#ֆուտզալ — Armsport.am

Չեմպիոնների լիգայի եզրափակիչի անցկացումը ցատկահարթակ է հայկական ֆուտզալի համար. Գևորգ Ղազարյան

Erik — Thu, 11 Apr 2024 16:39:41 +0000

Նախորդ տարվա դեկտեմբերի 12-ին ՈՒԵՖԱ-ի Գործադիր կոմիտեի որոշմամբ Երևանն ընտրվեց ՈՒԵՖԱ Ֆուտզալի Չեմպիոնների Լիգայի 2024 թվականի եզրափակիչ փուլը հյուրընկալող մայրաքաղաք։ Հայաստանի ֆուտբոլի ֆեդերացիայի հայտը հաղթող է ճանաչվել Հունաստանի, Լիտվայի, Լեհաստանի, Իսպանիայի և Շվեյցարիայի ֆուտբոլի ֆեդերացիաների հետ մրցակցությունում: Իսկ այս տարվա մարտի 14-ին Կարեն Դեմիրճյանի անվան մարզահամերգային համալիրում էլ կայացավ կիսաեզրափակիչների վիճակահանությունը: Մայիսի 3-ին առաջին կիսաեզրափակիչում կխաղան իսպանական «Բարսելոնան» և պորտուգալական «Սպորտինգը», մյուսում՝ պորտուգալական «Բենֆիկան» և իսպանական «Մալյորկան»: Եզրափակիչն ու երրորդ տեղի խաղը կկայանա մայիսի 5-ին։

Հայաստանում այս մակարդակի միջոցառում թիմային սպորտաձևում դեռևս չի անցկացվել։ Հայաստանի ֆուտբոլի ֆեդերացիայում վստահ են՝ Ֆուտզալի Չեմպիոնների լիգայի եզրափակիչ հյուրընկալումը կարող է նպաստել մեր երկրում սպորտաձևի զարգացմանը։ ArmSport-ը զրուցել է ՀՖՖ հասարակայնության հետ կապերի և լրատվության աշխատակից Գևորգ Ղազարյանի հետ, որը համակարգելու է ՈՒԵՖԱ ֆուտզալի Չեմպիոնների Լիգայի եզրափակչի ընթացքում տեղական մեդիայի աշխատանքը։

Ինչպե՞ս ստացվեց, որ ՀՖՖ-ն ձեռք բերեց պայմանավորվածություն Ֆուտզալի Չեմպիոնների լիգան Երևանում անցկացնելու վերաբերյալ։

— Իրականում նման միջոցառումների անցկացման ընթացակարգն ավելի քան հասարակ է: Երևելի բան չկար` դիմում ենք ներկայացրել, ու մեր հայտը հաստատել են: Սա հենց այդպիսի դեպքերից է, երբ ամեն ինչ առաջին հայացքից պարզ է թվում: Ամենակարևոր դերը խաղացել է այն, որ ֆուտզալի Հայաստանի ազգային հավաքականը հաջողություններ է գրանցել: Տեսնում ես, որ մարդկանց շրջանում ամեն օր ավելի է մեծանում հետաքրքրությունը ֆուտզալի նկատմամբ: Քանի որ կա ոգևորություն, ակամայից ցանկություն է առաջանում այդ ոգևորությունը սնել կողքից ավելի մասշտաբային միջոցառմամբ, իսկ խաղային մարզաձևերում նման կարգի միջոցառումներ Հայաստանն անցկացնելու փորձ ու պատիվ չի ունեցել:

Վերջերս Երևանում կայացած ծանրամարտի Եվրոպայի առաջնության հետ համեմատելու եզրեր միևնույն ժամանակ և’ կան, և’ չկան: Գանք հերթով. քանի որ անհատական ու խաղային մարզաձևերը իրենց անցուդարձով տարբերվում են, ինչպես նաև ֆուտզալի ու ծանրամարտի մասսայականությունն այլ մակարդակի վրա է, համեմատելը բավական բարդ է: Ինչ էլ անենք՝ ֆուտզալի նկատմամբ հետաքրքրությունը Եվրոպայում կամ Հարավային Ամերիկայում հսկայական է: Ֆուտզալը գեներացնում է յուրահատուկ կոնտենտ, որն ընկալելի է նաև ֆուտբոլասերի համար: Այդ առումով եզրեր կարելի է գտնել միայն միջոցառման կազմակերպչական հարցերի շուրջ: Երևանն արդեն ծանրամարտի կամ բռնցքամարտի Եվրոպայի առաջնություններն ընդունելու փորձ ունի: Հայաստանում Ֆուտզալի Չեմպիոնների լիգայի անցկացման հաջողության գրավականը նաև այնպիսի թիմերի ու խաղացողների մասնակցությունն է, որոնք հայ ֆուտբոլասերի ականջին ծանոթ ու հաճելի են, մի ակնթարթում իրավիճակ են փոխում, որը նույնը չի ու չի կարող լինել ծանրամարտի կամ բռնցքամարտի պարագայում: Այո, այս սպորտաձևերում կան մարզիկներ, որոնք ունեն երկրպագուների անհատական մեծ բանակ, բայց, ամեն դեպքում, դա հնարավոր չէ համեմատել «Բարսելոնայի», «Սպորտինգի» ու «Բենֆիկայի» հետ:

Որքանո՞վ է դժվար կազմակերպել նման կարգի միջոցառումը։

-Ամեն ինչ սկսվում է հայտը ներկայացնելուց: Դրանից հետո հարկավոր է տևական ժամանակ սպասել: Հաստատվելուց հետո միայն մենք առաջնորդվում ենք այն ստանդարտներով, որոնք տալիս է ՈՒԵՖԱ-ն: Այս դեպքում նման քաշային կարգում կա, երևի թե, 3 կառույց` ՖԻՖԱ-ն, ՄՕԿ-ը և ՖԻԱ-ն, որոնք ունեն աշխարհում կազմակերպչական այնպիսի նորմատիվ կամ նշաձող, այնպիսի բարձր պահանջներ, որոնք հնարավոր չէ համեմատել ոչ մի ուրիշ սպորտաձևի կազմակերպչականի հետ: Եվ նման միջոցառման հյուրընկալումը իսկական քննություն է յուրաքանչյուր երկրի համար: Ու այս պարագայում կապ չունի` ընդունող երկիրը Անգլիան է, Ֆրանսիան, թե Հայաստանը: Ամեն դեպքում, նման կարգի մրցաշարի կազմակերպչական պահանջները կարդալով, մենք զարգանում ենք ինքներս, որովհետև մենք տեսնում ենք այնպիսի պահանջներ, որոնք որ հենց հիմա կիրառվում են: Հասկանում ենք, թե որ պահանջները կարող ենք վերցնել մեր ներքին առաջնությունը կամ առաջնությունները զարգացնելու համար: Էլ չենք խոսում Կարեն Դեմիրճյանի անվան մարզահամերգային համալիրի պես կառույց ունենալու առավելության մասին: Ասում եմ ամենայն պատասխանատվությամբ` ովքեր եկել են ծանոթանալու ընդունող երկրի պայմաններին, կառույցի տեսքից ապշել են: Նրանք հասկացել են, որ եկել են ֆանտաստիկ տեղ` անելու ֆանտաստիկ միջոցառում, որտեղ, այո, կան բաներ, որոնք պետք է փոխվեն կամ բարելավվեն, բայց արդեն իսկ տեսողական մակարդակով նրանք հասկացել են, որ Հյաստանին ու Երևանին նման կարգի միջոցառում անցկանելու իրավունք տրամադրելը ճիշտ որոշում էր: Դժվարությունը հիմնականում փորձի պակասն է: Այսինքն, Երևանը Ֆուտզալի Չեմպիոնների լիգայի անցկացման փորձ չի ունեցել: Բազմաթիվ հարցեր քննարկվել են առաջին անգամ: Ես արդեն նշեցի, որ մենք վեջին տարիներին պատիվ ենք ունեցել Երևանում հյուրընկալել սպորտային մեծ միջոցառումներ, բայց էլի նոր բաներ կան, նոր մոտեցումներ, գաղափարներ ու պահանջներ կան, որոնք անծանոթ են մեզ: Ես վստահ եմ, որ հենց նման միջոցառում անցկացնելով մենք կարող ենք ֆուտզալում քայլ առաջ կատարել: Այն կարող է միայն ու միայն դրական արդյունք ունենալ:

Որքանո՞վ է մեծ հեռանկարը, որ սա կարող է ավելի մեծ տեղաշարժ առաջացնել հայկական ֆուտզալում։

-Սա բացառիկ ցատկահարթակ է, սակայն մեկ բան է ցատկահարթակը, մեկ այլ բան, թե ինչպես մենք կօգտվենք դրանից: Միանշանակ Հայաստանում գործող ու մարզվող բոլոր ֆուտբոլիստներն ու ֆուտզալիստները այս խաղերին ներկա են լինելու: Իսկ նրանցից քանի՞սն իրենց կարիերայի այս հատվածում կկարողանային ներկա գտնվել Չեմպիոնների լիգայի եզրափակիչին․ շատ քչերը, իրականում: Ու այն փաստը, որ Ֆուտզալի Եվրոպայի լավագույն միջոցառումը գալիս է մեզ մոտ, ու մենք կարող ենք դրան ներկա գտնվել, արդեն թույլ է տալիս նրանց ենթադրություններ անել՝ ինչ աշխատանք կատարել, որ նրանք իրենց կարիերայի ընթացքում հասնեն նման նվաճման: Էլ չեմ ասում, որ այդ մրցաշարում խաղում է մի դարպասապահ, որը փաստացի տարին մի քանի անգամ Հայաստանի ֆուտզալի առաջնության խաղացողների հետ կրում է Հայաստանի ազգային հավաքականի մարզաշապիկը: Այսինքն, դու շփման եզրեր ունես: Կարող ենք զուգահեռներ անցկացնել այլ երկրների հետ: Պայմանական վերցնենք մի երկիր, որը ավանդապես մշակույթ չունի այս կամ այն մարզաձևում, ընդունում է շատ մեծ միջոցառում ու ինքը ոչ դեսպան ունի, ոչ էլ հաղթանակ կամ նվաճում: Այնպես չէ, որ մենք այստեղ հյուր կամ նորեկ ենք, մենք փաստացի ունենք դարպասապահ, որը խաղալու է Չեմպիոնների լիգայի կիսաեզրափակիչում: Ու նա պարզապես ֆուտզալիստ չէ, որ քաղաքացիություն է ստացել: Ինքն իր կարիերայի սկզբնական փուլն անցկացրել է Հայաստանի առաջնությունում, հետո սկսել է հրավիրվել Հայաստանի հավաքական։ Այս ամենը վկայում է այն մասին, որ Երևանում նման մրցաշարի անցկացումը հրաշալի ցատկահարթակ է ապագայի համար։ Դրա շնորհիվ երկրպագուների, ֆուտզալիստների և սովորական մարդկանց մեջ փոխվում է ընկալում սպորտաձևի հանդեպ։ Բնականաբար, դրսից գալու են հյուրեր, ում հետ շփումները կօգնեն մարդկանց հասկանալ՝ ինչ է իրականում ֆուտզալը։ Հուսանք՝ դա կնպաստի Հայաստանի առաջնության նկատմամբ հետաքրքրության աճին։ Մեր ակումբներն էլ, տեսնելով նման ոգևորությունն ու հեռանկարները, կպատրաստվեն գալիք մրցաշրջաններին և կձգտեն խաղալ նախ Չեմպիոնների լիգայի որակավորման, ապա՝ խմբային փուլում։

Ունե՞նք տեսանելի ապագայում հեռանկար, որ մեր թիմերից որևէ մեկը որքան հնարավոր է հեռուն կհասնի ֆուտզալի Չեմպիոնների լիգայում։

-Ես, իհարկե, չեմ կարող խոսել որևէ ակումբի անունից, բայց որպես ֆուտզալի սիրահար, վստահաբար կասեմ՝ այո։ Ես նախորդ տարի աշնանը «Երևան» ՖԱ-ի հետ Կիպրոսում եղել եմ Չեմպիոնների լիգայի խմբային մրցաշարին։ Կարևոր մի բան կառանձնացնեմ. մեր ակումբների մեծ մասում խաղում են հայ ֆուտզալիստներ։ Իրենք մրցակցային միջավայր են ստեղծել, առաջնություն, որն ամեն տարի առանց խնդիրների անցկացվում է և ամեն տարի ավելի է զարգանում։ Դա արդեն այն հիմքն է, որով հայկական ակումբները տեսանելի ապագայում կարող են հաջողություններ ունենալ Եվրոպայում։ Ներդրումային կողմի մասին չեմ կարող ասել, բայց հիմքը ունենք՝ մեր երկրի նկատմամբ ՈՒԵՖԱ-ն դարձնում է առաջնահերթ ուշադրություն, մեր հավաքականը մասնակցում է Էլիտ ռաունդի մրցաշարին. Ասել է թե՝ մենք խոշորացույցի տակ ենք։ Չէ՞ որ, եթե մենք հասել ենք այստեղ, ուրեմն ինչ-որ որակ ունենք։ Ու այդ հանգամանքները կարող են նպաստել, որ տարիներ անց մեր ակումբները նախ հայտնվեն խմբային փուլում, ապա նաև՝ փլեյ-օֆֆ փուլում։ Ֆուտզալն այլ է, այստեղ ներդրումների ծավալը նույնը չէ, ինչ ֆուտբոլում է, հնարավոր է՝ ավելի լուրջ ներդրումները ավելի լուրջ հաջողություններ բերեն։

Լուսանկարները՝ Գևորգ Ղազարյանի և Armenpress-ի

Ռոբերտ Գասպարյան

Ֆուտզալի Հայաստանի Բարձրագույն խմբի առաջնությունը կմեկնարկի սեպտեմբերին

Նարե Հովհաննիսյան — Mon, 27 Jul 2020 14:10:00 +0000

Ֆուտզալի Հայաստանի Բարձրագույն խմբի 2020/2021 առաջնությունը մեկնարկելու է սեպտեմբերին:

Այս մասին հայտնում է ՀՖՖ-ի պաշտոնական կայքը:

Առաջնության հանդիպումները կկայանան ՀՖՖ Տեխնիկական կենտրոն/ֆուտբոլի ակադեմիայի մարզադահլիճում (խիտ գրաֆիկի դեպքում որոշ հանդիպումներ կանցկացվեն նաև այլ մարզադահլիճներում):

Մասնակցության համար անհրաժեշտ հավաստագրերի ընդունման վերջնաժամկետն է օգոստոսի 5-ը:

Լեոն իր պատմության մեջ 4-րդ անգամ հռչակվեց ֆուտզալի Հայաստանի չեմպիոն

Վարուժան Բաբայան — Tue, 30 Jun 2020 08:45:00 +0000

Հունիսի 29-ին՝ ՀՖՖ տեխնիկական կենտրոն/ֆուտբոլի ակադեմիայի մարզադահլիճում, կայացավ Հայաստանի ֆուտզալի սուպերլիգայի չեմպիոնական հանդիպումը «Արարատ-Արմենիայի» և «Լեոյի» միջև: Այդ մասին հայտնում է ՀՖՖ պաշտոնական կայքը։

Առաջին խաղակեսից հետո «Արարատ-Արմենիան» հաղթում էր 3:2 հաշվով: Երկրորդ խաղակեսում «Լեոն» կարողացավ բեկել հանդիպման ընթացքը և հաղթեց 6:5 հաշվով:

«Լեոն» իր պատմության մեջ 4-րդ անգամ հռչակվեց Հայաստանի չեմպիոն:

Ֆուտզալի ԵՎՐՈ 2022-ի որակավորման փլեյ-օֆֆ փուլ․ Հայտնի է՝ երբ կհանդիպեն Հայաստանի և Բուլղարիայի հավաքականները

Վարուժան Բաբայան — Sat, 27 Jun 2020 08:54:00 +0000

ՈՒԵՖԱ-ն հաստատել է ՈՒԵՖԱ ֆուտզալի ԵՎՐՈ 2022-ի որակավորման փլեյ-օֆֆ փուլի հանդիպումների անցկացման նոր ժամկետները:

Հիշեցնենք, որ դեռևս փետրվարի 13-ին կայացած վիճակահանության արդյունքում Հայաստանի հավաքականը պետք է մրցեր Բուլղարիայի ընտրանու հետ:

Ըստ նոր խաղացանկի՝ հանդիպումները կկայանան 2020 թ. նոյեմբերին: Առաջին հանդիպումը կկայանա Բուլղարիայում՝ նոյեմբերի 5-ին, պատասխանը՝ նոյեմբերի 11-ին՝ Հայաստանում: Այդ մասին հայտնում է ՀՖՖ պաշտոնական կայքը։

Հիշեցնենք, որ ավելի վաղ ՈՒԵՖԱ-ն հաստատել էր նաև Ազգերի լիգայի 2020/2021 խաղարկության հանդիպումների նոր ժամկետները:

Լեոն՝ Ֆուտզալ լիգա VBET գավաթի հաղթող

Վարուժան Բաբայան — Fri, 26 Jun 2020 10:07:00 +0000

ՀՖՖ տեխնիկական կենտրոն/ֆուտբոլի ակադեմիայում կայացել է Ֆուտզալ Լիգա VBET գավաթի եզրափակիչը, որտեղ միմյանց դեմ մրցեցին «Լեո» և «Էկո-Վիլ» ակումբները։ Լարված պայքարում «Լեոն» հաղթեց 11:5 հաշվով և իր պատմության մեջ առաջին անգամ դարձավ Հայաստանի ֆուտզալի գավաթակիր։

Եզրափակչից հետո կայացած մրցանակաբաշխության ժամանակ առաջնության հաղթողները պարգևատրվեցին ոսկե մեդալներով և գավաթով։ Այդ մասին հայտնում է ՀՖՖ պաշտոնական կայքը։

Առաջնության լավագույն ֆուտբոլիստ ճանաչվեց Սարո Գալստյանը («Լեո»), լավագույն դարպասապահ՝ Արմեն Ֆիշյանը (ՀՊՏՀ), իսկ լավագույն ռմբարկուի կոչումը կիսեցին Գարեգին Մաշումյանը («Լեո») և Վահան Սարգսյանը («Էկո-Վիլ»)։

Ֆուտզալ լիգա VBET գավաթի խաղարկություն․ Հայտնի են եզրափակչի մասնակիցները

Վարուժան Բաբայան — Fri, 19 Jun 2020 10:07:00 +0000

Հունիսի 18-ին՝ ՀՖՖ տեխնիկական կենտրոն/ֆուտբոլի ակադեմիայի մարզադահլիճում, կայացել է Ֆուտզալ լիգա VBET գավաթի խաղարկության երկրորդ կիսաեզրափակիչը։

«Էկո Վիլլը» 11:9 հաշվով հաղթել է «Ջոկերին» և նվաճել եզրափակչի ուղեգիր։ Այսպիսով, եզրափակչում կմրցեն Հայաստանի գործող չեմպիեն «Լեոն» և «Էկո Վիլլը»:

Հունիսի 17-ին կիսաեզրափակչի առաջին խաղում «Լեոն» 7։5 հաշվով հաղթել էր ՀՊՏՀ-ին և նվաճել եզրափակչի ուղեգիր։

Հայտնի են Futsal League VBET գավաթի 1/4 եզրափակիչի զույգերը

Erik — Sun, 07 Jun 2020 18:48:04 +0000

Հայաստանի ֆուտբոլի ֆեդերացիայի Facebook-յան էջից տեղեկանում ենք, որ հայտնի են Futsal League VBET գավաթի խաղարկության 1/4-րդ եզրափակիչի զույգերը։

ՀՊՏՀ — «Դվին»
«Արարատ-Արմենիա» — «Լեո»
«Ջոկեր» — «Ֆալկոնս»
«Էկո վիլլ» — «Չարբախ»

Հայտնի են Ֆուտզալ Լիգա VBET գավաթի խաղարկության 1/8 եզրափակչի զույգերը

Վարուժան Բաբայան — Fri, 15 May 2020 06:55:00 +0000

Մայիսի 14-ին՝ ՀՖՖ գրասենյակում, կայացել է Ֆուտզալ Լիգա VBET գավաթի խաղարկության վիճակահանությունը։ Այդ մասին հայտնում է ՀՖՖ պաշտոնական կայքը։

Խաղարկությանը կմասնակցեն ՀՖՖ Ֆուտզալի Սուպերլիգայի մասնակից 5 և սիրողական 11 ակումբներ։ Ընդունված որոշման համաձայն՝ հանդիպումները կանցկացվեն առանց հանդիսականների։

Վիճակահանության արդյունքում ձևավորվեցին 1/8 եզրափակչի հետևյալ զույգերը․

«Էկո Վիլ» — «Էվրիկա»

«Չարբախ» — «Շահումյան»

«Ջոկեր» — «Սիրիուս»

«Նորք-Մարաշ» — «Ֆալկոնս»

«ՀՊՏՀ» — «Եղվարդ»

«Արարատ» — «Դվին»

«Արարատ-Արմենիա» — «Մովիսթար»

«Սպորտինգ» — «Լեո»

Մրցաշարին մասնակցելու համար խաղացողների հայտավորման վերջնաժամկետն է մայիսի 27-ը։ Գավաթի խաղարկությունը կմեկնարկի հունիսի 1-ն, բոլոր հանդիպումները կանցկացվեն ՀՖՖ տեխնիկական կենտրոն/ֆուտբոլի ակադեմիայում։

ՖԻՖԱ. Ֆուտզալի աշխարհի առաջնությունը կանցկացվի 2021 թվականին

Erik — Tue, 12 May 2020 09:44:39 +0000

Ֆուտզալի աշխարհի առաջնությունը, որը պետք է անցկացվեր այս տարի, տեղի կունենա 2021 թվականի սեպտեմբերի 12-ից հոկտեմբերի 3-ը ՝ Լիտվայում:

ՖԻՖԱ-ն այս որոշումը կայացրել է կորոնավիրուսի համաճարակի վտանգը հաշվի առնելով:

2021 թվական են տեղափոխվել նաև կանաց Մ 17,20 տարեկանների մրցաշարերը:

Բացի այդ, ՖԻՖԱ-ի 70-րդ կոնգրես հանդիպումը կանցկացվի հեռավար ռեժիմով:

Ֆուտզալի Իրանի հավաքականի սպորտային տնօրենը մահացել է կորոնավիրուսից

Erik — Mon, 16 Mar 2020 17:00:00 +0000

Ֆուտզալի Իրանի ազգային հավաքականի սպորտային տնօրեն Ահմեդ Տահերին մահացել է կորոնավիրուսի պատճառով: Տահերին նաև հավաքականի մարզչական շտաբից էր:

Չորս ամիս առաջ մարզիչը վիրահատության է ենթարկվել, որի ժամանակ հեռացվել է գլխուղեղի ուռուցքը: Նշվում է, որ թույլ իմունիտետը ազդել է հիվանդության արդյունքի վրա: Տահերին մարզել է իրանական մի շարք ակումբներ:

Կորոնավիրուսի հետևանքով Իրանում զոհվածների թիվը հասել է 853-ի: