Կիրակի՝ հոկտեմբերի 25-ին, Իսպանիայի ֆուտբոլի առաջնության (Լա Լիգա) տասներորդ տուրում «Բարսելոնան» և «Ռեալ Մադրիդը» մրցեցին միմյանց հետ։ Հանդիպումը կայացավ Բարսելոնայում և ավարտվեց մադրիդյան թիմի հաղթանակով՝ 2-1 հաշվով։

«Բարսելոնայի» եզրային պաշտպան Չավի Էսպարտը ստիպված եղավ լքել խաղադաշտն արդեն 30-րդ րոպեին․ 19-ամյա ֆուտբոլիստը նստեց խաղադաշտում՝ ցույց տալով, որ չի կարողանա շարունակել հանդիպումը։ «Բլաուգրանայի» ծագող աստղի վնասվածքի լրջությունը դեռևս պարզ չէ, բայց մարզիչ Հանս-Դիտեր Ֆլիկը ստիպված եղավ անհապաղ փոխարինում կատարել՝ խաղադաշտ դուրս բերելով Ալեխանդրո Բալդեին։

Հանդիպման 41-րդ րոպեին հյուրերի ֆրանսիացի հարձակվող Կիլիան Մբապեն բացեց հաշիվը։

Հանդիպման 61-րդ րոպեին Ռաֆինյան՝ Պեդրիի փոխանցումից, հավասարեցրեց հաշիվը․ սա բրազիլացու 13-րդ գոլն էր Լա լիգայի այս մրցաշրջանում։ Ռաֆինյան դարձավ առաջին ֆուտբոլիստը Կրիշտիանու Ռոնալդուից հետո, որը Լա Լիգայի տասներորդ տուրում խփել է 13 գոլ։ Պորտուգալացին 2014/15 մրցաշրջանում «Ռեալ Մադրիդի» կազմում խփել էր 17 գոլ։ Ռաֆինյան Իսպանիայի ընթացիկ առաջնության գոլահարների մրցավազքում առաջատարն է՝ առաջ լինելով Կիլիան Մբապեից երկու գոլով։

88-րդ րոպեին Մբապեն դուբլ գրանցեց Կամավինգայի փոխանցումից հետո՝ ձևակերպելով այս հանդիպման վերջնական հաշիվը լուսատախտակին։ Սա Մբապեի 8-րդ գոլն էր 7-րդ Էլ Կլասիկոյում, և 14-րդ գոլը կատալոնական թիմի դարպասն իր կարիերայում։

Հանդիպման գոլերը՝ ԱՅՍՏԵՂ։

Այս հանդիպումից հետո «Բարսելոնան» 27 միավորով շարունակում է միանձնյա գլխավորել մրցաշարային աղյուսակը, «Ռեալը» 24 միավորով երրորդն է։

Մրցաշարային աղյուսակը

Մբապեն 11 խաղում 13 գոլ է խփել «Բարսելոնային»։ XXI դարում նրանից ավելի շատ գոլեր խփել են միայն Ռոնալդուն և Բենզեման։

«Ռեալի» հարձակվող Կիլիան Մբապեն հերթական գոլն է խփել «Բարսելոնայի» դարպասը՝ Լա Լիգայի 10-րդ տուրի «Էլ Կլասիկոյի» առաջին խաղակեսում բացելով հաշիվը։

Ֆրանսիացի ֆուտբոլիստի համար սա կատալոնական ակումբի դեմ 11 հանդիպումներում խփած 13-րդ գոլն էր։ Դրանցից 7-ը նա գրանցել է «Ռեալի» կազմում անցկացրած 7 խաղում, իսկ 6-ը՝ ՊՍԺ-ի կազմում «Բարսելոնայի» դեմ 4 հանդիպումներում։

XXI դարում «Բարսելոնայի» դեմ ավելի շատ գոլեր են խփել միայն Կրիշտիանու Ռոնալդուն՝ 34 խաղում 20 գոլ, և Կարիմ Բենզեման՝ 46 խաղում 16 գոլ։

«Բարսելոնայի» կիսապաշտպան Գավին Իսպանիայի Լա Լիգայի 10-րդ տուրի՝ «Ռեալի» դեմ հանդիպմանն ընդառաջ խոսել է մադրիդյան ակումբի հարձակվող Կիլիան Մբապեի մասին։

«Բոլորը շատ լավ գիտեն, որ Մբապեն մոլորակի լավագույն ֆուտբոլիստներից մեկն է։ Այո՛, Կիլիանը հսկայական թվով գոլեր է խփում, սակայն վերջին շրջանում նրան միշտ չէ, որ հաջողվել է թիմային տիտղոսներ նվաճել։

Այնուամենայնիվ, դա ոչ մի կերպ չի փոխում նրա իրական արժեքը։ Կիլիանն աշխարհի ուժեղագույն ֆուտբոլիստներից մեկն է և անընդհատ ապացուցում է դա խաղադաշտում։ Ով չի ցանկանում ընդունել ու տեսնել դա, պարզապես կույր է։ Մբապեն բացառիկ և անչափ վտանգավոր հարձակվող է, ուստի ամբողջ հանդիպման ընթացքում պետք է առավելագույն կենտրոնացվածություն պահպանենք նրա դեմ խաղալիս»,- Գավիի խոսքերն է մեջբերում RMC Sport-ը։

«Բարսելոնայի» և «Ռեալի» միջև հանդիպումը կկայանա այսօր՝ հոկտեմբերի 25-ին։

Այսօր՝ հոկտեմբերի 25-ին, «Սփոթիֆայ Կամպ Նոու» մարզադաշտում, Ժոզե Մոուրինյուն կանցկացնի իր առաջին «Էլ Կլասիկոն» Մադրիդի «Ռեալի» ղեկին՝ արքայական ակումբ վերադառնալուց հետո։

Հանդիպմանն ընդառաջ «սերուցքայինների» նախկին կիսապաշտպան Գուտին իսպանական SPORT պարբերականին տված հարցազրույցում վերլուծել է պորտուգալացի մասնագետի էվոլյուցիան՝ ընդգծելով, որ այսօրվա Մոուրինյուն էականորեն տարբերվում է այն մարզչից, որը 16 տարի առաջ առաջին անգամ ոտք դրեց «Սանտյագո Բեռնաբեու»։

«Տարիներն անցնում են բոլորի համար։ Նա մի փոքր հանդարտվել է և այլևս այնքան իմպուլսիվ չէ, որքան իր առաջին շրջանում, սակայն շարունակում է մնալ չափազանց մրցունակ մարզիչ, որն ատում է պարտվելը», — նշել է Գուտին։

Լեգենդար ֆուտբոլիստի կարծիքով՝ ամենամեծ փոփոխությունը տեղի է ունեցել թիմի խաղացողների հետ մարզչի հարաբերություններում.

«Հիմա նա ինձ ավելի հանգիստ է թվում և ավելի մոտ է ֆուտբոլիստներին, ինչը նախկինում այդքան էլ այդպես չէր։ Նա հասունացել է, ինչպես բոլորս ենք հասունանում տարիների ընթացքում»։

Հատկանշական է, որ Գուտիի խոսքերն առանձնահատուկ կշիռ ունեն։ Մադրիդյան ակումբի սանը, որը 15 մրցաշրջան պաշտպանել է «Ռեալի» առաջին թիմի գույները՝ նվաճելով Լա Լիգայի 5 և Չեմպիոնների լիգայի 3 գավաթ, լքեց հարազատ ակումբը հենց 2010 թվականի ամռանը՝ Միլանի «Ինտերից» Մոուրինյուի ժամանման պահին՝ տեղափոխվելով թուրքական «Բեշիքթաշ»։ 16 տարի անց նա կողքից է հետևում մի մարզչի, որը պահպանել է իր մրցակցային ոգին, բայց մեղմացրել է աշխատելաոճը։

Գուտին անդրադարձել է նաև «Ռեալի» ներկայիս մարզավիճակին։ Թիմը հաղթանակներ է տանում, սակայն ցուցադրած խաղով դեռևս լիովին չի համոզում երկրպագուներին։ Նախկին կիսապաշտպանը սա միանգամայն տրամաբանական գործընթաց է համարում.

«Երկրպագուների և ակումբի կողմից մեծ անհամբերություն կա, որպեսզի ամեն ինչ միանգամից ստացվի. ոչ միայն հաղթանակներ լինեն, այլև գեղեցիկ խաղ։ Բայց մենք հաշվի չենք առնում, որ թիմը համալրվել է բազմաթիվ նորեկներով, եկել է նոր մարզիչ, իսկ դրա համար ժամանակ է պետք։ Թեև, երբ թիմը երկու տարի շարունակ ոչինչ չի հաղթում, շատ դժվար է համբերություն և ժամանակ խնդրել»։

Այնուամենայնիվ, Գուտին լավատեսորեն է տրամադրված մադրիդյան թիմի ներուժի հարցում.

««Ռեալն» ավելի լավ թիմ ունի, քան մարդիկ կարծում են։ Սա շատ ամբողջական կազմ է, որը կարող է հիանալի ֆուտբոլ ցուցադրել։ Եթե լինի այդ հանգստությունն ու հավասարակշռությունը, նրանց մոտ ամեն ինչ կստացվի, բայց, իհարկե, վերջում ամեն ինչ կախված է լինելու արդյունքներից»։

Հավելենք, որ հոկտեմբերի 25-ին կայանալիք «Բարսելոնայի» դեմ հանդիպումը Ժոզե Մոուրինյուի համար կդառնա մարզչական կարիերայի 18-րդ «Էլ Կլասիկոն»՝ որպես Մադրիդի «Ռեալի» գլխավոր մարզիչ։ Նախորդ 17 դիմակայություններում պորտուգալացի մասնագետի գլխավորությամբ մադրիդցիները տոնել են 5 հաղթանակ, գրանցել 6 ոչ-ոքի և կրել 6 պարտություն։ Իսկ ընդհանուր առմամբ, իր ողջ մարզչական կարիերայի ընթացքում Մոուրինյուն կատալոնական ակումբի դեմ անցկացրել է 27 պաշտոնական հանդիպում՝ գրանցելով 8 հաղթանակ, 9 ոչ-ոքի և 10 պարտություն։

Այսօր՝ հոկտեմբերի 25-ին, իսպանական Լա Լիգայի 10-րդ տուրի շրջանակում կկայանա մրցաշրջանի կենտրոնական հանդիպումներից մեկը՝ «Բարսելոնան» սեփական հարկի տակ կընդունի Մադրիդի «Ռեալին»։

Խաղին ընդառաջ կատալոնական ակումբի մամուլի ծառայությունը հրապարակել է այն ֆուտբոլիստների անունները, որոնց «կապտանռնագույնների» գլխավոր մարզիչ Հանս-Դիտեր Ֆլիկը հայտավորել է առաջիկա «Էլ Կլասիկոյի» համար։

«Բարսելոնայի» հայտացուցակը.

• Դարպասապահներ. Ժոան Գարսիա, Վոյցեխ Շչեսնի, Դոմինիկ Լիվակովիչ,
• Պաշտպաններ. Ժոաու Կանսելու, Ալեխանդրո Բալդե, Պաու Կուբարսի, Չավի Էսպարտ, Ժերար Մարտին, Կամպոս,
• Կիսապաշտպաններ. Ֆարինյաս, Գավի, Ֆերմին Լոպես, Պեդրի, Ռոդրի, Ֆրենկի դե Յոնգ, Մարկ Բեռնալ, Գորեն,
• Հարձակվողներ. Գաբրիել Ժեզուս, Լամին Յամալ, Ռաֆինյա, Կարիմ Ադեյեմի, Էնթոնի Գորդոն, Աբդելկարիմ։

Հիշեցնենք, որ «Բարսելոնա» — «Ռեալ Մադրիդ» հանդիպումը կմեկնարկի Երևանի ժամանակով 00:00-ին:

Մադրիդի «Ռեալի» ճամբարում «Բարսելոնայի» դեմ կայանալիք խաղից ժամեր առաջ իրավիճակ է փոխվել։ Ինչպես հայտնում է Cadena SER-ը, բելգիացի դարպասապահ Տիբո Կուրտուայի ինքնազգացողությունը զգալիորեն բարելավվել է, և նա կարող է ուղևորվել «Կամպ Նոու»՝ մասնակցելու «Էլ Կլասիկոյին»։

Ավելի վաղ «արքայական» ակումբը պաշտոնապես հայտարարել էր, որ Կուրտուան գրիպի պատճառով բաց կթողնի հանդիպումը։ Առավոտյան դարպասապահն իրեն վատ էր զգացել և չէր կարողացել թիմի հետ մեկնել խաղին, սակայն ժամերի ընթացքում նրա առողջական վիճակը կարգավորվել է։ Այժմ բելգիացին մտադիր է ամեն ինչ անել՝ խաղադաշտ դուրս գալու և թիմին օգնելու համար։

Կուրտուայի հնարավոր բացակայությունը ծանր հարված կլիներ Ժոզե Մոուրինյուի գլխավորած թիմի համար, քանի որ նա մադրիդցիների առանցքային խաղացողներից է և դարպասային գծում նրան փոխարինելը չափազանց բարդ կլիներ։

Այս փոփոխությունը նշանակում է, որ ուկրաինացի դարպասապահ Անդրեյ Լունինը, որը պատրաստվում էր ընթացիկ մրցաշրջանում իր առաջին րոպեներն անցկացնել խաղադաշտում, ամենայն հավանականությամբ կրկին կմնա պահեստայինների նստարանին՝ սպասելով իր հաջորդ շանսին։

Մադրիդի «Ռեալի» հիմնական դարպասապահ Տիբո Կուրտուան չի մասնակցի Իսպանիայի առաջնության 10-րդ տուրի՝ կատալոնական «Բարսելոնայի» դեմ կենտրոնական հանդիպմանը։ Այս մասին հայտնում է «արքայական» ակումբի պաշտոնական կայքը։

34-ամյա բելգիացի դարպասապահը վերջին պահին դուրս է մնացել թիմի հայտացուցակից գրիպի ախտանշանների պատճառով։ Նրա փոխարեն մադրիդցիների հայտացուցակում ընդգրկվել է 19-ամյա ուկրաինացի դարպասապահ Իլյա Վոլոշինը։

Հիշեցնենք, որ «Բարսելոնա» — «Ռեալ Մադրիդ» հանդիպումը կկայանա այսօր՝ հոկտեմբերի 25-ին, և կմեկնարկի Երևանի ժամանակով 00:00-ին։

Տուրից առաջ «Բարսելոնան» 27 միավորով միանձնյա գլխավորում է Լա Լիգայի մրցաշարային աղյուսակը, իսկ «Ռեալը» առաջատարից հետ է մնում 6 միավորով և զբաղեցնում է 3-րդ հորիզոնականը։

Մադրիդի «Ռեալը» հրապարակել է «Բարսելոնայի» դեմ Իսպանիայի առաջնության 10-րդ տուրի հանդիպման հայտացուցակը։

«Ռեալ Մադրիդի» հայտացուցակը՝

Դարպասապահներ․ Տիբո Կուրտուա, Անդրեյ Լունին, Սերխիո Մեստրե։

Պաշտպաններ․ Էդեր Միլիտաո, Դին Հոյսեն, Տրենտ Ալեքսանդր-Առնոլդ, Իբրահիմա Կոնատե, Կուկուրելյա, Ալվարո Կարերաս, Անտոնիո Ռյուդիգեր, Դենզել Դումֆրիս։

Կիսապաշտպաններ․ Ջուդ Բելինգհեմ, Էդուարդո Կամավինգա, Ֆեդերիկո Վալվերդե, Օրելյեն Չուամենի, Արդա Գյուլեր, Բեռնարդու Սիլվա, Տիագո Պիտարչ։

Հարձակվողներ․ Էնդրիկ, Կիլիան Մբապե, Կառլոս Էսպի, Բրահիմ Դիաս, Յան Դիոմանդե։

Մադրիդյան թիմին չեն կարողանա օգնել Վինիսիուս Ժունիորը, որը որակազրկված է, ինչպես նաև վնասվածքներ ունեցող Ռաուլ Ասենսիոն, Ռոդրիգոն և Ֆերլան Մենդին։

Խաղը կկայանա այսօր՝ հոկտեմբերի 25-ին՝ Բարսելոնայի «Կամպ Նոու» մարզադաշտում։ Հանդիպման մեկնարկը Երևանի ժամանակով 23:55-ին է։

Կատալոնական «Բարսելոնայի» կիսապաշտպան Ռոդրին կիսվել է իր սպասելիքներով Իսպանիայի Լա Լիգայի 10-րդ տուրի կենտրոնական հանդիպումից՝ Մադրիդի «Ռեալի» դեմ կայանալիք «Էլ Կլասիկոյից» առաջ։

Հոկտեմբերի 25-ին «Սփոթիֆայ Կամպ Նոու» մարզադաշտում կայանալիք մրցավեճին ընդառաջ իսպանացի ֆուտբոլիստը խոսել է հայրենիք վերադառնալու, մադրիդյան ակումբի գլխավոր մարզիչ Ժոզե Մոուրինյուի և մրցակցի ռևանշիստական տրամադրվածության մասին։

Իսպանական ֆուտբոլ վերադառնալու և ԱՊԼ-ի հետ տարբերության մասին

«Մեծ ուրախություն է վերադառնալ իսպանական ֆուտբոլ և մասնակցել «Էլ Կլասիկոյին»։ Անգլիական Պրեմիեր լիգայում հանդես եկող ֆուտբոլիստների համար թերություններից մեկն այն է, որ այնտեղ նրանց այդքան էլ բարձր չէին գնահատում, և խաղի վրա նրանց ազդեցությունն էլ այնքան նշանակալի չէր, որքան կարող էր լինել Լա Լիգայում։ Բախտս բերել է, որ վերադարձել եմ և սպասում եմ մի հանդիպման, որը քեզ հանում է ամբողջ աշխարհի տեսադաշտ. բոլորը քարանում են՝ դիտելու «Էլ Կլասիկոն»։ Հուսանք՝ ամեն ինչ լավ կանցնի»։

Ժոզե Մոուրինյուի և «Ռեալի» խաղաոճի մասին

«Ժոզե Մոուրինյուն շատ ուժեղ բնավորությամբ, նպատակասլաց մարզիչ է, ով ունի իր յուրահատուկ խաղային փիլիսոփայությունը։ Նա միշտ բարձրացնում է այն թիմերի մակարդակը, որտեղ աշխատում է։

«Ռեալի» խաղաոճը տարբերվում է մերից, սակայն նրանց մրցակցային ոգին միշտ իրենց հետ է՝ հատկապես նմանատիպ հանդիպումներում։ Այդ պատճառով մենք սպասում ենք, որ մրցակիցը ներդնելու է բոլոր ուժերը։ Վերջին վեց կամ յոթ «Էլ Կլասիկոներից», կարծում եմ, նրանք հաղթել են ընդամենը մեկում, ուստի «Ռեալը» տրամադրված է լինելու ռևանշի»,— Ռոդրիի խոսքերն է մեջբերում Mundo Deportivo-ն՝ հղում անելով DAZN-ին։

Հիշեցնենք, որ հանդիպումը կկայանա վաղը՝ հոկտեմբերի 25-ին, ուղիղ կեսգիշերին։

Իսպանիայի Լա Լիգայի 10-րդ տուրի կենտրոնական հանդիպմանը՝ «Բարսելոնայի» դեմ «Էլ Կլասիկոյին» ընդառաջ, Մադրիդի «Ռեալի» գլխավոր մարզիչ Ժոզե Մոուրինյուն հանդես է եկել նախախաղային մամուլի ասուլիսով։

Պորտուգալացի մասնագետը, հավատարիմ մնալով իր ոճին, սուր ու դիպուկ պատասխաններ է տվել լրագրողներին՝ անդրադառնալով մրցավարական թեմային, մրցակցի ուժեղ կողմերին և իր թիմի հավակնություններին։

Թիմի մարզավիճակի և Կլասիկոյի նշանակության մասին

«Մենք լավ ընթացքի մեջ ենք. հաղթում ենք, լավ ենք խաղում, գոլեր ենք խփում… Բայց Կլասիկոներում նախկին արդյունքները ոչ մի նշանակություն չունեն, դրանք բոլորովին այլ հանդիպումներ են։ Կարևոր չէ, թե ովքեր են մարզիչները, կարևորը Կլասիկոյի համաշխարհային մասշտաբն է։ Աշխարհում կան այլ կարևոր դերբիներ, բայց այս մեկը յուրահատուկ է. ֆուտբոլասեր աշխարհը կանգ է առնում այն դիտելու համար։ Թող որ հիանալի խաղ ստացվի, և մենք հաղթենք»։

Արդյո՞ք այս խաղը թիմի՝ տիտղոսներ նվաճելու պատրաստակամության ստուգատեսն է

«Ոչ։ Մոուրինյուի գլխավորությամբ «Ռեալը» տիտղոսներ է նվաճում»։

Մրցավարի նշանակման արտահոսքի և Նեգրեյրայի որդու հետ կապի մասին (Լրագրողները հետաքրքրվել են մամուլում հայտնված տեղեկությամբ, թե խաղը սպասարկելու է Մունուերա Մոնտերոն, ով նախկինում վճարել է Նեգրեյրայի որդուն՝ քոուչինգի ծառայությունների համար — խմբ.)

«Դուք ինձ մի փոքր անակնկալի բերեցիք։ Ինձ երբեք չի անհանգստացրել մրցավարի անունը, ես միշտ առաջնորդվում եմ այն սկզբունքով, որ մրցավարը լավն է։ Ինձ անհանգստացնում է այն, երբ խախտվում են կանոնները։ Երեք շաբաթ առաջ շրջանառվում էր մեկ մրցավարի անուն, այս շաբաթ՝ մեկ ուրիշի, բայց ակումբի ներսում ինձ դեռ ոչ ոք պաշտոնապես չի ասել, թե ով է սպասարկելու խաղը։ Ով էլ լինի, հուսով եմ՝ ամեն ինչ լավ կանցնի»։

Պատասխան Ֆերմին Լոպեսին՝ մրցավարների մասին խոսակցություններից հոգնելու վերաբերյալ

«Ի՞նչ կարող եմ ասել… Մեզ էլ շատ ուրիշ բաներ են հոգնեցնում, որոնք շարունակում են կատարվել, իսկ Ֆերմինին հոգնեցնում են մեր խոսակցությունները։ Այդպես է կյանքը»։

ՊՍԺ-ից «Բարսելոնայի» կրած պարտության (2:4) մասին

«Չեմ կարծում, թե մեկ պարտության պատճառով կփոխվի նրանց տրամադրվածությունը կամ վստահությունը։ Իմ մոտեցումն էլ չէր փոխվի, եթե մենք «Լայպցիգին» 4:1 հաշվով հաղթելու փոխարեն պարտվեինք 1:4 հաշվով»։

«Բարսելոնային» գովաբանելու և «Ռեալին» քննադատելու մասին

«Նրանք, ովքեր մեկ շաբաթ առաջ կարծում էին, թե «Բարսան» մեզ կջախջախի, հավանաբար հիմա էլ նույն կարծիքին են։ Անկեղծ ասած, լինում են պահեր, երբ նրանք արժանի են գովասանքի, որովհետև շատ լավ բաներ են անում։ Իսկ մեզ դիտարկում են որպես արդեն պատրաստի պրոդուկտ, բայց ֆուտբոլում նման բան հազվադեպ է լինում։ Մենք ընդամենը երեք ամիս է, ինչ աշխատում ենք միասին, իսկ եթե հանենք նախամրցաշրջանային փուլն ու հավաքականների դադարները՝ մոտ մեկուկես-երկու ամիս։ Մենք դեռ կայացման փուլում ենք. մարզիչը ճանաչում է խաղացողներին, վերլուծում և ուղիներ նախագծում, ֆուտբոլիստներն էլ հարմարվում են մարզչին։ Մեր վիճակում գտնվող թիմին համեմատել մեկ այլ թիմի հետ, որն արդեն 2-3 տարի է՝ միասին է, ինձ արդարացի չի թվում։ Իսկ ընդհանուր առմամբ՝ հանդիպումները հաղթում են ֆուտբոլիստները, իսկ պարտվում են մարզիչները. դա է մեր կյանքը»։

Լամին Յամալին չեզոքացնելու ծրագրի մասին

«Թե՛ «Ռեալում», թե՛ «Բարսելոնայում» բոլորն էլ բարձրակարգ խաղացողներ են։ Նա հիանալի ֆուտբոլիստ է, իսկ մեծերին հարգում են։ Բայց մի բան է հարգելը, մեկ այլ բան՝ սեփական ծրագրերն ու կառուցվածքը փոխելը և սեփական էության մասին մոռանալը։ Մենք դա չենք պատրաստվում անել ո՛չ նրա, ո՛չ էլ մեկ այլ բարձրակարգ մրցակցի դեպքում»։

Հանս-Դիտեր Ֆլիկի և «Կամպ Նոու» վերադառնալու մասին

«Չեմ հասկանում, թե ինչու եք ինձ հարցեր տալիս մրցակիցների մասին։ Ի՞նչ եք ուզում, որ ասեմ Ֆլիկի մասին. նա հիանալի մարզիչ է, գերազանց աշխատանք է կատարում, և վերջ։ Իսկ «Կամպ Նոու» գնալը նույնն է, ինչ ցանկացած այլ մարզադաշտ գնալը։ Այո, մրցելու ենք շատ որակյալ թիմի դեմ, բայց արտառոց ոչինչ չկա»։

Մորուք պահելու և սնահավատության մասին(Մեկ ամիս է՝ Մոուրինյուն մորուք է պահում, և այդ ընթացքում «Ռեալը» միայն հաղթում է — խմբ.)

«Ընդհանրապես սնահավատ չեմ։ Ինչո՞ւ եք հարցնում, ահավո՞ր տեսք ունեմ մորուքով։ Եթե ասեք՝ ահավոր է, կմտածեմ փոխելու մասին (ծիծաղում է)։ Ես ֆուտբոլային աշխարհի այն քչերից եմ, ովքեր հեռու են սնահավատությունից»։

Մեկնարկային կազմի, խաղային պլանի և «Բարսայի» թույլ կողմերի մասին

Մոուրինյուն հաստատել է, որ արդեն կողմնորոշվել է մեկնարկային կազմի հարցում, սակայն հրաժարվել է բացել տակտիկական փակագծերը.

«Ավելի լավ է այլ հարց տաք։ Թե ինչպիսին է մեր պլանը, ով է խաղալու կամ ինչպես ենք կառուցելու խաղը՝ այդ հարցերին չեմ պատասխանի։ Իսկ թե որն է «Բարսելոնայի» թույլ կողմը… Դուք խելացի եք, բայց ես էլ հիմար չեմ (ծիծաղում է)»։

Հիշեցնենք, որ այս պահին «Բարսելոնան» 27 միավորով գլխավորում է Լա Լիգայի մրցաշարային աղյուսակը, իսկ Մադրիդի «Ռեալը» 21 միավորով երրորդ հորիզոնականում է։