ՄՕԿ — Armsport.am

ՄՕԿ-ի նոր որոշումը. տրանսգենդեր մարզիկներն այլևս չեն մասնակցի կանանց օլիմպիական մրցաշարերին

Suren Sahakyan — Thu, 26 Mar 2026 16:15:33 +0000

Միջազգային օլիմպիական կոմիտեն (ՄՕԿ) պաշտոնապես արգելել է տրանսգենդեր մարզիկներին հանդես գալ Օլիմպիական խաղերի կանանց մրցումներում։ Համապատասխան հայտարարությունը հրապարակվել է կազմակերպության պաշտոնական կայքում։

Որոշումն ուժի մեջ կմտնի 2028 թվականից։ Այդ ժամանակից սկսած՝ կանանց անհատական և թիմային մրցաշարերին կթույլատրվի մասնակցել միայն այն մարզուհիներին, որոնք գենետիկական թեստավորման միջոցով կհաստատեն իրենց կենսաբանական սեռը։ Ըստ ՄՕԿ-ի՝ գիտական տվյալների և փորձագիտական գնահատականների վրա հիմնված այս նոր քաղաքականությունը կոչված է ապահովելու մրցումների արդարությունը, անվտանգությունն ու ազնվությունը։

Կանոնակարգի համաձայն՝ SRY գենի դրական թեստ ունեցող աթլետները կզրկվեն կանանց կատեգորիայում մրցելու իրավունքից. նրանց կառաջարկվի հանդես գալ տղամարդկանց մրցաշարերում։ Բացառություն կարվի միայն անդրոգենների հանդեպ լիարժեք անզգայունության համախտանիշ (CAIS) կամ սեռական զարգացման այլ խանգարումներ ունեցող մարզուհիների համար՝ պայմանով, որ նրանք չեն ընդունում անաբոլիկ ստերոիդներ։

Կոմիտեն հստակեցնում է նաև, որ նոր կանոնները հետադարձ ուժ չունեն և չեն տարածվում սիրողական սպորտի վրա։

Հիշեցնենք, որ ՄՕԿ-ի կողմից նախապատրաստվող այս սահմանափակումների մասին դեռևս 2025 թվականի նոյեմբերին հայտնել էր բրիտանական The Times պարբերականը։ Հրատարակության աղբյուրները վկայակոչել էին ՄՕԿ-ի բժշկական և գիտական հարցերով տնօրեն Ջեյն Թորնթոնի զեկույցը, որի նախնական արդյունքները փաստում են՝ արական սեռի մարզիկների ֆիզիկական առավելությունները պահպանվում են նույնիսկ հորմոնալ թերապիա անցնելուց հետո։

🎥 Պատմություն կերտելով իր երկրի համար․ ՄՕԿ-ը Արթուր Դավթյանի նվիրված տեսանյութ է հրապարակել

Suren Sahakyan — Thu, 26 Jun 2025 16:51:04 +0000

Միջազգային օլիմպիական կոմիտեն (ՄՕԿ) տեսանյութ է պատրաստել՝ նվիրված հայ մարմնամարզիկ, Օլիմպիական խաղերի արծաթե և բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանի անցած ուղուն։

«Պատմություն կերտելով իր երկրի համար և ապացուցելով, որ համբերությունը գլխավորն է։ Արթուր Դավթյանից պահանջվեց երեք Օլիմպիական խաղեր՝ սպորտային մարմնամարզությունում Հայաստանի առաջին օլիմպիական մեդալը նվաճելու համար, իսկ չորրորդում՝ Փարիզ-2024-ում, նա բրոնզից անցավ արծաթե մեդալի։

Կհանդիպե՞նք Լոս Անջելես-2028-ում, Արթուր»,-գրված է ՄՕԿ-ի հրապարակմանը կից։

Making history for his country & proving that patience is key ✨

It took Artur Davtyan three Olympic Games to win Armenia’s first Olympic medal in artistic @gymnastics, and at his fourth, in #Paris2024, he advanced from bronze to silver.

See you at @LA28, Artur? 😉 pic.twitter.com/B6eod78PgN

— The Olympic Games (@Olympics) June 26, 2025

ՄՕԿ-ն այսուհետ առցանց խանութ կունենա

Erik — Fri, 29 Oct 2021 13:54:05 +0000

Միջազգային օլիմպիական կոմիտեն հայտարարել է առցանց խանութի բացման մասին, գրում է ՀԱՕԿ-ը: Այնտեղից կարելի է անցած և ապագա օլիմպիական խաղերին վերաբերող պարագաներ գնել։ Այս մասին հայտնում է ՄՕԿ-ի մամուլի ծառայությունը։

Համաշխարհային մարզասերը կարող է ձեռք բերել ձեռք բերել օլիմպիական խորհրդանիշներով ապրանքներ և զգալ օլիմպիզմի կախարդիչ ուժը:

Խանութի արտադրանքը բաժանված է երեք բաժնի. առաջինում ընդգրկված են 2024, 2026 և 2028 թթ-ի օլիմպիական խաղերին նվիրված հավաքածուները, երկրորդը օլիմպիական ժառանգությանն է նվիրված, որտեղ ցուցադրված են անցած խաղերի պարագաներ, իսկ երրորդը նախատեսված է երիտասարդ լսարանի համար և ներառում է ՄՕԿ-ի բրենդային բացառիկ արտադրանքը:

2022 թ-ի ամռանը խանութի տեսականին հասանելի կլինի աշխարհի բոլոր երկրների համար:

Կայացել է ՄՕԿ-ի գործկոմի հերթական նիստը

Erik — Fri, 10 Sep 2021 17:29:21 +0000

Տեղի է ունեցել միջազգային օլիմպիական կոմիտեի գործկոմի հերթական նիստը, հայտնում է ՀԱՕԿ-ը:

Ներկաները ընդգծել են, որ նախորդ ամռանը Տոկիոյում անցկացված օլիմպիական խաղերի բոլոր մասնակիցները հետևել են համավարակի համար սահմանված հատուկ կանոններին: Դա վերաբերում է մարզիկներին, մարզիչներին, պաշտոնյաներին, լրատվամիջոցների ներկայացուցիչներին:

«Նման միջոցառումներ կձեռնարկվեն նաև հաջորդ ՝ «Պեկին – 2022» ձմեռային խաղերից առաջ: Անվտանգ օլիմպիական խաղերի անցկացման համար ՄՕԿ-ը և կազմկոմիտեն կառաջնորդվեն նույն սկզբունքներով, ինչպես «Տոկիո-2020»-ի դեպքում»,-ասել է ՄՕԿ-ի նախագահ Թոմաս Բախը:

Համապատասխան ձեռնարկները, ամենայն հավանականությամբ, կհրապարակվեն հոկտեմբերին:

Տոկիոյի խաղերում գործել են հատուկ շտաբներ, որոնք ստացել են խախտումների մասին արձանագրությունները: Ինչպես հայտնի է, պահանջվել է հետևել սոցիալական հեռավորություն պահպանելու, գրկախառնություններից և ձեռքսեղմումներից զերծ մնալու, զբոսանք կատարելու կանոններին, պարբերաբար կորոնավիրուսի թեստերի առկայությանը:

Տոկիոյում մրցումների մեծամասնությունն անցկացվել է առանց հանդիսականի: 2022 թ-ի խաղերում երկրպագուների ներկայության հարցը դեռևս որոշված չէ: Հաշվի կառնվի տվյալ ժամանակահատվածում համաճարակաբանական իրավիճակը:

Գործկոմի անդամները նաև ողջունել են հոկեյի ազգային լիգայի խաղացողների ասոցիացիայի միջև ձեռք բերված համաձայնությունը, ըստ որի, Հյուսիսային Ամերիկայի լիգայի ներկայացուցիչները կմասնակցեն Պեկինում կայանալիք օլիմպիական մրցաշարին: Այդ գործին նպաստել է հատկապես մարզաձևի միջազգային ֆեդերացիան:

Հոկտեմբերից դեկտեմբեր ընկած ժամանակահատվածում Չինաստանում կանցկացվեն մի շարք փորձնական մրցումներ, որոնցում մարզիկները, տեխնիկական անձնակազմը, ինչպես նաև ՄՕԿ-ի և կազմկոմիտեի ներկայացուցիչները կկարողանան գնահատել մարզահամալիրների հնարավորությունները և անհրաժեշտ այլ ճշգրտումներ կկատարեն:

Գործկոմի կարևոր որոշումներից է ԿԺԴՀ-ի ԱՕԿ-ի հեռացումը մինչև 2022 թվականի ավարտը: Դա պայմանավորված է նրանով, որ այդ երկրի մարզական պատվիրակությունը հրաժարվեց Տոկիոյի խաղերի մասնակցությունից:

Բելառուսի Օլիմպիական կոմիտեն պատասխանել է ՄՕԿ-ին

Վարուժան Բաբայան — Wed, 10 Mar 2021 10:27:14 +0000

Բելառուսի ազգային օլիմպիական կոմիտեն (ԲԱՕԿ) անհիմն է համարում Միջազգային օլիմպիական կոմիտեի որոշումը Վիկտոր Լուկաշենկոյին կազմակերպության նոր նախագահ չճանաչելու վերաբերյալ: Այս մասին հաղորդվում է ԲԱՕԿ պաշտոնական կայքում:

Կազմակերպությունը նշում է, որ նոր նախագահի ընտրությունն անցել է բոլոր կանոններին համապատասխան: Նրանք նաև մեղադրել են ՄՕԿ-ին `«սպորտը քաղաքականությունից դուրս» սկզբունքը խախտելու մեջ: «ՄՕԿ-ի գործողությունները ապացույցների բազա չունեն` հիմնված սուբյեկտիվության և «երկակի ստանդարտների» քաղաքականության վրա», — ասված է հայտարարության մեջ:

Օլիմպիական կոմիտեն առանձին նշել է, որ բոլոր մարզիկները, անկախ իրենց քաղաքական հայացքներից, շարունակում են պատրաստվել օլիմպիական խաղերին և գտնվում են հավասար պայմաններում: Իսկ երկրի ազգային հավաքականների ընտրությունը կատարվելու է բացառապես մարզական սկզբունքների հիման վրա:

Ավելի վաղ ՄՕԿ-ը Վիկտոր Լուկաշենկոյին չէր ճանաչել Բելառուսի Օլիմպիական կոմիտեի նոր նախագահ `այն բանի համար, որ Մինսկը, ըստ ՄՕԿ-ի, չի կարող լիովին «ապահովել մարզիկների իրավունքների պաշտպանությունը», ինչպես նաև «պաշտպանել նրանց խտրականությունից կամ ճնշումից»:

ՄՕԿ-ը չի ճանաչել Վիկտոր Լուկաշենկոյի՝ Բելառուսի օլիմպիական կոմիտեի ղեկավարի պաշտոնում ընտրվելը

Վարուժան Բաբայան — Tue, 09 Mar 2021 06:28:24 +0000

Միջազգային օլիմպիական կոմիտեն (ՄՕԿ) չի ճանաչել Վիկտոր Լուկաշենկոյի՝ Բելառուսի ազգային օլիմպիական կոմիտեի ղեկավարի պաշտոնում ընտրվելը և երկարաձգել է նրա և Դմիտրի Բասկովի նկատմամբ պատժամիջոցները, հայտնում է ՄՕԿ կայքը:

Ինչպես նշված է հաղորդագրության մեջ, նման որոշում է կայացրել ՄՕԿ-ի գործադիր կոմիտեն, որը նույնպես չի ճանաչել Բասկովի ընտրությունը որպես գործկոմի անդամ:

Վիկտոր Լուկաշենկոյին և Բասկովին առայժմ արգելված է ցանկացած ձևաչափով մասնակցել Օլիմպիական խաղերին:

2020 թվականի դեկտեմբերին ՄՕԿ-ը հայտարարեց, որ կոմիտեն ժամանակավորապես արգելում է Բելառուսի նախագահ Ալեքսանդր Լուկաշենկոյին, որն այն ժամանակ նաև ՕԿ-ի ղեկավարն էր, ինչպես նաև Վիկտոր Լուկաշենկոյին և Դմիտրի Բասկովին, որպես ՕԿ-ի գործադիր կոմիտեի անդամ, մասնակցել ՄՕԿ-ի հովանու ներքո անցկացվող բոլոր միջոցառումներին, ներառյալ ՝ Օլիմպիական խաղերը:

Ազգային օրհներգի փոխարեն ՝ «Կատյուշա». Ռուս օլիմպիականների յուրահատուկ առաջարկը

Erik — Thu, 14 Jan 2021 13:25:11 +0000

Ռուսաստանի Օլիմպիական կոմիտեին մարզիկների հանձնաժողովն առաջարկել է երկրի հիմնի փոխարեն, օլիմպիադաներում օգտագործել «Կատյուշա» հայտնի երգը: Այս մասին տեղեկացնում է ТАСС-ը:

«Քննարկել ենք երաժշտական ձևավորումը: Շատ տարբերակներ ենք քննարկել, որոնց մեջ բազմաթիվ նորաոճ երգեր են եղել:

Այդուհանդերձ, մենք ընտրեցինք «Կատյուշա» հայտնի երգը, քանի որ այն մեծ ճանաչում ունի մեր երկրում»,-ասել է ՌՕԿ-ի մարզիկների հանձնաժողովի նախագահ Սոֆյա Վելիկայան:

Հիշեցնենք, որ մարզական արբիտրաժային դատարանի (CAS) որոշմամբ ՝ ռուս մարզիկները իրավունք ունեն օլիմպիական խաղերին և աշխարհի առաջնություններին մասնակցել միայն չեզոք կարգավիճակով:

Մարզիկներին արգելվում է ռուսական եռագույնով համազգեստ կրել, իսկ հաղթանակների դեպքում ազգային օրհներգը պետք է փոխարինել այլ երաժշտությամբ:

Ծանրամարտիկների օլիմպիական քվոտան կրճատվել է

Erik — Wed, 09 Dec 2020 09:49:36 +0000

Միջազգային Օլիմպիական կոմիտեն ծանրամարտ մարզաձևում ընդամենը 10 մրցանակային կոմպլեկտ կխաղարկի 2024 թվականին կայանալիք Օլիմպիական խաղերում: Այս որոշման մասին հայտնել է ՄՕԿ-ի սպորտային տնօրեն Կիտ Մակքոնուելը:

Դա 4 մրցանակային կոմպլեկտով պակաս է Տոկիո 2020-ից (2021), սակայն, դա էլ վերջնական որոշում չէ, քանի որ ծանր աթլետիկան իր մեջ պարունակում է մի շարք դոպինգային սկանդալներ և ռիսկեր: Այդ պատճառով, չի բացառվում, որ այն դուրս կբերվի օլիմպիական մարզաձևերի ցանկից:

«Ռիոյի խաղերում, ծանրամարտին հատկացված քվոտան հավասար էր 260-ի, Տոկիոյում ՝ 190-ի, իսկ ահա Փարիզում այն կկազմի 120 ծանրամարտիկ: Նախկինում մենք 14 մրցանակային կոմպլեկտ էինք խաղարկում, իսկ հիմա դրանց թիվը կնվազի չորսով:

Բացի այդ, մենք կարող ենք ծանրամարտը հանել օլիմպիական մարզաձևերի ցանկից»,-ասել է Մակքոնուելը:

Հիշեցնենք, որ ՄՕԿ-ի նախագահ Տոմաս Բախը իր դժգոհությունն էր հայտնել ծանրամարտում առկա դոպինգային և կոռուպցիոն սկանդալներից:

Նա հայտարարել էր, որ ցնցված է Ծանրամարտի միջազգային ֆեդերացիայում կոռուպցիայի վերաբերյալ զեկույցից:

ՄՕԿ-ը ժամանակավորապես կասեցրել է Ալեքսանդր Լուկաշենկոյի և ԲՕԿ-ի և գործունեությունը միության շրջանակում

Erik — Tue, 08 Dec 2020 13:17:53 +0000

Միջազգային օլիմպիական կոմիտեն ժամանակավորապես կասեցրել է Բելառուսի օլիմպիական կոմիտեի աշխատակիցների և երկրի նախագահ Ալեքսանդր Լուկաշենկոյի գործունեությունը միության շրջանում, տեղեկացնում է Коммерсантъ-ը:

ՄՕԿ-ը նման որոշումը բացատրել է այն հանգամանքով, որ Բելառուսի ղեկավարությունը պատշաճ կերպով իր մարզիկներին չի պաշտպանել քաղաքական հետապնդումներից: Այս մասին հայտարարել է միության նախագահ Տոմաս Բախը:

Նրա խոսքով, նման գործելաոճը հակասում է Միջազգային օլիմպիական կոմիտեի արժեքներին:

Հիշեցնենք, որ Օլիմպիական խաղերին ներկա չի գտնվի նաև Լուկաշենկոյի որդին ՝ Վիկտոր Լուկաշենկոն, ով հանդիսանում է ԲՕԿ փոխնախագահ:

ՄՕԿ-ը նաև արգելափակել է ԲՕԿ-ին մատուցվելիք բոլոր ֆինանսական վճարները:

Բելառուս պաշտոնյաների փոխարեն, միությունն այդ գումարները փոխանցել է այդ երկիրը ներկայացնող մարզիկներին:

Հավելենք, որ այս տարի կայացած Բելառուսի նախագահի ընտրություններում, Լուկաշենկոն հաղթող ճանաչվեց, ինչը երկրում մեծ դժգոհությունների առիթ հանդիսացավ:

Սպորտը կարող է կյանքեր փրկել․ ՄՕԿ-ի նախագահ

Erik — Mon, 23 Nov 2020 06:15:36 +0000

Սպորտը կարող է կյանքեր փրկել, կորոնավիրուսի համաճարակի ժամանակ պարզ դարձավ, թե որքան կարևոր է այն առողջության համար: Այս կարծիքը հայտնել է Միջազգային օլիմպիական կոմիտեի (ՄՕԿ) ղեկավար Թոմաս Բախը G20 երկրների ղեկավարների գագաթնաժողովում, հայտնում է ՄՕԿ մամուլի ծառայությունը:

«Սպորտը կարող է կյանքեր փրկել: Կորոնավիրուսային ճգնաժամի ընթացքում մենք բոլորս իմացանք, թե որքան կարևոր է սպորտը ֆիզիկական և հոգեկան առողջության համար:

Առողջապահության համաշխարհային կազմակերպությունը (ԱՀԿ) դա ճանաչեց` համաձայնագիր կնքելով ՄՕԿ-ի հետ: Այս համաձայնագրով ՄԱԿ-ը, ԱՀԿ-ն և ՄՕԿ-ը սկսել են համատեղ արշավ, որը կոչվում է «Առողջ միասին»՝ միջազգային ծրագրերը խթանելու համար, և մենք պատրաստվում ենք նպաստել պատվաստումների համաշխարհային արշավին», – ասել է Բախը:

«Այս ճգնաժամից մենք մեկ կարևոր դաս ենք քաղել։ Մեզ ավելի շատ համերաշխություն է պետք: Մենք շուտով կտոնենք համերաշխության այս դրսևորումը Տոկիոյի հետաձգված Օլիմպիական և Պարալիմպիկ խաղերում», – ավելացրել է ՄՕԿ-ի ղեկավարը: