«Մեծ սաղավարտի» կրկնակի չեմպիոն և աշխարհի նախկին առաջին ռակետ, ռումինացի թենիսիստուհի Սիմոնա Հալեպը հայտարարել է կարիերան ավարտելու մասին և երախտագիտության խոսքեր հղել: 

«Շնորհակալ եմ ամեն ինչի համար։ Ես հեռանում եմ լի երախտագիտությամբ»,- գրել է Հալեպը սոցցանցում։

Փետրվարի 4-ին Հալեպը պարտություն է կրել Կլուժ-Նապոկայում ընթացող WTA-250 մրցաշարի առաջին շրջանում՝ 1:6, 1:6 հաշվով ջախջախիչ պարտություն կրելով իտալացի Լուչիա Բրոնզետիից:

Մարզուհին չորս տարով որակազրկվել էր հակադոպինգային կանոնները խախտելու համար։ Թենիսիստուհին բողոքարկել է որոշումը։ Մարզական արբիտրաժային դատարանը (CAS) ընդունել է այն և ժամկետը կրճատել մինչև ինը ամիս:

Աշխարհի երրորդ ռակետ, ռումինուհի Սիմոնա Հալեպը պատվաստվել է կորոնավիրուսի դեմ: Նա ընտրել է Pfizer վակցինան և պատվաստվել չորեքշաբթի Բուխարեստում:

«Կային մտահոգություններ, բայց ես սա արել եմ գիտակցված ու ինձ շատ լավ եմ զգում: Կարծում եմ՝ պատվաստանյութն օգտակար կլինի բոլորին: Հուսով եմ՝ ավելի ու ավելի շատ մարդիկ կպատվաստվեն: Հիմա ես ինձ ավելի անվտանգ եմ զգում, բայց միևնույն է՝ պետք է զգույշ լինեմ: Եթե սա պանդեմիան դադարեցնելու միակ միջոցն է,ապա ավելի լավ է պատվաստվել»,- Հալեպի խոսքերն է փոխանցում Tennis World USA-ը:

Հալեպը նաև պատմել է առաջիկա մրցաշարերի մասին. «Մտադիր եմ խաղալ Դուբայում: Հիմա առողջանւմ եմ ու հույս ունեմ մեկնել այնտեղ: Կմասնակցեմ նաև Օլիմպիական խաղերին: 100 տոկոսով կլինեմ այնտեղ: Հույս ունեմ՝ մեդալ կնվաճեմ՝ ինչ գույն էլ, որ այն լինի»:

Մելբուրնում երկուշաբթի մեկնարկում է թենիսի տարվա Մեծ սաղավարտի առաջին մրցաշարը՝ Ավստրալիայի բաց առաջնությունը։ Հատկանշական է, որ Australian Open-ն արդեն երկրորդ տարին է, ինչ անցնում է արտառոց պայմաններում։ Եթե 2020-ի հունվարին խնդիրը կանաչ մայրցամաքում բռնկված անտառային սարսափելի հրդեհներն էին, ապա հիմա խնդիրը կորոնավիրուսի համավարակն է։

Այո՛, Ավստրալիան այն օրինակելի երկրներից է, որտեղ Covid-19-ը շատ մեծ վնասներ չի հասցրել, սակայն մենք խոսում ենք մի մրցաշարի մասին, որի մասնակիցները գալիս են աշխարհի այն կետերից, որտեղ կորոնավիրուսը ոչ միայն չի նահանջել, այլև տարածվում է նոր տեմպերով։

Խաղացողները Ավստրալիայում են «տենց հուլիսի կեսերից»։ Իհարկե, «Կարգին հաղորդման» սկետչերից մեկը հիշելը զուտ դրական մթնոլորտի ապահովման նպատակ էր հետապնդում, իսկ իրականում խաղացողները ոչ թե հուլիսի, այլ հունվարի կեսից են այստեղ։ Բոլորը, կամ կարելի է ասել, «բոլորը» անցան երկշաբաթյա կարանտին։ Ճիշտ է, որոշների համար պայմանները սարսափելի էին, որոշների համար՝ գերազանց։

Ուժեղագույնները՝ Նովակ Ջոկովիչը, Ռաֆա Նադալը, Սերենա Ուիլյամսը, Նաոմի Օսական և ուրիշ թոփեր իրենց կարանտինն անցում էին Ադելաիդայում։ Մյուս խաղացողները հյուրանոցների փոքր ու անհարմար սենյակներից դժգոհում էին Ավստրալիայի այլ քաղաքներում։ Աշխարհի առաջին ռակետ Նովակ Ջոկովիչը ցանկացավ մի ինչ-որ լավ բան անել այդ խաղացողների համար ու Tennis Australia-ից ավելի լավ պահանջներ խնդրեց։ Սակայն լավ պայմաններում ինքնամեկուսացումն անցկացնող Ջոկովիչի խորհուրդը շատերի կողմից սխալ ընկալվեց։ Ստեն Վավրինկան բացահայտ հեգնեց Նովակին, գրեթե նույնն արեց նաև Դոմինիկ Տիմը։

Ինչևէ, լավ վատ, բոլորը անցան կարանտինը, ու ոմանք մասնակցեցին ATP Cup-ին, ոմանք էլ Մելբուրնում ընթացող մրցաշարին։ Իսկ հիմա գանք բուն Australian Open-ին։

