#փաշիկ-ալավերդյան — Armsport.am

📷 Օլիմպիական հսկաներից մինչև երիտասարդ տաղանդներ. ինչպե՞ս բաշխվեցին տարվա գլխավոր մարզական տիտղոսները

Gevorg Martirosyan — Tue, 07 Apr 2026 06:21:48 +0000

Սպորտի միջազգային օրվա շրջանակում կայացել է «Սպորտի ոլորտում տարվա լավագույնների ընտրություն 2025» մրցույթի հաղթողների պարգևատրման հանդիսավոր արարողությունը։

Միջոցառմանը ներկա են եղել երկրի բարձրագույն ղեկավարությունը՝ ՀՀ վարչապետ Նիկոլ Փաշինյանի գլխավորությամբ, Հանրապետության նախագահ Վահագն Խաչատուրյանը, ԱԺ նախագահ Ալեն Սիմոնյանը, ԿԳՄՍ նախարար Ժաննա Անդրեասյանը, ինչպես նաև մարզաշխարհի ներկայացուցիչներ, ֆեդերացիաների ղեկավարներ և անվանի մարզիկներ։

Նոր մարզադպրոցներ և խոշոր մրցաշարեր Հայաստանում

Մինչ բուն մրցանակաբաշխությունը, վարչապետ Նիկոլ Փաշինյանը շնորհակալություն է հայտնել մարզիկներին միջազգային հարթակներում հայկական սպորտի պատիվը բարձր պահելու համար՝ ընդգծելով սպորտի ոլորտի ինստիտուցիոնալ զարգացման կարևորությունը:

Խոսելով ենթակառուցվածքների բարելավման մասին՝ կառավարության ղեկավարը նշել է, որ այս պահին ընթացքի մեջ են կամ մեկնարկում են մեր օլիմպիական չեմպիոնների և անվանի մարզիկների անվան նոր մարզադպրոցների կառուցման աշխատանքները: Շուտով շահագործման կհանձնվեն Հրանտ Շահինյանի, Ալբերտ Ազարյանի, Արթուր Աբրահամի (Երևանում), Արթուր Ալեքսանյանի և Նազիկ Ավդալյանի (Շիրակի մարզում), Վիկ Դարչինյանի, Յուրի և Ստեփան Սարգսյանների (Լոռիում), Ռոման և Մալխաս Ամոյանների (Արագածոտնում) անվան մարզօջախները։ Բացի այդ, նախատեսվում է ստադիոնների կառուցում Երևանում, Իջևանում, Վանաձորում և Ակադեմիական քաղաքում։

Հատուկ ուշադրություն է դարձվել ֆուտզալի ազգային հավաքականի պատմական նվաճումներին, որոնք ամրագրելու նպատակով առաջիկայում կկառուցվի հավաքականի անվան հատուկ մարզադպրոց։

Անդրադառնալով սպասվող խոշոր իրադարձություններին՝ հայտարարվել է, որ առաջիկայում Հայաստանը կհյուրընկալի Ֆրանկոֆոնիայի խաղերը, ինչպես նաև Մարմնամարզության Եվրոպայի և Ծանրամարտի աշխարհի առաջնությունները:

Ովքե՞ր են 2025-ի լավագույնները

Միջոցառման կուլմինացիան տարվա լավագույնների պարգևատրումն էր։ 11 անվանակարգերում հաղթող ճանաչվածներն արժանացել են 6 միլիոն 250 հազարական դրամ դրամական պարգևի և հատուկ հուշանվերների, որոնք նրանց հանձնել է վարչապետը։

2025 թվականի մրցանակակիրներն են՝

Լավագույն մարզիկներ՝ Վարազդատ Լալայան (ծանրամարտ), Արթուր Դավթյան (սպորտային մարմնամարզություն), Մալխաս Ամոյան (հունահռոմեական ըմբշամարտ)
Լավագույն կին մարզիկ՝ Ալեքսանդրա Գրիգորյան (ծանրամարտ)
Հաշմանդամություն ունեցող լավագույն մարզիկ՝ Սարգիս Սարգսյան (շախմատ)
Լավագույն թիմ՝ Հայաստանի ֆուտզալի ազգային հավաքական
Լավագույն երիտասարդ մարզիկ՝ Գասպար Տերտերյան (հունահռոմեական ըմբշամարտ)
Վերադարձ մեծ սպորտ և/կամ հայտնություն՝ Սուրեն Հարությունյան (կարատե)
Հայաստանի Հանրապետությունը լավագույնս հանրահռչակած մարզիկ՝ Համլետ Մանուկյան (սպորտային մարմնամարզություն)
Լավագույն մարզիչ՝ Փաշիկ Ալավերդյան (ծանրամարտ)
Հանդիսատեսի համակրանք (առցանց քվեարկությամբ)՝ Սուրեն Հարությունյան (կարատե)

Հիշեցնենք, որ «Սպորտի ոլորտում տարվա լավագույնների ընտրություն» մրցույթի նպատակն է խրախուսել տարվա ընթացքում բացառիկ նվաճումներ գրանցած և Հայաստանի հեղինակությունը միջազգային ասպարեզում բարձրացրած մարզիկներին ու մարզիչներին:

Հայտնի են Հայաստանի տարվա լավագույն մարզիկները․ ԿԳՄՍՆ-ն ամփոփել է մրցույթի արդյունքները

Gevorg Martirosyan — Fri, 26 Dec 2025 11:15:21 +0000

ՀՀ Կրթության, գիտության, մշակույթի և սպորտի նախարարությունը հրապարակել է «Սպորտի ոլորտում տարվա լավագույնների ընտրություն» մրցույթի արդյունքները։

Հաղթողների ցանկը ձևավորվել է մարզական ոլորտում հավատարմագրված 15 լրագրողների քվեարկության հիման վրա։
Ըստ քվեարկության արդյունքների՝ տարվա լավագույնները բաշխվել են հետևյալ անվանակարգերում․

Տարվա լավագույն մարզիկների եռյակ՝
Վարազդատ Լալայան (ծանրամարտ)
Մալխաս Ամոյան (հունահռոմեական ըմբշամարտ)
Արթուր Դավթյան (սպորտային մարմնամարզություն)

Լավագույն կին մարզիկ՝ Ալեքսանդրա Գրիգորյան (ծանրամարտ)

Լավագույն երիտասարդ մարզիկ՝ Գասպար Տերտերյան (ըմբշամարտ)

Տարվա հայտնություն՝ Սուրեն Հարությունյան (կարատե)

Հաշմանդամություն ունեցող լավագույն մարզիկ՝ Սարգիս Սարգսյան (շախմատ)

Լավագույն մարզիչ՝ Փաշիկ Ալավերդյան (ծանրամարտի հավաքական)

Տարվա լավագույն թիմ՝ Հայաստանի ֆուտզալի ազգային հավաքական

ՀՀ-ն լավագույնս հանրահռչակած մարզիկ՝ Համլետ Մանուկյան (մարմնամարզություն)

Պաշտոնական. Փաշիկ Ալավերդյանը հեռացավ. հայտնի է ծանրամարտի հավաքականի նոր գլխավոր մարզիչը

Gevorg Martirosyan — Mon, 01 Dec 2025 17:00:08 +0000

Հայաստանի ծանրամարտի ֆեդերացիան հայտարարել է ազգային հավաքականների մարզչական շտաբներում կատարված լայնածավալ փոփոխությունների մասին։ Որոշումը պայմանավորված է գալիք կարևորագույն ստուգատեսներով՝ 2027 թվականին Երևանում կայանալիք աշխարհի առաջնությամբ և դրան հաջորդող Օլիմպիական խաղերով։

Հավաքականի երկարամյա գլխավոր մարզիչ Փաշիկ Ալավերդյանը լքել է զբաղեցրած պաշտոնը։ Նրան փոխարինելու է թիմի երկրորդ մարզիչ Հակոբ Փիլոսյանը։ Մեծահասակների հավաքականի երկրորդ մարզիչ է նշանակվել Դավիթ Մուրադյանը, որը մինչ այդ զբաղեցնում էր երիտասարդական հավաքականի երկրորդ մարզչի պաշտոնը։

Փոփոխություններ են տեղի ունեցել նաև տարիքային մյուս հավաքականներում.

Երիտասարդներ. Հավաքականի ավագ մարզիչ Մելիք Ղուկասյանին փոխարինել է Վիգեն Խաչատրյանը (նախկինում՝ կանանց հավաքականի երկրորդ մարզիչ): Երկրորդ մարզիչ է նշանակվել Վահրամ Գևորգյանը։

Պատանիներ. Հավաքականի երկրորդ մարզիչ է նշանակվել Արսեն Թամրազյանը։

Պատանի աղջիկներ. Ավագ մարզչի պաշտոնը վստահվել է Քրիստինե Պետրոսյանին։

Ֆեդերացիայի ղեկավարությունը շնորհակալություն է հայտնել Փաշիկ Ալավերդյանին և Մելիք Ղուկասյանին՝ կատարած աշխատանքի համար։

Առաջիկա օրերին Ծանրամարտի ֆեդերացիայի գլխավոր քարտուղար Սամվել Գասպարյանը հանդես կգա մամուլի ասուլիսով՝ մանրամասնելով կադրային փոփոխությունների պատճառներն ու նպատակները:

Ծանրամարտի Հայաստանի հավաքականը պատրաստվում է Եվրոպայի առաջնությանը

Suren Sahakyan — Fri, 14 Feb 2025 17:32:06 +0000

Ծանրամարտի Հայաստանի տղամարդկանց հավաքականը սկսել է պատրաստվել ապրիլի 13-ին Մոլդովայի մայրաքաղաք Քիշնևում անցկացվելիք Եվրոպայի առաջնությանը։ Այս մասին հայտնում է ՀԱՕԿ-ի պաշտոնական կայքը։

Այսօր՝ փետրվարի 14-ին Հավաքականի գլխավոր մարզիչ Փաշիկ Ալավերդյանի և նրա օգնական Հակոբ Փիլոսյանի գլխավորությամբ թիմը Ծաղկաձորում է սկսել է այս տարվա երկորդ մարզական հավաքը։

Մարզչական խորհուրդը մարզումներում ներգրավել է Ռաֆիկ Մինասյանին / Գյումրի, 61 կգ /, Գառնիկ Չոլակյանին / Վեդի, 61 կգ /, Գոռ Սահակյանին / Գյումրի, 73 կգ /, Ռաֆիկ Հարությունյանին / Գյումրի, 81 կգ /, Սուրեն Գրիգորյանին / Վեդի, 89 կգ /, Մնացական Աբրահամյանին / Արարատ, 89 կգ / Դավիթ Հովհաննիսյանին / Երևան, 96 կգ / Արա Աղանյանին / Գյումրի, 102 կգ /, Պետրոս Պետրոսյանին / Արարատ, 109 կգ /, Գարիկ Կարապետյանին / Գյումրի, 109 կգ / և Վարազդատ Լալայանին / Գյումրի, + 109 կգ /:

Նշվում է, որ Ծաղկաձորյան մարզումներից մի քանի օր հետո կսկսվի հերթական ուսումնամարզական հավաքը:

Առաջին հերթին ինձ «подножка» տվեց Սիմոն Մարտիրոսյանը․ Փաշիկ Ալավերդյանը պարզաբանում է

Gevorg Martirosyan — Wed, 25 Dec 2024 10:55:41 +0000

Հայաստանի ծանրամարտի տղամարդկանց հավաքականի գլխավոր մարզիչ Փաշիկ Ալավերդյանը պարզաբանեց, թե ինչու են Բահրեյնում կայացած ծանրամարտի աշխարհի 89-րդ առաջնությանը մասնակցել ոչ այնքան լավ պատրաստված և վնասվածք ունեցող մարզիկներ։ Այս մասին տեղեկացնում է Sputnik Armenia-ն։

Բահրեյնում ընթացող աշխարհի առաջնության ժամանակ Եվրոպայի չեմպիոն, 109 կգ քաշային կարգում հանդես եկող Գարիկ Կարապետյանը վնասվածք էր ստացել։ Հայաստանի ծանրամարտի հավաքականի անդամ, օլիմպիական խաղերի կրկնակի արծաթե մեդալակիր, աշխարհի և Եվրոպայի չեմպիոն Սիմոն Մարտիրոսյանն էլ մինչ այդ ստացած վնասվածքի պատճառով չէր մասնակցել առաջնությանը։

