«Տրաբզոնսպորը» համաձայնության էր եկել թե՛ «Կրասնոդարի», թե՛ Էդուարդ Սպերցյանի հետ, սակայն Հայաստանի ազգային հավաքականի գլխավոր մարզչի պաշտոնակատար Սուրեն Չախալյանի միջամտությունից հետո տրանսֆերը չկայացավ: Այս մասին հայտնում է թուրքական fotospor.com-ը։

Թուրքական լրատվամիջոցների տեղեկություններով՝ «Տրաբզոնսպորը» հունվարին տրանսֆերային առաջարկ է արել ռուսական ակումբին, սակայն գործարքը ձախողվել է քաղաքական պատճառներով:

Նշվում է, որ ռուսական ակումբը պատրաստ էր բաց թողնել 24-ամյա ֆուտբոլիստին, իսկ «Տրաբզոնսպորը» 10 միլիոն եվրոյից բարձր առաջարկ էր արել՝ ներառյալ բոնուսներն ու հետագա վաճառքի տոկոսը:

Աղբյուրի հաղորդմամբ՝ Սպերցյանը չէր մերժել առաջարկը։ Ֆուտբոլիստի գործակալ Ռաֆայելա Պիմենտայի հետ բանակցությունները առաջ էին ընթանում, և Սպերցյանը ևս համակրում էր այդ գաղափարը, քանի որ Թուրքիայում կրկնակի բարձր աշխատավարձ էր ստանալու: Նշվում է նաև, որ «Կրասնոդարը» թույլատրել է Սպերցյանին հանդիպել «Տրաբզոնսպորի» ներկայացուցիչների հետ։

Սակայն Հայաստանի հավաքականի գլխավոր մարզչի պաշտոնակատար Սուրեն Չախալյանը և հայկական ֆուտբոլային շրջանակները քննարկել են հարցը և համոզել Սպերցյանին հրաժարվել «Տրաբզոնսպորից», պնդելով, որ դա կարող է բացասաբար անդրադառնալ նրա ազգային հավաքականի կարիերայի վրա:

Աղբյուրը նշում է, որ ավելի վաղ Զախարյանն էլ նույն պատճառով չգնաց Թուրքիա։ «Ռեալ Սոսյեդադի» ներկայիս խաղացողին ցանկանում էր ձեռք բերել «Գալաթասարայը», սակայն նա նույնպես քաղաքական պատճառներով հրաժարվեց՝ նախընտրելով բասկյան ակումբը։

ՈւԵՖԱ Ազգերի լիգայի 6-րդ մրցափուլում Հայաստանի ընտրանին Ռիգայի «Սկոնտո» մարզադաշտում հանդիպեց Լատվիայի հավաքականի հետ։

Հայաստանի հավաքականը հաղթեց 2-1 հաշվով և 7 միավորով զբաղեցրեց երկրորդ տեղը 4-րդ խմբում՝ վաստակելով B լիգա դուրս գալու համար անցումային հանդիպումներին մասնակցելու իրավունք։ Հանդիպման մանրամասներն՝ այստեղ։

Հանդիպման մասին իր կարծիքն է հայտնել Հայաստանի ազգային հավաքականի գլխավոր մարզչի ժամանակավոր պաշտոնակատար Սուրեն Չախալյան։

«Առաջին խաղակեսի սկզբում որոշ բաներ չէին ստացվում, բայց կարողացանք փոփոխություն կատարել թե խաղի, թե ընմիջման ժամանակ։ Տղաները կարողացան երկրորդ խաղակեսում կատարել հանձնարարությունը, արդյունքն էլ՝ գոլերն ու հաղթանակը։

Առաջին բանը, որ ընդմիջմանը պահանջել եմ տղաներից, դա համբերությունն է, պահը, որ պետք է սպասել, համբերատար լինել»,- հետխաղյա մամուլի ասուլիսի ժամանակ ասել է Սուրեն Չախալյանը։

Նոյեմբերի 16-ին Հայաստանի ազգային հավաքականը մեկնեց Ռիգա, որտեղ նոյեմբերի 17-ին ՈւԵՖԱ Ազգերի լիգայի խաղարկության վերջին՝ 6-րդ տուրի շրջանակում կմրցի Լատվիայի ընտրանու հետ:

Առաջիկա հանդիպման մասին իր կարծիքն է հայտնել Հայաստանի ազգային հավաքականի գլխավոր մարզչի ժամանակավոր պաշտոնակատար Սուրեն Չախալյան։

«Թիմի կազմում կլինեն փոփոխություններ։ Հաշվի առնելով երեք օրը մեկ հանդիպում անցկացնելու փաստին՝ մենք կգնանք այդ քայլին։

Երկու թիմերի համար էլ սկզբունքային հանդիպում է։ Դրական արդյունքի դեպքում կմնանք նույն լիգայում։ Պատրաստվում են տղաները, միակ նպատակը՝ վաղը դրական արդյունք ապահովելն է»,- նախախաղային մամուլի ասուլիսի ժամանակ ասել է Սուրեն Չախալյանը։

Հայաստանի ազգային հավաքականի նախախաղային մարզումը կկայանա նոյեմբերի16-ին՝ ժամը 20:00-ին «Սկոնտո» մարզադաշտում:

ՈւԵՖԱ-ի Ազգերի լիգայի C լիգայի 4-րդ խմբի 5-րդ մրցափուլում Հայաստանի ազգային հավաքականը տանը նվազագույն հաշվով պարտվեց Ֆարերյան կղզիների ընտրանուն՝ (0:1)

«Երկու խաղակեսում էլ թիմը գոլային պահեր ստեղծեց, բայց այդ պահերը չկարողացանք վերածել գոլի։ Ֆուտբոլում կարող ես ունենալ առավելություն, բայց վերջում պարտվել։

Խաղային համակարգը փոխվել էր, Վահանը իր նոր դիրքում իրեն ավելի լավ է զգում, քան եզրում։ Այն պահանջ, որը ունեինք Միրանյանից և Սևիկյանից ցավոք սրտի հաջող չկարողացան կատարել, այդ պատճառով էլ հենց առաջին խաղակեսում փոփոխություն կատարեցինք»,- հետխաղյա ասուլիսի ժամանակ նշել է Հայաստանի ազգային հավաքականի ԺՊ Սուրեն Չախալյանը։

Հայաստանի ազգային հավաքականի գլխավոր մարզչի ժամանակավոր պաշտոնակատար Սուրեն Չախալյանը Ազգերի լիգայի նախավերջին տուրի՝ Ֆարերյան կղզիների դեմ վաղը կայանալիք խաղից առաջ կազմակերպված մամուլի ասուլիսի ընթացքում պատասխանել է լրագրողների հարցերին.

«Ֆուտբոլում շատ բան է փոխվել, բոլորը սովորել են խաղալ։ Եթե նայենք Ֆարերյան կղզիների արդյունքներին՝ ոչ մի թիմ չի կարողացել հեշտ հաղթանակ տանել նրանց նկատմամբ։ Մեծ հարգանքով են մոտենում մրցակցին։ Ամեն ինչ կանենք՝ հաղթելու համար։ Թե ոնց կհաղթենք՝ վաղը մենք ցույց կտանք խաղադաշտում։

Գիտեք՝ ինչ խնդիր էր դրված հավաքականի առջև․ զբաղեցնել առաջին տեղը և շարունակել։ Բայց, ցավոք, այսօր այդպես չէ։ Այսօր մեր առջև դրված նպատակն առաջիկա երկու հանդիպումն է, պետք է ամեն ինչ անենք, որ հաղթենք։

Լիարժեք մարզում անցկացրել ենք երեկ, ու նաև այսօր: Լիահույս եմ, որ 12-րդ ֆուտբոլիստը մեզ շատ է օգնելու: Երկրպագուների աջակցությունը միշտ շատ է օգնել հավաքականին: Նրանց գործոնը բոլորիս համար կարևոր է: Հույս ունեմ, որ վաղն էլ նրանց աջակցությունը կունենանք»,- ասել է Սուրեն Չախալյանը մամուլի ասուլիսի ժամանակ:

Նշենք, որ մեր ընտրանին Ազգերի լիգայի խաղարկության շրջանակում նոյեմբերի 14-ին Վազգեն Սարգսյանի անվան «Հանրապետական» մարզդաշտում կընդունի Ֆարերյան կղզիներին, իսկ երեք օր անց՝ նոյեմբերի 17-ին կավարտի ելույթները Լատվիայի դեմ արտագնա խաղով։

Հայաստանի Ֆուտբոլի ֆեդերացիայի նախագահ Արմեն Մելիքբեկյանը Հայաստանի Հանրային հեռուստաընկերության «Հարցազրույց Պետրոս Ղազարյանի հետ» հաղորդաշարի ժամանակ նշել է, թե ում գլխավորությամբ է Հայաստանի ընտրանին մասնակցելու առաջիկա երկու հանդիպումներին։

«Նոյեմբերյան հանդիպումներում Հայաստանի հավաքականը կգլխավորի մարզչական շտաբը՝ Սուրեն Չախալյանի գլխավորությամբ, որից հետո կնշանակվի նոր գլխավոր մարզիչ։ Գլխավոր մարզչի պաշտոնում այս պահին կան թեկնածուներեր, որոնց հետ մենք հիմա բանակցում ենք։ Շատ տարբեր տրամաչափի մասնագետների հետ ենք հիմա բանակցում, բայց այս պահին որևէ պարզաբանում չեմ տա այդ առումով, քանի որ դա կարող է վնասել բանակցային գործընթացին»,- հարցազրույցի ժամանակ նշեց ՀՖՖ նախագահը։

Հիշեցնենք, որ ավելի վաղ Ալեքսանդր Պետրակովը հեռացվել էր Հայաստանի ընտրանու գլխավոր մարզչի պաշտոնից։ Մեր ընտրանին առաջիկա հանդիպումը կանցկացնի Երևանում, նոյեմբերի 14-ին՝ Ֆարերյան կղզիների հավաքականի հետ։

«Փյունիկի» տեխնիկական տնօրեն Սուրեն Չախալյանն այսօր սեմինար-հանդիպում է ունեցել «Փյունիկի» մանկապատանեկան թիմերի մարզիչների հետ: 

Այս մասին հայտնում է երևանյան թիմի մամուլի քարտուղարությունը:

Հանդիպման ժամանակ քննարկվել է ակադեմիայի համար մեկ ընդհանուր մարզումային ծրագրով աշխատելու հարցը և ներկայացվել է մարզումային տարբեր վարժություններ, որոնք պետք է գործածվեն խաղադաշտում:

«Փյունիկ» ՖԱ-ում տեղի են ունեցել նոր նշանակումներ:

«Փյունիկ» ակադեմիայի գլխավոր տնօրենի պաշտոնը զբաղեցրել է Ալբերտ Սարգսյանը, իսկ տեխնիկական տնօրենի պաշտոնը՝ Սուրեն Չախալյանը։ Այս մասին հայտնում է երևանյան ակումբի պաշտոնական կայքը: 

Ալբերտ Սարգսյանը մինչև գլխավոր տնօրենի պաշտոնը զբաղեցնելը «Փյունիկ» ՖԱ-ում ծավալել է մարզչական գործունեություն, իսկ Սուրեն Չախալյանը 2019/20 մրցաշրջանում հանդիսացել է «Փյունիկի» գլխավոր մարզչի պաշտոնակատար:

Ակումբը ունի նաև նոր մամուլի քարտուղար: Այսուհետ այդ պաշտոնը կզբաղեցնի Հայկազ Մկրտչյանը:

«Փյունիկի» մարզիչներ Սուրեն Չախալյանը, Ռոբերտ Արզումանյանը և Չիրո Հոսեինի Վերդին իսպանական «Վալենսիա» ֆուտբոլային ակումբում վերապատրաստական դասընթացներ են անցնում:

Այս մասին հայտնում է երևանյան ակումբի մամուլի քարտուղարությունը:

Ֆուտբոլի Հայաստանի Բարձրագույն խմբի առաջնության 13-րդ տուրի <<Փյունիկ>>-<<Շիրակ>> խաղում հաղթեցին տանտերերը։

13-րդ րոպեին Դենիս Մահմուդովը ստանալով Արտակ Եդիգարյանի փոխանցումը, հեռահար կրակոցով խփեց խաղի միակ ու հաղթական գնդակը։

Երկրորդ կեսի սկզբնամասում Ռոբերտ Հակոբյանը ստանալով երկրորդ դեղին քարտը՝ հեռացվեց խաղադաշտից։

Չնայած քանակական առավելությանը, Գյումրիի թիմը չկարողացավ փրկել խաղը։

Սուրեն Չախալյանը <<Փյունիկի>> ղեկին տարավ առաջին հաղթանակը։

Այս հաղթանակից հետո <<Փյունիկը>> միավորների քանակը հասցրեց 16-ի ու մոտեցավ <<Նոային>>։

Բիչախչյանի թիմը մնաց 25 միավորով և լրացուցիչ արդյունքներով շարունակում է մնալ երկրորդը։