փյունիկ — Armsport.am

ԿԼ․ Փյունիկը հաղթում է նաև Երևանում ու դուրս գալիս հաջորդ փուլ

Editor — Thu, 16 Jul 2026 17:57:28 +0000

Այսօր՝ հուլիսի 16-ին, Կոնֆերենցիաների լիգայի 2026/27 թթ. մրցաշրջանի որակավորման առաջին փուլի պատասխան խաղում «Փյունիկը» Վազգեն Սարգսյանի անվան «Հանրապետական» մարզադաշտում ընդունել էր Մալթայի փոխչեպիոն «Մարսաշլոկին»։

Հիշեցնենք, որ թիմերի միջև կայացած առաջին խաղում «նռնագույնները» հաղթել էին խոշոր՝ 3-0 հաշվով։

Երևանում կայացած հանդիպումն ավարտվեց տանտերերի հաղթանակով՝ 1-0 հաշվով․ աչքի ընկավ Կուլիկովը։ Այսպիսով, «Փյունիկը» դիմակայությունը հաղթեց ընդհանուր 4-0 հաշվով ու դուրս եկավ հաջորդ փուլ։

Նշենք, որ «Փյունիկից» բացի Կոնֆերենցիաների լիգայի երկրորդ փուլում հանդես կգան նաև «Նոան» և «Ալաշկերտը»։

🎥 Փյունիկը վստահ հաղթանակով է մեկնարկում եվրագավաթային մրցաշրջանը

Editor — Thu, 09 Jul 2026 18:53:01 +0000

Կոնֆերենցիաների լիգայի 2026/27 թթ․ մրցաշրջանի որակավորման առաջին փուլի առաջին խաղում «Փյունիկը» Մալթայի «Սենթենարի» մարզադաշտում հյուրընկալվեց Մալթայի փոխչեմպիոն «Մարսաշլոկին»։

Երևանյան թիմը վստահ հաղթանակ տոնեց՝ 3-0 հաշվով։

Գոլերով աչքի ընկան Յանսանեն, Դաշյանը և Կովալենկոն։

Հանդիպման գոլերը՝ ԱՅՍՏԵՂ։

Պատասխան հանդիպումը տեղի կունենա հուլիսի 16-ին, Երևանում, և կմեկնարկի 20։00-ին։

Էրեդիվիզիայի փորձով նիդեռլանդացի վինգերը միացավ Փյունիկին

Gevorg Martirosyan — Wed, 01 Jul 2026 13:30:32 +0000

Երևանի «Փյունիկը» պաշտոնապես հայտարարել է թիմի կազմը նոր ֆուտբոլիստով համալրելու մասին. երևանյան ակումբին է միացել նիդեռլանդացի աջ եզրային հարձակվող Իման Գրիֆիթը։

Ինչպես տեղեկացնում է ակումբի մամուլի ծառայությունը, 24-ամյա վինգերն ունի եվրոպական բավականին հետաքրքիր փորձ։ Իր կարիերայի ընթացքում նա հասցրել է հանդես գալ նիդեռլանդական հայտնի «ԱԶ Ալկմարի» երիտասարդական թիմում և «Ֆորտունա Սիտարդում»։ Մասնավորապես, 2023/24 թվականների մրցաշրջանում Գրիֆիթը «Ֆորտունայի» մարզաշապիկով Նիդեռլանդների Բարձրագույն դիվիզիոնում՝ Էրեդիվիզիայում, անցկացրել է 12 հանդիպում և դարձել մեկ գոլային փոխանցման հեղինակ։

Նիդեռլանդացի ֆուտբոլիստի նախորդ ակումբը եղել է երկրի Առաջին դիվիզիոնը ներկայացնող «Ռոդան», որի գույները նա պաշտպանում էր 2024 թվականի հուլիսից։ Այդ թիմի կազմում նախորդ մրցաշրջանում Գրիֆիթն անցկացրել է 35 հանդիպում՝ աչքի ընկնելով արդյունավետ խաղով. նրա ակտիվում գրանցվել է 6 գոլ և 6 գոլային փոխանցում։

««Փյունիկ» ՖԱ-ն բարի գալուստ և հաջող մրցելույթներ է մաղթում Իման Գրիֆիթին»,- նշված է երևանյան ակումբի տարածած պաշտոնական հաղորդագրության մեջ։

Տեղեկություն Փյունիկ-Մարսաշլոկ հանդիպման վերաբերյալ

Editor — Sun, 28 Jun 2026 16:08:21 +0000

Հայտնի են դարձել ՈՒԵՖԱ Կոնֆերենցիաների լիգայի որակավորման առաջին փուլի՝ «Փյունիկ» — «Մարսաշլոկ» դիմակայության վայրերն ու ժամանակացույցը։

Առաջին հանդիպումը տեղի կունենա Մալթայի «Սենթենարի» ստադիոնում և կմեկնարկի Երևանի ժամանակով 21։00-ին։

Այդ մասին հայտնում է երևանյան ակումբի մամուլի ծառայությունը։

Պատասխան հանդիպումը կկայանա Երևանում՝ Վազգեն Սարգսյանի անվան Հանրապետական ստադիոնում։ Խաղի մեկնարկը՝ 20։00:

Դիմակայության առաջին խաղը կկայանա հուլիսի 9-ին, մրցակցի հարկի տակ, պատասխան հանդիպումը՝ հուլիսի 16-ին, Երևանում (խմբ․)։

Իսպանացի հարձակվող Խավի Մորենոն հեռանում է Փյունիկից

Suren Sahakyan — Thu, 25 Jun 2026 11:06:22 +0000

Իսպանացի հարձակվող Խավի Մորենոն հեռանում է «Փյունիկից», հայտնում է երևանյան ակումբի մամուլի ծառայությունը։

«Շնորհակալություն ենք հայտնում Խավի Մորենոյին ցուցադրած խաղի և նվիրվածության համար։ Մաղթում ենք հաջողություններ և նոր նվաճումներ հետագա կարիերայում»,- նշված է ակումբի տարածած հայտարարության մեջ։

Ֆուտբոլիստը «նռնագույններին» միացել էր 2025 թվականի ամռանը։ «Փյունիկի» կազմում Խավին անցկացրել է 33 հանդիպում՝ դառնալով 6 գոլի հեղինակ և գրանցելով 2 գոլային փոխանցում։

Մխիթարյանը Փյունիկի մամուլի ծառայությանը տված հարցազրույցում կարևոր հայտարարություն է արել

Suren Sahakyan — Fri, 19 Jun 2026 18:23:49 +0000

Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը բացառիկ հարցազրույց է տվել իր նախկին ակումբի՝ Երևանի «Փյունիկի» մամուլի ծառայությանը։

Լեգենդար հայ կիսապաշտպանը կիսվել է հայրենիք և երևանյան թիմի մարզադպրոց կատարած այցելության տպավորություններով, խոսել անցած դժվարին ուղու, մոտիվացիայի և ակումբային կարիերայի ապագայի մասին։

Անդրադառնալով իտալական գրանդում իր ապագային՝ կիսապաշտպանը հաստատել է, որ ևս մեկ մրցաշրջան կշարունակի պաշտպանել «ներաձուրիների» գույները, որից հետո միայն պարզ կդառնան կարիերայի հետագա քայլերը։

Հիշեցնենք, որ Մխիթարյանն այսօր՝ հունիսի 19-ին հատուկ կազմակերպված փակ միջոցառման շրջանակում հյուրընկալվել էր «Փյունիկի» ակադեմիայում, որտեղ հանդիպում-զրույց էր ունեցել պատանի սաների հետ։ Միջոցառման ընթացքում ներկաները մեկ րոպե լռությամբ հարգել էին հայկական ֆուտբոլի նշանավոր ներկայացուցիչ, Հենրիխի հոր՝ Համլետ Մխիթարյանի հիշատակը։ Ակումբի համար արդեն խորհրդանիշ դարձած «Փառքի ծառի» մոտ հայ ֆուտբոլիստը թողել էր իր ձեռքի և ոտքի հետքերը:

🎥 Բարի գալուստ տուն, Հենրի՛խ. Մխիթարյանն այցելել է Փյունիկի ակադեմիա

Suren Sahakyan — Fri, 19 Jun 2026 16:05:00 +0000

Միլանի «Ինտերի» կիսապաշտպան Հենրիխ Մխիթարյանն այցելել է «Փյունիկի» մարզադպրոց։ Հայաստանի ազգային հավաքականի բոլոր ժամանակների լավագույն ռմբարկուին դիմավորել են «նռնագույնների» մեծ թվով սաներ:

Այցը կայանում է հատուկ կազմակերպված փակ միջոցառման շրջանակում: Օրվա ընթացքում նախատեսված է հատուկ ծրագիր, որը կներառի ֆուտբոլիստի անցած ճանապարհին նվիրված կարճամետրաժ ֆիլմի ցուցադրություն, ինչպես նաև հանդիպում-զրույց ակադեմիայի սաների հետ՝ կյանքի և ֆուտբոլային ուղու վերաբերյալ։

Միջոցառման ընթացքում Հենրիխ Մխիթարյանը, «Փյունիկի» ներկայացուցիչներն ու մյուս մասնակիցները հարգանքի տուրք են մատուցել նրա հոր՝ Համլետ Մխիթարյանի հիշատակին: Ներկաները մեկ րոպե լռությամբ հարգել են հայկական ֆուտբոլի նշանավոր ներկայացուցչի հիշատակը:

Այնուհետև երևանյան ակումբի համար արդեն խորհրդանիշ դարձած «Փառքի ծառի» մոտ Հենրիխ Մխիթարյանը թողել է իր ձեռքի և ոտքի հետքերը:

ԿԼ․ Փյունիկի և Ալաշկերտի մրցակիցները որակավորման առաջին փուլում

Suren Sahakyan — Tue, 16 Jun 2026 16:18:28 +0000

Այսօր՝ հունիսի 16-ին, Շվեյցարիայի Նիոն քաղաքում՝ ՈւԵՖԱ-ի շտաբ-բնակարանում, կայացել է Կոնֆերենցիաների լիգայի խաղարկության 2026/27 մրցաշրջանի որակավորման առաջին փուլի վիճակահանությունը։

«Ալաշկերտը» որակավորման առաջին փուլում կմրցի Ղազախստանը ներկայացնող «Ելիմայ Սեմեյի» հետ։

Նույն փուլում «Փյունիկը» կհանդիպի Մալթայի «Մարսաշլոկին»։

Հայաստանի փոխչեմպիոն ու գավաթակիր «Նոան» Կոնֆերենցիաների լիգայում պայքարը կսկսի որակավորման երկրորդ փուլից, որի վիճակահանությունը կկայանա հունիսի 17-ին։

Հանդիպումները նախատեսված են 2026 թվականի հուլիսի 9-ին և 16-ին։

Եվրագավաթների վիճակահանություն. հայկական ակումբների հավանական մրցակիցները

Gevorg Martirosyan — Tue, 16 Jun 2026 08:15:04 +0000

Այսօր՝ հունիսի 16-ին, կկայանան 2026/27 թթ․ ՈւԵՖԱ-ի Չեմպիոնների լիգայի, Եվրոպա լիգայի և Կոնֆերենցիաների լիգայի խաղարկությունների որակավորման առաջին փուլի վիճակահանությունները: Հայկական ակումբներն արդեն իսկ գիտեն իրենց հավանական մրցակիցներին և անհամբերությամբ սպասում են բախտորոշ իրադարձությանը։

Չեմպիոնների լիգա. «Արարատ-Արմենիան» սպասում է մրցակցին

Հայաստանը հին աշխարհամասի գլխավոր ակումբային մրցաշարում ներկայացնելու է «Արարատ-Արմենիան»: Չեմպիոնների լիգայի վիճակահանությունը կմեկնարկի Երևանի ժամանակով 18:00-ին: Արդեն հայտնի են այն 7 ակումբները, որոնցից մեկը որակավորման առաջին փուլում բաժին կհասնի մեր չեմպիոնին․