Ընդհանրապես AO-ին ընդառաջ միշտ բարդ է ասելը, թե ումից ինչ կարող ես սպասել։ Դե սրա գլխավոր պատճառն այն է, որ սա առաջին մեծ մրցաշարն է նոր մրցաշրջանում։ Այս տարի, իհարկե, ամեն ինչ ավելի բարդ է։ Երկար ժամանակ թենիսիստները կորտում չեն եղել։ Թենիսային մարզավիճակի մասով խնդիրներ պետք է որ չլինեն։ Այս մասին մեր հետ զրույցում ասաց նաև Հայաստանի առաջին ռակետ Անի Ամիրաղյանը։ Ֆիզիկական պատրաստությանը ևս թենիսիստները պետք է որ լավ ուշադրություն տրամադրած լինեն կարանտինի ընթացքում։ ATP Cup-ում մենք տեսանք, որ խաղացողները չունեն նաև այդ խնդիրը։

Սակայն երբ ֆիզիկականն ու հոգեբանականը միախառնվեն, դժվար է ասելը, թե ինչ կստանանք մրցաշրջանի սկզբում։ Դեռևս անհայտ է, թե տղամարդկանց մենախաղի գլխավոր ֆավորիտներից մեկը՝ Ռաֆայել Նադալը առհասարակ պատրա՞ստ է մրցաշարին։ Ռաֆան ATP Cup-ին չմասնակցեց մեջքի վնասվածքի պատճառով։ Իհարկե, չափազանց ցավալի կլինի, եթե նա իր լավագույն վիճակում չլինի մրցաշարի ընթացքում՝ հաշվի առնելով այն դժվարությունները, որ նրանք անցել են մրցաշարին մասնակցելու համար։

Ստադիոններում լինելու են երկրպագուներ։ Սա թերևս ամենակարևոր ու ուրախալի փաստն է Australian Open-ի այս տարվա մրցաշարի մասին։ Ավստրալիայում, չնայած Covid-19-ի բավականին սակավ դեպքերի, պահպանվում են կարանտինային խիստ միջոցները։ Նահանգից նահանգ գնալն արգելված է։ Այնպես որ, Վիկտորիայում ապրողները հնարավորություն ունեն տեսնելու աշխարհի ուժեղագույն թենիսիստներին գործի մեջ արդեն փետրվարի 8-ից։ Ճիշտ է՝ ստադիոնները ամբողջությամբ լեցուն չեն լինի։

Ֆավորիտներ տղամարդկանց մենախաղում

Այստեղ, իհարկե, առաջինը գալիս է Մելբուրնի անվիճելի չեմպիոնի՝ Նովակ Ջոկովիչի անունը։ Վերևում խոսեցինք այն մասին, որ մրցաշրջանի սկզբում բարդ է ասելը, թե ով կարող է լավ խաղալ Ավստրալիայում։ Սակայն Ջոկովիչի պարագայում մենք ոչ մեկ անգամ ենք համոզվել, որ նա կարողանում է գերազանց սկսել մրցաշրջանը՝ հաղթելով Australian Open-ում։ Այդպես եղավ նաև անցած տարի։

Մեծ են սպասումները երիտասարդներից։ Անցած մրցաշրջանի վերջում փայլող Դանիլ Մեդվեդևի ժամանակը, շատերի պնդմամբ, եկել է Մեծ սաղավարտում հաջողություն գրանցելու համար։ Սակայն այստեղ էլ այլ խնդիր կա։ Ռուս թենիսիստը թե՛ 2019-ին, թե՛ 2020-ին փայլեց մրցաշրջանի երկրորդ հատվածում, իսկ առաջինում նրա մրցելույթները համեմատաբար համեստ են։

Երկրպագուները սպասում են լավ ելույթների նաև Ալեքսանդր Զվերևից ու Ստեֆանոս Ցիցիպասից։ ATP CUP-ում փայլում էր Մատեո Բերետինին։ Նա, կարծես, լուրջ հայտ է ներկայացնելու այս մրցաշրջանում ավելի բարձր մակարդակում պայքարելու համար, ինչպես դա եղավ 2019-ի վերջում։

Դոմինիկ Տիմը, թերևս Նադալի ու Ջոկովիչի հետ նույն ակումբում է։ Թեպետ, կրկնում եմ, Նադալի պարագայում շատ բան անորոշ է նրա վնասվածքից հետո։

Ֆավորիտներ կանանց մենախաղում

Կանանց մոտ ավելի անհասկանալի իրավիճակ է։ Օսակա, Ուիլյամս, գործող չեմպիոն Սոֆիա Կենին, Սիմոնա Հալեպ, Էշլի Բարտի։ Այս բոլոր թենիսիստները կարող են լավ խաղալ։

Սակայն կանանց մենախաղում վերջին տարիներին կա տենդենց, երբ Մեծ սաղավարտի մրցաշարում հաղթում է մի թենիսիստ, ումից դա այդքան էլ չէին սպասում։ Խոսվում է նաև Մարտա Կոստյուկի շատ լավ մարզավիճակում լինելու մասին։ Կարանտինին բավականին ակտիվ մարզվում էր նաև Օնս Ջաբուրը։

Հայկական արմատները Australian Open-ում

Հայկական արմատներ ունեցող թենիսիստներից կտեսնենք միայն Կարեն Խաչանովին։ Կարենը անցած մրցաշրջանը մեծ հաշվով տապալեց։ Այս տարին նրա համար կարող է բեկումնային լինել։ Նա կամ կվերադառնա թոփ-10, կվերահաստատի թոփ թենիսիստի իր կարգավիճակը, կամ կամաց-կամաց կվերածվի ATP-ի դասակարգման աղյուսակում բավականին լավ տեղեր պահպանող, բայց միայն համեստ մրցաշարերում հաջողություններ գրանցող թենիսիտի։ Իհարկե, դա չեն ուզում ո՛չ Ռուսաստանում, ո՛չ էլ Հայաստանում։ Խաչանովի պոտենցիալը ահռելի է, ու հուսանք, որ նրա մոտ կստացվի։

