Մադրիդի «Ռեալի» կիսապաշտպան Ֆեդերիկո Վալվերդեն մեկնաբանել է թիմակից Օրելյեն Չուամենիի հետ ունեցած կոնֆլիկտը, ինչպես նաև կիսվել առաջիկա Աշխարհի առաջնությունից ունեցած սպասելիքներով: Այս մասին հայտնում է Madrid Universal-ը:

27-ամյա ֆուտբոլիստն արդեն ժամանել է Ուրուգվայի ազգային հավաքականի ճամբար՝ նախապատրաստվելու գլխավոր ֆուտբոլային ստուգատեսին։

«Ինձ հիանալի եմ զգում։ Ես ստացել եմ «Ռեալի» բոլոր երկրպագուների, ինչպես նաև անձամբ ակումբի աջակցությունն ու սերը։ Երբեմն ֆուտբոլում և կյանքում ստիպված ես լինում անցնել նման փորձությունների միջով՝ սովորելու, աճելու և ավելի հասուն մարդ դառնալու համար»,- նշել է Վալվերդեն:

Չնայած վերջին իրադարձությունների շուրջ բարձրացած աղմուկին՝ ուրուգվայցին ընդգծել է, որ այժմ լիովին կենտրոնացած է Աշխարհի առաջնությունում իր երկրի հավաքականին օգնելու վրա.

«Ես միշտ երազում եմ բարձրացնել այդ գավաթը։ Դա այն է, ինչն ամենաշատն ես ցանկանում, ինչի մասին երազում ես մանկուց՝ խաղալ հավաքականում և հաղթել Աշխարհի առաջնությունում»:

Վալվերդեն հիշել է նաև 2010 թվականին Հարավային Աֆրիկայում կայացած Մունդիալը, որտեղ Ուրուգվայի հավաքականը հասավ մինչև կիսաեզրափակիչ և զբաղեցրեց 4-րդ հորիզոնականը:

«Մենք մեծացել ենք այդ պատկերներով և շատ կցանկանայինք կրկնել նման մի բան, որպեսզի Ուրուգվայը կրկին հպարտանա մեզնով»,- հավելել է ֆուտբոլիստը։

Աշխարհի առաջնության խմբային փուլում Ուրուգվայի ազգային հավաքականը կմրցի Իսպանիայի, Սաուդյան Արաբիայի և Կաբո-Վերդեի ընտրանիների հետ:

Հայտնի մարզական The Athletic պարբերականը կազմել է եվրոպական թոփ-5 լիգաների 2025/2026 մրցաշրջանի խորհրդանշական հավաքականը։

Ուշագրավ է, որ լավագույնների թիմում ընդգրկվել է միանգամից հինգ ֆուտբոլիստ ֆրանսիական ՊՍԺ-ից։ Երկուական ներկայացուցիչ ունեն Մյունխենի «Բավարիան» և Լոնդոնի «Արսենալը», իսկ ահա իսպանական գրանդներից՝ Մադրիդի «Ռեալից» ու «Բարսելոնայից», խորհրդանշական թիմում տեղ է գտել մեկական ֆուտբոլիստ։

The Athletic-ի վարկածով 2025/26 մրցաշրջանի խորհրդանշական հավաքականն ունի հետևյալ տեսքը.

Դարպասապահ՝ Դավիդ Ռայա («Արսենալ»)

Պաշտպաններ՝ Աշրաֆ Հակիմի (ՊՍԺ), Մարկինյոս (ՊՍԺ), Գաբրիել Մագալյանս («Արսենալ»), Նունու Մենդեշ (ՊՍԺ)

Կիսապաշտպաններ՝ Ֆեդերիկո Վալվերդե («Ռեալ Մադրիդ»), Վիտինյա (ՊՍԺ), Ժոաու Նևեշ (ՊՍԺ)

Հարձակվողներ՝ Մայքլ Օլիսե («Բավարիա»), Լամին Յամալ («Բարսելոնա»), Հարի Քեյն («Բավարիա»)

Մադրիդի «Ռեալի» կիսապաշտպան Ֆեդերիկո Վալվերդեն լիարժեք մարզում է անցկացրել թիմի կազմում՝ թիմակից Օրելյեն Չուամենիի հետ ծեծկռտուքից և գանգուղեղային վնասվածք ստանալուց հետո առաջին անգամ։ 

Հիշեցնենք, որ մայիսի 7-ին կայացած մարզման ժամանակ Վալվերդեն և Չուամենին վիճաբանել էին, ինչը վերածվել էր ծեծկռտուքի։ Արդյունքում ուրուգվայցին տեղափոխվել էր հիվանդանոց, որտեղ նրա մոտ ախտորոշվել էր գանգուղեղային վնասվածք, և կարեր դնելու անհրաժեշտություն էր առաջացել։ Նշվում էր, որ ֆուտբոլիստների միջև կոնֆլիկտը սկսվել էր միջադեպից դեռ մեկ օր առաջ։

