Դանիացի հարձակվող Ռասմուս Հոյլունդը վերջնականապես հեռացել է «Մանչեսթեր Յունայթեդից» և մշտական հիմունքներով համալրել իտալական «Նապոլիի» շարքերը։ Այս տրանսֆերի մասին պաշտոնապես հայտարարել է անգլիական ակումբի մամուլի ծառայությունը։

​Ավարտված մրցաշրջանը հարձակվողն արդեն իսկ անցկացրել էր նեապոլյան թիմում՝ վարձակալական հիմունքներով։ Այդ ընթացքում նա բոլոր մրցաշարերում հասցրել է մասնակցել 44 հանդիպման՝ դառնալով 16 գոլի հեղինակ և ամրապնդելով իր դիրքերը իտալական ակումբում։

​Ավելի վաղ եվրոպական մամուլում շրջանառվող տեղեկությունների համաձայն՝ «Նապոլին» ֆուտբոլիստի լիարժեք տրանսֆերի դիմաց կվճարի շուրջ 44 միլիոն եվրո։

​Հիշեցնենք, որ Հոյլունդը «Մանչեսթեր Յունայթեդ» էր տեղափոխվել 2023 թվականի ամռանը՝ իտալական «Ատալանտայից»։ Մանկունիացիների կազմում անցկացրած երկու մրցաշրջանների ընթացքում հարձակվողն ընդհանուր առմամբ մասնակցել է 95 հանդիպման՝ դառնալով 26 գոլի հեղինակ։

«Նապոլին» վերջնականապես հրաժեշտ տվեց թիմի գլխավոր մարզիչ Անտոնիո Կոնտեին։ Նեապոլյան ակումբի սոցիալական ցանցերի պաշտոնական էջերում հրապարակվել է ժպտացող մասնագետի լուսանկարը՝ «Շնորհակալություն, միստեր» գրառմամբ։

Կողմերի համագործակցության դադարեցման մասին ավելի վաղ հայտարարվել էր ակումբի նախագահ Աուրելիո Դե Լաուրենտիսի հետ կայացած համատեղ ասուլիսի ժամանակ։

Ինչպես փոխանցում է հեղինակավոր La Gazzetta dello Sport պարբերականը, իտալացի մասնագետը հաստատել է, որ պաշտոնը լքելու որոշումն անձամբ է կայացրել։ Կոնտեի խոսքով՝ ինքը չի կարողացել հասնել թիմային համախմբվածության և հոգնել է ակումբի շուրջ տիրող «թունավոր» մթնոլորտից։

Չնայած այս բարդություններին՝ թիմը կարողացել է մրցաշրջանն ավարտել մրցաշարային աղյուսակի երկրորդ հորիզոնականում։ Հատկանշական է, որ ընդամենը մեկ տարի առաջ հենց Կոնտեն էր «Նապոլիին» առաջնորդել դեպի բաղձալի չեմպիոնական տիտղոսը։

Ակնկալվում է, որ մոտ ժամանակներս «Նապոլին» կհայտարարի նոր գլխավոր մարզչի անունը։ Ներկայումս այդ պաշտոնի համար որպես գլխավոր թեկնածու շրջանառվում է «Բոլոնիան» գլխավորող Վինչենցո Իտալյանոյի անունը։ Բացի այդ, ակումբի ղեկավարությունն ուսումնասիրում է նաև Մասիմիլիանո Ալեգրիի և Անդոնի Իրաոլայի տարբերակները։

Հայտնի են դարձել Չեմպիոնների լիգայի 2026/27 մրցաշրջանի ընդհանուր փուլի 29 մասնակիցները։ Լիգայի փուլում ամենաշատ ներկայացուցիչներ կունենան Անգլիան և Իսպանիան՝ 5-ական ակումբով։

• Անգլիա. «Արսենալ», «Մանչեսթեր Սիթի», «Մանչեսթեր Յունայթեդ», «Ասթոն Վիլա», «Լիվերպուլ»։
• Իսպանիա. «Բարսելոնա», «Ռեալ», «Վիլյառեալ», «Ատլետիկո», «Բետիս»։
• Իտալիա. «Ինտեր», «Նապոլի», «Ռոմա», «Կոմո»։
• Գերմանիա. «Բավարիա», Դորտմունդի «Բորուսիա», «Լայպցիգ», «Շտուտգարտ»։
• Ֆրանսիա. ՊՍԺ, «Լանս», «Լիլ»։
• Նիդերլանդներ. ՊՍՎ, «Ֆեյենորդ»։
• Պորտուգալիա. «Պորտու», «Սպորտինգ»։
• Բելգիա. «Բրյուգե»։
• Չեխիա. «Սլավիա»։
• Թուրքիա. «Գալաթասարայ»։
• Ուկրաինա. «Շախտյոր»։

Ընդհանուր առմամբ՝ Չեմպիոնների լիգայի 2026/27 մրցաշրջանի լիգայի փուլում հանդես կգա 36 թիմ։ ՉԼ-ի մնացած 7 ուղեգրերը կխաղարկվեն որակավորման փուլերում, որոնք կանցկացվեն ամռանը։ Մրցաշարի հիմնական փուլը կմեկնարկի 2026 թվականի սեպտեմբերի 8-ին և կեզրափակվի 2027-ի հունվարի 27-ին։

Հիշեցնենք, որ Չեմպիոնների լիգայի ընթացիկ մրցաշրջանի հաղթողը հայտնի կդառնա մայիսի 30-ին՝ ՊՍԺ — «Արսենալ» եզրափակիչ դիմակայությունում։ Հանդիպումը կկայանա Բուդապեշտի «Պուշկաշ Արենա» մարզադաշտում։

Իտալական Ա Սերիայի 2025/2026 մրցաշրջանի եզրափակիչ՝ 38-րդ տուրում «Նապոլին» սեփական հարկի տակ՝ «Դիեգո Արմանդո Մարադոնա» մարզադաշտում, 1:0 հաշվով հաղթանակ տարավ «Ուդինեզեի» նկատմամբ։

Հանդիպման միակ և հաղթական գոլը 24-րդ րոպեին հեղինակեց դաշտի տերերի հարձակվող Ռասմուս Հոյլունդը։ Երկրորդ խաղակեսում՝ 64-րդ րոպեին, հյուրերի պաշտպան Քրիստիան Կաբասելեն կարմիր քարտ ստացավ և հեռացվեց խաղադաշտից։

Այսպիսով, մրցաշրջանի վերջնարդյունքում «Նապոլին» վաստակեց 76 միավոր և գրավեց երկրորդ հորիզոնականը, իսկ «Ուդինեզեն» 50 միավորով զբաղեցրեց մրցաշարային աղյուսակի 10-րդ հորիզոնականը։

Տեսանյութը՝ ԱՅՍՏԵՂ

Մրցաշարային աղյուսակն այս պահին

Իտալիայի Ա Սերիայի 2025/26 մրցաշրջանի նախավերջին՝ 37-րդ տուրում գրանցվեցին անսպասելի արդյունքներ, որոնք էապես փոխեցին մրցաշարային աղյուսակի վերին հատվածի դասավորությունը՝ հատկապես Չեմպիոնների լիգայի գոտում:

Տուրի գլխավոր անակնկալներից մեկը գրանցվեց Թուրինում, որտեղ «Յուվենտուսը» «Ալյանց Ստադիումում» 0:2 հաշվով պարտություն կրեց «Ֆիորենտինայից»: Հյուրերի կազմում աչքի ընկան Շեր Նդուրը և Ռոլանդո Մանդրագորան: Այս պարտության հետևանքով թուրինցիները 68 միավորով 3-րդ հորիզոնականից նահանջեցին միանգամից 6-րդ տեղ:

«Յուվենտուս» — «Ֆիորենտինա» [Տեսանյութ]

«Բիանկոներիների» սայթաքումից լավագույնս օգտվեց «Ռոման», որը հռոմեական կրքոտ դերբիում 2:0 հաշվով պարտության մատնեց «Լացիոյին»: Հանդիպման հերոս դարձավ Ջանլուկա Մանչինին՝ ձևակերպելով դուբլ: Խաղն ավարտվեց բավականին նյարդային մթնոլորտում. 70-րդ րոպեին երկու թիմերն էլ մնացին տասը հոգով՝ ոչ մարզական պահվածքի համար հեռացվեցին Ուեսլին («Ռոմա») և Նիկոլո Ռովելան («Լացիո»): Տոնելով 4-րդ անընդմեջ հաղթանակը՝ «Ռոման» 70 միավորով բարձրացավ 4-րդ հորիզոնական՝ մտնելով Չեմպիոնների լիգայի գոտի: «Լացիոն» 51 միավորով 9-րդն է:

«Ռոմա» — «Լացիո» [Տեսանյութ]

«Միլանն» արտագնա խաղում 2:1 հաշվով կամային հաղթանակ կորզեց «Ջենոայի» նկատմամբ: Միլանցիների կազմում գոլերի հեղինակ դարձան Քրիստոֆեր Նկունկուն (11-մետրանոցից) և Զաքարի Ատեկամեն, իսկ դաշտի տերերի միակ գնդակը խփեց Յոհան Վասկեսը: Այս հաղթանակը թույլ տվեց «ռոսոներիներին» վաստակել 70 միավոր և բարձրանալ 3-րդ հորիզոնական:

«Ջենոա» — «Միլան» [Տեսանյութ]

ՉԼ ուղեգրի համար պայքարը շարունակում է նաև «Կոմոն», որը սեփական հարկի տակ Ալբերտո Մորենոյի միակ գոլի շնորհիվ կոտրեց «Պարմայի» դիմադրությունը (1:0) և 68 միավորով այժմ զբաղեցնում է 5-րդ հորիզոնականը:

«Կոմո» — «Պարմա» [Տեսանյութ]

Մրցաշարային աղյուսակի երկրորդ հորիզոնականում ամրապնդված «Նապոլին» արտագնա խաղում 3:0 հաշվով վստահորեն հաղթեց հետնապահ «Պիզային»: Նեապոլցիների կազմում գոլերով աչքի ընկան Սքոթ Մաքթոմինայը, Ամիր Ռահմանին և Ռասմուս Հոյլունդը:

«Պիզա» — «Նապոլի» [Տեսանյութ]

Այս հանդիպումից հետո հստակեցվեց նաև վտանգավոր գոտու ճակատագիրը. 23-րդ պարտությունը կրած «Պիզան» (18 միավոր) վերջնականապես կորցրեց Ա Սերիայում տեղը պահպանելու բոլոր հնարավորությունները և «Վերոնայի» հետ միասին լքեց Իտալիայի բարձրագույն դիվիզիոնը:

Մրցաշարի վերջին՝ 38-րդ տուրի հանդիպումները կկայանան մայիսի 24-ին:

Վերջին տուրի առանցքային խաղերը.

• «Վերոնա» – «Ռոմա»
• «Տորինո» – «Յուվենտուս»
• «Նապոլի» – «Ուդինեզե»
• «Լացիո» – «Պիզա»
• «Ֆիորենտինա» – «Ատալանտա»

Իտալիայի առաջնության 36-րդ տուրի վերջին խաղում «Նապոլին» սեփական հարկի տակ գոլառատ և դրամատիկ խաղում զիջեց «Բոլոնիային» (2-3):

Հյուրերի կազմում արդեն 9-րդ րոպեին հաշիվը բացեց Ֆեդերիկո Բերնարդեսկին, իսկ 34-րդ րոպեին Ռիկարդո Օրսոլինին անվրեպ իրացրեց 11 մետրանոց հարվածը՝ կրկնապատկելով «Բոլոնիայի» առավելությունը:

Առաջին խաղակեսի ավելացված ժամանակում (45+2) Ջովանի դի Լորենցոն կրճատեց հաշվի տարբերությունը, իսկ երկրորդ կեսի մեկնարկում՝ 48-րդ րոպեին, Սանտոսը վերականգնեց հավասարությունը: Հանդիպման ելքը վճռվեց 90+1-րդ րոպեին, երբ Ջոնաթան Ռոուն շրջադարձ հարվածով խթեց հյուրերի հաղթական գոլը:

Այս պարտությունից հետո «Նապոլին» 70 միավորով շարունակում է մնալ մրցաշարային աղյուսակի 2-րդ հորիզոնականում՝ առաջատար «Ինտերին» զիջելով 15 միավորով: «Բոլոնիան» վաստակած 52 միավորով զբաղեցնում է 8-րդ տեղը:

Հանդիպման գոլերը ԱՅՍՏԵՂ

Ա Սերիայի մրցաշարային աղյուսակը՝ ստորև․

Իտալիայի Ա Սերիայի 2025/26 մրցաշրջանի 35-րդ տուրում «Կոմոն» սեփական հարկի տակ ընդունել էր «Նապոլիին»։

​Կոմոյի «Ջուզեպե Սինիգալյա» մարզադաշտում կայացած հանդիպումն ավարտվեց 0:0 հաշվով. թիմերին այդպես էլ չհաջողվեց գրավել միմյանց դարպասը։

​Այս խաղից հետո Սեսկ Ֆաբրեգասի գլխավորած «Կոմոն» 35 հանդիպումներում վաստակած 62 միավորով զբաղեցնում է Իտալիայի առաջնության մրցաշարային աղյուսակի 5-րդ հորիզոնականը։

«Նապոլին» 70 միավորով 2-րդ տեղում է։ Աղյուսակը վստահորեն գլխավորում է «Ինտերը» (79 միավոր)։

​Հաջորդ տուրում «Կոմոն» մայիսի 10-ին կհանդիպի «Վերոնային», իսկ հաջորդ օրը՝ մայիսի 11-ին, նեապոլիտանական ակումբը կմրցի «Բոլոնիայի» հետ։

Մրցաշարային աղյուսակն այս պահին

Իտալական Ա Սերիայի 2025/26 մրցաշրջանի 34-րդ տուրի շրջանակում «Նապոլին» Նեապոլի «Դիեգո Արմանդո Մարադոնա» մարզադաշտում ընդունել էր «Կրեմոնեզեին»։

Գլխավոր մրցավար Դանիելե Դովերիի սպասարկած հանդիպումն ավարտվեց դաշտի տերերի վստահ հաղթանակով՝ 4:0 հաշվով։

​Խաղի հաշիվն արդեն 3-րդ րոպեին բացեց նեապոլիտանական ակումբի կիսապաշտպան Սքոթ Մաքթոմինեյը։ 45-րդ րոպեին հյուրերի պաշտպան Ֆիլիպո Տերաչանոն գնդակն ուղարկեց սեփական դարպասը, իսկ առաջին խաղակեսի ավելացված ժամանակում (45+3′) Կևին Դե Բրույնեն հաշիվը դարձրեց խոշոր։ Երկրորդ կեսում՝ 52-րդ րոպեին, հարձակվող Ալիսոն Սանթոսը խփեց տանտերերի չորրորդ գնդակը։ Նշենք նաև, որ 83-րդ րոպեին Մաքթոմինեյը վրիպեց 11-մետրանոց նշանակետից։

​Այս հաղթանակից հետո «Նապոլին» իր վաստակած միավորների քանակը հասցրեց 69-ի և զբաղեցնում է Ա Սերիայի մրցաշարային աղյուսակի երկրորդ հորիզոնականը։ 34 հանդիպումից հետո «Կրեմոնեզեն» 28 միավորով 17-րդն է։

Մրցաշարային աղյուսակն այս պահին

Իտալիայի Ա Սերիայի 33-րդ տուրի շրջանակում «Նապոլին» սեփական հարկի տակ ընդունեց «Լացիոյին» և 0:2 հաշվով պարտություն կրեց։

​Հռոմեական ակումբի կազմում գոլերի հեղինակ դարձան Տոմա Բաշիչը և Մատեո Կանսելիերին։ Վերջինս իր ակտիվում գրանցեց նաև արդյունավետ փոխանցում։ Հատկանշական է, որ հանդիպման առաջին խաղակեսում «Լացիոյի» ավագ Մատիա Ձականին չկարողացավ անվրեպ իրացնել 11-մետրանոց հարվածը։

​Այս խաղից հետո «Լացիոն» վաստակեց 47 միավոր և Ա Սերիայի մրցաշարային աղյուսակում զբաղեցնում է 9-րդ հորիզոնականը։ «Նապոլին» 66 միավորով շարունակում է մնալ երկրորդ տեղում։

Տեսանյութը` ԱՅՍՏԵՂ

Մրցաշարային աղյուսակն այս պահին

Իտալիայի առաջնության 32-րդ տուրում գործող չեմպիոն «Նապոլին» հյուրընկալվելիս ոչ-ոքի խաղաց «Պարմայի» հետ (1-1):

​Տանտերերը հիանալի մեկնարկեցին հանդիպումը. արդեն 1-ին րոպեին Գաբրիել Ստրեֆեզան առաջ մղեց «Պարմային»։ Նեապոլյան ակումբին հաջողվեց հավասարեցնել հաշիվը երկրորդ խաղակեսում. 60-րդ րոպեին հյուրերի կազմում աչքի ընկավ Սքոթ Մաքթոմինեյը։

​Այս խաղից հետո թիմերը վաստակեցին մեկական միավոր։ «Նապոլին» 65 միավորով երկրորդն է, իսկ «Պարման» 35 միավորով զբաղեցնում է 14-րդ հորիզոնականը։

Հանդիպման գոլերը՝ ԱՅՍՏԵՂ

Ա Սերիայի մրցաշարային աղյուսակը՝ ստորև․