Աշխարհի երրորդ ռակետ, ճապոնացի թենիսիստուհի Նաոմի Օսական հայտարարել է, որ դադար է վերցնում պրոֆեսիոնալ կարիերայում։

Օսական, որը US Open-ի գործող հաղթողն է, մրցաշարի երրորդ շրջանում անակնկալ պարտություն էր կրել աշխարհի 73-րդ ռակետ, կանադացի Լեյլա Ֆերնանդեսից ու դուրս մնացել հետագա պայքարից։

«Հիմա ես զգում եմ, որ գտնվում եմ մի փուլում, երբ փորձում եմ հասկանալ, թե ինչով եմ ցանկանում զբաղվել։ Անկեղծ ասած, ես չգիտեմ, թե երբ կանցկացնեմ իմ հաջորդ խաղը։ Կարծում եմ՝ որոշ ժամանակով դադար կվերցնեմ իմ կարիերայում։

Վերջին շրջանում ես ինձ երջանիկ չեմ զգում, երբ հաղթում եմ․ ավելի շուտ թեթևություն եմ զգում։ Իսկ երբ պարտվում եմ, շատ եմ տխրում։ Չեմ կարծում, որ սա նորմալ է»,- Օսակայի խոսքերն է փոխանցում BBC՝ ընդգծելով, որ Նաոմին չի կարողացել զսպել արցունքները մամուլի ասուլիսի ընթացքում։

ԱՄՆ-ի Ցինցինատի քաղաքում կայացել է WTA-1000 շարքի մրցաշարի երրորդ շրջանի հանդիպումը ճապոնացի Նաոմի Օսակայի և շվեյցարացի Հիլ Բելեն Թայհմանի միջև, որը WTA-ի վարկանիշային աղյուսակի 76-րդ հորիզոնականն է զբաղեցնում։

Հանդիպումն ավարտվել է Օսակայի՝ երեք սեթում կրած սենսացիոն պարտությամբ 6:3, 3:6, 3:6 հաշվով։ Խաղը 2 ժամ 3 րոպե է տևել։

Մրցաշարի քառորդ եզրափակչում Թայհմանը կմրցի Կարոլինա Մուխովա (Չեխիա) – Բելինդա Բենչիչ (Շվեյցարիա) զույգի հաղթողի հետ։

Աշխարհի երկրորդ ռակետ, ճապոնացի Նաոմի Օսական Ցինցինատիի մրցաշարի մեկնարկից առաջ անհարմար իրավիճակում է հայտնվել։ Մրցաշարի բացմանը նվիրված մամուլի ասուլիսի ընթացքում Օսական լաց է եղել լրագրողներից մեկի հարցից հետո և հեռացել։

«Դուք ինչո՞ւ չեք սիրում շփվել մամուլի ներկայացուցիչների հետ չնայած նրան, որ մամուլի կողմից շատ մեծ ուշադրության եք արժանանում»,- հարցրել է տեղի ԶԼՄ-ներից մեկի լրագրողը բավականին ագրեսիվ կերպով։ Դրանից հետո ճապոնացի թենիսիստուհին լաց է եղել ու լքել մամուլի ասուլիսների սրահը։

Որոշ ժամանակ անց Նաոմին վերադարձել է և շարունակել է պատասխանել ԶԼՄ-ների հարցերին։

«Ինքը թեման սարսափելի չէր, բայց անծանոթ մարդու ագրեսիվ տոնն այն բանից հետո, երբ Նաոմին արդեն նախորդ պատասխանում նշել էր, որ իր համար դժվար է մամուլի ասուլիսներ անցկացնելը , նման իրավիճակ ստեղծեց»,- Թվիթերի իր էջում պատմել է լրագրող Բեն Ռոտենբերգը։

Ճապոնացի թենիսիստուհի Նաոմի Օսական վառեց Օլիմպիական ջահը Տոկիո-2020-ի բացման արարողության ժամանակ։

Տոկիոյի ամառային Օլիմպիական խաղերը հիմնված են գենդերային հավասարության, ինչպես նաև բազմազանության և ներդաշնակության վրա։ Օսական, որի մայրը ճապոնուհի է, իսկ հայրը՝ ամերիկացի Հայիթիից, Օլիմպիական խաղերի կազմկոմիտեի կողմից ընտրվել է որպես մարզուհի, որը կարող է համապատասխանել այս փիլիսոփայությանը։

ԶԼՄ-ներն ավելի վաղ ենթադրում էին, որ Կազմկոմիտեն իր ընտրությունը կկանգնեցնի Օսակայի վրա, երբ նրա շաբաթ օրվա խաղը, որում ճապոնացի թենիսիստուհին պետք է մրցի չինուհի Չժեն Սայսայի հետ, մեկ օրով հետաձգվեց։  Այժմ մրցաշարի բացման խաղում միմյանց հետ կմրցեն լեհ թենիսիստուհի Իգա Սվյոնտեկն ու Գերմանիայի ներկայացուցիչ Մոնա Բարտելը։

Աշխարհի երկրորդ ռակետ, ճապոնացի թենիսիստուհի Նաոմի Օսական որոշել է բաց թողնել Ուիմբլդոնի առաջիկա խաղարկությունը։ Այդուհանդերձ, նա հուսադրել է ճապոնացի երկրպագուներին, որ կմասնակցի տնային Օլիմպիական խաղերին․

«Նաոմին այս տարի չի մասնակցի Ուիմբլդոնին։ Նա ժամանակը կանցկացնի ընկերների և ընտանիքի հետ։ Սակայն պատրաստ կլինի Օլիմպիական խաղերին ու ցանկանում է հանդես գալ տնային տրիբունաների ներքո»,- Օսակայի թիմի հայտարարությունից հատված է մեջբերում The Times-ի լրագրող Ստյուարտ Ֆրեյզերը։

Ավելի վաղ Օսական դադարեցրել էր իր մասնակցությունը Ռոլան Գարոսին։ Ֆրանսիայի Բաց առաջնության մեկնարկից առաջ նա հայտարարել էր, որ Ռոլան Գարոսի ընթացքում հարցազրույցներ չի տա, քանի որ ցանկանում է ուշադրություն հրավիրել «մարզիկների մենթալ առողջության անտեսման» խնդրի վրա։ Կազմակերպիչները, սակայն, քննադատության էին ենթարկել նրա այս որոշումը՝ մատնանշելով, որ ԶԼՄ-ների հետ շփումը Նաոմիի և առհասարակ մրցաշարի մյուս բոլոր մասնակիցների պարտականություններից է։ Ճապոնուհին պահեց խոստումն ու առաջին շրջանում տարած հաղթանակից հետո չներկայացավ հետխաղյա մամուլի ասուլիսին, ինչի համար տուգանվեց 15 հազար դոլարով։ Մայիսի 31-ին Օսական հայտարարեց, որ լքում է մրցաշարը։

Ուիմբլդոնի հիմնական մրցաշարը կկայանա հունիսի 28-ից հուլիսի 10-ը, իսկ Տոկիոյի ամառային Օլիմպիական խաղերը՝ հուլիսի 23-ից օգոստոսի 8-ը։

Աշխարհի երկրորդ ռակետ, ճապոնացի Նաոմի Օսական հայտարարել է, որ դադարեցնում է իր մասնակցությունը Ֆրանսիայի Բաց առաջնությանը՝ Ռոլան Գարոսին.

«Ողջույն բոլորին: Սա այն իրավիճակը չէ, որ ես երբևէ կպատկերացնեի, որ կլինի, երբ մի քանի օր առաջ գրառում էի անում: Կարծում եմ՝ հիմա մրցաշարի, մյուս թենիսիստների և իմ բարօրության համար ամենալավն այն կլինի, որ ես լքեմ մրցաշարը, որպեսզի բոլորը կարողանան վերադառնալ Փարիզում ընթացող թենիսին: Ես երբեք չեմ ցանկացել ուշադրություն գրավել և ընդունում եմ, որ իմ ուղերձը կարող էր ավելի հստակ լինել:

Ես ԱՄՆ-ի 2018 թվականի Բաց առաջնությունից ի վեր տառապում եմ շարունակական դեպրեսիայից և ես իսկապես շատ բարդ ժամանակներ եմ ապրել՝ դա հաղթահարելով: Ինձ ճանաչողները գիտեն, որ ես ինտրովերտ եմ, ու շատերը նկատած կլինեն, որ մրցումների ժամանակ ես ականջակալներով եմ, քանի որ դա օգնում է խլացնել տագնապը:

Չնայած մամուլը միշտ բարյացակամ է եղել իմ նկատմամբ (և ես ցանկանում եմ ներողություն խնդրել այն հիանալի լրագրողներից, որոնց գուցե նեղացրել եմ),  ես իմ էությամբ հանրային մարդ չեմ և շատ եմ լարվում՝ համաշխարհային մեդիայի առաջ խոսելիս: Ես իսկապես շատ եմ լարվում ու կարծում եմ՝ սթրեսային է, երբ ամեն անգամ փորձում եմ լավագույնս պատասխանել ձեր հարցերին ու հետաքրքիր լինել ձեզ համար:Այսպիսով, այստեղ՝ Փարիզում, ես որոշեցի իմ բարօրության համար բաց թողնել մամուլի ասուլիսները՝ այդ մասին նախապես հայտնելով կազմակերպիչներին ու ներողություն խնդրելով: Ես պատաստ էի հարցազրույցներ տալ մրցաշարի ավարտից հետո: Կարծում եմ՝ պետք է քննարկել և գտնել լավագույն տարբերակը մարզիկների, լրագրողների և երկրպագուների համար»,- գրել է Օսական Instagram-ի իր էջում:

Մինչև մրցաշարի մեկնարկը Օսական տեղեկացրել էր, որ մտադիր չէ շփվել լրագրողների հետ: Երեկ նա տուգանվել է 15 հազար դոլարով՝ մամուլի ասուլիսը բաց թողնելու համար:

Ճապոնացի թենիսիստուհի Նաոմի Օսական հաղթանակով է մեկնարկել Փարիզում ընթացող «Ռոլան Գարոսում»: Առաջին շրջանի խաղում Օսական հաղթել է Ռումինիայի ներկայացուցչուհի Պատրիսիա-Մարիա Ցիգին:

Օսակայից հաղթանակի հասնելու համար 2 սեթ պահանջվեց: Հանդիպումն ավարտվեց 6:4, 7:6 (7:4) հաշվով՝ հօգուտ Օսակայի: Խաղը 1 ժամ 48 րոպե է տևել:

Օսակայի մրցակիցը երկրորդ շրջանում դարձյալ Ռումինիայի ներկայացուցիչ կլինի՝ Աննա Բոգդանը:

«Ռոլան Գարոսը» մեկնարկել է այսօր՝ մայիսի 30-ն և կտևի մինչև հունիսի 12-ը:

Grand Slam-ի մրցաշարերի քառակի չեմպիոն, ճապոնուհի Նաոմի Օսական Instagram-ի իր էջում շնորհակալություն է հայտնել իր զուգընկերոջն աջակցության համար:

Օսական տեսանյութ է հրապարակել US Open-ի եզրափակչից: Տեսախցիկները ֆիքսել են նրա ճապոնուհու ընկերոջ՝ ռեփեր Կորդայի արձագանքն աղջկա հաղթանակին. նա միանգամից չի հասկացել, որ խաղն ավարտվել է, որ վայրկյաններ անց ի սրտե ուրախացել է Օսակայի համար:

 

Посмотреть эту публикацию в Instagram

 

Публикация от 大坂なおみ (@naomiosaka)

«Շնորհակալություն եմ հայտնում այս պարոնին, քանի որ այսօր այդպիսի տրամադրություն ունեմ: Այս լուսանկարն արվել է US Open-ում հաղթելուց հետո:Նա թողեց իր բոլոր գործերը, երբ տեսազանգով նրան ասացի, որ տխուր եմ ու ինձ միայնակ եմ զգում: Ավելի ուշ իմացա, որ նա անմիջապես նստել էր ինքնաթիռ, մի քանի օր ինքնամեկուսացում էր անցել հյուրանոցում, որպեսզի տեսնի ու աջակցի ինձ:

Իսկ ամենազավեշտալին այն է, որ նույնիսկ իր այս արձագանքից հետո ես առաջվա պես վստահ եմ, որ նա դեռ չի հասկանում թենիս խաղի կանոնները»,- գրել է Նաոմին:

Հիշեցնենք՝ 2020 թվականին Օսականա US Open-ի եզրափակչում 7:6 (7:1), 3:6, 6:3 հաշվով հաղթել էր ամերիկացի Ջենիֆեր Բրեյդիին:

Աշխարհի երկրորդ ռակետ, ճապոնուհի Նաոմի Օսական չի մասնակցի ATP-500 կատեգորիայի՝ Շտուտգարտի գրունտային մրցաշարին:

Այս մասին հայտնում են մրցաշարի կազմակերպիչները.

«Օսական, որն ի սկզբանե հանդիսանում էր մրցաշարի մասնակիցներից մեկը, Եվրոպայում գրունտային մրցաշրջանը կսկսի ավելի ուշ՝ մայիսին»,- ասել են կազմակերպիչները:

Վաղը Օսական առաջին խաղը կանցկացնի Մայամիի մրցաշարում՝ մրցելով ավստրալուհի Այլա Տոմլյանովիչի հետ: Օսական «Grand Slam»-ի 4, իսկ WTA-ի 7 մրցաշարերի հաղթող է:

Գերմանական Շտուտգարտի Porsche Tennis Grand Prix մրցաշարը կկայանա ապրիլի 19-ից 25-ը: Մասնակիցների թվում են աշխարհի առաջին ռակետ Էշլի Բարտին, Սիմոնա Հալեպը, Էլինա Սվիտոլինան, Արինա Սաբալենկոն, Վիկտորիա Ազարենկոն, Բելինդա Բենչիչը: Մրցանակային ֆոնդը 565,530 դոլլար է:

Մելբուրնում երկուշաբթի մեկնարկում է թենիսի տարվա Մեծ սաղավարտի առաջին մրցաշարը՝ Ավստրալիայի բաց առաջնությունը։ Հատկանշական է, որ Australian Open-ն արդեն երկրորդ տարին է, ինչ անցնում է արտառոց պայմաններում։ Եթե 2020-ի հունվարին խնդիրը կանաչ մայրցամաքում բռնկված անտառային սարսափելի հրդեհներն էին, ապա հիմա խնդիրը կորոնավիրուսի համավարակն է։

Այո՛, Ավստրալիան այն օրինակելի երկրներից է, որտեղ Covid-19-ը շատ մեծ վնասներ չի հասցրել, սակայն մենք խոսում ենք մի մրցաշարի մասին, որի մասնակիցները գալիս են աշխարհի այն կետերից, որտեղ կորոնավիրուսը ոչ միայն չի նահանջել, այլև տարածվում է նոր տեմպերով։

Խաղացողները Ավստրալիայում են «տենց հուլիսի կեսերից»։ Իհարկե, «Կարգին հաղորդման» սկետչերից մեկը հիշելը զուտ դրական մթնոլորտի ապահովման նպատակ էր հետապնդում, իսկ իրականում խաղացողները ոչ թե հուլիսի, այլ հունվարի կեսից են այստեղ։ Բոլորը, կամ կարելի է ասել, «բոլորը» անցան երկշաբաթյա կարանտին։ Ճիշտ է, որոշների համար պայմանները սարսափելի էին, որոշների համար՝ գերազանց։

Ուժեղագույնները՝ Նովակ Ջոկովիչը, Ռաֆա Նադալը, Սերենա Ուիլյամսը, Նաոմի Օսական և ուրիշ թոփեր իրենց կարանտինն անցում էին Ադելաիդայում։ Մյուս խաղացողները հյուրանոցների փոքր ու անհարմար սենյակներից դժգոհում էին Ավստրալիայի այլ քաղաքներում։ Աշխարհի առաջին ռակետ Նովակ Ջոկովիչը ցանկացավ մի ինչ-որ լավ բան անել այդ խաղացողների համար ու Tennis Australia-ից ավելի լավ պահանջներ խնդրեց։ Սակայն լավ պայմաններում ինքնամեկուսացումն անցկացնող Ջոկովիչի խորհուրդը շատերի կողմից սխալ ընկալվեց։ Ստեն Վավրինկան բացահայտ հեգնեց Նովակին, գրեթե նույնն արեց նաև Դոմինիկ Տիմը։

Ինչևէ, լավ վատ, բոլորը անցան կարանտինը, ու ոմանք մասնակցեցին ATP Cup-ին, ոմանք էլ Մելբուրնում ընթացող մրցաշարին։ Իսկ հիմա գանք բուն Australian Open-ին։

Ընդհանրապես AO-ին ընդառաջ միշտ բարդ է ասելը, թե ումից ինչ կարող ես սպասել։ Դե սրա գլխավոր պատճառն այն է, որ սա առաջին մեծ մրցաշարն է նոր մրցաշրջանում։ Այս տարի, իհարկե, ամեն ինչ ավելի բարդ է։ Երկար ժամանակ թենիսիստները կորտում չեն եղել։ Թենիսային մարզավիճակի մասով խնդիրներ պետք է որ չլինեն։ Այս մասին մեր հետ զրույցում ասաց նաև Հայաստանի առաջին ռակետ Անի Ամիրաղյանը։ Ֆիզիկական պատրաստությանը ևս թենիսիստները պետք է որ լավ ուշադրություն տրամադրած լինեն կարանտինի ընթացքում։ ATP Cup-ում մենք տեսանք, որ խաղացողները չունեն նաև այդ խնդիրը։

Սակայն երբ ֆիզիկականն ու հոգեբանականը միախառնվեն, դժվար է ասելը, թե ինչ կստանանք մրցաշրջանի սկզբում։ Դեռևս անհայտ է, թե տղամարդկանց մենախաղի գլխավոր ֆավորիտներից մեկը՝ Ռաֆայել Նադալը առհասարակ պատրա՞ստ է մրցաշարին։ Ռաֆան ATP Cup-ին չմասնակցեց մեջքի վնասվածքի պատճառով։ Իհարկե, չափազանց ցավալի կլինի, եթե նա իր լավագույն վիճակում չլինի մրցաշարի ընթացքում՝ հաշվի առնելով այն դժվարությունները, որ նրանք անցել են մրցաշարին մասնակցելու համար։

Ստադիոններում լինելու են երկրպագուներ։ Սա թերևս ամենակարևոր ու ուրախալի փաստն է Australian Open-ի այս տարվա մրցաշարի մասին։ Ավստրալիայում, չնայած Covid-19-ի բավականին սակավ դեպքերի, պահպանվում են կարանտինային խիստ միջոցները։ Նահանգից նահանգ գնալն արգելված է։ Այնպես որ, Վիկտորիայում ապրողները հնարավորություն ունեն տեսնելու աշխարհի ուժեղագույն թենիսիստներին գործի մեջ արդեն փետրվարի 8-ից։ Ճիշտ է՝ ստադիոնները ամբողջությամբ լեցուն չեն լինի։

Ֆավորիտներ տղամարդկանց մենախաղում

Այստեղ, իհարկե, առաջինը գալիս է Մելբուրնի անվիճելի չեմպիոնի՝ Նովակ Ջոկովիչի անունը։ Վերևում խոսեցինք այն մասին, որ մրցաշրջանի սկզբում բարդ է ասելը, թե ով կարող է լավ խաղալ Ավստրալիայում։ Սակայն Ջոկովիչի պարագայում մենք ոչ մեկ անգամ ենք համոզվել, որ նա կարողանում է գերազանց սկսել մրցաշրջանը՝ հաղթելով Australian Open-ում։ Այդպես եղավ նաև անցած տարի։

Մեծ են սպասումները երիտասարդներից։ Անցած մրցաշրջանի վերջում փայլող Դանիլ Մեդվեդևի ժամանակը, շատերի պնդմամբ, եկել է Մեծ սաղավարտում հաջողություն գրանցելու համար։ Սակայն այստեղ էլ այլ խնդիր կա։ Ռուս թենիսիստը թե՛ 2019-ին, թե՛ 2020-ին փայլեց մրցաշրջանի երկրորդ հատվածում, իսկ առաջինում նրա մրցելույթները համեմատաբար համեստ են։

Երկրպագուները սպասում են լավ ելույթների նաև Ալեքսանդր Զվերևից ու Ստեֆանոս Ցիցիպասից։ ATP CUP-ում փայլում էր Մատեո Բերետինին։ Նա, կարծես, լուրջ հայտ է ներկայացնելու այս մրցաշրջանում ավելի բարձր մակարդակում պայքարելու համար, ինչպես դա եղավ 2019-ի վերջում։

Դոմինիկ Տիմը, թերևս Նադալի ու Ջոկովիչի հետ նույն ակումբում է։ Թեպետ, կրկնում եմ, Նադալի պարագայում շատ բան անորոշ է նրա վնասվածքից հետո։

Ֆավորիտներ կանանց մենախաղում

Կանանց մոտ ավելի անհասկանալի իրավիճակ է։ Օսակա, Ուիլյամս, գործող չեմպիոն Սոֆիա Կենին, Սիմոնա Հալեպ, Էշլի Բարտի։ Այս բոլոր թենիսիստները կարող են լավ խաղալ։

Սակայն կանանց մենախաղում վերջին տարիներին կա տենդենց, երբ Մեծ սաղավարտի մրցաշարում հաղթում է մի թենիսիստ, ումից դա այդքան էլ չէին սպասում։ Խոսվում է նաև Մարտա Կոստյուկի շատ լավ մարզավիճակում լինելու մասին։ Կարանտինին բավականին ակտիվ մարզվում էր նաև Օնս Ջաբուրը։

Հայկական արմատները Australian Open-ում

Հայկական արմատներ ունեցող թենիսիստներից կտեսնենք միայն Կարեն Խաչանովին։ Կարենը անցած մրցաշրջանը մեծ հաշվով տապալեց։ Այս տարին նրա համար կարող է բեկումնային լինել։ Նա կամ կվերադառնա թոփ-10, կվերահաստատի թոփ թենիսիստի իր կարգավիճակը, կամ կամաց-կամաց կվերածվի ATP-ի դասակարգման աղյուսակում բավականին լավ տեղեր պահպանող, բայց միայն համեստ մրցաշարերում հաջողություններ գրանցող թենիսիտի։ Իհարկե, դա չեն ուզում ո՛չ Ռուսաստանում, ո՛չ էլ Հայաստանում։ Խաչանովի պոտենցիալը ահռելի է, ու հուսանք, որ նրա մոտ կստացվի։

Մարգարիտա Գասպարյանը չի հայտնվել հիմնական ցանցում, քանի որ որակավորման փուլի եզրափակիչում պարտություն կրեց՝ դուրս մնալով հետագա պայքարից։ Բայց եթե շատ եք ուզում կանանց մենախաղում էլ երկրպագել հայերի հետ որևէ կապ ունեցող մեկին, ապա Ալեքսիս Օհանյանի կինը ձեզ է սպասում։

Սպասվող անհարմարություններ

Ու նորից գանք հակահամաճարակային պայմաններին։ Թեպետ խոսեցինք Վիկտորիա նահանգում Covid-19-ի քիչ դեպքերի մասին, այնուամենայնիվ պետք չէ բացառել, որ մրցաշարի ընթացքում կլինեն ֆորս-մաժորային իրավիճակներ։ Այդպիսի դեպք եղավ անցած շաբաթ, երբ հյուրանոցի թիկնապահի մոտ, որտեղ մնացել էին հազարավոր խաղացողներ ու անձնակազմի անդամներ, հայտնաբերվել էր կորոնավիրուս։ Հինգշաբթի որևէ խաղ Մելբուրնում չկայացավ, քանի դեռ ողջ անձնակազմը դարձյալ թեստավորում չանցավ ու չստացավ բացասական արդյունք։

Tennis Australia-ի հաղթանակը

Թենիսի Ավստրալիայի ֆեդերացիան, կամ ինչպես ասում են Tennis Australia-ն մեծ հաղթանակ է տանում միայն նրանով, որ կազմակերպում է Australian Open-ը։ Հաշվի առնելով մրցաշարի ահռելի հեղինակությունը մարզական աշխարհում՝ կարելի է վստահ լինել, որ այն բարձր մակարդակի վրա է անցկացվելու անգամ այս բարդ պայմաններում։ Թենիսի սիրահարներին մաղթում եմ իրադարձություններով ու թեժ հանդիպումներով լի 2 շաբաթ․․․

Արամ Սահակյան