Լեհաստանի մայրաքաղաք Վարշավայում շարունակվում է ըմբշամարտի Եվրոպայի առաջնությունը:

63 կգ քաշային կարգում Հրաչյա Պողոսյանը մեկնարկում 6-0 հաշվով չնկատեց բելառուս Սոսլան Դաուրովին: ¼ եզրափակչում Պողոսյանն ամբողջ գոտեմարտի ընթացքում հաղթում էր ադրբեջանցի Թալեհ Մամեդովին, սակայն վերջին վայրկյաններին 2 միավոր տվեց ու չնայած 2-2 հաշվին, առավելությունը Մամեդովինն էր: Վերջինս կիսաեզրափակչում հաղթել է, և վաղը Պողոսյանը սփոփիչ գոտեմարտ կանցկացնի Նիկոլայ Իվանով Վիչևի հետ: Հաղթանակի դեպքում Պողոսյանը բրոնզե մեդալի համար կպայքարի Ալեքսանդր Յուրկյանսի հետ:

77 կգ քաշային կարգում Վարուժան Գրիգորյանը մեկնարկային գոտեմարտում ժամանակից շուտ պարտվեց Յունուս Էմրե Բաշարին:  Բաշարը եզրափակչում է, և Գրիգորյանը վաղը սփոփիչ գոտեմարտ կանցկացնի Սանան Սուլեյմանովի հետ: Հաղթանակի դեպքում Գրիգորյանը բրոնզե մեդալը կվիճարկի Դմիտրի Պուշկովի հետ:

Լեհաստանի մայրաքաղաք Վարշավայում շարունակվում է ըմբշամարտի Եվրոպայի առաջնությունը: Ազատ ոճայիններն ավարտեցին ելույթները՝ ընդհանուր առմամբ նվաճելով մեկ բրոնզե մեդալ: 70 կգ քաշային կարգում մեդալակիր դարձավ Արման Անդրեասյանը:

Հունահռոմեականների կազմն ավելի ներկայացուցչական է: Ազատ ոճայիններ Արսեն Հարությունյանն ու Վազգեն Թևանյանը չմասնակցեցին Եվրոպայի առաջնությանը, քանի որ վերջերս օլիմպիական ուղեգիր են նվաճել ու մարզիչները չցանկացան ավելորդ ռիսկի դիմել ու մարզիկներ գործուղել մայրցամաքային առաջնությանը: Հունահռոմեականների պարագայում մի փոքր այլ է: Օլիմպիական ուղեգիր ունեցող Կարապետ Չալյանը մասնակցում է Եվրոպայի առաջնությանը:

Հունահռոմեականները հանդես կգան 7 ըմբիշով: 55 կգ քաշային կարգում Հայաստանը կներկայացնի Ռուդիկ Մկրտչյանը: Վերջինս պայքարը սկսում է 1/4 եզրափակչից ու կիսաեզրափակչի ուղեգիրը վիճարկելու է թուրք Էկրեմ Օզթուրքի հետ: Եվրոպայի նախորդ առաջնությունում Մկրտչյանը մեկնարկային գոտեմարտում պարտվեց ու չշարունակեց պայքարը, քանի որ մրցակիցն էլ կիսաեզրափակչում պարտվել էր ապագա չեմպիոն Էդմոնդ Նազարյանին: Եվրոպայի գործող չեմպիոնը չի մասնակցում Եվրոպայի այս առաջնությանը, քանի որ մրցաշարը Օլիմպիական վարկանիշային չէ, իսկ Էդմոնդի պայքարի թիրախում այս պահին Օլիմպիական ուղեգրի նվաճումն է::

60 կգ քաշային կարգում պայքարի մեջ է գործող չեմպիոն Գևորգ Ղարիբյանը: 26-ամյա ըմբիշը Հռոմում կայացած նախորդ առաջնության եզրափակչում հաղթեց թուրք Քերեմ Քամալին ու կանգնեց պատվո հարթակի ամենաբարձր աստիճանին: Այս անգամ ևս նրանք տարբեր ցանցերում են ու կարող են հանդիպել միայն եզրափակչում: Գևորգը պայքարը կսկսի որակավորման փուլում, իսկ մրցակիցը վրացի Իրակլի Ձիմիստարիշվիլին է:

63 կգ քաշային կարգում Հայաստանի ներկայացուցիչը Հրաչյա Պողոսյանն է: Մեր ըմբիշը պայքարը կսկսի 1/8 եզրափակչում՝ ուժերը չափելով փորձառու Սոսլան Դաուրովի հետ: Դաուրովը Եվրոպական խաղերի կրկնակի մեդալակիր է, Եվրոպայի 2017 թ-ի առաջնության բրոնզե մեդալակիր:

67 կգ քաշային կարգում մեծ ակնկալիքներ ունենք Սլավիկ Գալստյանից: Վերջինս մոտ էր Օլիմպիական ուղեգիր նվաճելուն, սակայն վարկանիշային մրցաշարի կիսաեզրափակչում պարտվեց: Հաջորդ վարկանիշային մրցաշարում 67 կգ քաշային կարգում Հայաստանը կներկայացնի Կարեն Ասլանյանը, իսկ Սլավիկը մասնակցում է Եվրոպայի առաջնությանը: Նախորդ Եվրոպայի առաջնությանը մասնակցեց Կարեն Ասլանյանն ու նվաճեց բրոնզե մեդալ: Սլավիկը պայքարը կսկսի 1/8 եզրափակչից՝ մրցելով Օլեքսեյ Մասիկի հետ:

72 կգ քաշային կարգում չեմպիոնական խոսք ենք սպասում արդեն մեծ համբավ ձեռք բերած Մալխաս Ամոյանից: Դեկտեմբերին կայացած աշխարհի անհատական գավաթի խաղարկության եզրափակչում, ինչ-որ տեղ նաև անարդարացիորեն, Մալխասը 1-1 հաշվով պարտվեց ու զրկվեց ոսկե մեդալից: Եվրոպայի 2019 թ-ի երիտասարդների չեմպիոնն ու բազմակի մրցանակակիրը այստեղ պայքարելու է չեմպիոնության համար: Մալխասը պայքարը կսկսի 1/8 եզրափակչից, որտեղ մրցակիցը Խորվաթիայի ներկայացուցիչ Ալեն Ֆոդորն է: Այս քաշային կարգում Եվրոպայի գործող չեմպիոնը Ֆրանկ Շտեբլերն է, որը ևս մասնակիցների թվում է:

77 կգ քաշային կարգում Հայաստանի պատվիրակը Վարուժան Գրիգորյանն է: Վերջինս պայքարը կսկսի 1/8 եզրափակչից ու քառորդ եզրափակչի ուղեգիրը կվիճարկի թուրք Յունուս Էմրե Բաշարի հետ:

Մեծ սպասելիքներ ունենք նաև 87 կգ քաշային կարգի Հայաստանի մասնակցից: Կարապետ Չալյանն արդեն օլիմպիական ուղեգիր ունի, սակայն մարզավիճակի կարգավորման համար նաև մասնակցում է այս առաջնությանը: Եվրոպայի նախորդ առաջնությունում Չալյանը դարձավ բրոնզե մեդալակիր՝ հաղթելով հայազգի Հայկ Մնացականյանին, սակայն բոլոր հնարավորություններն ուներ պայքարելու ոսկե մեդալի համար. կիսաեզրափակչում մի փոքր թուլացրեց զգոնությունն ու պարտվեց: Չալյանից միշտ էլ մեծ են սպասելիքները, բայց ամենակարևոր պահերին Կարոն «թուլանում» է ու հաղթանակը «նվիրում» մրցակիցներին: Այս առաջնության ժամանակ Չալյանը պետք է հակառակում համոզի բոլորին: Ի վերջո, առջևում Տոկիո-2020-ն է:

Արմեն Գարամյան