Մադրիդի «Ռեալի» նախագահի թեկնածու գրանցված գործարար Էնրիկե Ռիկելմեն ակումբի ղեկավարի պաշտոնում ընտրվելու դեպքում աղմկոտ տրանսֆերներ է խոստանում։

​Ավելի վաղ Ռիկելմեն վստահեցրել էր, որ արդեն պայմանավորվածություն է ձեռք բերել համաշխարհային մեծության երկու աստղի հետ։

​«Եթե ես դառնամ ակումբի նախագահ, ապա «Ռեալում» հանդես կգան միջազգային մակարդակի մեծ աստղեր։ Այդ համալրումներն անհրաժեշտ են մեր սպորտային նախագծին թե՛ կարճաժամկետ, թե՛ միջնաժամկետ և թե՛ երկարաժամկետ հեռանկարում»,- Ռիկելմեի խոսքերն է մեջբերում ABC-ն։

​Madrid Zone հաղորդմամբ` պարզ է դարձել, թե ում նկատի ուներ թեկնածուն։ Ըստ առկա տեղեկությունների՝ Ռիկելմեն ուղիղ բանակցություններ է վարում «Մանչեսթեր Սիթիի» հարձակվող Էրլինգ Հալանդի ներկայացուցիչների հետ։ Նորվեգացի ռմբարկուի, ինչպես նաև գլխավոր մարզչի պաշտոնում գերմանացի մասնագետ Յուրգեն Կլոպի հրավերը նրա նախընտրական սպորտային նախագծի հիմքն են կազմում։

​Նշենք, որ «Ռեալի» նախագահի ընտրություններին քվեարկելու իրավունք ունի ակումբի ավելի քան 100 հազար անդամ (սոսիոս)։ Հատկանշական է, որ 2006 թվականից ի վեր առաջին անգամն է, երբ ակումբի նախագահի պաշտոնի համար պայքարում է առնվազն երկու հավակնորդ։ Նախորդ բոլոր ընտրարշավներում գործող նախագահ Ֆլորենտինո Պերեսը եղել է առաջադրված միակ թեկնածուն։

​Հիշեցնենք նաև, որ «արքայական» ակումբն արդեն երկու մրցաշրջան անընդմեջ ավարտում է առանց խոշոր տիտղոսների նվաճման։

«Լիվերպուլի» նախկին գլխավոր մարզիչ Յուրգեն Կլոպը դեմ չէ ապագայում ստանձնել Գերմանիայի ազգային հավաքականի ղեկը: Այս մասին տեղեկացնում է իսպանական Diario AS պարբերականը:

Աղբյուրի համաձայն՝ չնայած այս պատրաստակամությանը, գերմանացի մասնագետը չի շտապում վերադառնալ ակտիվ մարզչական գործունեության: Նշվում է, որ Կլոպը խորը հարգանքով է վերաբերվում Բունդեսթիմի գործող գլխավոր մարզիչ Յուլիան Նագելսմանին և սպասողական դիրք է գրավել:

Միևնույն ժամանակ ընդգծվում է, որ նա մտադրություն չունի աշխատել Մադրիդի «Ռեալում», ուստի ամառային միջմրցաշրջանային հատվածում հաստատապես չի գլխավորի «Արքայական» ակումբը:

Հիշեցնենք, որ այս ամռանը ԱՄՆ-ում, Կանադայում և Մեքսիկայում կմեկնարկի 2026 թվականի աշխարհի առաջնությունը: Գերմանիայի ազգային ընտրանին վիճակահանության արդյունքներով ընդգրկվել է E խմբում, որտեղ նրա մրցակիցները կլինեն Կոտ դ’Իվուարի, Կյուրասաոյի և Էկվադորի հավաքականները:

Մադրիդի «Ռեալի» հանդերձարանում նախընտրում են թիմի նոր գլխավոր մարզչի պաշտոնում տեսնել Յուրգեն Կլոպին, այլ ոչ թե Ժոզե Մոուրինյուին։ Այս մասին El Bar de Sique հաղորդման եթերում հայտնել է Cadena SER-ի լրագրող Գոնսալո Ալվարեսը։

Աղբյուրի տեղեկություններով՝ մադրիդյան ակումբի ֆուտբոլիստները կարծում են, որ Մոուրինյուի աշխատաոճը կարող է լարված մթնոլորտ ստեղծել կոլեկտիվի ներսում։ Նշվում է, որ պորտուգալացի մասնագետը հայտնի է ավելի կոշտ և կոնֆլիկտային մոտեցումներով, մինչդեռ Կլոպը խաղացողների մոտ շատ ավելի մեծ համակրանք է վայելում։

Ալվարեսն ընդգծել է նաև, որ ակումբի նախագահ Ֆլորենտինո Պերեսը հասկանում է գերմանացի մասնագետի թեկնածության գրավչությունը, սակայն միևնույն ժամանակ գիտակցում է այն մեդիաէֆեկտը, որը կարող է ապահովել Մոուրինյոյի վերադարձը Մադրիդ։

Ավելի վաղ Sky Sports-ը հայտնել էր, որ մադրիդցիները դիտարկում են Լիսաբոնի «Բենֆիկայի» ներկայիս մարզիչ Մոուրինյուին հրավիրելու տարբերակը, սակայն կողմերի միջև պաշտոնական բանակցություններ առայժմ չեն ընթացել։

Մադրիդի «Ռեալը» սկսել է նոր գլխավոր մարզչի փնտրտուքները Ալվարո Արբելոային փոխարինելու նպատակով այն բանից հետո, երբ թիմը 2025/26 մրցաշրջանի Չեմպիոնների լիգայի խաղարկության քառորդ եզրափակիչում ընդհանուր 4-6 հաշվով զիջեց Մյունխենի «Բավարիային»։ Այս մասին հաղորդում է The Athletic պարբերականը։

Աղբյուրի համաձայն՝ «արքայական» ակումբի ղեկավարությունն այս պաշտոնի համար դիտարկում է չորս հիմնական թեկնածուի։ Մադրիդում բարձր են գնահատում Յուրգեն Կլոպի աշխատանքը, սակայն կողմերի միջև առայժմ որևէ պաշտոնական շփում չի եղել։

Դիտարկվում է նաև Զինեդին Զիդանի վերադարձի տարբերակը, թեև վերջինս առավել հակված է գլխավորելու Ֆրանսիայի ազգային հավաքականը: Ցուցակում են նաև ԱՄՆ-ի հավաքականի ներկայիս գլխավոր մարզիչ Մաուրիսիո Պոչետինոն և Դիդիե Դեշամը, որը, սպասվում է, կհեռանա Ֆրանսիայի հավաքականից ԱԱ-2026-ի ավարտից հետո:

Հիշեցնենք, որ Արբելոան «Ռեալի» ղեկը ստանձնել է 2026 թվականի հունվարին՝ այդ պաշտոնում փոխարինելով Խաբի Ալոնսոյին։ Նրա գլխավորությամբ մադրիդյան թիմն անցկացրել է 21 հանդիպում, որոնցից 13-ն ավարտվել է հաղթանակով, 1-ը՝ ոչ-ոքի, իսկ 7-ում թիմը պարտություն է կրել։

Լա լիգայի 31 տուրերից հետո «Ռեալը» 70 միավորով զբաղեցնում է մրցաշարային աղյուսակի երկրորդ հորիզոնականը՝ առաջատար «Բարսելոնային» զիջելով 9 միավորով (կատալոնացիներն իրենց ակտիվում ունեն 79 միավոր)։

Դորտմունդի «Բորուսիայի» և «Լիվերպուլի» նախկին գլխավոր մարզիչ Յուրգեն Կլոպը խոստովանել է, որ երբեք իրեն որպես բացառիկ մասնագետ չի ընկալել։ Գերմանացին նշել է, որ մարզչական կարիերայի ընթացքում ամենօրյա ծանրաբեռնվածության պայմաններում ոչ միշտ է հստակ իմացել՝ ինչպես վարվել այս կամ այն իրավիճակում։

«Երբ մարզիչ էի, ինձ երբեք մեծագույն մասնագետ չեմ համարել։ Երբե՛ք, և դա ճշմարտություն է։ Ամեն օր այնքան անելիքներ ունեի, գլխումս այնքան հարցեր կային, որ ոչ միշտ գիտեի՝ ինչ անել։ Ինչպե՞ս կարող էի իմանալ։

Եթե մարդիկ ասում էին, որ իմ ու Պեպ Գվարդիոլայի (ում ես համարում եմ աշխարհի լավագույն մարզիչը) միջև մրցակցությունը բացառիկ էր, ապա, իհարկե, դա նշանակում է, որ ես էլ բավականին լավ մարզիչ եմ։ Ես դա հասկանում էի, բայց մինչև վերջ այդպես էլ չգիտակցեցի։ Հիմա ես այլևս մարզիչ չեմ, և, վա՜ու, պարզվում է՝ ես իսկապես լավն եմ եղել»,- Կլոպի խոսքերը մեջբերում է TV2-ը։

Յուրգեն Կլոպը «Լիվերպուլը» գլխավորել է 2015 թվականի հոկտեմբերից մինչև 2024 թվականի մայիսը այդ պաշտոնում փոխարինելով Բրենդան Ռոջերսին։

Մերսիսայդյան ակումբում աշխատելու տարիներին նա հասել է պատմական հաջողությունների՝ նվաճելով Չեմպիոնների լիգայի գավաթն ու երկար սպասված Անգլիայի Պրեմիեր լիգայի չեմպիոնի տիտղոսը։

«Լիվերպուլի» նախկին գլխավոր մարզիչ Յուրգեն Կլոպը չի պատրաստվում վերադառնալ մարզչական աշխատանքի՝ չնայած Մադրիդի «Ռեալի» հետ հնարավոր բանակցությունների մասին շրջանառվող լուրերին։

«Ես այլևս չեմ ցանկանում մարզիչ լինել։ Ոչ մի բանի չեմ կարոտում։ 25 տարվա ընթացքում ես ընդամենը չորս անգամ եմ կինոթատրոն գնացել, ընդ որում՝ այդ բոլոր այցելությունները եղել են վերջին ութ շաբաթվա ընթացքում։ Ինձ իսկապես հաճույք է պատճառում սա», — Կլոպի խոսքերը մեջբերում է Transfer News Live-ը։

Հիշեցնենք, որ ավելի վաղ իսպանական աղբյուրները (մասնավորապես՝ լրագրող Ֆրանսուա Գալյարդոն) նմանատիպ տեղեկություն էին տարածել, թե իբր Կլոպն արդեն համաձայնության է եկել և առաջիկա ամռանը գլխավորելու է Մադրիդի «Ռեալը»։ Գերմանացի մասնագետի այս նոր հայտարարությունը, սակայն, գործնականում հերքում է այդ խոսակցությունները։

Կլոպի մարզչական կարիերայի վերջին ակումբն անգլիական «Լիվերպուլն» էր, որի ղեկին նա աշխատել է 2015-ից 2024 թվականներին։ Գերմանիայի առաջնությունում մասնագետը մարզել է նաև «Մայնցն» ու Դորտմունդի «Բորուսիան»։

Անգլիական «Լիվերպուլի» նախկին գլխավոր մարզիչ Յուրգեն Կլոպը կգլխավորի Մադրիդի «Ռեալը»։ Այս մասին հայտնում է մարզական լրագրող Ֆրանսուա Գալյարդոն։

​Ըստ աղբյուրի տեղեկությունների՝ կողմերը գերմանացի մասնագետի՝ առաջիկա ամռանը նշանակվելու շուրջ համաձայնության են եկել դեռևս դեկտեմբերին։ Ընդ որում, ընդգծվում է, որ այս որոշումն ամենևին կախված չէ թիմի ներկայիս մարզիչ Ալվարո Արբելոայի գրանցած արդյունքներից։ Նշվում է նաև, որ Կլոպն արդեն իսկ աշխատանքային պայմանագիր է ստորագրել «արքայական» ակումբի հետ։

​Հիշեցնենք, որ Յուրգեն Կլոպի մարզչական կարիերայի վերջին ակումբն անգլիական «Լիվերպուլն» էր, որի ղեկին նա աշխատել է 2015-ից 2024 թվականներին և պաշտոնից հեռացել 2024-ի ամռանը։

Արդեն 2025 թվականի սկզբից գերմանացի մասնագետը զբաղեցնում է Red Bull ընկերության ֆուտբոլային ուղղության ղեկավարի պաշտոնը։ Սակայն մարտի սկզբին լուրեր էին շրջանառվում առ այն, որ ընկերության ղեկավարությունը դժգոհ է Կլոպի կայացրած որոշ որոշումներից և դիտարկում է նրան պաշտոնանկ անելու հավանականությունը։

«Լիվերպուլի» նախկին գլխավոր մարզիչ Յուրգեն Կլոպը կարծիք է հայտնել, որ մերսիսայդցիների հարձակման ներկայիս առաջատար Յուգո Էկիտիկեն ապագայում կարող է գերազանցել Մոհամեդ Սալահի նվաճումները, եթե ֆրանսիացին երկար ժամանակով մնա ակումբում։

Ինչպես հայտնի է, այս շաբաթ Սալահը հայտարարեց մրցաշրջանի ավարտին «Լիվերպուլից» հեռանալու մասին։ Կողմերը փոխադարձ համաձայնությամբ որոշել են ժամկետից շուտ խզել պայմանագիրը, որը նախատեսված էր մինչև 2027 թվականի ամառը։ Սալահը «Լիվերպուլի» պատմության լավագույն ռմբարկուների ցանկում զբաղեցնում է երրորդ տեղը՝ իր ակտիվում ունենալով 255 գոլ և զիջելով միայն Ռոջեր Հանթին (285) ու Իան Ռաշին (346)։

Սակայն, ըստ Կլոպի, ֆրանսիացի Էկիտիկեն, ով այս մրցաշրջանում թիմի լավագույն ռմբարկուն է, տեսականորեն շանսեր ունի ապագայում գերազանցելու այդ պատմական թվերը։ Ամռանը Ֆրանկֆուրտի «Այնտրախտից» տեղափոխված Յուգոն արագ հարմարվեց նոր թիմին և արդեն հասցրել է աչքի ընկնել 17 անգամ։

«Հուսով եմ՝ նա հաջող կեզրափակի մրցաշրջանը։ Նախորդ գիշեր մենք նամակագրական կապի մեջ էինք։ Ուզում եմ, որ Մոն վայելի այս հանդիպումները, բայց գիտեմ՝ նա կարող է հաճույք ստանալ միայն այն ժամանակ, երբ թիմը հաղթում է, իսկ ինքը՝ գոլեր խփում։ Այն, թե որտեղից է նա եկել, ինչերի միջով է անցել և ինչ է տվել մեզ… դա անհավանական է։

Երբ աշխատում ես նրա հետ, ժամանակի ընթացքում այդ թվերն ուղղակի աբսուրդ են թվում։ Դրանք անգերազանցելի ցուցանիշներ են։ Հնարավոր է՝ 10 տարի անց մենք նստենք այստեղ ու ասենք, որ Էկիտիկեն [գերազանցել է նրա ցուցանիշները], բայց դա շատ բարդ է լինելու։ Բոլոր ժամանակների մեծագույն խաղացողներից մեկը, անկասկած, ամռանը կհեռանա ակումբից։ Տեսնենք, թե որտեղ կհայտնվի նա հաջորդիվ», — ասել է Կլոպը The Anfield Wrap փոդքասթի եթերում։

«Լիվերպուլի» նախկին գլխավոր մարզիչ Յուրգեն Կլոպը բավականին հուզական է արձագանքել Մադրիդի «Ռեալը» գլխավորելու հավանականության մասին շրջանառվող լուրերին։

Ավելի վաղ արտասահմանյան մամուլում բազմիցս տեղեկություններ էին տարածվել, որ մադրիդյան ակումբը պատրաստ է հրավիրել 58-ամյա գերմանացի մասնագետին, եթե վերջինս որոշի վերսկսել մարզչական կարիերան։

«Ե՞րբ է պատմությունը դառնում իրականություն. երբ ինչ-որ մեկը թուղթ է վերցնում ու վրա՞ն ինչ-որ բան գրում: Թե՞ երբ դրա հետևում իսկապես ինչ-որ բան կա: Ի՞նչ պետք է տեղի ունենար: Պե՞տք է արդյոք մի օր ինձ զանգեին «Ռեալից» ու ասեին. «Ֆլորենտինո Պերեսն է կապի մեջ»: Թե՞ բավական է միայն այն, որ ավստրիական պարբերականում (խմբ.՝ նկատի ունի OE24 հրատարակությունը) ինչ-որ հիմարություն են գրել։ Գաղափար անգամ չունեմ՝ դա արհեստական բանականությունն է գեներացրել, թե՞ մարդիկ են գրել: Այս ամենն ինձ արդեն նյարդայնացնում է:

Այդ խոսակցությունները պարզապես զառանցանք են: «Ռեալից» ինձ երբեք չեն զանգահարել, կյանքումս ոչ մի անգամ: Ես դեռ մի հատ էլ «Ատլետիկոն» կգլխավորեմ, ցանկալի է՝ «Ռեալի» հետ միաժամանակ: Կներես, «Ռեա՛լ», բայց նախ պետք է ինձ զանգահարել»,- Կլոպի խոսքերն է մեջբերում Goal-ը:

Հիշեցնենք, որ 2025 թվականի սկզբից Կլոպը զբաղեցնում է Red Bull ընկերության ֆուտբոլային նախագծերի ղեկավարի պաշտոնը։ Գերմանացի մասնագետը 2024 թվականի ամռանն էր հեռացել «Լիվերպուլի» գլխավոր մարզչի պաշտոնից։ Մինչ այդ նա գլխավորել է Դորտմունդի «Բորուսիան» և «Մայնցը»։

Topskills Sports UK-ի տեղեկություններով՝ «Լիվերպուլի» նախկին գլխավոր մարզիչ Յուրգեն Կլոպը մի շարք պահանջներ է առաջ քաշել, որոնք պետք է բավարարվեն, եթե Մադրիդի «Ռեալն» ամռանը նրան առաջարկի գլխավորել թիմը։

Հաղորդվում է, որ գերմանացի մասնագետը ցանկանում է ուժեղացնել կազմը երկու կենտրոնական պաշտպանով և երկու կիսապաշտպանով։ Բացի այդ, նա պնդում է, որ բրազիլացի հարձակվող Էնդրիկն անպայման վերադառնա թիմ։

Նշվում է նաև, որ Կլոպն իբր պատրաստ է դիտարկել ակումբի երկու ներկայիս աստղերի՝ Ջուդ Բելինգհեմի և Էդուարդո Կամավինգայի վաճառքի կամ հեռանալու տարբերակը։

Ընդգծվում է, որ մարզիչը նախապես հստակեցրել է իր դիրքորոշումն ու Մադրիդի «Ռեալի» հետ հնարավոր համագործակցության խիստ պայմանները։