ՈւԵՖԱ Կոնֆերենցիաների լիգայի 2025/2026թթ․ խաղարկության լիգայի փուլի 3-րդ տուրում Հայաստանի չեմպիոն «Նոան» Երևանի Վազգեն Սարգսյանի անվան «Հանրապետական» մարզադաշտում կընդունի չեխական «Սիգմային»։

Նախախաղային ասուլիսի ժամանակ «Նոայի» գլխավոր մարզիչ Սանդրո Պերկովիչը և պաշտպան Սերգեյ Մուրադյանը պատասխանել են լրագրողների հարցերին։ 

«Մեզ դժվար խաղ է սպասվում, բայց մենք պատրաստ ենք լավ խաղ ցուցադրելու։ Մեր առաջնությունում տվյալ պահին ունենք դժվարություններ, բայց փորձում ենք ամենալավը անել», – Սերգեյ Մուրադյան։

«Այս մրցաշրջանում, այս ամիս՝ նոյեմբերին, շատ ակումբներ ունեն խնդիրներ վնասվածք ունեցող խաղացողների հետ, և մենք բացառություն չենք։ Մենք ունենք շատ կարևոր խաղացողներ, ովքեր վաղը չեն խաղալու, բայց բարեբախտաբար ունենք մեծ հայտացուցակ՝ լավ որակով ֆուտբոլիստներով։ Ով էլ լինի մեկնարկային կազմում, ով կմտնի փոխարինման, նրանք, վստահ եմ, ամենալավը կտան թիմին։ Եվ նաև սա կլինի լավ հնարավորություն այն ֆուտբոլիստների համար, որոնք քիչ խաղաժամանակ են ստացել», – Սանդրո Պերկովիչ։

Մանրամասն՝ տեսանյութում

«Զենիթի» սան Սերգեյ Մուրադյանը 2023 թվականին տեղափոխվել է Երևան և այժմ հանդես է գալիս «Նոայի» կազմում։ Կարճ ժամանակում կենտրոնական պաշտպանը նվաճել է Հայաստանի չեմպիոնի տիտղոսը և գավաթը, իսկ 21 տարեկանում արդեն դարձել է Հայաստանի ազգային հավաքականի հիմնական խաղացող։ Մուրադյանը զրուցել է Матч ТВ-ի հետ և պատասխանել լրագրողի հարցերին։

— Դուք ծնվել եք Սանկտ Պետերբուրգում։ Արդյո՞ք դա նշանակում է, որ մանկուց երազել եք խաղալ «Զենիթի» կազմում։

— Կարելի է այդպես ասել։ 14 տարեկանից մարզվել եմ «Զենիթի» ակադեմիայում։ Մինչ օրս անհանգստանում եմ թիմի համար և ցանկանում, որ «Զենիթը» ամեն տարի դառնա չեմպիոն։ Մանկությանս տարիներին հաճախ էի այցելում «Պետրովսկի» մարզադաշտ և աջակցում ակումբին։

— Երկու տարի առաջ ընտանիքով որոշեցիք տեղափոխվել Հայաստան։ Ինչո՞ւ։

— «Զենիթում» հեռանկարներ չէինք տեսնում, այդ պատճառով որոշեցինք տեղափոխվել։

— Ձեզ հաջողվե՞ց սովորել հայերեն։

— Ոչ, հայերեն դեռ չգիտեմ։ Իհարկե, պետք է սովորեմ, բայց հասկանում եմ, որ լեզուն բավականին բարդ է։

— Սակայն հավաքականի խաղերից առաջ օրհներգը երգում եք։

— Այո՛։ Հավաքականի այն խաղացողներին, ովքեր արտասահմանից են, ուղարկել են օրհներգի տեքստը։ Ռուսախոսների համար բառերը գրված են ռուսերեն տառերով, իսկ օտարերկրացիների համար՝ լատինատառ։

— Հայաստանում ռուսաստանցի խաղացողների հետ կապ պահպանո՞ւմ եք։

— Անցյալ տարի «Ուրարտուում» ռուս մարզիչ Դմիտրի Գունկոն էր աշխատում։ Այդ ժամանակ թիմում շատ ռուս տղաներ կային, նրանց հետ հաճախ էինք շփվում։ Հիմա էլ կապ եմ պահպանում նրանցից ոմանց հետ։

— «Զենիթում» ասում էին, որ հայերից լավագույնը Սարգիս Հովսեփյանն է։ Իսկ Ձեզ համար ո՞վ է լավագույն հայ ֆուտբոլիստը։

— Հենրիխ Մխիթարյանը։

— Կրիշտիանու Ռոնալդուն Ձեր կուռքն է եղել մանկության տարիներին։

— Այո՛։ Կցանկանայի, որ նա հաղթի այն ամենը, ինչ հնարավոր է։ Հույս ունեմ, որ նա կդառնա հաջորդ աշխարհի առաջնության հաղթող։ Բայց քանի որ ես պաշտպան եմ, կնշեմ նաև Սերխիո Ռամոսին։

— Ձեր գործակալը Հայաստանի հավաքականի և «Կռիլյա Սովետովի» նախկին պաշտպան Կարեն Դոխոյանն է։ Եթե նա հիմա զանգի և առաջարկի տեղափոխվել Սամարա, ի՞նչ կպատասխանեք։

— Դա հետաքրքիր տարբերակ կլիներ։ Անպայման կքննարկեինք։

— Տեղեկություն կար, որ Ձեզանով հետաքրքրված էր ֆրանսիական «Բրեստը»։

— Դա վաղուց էր։ Ոչինչ կոնկրետ չկար։

— «Նոան» հանդես է գալիս Կոնֆերենցիաների լիգայի հիմնական փուլում։ Որո՞նք են թիմի հեռանկարները այս մրցաշրջանում։

— Հաշվի առնելով անցյալ տարվա փորձը, կարծում եմ՝ մենք պետք է լրջորեն պայքարենք լավագույն 24-յակում հայտնվելու համար։

— «Նոայի» պայմանները կարելի՞ է համեմատել «Զենիթի» հետ։

— Հիմա «Նոան» նման պայմաններ չունի, բայց շուտով պատրաստ կլինի նոր մարզաբազան։ Արդեն բացվել է հիանալի մարզասրահ։ Կարծում եմ՝ կես տարուց Հայաստանում կունենանք լավագույն պայմանները։ Կառուցվող մարզաբազան համապատասխանում է եվրոպական առաջադեմ չափանիշներին։

— Որքանո՞վ էր դժվար զսպել Կրիշտիանու Ռոնալդուին Պորտուգալիայի հետ խաղում։ Ցանկանո՞ւմ էիք նրա հետ մարզաշապիկներ փոխանակել։

— Նա սովորական խաղացողի տպավորություն է թողնում, բայց անհրաժեշտ պահին հայտնվում է ճիշտ տեղում և լուծում է խաղային դրվագը։ Կարծում եմ՝ մեր թիմում յուրաքանչյուրը կցանկանար մարզաշապիկ փոխանակել Ռոնալդուի հետ, բայց 0:5 հաշվից հետո դա տեղին չէր։ Նախ պետք է արժանապատիվ խաղ ցույց տալ։

— Պորտուգալիայի հետ պատասխան խաղից առաջ անվստահություն կա՞։ Ումի՞ց կցանկանայիք մարզաշապիկ վերցնել։

— Ոչ, այլևս ճնշում չկա։ Շանսերը քիչ են՝ պետք է հաղթենք Հունգարիային, ապա՝ Պորտուգալիային։ Առաջին խաղում անվստահություն չկար, պարզապես դա մեր առաջին հանդիպումն էր նոր մարզիչ Եղիշե Մելիքյանի գլխավորությամբ։ Ինչ-որ բաներ մինչև վերջ չէինք հասկանում։ Հաջորդ խաղերում արդեն ավելի կազմակերպված էինք։ Կարծում եմ՝ Պորտուգալիայի հետ պատասխան խաղում շատ ավելի լավ կխաղանք։ Մենք այժմ այնպիսի թիմ ենք, որին դժվար է գոլ խփել։ Խաղացողները, ֆեդերացիան և երկրպագուները վստահում են մարզչին։ Հավատ կա, որ նա կարող է արդյունքի հասնել այս երիտասարդ թիմի հետ։ Մի քանի տարի հետո տղաները կդառնան ավելի փորձառու և ուժեղ, և ես հավատում եմ, որ այս մարզչի գլխավորությամբ մենք կկարողանանք մասնակցել Եվրոպայի կամ աշխարհի առաջնությանը։

— Եթե Հայաստանը Պորտուգալիայում լավ խաղ ցույց տա, խաղից հետո կմոտենա՞ք Ռոնալդուին։

— Կարծում եմ՝ կմոտենամ Ռուբեն Դիաշին։ Ես հավաքում եմ իմ դիրքում խաղացողների մարզաշապիկները։

Հայաստանի ազգային հավաքականի և Երևանի «Նոայի» պաշտպան Սերգեյ Մուրադյանը «Match TV»-ին տված հարցազրույցում նշել է, որ ազգային թիմում իր խաղընկեր Էդուարդ Սպերցյանի համար դժվար կլինի անմիջապես «Կրասնոդարից» տեղափոխվել Պրեմիեր լիգա։

— Էդուարդ Սպերցյանին հաճախ համեմատում են Հենրիխ Մխիթարյանի հետ։ Որո՞նք են Էդոյի հիմնական որակները։

«Հարված, փոխանցում, դաշտը տեսնելու կարողություն»։

— Կարո՞ղ է նա խաղալ «Մանչեսթեր Յունայթեդի» կամ «Արսենալի» կազմում, ինչպես Մխիթարյանը։

«Կարծում եմ՝ անպայման արժե փորձել։ Բայց գուցե անհրաժեշտ է միջանկյալ տարբերակ։ Շատ դժվար է Ռուսաստանի առաջնությունից ուղիղ տեղափոխվել խոշոր ակումբ», — ասել է Մուրադյանը «Match TV»-ին տված հարցազրույցում։

25-ամյա Սպերցյանը ՌՊԼ-ի ընթացիկ մրցաշրջանում անցկացրել է 12 խաղ, խփել է 5 գոլ և կատարել 10 գոլային փոխանցում։ Կիսապաշտպանի գործող պայմանագրի ժամկետը «ցուլերի» հետ նախատեսված է մինչև 2029 թվականը։

Հայաստանի ֆուտբոլի ֆեդերացիայի նախագահ Արմեն Մելիքբեկյանն այսօր խրախուսական նվերներ է հանձնել Հայաստանի ազգային հավաքականի ֆուտբոլիստներին, որոնք իրենց ակումբներում տիտղոսներ են նվաճել ավարտված մրցաշրջանի արդյունքներով և այժմ Ազգային թիմի կազմում մասնակցում են ուսումնամարզական հավաքի:

Մասնավորապես՝ պարգևատրվել են «Նոայի» կազմում Հայաստանի չեմպիոն ու գավաթակիր դարձած Հովհաննես Համբարձումյանը, Արտակ Դաշյանը, Գոռ Մանվելյանը, Սերգեյ Մուրադյանը, «Շերիֆի» կազմում Մոլդովայի գավաթակիր դարձած Արթուր Սերոբյանը, «Կրասնոդարի» կազմում առաջին անգամ Ռուսաստանի չեմպիոն հռչակված Էդուարդ Սպերցյանը, «Լեգիայի» կազմում Լեհաստանի գավաթը նվաճած Վահան Բիչախչյանը: Վերջինս վնասվածքի պատճառով չի միացել հավաքականի այս հավաքին և գտնվում է վերականգնման փուլում:

Շնորհավորելով ֆուտբոլիստներին ավարտված մրցաշրջանում գրանցած հաջողությունների առթիվ՝ ՀՖՖ նախագահ Արմեն Մելիքբեկյանը հույս է հայտնել, որ հաջորդ տարի իրենք ավելի մեծ թվով խաղացողների շնորհավորելու առիթ կունենան:

Միջոցառմանը ներկա են եղել նաև Հայաստանի ազգային հավաքականի մարզչական շտաբը՝ Ջոն վան ’տ Սխիպի գլխավորությամբ, ինչպես նաև ֆուտբոլիստների հարազատներն ու ընտանիքների անդամները:

Հայաստանի ազգային հավաքականի երկրպագուների «Առաջին հայկական ճակատ» (FAF) շարժման անդամները ՖԱՖ-ի տանն ամփոփել են 2024 թվականը. FAF համակրանք մրցանակին արժանացել է Հայաստանի ազգային հավաքականի և արգենտինական «Բելգրանոյի» ֆուտբոլիստ Լուկաս Սելարայանը:

Տարվա ամփոփիչ միջոցառմանը մասնակցել են հայկական ֆուտբոլի մի շարք ներկայացուցիչներ՝ «Փյունիկի» գլխավոր մարզիչ Եղիշե Մելիքյանը, երևանյան թիմի և Հայաստանի հավաքականի ֆուտբոլիստ Դավիդ Դավիդյանը, «Նոայի» և Հայաստանի հավաքականի պաշտպան Հովհաննես Համբարձումյանը, «Ուրարտուի» և Հայաստանի հավաքականի կիսապաշտպան Ժիրայր Մարգարյանը, «Վեստ Արմենիայի» խաղացող Արթուր Քարտաշյանը, ներկայացուցիչներ «Արարատ», «Շիրակ», «Ուրարտու» ֆուտբոլային ակումբներից, և այլք:

ՖԱՖ շարժման համահիմնադիր Սերգեյ Ջանջոյանի խոսքով՝ FAF-համակրանք մրցանակը շնորհվում է արդեն 16-րդ անգամ:

«Առաջին անգամ մրցանակին արժանացել է Հենրիխ Մխիթարյանը , ապա այս մրցանակը ստացել են Յուրա Մովսիսյանը, Ռոման Բերեզովսկին, Մարկոս Պիզելին, Ռոբերտ Արզումանյանն ու մի շարք այլ խաղացողներ: Այս մրցանակը մենք շնորհում ենք ոչ թե լավագույնին, այլ այն խաղացողին, որն ամբողջ տարվա մեջ արժանացել է երկրպագուների համակրանքին՝ իր որևէ արարքով, թիմային խաղում ունեցած ներդրմամբ, երկրի ու զինանշանի հանդեպ ունեցած հարգանքով: Քվեարկությանը մասնակցել են ՖԱՖ-ի բոլոր անդամները, այդ թվում՝ արտերկրից: Նախորդ տարում Հայաստանի հավաքականի երկրպագուները երջանկության շատ պահեր չեն ապրել, բայց Լուկասն անկասկած եղել է մեր թիմի լուսավոր կետերից մեկը»,- ասել է Սերգեյ Ջանջոյանը:

Անդրադառնալով նախորդ տարվա իրադարձություններին՝ ՖԱՖ շարժման համահիմնադիրն անդրադարձել է նաև ՀՖՖ ղեկավար կազմի հրաժարակին ուղղված երկրպագուների ակցիաներին. «Մի սխալ պնդում կա, որ այս ամենը մենք սկսել ենք հավաքականի վատ ելույթների  պատճառով: Ո՛չ: Վատ ելույթները կապ չունեն: Այս ամենը սկսվել է մի պատճառով՝ այս ֆեդերացիայի հետ մենք սկսել ենք մի ճանապարհ, բայց տարիներ անց գտնվում ենք այլ ճանապարհի վրա և այլ հարթության մեջ: Ֆեդերացիայի նախագահի հրաժարականին հասնելը մեր գործողություններում մի փոքր կետ է: Մեր նպատակը հայկական ֆուտբոլի առողջացումն է: Կարծում եմ՝ շատ բարդ տարի է լինելու, շատ բարդ ճանապարհ է մեզ սպասվում, բայց մենք գնալու ենք մինչև վերջ»:

Այս տարի առաջին անգամ FAF-ը նոր անվանակարգ է սահմանել` «Տարվա ամենաֆուտբոլային լրագրող», որը կկրի երջանկահիշատակ Դավիթ Մարտիրոսյանի անունը: Մրցանակին արժանացել է Ռոբերտ Մարկոսյանը: Այն հանձնել է Դավիթի հայրը՝ «Ֆուտբոլ+» շաբաթաթերթի գլխավոր խմբագիր Աշոտ Մարտիրոսյանը:

Միջոցառման ընթացքում մրցանակներ են հանձնվել նաև տարվա ընթացքում աչքի ընկած շարժման լավագույն և ամենաակտիվ անդամներին, ֆուտզալի թիմի լավագույն խաղացողին: Առանձին մրցանակ է սահմանվել նաև հայազգի ամենախոստումնալից խաղացողի համար: «Լավագույն երիտասարդ ֆուտբոլիստ» մրցանակին արժանացել է «Նոայի» և Հայաստանի հավաքականի պաշտպան Սերգեյ Մուրադյանը:

ՈւԵՖԱ Կոնֆերենցիաների լիգայի 2024/2025թթ․ խաղարկության Լիգայի փուլի 4-րդ տուրում «Նոան» կհանդիպի Ռեյկյավիկի «Վիկինգուրին»։ Հանդիպումը կկայանա Վազգեն Սարգսյանի անվան «Հանրապետական» մարզադաշտում, իսկ խաղի մեկնարկը կտրվի 21։45-ին։

Նախախաղային ասուլիսի ժամանակ լրագրողների հարցերին է պատասխանել «Նոայի» պաշտպան Սերգեյ Մուրադյանը։

«Նկատում եմ, որ մեծ աճ եմ գրանցել որպես ֆուտբոլիստ։ Միաժամանակ կարծում եմ, որ դեռ ցույց չեմ տվել իմ լավագույն որակները։ Պատրաստվում եմ ամեն ինչ անել այդ ամենի համար։

«Նոան» կենտրոնական պաշտպանությունում ունի 6 խաղացող, սակայն ինձ համար միևնույն է, թե ում հետ եմ ես խաղում։ Պաբլոն էլ, Գոնսալոն էլ շատ լավ ֆուտբոլիստներ են»,- նշել է Մուրադյանը։

Հայաստանի ազգային հավաքականի նախկին պաշտպան, ներկայումս «Լեգալ Սպորտ» գործակալության գլխավոր տնօրեն Կարեն Դոխոյանը Metaratings.ru-ին տված հարցազրույցի ժամանակ խոսել է ՌԴ-ում ծնված, խաղացած հայ ֆուտբոլիստների մասին։

– Վերջին 2-3 տարիներին շատ է տարածվել այն երևույթը, որ հայկական արմատներ ունեցող, Ռուսաստանում ծնված, մեծացած և խաղացած ֆուտբոլիստները ընտրում են Հայաստանի քաղաքացիությունը: Ինչպե՞ս եք վերաբերվում դրան։

– Արմատներն, ի վերջո, հայկական են: Եթե ծնողները ճիշտ դաստիարակություն են տալիս և ֆուտբոլիստն ունի ցանկություն խաղալու այն հավաքականի համար, որը, այսպես ասած, հայրական գծով է, ես դրան նորմալ եմ վերաբերվում, որովհետև ինքս 7 տարի խաղացել եմ Ռուսաստանում և ամեն ինչ լավ հասկանում եմ: Ունեմ շատ ընկերներ Սամարայում, որոնց երեխաները ծնվել են ռուսական քաղաքացիությամբ, բայց ստացել են այնպիսի դաստիարակություն, որ նրանք հայ են: Նրանք կարող են գալ այստեղ, խաղալ հավաքականում՝ լավ խաղալ, իսկ հետո մեկնել Եվրոպա, հաշվի առնելով ներկայիս իրավիճակը Ռուսաստանում:

Այս համատեքստում կցանկանայի նշել երիտասարդ Սերգեյ Մուրադյանին, ով արդեն երրորդ խաղն է խաղում Հայաստանի հավաքականի հիմնական կազմում՝ կենտրոնական պաշտպանության դիրքում: Նա «Զենիթի» սան է, հիմա խաղում է «Նոայում»: Նրան արդեն տարել էին Հայաստանի պատանեկան հավաքական, ես նրա մասին գիտեի և ասացի այն ժամանակ, որ եթե նա ցանկանա այստեղ մնալ, ես կզբաղվեմ նրա հարցերով: Անցավ մեկ կամ երկու տարի, և հայրը զանգահարեց ու ասաց՝ «Մենք որոշել ենք տեղափոխվել Հայաստան»: Նա այն ժամանակ 18 տարեկան էր:

Կայացան բանակցություններ «Զենիթի» հետ, մենք խոսեցինք Արշավինի հետ, և պարզ էր, որ պետերբուրգցիներն անվճար ֆուտբոլիստ չեն տալիս: Որոշակի գումարի դիմաց համաձայնություն ձեռք բերվեց, որպեսզի ֆուտբոլիստը տեղափոխվի այստեղ: Այդպես ստացվեց, որ մենք ճիշտ ակումբ ընտրեցինք՝ «Նոա», որը այն ժամանակ դեռ ֆինանսական նման հնարավորություններ չուներ, ինչպես հիմա:

Ակումբի ղեկավարությունը նույնպես պատրաստ էր նրան թիմում տեսնել, քանի որ նա արդեն խաղացել էր պատանեկան հավաքականում, և երևում էր նրա պոտենցիալը: Այդ ժամանակ մարզիչն էր Ռոբերտ Արզումանյանը, որի հետ միասին խաղացել ենք պաշտպանությունում: Եվ այս ամենը նպաստեց, որ Սերգեյն աստիճանաբար սկսեց խաղալ:

Հիմա «Նոան» Հայաստանի առաջատար ակումբներից է, և տեսնում ենք, թե ինչպես է նա մեծացել, թե ինչպես է արդեն խաղում: Ամենակարևորը՝ խաղում է շատ արժանապատիվ և կայուն: Կարծում եմ, որ նա նույնպես Հայաստանի ֆուտբոլի ապագան է, շատ ուրախ եմ նրա համար, որովհետև այս երկու տարիների ընթացքում, ինչ մենք աշխատում ենք միասին, նա մեծ հաջողությունների է հասել, շատ լավ է հասկանում ամեն ինչ, շատ լավ է մարզվում: Աստված տա, որ տեղափոխվի մեկ այլ լավ ակումբ: