Մյունխենի «Բավարիայի» և Ֆրանսիայի հավաքականի ֆուտբոլիստ Մայքլ Օլիսեն ազգային թիմի իր թիմակիցների հետ քննարկել է Մադրիդի «Ռեալ» հնարավոր տեղափոխությունը: Այս մասին հայտնում է ֆրանսիական հեղինակավոր L’Equipe պարբերականը:

Ավելի վաղ հաղորդվում էր, որ «արքայական» ակումբը պատրաստ է 23-ամյա խաղացողի համար վճարել տպավորիչ 200-220 միլիոն եվրո։ Ինքը՝ ֆուտբոլիստը, նույնպես ցանկանում է կարիերան շարունակել Մադրիդում, սակայն «Բավարիան» կտրականապես դեմ է տրանսֆերին և հրաժարվում է վաճառել ֆրանսիացուն:

Աղբյուրի փոխանցմամբ՝ Օլիսեն Ֆրանսիայի հավաքականի ճամբարում մոտեցել է «Ռեալում» հանդես եկող Կիլիան Մբապեին և Օրելյեն Չուամենիին՝ հարցուփորձ անելով մադրիդյան ակումբի ներքին խոհանոցի և մթնոլորտի մասին։

Սպասվում է, որ Օլիսեի և «Բավարիայի» ղեկավարության միջև վերջնական բանակցությունները կկայանան ԱԱ-2026-ի ավարտից հետո: Աշխարհի առաջնությունում Ֆրանսիայի ընտրանին երրորդ տեղի համար պայքարում ուժերն է չափելու Անգլիայի հավաքականի հետ։

Նշենք, որ 2025/26 մրցաշրջանում Օլիսեն «Բավարիայի» կազմում անցկացրել է 52 հանդիպում՝ դառնալով 22 գոլի և անհավանական 31 գոլային փոխանցման հեղինակ։ Իսկ ԱԱ-2026-ում կիսապաշտպանն անցկացրած 7 խաղում իր ակտիվում արդեն գրանցել է 5 ասիստ:

Մադրիդի «Ռեալն» ինտենսիվորեն կզբաղվի կազմի «զտմամբ»։ Ամռան սկզբին «սերուցքայիններն» իրականացրին մի շարք աղմկոտ տրանսֆերային գործարքներ, սակայն այժմ թիմը վաճառքների խիստ կարիք ունի։

Marca-ի տեղեկություններով՝ մադրիդյան ակումբում նոր ձեռքբերումներ չեն լինի այնքան ժամանակ, մինչև չհաջողվի վաճառել ներկայիս ֆուտբոլիստներից որևէ մեկին։ «Արքայական» ակումբի ղեկավարությունը կարծում է, որ թիմում այժմ չափազանց շատ խաղացողներ կան, ինչը գերբեռնվածություն է ստեղծում։

Շրջանառվող լուրերի համաձայն՝ հավանական հեռացողների թվում են Էդուարդո Կամավինգան, Օրելյեն Չուամենին, Դանի Սեբալյոսը, Ռաուլ Ասենսիոն, Ֆրան Գարսիան և այլք։ Սակայն ֆուտբոլիստները, ինչպես հաճախ պատահում է նման դեպքերում, ամենևին էլ չեն ցանկանում լքել Մադրիդը։

Հիշեցնենք, որ հունիսին մադրիդյան գրանդի գլխավոր մարզչի պաշտոնը ստանձնել է Ժոզե Մոուրինյուն՝ այդ պաշտոնում փոխարինելով Ալվարո Արբելոային։

Մադրիդի «Ռեալի» կիսապաշտպան Ֆեդերիկո Վալվերդեն մեկնաբանել է թիմակից Օրելյեն Չուամենիի հետ ունեցած կոնֆլիկտը, ինչպես նաև կիսվել առաջիկա Աշխարհի առաջնությունից ունեցած սպասելիքներով: Այս մասին հայտնում է Madrid Universal-ը:

27-ամյա ֆուտբոլիստն արդեն ժամանել է Ուրուգվայի ազգային հավաքականի ճամբար՝ նախապատրաստվելու գլխավոր ֆուտբոլային ստուգատեսին։

«Ինձ հիանալի եմ զգում։ Ես ստացել եմ «Ռեալի» բոլոր երկրպագուների, ինչպես նաև անձամբ ակումբի աջակցությունն ու սերը։ Երբեմն ֆուտբոլում և կյանքում ստիպված ես լինում անցնել նման փորձությունների միջով՝ սովորելու, աճելու և ավելի հասուն մարդ դառնալու համար»,- նշել է Վալվերդեն:

Չնայած վերջին իրադարձությունների շուրջ բարձրացած աղմուկին՝ ուրուգվայցին ընդգծել է, որ այժմ լիովին կենտրոնացած է Աշխարհի առաջնությունում իր երկրի հավաքականին օգնելու վրա.

«Ես միշտ երազում եմ բարձրացնել այդ գավաթը։ Դա այն է, ինչն ամենաշատն ես ցանկանում, ինչի մասին երազում ես մանկուց՝ խաղալ հավաքականում և հաղթել Աշխարհի առաջնությունում»:

Վալվերդեն հիշել է նաև 2010 թվականին Հարավային Աֆրիկայում կայացած Մունդիալը, որտեղ Ուրուգվայի հավաքականը հասավ մինչև կիսաեզրափակիչ և զբաղեցրեց 4-րդ հորիզոնականը:

«Մենք մեծացել ենք այդ պատկերներով և շատ կցանկանայինք կրկնել նման մի բան, որպեսզի Ուրուգվայը կրկին հպարտանա մեզնով»,- հավելել է ֆուտբոլիստը։

Աշխարհի առաջնության խմբային փուլում Ուրուգվայի ազգային հավաքականը կմրցի Իսպանիայի, Սաուդյան Արաբիայի և Կաբո-Վերդեի ընտրանիների հետ:

Ժոզե Մոուրինյուն Մադրիդի «Ռեալ» վերադառնալու դեպքում նախատեսում է թիմի կազմի լայնածավալ վերակառուցում իրականացնել։ Այս մասին հայտնում է իսպանական Marca պարբերականը։

Ըստ աղբյուրի տեղեկությունների՝ պորտուգալացի մասնագետը, ի թիվս այլ հարցերի, ղեկավարությունից կպահանջի սկզբունքային որոշում կայացնել Ֆեդերիկո Վալվերդեի և Օրելյեն Չուամենիի ապագայի վերաբերյալ։

Բանն այն է, որ ավելի վաղ կիսապաշտպանների միջև լուրջ կոնֆլիկտ է ծագել, ինչի հետևանքով մադրիդյան թիմի հանդերձարանում լարված մթնոլորտ է առաջացել։ Կատարվածից հետո Մոուրինյուն ցանկություն չունի երկու ֆուտբոլիստներին էլ միաժամանակ պահել թիմի կազմում և վճռական է տրամադրված նրանցից մեկի հեռանալու հարցում։

Հետաքրքրական է, որ չնայած «արքայական ակումբի» երկրպագուների շրջանում Վալվերդեի ունեցած մեծ ժողովրդականությանն ու խաղային ունիվերսալությանը՝ հենց Չուամենին է համարվում ավելի նախընտրելի տարբերակ պորտուգալացի մարզչի համար։

Մոուրինյուի տեսանկյունից՝ ֆրանսիացի ֆուտբոլիստն ավելի լավ է համապատասխանում իր մարտավարական պահանջներին՝ շնորհիվ բարձր դիրքային կարգապահության և հենակետային գոտում առավել հուսալի ու վստահ խաղի։

Մադրիդի «Ռեալի» կիսապաշտպան Ֆեդերիկո Վալվերդեն լիարժեք մարզում է անցկացրել թիմի կազմում՝ թիմակից Օրելյեն Չուամենիի հետ ծեծկռտուքից և գանգուղեղային վնասվածք ստանալուց հետո առաջին անգամ։ 

Հիշեցնենք, որ մայիսի 7-ին կայացած մարզման ժամանակ Վալվերդեն և Չուամենին վիճաբանել էին, ինչը վերածվել էր ծեծկռտուքի։ Արդյունքում ուրուգվայցին տեղափոխվել էր հիվանդանոց, որտեղ նրա մոտ ախտորոշվել էր գանգուղեղային վնասվածք, և կարեր դնելու անհրաժեշտություն էր առաջացել։ Նշվում էր, որ ֆուտբոլիստների միջև կոնֆլիկտը սկսվել էր միջադեպից դեռ մեկ օր առաջ։

Մադրիդյան ակումբը խիստ պատժել է երկու խաղացողներին՝ յուրաքանչյուրին տուգանելով 500 հազարական եվրոյով։

Չորեքշաբթի օրը Վալվերդեն սկանդալային միջադեպից հետո առաջին անգամ լիարժեք մարզում է անցկացրել ընդհանուր խմբում: Նա ամբողջությամբ ապաքինվել է և կարող է մասնակցել Լա Լիգայի 38-րդ տուրի՝ մայիսի 23-ին կայանալիք «Ատլետիկի» դեմ խաղին:

Կատալոնական «Բարսելոնայի» կիսապաշտպան Գավին իր կարծիքն է հայտնել Մադրիդի «Ռեալի» ֆուտբոլիստներ Ֆեդերիկո Վալվերդեի և Օրելյեն Չուամենիի միջև վերջերս տեղի ունեցած միջադեպի վերաբերյալ։

«Ես այն ֆուտբոլիստներից եմ, ովքեր կարծում են, որ մրցաշրջանի ընթացքում մարզումներին թիմակիցների միջև բախումներն անխուսափելի են. դա առողջ մրցակցության մի մասն է և նորմալ է մինչև որոշակի սահման։ Սակայն, եթե գործը հասել է իսկական ծեծկռտուքի, ապա մարզիչն իրավունք չուներ նրան դաշտ դուրս բերելու։

Եթե նրանց կռվելու մասին լուրերը ճիշտ են, ապա, իմ կարծիքով, մարզիչը սխալվել է՝ Չուամենիին հայտավորելով և խաղաժամանակ տրամադրելով։ Թեև պետք է խոստովանեմ, որ հստակ չգիտեմ՝ ինչ է իրականում կատարվել»,- իսպանացի ֆուտբոլիստի խոսքերն է փոխանցում Mundo Deportivo-ն։

Հիշեցնենք, որ մայիսի 7-ին իսպանական մամուլում տեղեկություններ տարածվեցին այն մասին, որ Վալվերդեի և Չուամենիի միջև մարզման ժամանակ ծագած վեճը հանդերձարանում վերածվել է ծեծկռտուքի։

Միջադեպի հետևանքով ուրուգվայցի կիսապաշտպանը գլխի պատռվածքով տեղափոխվել էր հիվանդանոց։ «Արքայական ակումբը» խստորեն պատժել է երկու ֆուտբոլիստներին՝ տուգանելով նրանց յուրաքանչյուրին 500 հազար եվրոյով։

Մադրիդի «Ռեալի» կիսապաշտպան Ֆեդերիկո Վալվերդեն թիմակից Օրելյեն Չուամենիի հետ ունեցած կոնֆլիկտից հետո վերսկսել է մարզումները թիմի կազմում: Այս մասին հայտնում է մադրիդյան ակումբի պաշտոնական կայքը:

Ավելի վաղ հաղորդվում էր, որ բախման հետևանքով ուրուգվայցի ֆուտբոլիստը գլխի պատռվածք էր ստացել և տեղափոխվել հիվանդանոց: Միջադեպից հետո երկու խաղացողներն էլ տուգանվել էին 500 հազարական եվրոյով:

Ակումբի մամուլի ծառայության տարածած հաղորդագրության մեջ, մասնավորապես, նշվում է.

«Մեր թիմը մարզում է անցկացրել «Սյուդադ Ռեալ Մադրիդ» մարզաբազայում: «Օվիեդոյի» դեմ հաղթական խաղի մեկնարկային կազմի ֆուտբոլիստները վերականգնողական վարժություններ են կատարել մարզասրահում: Մյուս խաղացողները նախավարժանքն սկսել են դաշտում, ինչից հետո կատարել են գնդակով և դարպասին հարվածներով վարժություններ: Վերջում ֆուտբոլիստները բարձր պրեսինգով մարզումային հանդիպում են անցկացրել, ինչպես նաև ևս մեկ խաղ՝ փոքրացված դաշտում։

Անդրեյ Լունինը վիրուսային վարակի պատճառով բաց է թողել մարզումը, իսկ Վալվերդեն պարապմունքի մի մասն անցկացրել է ընդհանուր խմբում: Ֆերլան Մենդին, Էդեր Միլիտաոն, Արդա Գյուլերն ու Ռոդրիգոն շարունակում են ապաքինվել: Ալվարո Արբելոայի գլխավորած թիմը հաջորդ հանդիպումը կանցկացնի Լա Լիգայի նախավերջին՝ 37-րդ տուրում՝ մայիսի 17-ին հյուրընկալվելով «Սևիլիային» «Ռամոն Սանչես Պիսխուան» մարզադաշտում»:

Եվրոպական մի շարք բարձրակարգ ակումբներ սպասում են Մադրիդի «Ռեալից» կիսապաշտպան Ֆեդերիկո Վալվերդեի հնարավոր հեռանալուն, ինչի պատճառը թիմակից Օրելյեն Չուամենիի հետ վերջերս տեղի ունեցած ծեծկռտուքն է:

Իսպանական AS պարբերականի հաղորդմամբ՝ 27-ամյա ֆուտբոլիստի հնարավոր տրանսֆերը կարող է արժենալ 100-ից 120 մլն եվրո։

Աղբյուրի տեղեկություններով՝ ուրուգվայցու ծառայություններով ակտիվորեն հետաքրքրված է «Մանչեսթեր Սիթին»։ Անգլիական ակումբը խաղացողի շուրջ ստեղծված իրավիճակին հետևում է դեռ 2025 թվականի ամառվանից: Միևնույն ժամանակ ընդգծվում է, որ անձամբ Վալվերդեն ամենևին չի ցանկանում լքել «արքայական ակումբը»։

Ընթացիկ մրցաշրջանում Վալվերդեն բոլոր մրցաշարերում մասնակցել է 48 հանդիպման՝ դառնալով 9 գոլի և 13 գոլային փոխանցման հեղինակ։ Ֆուտբոլիստի գործող պայմանագիրը մադրիդյան ակումբի հետ նախատեսված է մինչև 2029 թվականի ամառ: Transfermarkt պորտալի գնահատմամբ՝ կիսապաշտպանի շուկայական արժեքը կազմում է 120 մլն եվրո։

Մադրիդի «Ռեալի» հանդերձարանում խիստ անհանգիստ մթնոլորտ է։ Վերջին օրերին իսպանական մամուլը բացահայտել է ֆուտբոլիստների միջև տեղի ունեցած միանգամից երկու լուրջ կոնֆլիկտ։ Չորեքշաբթի կայացած մարզման ժամանակ բանը գրեթե հասել է ծեծկռտուքի Օրելյեն Չուամենիի և Ֆեդերիկո Վալվերդեի միջև։

«Արքայական ակումբն» ակնհայտորեն բարդ շրջան է ապրում, իսկ թիմի ներսում պառակտումն ավելի ու ավելի նկատելի է դառնում։ Ինչպես հաղորդում է Marca պարբերականը, կոլեկտիվում ձևավորվել են խաղացողների առանձին խմբավորումներ, որոնք գրեթե չեն շփվում միմյանց հետ։

Բացի այդ, ծայրահեղ լարված են հարաբերությունները մարզչական շտաբի անդամ Ալվարո Արբելոայի հետ։ «Իրավիճակն այնքան է սրվել, որ մոտ վեց ֆուտբոլիստ ընդհանրապես չի խոսում նրա հետ»,- նշվում է իսպանական պարբերականի հոդվածում։

Հատկանշական է, որ այս պայթյունավտանգ և լարված իրավիճակում մադրիդյան թիմը պատրաստվում է մրցաշրջանի առանցքային հանդիպումներից մեկին. կիրակի՝ մայիսի 10-ին, «Ռեալն» արտագնա խաղում ուժերը կչափի ոխերիմ թշնամու՝ կատալոնական «Բարսելոնայի» հետ։

Մադրիդի «Ռեալի» կիսապաշտպան Օրելյեն Չուամենին մեկնաբանել է Չեմպիոնների լիգայի քառորդ եզրափակիչի՝ Մյունխենի «Բավարիայի» դեմ առաջին խաղում (1:2) ստացած դեղին քարտը։

Այդ զգուշացման պատճառով ֆրանսիացի ֆուտբոլիստը ստիպված կլինի բաց թողնել թիմերի պատասխան հանդիպումը։ Նշենք, որ հանդիպման գլխավոր մրցավարը Մայքլ Օլիվերն էր։

«Իմ դեղին քա՞րտը… Չգիտեմ, ես պարզապես վազում էի, անգամ որևէ սահընկում չեմ արել։ Բայց մրցավարն այդպես որոշեց։ Կարծում եմ՝ պատճառն այն էր, որ մինչ այդ շատ խախտումներ էին եղել, և նա ցանկանում էր դեղին քարտ ցույց տալ: Բայց ես այնքան էլ չեմ հասկանում, թե ինչու դա արվեց կոնկրետ այդ դրվագում»,- Չուամենիի խոսքերն է մեջբերում լրագրող Ֆաբրիցիո Ռոմանոն՝ X-ի իր միկրոբլոգում։

Հիշեցնենք, որ «Բավարիայի» և «Ռեալի» միջև պատասխան հանդիպումը կկայանա ապրիլի 15-ին՝ «Մյունխեն Արենա» մարզադաշտում։