#ֆրանսիայի-հավաքական — Armsport.am

Զիդանն առաջին անգամ հրապարակել է Ֆրանսիայի հավաքական հրավիրված խաղացողների ցանկն առաջիկա հանդիպումների համար

Suren Sahakyan — Fri, 18 Sep 2026 17:23:03 +0000

Հայտնի է դարձել Ֆրանսիայի ազգային հավաքականի հայտացուցակն աշնանային միջազգային դադարի շրջանակում կայանալիք հանդիպումների համար։ Այս խաղերը կլինեն առաջինը թիմի նորանշանակ գլխավոր մարզիչ Զինեդին Զիդանի գլխավորությամբ։

Լեգենդար մասնագետն ազգային թիմ է հրավիրել հետևյալ ֆուտբոլիստներին․

Դարպասապահներ. Մայք Մենյան («Միլան»), Գիյոմ Ռեստ («Թուլուզ»), Ռոբեն Ռիսեր («Ռեն»)։

Պաշտպաններ. Էնդի Դիուֆ («Ինտեր»), Դայո Ուպամեկանո («Բավարիա»), Պիեռ Կալուլու («Յուվենտուս»), Ժյուլ Կունդե («Բարսելոնա»), Ժերեմի Ժակե («Լիվերպուլ»), Մաքսանս Լակրուա («Չելսի»), Իբրահիմա Կոնատե («Ռեալ Մադրիդ»), Ադրիեն Տրյուֆեր («Բորնմուտ»)։

Կիսապաշտպաններ. Էդուարդո Կամավինգա («Ռեալ Մադրիդ»), Լուկաս Դա Կունյա («Կոմո»), Ռայան Շերկի («Մանչեսթեր Սիթի»), Մանու Կոնե («Ռոմա»), Ուորեն Զաիր-Էմերի (ՊՍԺ), Ադրիեն Ռաբիո («Միլան»)։

Հարձակվողներ. Ուսման Դեմբելե (ՊՍԺ), Կիլիան Մբապե («Ռեալ Մադրիդ»), Մայքլ Օլիսե («Բավարիա»), Բրեդլի Բարկոլա («Լիվերպուլ»), Էստեբան Լեպոլ («Ռեն»), Դեզիրե Դուե (ՊՍԺ)։

Մոտ ժամանակներս ֆրանսիացիներն իրենց անդրանիկ հանդիպումները կանցկացնեն Զիդանի ղեկավարությամբ, որն ազգային թիմի գլխավոր մարզչի պաշտոնը ստանձնել է այս տարվա ամռանը։ ՈւԵՖԱ-ի Ազգերի լիգայի խաղարկության շրջանակում «եռագույնները» կմրցեն Թուրքիայի, Բելգիայի (երկու անգամ) և Իտալիայի հավաքականների դեմ։

Ռամին հայտնել է, որ չի վաճառել ԱԱ-2018-ի ոսկե մեդալը

Նարե Հովհաննիսյան — Fri, 29 May 2020 05:51:00 +0000

Ֆրանսիայի հավաքականի նախկին ֆուտբոլիստ, «Սոչիի» պաշտպան Ադիլ Ռամին հայտնել է, որ աճուրդում չի վաճառել աշխարհի 2018 թվականի առաջնության ոսկե մեդալը:

«Իմ մեդալը մինչև հիմա իմ տանն է: Պահում եմ սնդուկում՝ իմ մյուս մրցանակների հետ»,- գրել է Ռամին Instagram-ում:

Ավելի վաղ հաղորդվում էր, որ Ֆրանսիայի հավաքականի ֆուտբոլիստներից մեկը 66 հազար եվրոյով վաճառել է իր ոսկե մեդալը աճուրդում: Ընդ որում, ֆուտբոլիստի անունը չէր բացահայտվում:

Հիշեցնենք՝ աշխարհի 2018 թվականի առաջնությունը կայացել է Ռուսաստանում: Ֆրանսիայի հավաքականը եզրափակչում հաղթել է Խորվաթիային՝ 4-2 հաշվով: Հաղթողների կազմում գոլեր են հեղինակել Անտուան Գրիզմանը, Պոլ Պոգբան, Կիլիան Մբապեն, ևս մեկ գոլ սեփական դարպասն ուղարկել է խորվաթ հարձակվող Մարիո Մանջուկիչը:

Խորվաթիայի հավաքականի կազմում գոլեր են խփել Իվան Պերիշիչն ու Մանջուկիչը:

Ինչպես Ջորկաեֆը գրավեց Գալաթասարայի դարպասն ու հետո հրաժարվեց մեկնել Ստամբուլ՝ Թուրքիայի հետ ընկերական խաղին

Նարե Հովհաննիսյան — Fri, 24 Apr 2020 11:03:13 +0000

Ֆրանսահայ լեգենդար ֆուտբոլիստ, աշխարհի ու Եվրոպայի չեմպիոն Յուրի Ջորկաեֆի կյանքում իր ուրույն տեղն ու նշանակությունն ունի իր պատմական հայրենիքն ու այն ամենն, ինչ կապված է Հայաստանի հետ:

Հայոց Ցեղասպանության 105-րդ տարելիցի կապակցությամբ առաջարկում ենք վերհիշել Ջորկաեֆի կյանքից մի քանի դրվագ, որոնք լավագույնս արտացոլում են լեգենդար հայի անհանդուրժողականությունը՝ հայ ժողովրդի հանդեպ իրականացված ամենադաժան ոճրագործությանը:

Ջորկաեֆին, թերևս, սիրել ու սիրում են ամենուր, միայն ոչ՝ Թուրքիայում: 1998 թվականի օգոստոսին պաշտոնական Անկարան նույնիսկ հայտարարեց, որ աշխարհի հավաքականի կազմում Յուրի Ջորկաեֆի՝ Թուրքիա ժամանելը ցանկալի չէ. իսկ այցի նպատակը լինելու էր Թուրքիայի հավաքականի հետ ընկերական խաղը՝ նվիրված Թուրքիայի Հանրապետության կազմավորման 75-ամյակին: Ջորկաեֆին, ամեն դեպքում, ընդգրկեցին աշխարհի հավաքականի կազմում, ինչն Անկարան որպես անձնական վիրավորանք ընդունեց:

Ճիշտ է՝ Ջորկաեֆը, որն ակտիվորեն օգտագործում էր իր հնարավորությունները Հայոց ցեղասպանության միջազգային ճանաչման գործում, հայտարարեց, որ ինքն անձամբ չի ցանկանում մեկնել Ստամբուլ՝ ցուցադրական խաղին մասնակցելու համար, և չմեկնեց: Նույնը տեղի ունեցավ նաև 2 տարի անց, երբ Յուրին հրաժարվեց Ֆրանսիայի հավաքականի կազմում մասնակցել թուրքերի հետ ընկերական խաղին, իսկ մոտ 3 ամիս անց աշխարհի մեկ այլ չեմպիոն Ալեն Բոգոսյանի հետ շնորհակալություն հայտնեց Ֆրանսիային՝ Հայոց ցեղասպանությունը պաշտոնապես ճանաչելու համար:

Իսկ Թուրքիայի՝ Ջորկաեֆի հանդեպ «ատելությունը» գալիս է դեռ ՈՒԵՖԱ-ի Գավաթի 1993/94 մրցաշրջանի խմբային մրցաշարից, երբ Յուրին, հանդես գալով «Մոնակոյի» կազմում, գրավեց «Գալաթասարայի» դարպասն ու խաղից հետո հայտարարեց, որ դա իր պատասխանն էր թուրքերի կողմից դարասկզբին իրականացրած վայրագություններին:

Անկասկած, Թուրքիայում դա չմոռացան:

Բոլոր ժամանակների Ֆրանսիայի խորհրդանշական հավաքականը

Վարուժան Բաբայան — Sun, 19 Apr 2020 11:27:00 +0000

L’Equipe- ի ֆրանսիական հրատարակությունն իր ընթերցողներին առաջարկել է կազմել բոլոր ժամանակների Ֆրանսիայի խորհրդանշական հավաքականը: Երկրպագուներին առաջարկվել է յուրաքանչյուր դիրքի համար 4 խաղացողի տարբերակ՝ ընդհանուր առմամբ 44 խաղացող, որոնցից ընտրվել է 11-ը:

Բոլոր ժամանակների Ֆրանսիայի խորհրդանշական հավաքականն արդյունքնում ստացվել է այսպիսին․ Ֆաբիեն Բարտեզ, Լիլիան Թյուրամ, Լորան Բլան, Մարսել Դեսայի, Բիքսան Լիզարազյու, Դիդյե Դեշամ, Պատրիկ Վիեյրա, Միշել Պլատինին, Կիլիան Մբապե, Զինեդին Զիդանը, Թիերի Անրին:

Գրիզման. Եթե պատասխանեմ Բենզեմայի խոսքերին Ժիրուի մասին, խնդիրներ կունենամ

Նարե Հովհաննիսյան — Thu, 02 Apr 2020 10:27:58 +0000

«Բարսելոնայի» ֆրանսիացի հարձակվող Անտուան Գրիզմանը մեկնաբանել է Մադրիդի «Ռեալի» հարձակվող Կարիմ Բենզեմայի շուրջ ստեղծված իրավիճակը. որը, պատասխանելով իր նախկին թիմակից Օլիվյե Ժիրուի մասին հարցին, ասել է. «Ֆորմուլա-1-ը մի շփոթեք կարտինգի հետ»:

«Ես չեմ կարող պատասխանել Բենզեմայի խոսքերին Ժիրուի մասին, ես խնդիրներ կունենամ: Ինձ դուր է գալիս Ժիրուն, նա լավ խաղացող է ու օգնել է Ֆրանսիայի հավաքականին հաղթել աշխարհի առաջնությունում: Դա կարևոր է»,- Գրիզմանի խոսքերն է փոխանցում A Bola-ն:

2015 թվականից Ֆրանսիայի հավաքականի գլխավոր մարզիչ Դիդյե Դեշամը Բենզեմային չի հրավիրում թիմ: Պատճառը ֆուտբոլիստի՝ Մաթյո Վալբուենայի շանտաժի հետ ունեցած կապն է: _Օլիվյե Ժիրուն, իր հերթին, 2018 թվականին դարձել է աշխարհի չեմպիոն:

Մահացել է Ֆրանսիայի հավաքականի նախկին գլխավոր մարզիչը

Erik — Thu, 26 Mar 2020 19:43:36 +0000

Մահացել է ֆուտբոլի Ֆրանսիայի հավաքականի նախկին գլխավոր մարզիչ Միշել Իդալգոն:

Նախորդ կիրակի օրը լրացել էր Իդալգոյի 87-ամյակը: Իդալգոյի հարազատներից մեկի խոսքով, նախկին մարզչի մահվան մեջ կորոնավիրուսը դեր չունի:

Իդալգոն, որպես ֆուտբոլիստ, «Մոնակոյի» կազմում անցկացրել է 300-ից ավելի հանդիպում՝ այդ ընթացքում 2 անգամ դառնալով երկրի չեմպիոն ու մեկ անգամ էլ նվաճելով երկրի գավաթը:

1984 թ-ին, որպես Ֆրանսիայի հավաքականի գլխավոր մարզիչ, դարձել է Եվրոպայի չեմպիոն, իսկ «Մարսելի» ղեկին 3 անգամ դարձել է Ֆրանսիայի չեմպիոն:

Կյանքից հեռացել է Ֆրանսիայի հավաքականի նախկին գլխավոր մարզիչը

Erik — Thu, 26 Mar 2020 16:35:00 +0000

Ֆրանսիայի հավաքականի նախկին գլխավոր մարզիչ Միշել Իդալգոն կնքել է իր մահկանացուն, տեղեկացնում է France Football-ը:

87-ամյա մասնագետի մահվան պատճառը չի հայտնվում:

Իդալգոն Ֆրանսիայի հավաքականը գլխավորել է 1976-84 թվականներին: Նրա գլխավորությամբ «կապույտները» հաղթել են Եվրո 1984-ը:

Հետագայում, Իդալգոն մարզել է «Մարսելը», որի հետ 3 անգամ նվաճել է չեմպիոնի տիտղոսը և մեկ անգամ ՝ Ֆրանսիայի գավաթը:

Ֆրանսիայի հավաքականը առաջիկա ընկերական խաղերը կանցկացնի առանց հանդիսականների

Erik — Tue, 10 Mar 2020 19:24:11 +0000

Ֆրանսիայի ֆուտբոլի ազգային հավաքականը առաջիկա հանդիպումները կանցկացնի առանց երկրպագուների ներկայության:

Ֆրանսիայի ֆուտբոլի ֆեդերացիան հայտարարել է, որ Ուկրաինայի ու Ֆինլանդիայի դեմ առաջիկա ընկերական խաղերի ժամանակ տրիբունաները կլինեն դատարկ:

Երկրպագուները, որոնք տոմս են ձեռք բերել, հետ կստանան տոմսերի դիմաց վճարած գումարները:

Ֆրանսիայի ֆուտբոլի ֆեդերացիայի նախագահ․ Եթե Զիդանը ազատ լինի Դեշամի հեռանալու ժամանակ, նա կդառնա հավաքականի մարզիչը

Erik — Thu, 23 Jan 2020 19:22:00 +0000

Ֆրանսիայի ֆուտբոլի ֆեդերացիայի նախագահ Նոել Լե Գրաեն ուշագրավ հայտարարությամբ է հանդես եկել՝ նշելով, թե ով է լինելու աշխարհի գործող չեմպիոնների հաջորդ գլխավոր մարզիչը։

«Երբ Դեշամը որոշի հեռանալ հավաքականից, մենք նրա պայմանագիրը չենք թարմացնի։ Եթե Զիդանը այդ ժամանակ ազատ լինի, նա կլինի այն մարդը, ով կանցնի աշխատանքի հավաքականում»,-Ֆրանսիայի ֆուտբոլի ֆեդերացիայի նախագահի խոսքերն է մեջբերում Fox Sports-ը։

Զինեդին Զիդանը ներկա պահին գլխավորում է Մադրիդի «Ռեալը»։ «Արքայական» ակումբի հետ Զիդանը 10 տիտղոս է նվաճել։

Դիդիե Դեշամը 2018 թվականին Ֆրանսիայի հավաքականի հետ հռչակվել է աշխարհի չեմպիոն։

ԵՎՐՈ 2020. Կհաջողվի՞ Ֆրանսիային կրկնել 20 տարվա վաղեմության ոսկե դուբլը (Մաս 2)

Erik — Fri, 17 Jan 2020 06:57:00 +0000

Armsport.am-ը շարունակում է անդրադառնալ Եվրո-2020-ի եզրափակիչ փուլի ուղեգիր նվաճած հավաքականներին: Մենք ներկայացնում ենք նրանց անցած ճանապարհը, հնարավորություններն ու կազմի խորությունը:

Այս անգամ կանդրադառնանք համաշխարհային ֆուտբոլի հզոր հավաքականներից մեկին: 2016 թ-ի Եվրոպայի առաջնության եզրափակչում նույնիսկ Կրիշտիանու Ռոնալդուի վնասվածքը չօգնեց ֆրանսիացիներին՝ նվաճելու չեմպիոնական տիտղոսը: Սեփական հարկի տակ կայացած առաջնության խմբային փուլը ֆրանսիացիները դժվարությամբ հաղթահարեցին՝ կորզելով հաղթանակները միայն մրցավարի կողմից ավելացված ժամանակում: Փլեյ-օֆֆում ամեն ինչ ավելի հարթ էր: Սակայն եզրափակչում՝ լրացուցիչ ժամանակում, Էդերի հեռահար կրակոցը «Ստադ դե Ֆրանսը» լռեցրեց: Ստադիոնը լռեց նաև Մարկ Կլատենբուրգի եզրափակիչ սուլիչից հետ, որն ազդարարեց Պորտուգալիայի չեմպիոնությունը. ախր նրանք այդքա՜ն սպասել էին…

Այդ առաջնությունից հետո մենք տեսանք ավելի հավասարակշռված ու զորեղ Ֆրանսիա: Եթե Եվրո-2016-ում շատ բան կախված էր Պայեի խաղից, ապա առաջնությունից հետո հավաքականում սկսեց գերիշխել թիմային ֆուտբոլը: Դիդիե Դեշամն էլ ավելի հզորացրեց հավաքականն ու մեկնեց Ռուսաստան՝ ֆավորիտի կարգավիճակով:

Ֆրանսիան ամբողջ առաջնության ընթացքում ֆենոմենալ ֆուտբոլ խաղաց ու արժանիորեն նվաճեց աշխարհի գավաթը:

Եվրո-2020-ի ընտրական փուլը Ֆրանսիան անցավ մեկ շնչով` 10 խաղում վաստակելով 25 միավոր: Ճակատագրի հեգնանքով Եվրո-2020-ի եզրափակիչ հատվածի խմբային փուլում Եվրո-2016-ի եզրափակչի 2 մասնակիցները հայտնվեցին նույն խմբում: Սա դեռ բավարար չէր, նրանց էլ միացավ Գերմանիան, իսկ 4-րդ մասնակիցը դեռ պարզ չէ:

Այն, որ կենաց մահու պայքար է լինելու՝ փաստ է:

Փորձենք հասկանալ, թե ինչ վիճակում է գտնվում Ֆրանսիայի հավաքականն ու ինչ հնարավորություններ ունի առաջիկա առաջնությունում:

Հիմնական դարպասապահ Լյորիսը վնասվածք ունի ու շարք վերադառնալու ժամկետը դեռ հստակ պարզ չէ: Մինչև մրցաշարի մեկնարկը նա ապաքինված կլինի ու, ըստ ամենայի, հենց նա էլ կլինի հիմնական դարպասապահը: Հավաքականում կլինեն նաև Արեոլան ու Մանդանդան, բայց Արեոլան մշտական խաղաժամանակ չի ստանում «Ռեալում», իսկ Մանդանդան լավագույն տարբերակը չէ:

Պաշտպանությունում Դեշամը լայն ընտրության հնարավորություն կունենա, եթե բոլորը կազմ ու պատրաստ լինեն: Կենտրոնում, ըստ ամենայնի, կտեսնենք Վարան-Ումտիտի զույգը, չնայած կա նաև Կիմպեմբեի ու Լանգլեի տարբերակը: Կուրտ Զուման հաջող մրցաշրջան է անցկացնում և նա կարող է հաջող փոխարինող լինել: Եզրերում Դինն ու Պավարը կլինեն: Չի բացառվում նաև Մենդիի ու Հերնանդեսի՝ մեկնարկային կազմում հայտնվելը:

Կիսապաշտպանությունում մի փոքր բարդ է՝ հաշվի առնելով Պոլ Պոգբայի շուրջ ստեղծված անհասկանալի իրավիճակը: Պոգբան վերջին 4 ամսում 2 անգամ է դաշտ դուրս եկել: Պատճառը վնասվածքն է, բայց կա նաև ակումբում չմնալու ցանկություն: Եթե առաջիկա 15 օրում չլուծվի նրա տրանսֆերային խնդիրը, Պոգբան կարող է Դեշամի «աչքից ընկնել», բայց այնպես չէ, որ Պոգբայի կորուստը կարող է անդառնալի լինել: Կենտրոնում կարող են հաջողությամբ համագործակցել Կանտեն ու Տոլիսոն: Նրանց կարող է օգնել նաև երիտասարդ Գենդուզին: Անտուան Գրիզմանն այս պահին այն մարզավիճակը չունի, որն ուներ աշխարհի առաջնության ժամանակ, բայց նա ևս հավաքականի կարևորագույն խաղացողներից մեկն է: Իսկ առջևի գծում շատ բան կախված է լինելու հավաքականի առաջատարից՝ Մբապեից: Մբապեն ՊՍԺ-ի կազմում առաջնության հաջող հատված է անցկացնում և դեռ մրցաշարի մեկնարկին 4 ամիս կա ու այդ ընթացքում կարող է մոտենալ իր լավագույն մարզավիճակին: Օպտիմալ մարզավիճակում գտնվող Մբապեն ահ ու սարսափ է ցանկացած պաշտպանության համար:

Ժիրուն «Չելսիում» կայուն խաղաժամանակ չի ստանում, բայց եթե արտառոց ոչինչ չլինի, կլինի հավաքականի կազմում: Մբապեին եզրերից կարող են օգնել Կոմանն ու Բեն Յեդերը: Վերջինս «Մոնակոյի» կազմում արդյունավետ մրցաշրջան է անցկացնում: Նաբիլ Ֆեկիրը, տեղափոխվելով «Բետիս», արդյունավետության անկում է ունեցել, բայց նա ևս շարունակում է հավաքականի կազմում իր տեղը ունենալ: Հարձակմանը կարող է մեծ օգուտ բերել նաև Տոմա Լեմարը:

Համոզվեցինք, որ Ֆրանսիան հզոր կազմ ունի ու միանշանակ լինելու է հաղթողի գլխավոր հավակնորդներից մեկը, եթե ոչ՝ գլխավորը: Դեշամն էլ շարունակում է իր մարզչական վերելքը ու կարելի է վստահ լինել, որ Եվրո-2020-ի զարդերից մեկը հենց Ֆրանսիան է լինելու:

Արմեն Գարամյան

Շարքի նախորդ մասերը

Գործող չեմպիոնի՝ Պորտուգալիայի կազմի խորությունն ու հնարավորությունները