«Լիվերպուլը» իր պաշտոնական կայքում հայտարարեց «Օսասունայից» վինգեր Վիկտոր Մունյոսին ձեռք բերելու մասին։

22-ամյա ֆուտբոլիստը երկարաժամկետ պայմանագիր է կնքել։

Ավելի վաղ լրատվամիջոցները հայտնել էին, որ «կարմիրները» ակտիվացրել են 40 միլիոն եվրոյով Մունյոսի տրանսֆերը գնելու տարբերակը։

Հարձակվողը հանդես է եկել «Բարսելոնայի» և «Ռեալ Մադրիդի» երիտասարդական թիմերում։ Մունյոսը «Օսասունայի» կազմում է 2025 թվականի ամռանից։ Այս ընթացքում իսպանացի խաղացողը մասնակցել է 36 խաղի բոլոր մրցաշարերում՝ խփելով յոթ գոլ և կատարելով հինգ գոլային փոխանցում։

Իսպանական Լա Լիգայի 36-րդ տուրի շրջանակներում Մադրիդի «Ատլետիկոն» հյուրընկալվելիս ուժերը չափեց «Օսասունայի» հետ։ Պամպլոնայի «Էլ-Սադար» մարզադաշտում կայացած հանդիպումն ավարտվեց մադրիդյան ակումբի հաղթանակով՝ 2:1 հաշվով։

​Խաղի հաշիվը 15-րդ րոպեին 11-մետրանոց հարվածով բացեց «Ատլետիկոյի» հարձակվող Ադեմոլա Լուկմանը: Երկրորդ խաղակեսում՝ 72-րդ րոպեին, Ալեքսանդր Սորլոթը կրկնապատկեց հյուրերի առավելությունը։

​79-րդ րոպեին մադրիդցիները մնացին տասը հոգով. ուղիղ կարմիր քարտով խաղադաշտից հեռացվեց կիսապաշտպան Մարկոս Լյորենտեն։ Տանտերերին հաջողվեց միայն կրճատել հաշվի տարբերությունը. հիմնական ժամանակին ավելացված առաջին րոպեին (90+1′) աչքի ընկավ Էնրիկե Բարխան՝ ձևակերպելով հանդիպման վերջնական հաշիվը:

​Այս խաղից հետո «Ատլետիկոն» իր ակտիվում գրանցեց 66 միավոր և ամրապնդվեց մրցաշարային աղյուսակի 4-րդ հորիզոնականում։ «Օսասունան» 42 միավորով 11-րդն է։

Տեսանյութը՝ ԱՅՍՏԵՂ

Մրցաշարային աղյուսակն այս պահին

Իսպանական Լա Լիգայի 34-րդ տուրում «Բարսելոնան» արտագնա խաղում 2:1 հաշվով առավելության հասավ «Օսասունայի» նկատմամբ։

Հանդիպման հաշիվը 81-րդ րոպեին բացեց Ռոբերտ Լևանդովսկին։ 5 րոպե անց հյուրերի առավելությունը կրկնապատկեց Ֆեռան Տոռեսը, իսկ դաշտի տերերի հարձակվող Ռաուլ Գարսիան 88-րդ րոպեին կարողացավ հետ բերել մեկ գնդակ։

«Բարսելոնան» (88 միավոր) 10-րդ անընդմեջ հաղթանակը տոնեց Լա Լիգայում և շարունակում է վստահորեն գլխավորել մրցաշարային աղյուսակը։

Կատալոնացիները 14 միավորով առաջ են Մադրիդի «Ռեալից», որը մեկ խաղ պակաս է անցկացրել։ «Օսասունան» 42 միավորով ընթանում է 10-րդ տեղում։

Տեսանյութը՝ ԱՅՍՏԵՂ

Մրցաշարային աղյուսակն այս պահին

«Բարսելոնայի» միանգամից երեք ֆուտբոլիստ հայտնվել է որակազրկման վտանգի տակ՝ Մադրիդի «Ռեալի» դեմ սպասվող Էլ Կլասիկոյից անմիջապես առաջ։

Խոսքը վերաբերում է Ռաֆինյային, Ֆրենկի դե Յոնգին և Մարկ Բեռնալին։ Այս ֆուտբոլիստները ստիպված կլինեն բաց թողնել Իսպանիայի առաջնության հաջորդ տուրի գերսկզբունքային հանդիպումը, եթե այսօր՝ մայիսի 2-ին դեղին քարտ ստանան «Օսասունայի» դեմ կայանալիք խաղում:

Նշենք, որ «Օսասունա» – «Բարսելոնա» հանդիպումը կմեկնարկի Երևանի ժամանակով 23:00-ին, իսկ կատալոնական գրանդի տնային դիմակայությունը «սերուցքայինների» հետ տեղի կունենա մայիսի 10-ին՝ նույն ժամին:

Ներկայումս Հանս-Դիտեր Ֆլիկի գլխավորած թիմը վստահորեն գլխավորում է Լա լիգայի մրցաշարային աղյուսակը՝ առաջնության ավարտից 5 տուր առաջ 11 միավորով գերազանցելով հենց «սերուցքայիններին»։

Կատալոնական «Բարսելոնան» լուրջ մտադրություն ուներ ձեռք բերելու «Օսասունայի» 22-ամյա վինգեր Վիկտոր Մունյոսին, սակայն Մադրիդի «Ռեալը» փաստացի վետո է դրել այդ տրանսֆերի վրա: Ինչպես հայտնում է իսպանական AS պարբերականը, պատճառը մադրիդյան ակումբի պայմանագրային խորամանկությունն է։

Մունյոսը ծնվել է Բարսելոնայում և հանդիսանում է «Լա Մասիայի» սան, սակայն 2017-ին հեռանալուց հետո հայտնվել էր «Ռեալի» համակարգում: Նախորդ ամռանը նա 5 միլիոն եվրոյով տեղափոխվեց «Օսասունա», որտեղ այս մրցաշրջանում անցկացրած 33 խաղում դարձել է 6 գոլի և 5 գոլային փոխանցման հեղինակ: Սրընթաց առաջընթացի շնորհիվ վինգերը նորամուտն է նշել Իսպանիայի հավաքականում՝ գոլ խփելով Սերբիային, և դարձել առաջիկա աշխարհի առաջնությանը մեկնող հավանական թեկնածուներից մեկը։

Ինչու՞ է «Բարսելոնան» անզոր այս իրավիճակում. բանն այն է, որ «Ռեալը» վաճառքի ժամանակ պահպանել է խաղացողին ընդամենը 8 միլիոն եվրոյով հետ գնելու իրավունքը։ Բացի այդ, չնայած Մունյոսի պարտադիր հրաժարագինը 40 միլիոն եվրո է, մադրիդցիներին է պատկանում վերավաճառքի գումարի 50 տոկոսը և առաջնահերթ գնման իրավունքը։

Փաստացի, չնայած անգլիական, իտալական ակումբների և կատալոնացիների մեծ հետաքրքրությանը, «Ռեալը» կարող է ցանկացած պահի միջամտել գործարքին: Մադրիդյան գրանդն ամբողջությամբ վերահսկում է իրավիճակը՝ թույլ չտալով, որ իր գլխավոր մրցակիցն ուժեղանա։

Մադրիդի «Ռեալն» ամռանը պատրաստվում է համալրել կազմը՝ թիմ վերադարձնելով իր երեք խաղացողներին։

Ինչպես հաղորդում է Cadena SER ռադիոկայանը, մադրիդյան ակումբ կվերադառնան հարձակվողական ոճի կիսապաշտպան Նիկոլաս Պասը, ինչպես նաև հարձակվողներ Վիկտոր Մունյոսն ու Էնդրիկը։ Նախատեսվում է, որ ֆուտբոլիստների այս եռյակը կմասնակցի «սերուցքայինների» նախամրցաշրջանային հավաքին և նախապատրաստական փուլին։

Հիշեցնենք, որ 19-ամյա Էնդրիկը ձմռանը վարձավճարային հիմունքներով տեղափոխվել էր ֆրանսիական «Լիոն»։ 21-ամյա Պասը և 22-ամյա Մունյոսն այժմ հանդես են գալիս համապատասխանաբար իտալական «Կոմոյում» և իսպանական «Օսասունայում», սակայն «Ռեալը» պահպանել է նրանց տրանսֆերները հետ գնելու բացառիկ իրավունքը։