Մադրիդյան ակումբը խիստ պատժել է երկու խաղացողներին՝ յուրաքանչյուրին տուգանելով 500 հազարական եվրոյով։

Չորեքշաբթի օրը Վալվերդեն սկանդալային միջադեպից հետո առաջին անգամ լիարժեք մարզում է անցկացրել ընդհանուր խմբում: Նա ամբողջությամբ ապաքինվել է և կարող է մասնակցել Լա Լիգայի 38-րդ տուրի՝ մայիսի 23-ին կայանալիք «Ատլետիկի» դեմ խաղին:

Կատալոնական «Բարսելոնայի» կիսապաշտպան Գավին իր կարծիքն է հայտնել Մադրիդի «Ռեալի» ֆուտբոլիստներ Ֆեդերիկո Վալվերդեի և Օրելյեն Չուամենիի միջև վերջերս տեղի ունեցած միջադեպի վերաբերյալ։

«Ես այն ֆուտբոլիստներից եմ, ովքեր կարծում են, որ մրցաշրջանի ընթացքում մարզումներին թիմակիցների միջև բախումներն անխուսափելի են. դա առողջ մրցակցության մի մասն է և նորմալ է մինչև որոշակի սահման։ Սակայն, եթե գործը հասել է իսկական ծեծկռտուքի, ապա մարզիչն իրավունք չուներ նրան դաշտ դուրս բերելու։

Եթե նրանց կռվելու մասին լուրերը ճիշտ են, ապա, իմ կարծիքով, մարզիչը սխալվել է՝ Չուամենիին հայտավորելով և խաղաժամանակ տրամադրելով։ Թեև պետք է խոստովանեմ, որ հստակ չգիտեմ՝ ինչ է իրականում կատարվել»,- իսպանացի ֆուտբոլիստի խոսքերն է փոխանցում Mundo Deportivo-ն։

Հիշեցնենք, որ մայիսի 7-ին իսպանական մամուլում տեղեկություններ տարածվեցին այն մասին, որ Վալվերդեի և Չուամենիի միջև մարզման ժամանակ ծագած վեճը հանդերձարանում վերածվել է ծեծկռտուքի։

Միջադեպի հետևանքով ուրուգվայցի կիսապաշտպանը գլխի պատռվածքով տեղափոխվել էր հիվանդանոց։ «Արքայական ակումբը» խստորեն պատժել է երկու ֆուտբոլիստներին՝ տուգանելով նրանց յուրաքանչյուրին 500 հազար եվրոյով։

Մադրիդի «Ռեալի» կիսապաշտպան Ֆեդերիկո Վալվերդեն թիմակից Օրելյեն Չուամենիի հետ ունեցած կոնֆլիկտից հետո վերսկսել է մարզումները թիմի կազմում: Այս մասին հայտնում է մադրիդյան ակումբի պաշտոնական կայքը:

Ավելի վաղ հաղորդվում էր, որ բախման հետևանքով ուրուգվայցի ֆուտբոլիստը գլխի պատռվածք էր ստացել և տեղափոխվել հիվանդանոց: Միջադեպից հետո երկու խաղացողներն էլ տուգանվել էին 500 հազարական եվրոյով:

Ակումբի մամուլի ծառայության տարածած հաղորդագրության մեջ, մասնավորապես, նշվում է.

«Մեր թիմը մարզում է անցկացրել «Սյուդադ Ռեալ Մադրիդ» մարզաբազայում: «Օվիեդոյի» դեմ հաղթական խաղի մեկնարկային կազմի ֆուտբոլիստները վերականգնողական վարժություններ են կատարել մարզասրահում: Մյուս խաղացողները նախավարժանքն սկսել են դաշտում, ինչից հետո կատարել են գնդակով և դարպասին հարվածներով վարժություններ: Վերջում ֆուտբոլիստները բարձր պրեսինգով մարզումային հանդիպում են անցկացրել, ինչպես նաև ևս մեկ խաղ՝ փոքրացված դաշտում։

Անդրեյ Լունինը վիրուսային վարակի պատճառով բաց է թողել մարզումը, իսկ Վալվերդեն պարապմունքի մի մասն անցկացրել է ընդհանուր խմբում: Ֆերլան Մենդին, Էդեր Միլիտաոն, Արդա Գյուլերն ու Ռոդրիգոն շարունակում են ապաքինվել: Ալվարո Արբելոայի գլխավորած թիմը հաջորդ հանդիպումը կանցկացնի Լա Լիգայի նախավերջին՝ 37-րդ տուրում՝ մայիսի 17-ին հյուրընկալվելով «Սևիլիային» «Ռամոն Սանչես Պիսխուան» մարզադաշտում»:

Ֆրանսիական ՊՍԺ-ն շարունակում է ուղիներ փնտրել թիմի կազմն ուժեղացնելու համար։ Իսպանական հայտնի El Chiringuito հաղորդաշարի եթերում տեղեկություն է տարածվել այն մասին, որ Լիգա 1-ի գրանդը կապ է հաստատել Մադրիդի «Ռեալի» կիսապաշտպան Ֆեդերիկո Վալվերդեի ներկայացուցիչների հետ։

Միևնույն ժամանակ ընդգծվել է, որ փարիզյան ակումբի և Վալվերդեի շրջապատի միջև շփումը դեռևս չի նշանակում, թե ուրուգվայցին ցանկանում է հեռանալ «արքայական» ակումբից, կամ որ մադրիդյան թիմը մտադիր է վաճառել իր առանցքային ֆուտբոլիստին։

Նշենք, որ 27-ամյա Ֆեդերիկո Վալվերդեի տրանսֆերային արժեքը Transfermarkt պորտալը գնահատում է 120 միլիոն եվրո։ Ուրուգվայցի կիսապաշտպանի գործող պայմանագրի ժամկետը նախատեսված է մինչև 2029 թվականի ամառ։

Հիշեցնենք նաև, որ ավելի վաղ Վալվերդեն թիմակից Օրելիեն Չուամենիի հետ ունեցած կոնֆլիկտի պատճառով տուգանվել էր 500 հազար եվրոյով։ «Ռեալի» կողմից նույնաչափ պատիժ էր սահմանվել նաև ֆրանսիացի ֆուտբոլիստի նկատմամբ։

Մադրիդի «Ռեալի» նախագահ Ֆլորենտինո Պերեսը մեկնաբանել է թիմի կիսապաշտպաններ Ֆեդերիկո Վալվերդեի և Օրելիեն Չուամենիի մասնակցությամբ տեղի ունեցած միջադեպը։

«Սա ֆուտբոլիստների միջև ծեծկռտուքի առաջին դեպքը չէ։ Նրանք կռվում են գրեթե ամեն մրցաշրջանում, քանի որ անընդհատ մոտիվացնում և ստիպում են միմյանց ավելին անել։

Տղաների միջև ծեծկռտուքը սարսափելի էր, բայց շատ ավելի վատ է, որ այդ մասին հայտնի դարձավ մամուլին։ Նման բաներ պատահում են ամեն տարի, երբեմն էլ՝ մի քանի անգամ, բայց նախկինում երբեք ինֆորմացիայի արտահոսք չէր լինում։ Սա առաջին դեպքն է»,- ասել է Պերեսը մամուլի ասուլիսի ժամանակ։

Հիշեցնենք, որ մայիսի 7-ին հայտնի էր դարձել, որ մարզման ժամանակ բառակռիվ է տեղի ունեցել Ֆեդերիկո Վալվերդեի և Օրելիեն Չուամենիի միջև, ինչն արդեն հանդերձարանում վերածվել է ծեծկռտուքի։ Բախման արդյունքում ուրուգվայցի կիսապաշտպանը գլխի պատռվածք էր ստացել և տեղափոխվել հիվանդանոց։ Ակումբը երկու ֆուտբոլիստներին էլ տուգանել է 500 հազարական եվրոյով։

Մադրիդի «Ռեալում» առանձնացրել են այն ֆուտբոլիստների խումբը, որոնց հետ ակումբը լուրջ հույսեր է կապում: Այդ ցուցակում ընդգրկված է յոթ «անձեռնմխելի» խաղացող՝ Տիբո Կուրտուան, Անդրեյ Լունինը, Ջուդ Բելինգեմը, Ֆեդերիկո Վալվերդեն, Արդա Գյուլերը, Կիլիան Մբապեն և Էնդրիկը:

Ինչպես նշում է The Touchline-ը, թիմի հարձակվող Վինիսիուս Ժունիորը չի հայտնվել այս ցուցակում՝ պայմանագրի երկարաձգման շուրջ ընթացող բանակցություններում առաջացած բարդությունների պատճառով: Բրազիլացի ֆուտբոլիստի գործող պայմանագիրն ակումբի հետ նախատեսված է մինչև 2027 թվականի կեսերը:

Հիշեցնենք, որ «Ռեալը» 2025/2026 մրցաշրջանն ավարտում է առանց տիտղոսների: Մայիսի 10-ին կայացած «Էլ Կլասիկոյում» մադրիդցիները 0-2 հաշվով պարտություն էին կրել կատալոնական «Բարսելոնայից»:

Լեգենդար պորտուգալացի ֆուտբոլիստ Լուիշ Ֆիգուն անդրադարձել է Մադրիդի «Ռեալում» ստեղծված բարդ բարոյահոգեբանական մթնոլորտին, Օրելիեն Չուամենիի և Ֆեդերիկո Վալվերդեի միջև տեղի ունեցած ծեծկռտուքին, ինչպես նաև գլխավոր մարզչի պաշտոնում Ժոզե Մոուրինյուի հնարավոր վերադարձին։

Վերջին օրերին իսպանական և համաշխարհային մամուլի գլխավոր թեման «արքայական ակումբի» կիսապաշտպաններ Չուամենիի և Վալվերդեի միջև մարզման ժամանակ տեղի ունեցած բախումն է։ Ինչպես հայտնի էր դարձել ավելի վաղ, միջադեպի հետևանքով ուրուգվայցին գանգուղեղային վնասվածքով հայտնվել էր հիվանդանոցում, իսկ ակումբի մամուլի ծառայությունը հաստատել էր մեղավորների նկատմամբ կիրառված խոշոր դրամական տուգանքների մասին լուրը:

«Այն, ինչ տեղի ունեցավ «Ռեալում», նորմալ չէ։ Նման վայրում սա չպետք է պատահեր, թեև սա առաջին ու վերջին անգամը չէ։ Նման իրավիճակներ հանդերձարանում կարող են առաջանալ հիասթափության պահերին»,- Ֆիգուի խոսքերն է մեջբերում Diario Sport-ը։

Ստեղծված ճգնաժամային իրավիճակի և թիմում կարգապահական խնդիրների ֆոնին ակտիվորեն լուրեր են շրջանառվում նաև «Բենֆիկայի» ներկայիս գլխավոր մարզիչ Ժոզե Մոուրինյուի՝ Մադրիդ հնարավոր վերադարձի մասին: Նշվում է, որ կողմերն արդեն սկսել են բանակցային գործընթացը։ Սակայն Ֆիգուն համոզված չէ, որ իր հայրենակիցն այն մասնագետն է, որն այս պահին անհրաժեշտ է «սերուցքայիններին»։ Ըստ նախկին ֆուտբոլիստի՝ իսպանական գրանդին այժմ ավելի կոշտ և կարգապահություն հաստատող մարզիչ է հարկավոր։

«Իմ ժամանակ նա թարգմանիչ էր, մարզչի օգնական, գլխավոր մարզիչ և ընկեր։ Ես երբեք չեմ զգացել, որ նա չափազանց իշխող մարզիչ է: Անկեղծ ասած, ես չեմ կարծում, որ «Ռեալին» դա է պետք՝ հաշվի առնելով ակումբն ու այնտեղ տիրող մթնոլորտը»,- նշել է պորտուգալացին:

Հատկանշական է, որ հանրությանը ցնցած այս իրադարձությունները տեղի են ունենում մրցաշրջանի գլխավոր հանդիպումներից մեկի՝ առաջիկա կիրակի օրը՝ մայիսի 10-ին կայանալիք «Էլ Կլասիկոյի» նախաշեմին: Լա Լիգայի 34 տուրից հետո Ալվարո Արբելոայի գլխավորած թիմը զբաղեցնում է երկրորդ հորիզոնականը՝ «Բարսելոնայից» հետ մնալով 11 միավորով: Չեմպիոնության մաթեմատիկական շանսերը պահպանելու համար մադրիդցիներին անհրաժեշտ է միայն հաղթանակ տոնել կատալոնացիների նկատմամբ։

Մադրիդի «Ռեալի» կիսապաշտպան Ֆեդերիկո Վալվերդեի կինը սոցիալական ցանցերում հրապարակել է ամուսնու նոր լուսանկարը։

Սա ուրուգվայցի ֆուտբոլիստի առաջին լուսանկարն է թիմակից Օրելիեն Չուամենիի հետ ունեցած վերջին կոնֆլիկտից և ակումբի կողմից կիրառված խոշոր տուգանքից հետո։

Հրապարակված կադրում «արքայական ակումբի» ֆուտբոլիստը գլխարկով է և ջերմորեն ժպտում է որդու հետ, որը ճտի զվարճալի հագուստով է։

Ֆուտբոլիստի կինը լուսանկարին կից կատարել է հետևյալ գրառումը․

«Աստվա՜ծ իմ, նրանք ինձ պարզապես զինաթափում են, հահահա»,- գրել է նա։