Միջազգային օլիմպիական կոմիտեն (ՄՕԿ) տեսանյութ է պատրաստել՝ նվիրված հայ մարմնամարզիկ, Օլիմպիական խաղերի արծաթե և բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանի անցած ուղուն։

«Պատմություն կերտելով իր երկրի համար և ապացուցելով, որ համբերությունը գլխավորն է։ Արթուր Դավթյանից պահանջվեց երեք Օլիմպիական խաղեր՝ սպորտային մարմնամարզությունում Հայաստանի առաջին օլիմպիական մեդալը նվաճելու համար, իսկ չորրորդում՝ Փարիզ-2024-ում, նա բրոնզից անցավ արծաթե մեդալի։

Կհանդիպե՞նք Լոս Անջելես-2028-ում, Արթուր»,-գրված է ՄՕԿ-ի հրապարակմանը կից։

Making history for his country & proving that patience is key ✨

It took Artur Davtyan three Olympic Games to win Armenia’s first Olympic medal in artistic @gymnastics, and at his fourth, in #Paris2024, he advanced from bronze to silver.

See you at @LA28, Artur? 😉 pic.twitter.com/B6eod78PgN

— The Olympic Games (@Olympics) June 26, 2025

Հայաստանի մարմնամարզության հավաքականը սեպտեմբերի 25-ին կմեկնի Կիև՝ մասնակցելու միջազգային մրցաշարի՝  Ուկրաինայի բաց առաջնությանը։ 

Վահագն Դավթյանը ելույթ կունենա օղակների վրա վարժությունում, իսկ Արթուր Դավթյանն ու Գագիկ Խաչիկյանը՝  բոլոր 6 գործիքների վրա:

Հավաքականի՝ Ուկրաինայում գտնվելու ողջ ծախսերը կհոգան կազմակերպիչները։ Ամենայն հավանականությամբ այս մակարդակի մրցաշար այս տարի այլևս չի անցկացվի։

Ռուսաստանի սպորտային մարմնամարզության հավաքականի առաջատար Արթուր Դալալոյանը վնասվածքի պատճառով բաց կթողնի ազգային թիմի առաջին հավաքը:

Այս մասին հայտնում է sportbox-ը՝ մեջբերելով Ռուսատանի հավաքականի ավագ մարզիչ Վալենտինա Ռոդիոնենկոյի խոսքերը:

«Հաջորդ հավաքը կմեկնարկի հունիսի 22-ին և կտևի մինչև հուլիսի 12-ը: Այս հավաքը կավարտվի հունիսի 21-ին: Հունիսի 22-ին մենք սպասում ենք Արթուր Դալալոյանին, որի հետ մշտական կապի մեջ ենք:

Բազա ժամանելուն պես Արթուրը պետք է կորոնավիրուսի թեստ հանձնի: Եթե ամեն ինչ լավ լինի, նա մնացած տղաների հետ մարզվելու հնարավորություն կստանա»,- ասել է Ռոդիոնենկոն:

Դալալոյանը շարունակում է վերականգնվել հին վնասվածքից: Մարզչական շտաբը 2018 թվականի աշխարհի բացարձակ չեմպիոնին թույլ է տվել հավաքականին միանալ երկրորդ հավաքից:

Հայաստանի մարմնամարզության հավաքականի անդամ, աշխարհի գավաթի խաղարկության բրոնզե մեդալակիր Արթուր Ավետիսյանը երեկ՝ մայիսի 19-ին, ուսի վիրահատության է ենթարկվել. այն հաջող է անցել:

Այս մասին ArmSport-ը տեղեկացավ անձամբ մարզիկից:

«Մկանային խնդիր էր: Դեկտեմբերից ցավեր ունեի ու ստիպված էի վիրահատվել: Հիմա ամեն ինչ լավ է»,- ասել է Արթուր Ավետիսյանն, ով արդեն դուրս է գրվել հիվանդանոցից:

Ավետիսյանի խոսքով, ինքը մոտ 5-6 ամսից կկարողանա վերսկսել մարզումները:

Հիշեցնենք՝ Արթուր Ավետիսյանն ավելի վաղ ճանաչվել էր 2019 թվականի լավագույն երիտասարդ մարզիկ ու նաև ընդգրկվել էր 2019 թվականի «Տարվա 10 լավագույն մարզիկների» ցանկում:

