Անգլիական «Սանդերլենդը» Beacon of Light համալիրում կայացած ամենամյա պաշտոնական մրցանակաբաշխության ժամանակ ամփոփել է 2025/26 թթ․ մրցաշրջանը:

Հայ մարզասերների համար միջոցառման ամենաուշագրավ ու կարևոր իրադարձությունը Հայաստանի ազգային հավաքականի 18-ամյա հարձակվող Ֆինն Գերագուսյանի նվաճումն էր։

​Ակադեմիայի տարեվերջյան մրցանակաբաշխության շրջանակում հայ ֆուտբոլիստը պաշտոնապես ճանաչվել է «Սանդերլենդի» Մինչև 21 տարեկանների թիմի մրցաշրջանի լավագույն խաղացող՝ գնահատվելով երիտասարդական կազմում իր գրանցած փայլուն ելույթների ու գրանցած մեծ առաջընթացի համար։

Ընթացիկ մրցաշրջանում 18-ամյա հարձակվողը Մ-21 թիմի կազմում հասցրել է մասնակցել 4 տարբեր մրցաշարերի՝ դառնալով թիմի առանցքային խաղացողներից մեկը:

Մասնավորապես, Պրեմիեր լիգա 2-ում նա անցկացրել է 11 հանդիպում՝ դառնալով 3 գոլի և 2 գոլային փոխանցման հեղինակ: Պրեմիեր լիգայի գավաթի խաղարկությունում Գերագուսյանը մասնակցել է 5 հանդիպման՝ իր ակտիվում գրանցելով 2 գոլ և 1 գոլային փոխանցում:

Այս մրցաշարում հայ հարձակվողի թիմը հասել է մինչև եզրափակիչ, որտեղ համառ պայքարում 1:2 հաշվով զիջել է «Բարնլիին», սակայն ինքը՝ ֆուտբոլիստը, վնասվածքի պատճառով ցավոք բաց է թողել այդ վճռորոշ հանդիպումը:

Բացի այդ, նա 2 հանդիպման մասնակցել է Ազգային լիգայի գավաթում և ևս 1 հանդիպման՝ Պրեմիեր լիգայի Միջազգային գավաթում:

Հայաստանի ազգային հավաքականում նորամուտը նշելուց հետո անգլիական «Սանդերլենդի» 18-ամյա հարձակվող Ֆինն Գերագուսյանի ակումբային ապագան հայտնվել է ուշադրության կենտրոնում:

Թեև հարձակվողը դեռ նորամուտը չի նշել «Սանդերլենդի» հիմնական կազմում, ակումբի գլխավոր մարզիչ Ռեժիս Լե Բրին բարձր է գնահատել նրա ներուժն ու գլխավոր թիմ տեղափոխվելու շանսերը: Անդրադառնալով հայ ֆուտբոլիստի որակներին՝ Լե Բրին նշել է.

«Նա մի քանի մարզում է անցկացրել մեզ հետ, և ինձ դուր են գալիս նրա տվյալները: Լավ երիտասարդ է, հիանալի հարմարվել է ակումբի մտածելակերպին և ֆիզիկապես շատ ուժեղ ֆուտբոլիստ է: Այս լիգայում հաջողելու համար պետք է կարողանալ պայքարել երկրորդ հարկում, մենապայքարներում, իսկ նա այդ առումով բազմակողմանի զարգացած է: Իհարկե, նա դեռ երիտասարդ է և փորձի կարիք ունի, բայց ինձ շատ է դուր գալիս նրա խաղաոճը», — Լե Բրիի խոսքերն է մեջբերում Sunderland Echo-ն։

Հիշեցնենք, որ Գերագուսյանն իր առաջին հանդիպումն անցկացրեց ազգային թիմի կազմում մարտի 29-ին կայացած Հայաստան — Բելառուս ընկերական խաղում։ Երիտասարդ ֆուտբոլիստը խաղադաշտ դուրս եկավ 64-րդ րոպեին՝ փոխարինելով Հրանտ-Լեոն Ռանոսին:

