Պատսոն Դակա — Armsport.am

🎥 Պաշտոնական․ Լեսթերը նոր հարձակվող ունի

Վարուժան Բաբայան — Wed, 30 Jun 2021 10:41:36 +0000

«Զալցբուրգի» հարձակվող Պաթսոն Դական տեղափոխվել է «Լեսթեր»: Ֆուտբոլիստը պայմանագիր է կնքել անգլիական ակումբի հետ մինչև 2026 թվականը:

2020/21 մրցաշրջանում Դական «Զալցբուրգի» կազմում անցկացրել է 42 հանդիպում բոլոր մրցաշարերում ՝ դառնալով 34 գոլի ու 12 գոլային փոխանցման հեղինակ: Հարձակվողը 27 գոլով դարձավ Ավստրիայի առաջնության լավագույն ռմբարկու:

Տրանսֆերի գումարը կազմել է մոտ 30 միլիոն ֆունտ:

Լեսթերը ձեռք կբերի Ավստրիայի առաջնության լավագույն ռմբարկուին

Erik — Fri, 18 Jun 2021 07:26:33 +0000

«Ռեդ Բուլ Զալցբուրգի» հարձակվող Պատսոն Դական կդառնա «Լեսթերի» խաղացող։ Այս մասին հաղորդում է լրագրող Ֆաբրիցիո Ռոմանոն։

Աղբյուրի տեղեկացմամբ՝ կողմերը համաձայնության են հասել։ Տրանսֆերի մասին պաշտոնապես կհայտարարվի մյուս շաբաթ։

Ինչպես հաղորդում էին ԶԼՄ-ները՝ ֆուտբոլիստին հավակնում էին նաև «Լիվերպուլը», «Չելսին» ու «ՌԲ Լայպցիգը»։

Նախորդ մրցաշրջանում 22-ամյա զամբիացի հարձակվողը դարձել է Ավստրայի առաջնության լավագույն ռմբարկու։ Նրա ակտիվում «Զալցբուրգի» կազմում բոլոր մրցաշարերի 42 խաղում 34 գոլ ու 12 արդյունավետ փոխանցում կա։

Ռոման և մի շարք գրանդ ակումբներ ցանկանում են ձեռք բերել Զալցբուրգի հարձակվողին

Վարուժան Բաբայան — Tue, 23 Mar 2021 11:28:56 +0000

Լրագրող Նիկոլո Շիրան հայտնում է, որ «ՌԲ Զալցբուրգի» հարձակվող Պատսոն Դական հետաքրքրել է միանգամից մի քանի եվրոպական բարձրակարգ ակումբների:

Այս մրցաշրջանում 22-ամյա ֆուտբոլիստը 20 գոլ է խփել Ավստրիայի առաջնության 18 խաղում:

Ըստ աղբյուր ՝ հարձակվողով ներկայումս հետաքրքրված են «Լիվերպուլը», «Սևիլիան», «Ռոման» ու «ՌԲ Լայպցիգը»:

Ավելի վաղ լուրեր էին շրջանառվում նաև խաղացողի նկատմամբ «Ման Սիթիի» հետաքրքրության մասին:

Լիվերպուլը ցանկանում է ձեռք բերել Զալցբուրգի ռմբարկուին

Վարուժան Բաբայան — Thu, 03 Sep 2020 10:52:07 +0000

«Լիվերպուլը» մոտ է «Զալցբուրգի» հարձակվող Պատսոն Դակայի տրանսֆերը ձեռք բերելուն:

Ըստ teamTALK-ի, «կարմիրների» ղեկավարությունը տպավորված էր 21-ամյա զամբիացի հարձակվողի խաղից՝ ակումբների միջև կայացած ընկերական խաղում (2-2), որը կայացավ օգոստոսի վերջին Ավստրիայում:

Դական անցյալ մրցաշրջանում Ավստրիայի առաջնությունում դարձել էր Էրլինգ Հոլանդի լիարժեք փոխարինող և 31 խաղում կարողացել է 24 գոլ խփել և վեց գոլային փոխանցում կատարել:

Հարձակվողի գործող պայմանագրի ժամկետը լրանում է 2024 թվականին, ինչը նշանակում է, որ «Լիվերպուլը» ստիպված կլինի վճարել առնվազն խաղացողի շուկայական տրանսֆերային արժեքը, որը ներկայումս հասնում է 20 միլիոն եվրոյի:

Զալցբուրգի ռմբարկուն՝ Լիլի դիտակետում

Վարուժան Բաբայան — Wed, 22 Jul 2020 13:47:00 +0000

Ավստրիական Բունդեսլիգայում 24 գոլով և 8 գոլային փոխանցումով աչքի ընկած «ՌԲ Զալցբուրգի» հարձակվող Պատսոն Դական հայտնվել թոփ լիգաների մի շարք ակումբների ուշադրության կենտրոնում: Այդ մասին հայտնում է Transfermarkt-ը։

Այն բանից հետո, երբ ավստրիական ակումբի հետ կապվնել են Մյունխենգլադբախի «Բորուսիայի» ներկայացուցիչները, «ՌԲ Զալցբուրգը» ստացել է կոնկրետ առաջարկ նաև ֆրանսիական «Լիլից», որը 30 միլիոն եվրո է առաջարկել զամբիացի հարձակվողի համար։

«ՌԲ Զալցբուրգը» մերժել է առաջարկը, սակայն ակնկալվում է, որ «Լիլը» էլ ավելի գրավիչ առաջարկ կանի այն բանից հետո, երբ նրանք «Նապոլիին» վաճառեն Վիկտոր Օսիմենին:

Ֆուտբոլային սկաուտ․ Այս հիանալի Զալցբուրգը․․․

Վարուժան Բաբայան — Mon, 18 May 2020 08:45:00 +0000

Սադիո Մանե, Նաբի Կեյտա, Տակումի Մինամինո, Էրլինգ Հոլանդ․․․ այս ցուցակը կարելի է դեռ երկար շարունակել։ Ավստրիական գրանդը վերջին տարիներին դարձել է թոփ լիգաներին ֆուտբոլիստներ մատակարարող գլխավոր ակումբներից մեկը։ Եվ չնայած մի քանի առաջատարներ հեռացան թիմից վերջին տրանսֆերային պատուհանի ժամանակ, միևնույնն է, այս թիմում դեռ կան ևս մի քանի հեռանկարային, տաղանդավոր ֆուտբոլիստներ, որոնց մենք շուտով ևս կտեսնենք թոփ ակումբներում։

Կորեացի կիսապաշտպան Հի Չան Հվանին և ճապոնացի կիսապաշտպան Մասայա Օկուգավային մենք արդեն Ձեզ ծանոթացրել ենք Ֆուտբոլային սկաուտի նախորդ մասերում։ Իսկ այժմ առաջարկում ենք ծանոթանալ թիմի մյուս հեռանկարային ֆուտբոլիստներին․․․

Էնոք Մվեպու

🇿🇲 Զամբիա
«Զալցբուրգ»
22 տարեկան

Զամբիացի ֆուտբոլիտն ինչ-որ տեղ հիշեցնում է թիմի նախկին կիսապաշտպան Նաբիլ Կեյտային։ Մվեպուն բավականին հաջող հանդես է գալիս կիսապաշտպանության կենտրոնում և բացի մրցակցի գրոհները խափանելուց, նա կարողանում է հաջողությամբ սկսել իր թիմի գրոհները։ Նա օժտված է խաղադաշտը լավ տեսնելու ունակությամբ, ունի հղկված տեխնիկա և աչքի է ընկնում որակյալ խաղով։ Մվեպուն կարող է հանդես գալ ինչպես իր հարազատ հենակետային կիսապաշտպանի դիրքում, այնպես էլ՝ առաջ քաշված կամ աջ կիսապաշտպանի։ Բազմաֆունկցիոնալությունը դարձնում է այս ֆուտբոլիստին է՛լ ավելի արժեքավոր։

Ժերոմ Օնգուենե

🇨🇲 Կամերուն
«Զալցբուրգ»
22 տարեկան

Կամերունացի պաշտպանը ֆրանսիական «Սոշոյի» սան է, ով հանդես է եկել նաև գերմանական «Շտուտգարտի» երիտասարդական թիմում։ Գերմանական ակումբում նրա հետ հույսեր չէին կապում, և նա 2018-ին տեղափոխվեց «Զալցբուրգ»՝ 2 մլն եվրոյի դիմաց։ Այս ժամանակահատվածում աֆրիկացի ֆուտբոլիստը կարողացավ ամրապնդվել ավստրիական թիմի կազմում և այժմ հանդիսանում է թիմի առանցքային ֆուտբոլիստներից մեկը՝ պարբերաբար հրավիրվելով նաև Կամերունի ազգային հավաքական։ Ներկայումս Ժերոմի ծառայություններով հետաքրքրված են գերմանական և անգլիական մի շարք ակումբներ, և շուտով մենք նրան կարող ենք տեսնել մեր սիրելի լիգաներից որևէ մեկում։

Սեկու Կոյտա

🇲🇱 Մալի
«Զալցբուրգ»
20 տարեկան

Սեկուն իր հերթին հիշեցնում է Սադիո Մանեին․ նա հանդես է գալիս հարձակման եզրերում, հաճախ էլ «10 համարի» դիրքում՝ խաղալով միակ առաջ քաշված հարձակվողի թիկունքում։ Իսկ հարկ եղած դեպքում, Կոյտան կարող է հանդես գալ որպես կենտրոնական հարձակվող։ Ֆուտբոլիստն այս մրցաշրջանից առաջ է համալրել «Զալցբուրգի» կազմը, իսկ նախորդ մրցաշրջանում նա հանդես էր գալիս ավստրիական «Վոլֆսբերգերում»։ Մալիացի ֆուտբոլիստը աչքի է ընկնում արագությամբ և բավականին լավ տեխնիկայով և կորեացի Չանի հետ միասին հանդիսանում է թիմի գլխավոր շարժիչ ուժերից մեկը։

Դոմինիկ Սոբոսլաի

🇭🇺 Հունգարիա
«Զալցբուրգ»
19 տարեկան

Հունգարիայի հավաքականի կիսապաշտպանը ներկայիս «Զալցբուրգի» ամենահեռանկարային ֆուտբոլիստներից է, ում ծառայություններով արդեն իսկ հետաքրքրված են մի քանի գրանդ ակումբներ, այդ թվում՝ «Լիվերպուլը» և «Միլանը»։ Իր տարիքի համար բավականին հասուն խաղ ցուցադրող ֆուտբոլիստը հայրենիքում համարվում է հունգարական ֆուտբոլի ապագան, ազգային հավաքականի ապագա առաջատարն ու աստղը։ Եվ այժմ, հետևելով այս երիտասարդի կարիերային, կարելի է համաձայնվել հունգարացիների կանխատեսումներին․ ևս մեկ-երկու մրցաշրջան այսպիսի ֆուտբոլ ցուցադրելու դեպքում, մենք ականատես կլինենք նոր աստղի վերելքին ֆուտբոլային երկնակամարում․․․

Պատսոն Դակա

🇿🇲 Զամբիա
«Զալցբուրգ»
21 տարեկան

Արդեն երկրորդ զամբիացի ֆուտբոլիստը մեր ցուցակում։ Երբ Հոլանդն այս ձմեռ հեռացավ «Զալցբուրգից», թիմի շատ երկրպագուների առաջին հերթին հուզում էր մի հարց՝ ո՞վ է լինելու թիմի գլխավոր գոլահարը և արդյո՞ք ինչ-որ մեկը կարող է նման արդյունավետությամբ փայլել: Եվ ի ուրախություն ավստրիական գրանդի երկրպագուների՝ այդպիսի ֆուտբոլիստ գտնվեց։ Պատսոն Դական այս մրցաշրջանում անցկացրած 21 խաղերում արդեն դարձել է 17 գոլի հեղինակ․ հոլանդաստիկ ցուցանիշ է, չէ՞։ Արագություն, ֆիզիկական հիանալի պատրաստվածություն, լավ տեխնիկա, գոլային հոտառություն․․․ Այս ֆուտբոլիստն ամեն ինչ ունի՝ երիտասարդ վիկինգի ուղին կրկնելու համար։ Մնում է միայն շարունակել նման արդյունավետությամբ գործել և քրտնաջան աշխատել՝ հղկելու համար որոշ ֆուտբոլային ասպեկտներ, և մենք շուտով ականատես կլինենք ևս մեկ սուպերհարձակվողի համար տարվող համառ պայքարին՝ եվրոպական գրանդ ակումբների մասնակցությամբ․․․

Վար Բաբայան

Շարքի նախորդ մասերը

Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր

Ֆրանսիայի առաջնության գլխավոր բացահայտումները

Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Քեյ-ֆուտբոլի (K-Football) ակնկալիքով

Երիտասարդ աղվեսների ոդիսականը շարունակվում է

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)