«Պորտուն» պաշտոնապես ներկայացրեց փորձառու բրազիլացի կենտրոնական պաշտպան Տիագո Սիլվային։

Ակումբը 41-ամյա ֆուտբոլիստի հետ պայմանագիր կնքելու մասին հայտարարել էր 2025 թվականի դեկտեմբերի 20-ին, սակայն միայն հիմա պաշտոնապես ներկայացրեց լեգենդար բրազիլացուն։

Սիլվայի պայմանագիրը նախատեսված է մինչև 2026 թվականի հունիսը՝ այն ևս մեկ տարով երկարաձգելու հնարավորությամբ։ Տիագոն վիշապներին միացել է որպես ազատ գործակալ՝ «Ֆլումինենսեի» հետ պայմանագրի ավարտից հետո։

Սիլվան արդեն «Պորտուի» կազմում հանդես է եկել 2004/05 մրցաշրջանում, սակայն այդ ժամանակ խաղացել է երկրորդ թիմում։

Անցած մրցաշրջանում բրազիլացին «Ֆլումինենսեի» կազմում անցկացրել է 46 հանդիպում բոլոր մրցաշարերում՝ խփելով 4 գոլ և կատարելով 1 գոլային փոխանցում։

Իտալացի հարձակվող Մարիո Բալոտելին նշել է այն երկու պաշտպաններին, որոնց դեմ խաղալն իր համար ամենաբարդն է եղել։

«Նախ և առաջ պետք է ասեմ, որ հիմնական խնդիրը ես էի։ Եթե իմ ֆիզիկական և մտավոր վիճակը լավ լիներ, ոչ մի պաշտպան անհաղթահարելի չէր լինի ինձ համար։ Այնուամենայնիվ, ես հատկապես կցանկանայի առանձնացնել Տիագո Սիլվային և Սերխիո Ռամոսին։ Նրանք ունեին բոլոր անհրաժեշտ որակները»,- ասել է Բալոտելին pianetamilan.it-ին տված հարցազրույցում։

Տիագո Սիլվան ներկայումս խաղում է բրազիլական «Ֆլումինենսեում», մինչդեռ Սերխիո Ռամոսը վերջերս լքել է մեքսիկական «Մոնտերեյը» և ցանկանում է վերադառնալ Եվրոպա։

Նշենք, որ ներկայումս Բալոտելին չունի պրոֆեսիոնալ պայմանագիր և մարզվում է Իտալիայի Բրեշիա քաղաքի տեղական ակումբում։

Բրազիլական «Ֆլումինենսեի» փորձառու պաշտպան Տիագո Սիլվան հնարավոր է վերադառնա իտալական «Միլան», հաղորդում է La Repubblica-ն։

Աղբյուրի տեղեկություններով՝ «ռոսոներիների» գլխավոր նպատակն է ձեռք բերել փորձառու կենտրոնական պաշտպան, սակայն այլ թեկնածուների՝ «Մանչեսթեր Սիթիի» պաշտպան Մանուել Ականջիի և «Լիվերպուլի» պաշտպան Ջո Գոմեսի հետ բանակցությունները ձախողվել են։

Նշվում է, որ Տիագո Սիլվայի տրանսպերը, ամենայն հավանականությամբ, մեծ ֆինանսական ծախս չի պահանջի։ Բացի այդ, Սիլվան արդեն աշխատել է «Միլանի» ներկայիս գլխավոր մարզիչ Մասիմիլիանո Ալեգրիի ղեկավարության ներքո՝ անցյալ տասնամյակի սկզբին։

Բրազիլական «Ֆլումինենսե» ակումբի դարպասապահ Ֆաբիո Լոպեսը դարձավ աշխարհում առաջին ֆուտբոլիստը՝ ըստ անցկացրած պաշտոնական հանդիպումների թվի: 44-ամյա դարպասապահը ռեկորդ սահմանեց՝ իր կարիերայի ընթացքում անցկացնելով 1391-րդ հանդիպումը:

Պատմական խաղը տեղի ունեցավ Կոլումբիայի «Ամերիկա դե Կալի» թիմի դեմ՝ Հարավամերիկյան գավաթի 1/8 եզրափակչի պատասխան հանդիպման ժամանակ, որտեղ «Ֆլումինենսեն» հաղթեց 2:0 հաշվով: Այս խաղում Ֆաբիոն գերազանցեց անգլիացի նախկին դարպասապահ Պիտեր Շիլթոնի ցուցանիշը, որը 1966-1997 թվականներին անցկացրել էր 1390 պաշտոնական հանդիպում:

Հանդիսավոր արարողության ընթացքում Ֆաբիոյին հանձնվեցին հուշանվեր ափսե և նկար: Միջոցառմանը ներկա էր նրա ընտանիքը: Դարպասապահը խաղին մասնակցեց հատուկ խորհրդանշական կարկատանով զարդարված մարզաշապիկով:

Ֆաբիոն իր պրոֆեսիոնալ կարիերան սկսել է 1997 թվականին: Նա ամենաշատ խաղերն անցկացրել է «Կրուզեյրո» ակումբում (976 հանդիպում): Բացի այդ, նա հանդես է եկել «Ֆլումինենսեի» (235 խաղ), «Վասկո դա Գամայի» (150 խաղ), «Ունիան Բանդեյրանտեի» (30 խաղ) և «Ատլետիկո Պարանաենսեի» կազմում:

Ֆաբիոն երեք անգամ դարձել է Բրազիլիայի չեմպիոն՝ 2000 թվականին «Վասկո դա Գամայի» հետ, իսկ 2013 և 2014 թվականներին՝ «Կրուզեյրոյի» կազմում: Նա երեք անգամ նվաճել է Բրազիլիայի գավաթը, իսկ 2023 թվականին «Ֆլումինենսեի» հետ հաղթել է Կոպա Լիբերտադորեսում: Բացի այդ, նա ռեկորդակիր է Լիբերտադորեսի և Հարավամերիկյան գավաթի հանդիպումներում հաղթանակների քանակով:

2022 թվականից «Ֆլումինենսեում» հանդես եկող Ֆաբիոն ասել է.

«Ես միայն կարող եմ շնորհակալություն հայտնել Աստծուն, որ թույլ տվեց ապրել այս յուրահատուկ պահը և հասնել այս հսկայական ցուցանիշին: Հատկապես հուզիչ էր, որ ընտանիքս կողքիս էր տոնական արարողության ժամանակ: Ինձ համար մեծ պատիվ է այս ռեկորդին հասնել «Ֆլումինենսեի» մարզաշապիկով: Այժմ պետք է շարունակել խաղալ և յուրաքանչյուր հանդիպումով նոր նպատակների հասնել»:

Այսպիսով, Ֆաբիոն դարձավ ֆուտբոլի պատմության մեջ միանձնյա ռեկորդակիր՝ անցկացրած պաշտոնական խաղերի թվով: Նրան հաջորդում են՝

Պիտեր Շիլթոն (1390 խաղ)
Կրիշտիանու Ռոնալդու (1283 խաղ, դեռևս գործող ֆուտբոլիստ):

Հրապարակվել են ԱՄՆ-ում կայացած ՖԻՖԱ-ի Աշխարհի ակումբային առաջնության մասնակից ակումբների եկամուտները։

Football Rankings-ի տվյալներով՝ մրցաշարի հաղթող Լոնդոնի «Չելսին» վաստակել է ամենաշատը՝ 114.6 միլիոն եվրո։ Եզրափակչի մասնակից ՊՍԺ-ն զբաղեցրել է երկրորդ հորիզոնականը՝ 106.9 միլիոն եվրոյով։ Լավագույն եռյակը եզրափակել է Մադրիդի «Ռեալը», որը ստացել է 82.5 միլիոն եվրո։

Լավագույն հնգյակում են նաև «Ֆլումինենսեն» (60.8 միլիոն եվրո) և «Բավարիան» (58.2 միլիոն եվրո)։ Տասնյակում են ընդգրկվել նաև Դորտմունդի «Բորուսիան» (52.3 միլիոն եվրո), «Մանչեսթեր Սիթին» (51.7 միլիոն եվրո), «Պալմեյրասը» (49.8 միլիոն եվրո), «Ինտերը» (36.8 միլիոն եվրո) և «Ալ-Հիլալը» (34.2 միլիոն եվրո)։

Հիշեցնենք, որ եզրափակչում «Չելսին» 3։0 հաշվով հաղթեց ՊՍԺ-ին՝ դառնալով ակումբային աշխարհի նոր չեմպիոն։

ՖԻՖԱ-ի աշխարհի ակումբային առաջնության կիսաեզրափակիչի առաջին խաղում Նյու Ջերսիի Իսթ Ռադերֆորդ քաղաքի «ՄետԼայֆ» մարզադաշտում Լոնդոնի «Չելսին» երկու անպատասխան գնդակ ուղարկեց բրազիլական «Ֆլումինենսեի» դարպասը (2:0)՝ դուրս գալով մրցաշարի եզրափակիչ։

«Ազնվականների» կազմում իր նորամուտի խաղում հաղթական դուբլ գրանցեց Ժոաու Պեդրուն՝ երկու անգամ գրավելով իր նախկին ակումբի դարպասը։

Այսպիսով, լոնդոնյան գրանդը դուրս եկավ Ակումբային ԱԱ-ի եզրափակիչ, որտեղ կհանդիպի ՊՍԺ – «Ռեալ Մադրիդ» զույգի հաղթողի հետ։

Հանդիպման գոլերը կարող եք դիտել ԱՅՍՏԵՂ։

ՖԻՖԱ-ի աշխարհի ակումբային առաջնությունում ավարտվեց քառորդ եզրափակիչ փուլը, որի արդյունքում 4 ակումբներ վաստակեցին կիսաեզրափակիչի ուղեգրեր։

Ներկայացնում ենք կիսաեզրափակիչի հանդիպումների ժամանակացույցը․

• «Ֆլումինենսե» (Բրազիլիա) – «Չելսի» (Անգլիա)՝ հուլիսի 8-ին, ժամը 23:00
• ՊՍԺ (Ֆրանսիա) – «Ռեալ Մադրիդ» (Իսպանիա)՝ հուլիսի 9-ին, ժամը 23:00

Նշենք, որ մրցաշարի եզրափակիչ հանդիպումը նախատեսված է հուլիսի 13-ին, Երևանի ժամանակով 23։00-ին։

Opta սուպերհամակարգիչը վերլուծել է 2025 թվականի Աշխարհի ակումբային առաջնությունում թիմերի հաղթանակի հնարավորությունները՝ քառորդ եզրափակիչների ավարտից հետո։ Այս մասին հայտնում է Opta Analyst-ը։

Հաշվարկների համաձայն՝ «Պարի Սեն-Ժերմենի» հաղթանակի հավանականությունը կազմում է 38.54%, «Չելսիինը»՝ 33.86%, «Ռեալինը»՝ 24.67%։ Ամենացածր հնարավորությունն ունի «Ֆլումինենսեն»՝ 2.93%։

Առաջին կիսաեզրափակչում կհանդիպեն «Ֆլումինենսեն» և «Չելսին», իսկ երկրորդում՝ ՊՍԺ-ն և «Ռեալը»։ Խաղերը տեղի կունենան հուլիսի 8-ին և 9-ին։ Հաղթողները հուլիսի 13-ին կպայքարեն տիտղոսի համար։

Ակումբային ԱԱ-ի քառորդ եզրափակիչում բրազիլական «Ֆլումինենսեն» 2:1 հաշվով հաղթեց Սաուդյան Արաբիան ներկայացնող «Ալ-Հիլալին»։

Հանդիպման հաշիվը բացվեց 40-րդ րոպեին։ Աչքի ընկավ Մարտինելին։ Երկրորդ խաղակեսի սկզբնամասում սաուդյան ակումբը հավասարեցրեց հաշիվը Մարկոս Լեոնարդոյի գոլի շնորհիվ։

Հաղթական գոլը խփեց Էրկուլես Պերեյրա դե Նասիմենտուն 70-րդ րոպեին։

Այսպիսով, կիսաեզրափակիչում «Ֆլումինենսեն» կմրցի «Պալմեյրաս» (Բրազիլիա) — «Չելսի» (Անգլիա) հաղթողի հետ։

Հանդիպման գոլերի տեսանյութերը՝ ԱՅՍՏԵՂ

«Ալ-Հիլալի» պորտուգալացի ֆուտբոլիստներ Ժոաու Կանսելուն և Ռուբեն Նևեշը չկարողացան զսպել արցունքները Դիոգու Ժոտայի հիշատակին նվիրված լռության րոպեի ժամանակ, որը տեղի ունեցավ ՖԻՖԱ-ի ակումբային աշխարհի առաջնության քառորդ եզրափակչի «Ալ-Հիլալ» – «Ֆլումինենսե» հանդիպումից առաջ։

Պորտուգալիայի հավաքականի և «Լիվերպուլի» հարձակվող Ժոտան և նրա եղբայր Անդրե Սիլվան զոհվել են Իսպանիայում տեղի ունեցած ավտովթարի հետևանքով։

Ժոտան «Լիվերպուլ» էր տեղափոխվել 2020 թվականի սեպտեմբերին՝ «Վուլվզից»։ Այդ ժամանակից ի վեր նա մասնակցել է 182 հանդիպման, խփել 65 գոլ և կատարել 26 գոլային փոխանցում։ «Լիվերպուլի» կազմում նա նվաճել է Պրեմիեր լիգայի, Անգլիայի գավաթի և երկու Լիգայի գավաթի տիտղոսներ, իսկ Պորտուգալիայի հավաքականի հետ երկու անգամ հաղթել է Ազգերի լիգան։

In remembrance of Diogo Jota and André Silva, a minute of silence was observed. 🤍 pic.twitter.com/yYqKQWMur4

— DAZN Football (@DAZNFootball) July 4, 2025