։ Մարզական աշխարհը բառիս բուն իմաստով կանգնած է։ Չեղարկումներն ու հետաձգումները միանշանակորեն չեն ընկալվում մարզիկների ու մասնավորապես երկրպագուների կողմից։ Այս ամենը հիշեցնում է երկար ու մութ մի թունել, որի վերջի լույսը դեռ չի երևում։

Բարի օր, բարի գալուստ։ Նախ առողջություն բոլորիս և ուժ այս բարդ ու տարօրինակ օրերին։ Աշխարհի որ ծայրում էլ լինես, հիմա ամեն ինչ այլ է։ Այսօր կփորձենք հասկանալ, թե կորոնավիրուսի կանխարգելման նպատակով չեղարկված ու հետաձգված թենիսային մրցաշարերը ինչ ազդեցություն են ունենալու սպորտի վրա։ Եվ իհարկե, կխոսենք Ռոլան Գարոսի մասին, որի հետաձգումը շիլաշփոթ է առաջացրել թենիսային տարվա առանց այն էլ փոթորկված օրացույցում։

Այսպես, կորոնավիրուսի կանխարգելման նպատակով ATP-ն և WTA-ը որոշեցին չեղարկել մինչև ապրիլի 27-ը նախատեսված բոլոր մրցաշարերը։ Արդեն երեկ թենիսի գլխավոր երկու գերատեսչությունները նոր որոշում ընդունեցին, որի համաձայն՝ չեղարկվում են մինչև հունիսի 7-ը նախատեսված բոլոր մրցաշարերը։ Սա նշանակում է, որ մրցաշրջանի գրունտի հատվածը չի կայանա։

Չեղարկվել են տարվա գլխավոր իրադարձություններն ի դեմս Մայամիի, Ինդիան Ուելսի, Մոնտե Կառլոյի, Մադրիդի ու Հռոմի Մասթերսները։ Ոչ մի թենիս մինչև հունիս։

Ինչու՞ հիմա չեղարկել մինչև հունիս

ATP-ի և WTA-ի երեկվա համատեղ որոշումը ինչ-որ չափով զարմանալու տեղիք տվեց։ Այո՛, կորոնավիրուսի համավարակը տարածվում է լայն թափով, բայց միևնույն ժամանակ աշխարհի գրեթե բոլոր երկրները արագ քայլեր են ձեռնարկում դրա տարածումը կանխարգելելու համար։ Բացառված չէ, որ մայիսի սկզբին ունենանք իրավիճակ, երբ մրցաշարերը կարող էին անցկացվել՝ թեկուզ առանց հանդիսականների։

Ամեն դեպքում թենիսային գերատեսչությունները գնացին այս որոշմանը, ու գուցե ժամանակը ցույց տա, որ սա լավագույնն էր։ Եթե համեմատական զուգահեռներ տանենք ֆուտբոլի հետ, ապա կտեսնենք, որ ֆուտբոլում հետաձգումներ են եղել ազգային առաջնություններում։ Հույս կա վերսկսել առաջնություններն ու եվրագավաթները մայիսի սկզբին։ Բայց թենիսում արդեն կա հստակ որոշում, որ գարնանը մրցաշարեր ընդհանրապես չեն լինելու։

Վարկանիշային աղյուսակը կսառեցվի

ATP-ի և WTA-ի վարկանիշային աղյուսակներն այս ընթացքում կսառեցվեն։ Սա նշանակում է, որ խաղացողները նախորդ տարի մասնակցած մրցաշարերի համար վաստակած միավորները չեն կորցնի։ Սա ճիշտ որոշում էր։ Տրամաբանական չէ միավոր կորցնել մրցաշարերի համար, որին դու չես մասնակցում այն պատճառով, որ դրանք չեղարկվել են։

Իհարկե, այս ամենի մեջ կան խաղացողներ, ովքեր մեծապես շահեցին։ Խոսքը այն թենիսիստների մասին է, ովքեր ներկա պահին վնասվածք ունեն ու ապաքինվում են։ Նրանք այսպես, թե այնպես միավորներ էին կորցնելու, բայց սառեցված վարկանիշի պայմաններում դա տեղի չի ունենա։ Օրինակ, Ռոջեր Ֆեդերերը, անկախ ամեն ինչից, կորտ էր վերադառնալու միայն հունիսին ու նախնական հաշվարկներով մոտ 3000 միավոր էր կորցնելու։ Այդ պարագայում շվեյցարացին իջնելու էր 8-րդ հորիզոնական, մինչդեռ հիմա մնալու է 4-րդ տեղում։

Ռոլան Գարոսի հետաձգումն ու ստեղծված շիլաշփոթը

Ռոլան Գարոսի տնօրենը մի քանի անգամ հայտարարեց, որ նրանք դեռևս չեն քննարկում հետաձգման տարբերակը։ «Մենք քննարկելու ենք Ֆրանսիայի Թենիսի ֆեդերացիայի հետ և հետևելու ենք կառավարության խորհուրդներին»,-ասում էր նա։ Ու մեկ էլ հանկարծ ամեն բան գլխիվայր շրջվում է։ Կորոնավիրուսի կանխարգելման նպատակով Ռոլան Գարոսը հետաձգվում է։ Այն կայանալու է սեպտեմբերի 20-ից հոկտեմբերի 4-ը։

Այս նորությունը ալեկոծեց թենիսային ոչ պակաս ալեկոծված աշխարհը։ Նախ, Ռոլան Գարոսն ու Ֆրանսիայի թենիսի ֆեդերացիան այս որոշումը կայացրել են առանց այն քննարկելու ATP-ի WTA-ի, ինչպես նաև թենիսիստների հետ։ Սա անարգանք է բոլորի նկատմամբ։ Ո՛չ Tennis Australia-ն, ո՛չ Միացյալ Նահանգների թենիսի ֆեդերացիան տեղեկություն չեն ունեցել հետաձգման մասին։ Սա, իհարկե, աբսուրդ է։ Հատկանշական է, որ Ֆրանսիայի թենիսի ֆեդերացիայի նախագահի խոսքով՝ նրանք հարցը քննարկել են Ռաֆայել Նադալի հետ։

Ռոլան Գարոսը նշանակվեց US Open-ի ավարտից ընդամենը մեկ շաբաթ անց։ Սա սարսափելի սցենարներ է ենթադրում։ Թենիսիստների համար չափազանց բարդ է լինելու մեկ շաբաթվա դադարով Մեծ սաղավարտի երկու մրցաշար խաղալ։ Այստեղ կա նաև Միացյալ Նահանգներից Եվրոպա վերադառնալու խնդիրը, ժամային գոտիների խնդիրը և, վերջիվերջո, թենիսային մակերևույթի խնդիրը։ Այդքան էլ հեշտ չէ մեկ շաբաթում հարդը փոխարինել գրունտով։

Շատ փորձագետներ գտնում են, որ մի շարք թենիսիստներ հրաժարվելու են կամ US Open-ից կամ Ռոլան Գարոսից, քանզի երկուսին էլ մասնակցելը այդքան էլ իրատեսական չի թվում։ Բայց սա դեռ ամենը չէ։ Ռոլան Գարոսի նախանշած ժամանակահատվածում կան ATP-ի և WTA-ի մրցաշարեր, որոնց հետ գոնե պետք էր քննարկել որոշումն ընդունելուց առաջ։ Ինչպե՞ս կվարվի ATP-ն ու WTA-ը՝ դժվար է ասել։

Անկոտրուն Laver Cup-ն ու պոտենցիալ մասնակիցները

Եվս մեկ ենթադրյալ սկանդալ։ Սեպտեմբերի 25-ից 27-ը Միացյալ Նահանգների Բոստոն քաղաքում կայանալու է Laver Cup-ի 4-րդ մրցաշարը։ Ռոջեր Ֆեդերերի ստեղծած այս թենիսային տոնը վերջին տարիներին դարձել է օրացույցի գլխավոր զարդերից մեկը երկրպագուների համար։ Ռոլան Գարոսի հետաձգումից հետո Laver Cup-ի մամուլի ծառայությունը հանդես եկավ հայտարարությամբ՝ հասկացնելով բոլորին, որ մրցաշարը չի հետաձգվելու։ Բոլոր տոմսերը վաճառված են ու այն կայանալու է նախօրոք նշված ժամանակահատվածում։