«Շեմռոք Ռովերս» (Իռլանդիա)
«ԿուՊՍ Կուոպիո» (Ֆինլանդիա)
«Լինքոլն Ռեդ Իմփս» (Ջիբրալթար)
«Ռիգա» (Լատվիա)
«Ֆլորա Տալլին» (Էստոնիա)
«Լարն» (Հյուսիսային Իռլանդիա)
«Նյու Սեյնթս» (Ուելս)

Չեմպիոնների լիգայի որակավորման առաջին փուլի հանդիպումները կկայանան հուլիսի 7-ին և 8-ին, իսկ պատասխան խաղերը՝ հուլիսի 14-ին և 15-ին:

Կոնֆերենցիաների լիգա. «Փյունիկն» ու «Ալաշկերտը» պայքարի մեջ են

«Փյունիկը» վիճակահանությունից առաջ ընդգրկվել է 3-րդ զամբյուղի «Seeded» (ուժեղների) թիմերի շարքում և որպես մրցակից կարող է ստանալ հետևյալ ակումբներից մեկին․

«Սիլեկս» (Հյուսիսային Մակեդոնիա)
«Դինամո Սիթի» (Ալբանիա)
«Վիրտուս» (Սան Մարինո)
«Մորնար» (Չեռնոգորիա)
«Մարսաշլոկ» (Մալթա)

Մեր մյուս ներկայացուցչի՝ «Ալաշկերտի» հավանական մրցակիցներն են․

«Տորպեդո Քութայիսի» (Վրաստան)
«Վելեժ» (Բոսնիա և Հերցեգովինա)
«Ելիմայ Սեմեյ» (Ղազախստան)
«Պետրովաց» (Չեռնոգորիա)
«Էլբասանի» (Ալբանիա)

Կոնֆերենցիաների լիգայի, ինչպես նաև Եվրոպա լիգայի (որի վիճակահանությունը ևս կայանալու է այսօր) որակավորման առաջին փուլի առաջին հանդիպումները նախատեսված են հուլիսի 9-ին, իսկ պատասխան խաղերը՝ հուլիսի 16-ին:

Բոլոր մրցաշարերի համար խաղերի հաստատված օրերն ու մեկնարկային ժամերը ՈՒԵՖԱ-ն կհրապարակի վիճակահանություններից անմիջապես հետո:

Նա գալիս է այնտեղ, որտեղից ամեն ինչ սկսվել է. Փյունիկը՝ Մխիթարյանի վերաբերյալ հայտարարություն է տարածել

Suren Sahakyan — Fri, 12 Jun 2026 15:05:45 +0000

Հայաստանի ազգային հավաքականի բոլոր ժամանակների լավագույն ռմբարկու և Միլանի «Ինտերի» կիսապաշտպան Հենրիխ Մխիթարյանը հունիսի 19-ին պաշտոնական այցով կլինի Երևանի «Փյունիկի» մարզադպրոցում: Այս մասին հայտնում է երևանյան ակումբի մամուլի ծառայությունը։

Մխիթարյանի այցը կկայանա հատուկ կազմակերպված փակ միջոցառման շրջանակում: Օրվա ընթացքում նախատեսված է հատուկ ծրագիր, որը կներառի ֆուտբոլիստի անցած ճանապարհին նվիրված կարճամետրաժ ֆիլմի ցուցադրություն, ինչպես նաև հանդիպում-զրույց ակադեմիայի սաների հետ՝ կյանքի և ֆուտբոլային ուղու վերաբերյալ։

«Վերադարձ տուն՝ այնտեղ, որտեղից սկսվեց ամենամեծ ճանապարհը», — նշված է ակումբի տարածած հաղորդագրության մեջ:

Հիշեցնենք, որ ավելի վաղ Միլանի «Ինտերի» մարզական տնօրեն Պիերո Աուզիլիոն հայտնել էր, որ հայ ֆուտբոլիստը, որի պայմանագրի ժամկետն իտալական ակումբի հետ լրանում է այս ամիս, նոր համաձայնագրի շուրջ բանակցությունները վարում է ամբողջությամբ ինքնուրույն՝ առանց որևէ գործակալի միջամտության: