Ռումինիայի ֆուտբոլի ֆեդերացիան (FRF) մանկապատանեկան ֆուտբոլում աննախադեպ նորամուծություն է կատարել՝ շրջանառության մեջ դնելով «սև քարտը»։

Այս որոշումն ուղղված է մանկական թիմերի հանդիպումների ժամանակ ծնողների և հանդիսականների կողմից դրսևորվող ագրեսիվ վարքագծի դեմ պայքարին։

Նոր կանոնակարգի համաձայն՝ պատժամիջոցների կիրառման ընթացակարգը բաղկացած է լինելու երեք փուլից.

Նախազգուշացում. Մրցավարը ժամանակավորապես կանգնեցնում է խաղը և պահանջում մարզիչներից հանգստացնել տրիբունաներում գտնվող երկրպագուներին։

Դադար. Եթե լարվածությունը չի մեղմանում, հանդիպումը դադարեցվում է 10 րոպեով, իսկ ֆուտբոլիստներն ուղևորվում են հանդերձարան։

Սև քարտ. Եթե խաղի վերսկսումից հետո վիրավորանքներն ու ֆիզիկական ագրեսիան շարունակվում են, գլխավոր մրցավարը ցույց է տալիս սև քարտ և միանգամից հնչեցնում եզրափակիչ սուլիչը։

Խաղը վերջնականապես ընդհատվում է և այլևս չի կարող շարունակվել։

Նշվում է, որ այս խիստ միջոցառումը կկիրառվի Ռումինիայի բոլոր 130 ֆուտբոլային ակադեմիաներում։ Գլխավոր նպատակը պատանի ֆուտբոլիստներին, մարզիչներին, մրցավարներին և խաղի մյուս մասնակիցներին ավելորդ ճնշումից ու վտանգներից պաշտպանելն է։