Laver Cup-ը համագործակցում է Tennis Australia-ի և USTA-ի (ԱՄՆ-ի թենիսի ֆեդերացիա) հետ։ Սա յուրատեսակ բողոքի դրսևորում էր մրցաշարի, ինչու չէ նաև ամենաազդեցիկ երկու ֆեդերացիաների կողմից, որոնք իրականացնում են մյուս Grand Slam-երից երկուսի կազմակերպումը։ Եթե Laver Cup-ը չհետաձգվի, ակնհայտ է, որ Ռոլան Գարոսում չենք տեսնի Ռոջեր Ֆեդերերին ու ևս 9 հոգու։ Դրանց թվում վստահորեն կարող ենք նշել Նիկ Կիրիոսին, ով ատում է գրունտի վրա խաղալը։ Նաև այստեղ կարող են հայտնվել թենիսիստներ, ովքեր US Open-ից հետո ռիսկի չեն դիմի իրենց մարմինների հետ, կմնան ԱՄՆ-ում ու գերազանց ժամանակ կանցկացնեն։

Ամեն դեպքում Laver Cup-ը ֆանտաստիկ մթնոլորտ է ապահովում։ Հատկանշական է, որ նման պարագայում Ռոլան Գարոսի օրերին Փարիզում չեն լինի նաև թենիսի լեգենդներից Ռոդ Լեյվերը, Ջոն Մաքենրոյը և Բյորն Բորգը, ովքեր մեծ դերակատարում ունեն Laver Cup-ում։ Ամեն դեպքում ես անձամբ չեմ բացառում, որ Laver Cup-ը կարող է տեղափոխվել օրինակ հոկտեմբեր։ Պետք է համագործակցային բնույթի որոշում կայացնել։

Ուիմբլդոնն ու US Open-ը ԴԵՌ չեն հետաձգվում

Մասթերսների չեղարկումը մի կերպ կարող ենք հասկանալ, բայց բարդ է պատկերացնելը, որ մրցաշրջանը կանցնի առանց Ուիմբլդոնի կամ էլ US Open-ի։ Մրցաշարի կազմակերպիչները Ռոլան Գարոսի հետաձգումից հետո հանդես եկան հայտարարությամբ։ Ուիմբլդոնում դեռևս մտադիր չեն հետաձգել մրցաշարը։ Սակայն ուշադրությամբ հետևում են կորոնավիրուսի տարածմանը թե՛ Մեծ Բրիտանիայում, թե՛ Եվրոպայում։ US Open-ը առայժմ մտադիր են անցկացնել օգոստոսի 24-ից սեպտեմբերի 13-ը, ինչպես նախանշված է։

Եզրակացություն․ Կա մեծ հույս, որ COVID-19-ը առաջիկա ամիսների ընթացքում կնահանջի ու մեր բնականոն կյանքը կվերադառնա։ Ամեն դեպքում մեկ բան ակնհայտ է․ 2020 թվականի մրցաշրջանը թե՛ թենիսում, թե՛ այլ մարզաձևերում հիշվելու է միշտ։ Թերևս երբեք մեկ օրացույցային տարում չեն լինի այսքան չեղարկված մրցաշարեր, հետաձգումներ։

Առողջությու՛ն բոլորիս։

Արամ Սահակյան

Թենիսի պրոֆեսիոնալների միությունը հայտարարել է բոլոր միջոցառումները վեց շաբաթով դադարեցնելու մասին։

Կորոնավիրուսի պատճառով մինչև ապրիլի 27-ը թենիսի ոչ մի մրցաշար չի կայանա, այդ թվում Մայամիի և Մոնտե Կառլոյի Մասթերսները։

«Սա որոշում է, որը մենք ընդունել ենք դժվարությամբ։ Սա մեծ կորուստ է մեր մրցաշարերի, խաղացողների և երկրպագուների համար»,-ասված է հայտարարության մեջ։

Առողջապահության Համաշխարհային կազմակերպությունը երեկ կորոնավիրուսը հայտարարեց պանդեմիա։ Հետաձգվել կամ չեղարկվել են սպորտային մի շարք միջոցառումներ։