Ներկայումս «Ռեալը» Իսպանիայի Լա Լիգայի մրցաշարային աղյուսակում զբաղեցնում է երկրորդ հորիզոնականը։ Ալվարո Արբելոայի գլխավորած թիմն առաջատար «Բարսելոնայից» հետ է մնում ընդամենը չորս միավորով։

Լա Լիգան կուսումնասիրի Իսպանիայի առաջնության 25-րդ տուրի «Օսասունա» — «Ռեալ Մադրիդ» (2:1) հանդիպման տեսագրությունը, որտեղ Պամպլոնան ներկայացնող թիմի երկրպագուները, հավանաբար, վանկարկել են՝ «Վինիսիուս, մեռի՛ր»։ Այս մասին հայտնում է The Athletic-ը։

Աղբյուրի փոխանցմամբ՝ նշված հանդիպման ժամանակ «Օսասունայի» երկրպագուները վանկարկել են նաև «Վինիսիուս, լողափնյա գնդակ» (ակնարկ այն բանին, որ բրազիլացին չստացավ 2024 թվականի «Ոսկե գնդակը»), ինչպես նաև վիրավորական արտահայտություններ հնչեցրել Մադրիդի «Ռեալի» վինգերի հասցեին։

Նշենք, որ այդ հանդիպման 73-րդ րոպեին Վինիսիուսը դարձել է գոլի հեղինակ։ Իսպանիայի ընթացիկ առաջնությունում բրազիլացի հարձակվողն ընդհանուր առմամբ մասնակցել է 24 հանդիպման՝ դառնալով 9 գոլի և 5 արդյունավետ փոխանցման հեղինակ։

Մադրիդի «Ռեալի» կիսապաշտպան Դանի Սեբալյոսը հայտարարել է, որ ընդունում է իր մեղքն Իսպանիայի առաջնությունում «Օսասունայից» կրած պարտության համար։

Շաբաթ օրը Լա Լիգայի 25-րդ տուրի շրջանակում «Ռեալը» 1:2 հաշվով արտագնա պարտություն կրեց «Օսասունայից»: Հանդիպման 90-րդ րոպեին տանտերերի հարձակվող Ռաուլ Գարսիան խփեց հաղթական գոլն այն բանից հետո, երբ Սեբալյոսն անճշտություն թույլ տվեց փոխանցում կատարելիս։

«Ես պատասխանատվությունը վերցնում եմ ինձ վրա»,- խաղից հետո իր սոցցանցերում գրել է 29-ամյա իսպանացին։

Նշենք, որ ընթացիկ մրցաշրջանում Սեբալյոսը Լա Լիգայում անցկացրել է 15 հանդիպում՝ առայժմ աչքի չընկնելով արդյունավետ գործողություններով։

Այս խաղից հետո «Ռեալը» 60 միավորով պահպանեց առաջատարի դիրքը Լա Լիգայի մրցաշարային աղյուսակում, սակայն երկրորդ տեղում գտնվող և երկու միավորով հետ մնացող կատալոնական «Բարսելոնան» մեկ խաղ պակաս է անցկացրել:

Իսպանական Լա լիգայի 2025/26 մրցաշրջանի 25-րդ տուրում Մադրիդի «Ռեալը» հյուրընկալվելիս ուժերը չափեց «Օսասունայի» հետ։ Պամպլոնայի «Էլ Սադար» մարզադաշտում կայացած դրամատիկ հանդիպումն ավարտվեց տանտերերի՝ 2:1 հաշվով հաղթանակով։

​Հանդիպման հաշիվը 38-րդ րոպեին բացեց «Օսասունայի» հարձակվող Անտե Բուդիմիրը՝ անվրեպ իրացնելով 11-մետրանոց հարվածը։ Մադրիդցիներին հաջողվեց պատասխան գնդակը խփել 73-րդ րոպեին. աչքի ընկավ բրազիլացի վինգեր Վինիսիուս Ժունիորը։ Սակայն հիմնական ժամանակի վերջին րոպեին՝ 90-ին, հարձակվող Ռաուլի դիպուկ հարվածը հաղթանակ պարգևեց դաշտի տերերին՝ սահմանելով հանդիպման վերջնահաշիվը։
​Այս խաղից հետո «Արքայական ակումբը» 60 միավորով շարունակում է գլխավորել Լա լիգայի մրցաշարային աղյուսակը։

«Օսասունան» վաստակեց 33 միավոր և հանգրվանեց 9-րդ հորիզոնականում։
​Հաջորդ տուրում «Ռեալը» մարտի 2-ին սեփական հարկի տակ կընդունի «Խետաֆեին», իսկ «Օսասունան» մեկ օր առաջ արտագնա խաղում կմրցի «Վալենսիայի» հետ։

Տեսանյութերը՝ ԱՅՍՏԵՂ

Մրցաշարային աղյուսակն այս պահին

«Բարսելոնայի» գլխավոր մարզիչ Հանսի Ֆլիկը լրագրողների հետ զրույցում ամփոփել է «Օսասունայի» դեմ տարած հաղթանակը, որը թիմին թույլ տվեց 7 միավորով առաջ անցնել Մադրիդի «Ռեալից»։

«Ամենակարևորը երեք միավորն է։ Մենք վերահսկում էինք խաղի ընթացքը՝ գնդակին տիրելով ժամանակի գրեթե 80%-ում, և հուսալի էինք գործում պաշտպանությունում։ Թեև բազմաթիվ գոլային պահեր չստեղծեցինք, բայց կարողացանք երկու գնդակ խփել։ Միշտ էլ հաճելի է հանդիպումն ավարտել առանց բաց թողած գոլի, ինչի համար շնորհավորում եմ պաշտպանությանն ու ողջ թիմին», — նշել է մարզիչը։

Անդրադառնալով ֆուտբոլիստների անհատական ելույթներին՝ Ֆլիկն առանձնացրել է Պեդրիին և Ռաֆինյային.

«Առաջին գոլի դրվագում ճիշտ օգտագործեցինք ազատ տարածությունը։ Պեդրին անհավանական է, նա լավագույնն է՝ թոփ մակարդակի ֆուտբոլիստ։ Ինչ վերաբերում է Ռաֆինյային, ապա նա առանցքային ֆիգուրներից է։ Կարևոր է, որ նա դուբլի հեղինակ դարձավ՝ ևս մեկ քայլ առաջ կատարելով։ Այսօր դժվար էր ազատ գոտիներ գտնելը, բայց երբ դրանք ստեղծվեցին, մենք օգտագործեցինք պահերը հենց Պեդրիի ու Ռաֆինյայի շնորհիվ»։

Գերմանացի մասնագետը խոսել է նաև մրցաշարային պայքարի և մրցակիցների մասին.

«Ես չեմ ցանկանում խոսել մրցակիցների մասին, դա ինձ ուղղված հարց չէ։ Եթե մեր հաղթանակը ճնշում է գործադրում մրցակցի վրա, դա նրանց խնդիրն է։ Մնացածն ինձ չի հետաքրքրում։ Մենք պետք է շարունակենք պահել այս նշաձողը։ Թիմը վերականգնվել է, լավ է խաղում, բոլոր ֆուտբոլիստները շարքում են, և գրեթե բոլորը պատրաստ են 100 տոկոսով»։

Ֆլիկը նաև հավելել է, որ արդեն կենտրոնացած են «Վիլյառեալի» դեմ առաջիկա արտագնա խաղի վրա, իսկ գավաթային հանդիպման կազմի վերաբերյալ որոշում կկայացնեն առաջիկա օրերին։

«Հիանալի է խաղալ «Սփոթիֆայ Կամպ Նոու» մարզադաշտում։ Մենք հաղթել ենք բոլոր տնային խաղերում, և դա կարևոր է։ Բոլորս շատ ուրախ ենք այս ֆանտաստիկ ստադիոն վերադառնալու համար»,- Ֆլիկի խոսքը մեջբերում է AS-ը։