Մարգարիտա Գասպարյանը չի հայտնվել հիմնական ցանցում, քանի որ որակավորման փուլի եզրափակիչում պարտություն կրեց՝ դուրս մնալով հետագա պայքարից։ Բայց եթե շատ եք ուզում կանանց մենախաղում էլ երկրպագել հայերի հետ որևէ կապ ունեցող մեկին, ապա Ալեքսիս Օհանյանի կինը ձեզ է սպասում։

Սպասվող անհարմարություններ

Ու նորից գանք հակահամաճարակային պայմաններին։ Թեպետ խոսեցինք Վիկտորիա նահանգում Covid-19-ի քիչ դեպքերի մասին, այնուամենայնիվ պետք չէ բացառել, որ մրցաշարի ընթացքում կլինեն ֆորս-մաժորային իրավիճակներ։ Այդպիսի դեպք եղավ անցած շաբաթ, երբ հյուրանոցի թիկնապահի մոտ, որտեղ մնացել էին հազարավոր խաղացողներ ու անձնակազմի անդամներ, հայտնաբերվել էր կորոնավիրուս։ Հինգշաբթի որևէ խաղ Մելբուրնում չկայացավ, քանի դեռ ողջ անձնակազմը դարձյալ թեստավորում չանցավ ու չստացավ բացասական արդյունք։

Tennis Australia-ի հաղթանակը

Թենիսի Ավստրալիայի ֆեդերացիան, կամ ինչպես ասում են Tennis Australia-ն մեծ հաղթանակ է տանում միայն նրանով, որ կազմակերպում է Australian Open-ը։ Հաշվի առնելով մրցաշարի ահռելի հեղինակությունը մարզական աշխարհում՝ կարելի է վստահ լինել, որ այն բարձր մակարդակի վրա է անցկացվելու անգամ այս բարդ պայմաններում։ Թենիսի սիրահարներին մաղթում եմ իրադարձություններով ու թեժ հանդիպումներով լի 2 շաբաթ․․․

Արամ Սահակյան

Հայաստանի առաջին ռակետ Անի Ամիրաղյանի ծրագրերում առաջին հերթին կրունկի վնասվածքից ապաքինվելն է։ Անին մրցաշարերի չի մասնակցում նոյեմբերից։ Ապաքինման ընթացքի, երբևէ հանդիպած ամենաուժեղ մրցակցի, հայկական թենիսում առկա խնդիրների ու համաշխարհային թենիսի մի շարք հարցերի շուրջ Armsport-ը զրուցել է Հայաստանի առաջին ռակետ Անի Ամիրաղյանի հետ։

— Անի՛, ինչ մարզավիճակում ես հիմա։ Որտե՞ղ ես մարզվում։ 

— Ես հիմա չեմ մարզվում, քանի որ ունեմ կրունկի վնասվածք։ Նոյեմբերի 26-ից ես չեմ մարզվում։ Վերջին խաղս եղել է այդ օրը Հունաստանում։ Հիմա եկել եմ Հայաստան, որպեսզի բուժեմ վնասվածքս։

— Ի՞նչ լրջության է վնասվածքը։ 

— Բավականին լուրջ վնասվածք է, անգամ խանգարում է ինձ քայլելու ընթացքում։ Անցնում եմ տարբեր թերապիաներ, հաջորդը առաջիկա շաբաթ է։ Հուսամ՝ լավ կլինի։ Հիմա միայն մտածում եմ ապաքինման մասին, հետո նոր կմտածեմ մրցաշարերի մասին։ Իսկապես ոտքս շատ էր ցավում, ես հասկացա, որ այսպես չի կարող շարունակվել։ Այդ իսկ պատճառով մտածում եմ նախ ամբողջությամբ ապաքինվելու, հետո մարզումները վերսկսելու և նոր հետո միայն մրցաշարերին մասնակցելու մասին։

— Շուտափույթ ապաքինում եմ մաղթում։ Խոսենք Հայաստանում թենիսի իրավիճակի մասին։ Ի՞նչ է պետք թենիսը ավելի մասսայական դարձնելու ու զարգացնելու համար մեր երկրում։  

—  Կարծում եմ՝ թենիսը մեծ հաշվով զարգացած է մեր երկրում, մանավանդ փոքրերի մոտ։ Կան 10-12 տարեկան երեխաներ, որոնք շատ լավ են խաղում։ Սակայն հենց իմ օրինակով կարող եմ ասել, որ ուղղակի լավ խաղալը հերիք չէ թենիսում։ Դու պետք է հովանավոր ունենաս, որը, քեզ աջակցելով, ներդրում է կատարում։ Իհարկե, դու հետագայում, այսպես ասած, փոխհատուցում ես դա։   Հովանավորները տարբեր կերպ են պայմանավորվածություններ ունենում մարզիկների հետ։

Եթե դու լավ ես խաղում փոքր տարիքում, բայց դու չունես գումար, դա ոչ մի բան է։ Այսինքն քո արածը ջուրն է ընկնում։ Այդպես եղել է նաև ինձ մոտ։ Ես մի քանի անգամ դադարել եմ խաղալ, քանի որ ընդհանրապես հնարավորություն չկար մրցաշարի մասնակցելու, իսկ եթե դու մրցաշարի չես գնում, քո մարզվելը անիմաստ է դառնում, քանի որ դու մարզվում ես մրցաշարերի մասնակցելու համար։

— Այսինքն կարո՞ղ ենք ասել, որ գալիս է մի տարիք, երբ թենիսիստի առաջ գնալը ուղիղ կապված է հովանավորի հետ։ 

— Այո՛, իհարկե։ Խնդիրը դրանում է, որ մենք չունենք հովանավորներ։ Ես դիմել եմ մի քանի մեծ կազմակերպությունների, բայց նրանք ընդհանրապես հետաքրքրված չեն սպորտում ներդրում կատարելու մեջ։ Կարելի է ասել, որ թենիսը Հայաստանում շատ զարգացած է սիրողական մակարդակով, բայց պրոֆեսիոնալ մակարդակում զարգացած չէ։ Այլ երկրներում ֆեդերացիաները մեծ ֆինանսական միջոցներ ունեն ու կարող են ֆինանսավորել մարզիկներին, ու այստեղ խոսքը միայն թենիսի մասին չէ։ Իսկ մեզ մոտ ֆեդերացիան այդքան գումար չունի հովանավորելու համար։ Դրա համար պետք են անհատ մարդիկ, ովքեր պատրաստ կլինեն ներդրում կատարել։

— Ձեր սերնդում, կամ ձեզնից հետո դու ճանաչու՞մ ես այնպիսի խաղացողների, որոնք մեծ տաղանդ են ունեցել, սակայն չեն դարձել պրոֆեսիոնալ թենիսիստ հենց հովանավոր չունենալու պատճառով։

— Ինձ թվում է՝ նման դեպքեր շատ կան ու ոչ միայն Հայաստանում։ Ես ունեմ ընկերներ ամբողջ աշխարհում, որոնք ունեն գրեթե նույն խնդիրը։ Շատերը գնացել են ԱՄՆ սովորելու՝ հասկանալով, որ այլ ելք պարզապես չկա։ Իսկ ԱՄՆ-ը աջակցում է իր մարզիկներին, անգամ նրանց, ովքեր խաղում են իրենց համալսարանների համար։ Շատերին գիտեմ, ովքեր, իմանալով, որ ունենալու են հովանավորչություն, ընդունում են այդ առաջարկները ու գնում են երկրից։ Թենիսում ամեն ինչ մեծ գումարների հետ է կապված՝ հագուստ, ռակետներ, խաղակոշիկներ։ Ես նույնպես ունեի նման ցանկություն ԱՄՆ գնալու, սակայն երբ գնում ես այդպիսի երկիր, առաջին շեշտը դրվում է սովորելու վրա, իսկ այդ պարագայում պրոֆեսիոնալ թենիսիստ չես կարող դառնալ, մինչդեռ ես միշտ ուզեցել եմ դա։ Գուցե հենց դրա համար չեմ գնացել։

— Անի՛, ասեցիր, որ բազմաթիվ ընկերներ ունես ամբողջ աշխարհում։ Հետաքրքիր է, կա՞ շփում հայկական արմատներ ունեցող ռուսաստանաբնակ թենիսիստների, մասնավորապես Մարգարիտա Գասպարյանի կամ Կարեն Խաչանովի հետ։ 

— Մարգարիտայի հետ շփում կա։ Instagram-ում, երբ տեսնում եմ, որ նա այս կամ այն մրցաշարի է պատրաստվում, հաջողություն եմ մաղթում։ Բայց մոտ շփում հիմա չկա։ Ժամանակին կար, երբ նա [Մարգարիտան] ամեն տարի ամռանը գալիս էր Հայաստան, մենք միասին մարզվում էինք, շփվում էինք, իսկ հիմա այդքան հաճախ չենք շփվում։ Խաչանովին պարզապես գիտեմ, բայց նրա հետ շփում չեմ ունեցել։

— Անի՛, Australian Open-ից առաջ աշխարհի ուժեղագույն թենիսիստները երկշաբաթյա խիստ կարանտինի մեջ են։ Այդպիսի պրոֆեսիոնալների համար ի՞նչ հետևանք կարող է ունենալ նման մեծ մրցաշարից առաջ այդքան երկար ժամանակ սենյակներում մնալը։ 

— Երբ փոքր էի, եթե չխաղայի անգամ մեկ օր, հաջորդ օրը տպավորություն էր, որ ես ռակետը բռնում եմ առաջին անգամ։ Տարիքի հետ դա փոխվում է։ Իսկ հիմա, եթե չխաղամ անգամ մի քանի ամիս, ընդամենը մեկ շաբաթում ամբողջությամբ կարող եմ վերականգնել թենիսի մարզավիճակը։ Ես խոսում եմ զուտ թենիսի և ոչ ֆիզիկականի մասին։ Ֆիզիկականը վազքն է, հոգնածությունն է, շնչառությունն է, մինչդեռ թենիսայինը գնդակը զգալն է, նրա արագությունը հասկանալը։ Թենիսային մարզավիճակը շատ արագ է հետ գալիս, իսկ ֆիզիկականը․․․գիտե՞ք՝ հիմա այդ թենիսիստները այնպիսի պրոֆեսիոնալ մասնագետների հետ են աշխատում ու այնպիսի սարքավորումներ ունեն անգամ իրենց համարներում, որ անգամ 4 պատի մեջ նրանք կարող են գերազանց մարզավիճակ պահպանել։ Այնպես որ նրանց մոտ որևէ խնդիր չի լինելու, երբ կորտ վերադառնան։

— Անի՛, կարո՞ղ ես հիշել, թե ով է եղել ամենաուժեղ թենիսիստը, ում հետ երբևէ խաղացել ես։ 

— Ես խաղացել եմ Սիմոնա Հալեպի հետ։ Դա 2004 թվականին էր։ Ես մասնակցում էի Էստոնիայում ընթացող Development մրցաշարին մինչև 14 տարեկանների համար։ Դա ITF-ի (Թենիսի միջազգային ֆեդերացիա/խմբ․) ծրագրերից էր, ուր գնում էին երկրի առաջին և երկրորդ համարները։ Իմ ու Հալեպի խաղը տևեց 1 ու կես ժամ, ես պարտվեցի 0-6, 0-6 հաշվով (ծիծաղում է/խմբ․)։ Բայց բոլոր գեյմերը շատ համառ պայքարում էին անցնում, դրա համար էլ խաղն այդքան երկար տևեց, բայց այդ ժամանակ ով իմանար․․․

— Որ դու խաղում ես Ուիմբլդոնի ապագա չեմպիոն հետ։ 

— Այո՛, այո՛։

— Անի՛, հիշելով Հալեպի Ուիմբլդոնի հաղթանակը Ուիմբլդոնի եզրափակիչում Սերենա Ուիլյամսի դեմ խաղում մի հարց առաջացավ։ Շատերն են խոսում, որ Սերենան երեխայի ծնվելուց հետո չի կարողանում հաղթել Մեծ սաղավարտի մրցաշարերում, թեպետ 3 եզրափակիչի է մասնակցել։ Ըստ քեզ՝ ո՞րն է խնդիրը։ 

— Ես ընդհանրապես չեմ կարծում, որ դա կարող է ընտանիքի հետ կապված լինել։ Դա գուցե հոգեբանական ինչ-որ խնդիր է, բայց չեմ կարծում, որ այդ հոգեբանական խնդիրը ընտանիքն է կամ երեխան։ Ես նույնպես երեխա ունեմ, ամուսնացած եմ ու կարող եմ ասել, որ երեխա ունենալուց հետո ավելի լավ ես սկսում խաղալ։ Դա գալիս է նրանից, որ կյանքի առաջնահերթությունները փոխվում են, ու դու թենիս խաղում ես ավելի ազատ, քան դու խաղում էիր մինչև այդ։ Ես նույնպես չէի մտածում, որ այդպես կարող է լինել, բայց հենց այդ պահին ես սկսում ավելի շատ արժևորել թենիսը, քանի որ երկար ժամանակ սպորտից դուրս ես եղել։ Երբ չես խաղում, կարոտում ես սպորտը ու ուզում ես նորից խաղաս։ Իսկ վերադարձից հետո թենիսի այդ համը ուրիշ ձև ես զգում։

— Այս հարցը չեմ կարող չտալ։ Ֆեդերե՞ր, Նադա՞լ, թե՞ Ջոկովիչ։ Եվ ինչու՞։ 

— Իհարկե, Ֆեդերեր։ Կորտում իր պահելաձևը, համեստությունը․․․կարծում եմ՝ բոլորը իմ հետ համաձայն կլինեն այս հարցում։ Ինձ շատ է դուր գալիս նաև Ջոկովիչի տեխնիկան, ոտքերի շարժումը կորտում և ընդհանրապես նրա խաղը։ Նադալն էլ գրունտի արքան է։

Նրանցից յուրաքանչյուրը ունեն իրենց առանձնահատկությունը, բայց ես կընտրեմ Ֆեդերերին։ Շատ եմ սիրում նաև Գաել Մոնֆիսին։ Կրկնում եմ՝ Ջոկովիչի ոտքերի աշխատանքը լավագույնն է, նա ավելորդ որևէ բան չի անում կորտում, բայց Ֆեդերերին ոչ ոք չի կարող հասնել։

— Թերևս եզրափակենք հենց այս համատեքստում․ այս տարի լրանում է Ֆեդերերի 40-ը, բայց նա պատրաստվում է շուտով կորտ վերադառնալ։ Ի՞նչ սպասումներ կան նրանից այս տարիքում ու մեկ տարի չխաղալուց հետո։ 

— Չեմ կարծում, որ տարիքը նշանակություն ունի։ Նրա հետ այնպիսի մասնագետներ են հիմա աշխատում․․․Ավելի կարևոր է ֆիզիկական մարզավիճակը, իսկ Ռոջերը մեծ մրցաշարերի մոտենում է լավ ֆիզիկական մարզավիճակում։

Արամ Սահակյան

Ֆրանսիայի մայրաքաղաք Փարիզում շարունակվում է թենիսի Մեծ սաղավարտի տարվա 3-րդ մրցաշարը՝ Ռոլան Գարոսը: 

Տղամարդկանց մենախաղում հայտնի են դարձել քառորդ եզրափակիչի առաջին մասնակիցների անունները: Լավագույն 8-ում են հայտնվել Ռաֆայել Նադալը, Յանիկ Սիները, Դոմինիկ Տիմն ու Դիեգո Շվարցմանը: Նադալն ու Սիները 1/4-ում կմրցեն միմյանց դեմ, Տիմը կխաղա Շվարցմանի հետ:

Այսօր 1/8-րդ եզրափակիչի իր հանդիպումը կանցկացնի հայկական արմատներով ռուս թենիսիստ Կարեն Խաչանովը: Նրա մրցակիցը աշխարհի առաջին ռակետ Նովակ Ջոկովիչն է:

Կանանց մենախաղում պայքարից դուրս է մնացել Սիմոնա Հալեպը: Ռումինուհին պարտվել է Իգա Սվիատեկին: Քառորդ եզրափակիչ փուլի ուղեգիր են նվաճել նաև Մարտինա Տրեվիսանը, Նադիա Պոդորոսկան և Էլինա Սվիտոլինան:

WTA-ն հրապարակել է թենիսիստուհիների թարմացված վարկանիշային աղյուսակը: Ամերիկացի Սոֆիա Քենինը, Ավստրալիայի բաց առաջնությունում հաղթելուց հետո, 15-րդ տեղից բարձրացավ յոթերորդ տեղ: Ավստրալիայի բաց առաջնության կիսաեզրափակչի մասնակից Սիմոնա Հալեպը տեղափոխվեց երրորդից երկրորդ տեղ ՝ շրջանցելով չեխ Կարոլինա Պլիշկովային:

1. Էշլի Բարտի (Ավստրալիա) — 8367
2. Սիմոնա Հալեպ (Ռումինիա) — 6101
3. Կարոլինա Պլիշկովա (Չեխիա) — 5290
4. Էլինա Սվիտոլինա (Ուկրաինա) — 4775
5. Բելինդա Բենչիչ (Շվեյցարիա) — 4675
6. Բիանկա Անդրեեսկու(Կանադա) — 4665
7. Սոֆիա Քենին (ԱՄՆ) — 4495
8. Կիկի Բերտենս (Հոլանդիա) — 3965
9. Սերենա Ուիլյամս (ԱՄՆ) — 3915
10. Նաոմի Օսակա (Japanապոնիա) — 3626 …

Ավստրալիայի Բաց առաջնության 1/4 եզրափակչում Ռուսաստանի երկրորդ ռակետ Անաստասիա Պավլյուչենկովան, 1 ժամ 35 րոպեում ՝ 7:5, 6:3 հաշվով պարտվել է իսպանացի թենիսիստուհի Գարբինե Մուգուրուսային:

Մուգուրուսան կիսաեզրափակչում կմրցի նախկին առաջին ռակետ Սիմոնա Հալեպի հետ:

Հիշեցնենք, որ Պավլյուչենկովան նախկինում էլ չէր կարողացել հաղթահարել 1/4 եզրափակչի արգելքը:

Ռումինացի Սիմոնա Հալեպը նվաճեց Ավստրալիայի Բաց առաջնության-2020-ի կիսաեզրափակչի ուղեգիր` 1/4-րդ եզրափակիչ խաղում Հալեպը հաղթեց էստոնացի Անետա Կոնտավեյթին `6:1, 6:1:

Հանդիպումը տևեց 53 րոպե:

Եզրափակիչ դուրս գալու համար Հալեպը կպայքարի իսպանուհի Գարբինա Մուգուրուզույի հետ

Australian Open — 2020. Մելբուրն (Ավստրալիա)

Կանայք: Քառորդ եզրափակիչ

Սիմոն Հալեպ (Ռումինիա, 4)- Անետ Կոնտավիտ (Էստոնիա, 28) — 6:1, 6:1:

Էստոնիացի թենիսիստուհի Անետ Կոնտավեյտը դուրս եկավ Ավստրալիայի Օփենի-2020-ի քառորդ եզրափակիչ: Չորրորդ տուրի խաղում Կոնտավեյtը պարտության մատնեց Լեհաստանի ներկայացուցիչ Իգա Սվենտեկին`6:7 (4:7), 7:5, 7:5: Հանդիպումը տևեց 2 ժամ 45 րոպե:

Անետը առաջին էստոնացին է, ով դուրս եկավ Ավստրալիայի բաց առաջնության քառորդ եզրափակիչ: Կիսաեզրափակիչ դուրս գալու համար նա կպայքարի ռումինացի Սիմոնե Հալեպի հետ:

2020-ը մեկնարկեց քաղաքական ու բնապահպանական բուռն իրադարձություններով։ Մինչդեռ ԱՄՆ-Իրան հարաբերություններում սրացում էր, մոլորակի ամենազարմանահրաշ վայրերից մեկում՝ Ավստրալիայում այրվում էին անտառներ, ոչնչանում էին կենդանիներ։

Աղետը ողջ աշխարհի ուշադրությունը սևեռեց կանաչ մայրցամաքի վրա։ Այնտեղ հիմա էլ հրդեհները շարունակվում են։ Բազմաթիվ բարեգործություններ, ակցիաներ․․․այս ամենը մեկ բանի համար․ փրկե՜լ Ավստրալիան։

Մարզական աշխարհի սիրահարները համակ ուշադրությամբ էին հետևում Ավստրալիայում ծավալվող իրադարձություններին։ Հունվարին մարզական աշխարհի թենիսային ռադարները ուղղվում են հենց Ավստրալիայի վրա, բայց առաջին օրերին ամեն ինչ մշուշոտ էր թվում։

Ողջու՜յն։ Այս երկարաշունչ նախաբանով սկսում ենք խոսել հունվարի 20-ից փետրվարի 2-ը Ավստրալիայի Մելբուրն քաղաքում կայանալիք Մեծ սաղավարտի տարվա առաջին մրցաշարի՝ Ավստրալիայի բաց առաջնության մասին։

Ինչու՞ այսքան երկար խոսել բնապահպանական խնդիրներից, երբ հոդվածը թենիսի մասին է։ Այս հարցը, որը գուցե շատերիդ մոտ է առաջացել, պարզ պատասխան ունի։ Ավստրալիայում ծավալված խնդիրները ուղիղ համեմատական են Ավստրալիայի բաց առաջնության հետ, քանզի օդի աղտոտվածության տարրեր առկա են նաև Մելբուրնում։

Սկսենք նրանից, որ թենիսի Ավստրալիայի բաց առաջնության հանդիպումների մեծ մասը կայանալու են փակ կորտերում։ Սա, միանշանակ, փոխում է ուժերի հարաբերակցությունը, քանի որ տուրում կան տղաներ ու աղջիկներ, ովքեր ավելի լավ են խաղում փակ կորտում, կամ հակառակը՝ վատ են խաղում։

Եղանակային պայմանների հնարավոր վնասները

Մինչ Մելբուրն ժամանելը աշխարհի ուժեղագույն թենիսիստները եղան ավստրալական երեք քաղաքներում՝ Պերթում, Բրիսբենում և Սիդնեյում։ Այս երեք քաղաքներում անցկացվում էր ATP Cup-ը։ Օդի աղտոտվածությունից ու ծանրությունից բողոքեց Նովակ Ջոկովիչը։ Թենիսի սիրահարները գիտեն, որ սերբը ամենահարմարվողներից ու քիչ բողոքողներից մեկն է տուրում։

Եթե խնդիրների մասին բարձրաձայնում է Նովակը, ուրեմն դրանք հաստատ առկա են։ Պարանորմալ եղանակային պայմանները թենիսում չեն խնայել և ոչ մեկի։ Այնպես որ, բացառված չէ, որ ֆավորիտները լուրջ խնդիրներ կունենան ոչ միայն մրցակցի արգելքը հաղթահարելու այլ նաև եղանակային պայմանների դեմ պայքարելու ժամանակ։

Տղամարդկանց մենախաղ, մարզավիճակներ, ֆավորիտներ․․․

Մեծ եռյակ։ Դե նրանք միշտ կան։ Ինչպես նոյեմբերին ասաց Ջոկովիչը․ «Կամ մենք երեքս միասին կանգ կառնենք, կամ մեզնից ոչ ոք կանգ չի առնի»։ Ռաֆայել Նադալի ու Նովակ Ջոկովիչի մարզավիճակի մասին կարող ենք խոսել, քանի որ տեսել ենք նրանց խաղը ATP Cup-ում։ Ջոկովիչը գերազանց վիճակում է։ 8 խաղ, 8 հաղթանակ։ Ինչ վերաբերում է Նադալին, ապա իսպանացին լավագույն վիճակում չէր ATP Cup-ում։ Ռաֆան պարտվեց Գոֆենին ու Ջոկովիչին, դժվարությամբ հաղթեց դե Միանուրին։

Ռոջեր Ֆեդերերը մրցաշրջանը սկսում է Australian Open-ով։ Ոչ մի պաշտոնական խաղի շվեյցարացին չի մասնակցել այս տարի։ Հիմնականում Ռոջերը վերջին տարիներին այսպես է վարվում։ 2017-ն ու 2018-ը հաջող են եղել Ֆեդերերի համար Մելբուրնում։

2019-ին նա անակնկալ կերպով պարտվեց Ստեֆանոս Ցիցիպասին։ Դժվար է ասել, թե ինչ վիճակում է մոտենում մրցաշարին շվեյցարացի մաեստրոն, սակայն մեկ բան ակնհայտ է․ Ավստրալիան Ֆեդերերի ամենասիրելի վայրերից մեկն է խաղալու տեսանկյունից, այստեղի լսարանը նրան շա՜տ է սիրում։

NewGen-ը գործի կանցնի՞

Թենիսի նոր սերնդի՝ Մեծ սաղավարտերում հաջող ելույթների մասին խոսելը նման է ռուս արտիստների երևանյան համերգներին։ Խոսում են, խոսում են, բայց նրանք այդպես էլ չեն գալիս։

Այո՛, Դանիլ Մեդվեդևը չքնաղ տեսք ուներ US Open-2019-ում, ուր հասավ մինչև եզրափակիչ ու քիչ էր մնում հաղթեր Նադալին։ Այո՛, Ցիցիպասը հաղթեց ամփոփիչ մրցաշարում, անցած տարի էլ Մելբուրնում հասել էր կիսաեզրափակիչ։ Այո՛, լավն է Տիմը, այո՛, լավն է Բերետինին, բայց հաղթանակը Major-ում դեռ չկա։ Վերջին 12 Grand Slam-երը հաղթել են կամ Ջոկովիչը, կամ Ֆեդերերը, կամ Նադալը։

Այս մրցաշարում սպասելիքները մեծ չեն Ալեքսանդր Զվերևից։ Գերմանացին նոր է ենթարկվել աչքի վիրահատության ու, կարծես, լիովին չի ապաքինվել։ Սպասելիքները մեծ են Դանիլ Մեդվեդևից ու Ստեֆանոս Ցիցիպասից։ Կարելի էր խոսել նաև Ալեքս դե Մինաուրի մասին, ով փայլում էր ATP Cup-ում, սակայն, ցավոք, նա վնասվածքի պատճառով չի մասնակցի իր երկրում անցկացվելիք մրցաշարին։ Պոտենցիալ ունեն նաև Դենիս Շապովալովը, Մատեո Բերետինին, Ֆելիքս-Օժե Ալյասիմը։ Դոմինիկ Տիմին NewGen-ի մեջ ներառելը սխալ է։ Բայց նրա հաջողությանը ևս մարդիկ շատ երկար են սպասում։ ATP Cup-ում նա լավ տեսք չուներ, բայց չմոռանանք, որ սա մրցաշրջանի մեկնարկն է, ու տղաները նոր են մարզավիճակ հավաքում։

Oh no, Here we go again!

Ու նորից․․․արդեն քանիերորդ անգամ մարդիկ, երկրպագուները, թենիսիստներն ու կազմակերպիչները շունչները պահած սպասում էին վիճակահանությանը, որը կայացավ հինգշաբթի։ Վերջին տարիներին տղամարդկանց մենախաղում (անդրադառնալու ենք նաև կանանց, համբերե՛ք ։) ), երբ մեծ եռյակում այս աստիճանի հավասարություն է, մարդկանց մեկ հարց է տանջում․ ո՞ր երկուսն են իրար հետ նույն ցանցում։

Առաջին շրջանի համար բավականին թարմ մրցակիցներ են ստացել նույն ցանցում հայտնված Նովակ Ջոկովիչն ու Ռոջեր Ֆեդերերը։ Սերբ թենիսիստը մրցելու է Յան-Լենար Շտրուֆի հետ։ Ֆեդերերի մրցակիցը ամերիկացի Սթիվ Ջոնսոնն է։ Ռոջերը քառորդ եզրափակչում կարող է հանդիպել Բերետինիին, մինչ այդ նրա ճանապարհին կարող են հայտնվել Շապովալովը կամ էլ Դիմիտրովը։ Համաձայնվե՛ք, հեշտ չէ։ Ջոկովիչի հավանական մրցակիցը քառորդ եզրափակչում Ցիցիպասն է։ Նադալի ցանցը ավելի բարդ է։ Կարեն Խաչանով, Դոմինիկ Տիմ, Դանիլ Մեդվեդև։ Ահա՜ Նադալի հավանական մրցակիցները։

Տղամարդկանց մենախաղի վիճակահանության ամբողջական ցանցը՝ այստեղ

Դրամատիկ է լինելու կանանց պայքարում

2018 թվականի Ավստրալիայի բաց առաջնության չեմպիոնուհի Կարոլին Վոզնյացկին մոտ մեկ ամիս առաջ հայտարարեց, որ Մելբուրնում ավարտելու է կարիերան։ Որոշումը ընդունվեց մեծ ցավով թենիսի երկրպագուների կողմից, բայց ի՞նչ անես, այդպես է որոշել Կարոլինը։ Ինչու՞ հենց Մելբուրն․ քանի որ այստեղ էր Վոզնյացկու կարիերայի ամենատրիումֆատիկ երեկոն՝ երկու տարի առաջ Հալեպի հետ եզրափակչում։

Գլխավոր ֆավորիտներից մեկը՝ US Open-2019-ի չեմպիոնուհի Բիանկա Անդրեեսկուն վնասվածքի պատճառով չի մասնակցի մրցաշարին։ Սա լուրջ կորուստ է թենիսի սիրահարների համար։ Ֆավորիտների թվում կարելի է առանձնացնել մրցաշարի գործող չեմպիոնին՝ Նաոմի Օսակային։ Ճապոնացին նախորդ մրցաշրջանի վերջնամասում որոշակի անկում ունեցավ, բայց նորում միգուցե տեսնենք նախորդ տարվա AO-ի Օսակային։ Իհարկե, չի կարելի մոռանալ Էշլի Բարտիի, Սիմոնա Հալեպի, Սերենա Ուիլյամսի, Էլինա Սվիտոլինայի մասին։ Հիշե՛ք այս անունները։

AO-ին մասնակցելու է նաև Մարգարիտա Գասպարյանը։ Հայկական արմատներով ռուս թենիսիստուհուն առաջին հերթին մաղթենք, որ նա առանց վնասվածքների կավարտի մրցաշարը։ Մարգարիտայի դեպքում դա շատ հազվադեպ է լինում։ Տաղանդաշատ թենիսիստուհուն վնասվածքներն են հենց, որ խանգարում են լավ արդյունքներ գրանցել։ Մագան իր մարզական բնավորությամբ կռվող տեսակ է։

Առաջին շրջանում նրա մրցակիցը Մարիա Սակարին է Հունաստանից։ Թեպետ վարկանիշային աղյուսակում Սակարիի դիրքերը ավելի լավն են (22-րդը), այնուամենայնիվ Գասպարյանը ի զորու է հաղթել այս կարգի խաղացողների։

Կանանց մենախաղի վիճակահանության ամբողջական ցանցը՝ այստեղ

Երջանկության կղզյակ կանաչ մայրցամաքում․ Մելբու՛րն, դու պատրա՞ստ ես

Եվ վերջում գանք սկզբին։ Օրեր առաջ՝ հունվարի 15-ին, «Ռոդ Լեյվեր» արենայում անցկացվեց բարեգործական հանդիպում, որի արդյունքում Ավստրալիայի հրդեհների մարման աշխատանքների համար հավաքվեց 4,826,014 դոլլար։ Ինչպես ասաց Ռոջեր Ֆեդերերը․«Ես ուրախ եմ, որ օգնել եմ Ավստրալիային, բայց ուրախ չեմ, որ նման օգնության կարիք է առաջացել»։

Եվ իսկապես․ թենիսիստների գլխավոր ասելիքը բարեգոծությունից զատ այդ օրը կայանում էր նրանում, որ Ավստրալիան շարունակում է մնալ մի երկիր, որտեղ կարելի է այցելել ու լավ ժամանակ անցկացնել․․․

Ու ակնհայտ է, որ այս ամիսների ընթացքում բարդ էր Ավստրալիայում գտնել մի կետ, որտեղից երջանկության, դրական ու բացասական էմոցիաների չափաբաժիններ կարտանետվեն․․․Այդ կղզյակը հիմա, առանց տարակուսանքի, Մելբուրն է։ Այնտեղ երկու շաբաթ շատ լավ է լինելու։

Սպորտային ամենահայտնի հեռուստաընկերություններից մեկը արդեն մեկ տարի է որդեգրել է մի քաղաքականություն՝ Մեծ սաղավարտի մրցաշարերը անվանելով թենիսային խելագարություն։ Բաց մի՛ թողեք թենիսային խելագարությունը Մելբուրն պարկից։

Ու վերջում դարձյալ զուգահեռներ թենիսի ու կյանքի միջև․ ինչպես ասել է ավստրալացի լեգենդար թենիսիստ Ռոդ Լեյվերը, ում անունով էլ հենց կոչվում է Մելբուրն պարկի գլխավոր կորտը․

«Հաջորդ միավորը․ ահա թե ինչի մասին դու պետք է միայն մտածես»։

Արամ Սահակյան