Ռեյկյավիկում ավարտին է մոտենում շախմատի տղամարդկանց Եվրոպայի անհատական առաջնությունը:

Նախավերջին տուրում առաջատարներին հետապնդող Հովհաննես Գաբուզյանը սևերով պարտվեց իտալացի Դանիելե Վոկատուրոյին ու դուրս մնաց չեմպիոնական մրցավազքից: Գաբուզյանն այժմ 6.5 միավոր ունի, իսկ առաջատարը 8 միավորով Անտոն Դեմչենկոն է:

Այս տուրում միակ հաղթանակը տոնեց Հայկ Մարտիրոսյանը՝ պարտության մատնելով Ֆելիք Բլոհբերգերին: Հայկը ևս այս պահին ունի 6.5 միավոր:

Ոչ-ոքիներ խաղացին Ռոբերտ Հովհաննիսյանը, Սամվել Տեր-Սահակյանն ու Գաբրիել Սարգսյանը` միավորների քանակը հասցնելով համապատասխանաբար 6.5-ի, 5.5-ի ու 6.5-ի: Այսօր կկայանան վերջին տուրի պարտիաները:

Ռեյկյավիկում շարունակվում է շախմատի տղամարդկանց Եվրոպայի անհատական առաջնությունը: Մեկնարկել է մրցաշարի եզրափակիչ հատվածը:

Այսօր կայանում են 9-րդ տուրի պարտիաները: Առաջատարները ոչ-ոքիներ խաղացին: Հերթական կես միավորը վաստակեց Հայաստանի չեմպիոն Հովհաննես Գաբուզյանը՝ խաղաղ դաշն կնքելով Դավիդ Նավարայի հետ: Գաբուզյանն այժմ ունի 6.5 միավոր ու 3 առաջատարից հետ է մնում կես միավորով: Եվս 8 շախմատիստ ունի 6.5 միավոր:

Ոչ-ոքիներ խաղացին նաև Հայկ Մարտիրոսյանը, Ռոբերտ Հովհաննիսյանն ու Գաբրիել Սարգսյանը՝ միավորների քանակը հասցնելով համապատասխանաբար 5.5-ի, 6-ի ու 6-ի:

Այս պահին ընթացքի մեջ է Գաբրիել Սարգսյանի պարտիան. մրցակիցը Վահափ Սանալն է:

Ռեյկյավիկում շարունակվում է տղամարդկանց շախմատի Եվրոպայի անհատական առաջնությունը:

Կայացել են 6-րդ տուրի պարտիաները: Առաջատար Հովհաննես Գաբուզյանը ոչ-ոքի է խաղացել ու այժմ 5 միավորով 3-րդ հորիզոնականում է. առաջատարին զիջում է կես միավորով: Երկրորդ անընդմեջ պարտությունն է կրել Ռոբերտ Հովհաննիսյանը: Վերջինս 4 միավորով 20-րդ տեղում է: Պարտություն կրեց նաև Հայկ Մարտիրոսյանն ու մնաց 3.5 միավորով:

Այս տուրում մեր միակ հաղթանակը տոնեց Սամվել Տեր-Սահակյանը: Ոչ-ոքի խաղաց Գաբրիել Սարգսյանը: Գաբին ու Սամվելն ունեն 4-ական միավոր:

Ռեյկյավիկում շարունակվում է շախմատի տղամարդկանց Եվրոպայի առաջնությունը:

3-րդ անընդմեջ հաղթանականերն են տոնել Հովհաննես Գաբուզյանն ու Ռոբերտ Հովհաննիսյանը՝ պարտության մատնելով համապատասխանաբար Դանիել Ֆրիդմանին ու Վիտալի Սիվուկին:

Խաղաղ դաշն են կնքել Սամվել Տեր-Սահակյանը, Հայկ Մարտիրոսյանն ու Գաբրիել Սարգսյանը:

3-րդ տուրից հետո Գաբուզյանն ու Հովհաննիսյանը 3-ական միավորով 7 առաջատարի թվում են, իսկ Հայկը,Սամվելն ու Գաբին ունեն 2-ական միավոր:

Իսլանդիայում այսօր կմեկնարկի շախմատի Եվրոպայի տղամարդկանց անհատական առաջնությունը:

Հայաստանը մրցավայր է մեկնել 5 շախմատիստով: Եվրոպայի չեմպիոնի համար կպայքարեն Գաբրիել Սարգսյանը, Հովհաննես Գաբուզյանը, Հայկ Մարտիրոսյանը, Սամվել Տեր-Սահակյանը և Ռոբերտ Հովհաննիսյանը: Մրցաշարին կմասնակցի 180 շախմատիստ:

Առաջնության երկրորդ համարը Գաբրիել Սարգսյանն է:

2020 թ-ը շարունակում է տհաճ անկանկալների մատուցումը: Քսան Քսանը շախմատային փոքր Հայաստանին արդեն իսկ զրկել է մեկ թագավորից և թագուհուց: Լևոն Արոնյանի կնոջ՝ Արիանե Կաոիլիի մահվանից օրեր անց սրտի կաթվածից մահացավ գրոսմայստեր, վաստակավոր մարզիչ, 2 Օլիմպիական խաղերի մասնակից Արսեն Եղիազարյանը: Ընդամենը 48 օր անց կբոլորեր Արսենի 50 ամյակը, բայց…

Արսեն Եղիազարյանը շախմատի Արմեն Գյուլբուդաղյանցն էր: Նրա աշխատանքը պատանիների հետ աննկարագրելի արդյունավետ էր: Պատահական չէ, որ նա մարզել է տարբեր տարիքային պատանեկան հավաքականներ, և նրա գլխավորած ընտրանիները տարբեր հաջողություններ են ունեցել՝ թե՛ անհատական, թե՛ թիմային: Armsport-ը զրուցել է շախմատի Հայաստանի գործող չեպիոն, Հայաստանի հավաքականի անդամ, գրոսմայստեր Սամվել Տեր-Սահակյանի ու կանանց հավաքականի նախկին անդամ, գրոսմայստեր Լիլիթ Գալոյանի հետ՝ փորձելով հասկանալ ու գնահատել նրանց ու շախմատային Հայաստանի կյանքում Արսեն Եղիազարյանի ունեցած ավանդը:

Ի տարբերություն Սամվելի՝ Արսենը եղել է Լիլիթի նաև անհատական մարզիչը, և Գալոյանը իր հաղթանակների գրավականը համարում է Արսեն Եղիազարյանի տված գիտելիքները.

«Արսենը եղել է իմ երկրորդ մարզիչը: 1997 թ-ից եղել է իմ անհատական մարզիչը, 4-5 տարի հավաքականի կազմում եղած տարիներին ևս միմյանց հետ աշխատել ենք: Իմ շախմատային հաջողությունների համար ես երախտապարտ եմ Արսենին:

Նրա մարդկային որակների մասին բոլորը գիտեին: Ինչ-որ մի ժամանակ դադարեցվեց խոստումնալից երեխաների մարզիչների ֆինանսավորումը, բայց Արսենը պահեց խումբը և մեզ կանչում էր պարապմունքի, կարծես՝ ոչինչ չէր եղել: Ի տարբերություն խմբի մյուս երեխաների՝ ծնողներս ի վիճակի չէին պարապմունքի գումարը վճարելու, բայց ուշադրություն չդարձնելով այդ փաստին, նա շարունակեց ինձ մարզել: Այս փաստը բնորոշում էր նրա՝ բարձր հատկանիշներով օժտված լինելը: Շատ մեղմ ու փափուկ բնավորություն ուներ, բայց միևնույն ժամանակ շատ տղամարդկային էր: Խմբավորումներ կամ ավելորդ խոսակցություններ ստեղծելն իր տեսակին հարազատ չէր: Լինելով հավաքականի մարզիչ՝ չեմ հիշում, որ վատ խաղացած պարտիաներից հետո թիմի աղջիկներից որևիցե մեկին նա ինչ-որ «թթու» խոսք ասած լիներ: Երբեք ներքին լարվածություն չէր ստեղծում: Հաղթած պարտիաներից հետո մոտենում, շնորհավորում էր, իսկ պարտություններից հետո քննարկում էինք ու անմիջապես անցնում առաջ, ոչինչ չէր բարդեցնում: Շատ կատակասեր էր: Մենք մի ընտանիք էինք, շատ հավաքներ ենք միասին անցկացրել: Երբ հավաքականում հայտնվեցի, բոլորը նրան Արսենով էին դիմում, իսկ ես ընկեր Արսեն էի ասում, բայց երբեմն փորձում էի Արսենով դիմել, և այդ պահերին նա հումորով հարցնում էր ինձ. «Հիմա ես Արսե՞նն եմ, թե՞ ընկեր Արսենը»: Պարտություններից հետո նա շատ հաճախ փորձում էր մեզ հանել ծանր իրավիճակներից:

Երբ սկսեցի Արսենի մոտ պարապել, նա նոր էր լրացրել գրոսմայստերի նորման: Հիշում եմ, երբ մրցաշարից վերադառնում ու ցույց էր տալիս պարտիաները, ես առաջին անգամ էի տեսնում ու լսում, որ հնարավոր է դիրքին այդքան արագ ու վստահ գնահատական տալ: Ընդամենը 2 տարվա առաջին կարգային է, և վարպետների շախմատային դասերը, այս կամ այն դիրքի մասին բանավեճերն ու եզրակացություններն ինձ համար մեծ հնարավորություն էր՝ հասկանալու այդ պահին իմ շախմատային սուղ գիտելիքներն ու դեռևս չձևավորված դիրքային տեսողությունը:

Չի եղել դեպք, որ խաղից առաջ պատրաստ չլինեինք: Բացարձակապես մեզ չէր լարում: Գալիս էր, օգնում էր, սկզբնախաղային հարցերն էր լուծում: Շատ լուրջ ապրումներ էր ունենում խաղերի ժամանակ: Քանի որ մարզիչները չեն կարող խաղատախտակի առջևից քայլել, նա կանգնում էր մեր կողքին կամ թիկունքում: Ես անձամբ զգում էի նրա բնույթին հակառակ լարվածությունը, ճակատի երակներից զգում էի, որ շատ թեժ իրավիճակ է ոչ միայն իմ, այլ նաև թիմի մյուս անդամների մոտ:

Արսենի պահանջարկն այնքան մեծ էր, որ աշխատում էր ոչ միայն Հայաստանի տաղանդավոր պատանիների հետ, այլ նաև առաջարկներ էր ունենում տարբեր երկրներից: Վերջին շրջանում աշխատում էր Ղազախստանում, հատուկ առաջարկով մեկնել էր այնտեղ ու աշխատում էր ղազախ պատանի տաղանդավոր շախմատիստների հետ:

2008 թ-ին կանանց Հայաստանի հավաքականը համաշխարհային թիմային Օլիմպիադայում լավագույն արդյունքը ցույց տվեց՝ կիսելով 5-6-րդ հորիզոնականները: Որպես հավաքականի մարզիչ, Արսենի դերն ահռելի էր, քանի որ հավաքականի անդամ գրոսմայստերները նրա՝ որպես մարզիչ աշխատած տարիներին էին կայունացել ու դարձել հզոր»:

Իր հաղթանակների համար Արսենին երախտապարտ է նաև Սամվել Տեր-Սահակյանը.

«Ընկեր Արսենը գիտեր շախմատային թե՛ հին, թե՛ նոր գրքերը: Շատ էր ընթերցում, անընդհատ սովորում էր, ուներ գիտելիքների մեծ պաշար: Այսինքն, նա կարող էր տարբեր սերունդների ներկայացուցիչների կրթել: Երկար տարիներ նա ինձ պատրաստել է խաղերից առաջ: Եվրոպայի և աշխարհի պատանեկան առաջնություններից առաջ նա բոլորիս հետ առանձին աշխատում էր, տալիս էր ամեն հնարավորն ու անհնարինը: Նրա գլխավորած պատանեկան հավաքականների անդամները հետագայում էլ դարձան Հայաստանի չեմպիոններ ու դարձան  ազգային հավաքականի անդամներ:

Շատ կատակասեր էր, միշտ հետաքրքրիր պատմություններ էր պատմում, բայց հետաքրքիրն այն է, որ ինքն էլ շատ հաճախ հայտնվում էր նման պատմությունների կենտրոնում»:

Շախմատի Հայաստանի հավաքականի անդամ Էլինա Դանիելյանը վաստակավոր մարզչի մահվանն արձագանքեց՝ գրառում կատարելով Ֆեյսբուքում.

«Արսեն Եղիազարյանի՝ կյանքից հեռանալու մասին լուրն ինձ համար շոկային էր: Չեմ հավատում, չեմ ցանկանում հավատալ…

Հիշում եմ իմ երիտասարդությունը, առաջին շախմատային քայլերը Հայաստանում, մրցաշարերին պատրաստվելը, ուսումնամարզական հավաքները՝ Հայաստանի համար դժվար ժամանակներում, տարբեր մրցաշարերին՝ մեր մասնակցությունները, հաջողություններն ու անհաջողությունները: Մի քանի տարի նա իմ անհատական մարզիչն էր, իսկ 2000-2010 թվականներին գլխավորում էր Հայաստանի կանանց ազգային հավաքականը: Միասին մենք Եվրոպայի թիմային առաջնությունում նվաճեցինք 2 մեդալ՝ 2003 թվականին ոսկի և բրոնզ 2007-ին: Իմ շախմատային կարիերայում Արսենի հետքն անգնահատելի է:

Խորապես ցավակցում եմ Արսենի հարազատներին ու ընկերներին: Շախմատային Հայաստանը Մեծ Մարդ կորցրեց»:

Գրոսմայստերի մահվան լուրին արձագանքեց գրոսմայստեր, կրկնակի Օլիմպիական չեմպիոն, Հայաստանի պատանեկան հավաքական գլխավոր մարզիչ Արտաշես Մինասյանը.

«Խոր ցավով տեղեկացա ՀՀ վաստակավոր մարզիչ, ՖԻԴԵ-ի ավագ մարզիչ, գրոսմայստեր Արսեն Եղիազարյանի անժամանակ մահվան մասին: Արսեն Եղիազարյանը հանդիսանում էր Հայաստանի լավագույն մարզիչներից մեկը: Եղիազարյանը հաղթանակներ է ունեցել նաև որպես պրակտիկ շախմատիստ՝ «Երևան» ակումբի կազմում 1995 թվականին նվաճել է Եվրոպայի ակումբային գավաթը: 1994 և 1996 թվականներին Հայաստանի հավաքականի կազմում մասնակցել է շախմատի համաշխարհային Օլիմպիադաներին: Արսեն Եղիազարյանը մեծ ավանդ ունի հայ պատանի շախմատիստների հաջողությունների գործում, ովքեր հետագայում հասել են նշանակալի նվաճումների: Արսեն Եղիազարյանը էական ներդրում է ունեցել Հայաստանի կանանց հավաքականի կայացման և հաղթանակների կերտման գործում: Եղիազարյանի գլխավորած Հայաստանի կանանց հավաքականը 2003 թվականին հռչակվել է Եվրոպայի կանանց թիմային չեմպիոն, իսկ 2007 թվականին Եվրոպայի կանանց թիմային առաջնությունում նվաճել է բրոնզե մեդալ:

Անվանի շախմատիստի, հաղթանակներ կերտած մարզչի, գործընկերների հարգանքը և հարազատների սերը վայելող Արսեն Եղիազարյանի հիշատակը վառ կմնա մեր սրտերում: Իմ խորին վշտակցությունը և զորակցությունն եմ հայտնում Արսեն Եղիազարյանի ընտանիքին, ընկերներին և շախմատային հանրությանը»:

Շախմատային Հայաստանը, իրավամբ, առաջին հերթին կորցրեց լավ մարդու ու հզոր մասնագետի: Նրա տված գիտելիքներն ու շախմատային մեծ ավանդը ընդմիշտ կմնա ու կհիշվի, իսկ նրա սաները, կարծում եմ, իրենց առաջին հաղթանակները հրապարակավ կնվիրեն Արսեն Եղիազարյանին:

Արմեն Գարամյան

Շախմատի Հայաստանի ֆեդերացիայի ֆեյսբուքյան պաշտոնական էջը տեղեկացնում է, որ գրոսմայստեր Սամվել Տեր-Սահակյանն առցանց շախմատի միաժամանակյա խաղ կանցկացնի:

Մրցաշարին մասնակցելու համար անհրաժեշտ է նախապես գրանցվել: Ընտրվելու են առաջին 20 գրանցված մասնակիցները:

Հիշեցնենք, որ Սամվել Տեր-Սահակյանը Հայաստանի գործող չեմպիոնն է:

Շախմատի Հայաստանի նորընծա չեմպիոն Սամվել Տեր-Սահակյանը խոստովանել է՝ իր համար երազանք էր Հայաստանի հավաքականում ընդգրկվելն ու շախմատի 44-րդ Օլիմպիադային մասնակցելը, որը կկայանա այս տարվա օգոստոսի 5-17-ը Մոսկվայում։ Իսկ նման հնարավորություն Սամվել Տեր-Սահակյանը ստացել է կարիերայում առաջին անգամ Հայաստանի չեմպիոնությունը նվաճելու շնորհիվ․

«Կարծում եմ՝ յուրաքանչյուր հայ շախմատիստի երազանքը Հայաստանի հավաքականում ընգրկվելն ու նման շախմատիստների կողքին խաղալն է։ Երազանք էր իհարկե նաև Օլիմպիադային մասնակցելու իրավունք նվաճելը։

Ինչ վերաբերում է Հայաստանի առաջնության չեմպիոնի կոչումը նվաճելուն, պետք է ասեմ, որ հաղթանակը հեշտ չտրվեց, քանի որ պայքարը շատ թեժ էր։ Չի՛ կարելի ասել, որ չեմպիոնությունը կամ որևէ պարտիայում հաղթանակն ինձ հեշտ տրվեց։

Մամիկոն Ղարիբյանը, որը միակ մասնակիցն էր, ով գրոսմայստերի կոչում չուներ, բայց շատ բարձրակարգ շախմատ էր ցուցադրում ամբողջ մրցաշարի ընթացքում ու պատահական չէր, որ հենց մեր պարտիայում ես չկարողացա ամբողջությամբ լուծել իմ առջև դրված խնդիրը, փաստորեն նույնիսկ ոչ-ոքին բավական կլիներ, բայց լարված խաղ էր ընթանում ու իմ նյարդերն առաջինը տեղի տվեցին։ Չեմ կարող ասել, որ ինչ-որ բան այն չէի անում, պարզապես մրցակիցս շատ ուժեղ շախմատիստ էր »,- խոստովանում է Սամվել Տեր-Սահակյանը։

Օլիմպիադայից առաջ Սամվել Տեր-Սահակյանը մայիսին կմասնակցի Եվրոպայի անհատական առաջնությանը, ինչպես նաև նախատեսված են մի շարք ուսումնամարզական հավաքներ ու միջազգային մրցաշարեր։

Հիշեցնենք՝ Սամվել Տեր-Սահակյանը մրցաշարում միակ պարտությունը կրել է 8-րդ տուրում երիտասարդ շախմատիստ Մամիկոն Ղարիբյանից, իսկ վերջին՝ 9-րդ տուրում, միավորները կիսել է Շանթ Սարգսյանի հետ, ինչ, այդուհանդերձ, չի խանգարել Տեր-Սահակյանին հռչակվել Հայաստանի չեմպիոն։

Շախմատի Հայաստանի առաջնությունում ավարտեց վերջին՝ 9-րդ տուրը:

Տիգրան Պետրոսյանի անվան շախմատի կենտրոնական տանը 9 օր շարունակ շախմատիստներըր պայքարեցին լավագույնի կոչման համար:

Վերջին տուրում առաջատար Սամվել Տեր-Սահակյանը միավորը կիսեց Շանթ Սարգսյանի հետ ու դարձավ Հայաստանի չեմպիոն: Ոչ-ոքի ավարտվեցին նաև Փաշիկյան-Գաբուզյան և Անդրիասյան-Մարտիրոսյան պարտիաները: Հաղթանակ տոնեց Ռոբերտ Հովհաննիսյանը:

Մեկ խաղատախտակի վրա դեռ պարտիան շարունակվում է:

Սամվել Տեր-Սահակյանը 6 միավորով դարձավ Հայաստանի չեմպիոն:

Շարունակվում է շախմատի Հայաստանի առաջնությունը: Այսօր կայացել են 5-րդ տուրի պարտիաները:

Կանանց պայքարում շարունակում է իր հաղթարշավը Մարիա Գևորգյանը: Մարիա Գևորգյանի հերթական զոհը Նարե Առաքելյանն էր: Այս տուրում հաղթանակներ են տարել նաև Մարիամ Ավետիսյանը, Աստղիկ Հակոբյանն ու Մարիա Կուրսովան: Ոչ-ոքի է ավարտվել Գաբոյան-Խաչատրյան պարտիան:

5 տուրից հետո 4 միավորով առաջատարը Մարիա Գևորգյանն է: 3.5-ական միավոր ունեն Սուսաննա Գաբոյանն ու Աննա Խաչատրյանը:

Տղամարդկանց պայքարում հաղթանակներ են տարեկ Հայկ Մարտիրոսյանն ու Ռոբերտ Հովհաննիսյանը: Ոչ-ոքի են ավարտվել Տեր-Սահակյան-Հակոբյան, Գաբուզյան-Հակոբյան, Սարգսյան-Անդրիասյան պարտիաները:

5 տուրից հետո 3.5-ական միավորով առաջին տեղը կիսում են Ռոբերտ Հովհանիսյանն ու Սամվել Տեր-Սահակյանը: