Խորվաթ կիսապաշտպան Լուկա Մոդրիչը հակված է ևս մեկ մրցաշրջան անցկացնել «Միլանի» կազմում։

Աշխարհի առաջնությունից Խորվաթիայի հավաքականի դուրս մնալուց հետո 40-ամյա ֆուտբոլիստը մտորում է իր ապագայի շուրջ։ Ինչպես հաղորդում է հեղինակավոր La Gazzetta dello Sport-ը, վերջին շաբաթներին նա չէր բացառում կարիերայի շարունակության որևէ տարբերակ, սակայն այժմ վճռական է տրամադրված մնալ միլանյան ակումբում։

Ակումբում նույնպես ցանկանում են շարունակել համագործակցությունը: «Ռոսոներիների» ղեկավարությունը տեղեկացրել է Մոդրիչին, որ հույսեր է կապում նրա հետ նաև հաջորդ մրցաշրջանում:

Օրերս Լուկային անձամբ զանգահարել է «Միլանի» նորանշանակ գլխավոր մարզիչ Ռուբեն Ամորիմը։ Սա կարևոր ազդակ է դարձել ֆուտբոլիստի համար. պորտուգալացի մասնագետը հասկացրել է, որ խորվաթ վետերանին համարում է թիմի նշանակալի մասնիկը։

Գործող պայմանագիրն ավտոմատ երկարաձգել այլևս հնարավոր չէ, քանի որ 2026/27 մրցաշրջանի համար նախատեսված կետի ժամկետն սպառվել է հունիսի 30-ին: Այնուամենայնիվ, եթե անսպասելի զարգացումներ չլինեն, կողմերը կբանակցեն և կհամաձայնեցնեն նոր՝ մեկամյա պայմանագիր։

Պորտուգալացի մասնագետ Ռուբեն Ամորիմը պաշտոնապես նշանակվել է իտալական «Միլանի» գլխավոր մարզիչ։ Այս պաշտոնում նա փոխարինել է պաշտոնանկ արված Մասիմիլիանո Ալեգրիին, հայտնում է ակումբի մամուլի ծառայությունը։

Ինչպես հաղորդվում է, պորտուգալացու հետ պայմանագիրը կնքվել է «2+1» ձևաչափով։ Նրա աշխատավարձը միլանյան ակումբում կկազմի տարեկան 3,5 միլիոն եվրո՝ չհաշված նվաճած տիտղոսների և Չեմպիոնների լիգայի ուղեգիր ապահովելու համար նախատեսված հավելյալ բոնուսները։

Նշենք, որ Ամորիմի նախորդ աշխատավայրն անգլիական «Մանչեսթեր Յունայթեդն» էր։ Ինչ վերաբերում է «Միլանին», ապա ավարտված մրցաշրջանում թիմն Իտալիայի Ա Սերիայում զբաղեցրել է 5-րդ հորիզոնականը՝ անցկացրած 38 խաղում վաստակելով 70 միավոր։

Հավելենք նաև, որ որպես գլխավոր մարզչի հավանական թեկնածու՝ ակումբի ղեկավարությունը դիտարկում էր նաև Մատիաս Յայսլեի տարբերակը։

«Միլանը» շարունակում է նոր գլխավոր մարզչի որոնումները։ Մամուլի հաղորդագրություններին հակառակ, Օլիվեր Գլասների նշանակման վերաբերյալ դեռևս որոշում չի կայացվել, հայտնում է ինսայդեր Ֆաբրիցիո Ռոմանոն։

«Ալ-Ահլիի» մարզիչ Մաթիաս Յայսլեն և «Մանչեսթեր Յունայթեդի» նախկին մարզիչ Ռուբեն Ամորիմը նույնպես դիտարկվում են որպես թեկնածուներ։

Լրագրող Մատեո Մորետոյի խոսքով՝ «ռոսոներիները» նեղացնում են իրենց թեկնածուների ցանկը և ցանկանում են արագացնել վերջնական ընտրությունը։

Այս առումով, առաջիկա ժամերին նախատեսված են անմիջական հանդիպումներ Ամորիմի, Յայսլեի և Գլասների հետ։

TEAtalk-ի տվյալներով՝ «Ֆուլհեմի» ղեկավարությունը դեռևս փնտրում է նոր գլխավոր մարզչի, այն բանից հետո, երբ Մարկո Սիլվան հրաժարական տվեց իր պաշտոնից:

Նշվում է, որ ակումբը ներկայումս դիտարկում է երեք թեկնածու, այդ թվում՝ «Լիվերպուլի» նախկին մարզիչ Արնե Սլոտին, «Մանչեսթեր Յունայթեդի» նախկին մարզիչ Ռուբեն Ամորիմին և «Բրենտֆորդի» ու «Տոտենհեմի» նախկին մարզիչ Թոմաս Ֆրանկին։

Այս շաբաթ լոնդոնյան ակումբի խորհուրդը նիստ կանցկացնի՝ ակումբի մարզչական պաշտոնի հիմնական թեկնածուի վերաբերյալ վերջնական որոշում կայացնելու համար։

Պրեմիեր լիգայի մրցաշրջանի ավարտին «Ֆուլհեմը» 52 միավորով զբաղեցրեց աղյուսակի 11-րդ հորիզոնականը։

«Մանչեսթեր Յունայթեդը» սըր Ալեքս Ֆերգյուսոնի հեռանալուց հետո մոտ 100 միլիոն ֆունտ ստեռլինգ է ծախսել մարզիչների և ղեկավար կազմի անդամների նշանակման ու հեռացման փոխհատուցումների վրա։

The Telegraph-ի տեղեկություններով՝ երկուշաբթի ակումբը պաշտոնանկ է արել Ռուբեն Ամորիմին։ Պայմանագրի մնացած 1.5 տարվա համար պորտուգալացի մասնագետը որպես փոխհատուցում կստանա 10 միլիոն ֆունտ։

Այսպիսով, 2013 թվականից ի վեր «կարմիր սատանաները» 78 միլիոն ֆունտ են վճարել միայն հեռացված մարզիչներին և նրանց շտաբներին։ Ցանկը՝ ստորև․

1. Ժոզե Մոուրինյու՝ 19.6 մլն ֆունտ
2. Ռալֆ Ռանգնիկ՝ 14.7 մլն ֆունտ
3. Օլե-Գունար Սուլշեր՝ 10 մլն ֆունտ
4. Էրիկ տեն Հագ՝ 10 մլն ֆունտ
5. Լուի վան Գալ՝ 8.4 մլն ֆունտ
6. Դևիդ Մոյես՝ 4.9 մլն ֆունտ

Բացի այդ, մանկունիական ակումբը ևս 21 միլիոն ֆունտ է ծախսել մարզիչներ հրավիրելու, ինչպես նաև տնօրենների նշանակման ու ազատման համար։ Ամենախոշոր ծախսը գրանցվել է 2024 թվականին, երբ Ամորիմի նշանակման համար «Սպորտինգին» վճարվել է 11 միլիոն եվրո։

Պորտուգալացի մարզիչ Ռուբեն Ամորիմը, որը ժամեր առաջ հեռացվել է «Մանչեսթեր Յունայթեդի» գլխավոր մարզչի պաշտոնից, զգալի փոխհատուցում կստանա աշխատանքային պայմանագրի վաղաժամկետ խզման համար. հայտնում է talkSPORT-ը։

Մասնագետը «կարմիր սատանաների» հետ աշխատել է 2024 թվականի նոյեմբերից և թիմը լքել 2026 թվականի հունվարի 5-ին։ Նրա պայմանագրի ժամկետը նախատեսված էր մինչև հաջորդ մրցաշրջանի ավարտը։ Որպես հրաժարագին՝ նա կստանա 10.05 միլիոն ֆունտ ստեռլինգ։

2024 թվականի նոյեմբերին «Մանչեսթեր Յունայթեդը» «Սպորտինգին» վճարել էր 9.6 միլիոն ֆունտ ստեռլինգ փոխհատուցում։ Ամորիմի պայմանագիրը նախատեսում էր տարեկան 6.7 միլիոն ֆունտ ստեռլինգ վաստակ։

Մանկունյական ակումբում անցկացրած ժամանակահատվածում մարզիչն արդեն վաստակել էր 7.8 միլիոն ֆունտ ստեռլինգ։ «Մանչեսթեր Յունայթեդը» Ամորիմի գլխավորությամբ տրանսֆերների վրա ծախսել է մոտ 250 միլիոն ֆունտ ստեռլինգ։

Շախմատի աշխարհի 16-րդ չեմպիոն, ՖԻԴԵ-ի համաշխարհային դասակարգման առաջատար Մագնուս Կարլսենը անդրադարձել է «Մանչեսթեր Յունայթեդի» գլխավոր մարզչի պաշտոնից Ռուբեն Ամորիմի պաշտոնանկությանը։

X սոցիալական ցանցի իր էջում 35-ամյա գրոսմայստերը կիսվել է 2025 թվականի հունվարի 19-ին կատարած իր գրառմամբ, որտեղ կոչ էր արել Ամորիմին լքել «կարմիր սատանաների» գլխավոր մարզչի պաշտոնը։

«Նրանցից մեկ տարի պահանջվեց սա տեսնելու համար», — նախկին գրառմանը հղում կատարելով գրել է Մագնուսը։

Just took them a year to see it https://t.co/at6DkaSZ6i

— Magnus Carlsen (@MagnusCarlsen) January 5, 2026

Հիշեցնենք, որ պորտուգալացի մասնագետը այսօր՝ հունվարի 5-ին, հեռացվել է մանկունիական ակումբի գլխավոր մարզչի պաշտոնից։

«Մանչեսթեր Յունայթեդը» պաշտոնական հայտարարություն է տարածել՝ հայտնելով Ռուբեն Ամորիմի՝ գլխավոր մարզչի պաշտոնից հեռանալու մասին։

«Ռուբենը նշանակվել էր 2024 թվականի նոյեմբերին և մայիսին թիմին դուրս բերեց Բիլբաոյում կայացած ՈՒԵՖԱ-ի Եվրոպա լիգայի եզրափակիչ։

Քանի որ «Մանչեսթեր Յունայթեդն» այժմ Պրեմիեր լիգայում զբաղեցնում է 6-րդ հորիզոնականը, ակումբի ղեկավարությունը դժկամությամբ, բայց կայացրել է այն որոշումը, որ փոփոխությունների համար ճիշտ ժամանակն է։ Սա թիմին լավագույն հնարավորությունը կտա՝ պայքարելու Պրեմիեր լիգայում հնարավորինս բարձր հորիզոնական զբաղեցնելու համար։

Ակումբը շնորհակալություն է հայտնում Ռուբենին կատարած աշխատանքի համար և հաջողություն է մաղթում ապագայում»,- ասված է ակումբի տարածած հայտարարության մեջ։

Նշվում է նաև, որ չորեքշաբթի կայանալիք «Բարնլիի» դեմ խաղում թիմի ղեկը ժամանակավորապես կստանձնի Դարեն Ֆլետչերը։

«Մանչեսթեր Յունայթեդը» որոշում է կայացրել պաշտոնանկ անել թիմի գլխավոր մարզիչ Ռուբեն Ամորիմին։ Այս մասին հայտնում է The Athletic-ը։

Նշվում է, որ 40-ամյա պորտուգալացի մասնագետն արդեն տեղեկացվել է ակումբի ղեկավարության կայացրած որոշման մասին։

«Մանչեսթեր Յունայթեդի» գլխավոր մարզչի պարտականությունները ժամանակավորապես կստանձնի Դարեն Ֆլետչերը, ով գլխավորում է ակումբի երիտասարդական թիմը։

Ներկայումս «կարմիր սատանաները» ԱՊԼ-ի մրցաշարային աղյուսակում զբաղեցնում են 6-րդ հորիզոնականը՝ 20 խաղում վաստակելով 31 միավոր։

Հիշեցնենք, որ Ամորիմը մանկունիական ակումբը գլխավորում էր 2024 թվականի նոյեմբերից։

​«Մանչեսթեր Յունայթեդի» գլխավոր մարզիչ Ռուբեն Ամորիմը մեկնաբանել է թիմի առաջատար կիսապաշտպան Բրունու Ֆերնանդեշի կորուստը։ Ֆուտբոլիստը վնասվածք էր ստացել Անգլիայի առաջնության 17-րդ տուրի՝ «Ասթոն Վիլայի» դեմ խաղում (1:2) և փոխարինվել ընդմիջմանը։

​«Կարծում եմ՝ Բրունուին փոխարինելն անհնար է, և ես այդ մասին ասում եմ թիմին։ Սակայն մենք պետք է փորձենք օգուտ քաղել ստեղծված իրավիճակից։ Այստեղ դրականն այն է, որ մյուս ֆուտբոլիստները ստիպված կլինեն իրենց դրսևորել։

​Խնդիրը միայն գոլային պահեր ստեղծելը չէ, այլև յուրաքանչյուր ստանդարտ դիրքի իրացումը․ նա այն ֆուտբոլիստն է, ով երբեմն կազմակերպում է թիմի ամբողջ խաղը։ Սա բոլորի համար լավ առիթ է՝ հասկանալու, որ մենք չենք կարող ամեն ինչում հույս դնել մեկ խաղացողի վրա։

​Ստանդարտ դիրքերում մենք կորցրել ենք Բրունուին, ինչպես նաև Բրայանին և Ամադին։ Սա ահռելի կորուստ է, բայց միևնույն ժամանակ՝ հնարավորություն մյուս խաղացողների համար՝ ցուցադրելու այն առաջատարի որակները, որոնք մեզ անհրաժեշտ են»,- Ամորիմի խոսքերն է մեջբերում ակումբի պաշտոնական կայքը։