«Գարիկ Կարապետյանի առողջական վիճակը շատ լավ է, խնդիր չկա։ Կտեսնեք, թե Եվրոպայի առաջնությանը ոնց կմասնակցի։ Գարիկն ԱԱ–ին լավ էր պատրաստված, ուսը որ չվնասվեր` առաջին տեղը կգրավեր»,– մամուլի ասուլիսի ժամանակ նշեց Ալավերդյանը։

Խոսելով այն մասին, որ նախնական տվյալներով` ծանրամարտի ԱԱ–ին պետք է մասնակցեր 10 մարզիկ, բայց արդյունքում Մանամա մեկնեցին 9 հոգով, Ալավերդյանը դժգոհեց Սիմոն Մարտիրոսյանից։

«Ես ուզում էի այս առաջնությանն այդ 10 հոգանոց թիմով մասնակցել, քանի որ նրանք 2023 թվականի չեմպիոն թիմն են։ Առաջին հերթին, ռուսերեն ասած, ինձ «подножка» տվեց Սիմոն Մարտիրոսյանը։ Վերջին օրով եկավ ու ասաց՝ ես չեմ գալիս, մեջքս ցավում է։ Տոմսն էլ չէինք կարող վերադարձնել, գումարած մասնակցության համար արված վճարումը, որը 3000 դոլար էր»,– ասաց մարզիչը։

Անդրադառնալով Ալեքսանդրա Գրիգորյանին` Փաշիկ Ալավերդյանը նշեց` ապագայում մեր օլիմպիական խաղերի լավագույն մասնակիցը պետք է լինի, հնարավոր է` նույնիսկ մեդալներ կարողանա վաստակի։

Մարզիչը շեշտեց` նա աղջիկներից ամենամոտն է իր այդ հայտարարությանը, քան մյուսները, չնայած ընդգծեց, որ Էմմա Պողոսյանն էլ է հավակնում, քանի որ շատ է աշխատում իր վրա ու մարտական ոգի ունի։

Բահրեյնի մայրաքաղաք Մանամայում ծանրամարտի ԱԱ–ն մեկնարկել էր դեկտեմբերի 6-ին և ավարտվել 15-ին։ Հայաստանը ծանրամարտի աշխարհի առաջնությունում ներկայացրել է 11 մարզիկ, որոնց թվում 9 տղամարդ է, 2 կին։ Նրանք են Գարիկ Չոլակյանը (61 կգ), Ալեքսանդրա Գրիգորյանը (55 կգ), Գոռ Սահակյանը (67 կգ), Անդրանիկ Կարապետյանը (89 կգ), Հակոբ Մկրտչյանը (96 կգ), Դավիթ Հովհաննիսյանը (96 կգ), Արա Աղանյանը (102 կգ), Պետրոս Պետրոսյանը (109 կգ), Գարիկ Կարապետյանը (109 կգ), Տաթև Հակոբյանը (87 կգ) Վարազդատ Լալայանը (109 +), Ալեքսանդրա Գրիգորյանը (55 կգ) և Տաթև Հակոբյանը (երկուսն էլ՝ 87 կգ): Ալեքսանդրա Գրիգորյանը դարձել է ծանրամարտի աշխարհի առաջնության բրոնզե մեդալակիր։

Եթե իմ աշխատանքը ձեռք չի տալիս, կարող եմ զենքս դնել և գնալ թոշակի. Փաշիկ Ալավերդյան

Erik — Tue, 21 Dec 2021 08:26:22 +0000

Ծանրամարտի Հայաստանի հավաքականի գլխավոր մարզիչ Փաշիկ Ալավերդյանն այսօր կայացած մամուլի ասուլիսի ընթացքում ամփոփել է տարին և Տաշքենդում կայացած աշխարհի առաջնության արդյունքները.

