Արգենտինայի հավաքականի ավագ Լիոնել Մեսսին շատ հարցերում իրեն նույնացնում է իսպանացի հայտնի թենիսիստ Ռաֆայել Նադալի հետ: Այս մասին լեգենդար ֆուտբոլիստը հայտարարել է աշխարհի առաջնության խմբային փուլում Ալժիրի հավաքականի դարպասը հեղինակած հեթ-տրիկից հետո:

Մեսսին նշել է, որ անգամ հիմա՝ մունդիալի օրերին, շարունակում է վերանայել իսպանացի թենիսիստի մրցելույթները:

 «Այդ առումով ես շատ նման եմ նրան. ես միշտ ցանկանում եմ առավելագույնս նվիրվել և ողջ ուժերս ներդնել դաշտում»,- Մեսսիի խոսքերն է մեջբերում Infobae պարբերականը:

Նշենք, որ աշխարհի առաջնություններում խփելով իր 16-րդ գոլը՝ Մեսսին այս ցուցանիշով հավասարվել է Գերմանիայի հավաքականի նախկին հարձակվող Միրոսլավ Կլոզեին: Այժմ նրանք կիսում են Մունդիալների պատմության լավագույն ռմբարկուների ցուցակի առաջին հորիզոնականը:

Հատկանշական է նաև, որ հանդիպման առաջին խաղակեսում արգենտինացին կարող էր հեռացվել խաղադաշտից ալժիրցի ֆուտբոլիստի սրունքին խաղակոշիկի ստորին հատվածով հարվածելու համար, սակայն ոչ գլխավոր մրցավարը, ոչ էլ VAR համակարգի պատասխանատուներն այս դրվագին չեն արձագանքել:

Լեգենդար թենիսիստ Ռաֆայել Նադալը, որն անցյալ տարի ավարտել է կարիերան, կարևոր խորհուրդ է տվել «Բարսելոնայի» 18-ամյա հարձակվող Լամին Յամալին։

«Նրա համար կարևոր է շրջապատված լինել այնպիսի մարդկանցով, որոնք իսկապես ցանկանում են օգնել իրեն և ունենալ իմաստություն՝ լսելու այնպիսի բաներ, որոնք հաջողակ մարզիկները հաճախ դժվարանում են լսել։ Նա պետք է լինի ողջամիտ, պետք է չկորցնի կապը իրական աշխարհի հետ»,- Նադալի խոսքերն է մեջբերում Mundo Deportivo-ն։

Հիշեցնենք, որ Յամալի տրանսֆերային արժեքը գնահատվում է 200 միլիոն եվրո։ Այս տարի Յամալը «Ոսկե գնդակի» քվեարկության արդյունքում զբաղեցրել է երկրորդ տեղը։

Աշխարհի նախկին առաջին ռակետ, իսպանացի թենիսիստ Ռաֆայել Նադալը մեկնաբանել է Մադրիդի «Ռեալի» գլխավոր մարզիչ Խաբի Ալոնսոյի աշխատանքը.

«Այս պահին Ալոնսոյի թիմը գլխավորում է առաջնության մրցաշարային աղյուսակը և բավականին նպաստավոր դիրքում է Չեմպիոնների լիգայում։

Չեմ կարծում, թե ակումբում կգտնվի մեկը, ով չէր ցանկանա հիմա լինել նրա տեղում։ Սա նոր նախագիծ է, և թիմը դեռ շատ բան պետք է յուրացնի։ Տունը մեկ օրում չի կառուցվում»,- Նադալի խոսքերն է մեջբերում Madrid Universal-ը։

Հիշեցնենք, որ վերջին շրջանում «Արքայական ակումբը» Լա լիգայում երկու ոչ-ոքի է խաղացել («Ռայո Վալյեկանո»՝ 0:0, «Էլչե»՝ 2:2), ինչպես նաև Չեմպիոնների լիգայում զիջել է «Լիվերպուլին» (0:1):

Լեգենդար իսպանացի թենիսիստ Ռաֆայել Նադալը, ով «Ռեալի» երկրպագու է, բարձր է գնահատել ֆրանսիացի հարձակվող Կիլիան Մբապեի խաղը, որը միացել էր մադրիդյան ակումբին 2024 թվականի ամռանը:

«Երբ Կիլիանը պայմանագիր էր կնքում «Ռեալի» հետ, մենք հստակ գիտեինք, թե ում ենք ձեռք բերում: Մենք հրավիրել էինք Մբապեին այն մտքով, որ պայմանագիր ենք կնքում աշխարհի լավագույն ֆուտբոլիստի հետ, և այս մրցաշրջանի սկզբում նա ապացուցեց, որ մեր գնահատականը ճիշտ էր:

Նա շարունակելու է պայքարել աշխարհի լավագույն ֆուտբոլիստի կոչման համար՝ հիասքանչ թիմակիցների շրջապատում: Անձամբ ես անչափ ուրախ եմ տեսնել, թե ինչպես է Կիլիանը հասնում նման հաջողությունների: Գիտեմ, թե որքան կարևոր էր դա նրա համար», — ասել է Նադալը «Ռեալի» մամուլի ծառայությանը տված հարցազրույցում:

Ընթացիկ մրցաշրջանում 26-ամյա Մբապեն «Ռեալի» կազմում բոլոր մրցաշարերում անցկացրած 13 խաղում խփել է 15 գոլ և կատարել 2 գոլային փոխանցում:

2024 թվականը դարձավ առաջին տարին, երբ կոռոնավիրուսի բոլոր սահմանափակումները վերացվեցին մեծ սպորտային միջոցառումներից։ Սա նշանակում էր, որ երկրպագուները վերադարձան Օլիմպիական խաղերին, իսկ ֆուտբոլասերները կարողացան լիովին վայելել Եվրոպայի առաջնությունը:

Իսպանիայի հավաքականը դարձավ Եվրոպայի չեմպիոն

Իսպանիայի հավաքականը 2024 թվականին կրկին նվաճեց Եվրոպայի չեմպիոնի տիտղոսը՝ հաղթելով Անգլիայի հավաքականին 2:1 հաշվով: Հատկանշական է, որ իսպանացիներն այս հաջողությունն արձանագրեցին երիտասարդ աստղ Լամին Յամալի օգնությամբ, ով դարձավ պատմության ամենաերիտասարդ խաղացողը և գոլի հեղինակը: Իսպանիայի հավաքականն այժմ ունի Եվրոպայի չորս չեմպիոնական տիտղոս՝ շրջանցելով Գերմանիային։

Օլիմպիական խաղերը Փարիզում

Փարիզում տեղի ունեցած Օլիմպիական խաղերը բազմաթիվ քննարկումներ առաջացրեցին, սակայն միջոցառումն անցավ առանց լուրջ միջադեպերի։ Խաղերի կազմակերպումն արժեցել է մոտ 9 միլիարդ եվրո, բայց կազմակերպիչները հայտարարեցին 26.8 միլիոն եվրոյի եկամուտի մասին: Օլիմպիական խաղերի մեդալային հաշվարկում առաջատար դարձավ ԱՄՆ-ը՝ 126 մեդալով: Փարիզյան Օլիմպիադան առանձնացավ նաև մի շարք ռեկորդներով, ներառյալ շվեդ Արման Դյուպլանտիսի 6,25 մետր ցատկը։

Նադալի հրաժեշտը

2024 թվականի թենիսը հիշվեց երկու դոպինգային սկանդալներով, որոնց մեջ ներառված էին թոփ թենիսիստներ։ Սկզբում արգելված նյութ հայտնաբերվեց աշխարհի առաջին ռակետ Յանիկ Սիների մոտ, ապա նաև նախկին առաջին ռակետ Իգա Շվյոնտեկի մոտ։ Երկուսն էլ խուսափեցին պատժից, ինչը դժգոհություն առաջացրեց բազմաթիվ թենիսիստների շրջանում։ Այնուամենայնիվ, այս իրադարձությունները չկարողացան մթագնել Ռաֆայել Նադալի հրաժեշտը։ Լեգենդար իսպանացին հրաժեշտ տվեց թենիսին նոյեմբերին Մալագայում՝ Դևիսի գավաթի խաղարկության ժամանակ։ 38-ամյա Նադալը 23 տարվա ընթացքում հաղթել է 22 «Մեծ սաղավարտի» մրցաշար։

Ռոդրին ստացավ «Ոսկե գնդակը»

2024 թվականի ֆուտբոլը շատ անակնկալներ մատուցեց. Լևերկուզենի «Բայերը» հաղթեց Գերմանիայի առաջնությունը՝ ընդհատելով «Բավարիայի» 11 տարվա անընդմեջ չեմպիոնությունը, իսկ Յուրգեն Կլոպը հեռացավ «Լիվերպուլից»։ Սակայն ամենամեծ անակնկալը տեղի ունեցավ նոր մրցաշրջանի սկզբում՝ «Ոսկե գնդակի» արարողության ժամանակ, որը կազմակերպում է ֆրանսիական France Football ամսագիրը։ Տարիներ շարունակ ֆուտբոլի ամենահեղինակավոր մրցանակի հաղթողը պարզ էր լինում դեռ արարողությունից առաջ, բայց 2024 թվականին ամեն ինչ փոխվեց։

Տարվա ֆավորիտը համարվում էր «Ռեալի» և Բրազիլիայի հավաքականի հարձակվող Վինիսիուս Ժունիորը, սակայն վերջինս չներկայացավ արարողությանը՝ միասին իր ակումբի հետ։ Մի քանի ժամ առաջ պարզ դարձավ, որ տարվա լավագույն ֆուտբոլիստը ոչ թե նա է, այլ Ռոդրին։

Ավարտվող 2024 թվականը լեցուն էր անմոռանալի պահերով, հաղթանակներով և հիասթափություններով, որոնք դարձան համաշխարհային սպորտի պատմության անբաժանելի մասը։ Ամեն մի իրադարձություն՝ սկանդալից մինչև փառահեղ չեմպիոնություն, վկայում էր սպորտի ուժի և դրա անընդհատ զարգացման մասին։ 2024-ը մեզ հիշեցրեց, որ սպորտն ավելին է, քան խաղը․ դա հույսի, միասնության և մոլորակի ամենատարբեր անկյուններից մարդկանց միավորելու հզոր միջոց է։

Ռաֆայել Նադալն ասել է, որ իր ամենադժվար մրցակիցը շվեյցարացի Ռոջեր Ֆեդերերն էր, սակայն սերբ Նովակ Ջոկովիչն իրեն ևս պարտադրել է անհավանական մրցակցություն:

«Ջոկովիչն այն թենիսիստն է, ում հետ ամենաշատն եմ հանդիպել, բայց ինձ համար ամենամեծ մրցակիցը Ֆեդերերն էր: Որովհետև, երբ ես սկսեցի կարիերաս, Ֆեդերերն այնտեղ էր և նա թիվ մեկն էր:

Այդ տարիներին, երբ ես կարիերայիս գագաթնակետին էի, Ռոջերն ու Նովակն ինձ հետ էին։ Բայց առաջին տարիներին, երբ նոր էի սկսել փայլել, Ռոջերը միշտ այնտեղ էր: Կարծում եմ, և չգիտեմ ինչու, որ երկուսի հետ իմ մրցակցությունն ավելի ուժեղ էր, քան նրանց միջև եղած մրցակցությունը։

Ես չգիտեմ ստույգ պատճառը, բայց ինձ թվում է, որ աշխարհը դա այդպես է ընկալում։ Մենք պետք է գտնենք պատճառը։

Ռոջերի հետ ինձ համար պարզ է, որ դա պայմանավորված է նրանով, որ շատ նկատելի հակադրություն կար սպորտը տեսնելու և մեր ոճերի մեջ: Իսկ Նովակի հետ, իհարկե, դա անհավանական մարտահրավեր էր։ Ի վերջո, նա թենիսիստ է, ում հաջողվում է ամեն տարի պահպանել շատ բարձր խաղամակարդակ ու կատարելագործվել։ Թվերն ասում են, որ նա լավագույնն է, հետևաբար նրա թենիսի մակարդակը լավագույնն էր, և, բացի այդ, նա էր, ով կարողացավ ամենաերկարը շարունակել առանց վնասվածքների»,- Նադալի խոսքերն է մեջբերում AS-ը։

Այսօր՝ հոկտեմբերի 11-ին, միջազգային մարզական մամուլն անդրադարձել է մի շարք կարևոր թեմաների։

Ներկայացնում ենք համաշխարհային ճանաչում ունեցող թերթերի շապիկներին տպագրված վերնագրերը և հոդվածները։

Անգլիական լրատվամիջոցներն անդրադարձել են Անգլիայի անակնկալ պարտությանը։

Իսպանական թերթերն ամբողջ ուշադրությունը սևեռել են թենիսիստ Ռաֆա Նադալի վրա, ով հայտարարել է կարիերան ավարտելու մասին։

Գերմանական մամուլն էլ, իր հերթին, անդրադարձել է «Լիվերպուլի» նախկին գլխավոր մարզիչ Յուրգեն Կլոպին, ով իր համար նոր աշխատանք է գտել Ռեդ Բուլում։

«Ալ-Նասրի» և Պորտուգալիայի հավաքականի հարձակվող Կրիշտիանու Ռոնալդուն խոսել է «Մեծ սաղավարտի» 22-ակի չեմպիոն և աշխարհի նախկին առաջին ռակետ իսպանացի Ռաֆայել Նադալի կարիերան ավարտելու որշման մասին։

«Ռաֆա, ինչպիսի անհավանական կարիերա ես ունեցել: Քո նվիրվածությունը, կիրքը և անհավատալի տաղանդը ոգեշնչում են միլիոնավոր մարդկանց ամբողջ աշխարհում: Պատիվ է եղել ականատես լինել քո ճանապարհորդությանը և քեզ իմ ընկեր անվանել: Շնորհավորում եm հիանալի կարիերայի կապակցությամբ: Վայելիր քո վաստակած հանգիստը»,- գրել է Ռոնալդուն X սոցիալական ցանցում (նախկինում՝ Twitter):

Հիշեցնենք, այսօր՝ հոկտեմբերի 10-ին, Նադալը հայտարարեց, որ կավարտի թնիսիստի պրոֆեսիոնալ կարիերան Դևիսի գավաթի 2024 թվականի եզրափակիչ փուլից հետո, որը կանցկացվի նոյեմբերի 19-ից 24-ը Իսպանիայի Մալագա քաղաքում։

Մեծ սաղավարտի 20-ակի հաղթող շվեյցարացի Ռոջեր Ֆեդերերն արձագանքել է իսպանացի Ռաֆայել Նադալի կարիերան ավարտելու մասին հայտարարությանը։

«Ինչպիսի՞ կարիերա էր, Ռաֆա: Ես միշտ հույս ունեի, որ այս օրը երբեք չի գա։ Շնորհակալություն անմոռանալի հիշողությունների և քո բոլոր անհավանական ձեռքբերումների համար մեր սիրելի խաղում: Քեզ հետ մրցելը պատիվ էր ինձ համար»,- գրել է Ֆեդերերը։

38-ամյա Ռաֆայել Նադալը հայտարարել է, որ կավարտի պրոֆեսիոնալ կարիերան 2024 թվականի Դևիսի գավաթի եզրափակիչ փուլից հետո, որը կանցկացվի նոյեմբերի 19-ից 24-ը Մալագայում (Իսպանիա)։ Իր կարիերայի ընթացքում Նադալը մենախաղում հաղթել է Ռոլան Գարոսում 14 անգամ, 2 անգամ հաղթել է Ուիմբլդոնում և Ավստրալիայի բաց առաջնությունում և 4 անգամ հաղթել ԱՄՆ բաց առաջնությունում։

Նովակ Ջոկովիչը ժամանակակից թենիսի ամենաուժեղ ներկայացուցիչն է։ Դրանում կասկած գրեթե չկա։ Իհարկե, ճաշակին ընկեր չկա. ոմանց համար Նադալն է սպորտաձևի լավագույնը, շատերն էլ ցայսօր չեն կարողանում առանց հիացմունքի ու հուզմունքի խոսել Ռոջեր Ֆեդերերի մասին։ Բայց եթե մի կողմ դնենք լիրիկական զեղումներն ու խոսենք չոր թվերի լեզվով, ամեն ինչ կընկնի տեղը՝ 24 «Մեծ սաղավարտ», ռեկորդային 400+ շաբաթ որպես աշխարհի առաջին ռակետ։ Ջոկոն միակն է, որը տարին 8 անգամ ավարտել է որպես թիվ 1 ռակետ։ Սերբն ունի 98 տիտղոս, այդ թվում՝ 40 (ի դեպ, դարձյալ ռեկորդային) Մասթերս, Դևիսի գավաթ-2010, ATP գավաթ-2020։

Այս պատկառելի ցանկում չկա միայն Օլիմպիական ոսկին։ Սերբ թենիսիստի ու ՕԽ փոխհարաբերությունները լավագույն կերպով չեն զարգացել։ Հիմա կհիշենք բոլորը, կանենք անհրաժեշտ հետևություններ ու կտանք տրամաբանական հարցը. «պատրա՞ստ է Ջոկովիչը վերջապես տուն տանել Օլիմպիական ոսկին»։

Փորձերի սկիզբ

Ջոկովիչի առաջին ծանոթությունն Օլիմպիական խաղերի հետ կայացել է 2008 թվականին։ Այդ ժամանակ սերբ թենիսիստը ընդամենը 21 տարեկան էր, բայց համաշխարհային դասակարգման աղյուսակում 3-րդն էր ու հասցրել էր հաղթել Ավստրալիայի բաց առաջնությունում։ Բավական վստահ քայլերով Ջոկոն հասավ կիսաեզրափակիչ, որտեղ նրան սպասում էր Ռաֆա Նադալը։ Գերհավասար ստացված պայքարում Ջոկովիչը երրորդ սեթում 4-5 հաշվի ժամանակ ձախողեց սմեշն ուղիղ տեղը ու զիջեց ճանապարհն ապագա հաղթող իսպանացուն։ Պարտվելուց հետո նա չկարողացավ զսպել արցունքները։ Գրեթե նույն պատկերը երրորդ տեղի համար խաղից հետո էր։ Բայց այս անգամ ամերիկացի Ջեյմս Բլեյքի հետ դիմակայությունից հետո նրա աչքերը դարձյալ թաց էին, բայց դեմքին այս անգամ ժպիտ կար, իսկ վզից կախված էր օլիմպիական բրոնզը։ Այո, այդ բրոնզը հաղթանակ էր, բայց Ջոկովիչը դժվար երազեր այն պահել որպես իր գլխավոր օլիմպիական նվաճում։

Կիսաեզրափակիչ անեծքն ու Դել Պոտրոն

2012 թվականին, Լոնդոնում կայացած Օլիմպիական խաղերի բացման արարողությանը Ջոկովիչն արդեն ներկայանում էր որպես իր սպորտաձևի առաջատար։ Ջոկովիչը Սերբիայի դրոշակակիրն էր ու թենիսի մրցաշարի հաղթողի գլխավոր ֆավորիտներից մեկը։ Այս անգամ էլ սերբ թենիսիստի ճանապարհորդությունն ընդհատվեց կիսաեզրափակիչ փուլում։ Այս անգամ ևս Ջոկովիչը պարտվեց ապագա չեմպիոնին։ Բայց, ի տարբերություն Պեկին-2008-ի, այս անգամ բրոնզե մեդալ նվաճել չհաջողվեց՝ պատվո հարթակի երրորդ աստիճանին կանգնեց արգենտինացի Խուան Մարտին դել Պոտրոն։

2016 թվականին Ռիոյում Ջոկովիչը մրցեց դել Պոտրոյի հետ արդեն առաջին շրջանում։ Արգենտինացին այն ժամանակ վերադառնում էր տուր երեք վիրահատությունից հետո: Ու թեև հանդիպումը խոստանում էր բարդ լինել, սերբը դրան մոտենում էր որպես բացահայտ ֆավորիտ՝ նա բոլոր «սլեմների» գործող չեմպիոնն էր։ Սակայն Ջոկովիչը պարտվեց 6:7 6:7 հաշվով:

Պարտությունից հետո սերբը նախ ժպտաց ու թափահարեց գլուխը, իսկ հետո արգենտինացու հետ երկար ժամանակ գրկախառնված մնաց՝ սեղմելով ձեռքերը։ Թվում էր՝ այդ ժամանակ լացում էին բոլորը՝ դել Պոտրոն թաքցրեց երեսը սրբիչով, իսկ Ջոկովիչը թողեց կորտերը՝ կրկին գլուխը շարժելով և սրբելով արցունքները, ինչպես դա եղավ 2008-ին։

Սուրբ երրորդությու՞ն։ Ոչ չենք լսել

Տոկիոյում նախատեսված խաղերում Ջոկովիչը նորից ֆավորիտ էր։ Մինչև կիսաեզրափակիչ փուլ (հա, էլի կիսաեզրափակիչ) ամեն ինչ ավելի քան հարթ էր ընթանում։ Մրցակիցներից մեկին Ջոկովիչը նույնիսկ հաղթել էր 6-0 հաշվով։ Ալեքսանդր Զվերևի հետ առաջին պարտիան սերբն անցկացրեց բարձր մակարդակով՝ հաղթելով 6-1 հաշվով։ Երկրորդում Ջոկոն ուներ առավելությույն ու հաղթում էր բրեյքով։ Բայց հանկարծ կախարդանքը կորավ, առաջ եկան բղավոցներն ու կոպիտ սխալները։ Որպես հետևանք՝ Ջոկովիչը հեռացավ տուն ձեռնունայն՝ պարտվելով Զվերևին՝ 6-1 3-6 1-6 հաշվով։ Երրորդ տեղի համար խաղն էլ չստացվեց՝ պարտություն 3 սեթում Պաբլո Կարենո Բուստայից։

Նովակը միակ թենիսիստն է, որը 3 անգամ հասել է Օլիմպիական խաղերի կիսաեզրափակիչ, բայց, միևնույն ժամանակ` 0 եզրափակիչ։ Զուգախաղերում ամեն ինչ ավելի տխուր է. 2008 թվականին նա խաղացել է Նենադ Զիմոնջիչի հետ ու պարտվել առաջին շրջանում։ Լոնդոնում նրա թիմակիցն արդեն Վիկտոր Տրոիցկին էր, բայց պատկերը նույնն էր՝ առաջին շրջանից այն կողմ գնալ չստացվեց, Ռիոյում՝ նույնպես։

Վերջին փարիզյան հույս

Բնականաբար, այս ամեն ինչը Ջոկովիչի սրտով չէ։ Այսքան երկար ու շատ օլիմպիական ամենահարկի մեդալի ձգտող մարդն ամեն օր բացում է վիճակագրությունն, ու նրա սրտից արյուն է կաթում։ Թենիսային «Մեծ քառյակից» յուրաքանչյուրն ունի օլիմպիական ոսկի տարբեր կատեգորիաներում: Ռաֆայել Նադալն ու Էնդի Մարեյը Օլիմպիական չեմպիոն են մենախաղում, իսկ Ռոջեր Ֆեդերերը՝ զուգախաղում։

«Փարիզի ոսկին իմ գլխավոր նպատակն է», — ասում է Ջոկովիչը։ Նրա խոսքով այս փորձն, ամենայն հավանականությամբ, վերջինն է։ Նովակն, իհարկե, լավատես է, նա ասուլիսներից մեկի ժամանակ չի հերքել իր մասնակցությունը նաև հաջորդ՝ 2028 թվականին Լոս Անջելեսում կայանալիք խաղին, բայց մինչև այդ հորով-մորով անել է պետք այս փարիզյանը։ իսկ Ֆրանսիայի մայրաքաղաքում նրան հեշտ կյանք ոչ ոք չի խոստանում։ Ջոկոն սկսեց պայքարը Մեթյու Էբդենի հետ խաղով, իսկ երկրորդ շրջանում այսօր կհանդիպի Օլիմպիական չեմպիոն Ռաֆայել Նադալին։

Ռոբերտ Գասպարյան