ֆերլան-մենդի — Armsport.am

Հարձակում դեռահասի վրա և քնեցված կենդանի. Ռեալի աստղը կկանգնի դատարանի առջև

Gevorg Martirosyan — Fri, 16 Oct 2026 20:08:14 +0000

Մադրիդի «Ռեալի» ֆրանսիացի պաշտպան Ֆերլան Մենդին կկանգնի դատարանի առջև անչափահասի վրա իր շներից մեկի հարձակման պատճառով։ Այս մասին հայտնում է իսպանական Sport.es պարբերականը։

Աղբյուրի տեղեկություններով՝ Մադրիդի քրեական դատարանը գործի քննության մեկնարկը նշանակել է դեկտեմբերի 21-ին։ Ֆուտբոլիստը մեղադրվում է մարմնական վնասվածք հասցնելու հետ կապված իրավախախտման մեջ։

Մասնավորապես, Մենդիին պատկանող շներից մեկը կծել է 17-ամյա դեռահասի ոտքը, ինչպես նաև հարձակվել երկու այլ շների վրա։ Վերջիններիսից մեկին՝ ստացած ծանր վնասվածքների պատճառով, հետագայում ստիպված են եղել քնեցնել։

Նշվում է, որ դատախազությունը պահանջում է «արքայական» ակումբի խաղացողին տուգանել 1200 եվրոյով, ինչպես նաև պարտավորեցնել նրան տուժած կողմին վճարել 5700 եվրոյի չափով փոխհատուցում։

Հավելենք, որ բուն միջադեպը տեղի է ունեցել դեռևս 2023 թվականի հունվարի 4-ին, երբ Մենդիի չորս շները, մնալով առանց հսկողության, դուրս են եկել նրա առանձնատան տարածքից։

Կարևոր վերադարձ 5 ամիս անց և Մբապեի կարգավիճակը․ կադրային ինչ իրավիճակ է Ռեալում

Suren Sahakyan — Tue, 29 Sep 2026 10:14:47 +0000

Մադրիդի «Ռեալը» վերսկսել է մարզումները. Ժոզե Մոուրինյուն թիմին նախապատրաստում է մրցաշրջանի վերսկսմանը։ Իսպանական հեղինակավոր AS պարբերականն անդրադարձել է մադրիդյան ակումբի կադրային ներկայիս վիճակին և ֆուտբոլիստների ապաքինման ընթացքին։

Գլխավոր նորությունը Էդեր Միլիտաոյի վերադարձն է։ Բրազիլացի պաշտպանը, որի ապաքինումը պահանջել է ավելի քան հինգ ամիս, մարզման մի մասն արդեն անցկացրել է ընդհանուր խմբում։ Ակնկալվում է, որ նրա վերադարձը խաղադաշտ կլինի աստիճանական։

Ինչ վերաբերում է Կիլիան Մբապեին, Ֆեդերիկո Վալվերդեին և Իբրահիմա Կոնատեին, ապա նրանք երկուշաբթի՝ սեպտեբերի 28-ի մարզումն անցկացրել են մարզասրահում։

Միևնույն ժամանակ, Ֆերլան Մենդին և Ռոդրիգոն աշխատել են խոտածածկին, սակայն առանձնացված. վերականգնողական գործընթացի շրջանակում ֆուտբոլիստները կատարել են անհատական վարժություններ՝ չմիանալով ընդհանուր խմբին։

Հավելենք, որ «արքայական» ակումբն իր առաջիկա հանդիպումը կանցկացնի հոկտեմբերի 10-ին՝ սեփական հարկի տակ հյուրընկալելով «Վիլյառեալին»։

Ռեալը երկու խաղացողի ցույց է տվել դռան կողմը․ հայտնի են անունները

Suren Sahakyan — Fri, 14 Aug 2026 17:10:12 +0000

Մադրիդի «Ռեալը» նախատեսում է ամառային տրանսֆերային պատուհանի ընթացքում վաճառել պաշտպաններ Ֆերլան Մենդիին և Ռաուլ Ասենսիոյին։ Այս մասին հաղորդում է Diario AS պարբերականը։

Նշվում է, որ «սերուցքայինները» որոշել են հրաժեշտ տալ Մենդիին՝ ֆուտբոլիստի՝ վնասվածքների հակվածության պատճառով։ Իսկ Ասենսիոն, հավանաբար, չի մտնում թիմի գլխավոր մարզիչ Ժոզե Մոուրինյուի ծրագրերի մեջ։ Սակայն, ըստ աղբյուրի տեղեկությունների, առայժմ մադրիդյան ակումբը զգալի առաջընթաց չի գրանցել խաղացողների համար նոր թիմեր գտնելու հարցում։

Իսպանիայի Լա լիգայի նոր մրցաշրջանը «Ռեալը» կսկսի «Էսպանյոլի» դեմ արտագնա խաղով։ Հանդիպումը կկայանա օգոստոսի 22-ին և կմեկնարկի Երևանի ժամանակով 23։30-ին։

Footmercato. Մոուրինյուն ընտրել է վեց ֆուտբոլիստի, որոնք պետք է լքեն Ռեալը, ևս երկուսի ապագան էլ անորոշ է

Suren Sahakyan — Sat, 01 Aug 2026 06:10:48 +0000

Մադրիդի «Ռեալի» գլխավոր մարզիչ Ժոզե Մոուրինյուն ընտրել է այն ութ խաղացողներին, որոնք առաջիկայում կարող են հեռանալ «արքայական» ակումբից։ Այս մասին հայտնում է Footmercato պարբերականը։

Աղբյուրի համաձայն՝ անվանի պորտուգալացի մարզիչը հայտնել է, որ իր ծրագրերի մեջ չեն մտնում պաշտպաններ Ֆերլան Մենդին և Ռաուլ Ասենսիոն, կիսապաշտպաններ Էդուարդո Կամավինգան, Ֆրանկո Մաստանտուոնոն, ինչպես նաև հարձակվողներ Էնդրիկն ու Գոնսալո Գարսիան։

Միևնույն ժամանակ, Լոնդոնի «Արսենալը» մտադիր է պայմանագիր կնքել մադրիդցիների բրազիլացի հարձակվող Վինիսիուս Ժունիորի հետ, որը հրաժարվում է երկարաձգել գործող համաձայնագրի ժամկետը «սերուցքայինների» հետ, իսկ «Մանչեսթեր Յունայթեդը» թիրախավորել է կիսապաշտպան Օրելիեն Չուամենիին։

«Ռեալը» ակտիվորեն աշխատում է գլխավոր մարզչին աստղային կազմով ապահովելու ուղղությամբ։ Արդեն հաստատվել են Մարկ Կուկուրելյայի, Դենզել Դումֆրիսի, Իբրահիմա Կոնատեի և Բեռնարդու Սիլվայի տրանսֆերները, սպասվում է նաև Յան Դիոմանդեի ժամանումը։

Սակայն ակումբը սրանով չի սահմանափակվում։ Նշվում է, որ հաջորդ քայլը կարող է լինել ԱԱ-2026-ի լավագույն ֆուտբոլիստ Ռոդրիի տրանսֆերը, որը որոշել է հեռանալ անգլիական «Մանչեսթեր Սիթիից» և արդեն տեղեկացրել է «քաղաքայիններին» իր որոշման մասին։

Ռեալի ֆուտբոլիստը կարող է ստիպված լինել ավարտել կարիերան

Suren Sahakyan — Fri, 08 May 2026 14:15:18 +0000

Մադրիդի «Ռեալի» ֆրանսիացի պաշտպան Ֆերլան Մենդիի վնասվածքը սպասվածից շատ ավելի լուրջ է ստացվել։ Իսպանական COPE պարբերականի հաղորդմամբ՝ 30-ամյա ֆուտբոլիստը վտանգում է բաց թողնել մեկ ամբողջ տարի, իսկ անբարենպաստ սցենարի դեպքում՝ վաղաժամ հրաժեշտ տալ մեծ ֆուտբոլին։

Աղբյուրի տեղեկություններով՝ Մենդիի մոտ ախտորոշվել է ջլի պատռվածք՝ ոսկրային պոկումով։ Եթե վերականգնողական գործընթացը բարեհաջող չընթանա, նա ստիպված կլինի ավարտել պրոֆեսիոնալ կարիերան։ Նշվում է, որ բժիշկների հիասթափեցնող կանխատեսումների ֆոնին ֆրանսիացի պաշտպանն արդեն սկսել է լրջորեն մտածել կարիերան ավարտելու մասին։

Ֆերլան Մենդին Մադրիդի «Ռեալի» գույները պաշտպանում է 2019 թվականից։ Ընթացիկ մրցաշրջանում նա բոլոր մրցաշարերում մասնակցել է ընդամենը 9 հանդիպման՝ արդյունավետ գործողություններով աչքի չընկնելով։

Ֆրանսիացի պաշտպանի գործող պայմանագրի ժամկետն ակումբի հետ նախատեսված է մինչև 2028 թվականի ամառը։ Ըստ Transfermarkt պորտալի՝ ֆուտբոլիստի տրանսֆերային արժեքը ներկայումս կազմում է 6 միլիոն եվրո։

Հերթականը․ Ռեալը հայտնել է Մենդիի վնասվածքի մասին

Gevorg Martirosyan — Mon, 04 May 2026 17:21:32 +0000

Մադրիդի «Ռեալը» պաշտոնապես հայտնել է թիմի պաշտպան Ֆերլան Մենդիի վնասվածքի բնույթի մասին։

«Ակումբի բժշկական ծառայության կողմից մեր ֆուտբոլիստ Ֆերլան Մենդիի՝ այսօր անցած բուժզննման արդյունքում ախտորոշվել է աջ ոտքի ազդրի ուղիղ մկանի ջլի վնասվածք: Վերականգնման ժամկետները ճշտվում են»,- նշված է մադրիդյան ակումբի մամուլի ծառայության տարածած հաղորդագրության մեջ։

30-ամյա ֆրանսիացին վնասվածք էր ստացել և փոխարինվել Լա Լիգայի 34-րդ տուրի՝ «Էսպանյոլի» դեմ խաղի (2:0) 14-րդ րոպեին։ Մենդիի համար սա արդեն հինգերորդ վնասվածքն է ընթացիկ մրցաշրջանում։

Այս մրցաշրջանում պաշտպանը մասնակցել է ընդամենը 9 հանդիպման՝ աչքի չընկնելով արդյունավետ գործողություններով։

Անորոշություն Ռեալում. ե՞րբ խաղադաշտ կվերադառնա Ֆերլան Մենդին

Gevorg Martirosyan — Fri, 13 Mar 2026 19:48:54 +0000

Մադրիդի «Ռեալը» պաշտոնապես հայտնել է թիմի ֆրանսիացի պաշտպան Ֆերլան Մենդիի վնասվածքի մասին։

Բուժզննման արդյունքում 30-ամյա ֆուտբոլիստի մոտ ախտորոշվել է աջ ոտքի ազդրի երկգլուխ մկանի վնասվածք։ Նրա ապաքինման և խաղադաշտ վերադառնալու ստույգ ժամկետները դեռևս հայտնի չեն։

Մենդին վնասվածքը ստացել է Չեմպիոնների լիգայի 1/8 եզրափակչի՝ «Մանչեսթեր Սիթիի» դեմ տնային հաղթական խաղում (3:0)։ Ֆրանսիացին մասնակցել է միայն առաջին խաղակեսին, որից հետո ընդմիջմանը նրան փոխարինել է Ֆրան Գարսիան։

«Ակումբի բուժծառայության կողմից մեր խաղացող Ֆերլան Մենդիի հետազոտությունից հետո ախտորոշվել է աջ ոտքի ազդրի երկգլուխ մկանի վնասվածք։ Ապաքինման ժամկետները կախված կլինեն վերականգնողական գործընթացի ընթացքից», — ասված է մադրիդյան ակումբի տարածած պաշտոնական հաղորդագրության մեջ։

Հավելենք, որ ընթացիկ մրցաշրջանում ֆրանսիացի պաշտպանը հասցրել էր մասնակցել ընդամենը հինգ հանդիպման։

Մբապեն ու ևս երկու աստղ կարող են բաց թողնել Ման Սիթիի դեմ խաղը

Gevorg Martirosyan — Thu, 12 Mar 2026 16:45:38 +0000

Մադրիդի «Ռեալի» հարձակվող Կիլիան Մբապեն, ինչպես նաև պաշտպաններ Ալվարո Կառերասն ու Ֆերլան Մենդին չեն մասնակցի Իսպանիայի առաջնության 28-րդ տուրի՝ «Էլչեի» դեմ հանդիպմանը։ Այս մասին հայտնում է իսպանացի հայտնի լրագրող Մելչոր Ռուիսը։

Ըստ աղբյուրի՝ այս երեք առանցքային ֆուտբոլիստների մասնակցությունը Չեմպիոնների լիգայի 1/8 եզրափակչի՝ «Մանչեսթեր Սիթիի» դեմ սպասվող պատասխան խաղին նույնպես դեռևս մնում է մեծ հարցականի տակ։

Միևնույն ժամանակ, COPE-ի փոխանցմամբ, դրական նորություններ կան կիսապաշտպան Օրելիեն Չուամենիի ճամբարից։

Ֆրանսիացին, որը «Սիթիի» դեմ առաջին հանդիպման վերջնամասում աջ ոտքի շրջանում անհանգստություն և դիսկոմֆորտ ուներ, այժմ իրեն լավ է զգում։

Նա լիովին պատրաստ կլինի «Էլչեի» դեմ մրցավեճին, որը կկայանա մարտի 14-ին՝ Մադրիդում։

Մադրիդի Ռեալի ութ պաշտպան բաց կթողնի Լա լիգայի հաջորդ հանդիպումը

Suren Sahakyan — Mon, 08 Dec 2025 15:15:39 +0000

Իսպանիայի առաջնության 15-րդ տուրում Մադրիդի «Ռեալը» «Բեռնաբեուում» ոչ միայն կորցրեց կարևոր միավորներ՝ պարտվելով «Սելտային» (0-2), այլ նաև զրկվեց կարևոր խաղացողներից՝ հաջորդ տուրի «Ալավեսի» դեմ հանդիպումից առաջ։

Մադրիդյան գրանդի բրազիլացի պաշտպան Էդեր Միլիտաոն վնասվածք ստացավ առաջին խաղակեսում, իսկ Ֆրան Գարսիան և Ալվարո Կարերասը հեռացվեցին խաղադաշտից ընդմիջումից հետո։

Ըստ The Touchline-ի՝ «Ռեալի» ութ պաշտպաններ բաց կթողնեն Լա լիգայի հաջորդ խաղը «Ալավեսի» դեմ։ Բացի վերը նշված երեք պաշտպաններից, առաջիկա հանդիպումը բաց կթողնեն նաև Դին Հաուսենը, Տրենտ Ալեքսանդր-Առնոլդը, Դանի Կարվախալը, Դավիդ Ալաբան և Ֆերլան Մենդին։

«Ռեալի» և «Ալավեսի» միջև խաղը կկայանա հաջորդ կիրակի՝ դեկտեմբերի 14-ին։ Դրանից չորս օր առաջ Խաբի Ալոնսայի թիմը տանը՝ Չեմպիոնների լիգայի խաղում, կընդունի «Մանչեսթեր Սիթիին»։

Ռեալը զգուշացրել է ֆուտբոլիստին, որ կխզի պայմանագիրը, եթե իրավիճակը չշտկվի

Suren Sahakyan — Sun, 19 Oct 2025 17:45:34 +0000

Մադրիդի «Ռեալի» ղեկավարությունը քննարկում է թիմի ֆրանսիացի ձախ պաշտպան Ֆերլան Մենդիից բաժանվելու հնարավորությունը։ Այս մասին հայտնում է Fichajes-ը։

30-ամյա ֆուտբոլիստը դեռ շարունակում է վերականգնվել վնասվածքից, որը նրան խաղադաշտից դուրս է թողել գրեթե կես տարով՝ ապրիլի վերջից։

Աղբյուրի տեղեկություններով՝ «սերուցքայինների» ղեկավարությունը զգուշացրել է ֆրանսիացուն, որ եթե նրա ֆիզիկական վիճակը չբարելավվի, պայմանագիրը կարող է վաղաժամկետ խզվել՝ մինչև 2026 թվականը։

Ֆերլան Մենդիի գործող պայմանագրի ժամկետը մադրիդյան գրանդի հետ նախատեսված է մինչև 2028 թվականի կեսերը։ Ֆրանսիացին «արքայական» ակումբ է տեղափոխվել 2019 թվականին՝ «Լիոնից»։ Նա ակումբի կազմում անցկացրել է 201 խաղ բոլոր մրցաշարերում։