«Այս տարի, ինչպես և միշտ, Հայաստանի ծանրամարտի ֆեդերացիան հայկական սպորտի գագաթնակետում է: Կարճ ասեմ, Հայաստանն ունի 185 մեդալ, որից 97-ը ծանրորդներինն է: Դա միայն աշխարհի, Եվրոպայի առաջնությունից ու ՕԽ-ից: Այստեղից գալիս ենք եզրակացության, թե ինչ գնահատական տանք ֆեդերացիայի աշխատանքին: Ոսկե մեդալների քանակը 38-ն է, որից երկամարտի գումարով՝ 28-ը: Այսինքն 28 անգամ այլ պետություններին պարտադրել ենք մեր դրոշը բարձրացնել ու հիմնը լսել: Ուրիշ մարդ կա՞ Հայաստանում, որ կարող է դա անել 28 անգամ: Ահա թե ինչ ավար ունի Հայաստանի ծանրամարտն այսօր»,-ամփոփելով տարին ասաց Ալավերդյանը:

Հավաքականի գլխավոր մարզչի խոսքով, Տաշքենդում ցույց տված արդյունքները ձախողում չեն. «Ճիշտ են ասում, որ դու մեղավոր չես, շատի ես սովորեցրել, ճիշտ են ասում: Ես ամեն մրցումներում բերում եմ չեմպիոններ, իսկ հիմա երկրորդ տեղը ոչնչությո՞ւն եք համարում, ճիշտ եք անում: Իսկ ինչի՞ չենք անում ռուսների նման, որ բերենք ընդամենը մեկ բրոնզե մեդալ: Մենք լա՞վն ենք ռուսներից կամ ուկրաինացիներից: Պետք է մարդիկ իրենց զավակների աշխատանքը ճիշտ գնահատեն: Մենք չենք ծնվել, որ անընդհատ քարկոծեն մեզ: Եղե՞լ է դեպք, որ վարչապետը կարողանա բյուջեից հայթայթի գումար, ու 20 օլիմպիական ձող նվիրի: Եթե մինչև այդ եղել է, ասեք եղել է: Չի էլ կարող լինել: Եթե սա ձեռք չի տալիս մեր ժողովրդին, ես կարող եմ զենքս դնել և գնալ թոշակի: Եթե ձեռք չի տալիս, ասեք՝ սխալներս ուղղեմ»:

Ալավերդյանը խոսեց նաև առանձին մարզիկների մասին.

«Հարությունյան Ռաֆիկը գրավեց ավելի ցածր տեղ, քան ես կարծում էի: Բայց դա անհաջողություն չէ, ինձ համար հաջողություն է: Եթե 21 տարեկան տղան կարողանում է առաջին անգամ մտնել գիգանտների մեջ ու բարձրացնել, նշանակում է նրա մեջ տաղանդ կա, որ հետագայում կարող է շարունակել:

Դավիթ Հովհաննիսյանը բավականաչափ վնասվածք ունի: Նա բանակից ազատված է առողջական խնդիրների պատճառով: Չեմ ուզում նրա հույսը կտրել, բայց նա պետք է լինի: Չենք ասելու գնա տունը սպասի: Նրա ձեռքը պիտի բռնենք ու պահենք մեր թիմի մեջ:

Ինչո՞ւ Արսեն Մարտիրոսյանը անհաջողության մատնվեց: Կասեք, որ վերջին վայրկյանին վազելով եկավ: Ո՛չ: Նա դռան հետևում էր: Նա երկրորդ մոտեցումը չարեց ու պետք չէր որ կրկներ: Ուզում էինք մեկ կիլոգրամ ավելացնել, բայց չթողեցին: Որպեզի Արսենը մեդալ նվաճեր, պետք է Սամվելից մեկ կիլոգրամ ավելի բարձրացներ: Մի խոսքով, չկարողացանք քաշը փոխել, դա ոչ թե թերություն էր, այլ ցայտնոտի մեջ ընկնելու արդյունք էր, բայց սա ծանրամարտ է»,-ասաց Ալավերդյանը:

Գլխավոր մարզիչը նշեց, որ հնարավոր է այսուհետ չլինի կանանց առանձին հավաքական. «Այս տարվա մեր թերություններից մեկն այն է եղել, ավելի ճիշտ հնարավորությունից պակաս ենք հանդես եկել աղջիկների մրցաշարերում: Մտածում ենք, որ միգուցե աղջիկների առանձին թիմ չպահենք: Հնարավոր է պահենք տղաների հավաքականում, ինչպես լինում է շատ երկրներում: Ես ինձ հարցնում եմ, Փաշիկ, գո՞հ ես քո արդյունքներից: Ես կասեմ այո, քանի որ լավագույն մարզիկների թեկնածուների մեջ կա 7 ծանրորդ, որից 3-ը հաստատ լինելու են 10-ի մեջ»,-ասաց Ալավերդյանը:

Ծանրամարտի Հայաստանի առաջնություն. ArmSport-ի տեսանյութը մրցումային վերջին օրվանից

Erik — Tue, 09 Feb 2021 18:54:50 +0000

Ծանրամարտի Հայաստանի առաջնության մրցումային վերջին օրը մրցահարթակ են դուրս եկել 109 կգ քաշային և գերծանր քաշային կարգի ծանրորդները:

ArmSport-ը ներկա է եղել մրցումային վերջին օրվան ու պատրաստել տեսանյութ:

Ի՞նչ մարզավիճակի մասին է խոսքը, երբ մարզիկները 45 օր իրենց տանն էին. ծանրորդները հավաք են անցկացնում Աբովյանում

Նարե Հովհաննիսյան — Mon, 11 May 2020 13:32:13 +0000

Ծանրամարտի Հայաստանի հավաքականն այս օրերին ուսումնամարզական հավաք է անցկացնում Աբովյանում՝ խստացված պայմաններում: Այս մասին ArmSport-ի հետ զրույցում հայտնել է հավաքականի գլխավոր մարզիչ Փաշիկ Ալավերդյանը.

«Հավաքը սկսել ենք մայիսի 4-ից. այն նախատեսում ենք ավարտել ամսի 24-ին: Եվս մեկ հավաք կունենանք արդեն մայիսի 27-ին: Հավաքականի կազմում ես միշտ ունեցել եմ և՛ երիտասարդներ, և՛ պատանիներ: Այս անգամ 6 երիտասարդ և 10 մեծահասակ մարզիկ է մասնակցում հավաքին: Ընդհանուր առմամբ 20 հոգի ենք: Ունենք բժիշկ, մերսող»,- ասում է Փաշիկ Ալավերդյանն ու ընդգծում, որ կարանտինային իրավիճակում հավաքն անցկացնում են խիստ ու փակ պայմաններում.

«Շատ խիստ ենք: Փակված ենք, չենք էլ թույլ տալիս որևէ կողմնակի մեկի մուտքը: Մարզիկներն էլ իրենց ծնողների ու հարազատների հետ միայն հեռախոսազանգով են շփվում: Որևէ հանդիպում չի լինում: Բոլոր պայմաններն ապահովված են: Պետք է նշեմ՝ մենք ավելի խիստ ենք, քան պետությունը պատկերացնում է: Եթե պետությունը ցանկությունի ունի, կարող եմ իրենց սովորացնել՝ ինչպես խիստ լինել:

Արդյոք գո՞հ եմ ներկայիս կանխարգելիչ միջոցառումներից. թույլ է»:

Իսկ խոսել այն մասին, թե ինչ մարզավիճակում են ծանորդները միացել հավաքին, անգամ ավելորդ է.

«Ի՞նչ մարզավիճակում են. ցավոք, այդ հարցը չպետք է տայիք: Ի՞նչ մարզավիճակի մասին է խոսքը, երբ 45 օր մարզիկներն իրենց տանն էին: Ի՞նչի մասին է խոսքը: Չեմ կարող ասել, թե որքան ժամանակ պետք լինի վերականգնման ու նախկին մարզավիճակին հասնելու համար: Մեկը վերականգնվում է 40 օրից, մյուսը՝ 38, մյուսն էլ առհասարակ չի վերականգնվում: Դա պետք է մասնագետների հետ քննարկել»:

Ծանրամարտի Հայաստանի հավաքականը նախապատրաստվում է սեպտեմբերին ու նոյեմբերին նշանակված երիտասարդների աշխարհի առաջնությանն ու մեծահասակների Եվրոպայի առաջնությանը, որը վարկանիշային է Տոկիոյում կայանալիք Օլիմպիական խաղերի համար:

Նարե Հովհաննիսյան

Փաշիկ Ալավերդյան. Պատրաստվում էինք ձեռնոց նետել Լաշա Տալախաձեին

Erik — Sat, 09 May 2020 10:33:00 +0000

Ծանրամարտի Հայաստանի հավաքականի գլխավոր մարզիչ Փաշիկ Ալավերդյանը «Սպորտ Գիլոյանի հետ» հաղորդման ժամանակ խոսել է կորոնավիրուսի առաջացրած բացասական հետևանքների մասին.

«Վստահեցնում եմ՝ Ուկրաինայի, Թուրքիայի, Վրաստանի, Իտալիայի, Ֆրանսիայի և այլ երկրների ծանրորդներն այս ընթացքում մարզվել են: Գտել են դահլիճներ, մեկուսացվել են ու մարզվել: Ես էլ ցանկանում էի նույն կերպ վարվել՝ հավաքականի հետ մեկուսացվելով Աբովյանում, բայց թույլ չտվեցին: Ինչու՞: Ի՞նչ կլիներ, որ բժշկի գլխավորությամբ 12 հոգի մեկուսանար այդտեղ: Նույնիսկ հավաքարարին թույլ չէինք տալիս գար, մենք էինք մաքրում: Ոչ մեկի հետ չէինք պատրաստվում շփվել: Մեզ պետք էր մարզվել, բայց չթույլատրեցին: Մի գաղտնիք բացեմ. մենք պատրաստվում էինք ձեռնոց նետել Լաշա Տալախաձեին: Գոռը շատ աշխատասեր է և մոտենում էր Լաշայի արդյունքին, բայց երկու ամիս չմարզվելուց հետո մենք պետք է դեռ երկար մարզվենք՝ նախկին մարզավիճակին վերադառնալու համար, իսկ Տալախաձեն ամեն օր մարզվել է: Պատրաստվում էինք նաև նոր ռեկորդներ գրանցել»,-ասել է Ալավերդյանը:

Սիմոն Մարտիրոսյանի Օլիմպիական արծաթը կփոխարինվի ոսկով. Փաշիկ Ալավերդյան

Նարե Հովհաննիսյան — Wed, 25 Dec 2019 12:05:18 +0000

Ծանրամարտի Հայաստանի հավաքականի գլխավոր մարզիչ Փաշիկ Ալավերդյանը լրագրողների հետ զրույցում այսօր հայտնել է, որ Սիմոն Մարտիրոսյանի Ռիո-2016-ի օլիմպիական արծաթը կփոխարինվի ոսկով: Ալավերդյանը նշել է, որ այսօր պաշտոնական գրություն է ստացել ՄՕԿ-ից, որտեղ նշված է եղել, որ այդպիսի գործընթաց է ընթանում:

Մինչև 105 կգ քաշային կարգում Ռիո-2016-ի ոսկե մեդալակիր, ուզբեկ Ռուսլան Նուրուդինովի դոպինգ-թեստը դրական արդյունք է ցույց տվել:

Ըստ Փաշիկ Ալավերդյանի, Սիմոն Մարտիրոսյանը պաշտոնապես Ռիոյի 2016 թվականի օլիմպիական խաղերի ոսկե մեդալակիր կարող է ճանաչվել արդեն 2020 թվականի հունվարին:

Մարզական արբիտրաժային դատարանի հակադոպինգային բաժինը (CAS ADD) Ուզբեկստանի ներկայացուցչին այս տարվա մայիսին մեղավոր է ճանաչել Լոնդոնի 2012 թվականի Օլիմպիական խաղերում դոպինգ օգտագործելու մեջ:

Ծանրամարտի միջազգային ֆեդերացիան (IWF) 2018 թվականի դեկտեմբերին հայտնել էր Նուրուդինովին մրցումներից հեռացնելու մասին՝ ՄՕԿ-ի կողմից մարզիկի դոպինգ-թեստի վերաստուգումից հետո:

Այս տարվա ապրիլին միջազգային օլիմպիական կոմիտեն (ՄՕԿ) Նուրուդինովի գործը փոխանցել էր CAS, որտեղ նրա գործի քննման արդյունքում որոշում կայացվեց այն մասին, որ մարզիկը խախտել է հակադոպինգային կանոններն ու լոնդոնյան խաղերում նրա արդյունքները չեղյալ համարվեցին: Գործը փոխանցվեց IWF՝ հետագա ուսումնասիրման համար: Լոնդոնի Օլիմպիական խաղերում Նուրուդինովը 4-րդ տեղն էր զբաղեցրել:

Հիշեցնենք՝ Սիմոն Մարտիրոսյանը Ռիոյի օլիմպիական խաղերի ժամանակ ընդամենը 19 տարեկան էր: