ռիո-ֆերդինանդ — Armsport.am

Նրա վիճակագրությունն ուղղակի խելահեղ է. Ֆերդինանդը նշել է Ոսկե գնդակի ապագա դափնեկրին

Suren Sahakyan — Thu, 08 Oct 2026 08:17:54 +0000

Անգլիական «Մանչեսթեր Յունայթեդի» նախկին պաշտպան Ռիո Ֆերդինանդը նշել է այն խաղացողի անունը, որն, իր կարծիքով, պետք է արժանանա 2026 թվականի «Ոսկե գնդակին»:

«Քեյնի վիճակագրությունն ուղղակի խելահեղ է: Հենց Հարին պետք է դառնա «Ոսկե գնդակի» դափնեկիր»,- սոցիալական ցանցերի իր էջերում գրել է Անգլիայի հավաքականի նախկին պաշտպանը:

Նշենք, որ Ազգերի լիգայի խմբային փուլի չորրորդ տուրում Չեխիայի ընտրանու դեմ կայացած խաղում (3-0) Հարի Քեյնը դարձել էր դուբլի հեղինակ։

Հիշեցնենք, որ «Ոսկե գնդակի» հանձնման հանդիսավոր արարողությունը կկայանա հոկտեմբերի 26-ին՝ Լոնդոնում: Նախորդ տարի ֆուտբոլային ամենահեղինակավոր անհատական մրցանակին արժանացել էր ՊՍԺ-ի և Ֆրանսիայի ազգային հավաքականի հարձակվողական ոճի կիսապաշտպան Ուսման Դեմբելեն:

Որտե՞ղ էր Պորտուգալիան Ռոնալդուից առաջ. Ֆերդինանդ

Editor — Fri, 02 Oct 2026 18:44:58 +0000

«Մանչեսթեր Յունայթեդի» նախկին պաշտպան Ռիո Ֆերդինանդը խոսել է Կրիշտիանու Ռոնալդուի աջակցության մասին, այն բանից հետո, երբ 41-ամյա հարձակվողը լքեց Պորտուգալիայի հավաքականը՝ գլխավոր մարզիչ Ժորժե Ժեզուսի հետ ենթադրյալ կոնֆլիկտից հետո:

«Որտե՞ղ էր Պորտուգալիան Կրիշտիանու Ռոնալդուից առաջ: Ի՞նչ էին նրանք ընդհանրապես անում: Արդյո՞ք նրանք ընդհանրապես որակավորվե՞լ են մեծ մրցաշարերի: Առավել ևս՝ ինչ-որ բան հաղթե՞լ էին։

Ինձ նյարդայնացնում է, որ շատերը նրան քննադատում են վերջին երեք կամ չորս տարիների համար: Նա դեռևս ֆանտաստիկ թվեր է գրանցում իր տարիքի մարդու համար: Կարևոր չէ, թե որ լիգայում է հանդես գալիս՝ թվերը դեռևս զարմանալի են։

Կարծում եմ՝ շատերը պետք է մի պահ ժամանակի մեջ հետ գնան… Նայեք նրան «Յուվենտուսում», թե ինչ արեց այնտեղ: Նրա ժամանակին «Ռեալ Մադրիդում»: Եվ նրա ժամանակին «Մանչեսթեր Յունայթեդում»: Դա այնպիսին է, կարծես նա երեք կարիերա է ունեցել մեկում: Երեք համաշխարհային մակարդակի կարիերա», — Ֆերդինանդի խոսքերն է մեջբերում Goal-ը։

Հիշեցնենք, որ Ռոնադուն և Ֆերդինանդը հանդես են եկել ՄՅՈւ-ի կազմում։

Ուրիշ ո՞վ պետք է նվաճի Ոսկե Գնդակը, եթե ոչ նա․ Ֆերդինանդ

Editor — Sun, 13 Sep 2026 19:41:55 +0000

Անգլիայի հավաքականի նախկին պաշտպան Ռիո Ֆերդինանդը կարծում է, որ «Բավարիայի» և «Երեք առյուծների» հարձակվող Հարի Քեյնը «Ոսկե գնդակի» գլխավոր հավակնորդն է։

«73 գոլ մեկ մրցաշրջանում։ Միայն Լիոնել Մեսսին է մեկ մրցաշրջանում ավելի շատ խփել, քան Հարի Քեյնը։ Նա նվաճել է «Ոսկե խաղակոշիկը»։ Ուրիշ ո՞վ, եղբայր։ Ուրիշ ո՞վ։ Ուրիշ ո՞վ պետք է նվաճի «Ոսկե գնդակը», եթե ոչ Քեյնը։

Այն ֆուտբոլիստը, որը մեկ ակումբի կազմում 100 գոլ է խփել ավելի արագ, քան որևէ մեկը լավագույն հինգ լիգաներում։ Կա միայն մեկ հավակնորդ և դա Հարի Քեյնն է», — ասել է Ֆերդինանդը «Բավարիա Մյունխենի» սոցիալական ցանցի էջում տեղադրված տեսանյութում։

2026 թվականի «Ոսկե գնդակի» մրցանակաբաշխությունը նախատեսված է հոկտեմբերի 26-ին։ Միջոցառումը տեղի կունենա Լոնդոնում։

Կարծում եմ՝ մի օր նա կնվաճի Ոսկե գնդակը․ Ֆերդինանդ

Suren Sahakyan — Fri, 07 Aug 2026 20:10:00 +0000

Անգլիայի հավաքականի և «Մանչեսթեր Յունայթեդի» նախկին պաշտպան Ռիո Ֆերդինանդը կարծում է, որ իր հայրենակից Ջուդ Բելինգեմն ապագայում կարժանանա ֆուտբոլային ամենահեղինակավոր անհատական մրցանակին։

«Մանչեսթեր Յունայթեդի» նախկին ֆուտբոլիստը նման հայտարարություն է արել իր Rio Ferdinand Presents փոդքասթի եթերում։

«Կարծում եմ՝ մի օր Բելինգեմը կնվաճի «Ոսկե գնդակը»,- նշել է Ֆերդինանդը։

Հիշեցնենք, որ Ջուդ Բելինգեմը պաշտպանում է Մադրիդի «Ռեալի» գույները։ Հունիսի վերջին անգլիացի կիսապաշտպանը նշել է իր 23-ամյակը։ ԱԱ-2026-ում «սերուցքայինների» աստղային ֆուտբոլիստն Անգլիայի ազգային հավաքականի կազմում անցկացրած 8 հանդիպումներում դարձել է 7 գոլի և 1 գոլային փոխանցման հեղինակ։

Այն, ինչ պատմում էին Ռոնալդուի մասին, ճշմարտություն էր. Չիչարիտոյի բացառիկ հարցազրույցը

Gevorg Martirosyan — Fri, 07 Aug 2026 13:22:16 +0000

Մադրիդի «Ռեալի» և «Մանչեսթեր Յունայթեդի» նախկին հարձակվող Խավիեր Էռնանդեսը (Չիչարիտո) Ռիո Ֆերդինանդի հեղինակային փոդքասթի ժամանակ կիսվել է պորտուգալացի աստղ Կրիշտիանու Ռոնալդուի մասին իր տպավորություններով։

Մեքսիկացին պորտուգալացու հետ «արքայական» ակումբի գույները պաշտպանել է 2014/15 մրցաշրջանում։ Պատասխանելով Ֆերդինանդի այն հարցին, թե որն էր Ռոնալդուի հետ նույն հանդերձարանում հայտնվելու առաջին տպավորությունը, Չիչարիտոն նշել է.

«Դա անհավանական էր։ Մինչ այդ ես շատ էի խոսել քո և մյուս տղաների հետ Կրիշտիանուի մասին, թե ինչպիսին էր նա «Մանչեսթեր Յունայթեդում»։ Ինձ բազմաթիվ պատմություններ էին պատմել, և հետո ես պատիվ ունեցա դառնալ նրա թիմակիցը։ Եվ գիտե՞ս, այն ամենը, ինչ դուք պատմում էիք, ճշմարտություն էր։

Նա մրցակցում էր նույնիսկ ընթրիքի սեղանի շուրջ։ Բայց այդ մրցակցային ոգին ոչ մի աղերս չունի մեծամտության հետ։ Բանն այն չէ, որ նա ուզում է ապացուցել, թե քեզանից լավն է։ Պարզապես, ինձ թվում է, նրա ներսում ինչ-որ անջատիչ կա։ Կարծում եմ՝ շատ ֆուտբոլիստների մոտ է այդպես. մենք չունենք «միացված» և «անջատված» ռեժիմներ։ Դու միշտ պետք է «միացված» լինես:

Լավագույններից լավագույնը դառնալու համար պետք է այդպիսին լինել ամեն օրվա յուրաքանչյուր վայրկյանում։ Միայն այդպես է հնարավոր դիմանալ այն ահռելի ճնշմանը, որն առաջանում է, երբ դու լավագույնն ես։

Անկեղծ ասած, նրա՝ որպես մարդու մասին շատ լավ հիշողություններ ունեմ։ Ես չեմ ասում, թե աշխատում էի այնքան շատ, որքան Կրիշտիանուն, բայց միշտ առաջինն էի գալիս բազա՝ մարզասրահում պարապելու կամ պրոցեդուրաներ անցնելու համար։ Դու ինքդ դա տեսել ես: Դրա շնորհիվ ես հնարավորություն ունեի հաճախ մենակ մնալ նրա հետ։ Եվ առանձնազրույցներում նա բոլորովին այլ մարդ չէր, նա մնում էր նույնքան անկեղծ ու իրական»,- եզրափակել է Չիչարիտոն։

Հիշեցնենք, որ Կրիշտիանու Ռոնալդուն Չեմպիոնների լիգայի հնգակի գավաթակիր է, 2016 թ. Եվրոպայի չեմպիոն և Ազգերի լիգայի կրկնակի հաղթող։ Նրան են պատկանում ազգային հավաքականների, Եվրոպայի առաջնությունների, Չեմպիոնների լիգայի և Ակումբային աշխարհի առաջնությունների պատմության լավագույն ռմբարկուի բացարձակ ռեկորդները։ Ռոնալդուն նաև «Ոսկե գնդակի» հնգակի դափնեկիր է։

Նա ստիպեց ինձ կրկին սիրել ֆուտբոլը. Ռիո Ֆերդինանդ

Suren Sahakyan — Sun, 12 Apr 2026 11:14:55 +0000

«Մանչեսթեր Յունայթեզի» և Անգլիայի ազգային հավաքականի նախկին պաշտպան Ռիո Ֆերդինանդն իր հիացմունքն է արտահայտել կատալոնական «Բարսելոնայի» իսպանացի հարձակվող Լամին Յամալի խաղի վերաբերյալ։

«Նա ստիպեց ինձ կրկին սիրել ֆուտբոլը։ Մարադոնա, Ռիկելմե, Վերոն. ահա թե ինչու եմ ես սիրում այս մարզաձևը: Սիրում եմ այն ֆուտբոլիստների շնորհիվ, որոնք չեն վախենում անհատական խաղի դիմել, խելահեղ բաներ են անում խաղադաշտում և գնում են ռիսկի։ Յամալը հենց այն խաղացողներից է, որոնք պատրաստ են ռիսկի դիմել և ձգտում են իսկական շոու պարգևել հանդիսատեսին»,- Ֆերդինանդի խոսքերն է մեջբերում The Touchline-ը։

Բացի զուտ մարզական որակներից, անգլիացի նախկին ֆուտբոլիստը գովեստի խոսքեր է հղել 18-ամյա Յամալի հասցեին նաև ֆուտբոլում և հասարակության մեջ ռասիզմի խնդրի վրա հանրության ուշադրությունը հրավիրելու համար։

Հավելենք, որ ներկայումս Լամին Յամալն ու «Բարսելոնան» ակտիվորեն նախապատրաստվում են Չեմպիոնների լիգայի շրջանակներում Մադրիդի «Ատլետիկոյի» դեմ կայանալիք պատասխան հանդիպմանը։

Ժամանակին նա անում էր այնպիսի բաներ, որոնք նույնիսկ Ռոնալդուն և Մեսսին չէին կարող անել. Ֆերդինանդ

Suren Sahakyan — Wed, 25 Mar 2026 11:16:48 +0000

Անգլիացի հայտնի նախկին պաշտպան Ռիո Ֆերդինանդը խոսել է Նեյմարի բացառիկության մասին՝ անդրադառնալով նաև բրազիլացու՝ առաջիկա աշխարհի առաջնությունը բաց թողնելու հավանականությանը։

«Սանտոսի» 34-ամյա հարձակվողը Կառլո Անչելոտիի կողմից չի ստացել ազգային հավաքականի հրավեր՝ մասնակցելու առաջիկա ընկերական հանդիպումներին։ Շատ հավանական է, որ աստղային ֆուտբոլիստը դուրս կմնա նաև Մունդիալի վերջնական հայտացուցակից։

«Ժամանակին Նեյմարն անում էր այնպիսի բաներ, որոնք աշխարհում ոչ ոք չէր կարողանում անել։ Ես նկատի ունեմ նաև Կրիշտիանու Ռոնալդուին և Լիոնել Մեսսիին. անգամ նրանք ի զորու չէին նման բաների»,- Ֆերդինանդի խոսքերը մեջբերում է The Touchline-ը։

Հիշեցնենք, որ մինչև հայրենիք՝ Բրազիլիա վերադառնալը, Նեյմարը պաշտպանել է սաուդյան «Ալ Հիլալի», ֆրանսիական ՊՍԺ-ի և կատալոնական «Բարսելոնայի» գույները։

Ռիո Ֆերդինանդը պատմել է Դուբայում ապրած սարսափի մասին

Gevorg Martirosyan — Tue, 03 Mar 2026 19:45:41 +0000

Անգլիայի ազգային հավաքականի և «Մանչեսթեր Յունայթեդի» նախկին պաշտպան Ռիո Ֆերդինանդը պատմել է, որ Դուբայի վրա իրանական անօդաչու թռչող սարքերի հարձակման ժամանակ ստիպված է եղել ընտանիքի հետ պատսպարվել իր տան նկուղում։

Նախորդ տարի Ֆերդինանդը կնոջ և երեք երեխաների հետ մշտական բնակություն էր հաստատել Դուբայում։ Վերջին օրերին, Իսրայելի և ԱՄՆ-ի մասնակցությամբ զինված հակամարտության սրման ֆոնին, քաղաքը պարբերաբար ենթարկվում է հարձակումների Իրանի կողմից։

Անգլիացի նախկին ֆուտբոլիստը կիսվել է իր ապրումներով՝ նշելով, որ փորձում են հնարավորինս հանգիստ արձագանքել ստեղծված իրավիճակին.

«Սարսափելի է, երբ լսում ես հրթիռների և կործանիչների ձայներ։ Շատ կարևոր է երեխաներին բացատրել, թե ինչ է կատարվում, և օգնել նրանց հաղթահարել այս իրավիճակը։ Պետք է փորձել պահպանել հանգստություն և հանգստացնել շրջապատողներին։

Անկեղծ ասած, իրավիճակը փոքր-ինչ վախենալու էր, բայց, որքան էլ տարօրինակ է, միևնույն ժամանակ ինձ լիովին ապահով և պաշտպանված էի զգում։ Իմ ստուդիան վերածվել է բունկերի։ Հենց առաջին գիշերը, երբ սկսվեց այս ամբողջ աղմուկը, մեզ խորհուրդ տվեցին իջնել նկուղ, և մենք այնտեղ քնեցինք։ Մենք փորձում ենք խելամտորեն օգտագործել այդ տարածքը»,- Ֆերդինանդի խոսքերն է մեջբերում The Mirror-ը։

Սևամորթները նրան որպես հոր են նայում. Ֆերդինանդը պաշտպանել է Մոուրինյուին՝ Վինիսիուսի հետ կապված միջադեպի ֆոնին

Gevorg Martirosyan — Tue, 24 Feb 2026 08:10:35 +0000

«Մանչեսթեր Յունայթեդի» նախկին պաշտպան Ռիո Ֆերդինանդը մեկնաբանել է «Բենֆիկայի» գլխավոր մարզիչ Ժոզե Մոուրինյուի խոսքերը՝ ուղղված Մադրիդի «Ռեալի» վինգեր Վինիսիուս Ժունիորին:

Նախորդ շաբաթ մադրիդյան ակումբը ՈւԵՖԱ-ի Չեմպիոնների լիգայի փլեյ-օֆֆ փուլի խաղում 1:0 հաշվով հաղթել էր «Բենֆիկային»: Խաղի ընթացքում Վինիսիուսը հայտնել էր գլխավոր մրցավար Ֆրանսուա Լետեքսիեին, որ լիսաբոնցիների կիսապաշտպան Ջանլուկա Պրեստիանին, մարզաշապիկով փակելով բերանը, իրեն «կապիկ» է անվանել: Պրեստիանին, իր հերթին, հայտարարել էր, որ չի վիրավորել բրազիլացուն:

Խաղից հետո «Բենֆիկան» գլխավորող Մոուրինյուն նշել էր. «Ինչ-որ բան այն չէ: Յուրաքանչյուր մարզադաշտում, որտեղ խաղում է Վինիսիուսը, միշտ ինչ-որ բան պատահում է»:

«Կարծում եմ՝ որոշ ժամանակ անց Ժոզեն կնստի ու կմտածի. «Հնարավոր է՝ ես սխալ վարվեցի»: Այդ խոսքերը Մոուրինյուին ռասիստ չեն դարձնում: Կարծում եմ՝ Ժոզե Մոուրինյուն բավականաչափ բան է արել ողջ աշխարհի սևամորթ ֆուտբոլիստների համար, ովքեր նրան որպես հոր են նայում, որպեսզի վստահաբար նշենք, որ նրա մեջ ռասիզմի նշույլ անգամ չկա»,- Ֆերդինանդի խոսքերն է մեջբերում Mirror-ը:

Հավելենք, որ ՈւԵՖԱ-ն արդեն ժամանակավորապես հեռացրել է «Բենֆիկայի» կիսապաշտպանին եվրագավաթային հանդիպումներից:

Ֆերդինանդը ներկայացրել է ՄՅՈւ-ի գլխավոր մարզչի պաշտոնի համար իր թեկնածուներին

Suren Sahakyan — Tue, 06 Jan 2026 14:15:59 +0000

Ռիո Ֆերդինանդն առանձնացրել է «Մանչեսթեր Յունայթեդի» գլխավոր մարզչի հավանական թեկնածուներին

«Մանչեսթեր Յունայթեդի» լեգենդար նախկին պաշտպան Ռիո Ֆերդինանդը սոցիալական ցանցերում հրապարակել է այն մասնագետների ցանկը, որոնք, ըստ իրեն, կարող են ստանձնել մանկունիանցիների գլխավոր մարզչի պաշտոնը։ Հիշեցնենք, որ ավելի վաղ այդ պաշտոնից հեռացել էր Ռուբեն Ամորիմը։

Ֆերդինանդն իր հրապարակման մեջ առանձնացրել է հետևյալ անունները.

«Դե Ձերբի, Տուխել, Խավի կամ Դարեն Ֆլետչեր՝ եթե նրա մոտ ստացվի»,- գրել է Ֆերդինանդը։

Անդրադառնալով նշված թեկնածուների ներկայիս կարգավիճակին՝ հարկ է նշել, որ Ռոբերտո դե Ձերբին ներկայումս գլխավորում է «Մարսելը», որը Լիգա 1-ի մրցաշարային աղյուսակում զբաղեցնում է երրորդ հորիզոնականը։

Թոմաս Տուխելն աշխատում է Անգլիայի ազգային հավաքականի հետ՝ թիմին դուրս բերելով 2026 թվականի աշխարհի առաջնության եզրափակիչ փուլ։

Չավիի վերջին աշխատավայրը կատալոնական «Բարսելոնան» էր, որի հետ նա նվաճել է Իսպանիայի չեմպիոնի տիտղոսն ու Սուպերգավաթը։

Դարեն Ֆլետչերն այս պահին զբաղեցնում է «Մանչեսթեր Յունայթեդի» երիտասարդական թիմի գլխավոր մարզչի պաշտոնը։