Լոնդոնի «Չելսին» պաշտոնապես հայտարարեց Անգլիայի հավաքականի և «Լիվերպուլի» նախկին կիսապաշտպան Ջորդան Հենդերսոնի տեղափոխության մասին։

36-ամյա ֆուտբոլիստը, ով հուլիսի վերջին խզել էր պայմանագիրը «Բրենթֆորդի» հետ, լոնդոնյան ակումբին միացել է ազատ գործակալի կարգավիճակով։ Կողմերը կնքել են երկու տարվա համաձայնագիր, որը նախատեսված է մինչև 2028 թվականը, և անգլիացին արդեն 2026/27 մրցաշրջանից առաջ կմիանա իր նոր խաղընկերներին։

«Հաշվի առնելով ակումբի մեծությունը, գլխավոր մարզիչ Խաբի Ալոնսոյին, ումով ես անչափ հիանում եմ, և ֆուտբոլիստների որակը՝ սա հսկայական հնարավորություն էր, որից չէի կարող հրաժարվել։ Ինձ շատ տպավորեց նաև այն, թե որքան են սեփականատերերը ցանկանում, որ «Չելսին» հաջողության հասնի և շարժվի ճիշտ ուղղությամբ։ Ինձ համար կարևորն ամեն օր թե՛ խաղադաշտում, թե՛ դրանից դուրս առավելագույնն անելն է՝ թիմին ու խաղընկերներիս հնարավորինս օգնելու համար։ Անհամբերությամբ եմ սպասում աշխատանքի մեկնարկին»,- նշել է Հենդերսոնը ակումբի մամուլի ծառայության հետ զրույցում:

Հենդերսոնն իր կարիերայի ընթացքում նվաճել է 8 տիտղոս, այդ թվում՝ Անգլիայի Պրեմիեր լիգայի և Չեմպիոնների լիգայի գավաթները «Լիվերպուլի» կազմում։ Մերսիսայդյան ակումբում, որտեղ նա 2015-ին ստանձնել էր ավագի թևկապը Սթիվեն Ջերարդի հեռանալուց հետո, անգլիացին ընդհանուր առմամբ անցկացրել է 492 հանդիպում և դարձել 33 գոլի հեղինակ։

Կիսապաշտպանը նախկինում հանդես է եկել նաև հարազատ «Սանդերլենդում», «Քովենթրիում», սաուդյան «Ալ-Իթիֆաքում», Ամստերդամի «Այաքսում», իսկ նախորդ մրցաշրջանն անցկացրել է «Բրենթֆորդում»՝ բոլոր մրցաշարերում մասնակցելով 34 հանդիպման, դառնալով 1 գոլի և 3 գոլային փոխանցման հեղինակ:

Անգլիայի ազգային հավաքականի կազմում Հենդերսոնն անցկացրել է 91 հանդիպում՝ դառնալով Եվրո-2020-ի փոխչեմպիոն, Ազգերի լիգայի և ԱԱ-2026-ի բրոնզե մեդալակիր: Վերջերս ավարտված աշխարհի առաջնության շրջանակներում նա մասնակցել է խմբային փուլի՝ Պանամայի դեմ հանդիպմանը (2:0)՝ փոխարինման դուրս գալով խաղավերջում։

Անգլիայի հավաքականի կիսապաշտպան Ջորդան Հենդերսոնի համար ԱԱ-2026-ն ավարտված է, ընդ որում՝ ամենաանսպասելի և հեգնական սցենարով։ Անգլիացի ֆուտբոլիստը լուրջ վնասվածք է ստացել ոչ թե խաղադաշտում, այլ պարզապես հաղթանակը տոնելիս:

Ինչպես հաղորդում է The Athletic-ը, Մեքսիկայի ընտրանու դեմ 1/8 եզրափակչի լարված հանդիպումից (3:2) անմիջապես հետո Հենդերսոնը փորձել է ցատկել գովազդային վահանակի վրայով, սակայն անհաջող վայրէջք է կատարել ձեռքի վրա։

Բժշկական զննումը ցույց է տվել, որ ֆուտբոլիստին անհրաժեշտ է դաստակի վիրահատություն։ Ներկայումս նա գտնվում է Մեխիկոյի հիվանդանոցներից մեկում՝ Անգլիայի հավաքականի բուժշտաբի ներկայացուցչի ուղեկցությամբ։ Վիրահատական միջամտությունից հետո կիսապաշտպանն ամենայն հավանականությամբ այլևս չի կարողանա օգնել իր թիմին ընթացիկ Մունդիալում։

Նշենք, որ ԱԱ-2026-ի շրջանակներում Հենդերսոնն ընդամենը մեկ անգամ էր հայտնվել խաղադաշտում։ Նա փոխարինման էր դուրս եկել Պանամայի դեմ խմբային փուլի երրորդ տուրի հանդիպմանը (2:0): Ի դեպ, այդ խաղը նրա համար հոբելյանական՝ 90-րդն էր ազգային թիմի մարզաշապիկով:

ԱԱ-2026-ի 1/8 եզրափակիչում Անգլիայի հավաքականը լարված և դրամատիկ պայքարում 3:2 հաշվով պարտության մատնեց Մեքսիկայի ընտրանուն՝ նվաճելով քառորդ եզրափակիչի ուղեգիր։

Մեխիկոյում կայացած հանդիպումն աչքի ընկավ գոլերի առատությամբ, հեռացումով, երկու 11-մետրանոցներով և հետխաղյա ցավալի ու անհեթեթ միջադեպով:

Խաղի մեկնարկը եղանակային վատ պայմանների և կայծակի վտանգի պատճառով հետաձգվել էր մեկ ժամով: Սակայն դա չխանգարեց թիմերին ցուցադրել դիտարժան ֆուտբոլ:

Անգլիացիների կազմում փայլեց Ջուդ Բելինգհեմը, ով ճանաչվեց խաղի լավագույն ֆուտբոլիստ։ Կիսապաշտպանը հանդիպման 36-րդ և 38-րդ րոպեներին դարձավ արագ դուբլի հեղինակ: Մեքսիկացիները չհանձնվեցին, և արդեն 42-րդ րոպեին Խուլիան Կինյոնեսը կրճատեց հաշվի տարբերությունը:

Երկրորդ խաղակեսի սկզբում (52-րդ րոպե) անգլիացիները հայտնվեցին բարդ իրավիճակում. Խեսուս Գալյարդոյի նկատմամբ կոպիտ խաղի համար խաղադաշտից հեռացվեց անգլիացիների պաշտպան Ջարել Քուենսան: Չնայած քանակական անհավասարությանը, ընդամենը րոպեներ անց Հարի Քեյնը անվրեպ իրացրեց 11-մետրանոցը՝ հաշիվը դարձնելով 3:1:

Հանդիպման ինտրիգը վերադարձավ 69-րդ րոպեին, երբ նույն Քեյնը կանոնները խախտեց սեփական տուգանային հրապարակում, իսկ Մեքսիկայի հարձակվող Ռաուլ Խիմենեսը դիպուկ իրացրեց նշանակված 11-մետրանոցը՝ հաշիվը դարձնելով 3:2: Սակայն մեքսիկացիներին ավելին անել չհաջողվեց։

Խաղից հետո անգլիացիների ճամբարում գրանցվեց տարօրինակ և ցավալի միջադեպ: Անգլիայի հավաքականի 36-ամյա կիսապաշտպան Ջորդան Հենդերսոնը, ով ամբողջ խաղն անցկացրել էր պահեստայինների նստարանին (նախքան այդ հասցնելով դեղին քարտ ստանալ մրցավարի հետ վիճելու համար), հաղթանակը տոնելիս լուրջ վնասվածք ստացավ։ Գովազդային վահանակի վրայով ցատկելիս նա անհաջող ընկավ ձեռքի վրա: Ֆուտբոլիստին դաշտից հեռացրին պատգարակով՝ միացնելով թթվածնային դիմակ։

«Շատ վատ է։ Դրան գումարվեց նաև Քուենսայի կարմիր քարտը: Ջորդանը վայր ընկավ և վնասեց դաստակը, տեսարանը շատ վատն էր», — նշել է Անգլիայի հավաքականի գլխավոր մարզիչ Թոմաս Տուխելը:

Աշխարհի առաջնությունների 1/8 եզրափակիչ փուլը շարունակում է մնալ ճակատագրական արգելք Մեքսիկայի հավաքականի համար։ 1994 թվականից ի վեր սա արդեն 8-րդ անգամն է, որ թիմը պայքարը լքում է հենց այս փուլում (չհաշված 2022 թ., երբ մեքսիկացիները չհաղթահարեցին խմբային արգելքը)։ Վերջին անգամ Մեքսիկան ԱԱ-ի քառորդ եզրափակիչում խաղացել է ուղիղ 40 տարի առաջ՝ ԱԱ-1986-ում:

Անգլիայի հավաքականը 1/4 եզրափակիչում կմրցի Նորվեգիայի ընտրանու հետ: Այդ հանդիպումը կկայանա հուլիսի 12-ին՝ ԱՄՆ-ի Մայամի քաղաքում:

Տեսանյութը՝ ԱՅՍՏԵՂ

«Լիվերպուլի» նախկին ավագ և «Այաքսի» նախկին կիսապաշտպան Ջորդան Հենդերսոնը միացել է անգլիական «Բրենթֆորդ» ակումբին, հայտնում է ակումբի պաշտոնական կայքը։

Պայմանագիրը կնքվել է մինչև 2027 թվականի հունիսի 30-ը։ Ավելի վաղ՝ հուլիսին, Հենդերսոնը լքել էր Ամստերդամի «Այաքսը», որն ընդառաջել էր ֆուտբոլիստի՝ պայմանագիրը վաղաժամ լուծելու խնդրանքին։ Նշենք, որ նախնական պայմանագիրը գործում էր մինչև հաջորդ մրցաշրջանի ավարտը։

«Ես միշտ հիացել եմ այս թիմով և նրանց վերջին տարիների հաջողություններով։ Ինձ դուր է գալիս «Բրենթֆորդի»՝ որպես ակումբի զարգացումը», — նշել է Հենդերսոնը ակումբի պաշտոնական կայքին տված հարցազրույցում։

35-ամյա Հենդերսոնը «Այաքսի» կազմում, որտեղ խաղացել է 2024 թվականից, անցկացրել է 57 հանդիպում, խփել մեկ գոլ և կատարել ինը գոլային փոխանցում։

Նա Անգլիայի չեմպիոն է, երկրի Գավաթի և Սուպերգավաթի հաղթող, ինչպես նաև Չեմպիոնների լիգայի դափնեկիր «Լիվերպուլի» կազմում, որտեղ խաղացել է 2011-ից 2023 թվականներին և եղել է թիմի ավագ։ Անգլիայի հավաքականի կազմում անցկացրել է 84 խաղ, դարձել Եվրոպայի 2020 թվականի առաջնության արծաթե և Ազգերի լիգայի 2019 թվականի բրոնզե մեդալակիր։

«Բրենթֆորդը» նախորդ մրցաշրջանում Անգլիայի Պրեմիեր լիգայում զբաղեցրել է հինգերորդ հորիզոնականը։

Բրիտանական GiveMeSport պորտալի կազմած ցանկի համաձայն՝ ամենաթերագնահատված խաղացողը ճանաչվել է Միքայել Լաուդրուպը։ Ֆուտբոլային կարիերայի ընթացքում նա հանդես է եկել «Յուվենտուս», «Բարսելոնա», «Ռեալ Մադրիդ» և «Այաքս» ակումբներում։

Տասնյակի երկրորդ տեղում է «Բավարիայի» հարձակվող կիսապաշտպան Թոմաս Մյուլերը, իսկ երրորդը՝ «Լիվերպուլի» նախկին կիսապաշտպան Ջորդան Հենդերսոնը։

Լավագույն տասնյակը

1. Միքայել Լաուդրուպ (Դանիա)
2. Թոմաս Մյուլեր (Գերմանիա)
3. Ջորդան Հենդերսոն (Անգլիա)
4. Դանիել Կարվախալ (Իսպանիա)
5. Ռոբերտ Պրոսինեչկի (Խորվաթիա)
6. Ֆրանկ Ռիբերի (Ֆրանսիա)
7. Սերխիո Բուսկետս (Իսպանիա)
8. Գեորգի Հաջի (Ռումինիա)
9. Մայքլ Քերրիկ (Անգլիա)
10. Ռուդի Ֆյոլեր (Գերմանիա)

Միքայել Լաուդրուպի մասին

Միքայել Լաուդրուպը դանիացի նախկին ֆուտբոլիստ և մարզիչ է։ Ծնվել է 1964 թվականի հունիսի 15-ին Ֆրեդերիկսբերգում։

Որպես ֆուտբոլիստ հանդես է եկել կիսապաշտպանի դիրքում՝ խաղալով այնպիսի ակումբներում, ինչպիսիք են «Լացիոն», «Յուվենտուսը», «Բարսելոնան», «Ռեալ Մադրիդը» և Դանիայի ազգային հավաքականը։

2006 թվականին Դանիայի ֆուտբոլի ֆեդերացիան Լաուդրուպին ճանաչել է Դանիայի ֆուտբոլի պատմության լավագույն խաղացող։

Որպես մարզիչ աշխատել է Դանիայի, Իսպանիայի, Ռուսաստանի, Անգլիայի և Քաթարի ակումբներում։

Անգլիայի Չեմպիոնշիփում հանդես եկող «Սանդերլենդը» դիտարկում է «Այաքսի» 34-ամյա կիսապաշտպան Ջորդան Հենդերսոնի հետ պայմանագիր կնքելու տարբերակը։ Այս մասին հայտնում է The Sun-ը։

Ֆուտբոլիստը «Սանդերլենդի» սան է։

Այս մրցաշրջանում նա բոլոր մրցաշարերում մասնակցել է 11 հանդիպման, որոնցում խաղադաշտում անցկացրել է 810 րոպե։ Այս հանդիպումներում Հենդերսոնը երկու գոլային փոխանցում է կատարել։

Ջորդանի ծառայություններով հետաքրքրված են նաև անգլիական այլ ակումբներ։

Ընդամենը մի քանի տարի առաջ բազում ֆուտբոլային չինովնիկներ ու գնդակով խաղի այլ ներկայացուցիչներ ի լուր աշխարհի հայտարարում էին՝ «շուտով Չինաստանի ֆուտբոլի առաջնությունը դառնալու է մրցունակ եվրոպական թոփերի կողքին»։ Անցել են տարիներ։ Չինական քանի՞ թիմ է արժանի պայքար մղել եվրոպականների հետ, քանի՞ թոփ ֆուտբոլիստ է խաղում Չինաստանի ուժեղագույնների առաջնությունում։ Շատերն ասում էին, որ 2026 թվականի աշխարհի առաջնությանը Չինաստանի ընտրանին լինելու է չեմպիոնական ֆավորիտներից մեկը։ Մեղմ ասած՝ այս ենթադրությունների հեղինակները կտրված են եղել իրականությունից։

Հիմա գրեթե նույնատիպ դիֆերամբներ են երգվում Սաուդյան Արաբիայի հասցեին։ Լինենք անկեղծ՝ Սաուդյան Արաբիայում հայտնված ֆուտբոլիստների մակարդակը գերազանցում է տարիներ առաջ Չինաստանում հայտնվածների աստղային սանդղակը։ Ոչ մի կերպ չես կարող համեմատել 2017-ի Պատոյի, Գրացիանո Պելեի, Կառլոս Տևեսի տրանսֆերները Ռոնալդուի, Մանեի, Նեյմարի, Լապորտի, Կուլիբալիի տեղափոխությունների հետ։ Բայց վերջին օրերին Սաուդյան Արաբիայից եկած նորությունները մտահոգվելու առիթ են տալիս։ Առայժմ չեն արդարանում Սաուդյան լիգայի՝ գերհզոր դառնալու հույսերը։ Դրա համար կան ավելի քան լուրջ պատճառներ։ Հիմա փորձենք հերթով գնալ դրանց հետքերով։

Վերը նշածս ֆուտբոլիստներից մեկը՝ Այմերիկ Լապորտը, վերջերս անկեղծացել էր AS պարբերականի հետ զրույցում և պատմել Սաուդյան Արաբիայում իր կյանքի մասին։ Հարցազրույցը երկակի զգացողություն առաջացրեց, ու տողատակեր որսացողներն անմիջապես հասկացան. «Մանչեսթեր Սիթիի» պաշտպանն ակնարկում է երկրից հեռանալու մասին։

«Ակումբների ղեկավարները քիչ ուշադրություն են դարձնում ֆուտբոլիստերի և նրանց առանձնահատկությունների վրա։ Նրանք, երևի, երբեք սովոր չեն եղել շփում ունենալու նման կարգի ֆուտբոլիստների հետ։ Այստեղ կյանքը զգալիորեն տարբերվում է Եվրոպայից, բայց հարմարվել կարելի է», — ասել է Լապորտը։

Ամռանը սաուդյան թիմերն աստղերի համար առաջարկում էին տիեզերական մակարդակի գումարներ, մինչդեռ հիմա, ժամանակի ընթացքում այդ հետաքրքրությունը նվազել է։ Նոր աստղերի անուններ ոչ միայն չեն հնչում (ամենայն հարգանքով, բայց Ռենան Լոդին այն մակարդակը չէ), այլև ամռանը եկածները կամ գնացել են, կամ հավաքում են ճամպրուկները։ Ջորդան Հենդերսոնն արդեն գնացել է, տունդարձի ճամփան են բռնել նաև Բոբի Ֆիրմինոն, Կարիմ Բենզեման, ասում են՝ Եվրոպան կարոտել է նաև Սերգեյ Միլինկովիչ-Սավիչը։

Լապորտի խոսքով՝ Սաուդյան Արաբիային դեռևս ժամանակ է պետք տրամադրել ադապտացվելու համար։ Ու այստեղ ամենևին էլ աշխատավարձի չափն էական չէ։ Լապորտը տարեկան վաստակում է մոտ 20 մլն եվրո, սակայն իսպանացու խոսքով՝ Եվրոպայում ֆուտբոլիստների հանդեպ ավելի ուշադիր են, և ինչպես ակնարկել է՝ այո, շատերն այստեղ են եկել գումար վաստակելու համար, սակայն միշտ ամենաբարձր մակարդակի վերաբերմունքի արժանացած ֆուտբոլիստների համբերության բաժակն այստեղ լցվում է։

Ջորդան Հենդերսոնի հեռանալու վերաբերյալ մեծ աղմուկ բարձրացավ։ Ըստ ԶԼՄ-ների հրապարակումների՝ «Լիվերպուլի» նախկին ավագը չկարողացավ հարմարվել պայմաններին։ Եվ դա այն դեպքում, որ տեղափոխումից շատ կարճ ժամանակ անց Հենդերսոնը հայտարարել էր, որ ամեն ինչ հրաշալի է։ Փաստորեն ամեն ինչ «բլա-բլա-բլա» շարքից էր։ Հարմարվող մարդը կբնակվեր հենց Սաուդյան Արաբիայում, այլ ոչ թե կապրեր հարևան երկրում՝ Բահրեյնում։ Պատճառը երկրի՝ համեմատաբար լիբերալ կարգավիճակն ու ապրելակերպն է։ Բայց ոչ միայն։

Խցանումներ ու երթևեկություն

Այս մասին բացեիբաց որևէ մեկը պաշտոնապես չի արտահայտվել, բայց դրա մասին եզրակացություն անելը բարդ չէ։ Սաուդյան Արաբիայից արդեն հեռացած Ջորդան Հենդերսոնն ու դեռևս այնտեղ աշխատող Սթիվեն Ջերարդը օրվա մեջ 4 ժամ ծախսում են Բահրեյնից իրենց թիմի մարզաբազա հասնելու համար (թե ինչու էին նրանք որպես իրենց կացարան ընտրել Բահրեյնը՝ ստորև)։ Նույն Լապորտը հայտարարել է, որ կյանքի որակից ուներ այլ ակնկալիքներ, այդ թվում՝ ճանապարհներից։ «Այստեղ» դու ուզած-չուզած 2-3 ժամ նվազագույնն անցկացնում ես մեքենայի մեջ։ Ամեն օր։ Էր-Ռիադում օրդ կորչում է խցանումներում»։

 Իսկ ինչո՞ւ էր Հենդերսոնը հետևել Ջերրարդի օրինակին ու բնակվում Բահրեյնում։ Բահրեյնն ու Սաուդյան Արաբիան հարևաններ են ու, ի տարբերություն ՍԱ-ի, Բահրեյնում անհամեմատ ավելի տարածված է եվրոպական ապրելակերպը. Զարմանալի չէ, որ արևելքի երկրներից առաջինը «մեծ աշխարհ» է դուրս եկել հենց Բահրեյնը։ 2003-ին հենց այս երկիրը դարձավ Ֆորմուլա 1-ի Գրան Պրի ընդունող առաջին արևելյան երկիրը։ Հենդերսոնն էլ իր խոսքում ասել էր, որ հենց սկզբից մերվել է միջավայրին։ Փաստորեն լավ չէր մերվել։

Պայմաններ

 «Պայմաններ» ասելով նկատի ունենք հիմնականում եղանակը։ Որոշ հանդիպումներ պետք է անցկացնել 40 աստիճան շոգին։ Իսկ հիմա զավեշտը. հունվարի վերջին, երբ Սաուդյան Արաբիայում հրաշալի եղանակ է՝ 20-25 աստիճան, առաջնությունում դադար է։ Բնականաբար առաջնության հանդիպումների մեծամասնությունը նշանակվում է երեկոյան, որ շատ շոգ չլինի։ Դրա շնորհիվ խաղում հաճախակի ջրային դադարներ չեն լինում։ Նույնիսկ Կրիշտիանու Ռոնալդուն է արտահայտվել այս թեմայով՝ նշելով, որ նոր կլիմային սովորելը հեշտ չէր. «Սաուդյան Արաբիայի ու եվրոպական երկրների միջև ամենամեծ տարբերությունն, իհարկե, եղանակն ու կլիման է։ Ստիպված ենք լինում շատ դեպքերում երեկոյան ժամերին մարզվել, ինչի պատճառով տուժում է մեր անձնական ժամանակը»։

Եղանակային պայմանների պատճառով Սաուդյան Արաբիայում չեն կարողանում մնալ նաև աստղային 2 ֆուտբոլիստի կանայք, որոնց անունը չի նշվում։ The Sun-ին հայտնի է դարձել, որ այդ կանայք իրենց ամուսիններին խնդրել են վերադառնալ Եվրոպա։ «Չար լեզուները» (դեղին մամուլ) նաև ասում են, որ այդ կանանց դուր չեն եկել տեղի բուտիկները և դրանց միջև հեռավորությունը։

Ապրելակերպ

Սա հանգիստ կարելի է համարել նախորդ թեմայի շարունակություն։ Այստեղ բնականաբար ամեն ինչ պարզ է։ Սաուդյան Արաբիան մահմեդական երկիր է։ Եթե մահմեդականություն դավանող ֆուտբոլիստներին ավելի հեշտ է ադապտացվել նոր առաջնությանը գոնե կրոնական տեսանկյունից, Եվրոպայից ժամանած թոփ աստղերի մեծամասնության մոտ մշակութային շոկ է եղել։

Ու այստեղ նորից պետք է խոսել գեղեցիկ սեռի ներկայացուցիչների մասին, որոնց գործոնն ազդել է ֆուտբոլիստներից մեկի տրանսֆերի կայացման վրա, ավելի ճիշտ կլիներ այս պարագայում ասել՝ չկայացման վրա։ Mail Sport-ի հետ զրույցում անգլիացի մի ֆուտբոլիստ ասել է, որ իր կնոջը տեղի առևտրի կենտրոններից մեկում անպատվել ու մատնացույց են արել տեղացի կանայք, քանի որ նա եղել է կարճ կիսավարտիքով։ Նման իրավիճակից հետո ֆուտբոլիստն ուներ ընտրության երկու իրավունք. կամ կնոջ հետ այլևս չգալ Սաուդյան Արաբիա, կամ էլ…երկրորդ տարբերակ, երևի թե, չի էլ դիտարկվել։

Հաճախելիություն

Վերոնշյալ հարցերը, իհարկե, կարևոր են, բայց այս մեկի վրա բոլորն են գլուխ կոտրում։ Թվում էր՝ եվրոպացի սուպերաստղերի ժամանումով աշխարհի ուշադրությունը Սաուդյան Լիգայի նկատմամբ կբարձրանա, մարդիկ կսկսեն հետևել դրան ավելի մեծ ուշադրությամբ։ Իրականում այդպես էլ կա։ Բայց կա մարդկանց մի ստվար զանգված, որին այդ երկրի ֆուտբոլը բացարձակ հետաքրքրություն չի առաջացնում։ Այդ մարդիկ հենց սաուդներն են։

Այստեղ կարևոր է հասկանալ, որ երկրպագուների հետաքրքրությունն իրականում աճում է աստղերի ժամանումից հետո: Պարզապես ոչ այն մասշտաբով, ինչպիսին կցանկանային տեսնել ակումբների սեփականատերերը: Վերցնենք «Ալ-Իթիֆաքը», այսպես ասած՝ «տեղական «Լիվերպուլը», որտեղ խաղում է Ջինի Վեյնալդումը, արդեն չի խաղում Ջորդան Հենդերսոնը, իսկ Սթիվեն Ջերարդը բազմած է մարզչական աթոռին։ Նրանց ամեն խաղին «Մուհամեդ բին Ֆահդ» մարզադաշտը, որը կարող է ընդունել 35,000 հանդիսական, լցվում է ընդամենը 8,000 երկրպագուով: Հաջորդ թվից ավելի եք տխրելու. 2023 թվականի հոկտեմբերի 22-ին ոչ աստղային «Ալ Ռիադի» հետ խաղին ընդամենը 696 մարդ է եկել։ Դե, խայտառակություն է, չէ՞։ Խոսքը Ջերարդի թիմի մասին է, ոչ թե «Վանի», «ՆիկԱրմի» կամ «Վեստ Արմենիայի»՝ նրանց հանդեպ ունեցած ամենայն հարգանքով։ Հարց՝ ինչու՞ է այդպես։

Նույնիսկ այցելուների քանակով առաջատարները՝ «Ալ-Հիլալը»՝ Մալկոմի և Նեյմարի հետ, և «Ալ-Իթիհադը»՝ Կանտեի և Բենզեմայի հետ, իրենց մարզադաշտերը լցնում են ընդամենը 20-25 հազար երկրպագուով։ Այո, այդ «ընդամենը» 25 հազարի մասին վերոնշյալ «Ալ-Իթիֆաքը» կերազեր ու դուք էլ կարող եք ասել, որ 25 հազար երկրպագուն, վերջին հաշվով, վատ ցուցանիշ չէ։ Բայց այստեղ կա մի նրբություն. «Ալ Հիլալի» ու «Ալ-Իթիհադի» ստադիոնները տեղավորում են ավելի քան 60 հազար հանդիսական։ Ամեն ինչ լավ է միայն «Ալ-Նասրի» մոտ։ Դե կներեք՝ Կրիշտիանուից ենք խոսում։ Ստադիոնը տեղավորում է 25000 հազար մարդ և միջինում այն լցվում է 95 տոկոսով։

Իրավիճակն ավելի խճճենք. Սաուդյան Արաբիայում մյուս մարզական իրադարձությունները շատ ավելի լավ հաճախելիություն ունեն, քան աստղային ֆուտբոլը: UFC-ի, WWE-ի կամ բռնցքամարտի իվենթները լավ են լցվում, և մարտիկները ստիպված չեն լինում մենամարտել՝ նայելով դատարկ տրիբունաներին: Այսինքն՝ չենք կարող ասել, որ այս երկրում հանդիսատեսն ընդհանրապես սպորտ չի սիրում։

Բայց, Սաուդյան Արաբիան չունի ուժեղ ֆուտբոլային ավանդույթ, ու մարդիկ զուտ չեն գալիս ստադիոն հետևելու, թե ինչպես են «կապույտները» հաղթում «դեղիններին»։ Նրանք պարզապես ցանկանում են իրենց աչքերով տեսնել Կրիշտիանու Ռոնալդուին և մյուս աստղերին: Ի դեպ, ավելի լավ միջոց այս տողերի իսկությունն ապացուցելու համար, քան թվերն են, չունենք. դա չափենք Նեյմարի վնասվածքներով: «Ալ-Հիլալ»-ի հաճախելիությունը գրեթե կիսով չափ նվազել է, երբ բրազիլացին երկար ժամանակով դուրս է մնացել վնասվածքի պատճառով: Հանրությունը գիտեր, որ Նեյմարը խաղադաշտ դուրս չի գա, և որոշեց չանհանգստանալ տոմսեր գնելու համար։ Դա այնքան պարզ է:

Պարադոքսալ է հնչում, բայց ֆուտբոլի՝ հաճախակի լինելու հանգամանքը ևս վնասում է հաճախելիությանը։ UFC-ն ու բռնցքամարտը ֆուտբոլ չեն։ Այս մարզական իրադարձությունները տեղի են ունենում շատ ավելի հազվադեպ, ինչը նշանակում է, որ հանդիսատեսն ավելի մեծ սպասումով է գալիս իվենթներին։ Կա նաև լոգիստիկ խնդիր։ Սաուդյան Արաբիան շատ մեծ երկիր է, և նրա մի մասից մյուսը հասնելն այնքան էլ հեշտ չէ։ Կարող է թվալ, որ դա այնքան էլ կարևոր չէ, բայց իրկանում՝ ոչ։ Ռուսաստանը թեպետ ավելի մեծ է, բայց միջին հաճախելիությունը մինչև Fan ID-ի ներդրումը շատ ավելի բարձր էր: Բայց փաստն այն է, որ, օրինակ «Սպարտակ»-«Զենիթ» հանդիպմանը ներկա գտնվելու համար այդքան էլ ժամանակ պետք չէ, քանի որ կա «Սապսան» (արագընթաց գնացք) Սանկտ Պետերբուրգից Մոսկվա: Իսկ ամենաշատ թոփ-ակումբները հիմնականում գտնվում են Մոսկվայում: Մինչդեռ մոտ 11 ժամ է պահանջվում Ջիդայից, որտեղ ապրում է «Ալ-Իթիհադը», Ռիադ հասնելու համար, որտեղ խաղում է «Ալ-Հիլալը»։ Մեղմ ասած՝ կասկածելի վայելքի շարքից է։

Եվրո 2024-ը հորիզոնում է

Ոչ պակաս կարևոր գործոն է նաև առաջիկա Եվրոն ու դրան մասնակցելը։ Իհարկե,  շատ խաղացողների ազգային հավաքականից դուրս մնալու վտանգ չի սպառնում. Ռոնալդուն, օրինակ, այնքան մեծ դեմք է, որ պորտուգալացիները կգերադասեն դարպասապահներ չտանել Եվրո, քան մնալ առանց Կրիշտիանուի:

Անգլիայի հավաքականի մարզիչը խիստ քննադատության էր ենթարկվել Ջորդան Հենդերսոնին ազգային հավաքական հրավիրելու համար: Մասնագետների որակմամբ՝ Կյորտիս Ջոնսը և Ջեյմս Ուարդ-Պրոուզը շատ լավ են խաղում ԱՊԼ-ում, իսկ Սաութգեյթը մնում է անդրդվելի: Բայց մյուսների բախտը նման կերպ կարող է չբերել։ Սաուդյան Արաբիան դեռ այնքան հեղինակավոր լիգա չէ, որքան շատ եվրոպական առաջնություններ: Դատելով հեղինակավոր Opta վիճակագրական ծառայության մոդելից՝ Սաուդյան Արաբիայի առաջնության «ուժը» դեռևս ավելի ցածր է, քան MLS-ինը։ Ազգային հավաքականների մարզիչները, գուցե, ուշադրության կենտրոնում պահեն ավելի մրցունակ լիգաների խաղացողներին:

Ի՞նչ եզրակացություն կարող ենք անել։ Ֆուտբոլային ավանդույթները միանգամից չեն կարող «ներարկվել»։ Այդ իսկ պատճառով վերոնշյալ բոլոր Նեյմարներն ու Բենզեմաները հիմա ու վաղը օդի պես պետք են սաուդյան ակումբներին։ Նրանք ստեղծում և պահպանում են հետաքրքրությունը, մինչև դա սովորություն դառնա: Եվ դրանք նաև սկզբունքորեն բարձրացնում են Սաուդյան Արաբիայի միջազգային հեղինակությունը։ Ու այս անգամ կա լավատեսություն, որ չի կրկնվի Չինաստանի Սուպերլիգայի օրինակը։ Բայց նաև ակնհայտ է, որ տեղական ֆուտբոլը, չնայած նման ներարկումներին, դեռ, կարծես, տեղից չի շարժվել։

Ռոբերտ Գասպարյան

«Լիվերպուլի» ավագ Ջորդան Հենդերսոնն այսօր ԱՊԼ թիմերի ավագների հրատապ ժողով է հրավիրել Սուպերլիգայի հարցը քննարկելու համար։ Այս մասին տեղեկացնում է Daily Mail-ը։

Նշվում է, որ հանդիպմանը ներկա են եղել ԱՊԼ բոլոր 20 թիմերի ավագները։ Հենդերսոնը երկար ժամանակ է բարձրագույն դիվիզիոնի ֆուտբոլիստների շրջանում ընդունվում է որպես վստահություն վայելով ու հարգանքի արժանի դեմք։ Շշուկներ են պտտվում, որ «Լիվերպուլը» դուրս է գալու նոր մրցաշարի մասնակից թիմերի շարքից։

Բացի դրանից, հայտնի է դարձել, որ ՄՅՈՒ-ի խաղացողները՝ թիմի ավագ Հարի Մագուայրի գլխավորությամբ դժգոհ են եղել, որ Սուպերլիգայի ստեղծման մասին իմացել են ԶԼՄ-ների միջոցով, այլ ոչ թիմերի ղեկավարներից։

«Լիվերպուլի» կիսապաշտպան Ջորդան Հենդերսոնը վիրահատության է ենթարկվել աճուկի վնասվածքի պատճառով։

Խաղացողի վերականգնման հստակ ժամկետներ չեն նշվում, բայց նա ամենաքիչը մինչև ապրիլ չի խաղա։ Այս մասին հաղորդում է «կարմիրների» մամուլի ծառայությունը։

Ընթացիկ մրցաշրջանում Հնդերսոնը մասնակցել է ԱՊԼ 21 խաղի, դարձել 1 գոլի ու 1 գոլային փոխանցման հեղինակ։

«Լիվերպուլի» կիսապաշտպան Ջորդան Հենդերսոնը նշել է, որ մերսիսայդյան ակումբը հենց հիմա էլ պատրաստ է սկսել նոր մրցաշրջանը։

«Ինչ վերաբերում է նոր մրցաշրջանին, մենք պատրաստ ենք այն թեկուզ հենց հիմա էլ սկսել։ Տիտղոսը գլխավերևում պահելու հաջորդ օրվանից արդեն նոր մրցաշրջանի մասին էի մտածում։ Մենք չենք փորձելու պաշտպանել տիտղոսը, փորձելու ենք հարձակվել նրա վրա։ Այդպիսին է մեր մենթալիտետը։ Խոսել եմ խաղացողների հետ, որոնք արդեն չեմպիոն դարձել են, նրանք ասում էին, որ ԱՊԼ-ում շատ դժվար է տիտղոսը պահելը։ Այնպես որ, մարտահրավերը նետված է»,- Հենդերսոնի խոսքերն է փոխանցում The Guardian-ը։