2019-ի ամռանն Ավետիսյանը նաև բրոնզե մեդալ էր նվաճել Չինաստանի Ուհան քաղաքում կայացած Համաշխարհային բանակային խաղերում։ 

Սպորտային մարմնամարզության տղամարդկանց հավաքականը մայիսի 4-ից վերսկսել է մարզումները, թիմի հետ մարզումներին մասնակցել է նաև Արթուր Ավետիսյանը:

Հավաքականի գլխավոր մարզիչ Հակոբ Սերոբյանն ավելի վաղ հայտնել էր, որ ամռանը թիմն ուսումնամարզական հավաք կանցկացնի Թբիլիսիում։ Հաստատվել է Բաթումիի  միջազգային մրցաշարը։ Աշնանը նշանակված են աշխարհի գավաթի խաղարկության մրցումները։ Այդուհանդերձ շատ բան  կապված է իրավիճակի կայունացման հետ:

Մարմնամարզության միջազգային ֆեդերացիան (FIG) հայտարարել է, որ Դոհայում նախատեսված սպորտային մամնամարզության աշխարհի գավաթի խաղարկության փուլի ժամկետը երկրորդ անգամ է տեղափոխվում։ Այդ մասին տեղեկացնում է ՀԱՕԿ-ի պաշտոնական կայքը։

Սկզբում մրցաշարի անցկացման ժամկետները մարտից փոխվեցին հունիս, այժմ էլ այն հետաձգվել է անորոշ ժամանակով։ Նոր ժամկետը մարզաձևի միջազգային ֆեդերացիան կհայտնի ավելի ուշ։

Այսօր հայտնի էր դարձել նաև, որ Բադմինթոնի միջազգային ֆեդերացիան հայտարարել է Մեծ մրցանակի խաղարկության երեք փուլերի հետաձգման մասին:

Ավելի վաղ հետաձգվել էին նաև գեղալողի համաշխարհային շարքի մրցաշարը (մրցումների  շրջանակում ծրագրված է 9 փուլ) և Թեթև աթլետիկայի Եվրոպայի առաջնությունը։

Այս օրերին Թբիլիսիում տեղացի մարմնամարզիկների հետ համատեղ ուսումնամարզական հավաքն է շարունակում Հայաստանի սպորտային մարմնամարզության  կանանց և տղամարդկանց ընդհանուր պատվիրակությունը: Այդ մասին հայտնում է ՀԱՕԿ-ի պաշտոնական կայքը։

Երևան վերադառնալուց անմիջապես հետո մեր առաջատարներից Հարություն Մերդինյանը, Վահագն Դավթյանը, Արթուր Դավթյանը և Արթուր Ավետիսյանը պետք է մեկնեին Դոհա՝ մասնակցելու մարտի 18-22-ին անցկացվող Աշխարհի գավաթի խաղարկության հերթական փուլին: Բայց մրցաշարը կորոնավիրուսի համաճարակի պատճառով տեղի չի ունենա:

Մարզաձևի միջազգային ֆեդերացիան նախատեսել է նշած մրցաշարն անցկացնել հունիսի 3-6-ը` կրկին Դոհայում:

Երևանում ավարտվեց Հայաստանի սպորտային մարմնամարզության առաջնությունը: Այսօր տեղի ունեցան առանձին գործիքների եզրափակիչները:

Չեմպիոն դարձան հետևյալ մարզիկ-մարզուհիները:

Տղամարդիկ. Նորայր Հովհաննիսյան /ազատ վարժություններ /, Հարություն Մերդինյան / նժույգթափեր /, Վահագն Դավթյան / օղակներ /, Արթուր Դավթյան / հենցատկ և զուգափայտ / և Էրիկ Բաղդասարյան / պտտաձող /:

Կանայք. Ինեսա Ջաղինյան  / ազատ վարժություն և հենացատկ / ,  Ջեմմա Բերբերյան / զուգափայտ / և Տաթև Սուքիասյան /  հավասարակշռության գերան /:Բացառությամբ գյումրեցի Տաթև Սուքիասյանի, մյուս բոլոր չեմպիոնները Երևանից են:

Առաջնության արդյունքներով կազմավորվեցին հավաքականներ, որոնք փետրվարի 29-ին ուսումնամարզական հավաքի կմեկնեն Թբիլիսի: Այնուհետև լավագույնները կուղևորվեն Դոհա` մասնակցելու մարտի 16-ին մեկնարկելիք աշխարհի գավաթի` օլիմպիական վարկանիշային խաղարկությանը:

Օլիմպիական խաղերի եռակի, աշխարհի քառակի և Եվրոպայի կրկնակի չեմպիոն Ալբերտ Ազարյանն այսօր տոնում է ծննդյան 91-ամյակը: 

ՀՀ կրթության, գիտության, մշակույթի և սպորտի նախարար Արայիկ Հարությունյանը լեգենդար մարզիկին շնորհավորել է նրա անունը կրող Մարմնամարզության օլիմպիական հերթափոխի մանկապատանեկան մարզադպրոցում: Այս մասին հայտնում է նախարարության պաշտոնական կայքը:

ԿԳՄՍ նախարար Արայիկ Հարությունյանի խոսքով՝ անվերջ կարելի է թվարկել կոչումներն ու մեդալները, որոնք Ալբերտ Ազարյանի տասնամյակների բեղուն գործունեության արդյունքն են.

«Անգնահատելի է Ձեր անմնացորդ նվիրումը, ներդրումն ու վաստակը հայկական սպորտի զարգացման և հայ մարմնամարզիկների վարպետության բարձր մակարդակն աշխարհին ներկայացնելու կարևորագույն գործում: Մաղթում եմ Ձեզ առողջություն և ամենայն բարիք»,- ասել է Արայիկ Հարությունյանը՝ ընդգծելով, որ Ազարյանն իր օրինակով շարունակում է սերունդներ կրթել:

Ալբերտ Ազարյանը նշել է, որ իրեն 19 տարեկան է զգում, շարունակում է մարզվել և ոգեշնչել երիտասարդ մարզիկներին:

«Օղակների արքան» և ԿԳՄՍ նախարարը շրջել են մարզադպրոցում, հայկական սպորտի լեգենդը վարակիչ կենսուրախությամբ ներկայացրել է մարզադպրոցի գործունեությունը:

Արայիկ Հարությունյանը հույս է հայտնել, որ 92-ամյակին Ալբերտ Ազարյանին նույն ոգևորությամբ կտեսնի, իսկ շնորհավորելու առիթներն ավելացած կլինեն՝ ակնարկելով, որ Ազարյանի մարզադպրոցի սան Արթուր Դավթյանը Տոկիոյում կայանալիք Օլիմպիական խաղերում գուցե կդառնա մեդալակիր:

Հայ  հանճարեղ մարմնամարզիկ Ալբերտ Ազարյանն այսօր` փետրվարի 11-ին, նշում է ծննդյան 91-րդ տարեդարձը:

Ազարյանը հայաստանցի միակ մարզիկն է, ով 11 անգամ հռչակվել է ԽՍՀՄ չեմպիոն` օղակներ, զուգափայտ, պտտաձող մրցաձևերում: Եվրոպայի կրկնակի և աշխարհի քառակի չեմպիոն է: Միակ հայ  մարզիկն է, ով կրում է Օլիմպիական խաղերի եռակի չեմպիոնի պատվավոր կոչումը:

Ալբերտ  Ազարյանն արժանացել է  ԽՍՀՄ, ՀԽՍՀ և անկախ Հայաստանի բարձրագույն պարգևներին և կոչումներին:

Ալբերտ Ազարյանը հաղթել է 1956 և 1960 թվականների Օլիմպիական խաղերում: Նա արժանացել է նաև աշխարհի (1954, 1958), Եվրոպայի (1955), Ասիական խաղերի (1963) չեմպիոնի կոչման: Ակտիվ սպորտին հրաժեշտ տալուց հետո մինչ օրս զբաղվում է մարզչական և մանկավարժական գործունեությամբ:

Մարմնամարզության միջազգային ֆեդերացիայի հավաստագրման համաձայն` օղակների վրա նրա կատարած վարժությունների համալիրը պաշտոնապես անվանակոչվեց «Ազարյանական խաչ»:

ArmSport-ը շնորհավորում է 20-րդ դարի Հայաստանի լավագույն մարզիկին, մաղթում առողջություն և նոր սերնդին իր անգնահատելի փորձը փոխանցելու անսպառ ներուժ:

ՀՀ նախագահ Արմեն Սարգսյանը, հիմք ընդունելով վարչապետի միջնորդությունը՝ համաձայն Սահմանադրության 136-րդ հոդվածի, ինչպես նաև «Հայաստանի Հանրապետության պետական պարգևների և պատվավոր կոչումների մասին» օրենքի 5.3-րդ հոդվածի 1-ին մասի,
Ֆիզիկական կուլտուրայի և սպորտի զարգացման գործում ունեցած վաստակի համար Հայաստանի Հանրապետության վաստակավոր մարզչի պատվավոր կոչում է շնորհել՝

Արմեն Սամվելի ՄԿՐՏՉՅԱՆԻՆ Գյումրու քաղաքապետարանի Յ. Վարդանյանի անվան ծանրամարտի մարզադպրոցի մարզիչ-մանկավարժ

Գառնիկ Ռուբենի ԱԼԵՔՍԱՆՅԱՆԻՆ Արարատ քաղաքի մարզադպրոցի ծանրամարտի մարզիչ

Կարեն Լավուրիկի ԿԱՐԱՊԵՏՅԱՆԻՆ Գյումրու մանկապատանեկան համալիր մարզադպրոցի ծանրամարտի մարզիչ-մանկավարժ

Արշակ Գյորգիի ՀԱՅՐԱՊԵՏՅԱՆԻՆ Երևանի օլիմպիական հերթափոխի պետական մարզական քոլեջի ազատ ոճի ըմբշամարտի մարզիչ-մանկավարժ

Կարեն Ռաֆիկի ԲԱՂԴԱՍԱՐՅԱՆԻՆ Երևան քաղաքի Ա. Ազարյանի անվան մարմնամարզության մարզադպրոցի մարզիչ-մանկավարժ:

Գյումրեցի մասնագետ Արմեն Մկրտչյանը մեծահասակների ծանրամարտի 2019թ աշխարհի և Եվրոպայի չեմպիոն, Մ23 տարեկանների 2019թ Եվրոպայի չեմպիոն, 2014թ ամառային պատանեկան 2-րդ օլիմպիական խաղերի չեմպիոն Հակոբ Մկրտչյանի անձնական մարզիչն է:

Արարատցի մասնագետ Գառնիկ Ալեքսանյանը գերծանր քաշային ծանրորդ, մեծահասակների 2019թ աշխարհի և Եվրոպայի բրոնզե մեդալակիր, երիտասարդների 2010թ աշխարհի չեմպոին, մեծահասակների 2010թ և 2014թ Եվրոպայի փոխչեմպիոն, երիտասադրների Մ23 2009թ Եվրոպայի չեմպիոն Ռուբեն Ալեքսանյանի հայրն ու անձնական մարզիչն է:

Արշակ Հայրապետյանը ազատ ոճի ըմբշամարտի ՀՀ պատանեկան հավաքականի ավագ մարզիչն է: Նա նաև մեծահասակների 2019թ Եվրոպայի չեմպիոն, 57 կգ քաշային կարգում երիտասարդների 2018 թ. Եվրոպայի չեմպիոն և նույն տարվա աշխարհի երիտասարդական առաջնության բրոնզե մեդալակիր Արսեն Հարությունյանի անձնական մարզիչն է:

Երևանցի ճանաչված մարզիչ Կարեն Բաղդասարյանն էլ համաշխարահային ունիվերսիադիաների կրկնակի չեմպիոն, մարմնամարզիկ Արթուր Թովմասյանի անձնական մարզիչն է:

Իսկ գյումրեցի մասնագետ Կարեն Կարապետյանը երիտասարդների 2019թ աշխարհի և Եվրոպայի չեմպիոն, ծանրորդ Վարազդատ Լալայանի և Մ15 2019թ Եվրոպայի առաջնության 89 կգ քաշային կարգի փոխչեմպիոն Ալեքսանդր Լազարյանի անձնական մարզիչն է: