Լոնդոնի «Չելսին» պաշտոնական հայտարարությամբ է հանդես եկել՝ մանրամասներ հայտնելով թիմի արգենտինացի դարպասապահ Էմիլիանո Մարտինեսի առողջական վիճակի վերաբերյալ։ Ֆուտբոլիստը լուրջ վնասվածք էր ստացել Անգլիայի Պրեմիեր լիգայի 7-րդ տուրի՝ «Էվերթոնի» դեմ հաղթական հանդիպման ընթացքում (2:0):

Միջադեպը տեղի է ունեցել հոկտեմբերի 17-ին՝ «Հիլ Դիքինսոն» մարզադաշտում կայացած խաղի երկրորդ խաղակեսի միջնամասում։ Մարտինեսը ծանր բախվել է մրցակցի պաշտպան Ջարադ Բրանթուեյթին, ինչից հետո չի կարողացել շարունակել հանդիպումը. արգենտինացի դարպասապահին խաղադաշտից հեռացրել են պատգարակով։

Ֆուտբոլիստն անմիջապես տեղափոխվել է հիվանդանոց՝ խորացված հետազոտության, որի արդյունքում նրա մոտ ախտորոշվել է վիրահատական միջամտություն պահանջող ծնոտի կոտրվածք։

«Դարպասապահ Էմիլիանո Մարտինեսը ծնոտի կոտրվածքից հետո բարեհաջող վիրահատության է ենթարկվել։ «Չելսիում» բոլորը Էմիին մաղթում են շուտափույթ ապաքինում և կաջակցեն նրան վերականգնման ողջ ընթացքում», — ասված է «կապույտների» մամուլի ծառայության տարածած հաղորդագրության մեջ։

Հիշեցնենք, որ 34-ամյա Էմիլիանո Մարտինեսը լոնդոնյան ակումբի գույները պաշտպանում է 2026 թվականի օգոստոսից։ Նմանատիպ վնասվածքների պատճառով վերականգնման համար նվազագույնը անհրաժեշտ է լինում մոտ 4-ից 6 շաբաթ։

Անգլիական Պրեմիեր լիգայի 2026/27 մրցաշրջանի 7-րդ տուրում Լոնդոնի «Չելսին» հյուրընկալվելիս 2:0 հաշվով հաղթանակ տարավ «Էվերթոնի» նկատմամբ, սակայն հանդիպումը մթագնեց հյուրերի դարպասապահ Էմիլիանո Մարտինեսի ստացած ծանր վնասվածքով։

Լիվերպուլի «Հիլ Դիքինսոն» մարզադաշտում՝ 52 271 հանդիսականի ներկայությամբ կայացած խաղի հիմնական իրադարձությունները ծավալվեցին ընդմիջումից հետո։ Երկրորդ խաղակեսի մեկնարկում՝ 46-րդ րոպեին, «կապույտների» պորտուգալացի վինգեր Պեդրու Նետուն դիպուկ հարվածով բացեց հանդիպման հաշիվը։ Խաղավերջում՝ 90-րդ րոպեին, նույն Նետուն ձևակերպեց դուբլ՝ դնելով հանդիպման վերջակետը։ Խաղը սպասարկում էր Փոլ Թիրնիի գլխավորած մրցավարական անձնակազմը։

Հանդիպման ամենադրամատիկ դրվագը գրանցվեց երկրորդ խաղակեսի միջնամասում։ Դարպասային հրապարակում «Էվերթոնի» պաշտպան Ջարեդ Բրենթուեյթի հետ բախման հետևանքով «Չելսիի» դարպասապահ Էմիլիանո Մարտինեսը գլխի սարսափելի վնասվածք ստացավ։

Աշխարհի 2022 թվականի չեմպիոնը չկարողացավ շարունակել հանդիպումը. 75-րդ րոպեին նրան տրիբունաների ծափահարությունների ներքո դաշտից դուրս բերեցին պատգարակով, իսկ նրա փոխարեն խաղի մեջ մտավ Մայք Պենդերսը։

Հիշեցնենք, որ արգենտինացի դարպասապահը լոնդոնյան ակումբ է տեղափոխվել անցած ամառ։ Այս ընթացքում Մարտինեսը բոլոր մրցաշարերում մասնակցել է 6 հանդիպման՝ դրանցից մեկում անառիկ պահելով սեփական դարպասը։ Ֆուտբոլիստի գործող պայմանագիրը «Չելսիի» հետ նախատեսված է մինչև 2029 թվականի ամառը, իսկ Transfermarkt պորտալը նրա տրանսֆերային արժեքը գնահատում է 10 մլն եվրո։

Տեսանյութը՝ ԱՅՍՏԵՂ

Մրցաշարային աղյուսակն այս պահին

Շվեդիայի հավաքականի լեգենդար նախկին հարձակվող Զլատան Իբրահիմովիչը կանխատեսել է եվրոպական մի շարք խոշոր մրցաշարերի հաղթողներին, ինչպես նաև նշել է, թե ով կարժանանա տարվա լավագույն խաղացողի կոչմանը։

Շվեդ լեգենդար հարձակվողի կանխատեսումն է մեջբերում The Touchline պարբերականը՝ հղում անելով ESPN-ին։

Ըստ Իբրահիմովիչի՝ Անգլիայի Պրեմիեր լիգայի չեմպիոն կդառնա «Մանչեսթեր Սիթին», երկրի գավաթը կնվաճի «Չելսին», իսկ Իսպանիայի Լա լիգայում և Չեմպիոնների լիգայում հաղթող կճանաչվի կատալոնական «Բարսելոնան»։

Ինչ վերաբերում է ֆուտբոլային աշխարհի գլխավոր անհատական մրցանակին, ապա Զլատանը համոզված է, որ «Ոսկե գնդակը» կստանա «Բարսելոնայի» և Իսպանիայի ազգային հավաքականի 19-ամյա հարձակվող Լամին Յամալը։

Հիշեցնենք, որ «Ոսկե գնդակի» հանձնման հանդիսավոր արարողությունը կկայանա հոկտեմբերի 26-ին՝ Լոնդոնում։ Նախորդ տարի մրցանակին արժանացել էր Ուսման Դեմբելեն, իսկ Լամին Յամալը քվեարկության արդյունքներով զբաղեցրել էր երկրորդ հորիզոնականը։

Անգլիայի Պրեմիեր լիգայի 2026/27 մրցաշրջանի 6-րդ տուրում Լոնդոնի «Չելսին» «Սթեմֆորդ Բրիջ» մարզադաշտում հյուրընկալել էր «Բորնմութին» և ջախջախիչ հաղթանակ տարավ 5:1 հաշվով։

Տանտերերը շոկային մեկնարկ ապահովեցին հյուրերի համար. արդեն 2-րդ րոպեին 36-ամյա Ջորդան Հենդերսոնը բացեց խաղի հաշիվը, իսկ ընդամենը մեկ րոպե անց Մորգան Ռոջերսը կրկնապատկեց «ազնվականների» առավելությունը։

Երկրորդ խաղակեսի հենց սկզբում՝ 46-րդ րոպեին, Ժոաո Պեդրոն խփեց լոնդոնցիների երրորդ գնդակը։ Թեև 51-րդ րոպեին Էվանիլսոնին հաջողվեց կրճատել հաշվի տարբերությունը, «Չելսին» կանգ չառավ։ 67-րդ և 70-րդ րոպեներին Պեդրոն ու Հենդերսոնը համապատասխանաբար ձևակերպեցին իրենց դուբլերը՝ դնելով հանդիպման վերջակետը։

Այս հաղթանակից հետո «Չելսին» վաստակեց 10 միավոր և բարձրացավ Պրեմիեր լիգայի մրցաշարային աղյուսակի 5-րդ հորիզոնական։ «Բորնմութը» 3 միավորով 17-րդ տեղում է։

Տեսանյութը՝ ԱՅՍՏԵՂ

Անգլիայի Պրեմիեր լիգայի մրցաշարային աղյուսակն այս պահին

Լոնդոնի «Չելսիի» նախկին կիսապաշտպան Ֆրենկ Լեմպարդը վերհիշել է «ազնվականների» փառահեղ ժամանակաշրջանը, երբ ակումբի սեփականատերը ռուս միլիարդատեր Ռոման Աբրամովիչն էր։

«Ես լոնդոնյան թիմի կազմում հանդես եմ եկել 13 տարի։ Երբ ակումբ եկավ Աբրամովիչը, բոլորը պնդում էին, թե մենք պարզապես գնել ենք չեմպիոնական տիտղոսը։ Բայց իրականում մենք պետք է խաղադաշտում հաղթեինք «Մանչեսթեր Յունայթեդին», որի կազմում հանդես էին գալիս Ռունին, Սքոուլզը, Բեքհեմը և այլ մեծագույն աստղեր։

Երբ դուրս ես գալիս խաղադաշտ, մտածում ես բացառապես հաղթանակի մասին։ Եվ մեզ հաջողվեց դա անել «Չելսիում»», — անգլիացու խոսքերն է մեջբերում The Athletic-ը։

Հիշեցնենք, որ «Չելսիի» մարզաշապիկով Լեմպարդը երեք անգամ դարձել է Անգլիայի Պրեմիեր լիգայի չեմպիոն, չորս անգամ նվաճել երկրի գավաթը և հաղթել ՈւԵՖԱ-ի Չեմպիոնների լիգայում։

Transfermarkt հեղինակավոր պորտալը թարմացրել է Անգլիայի Պրեմիեր լիգայում հանդես եկող մի շարք ֆուտբոլիստների տրանսֆերային արժեքները, ինչից հետո «Մանչեսթեր Սիթին» կազմի ընդհանուր արժեքով հավասարվել է Մադրիդի «Ռեալին»:

Այժմ թե՛ «քաղաքայինների», թե՛ «սերուցքայինների» կազմերը գնահատվում են հավասար՝ 1,5 միլիարդ եվրո, և այս ակումբները կիսում են ցանկի առաջին հորիզոնականը:

Երրորդ տեղը զբաղեցնում է Լոնդոնի «Արսենալը», որի կազմը գնահատվում է 1,38 միլիարդ եվրո: Ամենաթանկարժեք ակումբների լավագույն հնգյակում տեղ են գտել նաև ՊՍԺ-ն (1,36 միլիարդ եվրո) և կատալոնական «Բարսելոնան» (1,3 միլիարդ եվրո):

Աշխարհի լավագույն տասնյակում ընդգրկվել են նաև Լոնդոնի «Չելսին» (1,15 միլիարդ եվրո), «Լիվերպուլը» (1,09 միլիարդ եվրո), Մյունխենի «Բավարիան» (1,04 միլիարդ եվրո), ինչպես նաև «Մանչեսթեր Յունայթեդը» (928,8 միլիոն եվրո) և Լոնդոնի «Տոտենհեմը» (836 միլիոն եվրո):

Իսպանացի հանրահայտ հարձակվող Պեդրո Ռոդրիգեսը հայտարարել է պրոֆեսիոնալ կարիերան ավարտելու մասին։ 39-ամյա ֆուտբոլիստի վերջին ակումբն իտալական «Լացիոն» էր, որի շարքերը նա լքել էր այս ամռանը։

Իր հեռանալու մասին Պեդրոն հայտնել է սոցիալական ցանցերում արված հուզիչ գրառմամբ.

«Զգում եմ, որ ժամանակն է եկել։ Ժամանակն է առաջ քայլ անելու և կյանքիս նոր էջը սկսելու։ Ես հեռանում եմ հպարտությամբ, որ կարողացա երազանքս իրականություն դարձնել, և երախտագիտությամբ եմ լցված բոլոր նրանց հանդեպ, ովքեր իմ կողքին էին ու օգնեցին ինձ այս ճանապարհին։ Շնորհակալ եմ քեզ, ֆուտբո՛լ, ինձ այսքան երջանիկ դարձնելու համար»։

Կատալոնական «Բարսելոնայի» սանը կարող է հպարտանալ ֆանտաստիկ ֆուտբոլային ճանապարհով։ Իր հարուստ կարիերայի ընթացքում հարձակվողը հասցրել է փայլել նաև լոնդոնյան «Չելսիում» և իտալական մեկ այլ ակումբում՝ «Ռոմայում»։

Պեդրոն նվաճել է գրեթե հնարավոր ամեն ինչ և՛ ակումբային, և՛ հավաքականի մակարդակում։ Նա Իսպանիայի հնգակի և Անգլիայի չեմպիոն է, Չեմպիոնների լիգայի եռակի, ինչպես նաև Եվրոպա լիգայի գավաթակիր։ Իսկ Իսպանիայի ազգային հավաքականի կազմում նա դարձել է Աշխարհի (2010) և Եվրոպայի (2012) չեմպիոն:

Ընդհանուր առմամբ, փայլուն կարիերայի ընթացքում Պեդրոն նվաճել է 25 տիտղոս, անցկացրել 794 հանդիպում՝ դառնալով 197 գոլի և 113 գոլային փոխանցման հեղինակ:

Մադրիդի «Ռեալի» պաշտոնական կայքը՝ realmadrid.com-ը, 10-րդ տարին անընդմեջ ճանաչվել է աշխարհի ամենաշատ այցելվող ֆուտբոլային ակումբի կայքը։ Տվյալները ներկայացրել է SimilarWeb վերլուծական ընկերությունը։

Նախորդ մրցաշրջանում «Ռեալի» կայքը միջինում ամսական ունեցել է 8,7 միլիոն այց։ Ընդհանուր առմամբ գրանցվել է 86 միլիոն եզակի օգտատեր, ավելի քան 162 միլիոն սեսիա և 449 միլիոն եզակի էջադիտում։

Կայքի այցելությունների 78%-ը կատարվել է բջջային սարքերով, իսկ այցելուների 28%-ը 25-34 տարեկան օգտատերերն են։ Կայքը հասանելի է ութ լեզվով՝ իսպաներեն, անգլերեն, ֆրանսերեն, գերմաներեն, պորտուգալերեն, ճապոներեն, չինարեն և արաբերեն։

Ամսական միջին այցելությունների ցուցանիշով լավագույն տասնյակում «Ռեալին» հաջորդում են «Լիվերպուլը»՝ 7,9 միլիոն, «Արսենալը»՝ 7,8 միլիոն, «Բարսելոնան»՝ 7,6 միլիոն և «Մանչեսթեր Յունայթեդը»՝ 5,4 միլիոն։

Առաջին տասնյակը հետևյալն է.

1. Ռեալ Մադրիդ՝ ամսական միջինը 8.7 միլիոն այցելություն;
2. Լիվերպուլ՝ 7.9 միլիոն;
3. Արսենալ՝ 7.8 միլիոն;
4. Բարսելոնա՝ 7.6 միլիոն;
5. Մանչեսթեր Յունայթեդ՝ 5.4 միլիոն;
6. Բավարիա՝ 4.8 միլիոն;
7. Չելսի՝ 4.8 միլիոն;
8. Մանչեսթեր Սիթի՝ 3.2 միլիոն;
9. ՊՍԺ՝ 2.7 միլիոն;
10. Ինտեր Միլան՝ 2.6 միլիոն:

«Բարսելոնան» հետևում է «Չելսիի» վինգեր Էստևաո Վիլիանի իրավիճակին։ Այդ մասին հայտնում է Diario Sport-ը։

19-ամյա բրազիլացին դժգոհ է լոնդոնյան ակումբում ստացած խաղաժամանակից։ Ընթացիկ մրցաշրջանի Պրեմիեր լիգայի առաջին հինգ խաղերում Էստևաոն խաղադաշտում անցկացրել է ընդամենը 23 րոպե։

Հաղորդվում է, որ «Բարսելոնայի» մարզական տնօրեն Դեկուն անմիջական տեղեկություններ ունի ֆուտբոլիստի իրավիճակի վերաբերյալ և շարունակում է հետևել զարգացումներին։

Էստևաոյի գործող պայմանագիրը «Չելսիի» հետ նախատեսված է մինչև 2033 թվականի ամառը։ Transfermarkt-ը բրազիլացու տրանսֆերային արժեքը գնահատում է 80 միլիոն եվրո։

Give Me Sport հեղինակավոր պորտալը հրապարակել է աշխարհի լավագույն կենտրոնական հարձակվողների իր նոր վարկանիշային աղյուսակը։

Ցուցակի առաջին հորիզոնականում Մադրիդի «Ռեալի» և Ֆրանսիայի ազգային հավաքականի աստղ Կիլիան Մբապեն է: Երկրորդ տեղը զբաղեցրել է Մյունխենի «Բավարիայի» հարձակվող Հարի Քեյնը, իսկ լավագույն եռյակը եզրափակում է «Մանչեսթեր Սիթիի» ռմբարկու Էրլինգ Հալանդը:

Լավագույն տասնյակում հաջորդաբար տեղ են գտել նաև Ուսման Դեմբելեն (ՊՍԺ), Խուլիան Ալվարեսը («Ատլետիկո Մադրիդ»), Լաուտարո Մարտինեսը («Ինտեր»), Վիկտոր Օսիմհենը («Գալաթասարայ»), Ժոաո Պեդրոն («Չելսի»), Ալեքսանդր Իսակը («Լիվերպուլ») և Մարկուս Թյուրամը («Ինտեր»):

Հիշոցնենք, որ 2025/26 մրցաշրջանում Եվրոպայի ոսկե խաղակոշիկը՝ որպես մայրցամաքի լավագույն ռմբարկու, նվաճել է Մյունխենի «Բավարիայի» և Անգլիայի հավաքականի հարձակվող Հարի Քեյնը։   Գերմանական Բունդեսլիգայի նախորդ խաղարկությունում նա դարձել է 36 գոլի հեղինակ՝ այս արդյունքին հասնելու համար անցկացնելով 31 հանդիպում