Ջան Պիերո Գասպերինին լքում է «Ատալանտան», որի գլխավոր մարզիչն էր 2016 թվականի ամռանից։ Այս մասին հայտնել է հենց ինքը՝ մասնագետը։

«Ես չէի կարող այս մասին ձեզ ավելի վաղ ասել, քանի որ միայն վերջին մի քանի ժամվա ընթացքում որոշեցի ավարտել այս հրաշալի ինը տարվա պատմությունը։ Բայց եկեք չխոսենք հրաժեշտի մասին։ Ինձ դա դուր չի գալիս։ Ես պարզապես ավարտում եմ իմ փորձը Բերգամոյում՝ որպես «Ատալանտայի» մարզիչ, իսկ մնացած ամեն ինչ կմնա անփոփոխ։

«Ատալանտայից» հեռանալու որոշումը կայացրել եմ բացառապես ես։ Ակումբի ղեկավարությունը դրա հետ որևէ կապ չունի։ Ես պարզապես հասկացա, որ ժամանակն է այս քայլը կատարել։ Լքում եմ ակումբը բարձրակետին՝ մրցաշարային աղյուսակում զբաղեցնելով երրորդ տեղը և Չեմպիոնների լիգայի ուղեգիր նվաճելուց հետո»,- Գասպերինիի խոսքերն է մեջբերում լրագրող Ջանլուկա Դի Մարցիոն։

Գասպերինին նաև նշել է, որ ցանկանում է կանգնել նոր մարտահրավերի առաջ։ Ավելի վաղ ինսայդեր Ֆաբրիցիո Ռոմանոն հայտնել էր, որ Գասպերինին կստանձնի «Ռոմայի» ղեկը։

Իտալական «Ատալանտայի» գլխավոր մարզիչ Ջան Պիերո Գասպերինին վերջնական որոշում է կայացրել լքել իր պաշտոնը, հաղորդում է լրագրող Մատեո Մորետոն։

Աղբյուրի փոխանցմամբ՝ 67-ամյա մասնագետն արդեն տեղեկացրել է ակումբի ղեկավարությանը իր հեռանալու մասին, չնայած նրա պայմանագիրը ուժի մեջ է մինչև հաջորդ տարվա ամառը։

Ջան Պիերո Գասպերինին մոտ է «Ռոման» գլխավորելուն։ Այս մասին արդեն հայտնել է լրագրող Նիկոլո Սկիրան

Աղբյուրի փոխանցմամբ՝ «Ռոմայում» պատրաստ են իտալացի մասնագետին առաջարկել մինչև 2028 թվականը նախատեսված պայմանագիր։ Միաժամանակ, հռոմեական ակումբի հետ աշխատանքային պայմանագրով Գասպերինիի աշխատավարձը կկազմի տարեկան 5 միլիոն եվրո։

Իտալական «Ատալանտա» ակումբի գլխավոր մարզիչ Ջան Պիերո Գասպերինին խոսել է իր ապագայի մասին։

Բերգամոյի թիմի մարզիչը պաշտոնը զբաղեցնում է արդեն 9 տարի։

«Մենք կքննարկենք դա, երբ և եթե հասնենք մեր նպատակին։ Ես երբեք չեմ ասել, որ կհեռանամ։

Ավելի շուտ ես ասել եմ , որ չի երկարաձգի պայմանագիրը, և սրանք երկու տարբեր բաներ են։ Մեր նպատակն այժմ Չեմպիոնների լիգա դուրս գալն է», — մասնագետի խոսքերն է մեջբերում Sky-ը։

Իտալիայի առաջնության 34 տուրերի արդյունքներով Գասպերինիի թիմը 65 միավորով երրորդ տեղում է։

«Ատալանտայի» գլխավոր մարզիչ Ջան Պիերո Գասպերինին ընթացիկ մրցաշրջանի ավարտից հետո կարող է հեռանալ Բերգամոյի թիմից։

Այս մասին հայտնում է ինսայդեր Նիկոլո Սկիրան։

Լրագրողի տեղեկություններով՝ մասնագետի ծառայություններով հետաքրքրված են իտալական երկու թոփ ակումբներ։ Խոսքը Թուրինի «Յուվենտուսի» և «Ռոմայի» մասին է։ Գասպերինին նաև աշխատանքի հնարավորություններ ունի Սաուդյան Արաբիայում:

67-ամյա մասնագետն «Ատալանտայի» գլխավոր մարզչի պաշտոնը զբաղեցնում է 2016 թվականի հուլիսից։ Կողմերի միջև գործող աշխատանքային պայմանագիրը ներկայիս ակումբի լրանում է 2025 թվականի հունիսի վերջին։

Իտալական «Ատալանտայի» գլխավոր մարզիչ Ջան Պիերո Գասպերինին խոսել է Չեմպիոնների լիգայի փլեյ-օֆֆ դուրս գալու մասին։ Լիգայի փուլում «Ատալանտան» զբաղեցրել է 9-րդ տեղը:

«Մենք դուրս ենք եկել հաջորդ փուլ և նորից կլսենք Չեմպիոնների լիգայի օրհներգը. դա տոն է Բերգամոյի բնակիչների համար:

Մենք պետք է հպարտ լինենք և գոհ լինենք: Եթե ​​ինձ հարցնեք՝ հաղթելո՞ւ ենք Չեմպիոնների լիգան, դա այլ հարց է, բայց մենք ուրախ սրտով ենք առաջ գնում։

Եթե ​​դուք իսկապես ուզում եք, որ ես նշեմ մեր նպատակը, ես կասեմ՝ մեր նպատակն է հաղթել Չեմպիոնների լիգան և Ա Սերիան»: Եվ ես հուսով եմ, որ այս պատասխանը ձեզ կուրախացնի»,- Գասպերինիի խոսքերը մեջբերում է ՈւԵՖԱ-ի պաշտոնական կայքը։

Իտալիայի Ա Սերիայում մեկնարկել է 2024 թվականի լավագույն մարզչի քվեարկությունը։ Հեղինակավոր անհատական ​​մրցանակին հավակնում են երեք մասնագետ:

Լավագույն մարզիչի կոչման համար կպայքարեն Սիմոնե Ինձագին (Ինտեր), Ջան Պիերո Գասպերինին (Ատալանտա) և Տիագո Մոտան (Բոլոնիա/Յուվենտուս):

Անվանակարգի հաղթողը կհայտարարվի դեկտեմբերի 2-ին կայանալիք մրցանակաբաշության ժամանակ։

Հիշեցնենք, որ Հենրիխ Մխիթարյանը (Ինտեր) հավակնում է տարվա լավագույն կիսապաշտպանի մրցանակին։

Globe Soccer Awards-ը հրապարակել է 2024 թվականի լավագույն մարզչի մրցանակի հավակնորդների ցուցակը։

Մրցանակին հավակնում է 9 մասնագետ․

Սիմոնե Ինձագի (Ինտեր)
Կարլո Անչելոտի (Ռեալ Մադրիդ),
Ջան Պիերո Գասպերինի (Ատալանտա)։
Խոսեպ Գվարդիոլա (Մանչեսթեր Սիթի)
Լուիս Էնրիկե (ՊՍԺ),
Խաբի Ալոնսո (Բայեր),
Միկել Արտետա (Արսենալ),
Լուիս դե լա Ֆուենտե (Իսպանիա)
Լիոնել Սկալոնի (Արգենտինա)

Մրցանակաբաշխությունը տեղի կունենա դեկտեմբերի 27-ին Դուբայում։ Հետաքրքիր է, որ Կարլո Անչելոտիից բացի ոչ ոք այս մրցանակին չի արժանացել մեկից ավելի անգամ (իտալացին մրցանակը ստացել է երկու անգամ):

Եվրոպա լիգայի եզրափակիչում դժվար գտնվեր գեթ մեկ խելամիտ երկրպագու կամ մասնագետ (եթե նա Բերգամո քաղաքից չէ, իհարկե), որը ֆավորիտ կհամարեր «Ատալանտային» «Բայերի» հետ դիմակայությունում։ Իհարկե, մրցաշարի մեկնարկից առաջ այս թիմերի շանսերը գրեթե հավասար ցածր էին գնահատվում՝ օրինակ, «Լիվերպուլի» ֆոնին։ Բայց հաղթահարելով բոլոր մրցակիցների արգելքները, «ասպիրինավորներն» ու բերգամասկները հասան եզրափակիչ՝ միանգամայն տարբեր տրամադրությամբ ու կարգավիճակում։ «Ատալանտան» մրցաշրջանի ընթացքում հաղթահարեց լուրջ ճգնաժամը, իսկ «Բայերը» 51 խաղից բաղկացած անպարտելի շարք ձեռնարկեց։ Ով էլ հաղթեր այս զույգում, չեզոք երկրպագուները դժգոհ չէին մնա։ Մենք առանձնացրել ենք 3 կետ, որոնք դարձան վճռորոշ այս եզրափակիչի համար։

«Ատալանտայի» անհատական ու անհավանական պրեսինգը

Տարիներ առաջ Ջան Պիերո Գասպերինին նոր թրենդ մտցրեց ժամանակակից ֆուտբոլ։ Ավելի ճիշտ, վերակենդանացրեց ֆուտբոլային էլեմենտ՝ «անհատական պրեսսինգ» կոչվածը, որը մոդայիկ էր հատկապես Ա սերիայում 90-ական թվականներին։ Իհարկե, եղել են որոշակի ժամանակահատվածներ, երբ «Ատալանտան» մի փոքր փոխել է իր խաղաոճն ու հրաժարվել է դրանից, բայց հենց այն խաղում, որտեղ կար անհատական պրեսսինգի անհրաժեշտությունը․ Գասպերինին միացրեց «Turn ON» կոճակը, և իր ֆուտբոլիստները 90 րոպեում խեղդամահ արեցին անպարտելի «Բայերին»։

«Ասպիրինավորներին» շատ դժվար էր մտնել խաղի մեջ։ Ալոնսոյի ֆիրմային կարճ խաղարկումների վերջը տալիս էր հարձակման գծում ներգրավված հնգյակը։ Երբ գնդակի հետևից սեփական կիսադաշտ էր իջնում Վիրցը, նրա հետևից վազում էր «Ատալանտայի» կենտրոնական պաշտպաններից մեկը։ Երբ կարճ փոխանցումներով գրոհները չէին ստացվում, գործի էին դրվում երկար փոխանցումները և անհատական պայքարը, որտեղ նույնպես «Ատալանտան» անողոք էր։ «Ատալանտան» այս խաղում գրանցել է 21 խախտում։ Նկատենք, որ ավելի շատ խախտում Բերգամո քաղաքը ներկայացնող թիմը թույլ է տվել միայն 1 անգամ այս մրցաշրջանում։ Բայց այսքան խախտումները բնավ չեն խոսում այն մասին, որ «Ատալանտան» չէր հասցնում «Բայերի» հետևից։ Գասպերինիի թիմը ճիշտ ժամանակին մանր խախտումներ էր թույլ տալիս և կոտրում էր մրցակցի մանր գրոհների տեմպը։

Չի բացառվոււմ, որ «Ատալանտան» չկարողանար ցույց տալ այն ֆուտբոլը, որը ցանկանում էր, եթե մրցակիցը «Բայերը» չլիներ։ Պարադոքսալ է կարդացվում, բայց այդպես է։ Ե՛վ «Բայերը», և՛ «Ատալանտան» խաղում են միևնույն՝ 3-4-2-1 սխեմայով։ Այս մրցաշրջանում միայն 3 թիմ է կարողացել հակադարձել այդ սխեմային՝ «Ատալանտային» չհաշված (բայց այդ մասին՝ ստորև՝ մի քիչ հետո)։ Անհատական պրեսսինգի համար չկա ավելի հարմար տարբերակ, քան մրցակցի հայելանման սխեման։ Խաղում ամենակարևոր նշանակությունն ունեցավ երկու թիմերի միջին օղակում հանդես եկող ֆուտբոլիստների խաղը։ «Բայերի» միջին գիծը պահում էին Գրանիտ Ջական ու Էզեկիել Պալասիոսը։ Գասպերինին նրանց դեմ դուրս էր բերել Էդերսոն – Կոպմայներս զույգին։ Նրանք անմիջապես դիմավորում էին մրցակցին սեփական կիսադաշտից հեռու, ստիպում էին սխալվել, հաղթում էին մի շարք անհատական միկրոմենամարտերում, իսկ երբ մրցակցին հաջողվում էր գոնե 20 մետր առաջխաղացում գրանցել, անմիջապես նահաջում էին ու «մարդ էին բերում»՝ ի դեմս զորեղ թիմակիցների։

«Ատալանտայի» անհատական պրեսսինգը մսաղացի մեջ առավ նաև Ֆլորիան Վիրցին։ Աջ եզրում Դավիդե Ձապակոստան քրքրում էր Ալեքս Գրիմալդոյին։ Այս երկուսի խաղը չստացվեց, բայց առավել էական նշանակություն ունեցավ Ջակայի ու Պալասիոսի ձախողումը։ Ապակենտրոնացած Գրիմալդոյով ու Վիրցով բարդ է գրոհ կառուցել, այո, համաձայն ենք, բայց ապակենտրոնացած Ջակայով ու Պալասիոսով ֆուտբոլ խաղն անհնար է դառնում։ Որպես այս տողերի ապացույց՝ բերենք չոր թվեր ու փաստեր․ Պալասիոսի աչքի առաջ «Ատալանտան» խփեց առաջին գոլը, իսկ երկրորդը ծնվեց Ջակային շրջանցելուց հետո։

«Բայերի» վատագույն խաղն այս մրչցաշրջանում

Նախ սկսենք ամենակարևորից՝ «Ատալանտան» իր հաղթանակը տարել է միանգամայն արժանիորեն։ Մրցաշրջանի 52 հանդիպումից հենց այս մեկն էր «Բայերի» կատարմամբ վատագույնը։ Ո՞վ կարողացավ «Ատալանտայի» պես արժանի ոտք մեկնել «Բայերի» դեմ այս մրցաշրջանում։ Անուններից, գուցե, զարմանաք, բայց՝ «Շտուդգարտը», «Քարաբախը» և «Ռոման»։ Գնանք հերթով։

Նախ, հիշենք «Շտուդգարտին», որը «Բայերի» դեմ անցկացրեց, բառի ուղիղ իմաստով, անգերազանցելի 45 րոպե։ Առաջին շրջանի խաղում համանուն քաղաքի թիմը պարզապես ճմրթել էր Ալոնսոյի թիմին՝ բազմաթիվ գոլային պահեր, պրեսսինգի կայուն հաղթահարում, ուժեղ խաղ սեփական կիսադաշտում։ Առաջին կեսում «Շտուդգարտը» հաղթում էր 3-0 հաշվով, բայց երկրորդ խաղակեսում «Բայերը» սկսեց ճնշել ու հավասարեցրեց հաշիվը։ Դրանից առաջ կամ հետո ոչ մի թիմ չի կարողացել նման դոմինանտ ուժ լինել Խաբի Ալոնսոյի թիմի դեմ։ Այս խաղից զատ, ի դեպ, «Շտուդգարտն» ունեցել է ևս 2 հնարավորություն սխալն ուղղելու համար՝ Գերմանիայի գավաթի քառորդ եզրափակիչն ու առաջնության երկրորդ շրջանի հանդիպումը։ Երկու դեպքում էլ «Շտուդգարտը» բացել է հաշիվը, բայց երկու դեպքում էլ մնացել է առանց հաղթանակի։ Գավաթում «Բայերը» հաղթեց 3-2 հաշվով՝ հաղթական գոլը խփելով 90-րդ րոպեին, իսկ առաջնության երկրորդ շրջանի խաղում «Բայերը» պարտվում էր 0-2 հաշվով, բայց 90+6-ին լուսատախտակին վառեց 2-2 հաշիվը։

«Քարաբախը» «Բայերին» հաղթելու 4 հնարավորություն է ունեցել։ Երկու հանդիպում թիմերն անցկացրել են խմբային փուլում, ևս երկուսը՝ 1/8 եզրափակիչում։ Խաղի որակով լավագույն հանդիպումն այս թիմի համար եղել է փլեյ-օֆֆ փուլի առաջին հանդիպումը, որի ընթացքում «Բայերը» պարտվում էր 0-2 հաշվով հիմնականում հենց ուժեղ պրեսսինգի պատճառով։ Բայց Վիրցն ու Շիկը խաղի վերջում հետ բերեցին «Բայերին» խաղ։ Պատասխան խաղում նորից 2-0 հաշվով հաղթում էր «Քարաբախը», բայց, ի տարբերություն առաջին հանդիպման, «Բայերը» գտել էր մրցակցի հակախաղը ու կարողացավ շատ ավելի մեծ առավելությամբ հասցնել հաշիվը 3-2-ի։

Իսահակ Հինը՝ «Ատալանտայի» թաքնված հերոս

Դուք՝ ընթերցողներդ, հիմա կասեք՝ «ի՞նչ Հին, ի՞նչ նոր։ Կա Ադեմոլա Լուքման, որը հեթ-տրիկ է ձևակերպել»։ Գործնականում չեք սխալվի, բայց մենք փորձել ենք մի փոքր այլ տեսանկյունից նայել հարցին։ Իհարկե, ամեն դիրքում «Ատալանտայի» բոլոր ֆուտբոլիստները թոփ էին, եթե մենք խոսում ենք անհատական պրեսսինգի մասին, բայց Իսահակ Հինն անգերազանցելի էր, քանի որ նա ուներ եռակի բարդ խնդիր։ Հասկանանք՝ ինչու։

Շվեդ պաշտպանը եզրափակիչում ստիպված էր պայքարել 3 մրցակիցների դեմ տարբեր ժամանակահատվածներում։ Սկզբում Հինի մրցակիցը Ադլին էր։ Այնուհետև կենտրոնական գոտի իջավ նոր դեսանտ՝ ի դեմս Ֆլորիան Վիրցի։ Երկրորդ կեսում Հինն արդեն առճակատման էր դուրս եկել Բոնիֆասեի հետ։ Այսինքն՝ միանգամայն 3 տարբեր ֆուտբոլային կերպաներ՝ գերարագ վինգեր, ստեղծագործող հանճար և մաքուր կենտրոնական հարձակվող՝ ֆիզիկական լավ տվյալներով։ Հինը «խժռեց» բոլորին.

• Ադլիի հետ դիմակայության ամենակարևոր գործոնը դարձավ երկար տարածություններում նրա բարձր արագությունը։
• Վիրցի դեմ պայքարը դժվար էր, բայց շվեդ պաշտպանը նրան ստվերի պես հետապնդում էր ու թույլ չէր տալիս արագ կողմնորոշվել ու սրել խաղն իր փոխանցումներով։
• Բոնիֆասեի հետ պայքարում Հինին մնում էր զուտ առավելագույն անհարմարություն ստեղծել՝ թույլ չտալով դեմքով կանգնած դարպասին ընդունել գնդակը։ Հինը միշտ հասնում էր, ստիպում մրցակցին գնդակն ընդունել թիկունքով դարպասին, ինչը զգալիորեն գցում էր խաղի տեմպը։

Շվեդ ֆուտբոլիստը, կարծես, իդեալական պաշտպան է «Ատալանտայի» ֆուտբոլի համար։ Նա եկել է «Վերոնայից», որտեղ նույնպես բարձր են գնահատում անհատական պրեսսինգը: Այս գարնանը նա պարզապես ֆենոմենալ մարզավիճակ է հավաքել։ Եզրափակիչի ճանապարհին նա կարողացել է անջատել այնպիսի դեմքերի, ինչպիսիք են Դարվին Նունյեսն ու Պյեր-Էմերիկ Օբամեյանգը։

Բացի դրանից, նա նրբանկատորեն ընկալում է մրցակցի հարձակվողների  տրամաբանությունը: Բայց այստեղ զարմանալու ոչինչ չկա. մինչև 21 տարեկանը Հինը խաղացել է…հարձակվողի դիրքում, նույնիսկ Շվեդիայի երիտասարդական թիմերում նա հասցրել է խաղալ «Նյուքասլի» հարձակվող Ալեքսանդր Իսակի հետ։ Խաղը գերազանց կարդալու ունակությունը՝ գումարած անհատական պրեսսինգի համար աստվածատուր տվյալները, նրան դարձնում են հրեշ Գասպերինիի համակարգի համար։

Այո, եզրափակիչում եղան նաև այլ հերոսներ՝ Ադեմոլա Լուքմանը հեթ-տրիկ գրանցեց՝ խփելով մեկը մեկից շքեղ գոլեր։ Մասնագետների կարծիքով, առավել քան արժանի է գովեստի խոսքերի հենակետային Էդերսոնը, որը միջին գծում բետոնել էր ամեն ինչ։ Ամբողջ մրցաշրջանի համար արժե հիշատակել Շառլ դե Կետելարեին, որը «Միլանում» խայտառակ ֆեյլելուց հետո եկավ Բերգամո ու անճոռնի ճուտիկից վերածվեց չքնաղագեղ կարապի՝ դառնալով թիմի առանցքային ֆուտբոլիստը միջին ու հարձակման գծում։

Բայց այս ամենը երբեք ու երբեք չէր լինի առանց Ջան Պիերո Գասպերինիի։ Նրա մասին դեռ առանձին հոդված լույս կտեսնի, բայց այս պահին արժանին մատուցենք 66 տարեկան ծերուկին, որը համբերատար գտնվեց, 8 տարվա ընթացքում ստեղծեց այս «Ատալանտան», հաղթահարեց բոլոր խնդիրները, հասավ ՉԼ քառորդ եզրափակիչ, քիչ էր մնում անցներ ՊՍԺ-ին։ Հենց Գասպերինին «Ատալանտան» դարձրեց Ա սերիայի թոփ թիմ։ Ժամանակին «Ատալանտան» համարվում էր Ապենինյան թերակղզու համեստ ու միջակ ակումբ, իսկ հիմա այն բրենդ է, որը պատմություն կերտեց ու Լևերկուզենից ժամանած հերոսներին ու մեզ բոլորիս ապացուցեց մի պարզ ճշմարտություն՝  լավից լավը կա, ամենալավից ամենալավն էլ կա։

Ռոբերտ Գասպարյան

«Ատալանտայի» գլխավոր մարզիչ Ջան Պիերո Գասպերինին ստացել է 2019/20 մրցաշրջանի «Ոսկե նստարան» մրցանակակիր: Այդ մասին հայտնում է ակումբի մամուլի ծառայությունը։

Մրցանակը շնորհվում է Ա Սերիայի լավագույն մարզչին ՝ հիմնվելով լիգայի բոլոր գլխավոր մարզիչների միջև քվեարկության վրա: Հարկ է նշել, որ Գասպերինին այս մրցանակը ստացել էր նաև 2018/19 մրցաշրջանի ավարտին:

«Ատալանտայի» գլխավոր մարզիչ Ջան Պիերո Գասպերինին կիսվել է Չեմպիոնների լիգայի 1/8 եզրափակչի «Ռեալի» դեմ պատասխան խաղում իր սպասելիքներից:

«Մեծամտություն կլինի,  եթե ասեմ, որ մենք կարող ենք հաղթել «Ռեալին»: Մենք կսպասենք մինչև խաղադաշտ դուրս գանք, իսկ հետո կտեսնենք, թե ինչպես շարունակենք: Մենք ցանկանում ենք հիանալի խաղ անցկացնել, և հուսով եմ, որ դա բավական կլինի մրցաշարի պատմության մեջ ամենահաջողակ ակումբներից մեկի դեմ:

Չեմպիոնների լիգայի այս մրցաշրջանը շատ բարդ է, բայց մենք անցել ենք ավելի բարդ խմբից, քան նախորդ տարի՝ վաստակելով 11 միավոր:

Բայց մենք դեռ կարող ենք ավելի առաջ գնալ: Մենք ցանկանում ենք լավ խաղալ», — մեջբերում է Գասպերինիին ՈւԵՖԱ-ի պաշտոնական կայքը:

«Ռեալ»-«Ատալանտա» հանդիպումը կկայանա այսօր։ Հանդիպման մեկնարկը՝ Երևանի ժամանակով ուղիղ կեսգիշերին։

Adjarabet բուքմեյքերական ընկերությունը «Ռեալի» հաղթանակը գնահատում է 2,15 գործակցով , ոչ ոքին՝ 3,75 իսկ «Ատալանտայի» հաղթանակը՝ 3,45։