Գերագուսյանն այս մրցաշրջանում արդեն հասցրել է մարզվել անգլիական ակումբի հիմնական թիմի հետ և Անգլիայի գավաթի խաղարկության հանդիպումներից մեկում նույնիսկ ընդգրկվել է պահեստայինների նստարանին: «Սանդերլենդի» երիտասարդական (Մ-18 և Մ-21) թիմերի կազմում անցկացրած 27 հանդիպումներում նա դարձել է 13 գոլի և 3 գոլային փոխանցման հեղինակ:

Երևանի Վազգեն Սարգսյանի անվան «Հանրապետական» ստադիոնում կայացավ Հայաստանի ֆուտբոլի ազգային հավաքականի՝ այս տարվա առաջին հանդիպումը։ Մեր ընտրանին սեփական հարկի տակ ընկերական խաղում ուժերը չափեց Բելառուսի ազգային հավաքականի հետ։

Հանդիպման 63-րդ րոպեին ազգային թիմի կազմում իր պաշտոնական նորամուտը նշեց Ֆինն Գերագուսյանը՝ փոխարինման դուրս գալով և փորձելով ակտիվություն մտցնել առջևի գծում։ Սակայն, չնայած գործադրված ջանքերին, հաջողությունը հյուրերի կողմն էր։

Հայ ֆուտբոլիստի առաջին հանդիպումն ազգային թիմի մարզաշապիկով աննկատ չի մնացել նրա ներկայացրած ակումբի կողմից։ Անգլիական «Սանդերլենդի» մամուլի ծառայությունը պաշտոնական էջերում անդրադարձել է այս իրադարձությանն ու շնորհավորել իր ֆուտբոլիստին.

«Այսօր կայացած Բելառուսի դեմ ընկերական խաղում Ֆինն Գերագուսյանը նշեց իր նորամուտը Հայաստանի հավաքականի կազմում: Շնորհավո՛ր, Ֆինն»,- ասված է ակումբի տարածած հաղորդագրության մեջ։

🇦🇲 Finn Geragusian made his Armenia debut in this afternoon’s friendly against Belarus!

Congratulations, Finn! 👏 pic.twitter.com/Pz6laVzmaT

— SAFC Academy (@AcademyOfLight) March 29, 2026

Շոտլանդական «Ռեյնջերսը» մտադիր է ձեռք բերել անգլիական «Սանդերլենդի» 18-ամյա հայ հարձակվող Ֆինն Գերագուսյանին: Երիտասարդ ֆուտբոլիստի կրթաթոշակային պայմանագրի ավարտը կարող է նպաստել, որպեսզի տրանսֆերը կայանա ակումբի համար բավականին շահավետ պայմաններով:

Գերագուսյանը դեռևս նորամուտը չի նշել պրոֆեսիոնալ ֆուտբոլում, սակայն պատկերը կարող է փոխվել առաջիկա միջազգային դադարի ընթացքում: Ֆիննն առաջին անգամ հրավիրվել է Հայաստանի ազգային հավաքական, ինչը հիանալի հնարավորություն է գլազգոյան ակումբի համար՝ հետևելու նրա ելույթներին միջազգային մակարդակում:

Շոտլանդական ակումբն այս մրցաշրջանում խնդիրներ ունի հարձակման գծում: Նորեկներ Ռայան Նադերիի և Յուսեֆ Շերմիտիի տրանսֆերները դեռևս չեն արդարացրել սպասելիքները, ուստի ամռանը նոր հարձակվողի ժամանումը տրամաբանական կլինի:

Ըստ Daily Mail-ի լրագրող Քրեյգ Հոուփի՝ «Ռեյնջերսը» այն բազմաթիվ ակումբների թվում է, որոնք հետևում են հայ տաղանդին: Ֆիննի պայմանագիրն իր ներկայիս ակումբի հետ ավարտվում է ամռանը, և ՖԻՖԱ-ի՝ կրթաթոշակային պայմանագրերի վերաբերյալ կանոնակարգի համաձայն, շոտլանդացիները նրա դիմաց կարող են վճարել ընդամենը 173,770 ֆունտ ստեռլինգ: Բանն այն է, որ Անգլիայից դուրս հանդես եկող թիմերը անգլիական ակադեմիաների սաներին ձեռք բերելիս ազատված են փոխհատուցման բարձր վճարներից։

«Սանդերլենդի» երիտասարդական թիմերի առանցքային խաղացողը հիմնականում հանդես է գալիս կենտրոնական հարձակվողի դիրքում, սակայն աչքի է ընկնում իր ունիվերսալությամբ. նա կարող է խաղալ նաև որպես աջ կիսապաշտպան և աջ վինգեր: Չնայած երիտասարդ տարիքին՝ Գերագուսյանն ունի տպավորիչ ֆիզիկական տվյալներ (հասակը՝ 193 սմ) և մեծ ներուժ՝ ապագայում բարձր մակարդակով հանդես գալու համար:

Հայաստանի ազգային հավաքականի նորեկ, 18-ամյա հարձակվող Ֆինն Գերագուսյանը շարունակում է արդյունավետ ելույթներն Անգլիայում: Հայ ֆուտբոլիստը հերթական անգամ աչքի է ընկել Պրեմիեր լիգայի գավաթի խաղարկության քառորդ եզրափակիչի շրջանակում։

Երեկ՝ մարտի 6-ին կայացած խաղում «Սանդերլենդի» Մ21 թիմը սեփական հարկի տակ 3:1 հաշվով վստահ հաղթանակ է տարել «Ուոթֆորդի» հասակակիցների նկատմամբ՝ նվաճելով կիսաեզրափակիչի ուղեգիր։ Գերագուսյանը խաղադաշտ է դուրս եկել մեկնարկային կազմում և 52-րդ րոպեին բացել է հանդիպման հաշիվը: Երկրորդ խաղակեսի միջնամասում նա փոխարինվել է։

Այս գոլը 18-ամյա հարձակվողի համար արդեն 13-րդն էր ընթացիկ մրցաշրջանում՝ ակումբի տարբեր տարիքային թիմերի կազմում անցկացրած խաղերում: Ինչ վերաբերում է «Սանդերլենդ Մ21»-ին, ապա թիմը տոնել է իր 6-րդ անընդմեջ հաղթանակը։

Հատկանշական է, որ հենց հանդիպման օրը հրապարակվել էր Հայաստանի ազգային հավաքական հրավիրված արտերկրում հանդես եկող ֆուտբոլիստների ցուցակը, որտեղ Գերագուսյանի անունն ընդգրկված էր առաջին անգամ։ Երիտասարդ հարձակվողը կմիանա ազգային ընտրանուն՝ նախապատրաստվելու առաջիկա ընկերական հանդիպումներին։

Հիշեցնենք, որ մարտի 26-ին Հայաստանի հավաքականն ուժերը կչափի Արաբական Միացյալ Էմիրությունների, իսկ մարտի 29-ին՝ Բելառուսի ընտրանու հետ։

Անգլիական «Սանդերլենդի» երիտասարդական թիմի հայ հարձակվող Ֆինն Գերագուսյանն արձագանքել է առաջին անգամ Հայաստանի ազգային հավաքական հրավիրվելուն։

18-ամյա խաղացողն Instagram-ի իր էջի stories բաժնում հավաքականի մարզահագուստով լուսանկար է հրապարակել և կատարել հետևյալ գրառումը.

«Իսկապես երախտապարտ եմ ազգային գլխավոր թիմում հանդես գալու հնարավորության համար»,- նշել է Գերագուսյանը՝ կից տեղադրելով Հայաստանի դրոշը։

Հիշեցնենք, որ Հայաստանի ազգային հավաքականը մարտի 26-ին մրցակցի հարկի տակ ընկերական հանդիպում կանցկացնի Արաբական Միացյալ Էմիրությունների ընտրանու հետ։ 3 օր անց Եղիշե Մելիքյանի թիմը Երևանում կմրցի Բելառուսի հետ։

Հայտնի են Հայաստանի ազգային հավաքական հրավիրված լեգեոնականների անունները. ընտրանու գլխավոր մարզիչ Եղիշե Մելիքյանը հրապարակել է արտերկրում հանդես եկող խաղացողների ցուցակը։

Պաշտպաններ

• Գեորգի Հարությունյան — «Պուշկաշ Ակադեմիա»
• Ստյոպա Մկրտչյան — «Նյուրնբերգ»
• Նաիր Թիկնիզյան — «Ցրվենա Զվեզդա»
• Արտյոմ Բանդիկյան — ԲԿՄԱ Մոսկվա

Կիսապաշտպաններ

• Էդուարդ Սպերցյան — «Կրասնոդար»

Հարձակվողներ

• Վահան Բիչախչյան — «Լեգիա» Վարշավա
• Հրանտ Լեոն Ռանոս — «Այնտրախտ Բրաունշվայգ»
• Արթուր Միրանյան — «Բնեյ Սախնին»
• Նարեկ Գրիգորյան — «Ֆարուլ»
• Ֆինն Կասպեր Ադամ Գերագուսյան — «Սանդերլենդ» Մ21

Հիշեցնենք, որ այս ամիս մեր գլխավոր թիմը նախատեսում է անցկացնել երկու ստուգողական հանդիպում.

Մարտի 26-ին կկայանա ԱՄԷ — Հայաստան մրցավեճը։ 

Մարտի 29-ին մեր ընտրանին Երևանում ուժերը կչափի Բելառուսի ազգային հավաքականի հետ։

Հայաստանի Մ21 հավաքականի հարձակվող Ֆինն Գերագուսյանը հերթական արդյունավետ գործողությամբ է աչքի ընկել Անգլիայում։

Պրեմիեր լիգա 2-ի (Մ23) 13-րդ տուրի շրջանակում «Սանդերլենդի» երիտասարդական թիմը սեփական հարկի տակ ընդունել է «Բրայթոնին»։ Հանդիպումն ավարտվել է տանտերերի վստահ հաղթանակով՝ 2:0 հաշվով, իսկ հանդիպման հերոսներից մեկը դարձել է հայ հարձակվողը։

Հենց 18-ամյա Գերագուսյանն է խաղի 43-րդ րոպեին բացել հաշիվը՝ տուգանային հրապարակում կողմնորոշվելով բոլորից արագ և եզրափակելով գրոհը հեռավոր դարպասաձողի մոտ։ Հանդիպման վերջնակետը 81-րդ րոպեին դրել է Մարկուս Նիլը։

Գերագուսյանը խաղը սկսել է մեկնարկային կազմում և մասնակցել ամբողջ հանդիպմանը։ Նրա ելույթը բարձր է գնահատվել մասնագետների կողմից՝ ստանալով 9/10 գնահատականը։ Նշվում է, որ հայ ֆուտբոլիստը գերազանց շարժում է ցուցադրել գոլային դրվագում և ամբողջ խաղի ընթացքում մի քանի անգամ լրջորեն անհանգստացրել մրցակցի դարպասապահին։

Ընթացիկ մրցաշրջանում Գերագուսյանը Պրեմիեր լիգա 2-ում անցկացրել է 6 հանդիպում՝ դառնալով 2 գոլի և 1 գոլային փոխանցման հեղինակ։ Բոլոր մրցաշարերը միասին վերցրած՝ երիտասարդ հարձակվողն իր ակտիվում ունի արդեն 8 գոլ։

Անգլիայի ֆուտբոլային ասոցիացիայի երիտասարդական գավաթի (FA Youth Cup) խաղարկության երրորդ փուլում «Սանդերլենդի» Մ-18 տարեկանների թիմը սեփական հարկի տակ երեք անպատասխան գնդակ է ուղարկել «Նոթինգհեմ Ֆորեստի» հասակակիցների դարպասը (3-0)։

«Սև կատուների» կազմում գոլերից մեկը հեղինակել է Հայաստանի Մ-21 տարեկանների հավաքականի հարձակվող Ֆին Գերագուսյանը։

«Սանդերլենդի» Մ-18 տարեկանների թիմը հաջորդ փուլում կհյուրընկալի «Վեսթ Բրոմին» կամ «Բորնմութին»։

 

Посмотреть эту публикацию в Instagram

 

Публикация от Sunderland AFC (@sunderlandafc)

Հայաստանի Մ-21 հավաքականը սկսել է պատրաստվել ՈւԵՖԱ Մ-21 տարեկանների Եվրոպայի 2027 թվականի առաջնության որակավորման փուլի Չեռնոգորիայի և Շվեդիայի դեմ հանդիպումներին։

Այդ կապակցությամբ Արմեն Գյուլբուդաղյանցը հրավիրել է «Սանդերլենդի» Մ-21 թիմի հարձակվող Ֆինն Գերագուսյանին։ Վերջինս հարցազրույց է տվել ՀՖՖ-ի մամուլի ծառայությանը։

«Ես սկսել եմ ֆուտբոլով զբաղվել 4-5 տարեկան հասակում։ Այդ ժամանակվանից ես հավատում էի, որ ֆուտբոլը լինելու է իմ կյանքի անբաժան մասը։ Որևէ օր չեմ անցկացրել առանց գնդակի։ Իմ ընտանիքը դա տեսնում էր և լիովին աջակցում էր ինձ։

Նրանք վստահ էին, որ ինձ մեծ ապագա է սպասում։ Իմ պապիկն մեծ ներդրում ունի նրանում, որ ես դարձա ֆուտբոլիստ։

Իմ պապիկը հայ է։ Նա ինձ շատ է պատմել Հայաստանի և հայկական մշակույթի մասին։ Նա խոսում է հայերեն և այժմ ինձ էլ է սովորեցնում լեզուն։

Երբ առաջին անգամ հրավիրվեցի Հայաստանի մինչև 19 տարեկանների հավաքական՝ զգացմունքները հիանալի էին։ Դա լավ հնարավորություն էր ավելի մոտիկից ճանաչելու հայկական մշակույթը, ձեռք բերելու նոր ընկերներ և աշխատելու նոր մարզիչների հետ։

Հայաստանի հավաքականի շապիկը կրելը մեծ պատասխանատվություն է։ Երբ լսում եմ երկրի օրհներգը, ոգևորվում եմ, սիրտս սկսում է արագ բաբախել։ Երբեմն դժվար է հաղորդակցվել տղաների հետ, բայց ինչպես նրանք, այնպես էլ մարզիչները շատ են օգնում ինձ։

Հայաստանի երիտասարդական հավաքականը անընդհատ աշխատանքում է, ես դա հստակ տեսնում եմ։ Կանեմ ամեն ինչ՝ շատ գոլեր խփելու և թիմիս հաղթանակներ բերելու համար։

Իմ առավելությունը՝ իմ հասակն է։ Փորձում եմ օգտագործել այն ինչպես պայքարում գնդակի համար, այնպես էլ գնդակը պահելու ընթացքում։

Ես կցանկանայի խաղալ «Սանդերլենդի» առաջին թիմում։ Ելույթ ունենալ Պրեմիեր լիգայում՝ դա ցանկացած ֆուտբոլիստի երազանքն է։ Եվ, իհարկե, շատ եմ ուզում խաղալ Հայաստանի ազգային հավաքականում»,- ասել է Գերագուսյանը ՀՖՖ-ին տված հարցազրույցի ժամանակ։

Ամբողջականը՝ ստորև