մարմնամարզություն — Armsport.am

Փայլուն մեկնարկ Օսիյեկում. Հայաստանի բոլոր չորս մարմնամարզիկները մեդալների համար կպայքարեն եզրափակիչում

Gevorg Martirosyan — Sat, 11 Apr 2026 11:10:11 +0000

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության հերթական փուլը խոստումնալից է դասավորվում Հայաստանի հավաքականի համար: Մեր թիմի բոլոր չորս ներկայացուցիչներն էլ վստահորեն հաղթահարել են որակավորման փուլի արգելքն ու նվաճել եզրափակիչի ուղեգրեր:

Հենացատկի վարժությունում հերթական անգամ իր բարձր կարգն է հաստատել Հայաստանի հավաքականի առաջատար Արթուր Դավթյանը։ Նա ցույց է տվել լավագույն արդյունքն ու առաջին հորիզոնականով դուրս եկել եզրափակիչ:

Նժույգ-թափերի վարժությունում մեդալների համար կպայքարեն մեր երկու մարմնամարզիկները՝ Համլետ Մանուկյանն ու Մամիկոն Խաչատրյանը։ Տղաները հաջողությամբ են հանդես եկել որակավորման փուլում և զբաղեցրել են համապատասխանաբար երրորդ և չորրորդ տեղերը:

Օղակների վարժությունում ևս Հայաստանը կունենա իր ներկայացուցիչը. Արթուր Ավետիսյանը գրանցել է երրորդ լավագույն արդյունքն ու ապահովել իր տեղը վճռորոշ փուլում:

Հիշեցնենք, որ այս նույն կազմով հայ մարմնամարզիկները տպավորիչ ելույթներ էին ունեցել նաև Եգիպտոսի մայրաքաղաք Կահիրեում կայացած աշխարհի գավաթի նախորդ փուլում։ Այն ժամանակ Արթուր Դավթյանն ու Համլետ Մանուկյանը հռչակվել էին մրցաշարի հաղթողներ և նվաճել ոսկե մեդալներ, իսկ Արթուր Ավետիսյանը կանգնել էր պատվո հարթակի երկրորդ աստիճանին՝ արժանանալով արծաթե պարգևի: Եզրափակիչներում մեր մարզիկները կփորձեն կրկնել և զարգացնել այս հաջողությունը:

🎥 Արթուր Դավթյանը՝ Աշխարհի գավաթի խաղարկության ոսկե մեդալակիր

Gevorg Martirosyan — Mon, 06 Apr 2026 16:31:01 +0000

Եգիպտոսի մայրաքաղաք Կահիրեում ընթացող սպորտային մարմնամարզության Աշխարհի գավաթի խաղարկության չորրորդ փուլը հաղթական է ստացվել Հայաստանի ազգային հավաքականի համար:

Օլիմպիական խաղերի արծաթե և բրոնզե մեդալակիր, աշխարհի ու Եվրոպայի եռակի չեմպիոն Արթուր Դավթյանը հերթական անգամ ապացուցել է իր բարձր կարգը՝ նվաճելով մրցաշարի ոսկե մեդալը։

Հենացատկի վարժության եզրափակիչում հայ մարմնամարզիկը ցուցադրել է անթերի ելույթ՝ վաստակելով 14.666 միավոր և զբաղեցնելով պատվո հարթակի առաջին աստիճանը։ Նա վստահորեն շրջանցել է երկրորդ տեղը զբաղեցրած Ղազախստանի ներկայացուցիչ Ասան Սալիմովին (14.083 միավոր) և լավագույն եռյակը եզրափակած չեխ Յոնաս Դանեկին (14.016 միավոր)։

Կահիրեի մրցահարթակում տպավորիչ արդյունքներ են գրանցել նաև մեր ընտրանու մյուս անդամները։ Ավելի վաղ նժույգ-թափեր վարժությունում հավասարը չէր ունեցել Համլետ Մանուկյանը, ով վաստակելով 14.800 միավոր՝ հռչակվել էր Աշխարհի գավաթի այս փուլի հաղթող։

Օղակների վարժությունում հաջողության էր հասել Արթուր Ավետիսյանը՝ իր ակտիվում գրանցելով 14.300 միավոր և արժանանալով արծաթե պարգևի։

Շրջանցելով ադրբեջանցի մրցակցին. Համլետ Մանուկյանը ոչ մի շանս չտվեց մյուսներին

Gevorg Martirosyan — Tue, 03 Mar 2026 16:00:34 +0000

Սպորտային մարմնամարզության Եվրոպայի չեմպիոն, Ունիվերսիադայի հաղթող, երիտասարդների աշխարհի կրկնակի չեմպիոն Համլետ Մանուկյանը ճանաչվել է 2025 թ. լավագույն տղամարդ մարմնամարզիկ:

18-ամյա մարզիկը հաղթող է ճանաչվել Մարմնամարզության միջազգային ֆեդերացիայի կայքում անցկացված քվեարկության արդյունքում՝ ստանալով ավելի քան 1 մլն 30 հազար ձայն (51 %):

Համլետ Մանուկյանի հետ լավագույնի կոչման համար պայքարել են նաև սպորտային ակրոբատիկայի Եվրոպայի բրոնզե մեդալակիր, Պորտուգալիայի ներկայացուցիչ Գաբրիել Ալբուկեկը, Եվրոպայի չեմպիոն, Ադրբեջանի ներկայացուցիչ Տոֆիգ Ալիևը, սպորտային մարմնամարզության աշխարհի բրոնզե մեդալակիր, Եվրոպայի փոխչեմպիոն շվեյցարիացի Նոէ Զայֆերտը, սպորտային մարմնամարզության աշխարհի փոխչեմպիոն, Եվրոպայի քառակի չեմպիոն բրիտանացի Լյուկ Ուայթհաուսը:

Աղբյուրը՝ ԿԳՄՍՆ

Ոսկե, արծաթե մեդալներ․ Հայ մարմնամարզիկների տպավորիչ արդյունքները Կոտբուսում

Gevorg Martirosyan — Sun, 22 Feb 2026 06:35:40 +0000

Գերմանիայի Կոտբուս քաղաքում ընթացող սպորտային մարմնամարզության Աշխարհի գավաթի խաղարկության առաջին փուլում Հայաստանի հավաքականը շարունակում է ուրախացնել մեդալներով:

Հակոբ Սերոբյանի գլխավորած թիմից փայլուն ելույթ է ունեցել Արթուր Ավետիսյանը։ Օղակների վարժության եզրափակիչում հայ մարմնամարզիկը վաստակել է 14․366 միավոր՝ կանգնելով պատվո հարթակի ամենաբարձր աստիճանին և հռչակվելով Աշխարհի գավաթի խաղարկության այս փուլի հաղթող։ Նույն վարժությունում Հայաստանի մյուս ներկայացուցիչ Արթուր Դավթյանը 13․766 միավորով զբաղեցրել է 5-րդ հորիզոնականը։

Հայ մարզիկները մեդալային հաջողություն են գրանցել նաև նժույգ թափեր վարժությունում: Մամիկոն Խաչատրյանը, գերազանց ելույթ ունենալով և վաստակելով 14․966 միավոր, դարձել է մրցաշարի արծաթե մեդալակիր: Նույն մրցաձևում հանդես եկող Համլետ Մանուկյանն էլ իր ակտիվում գրանցած 14․166 միավորով մրցաշարն ավարտել է 7-րդ տեղում։

Հայտնի են Հայաստանի տարվա լավագույն մարզիկները․ ԿԳՄՍՆ-ն ամփոփել է մրցույթի արդյունքները

Gevorg Martirosyan — Fri, 26 Dec 2025 11:15:21 +0000

ՀՀ Կրթության, գիտության, մշակույթի և սպորտի նախարարությունը հրապարակել է «Սպորտի ոլորտում տարվա լավագույնների ընտրություն» մրցույթի արդյունքները։

Հաղթողների ցանկը ձևավորվել է մարզական ոլորտում հավատարմագրված 15 լրագրողների քվեարկության հիման վրա։
Ըստ քվեարկության արդյունքների՝ տարվա լավագույնները բաշխվել են հետևյալ անվանակարգերում․

Տարվա լավագույն մարզիկների եռյակ՝
Վարազդատ Լալայան (ծանրամարտ)
Մալխաս Ամոյան (հունահռոմեական ըմբշամարտ)
Արթուր Դավթյան (սպորտային մարմնամարզություն)

Լավագույն կին մարզիկ՝ Ալեքսանդրա Գրիգորյան (ծանրամարտ)

Լավագույն երիտասարդ մարզիկ՝ Գասպար Տերտերյան (ըմբշամարտ)

Տարվա հայտնություն՝ Սուրեն Հարությունյան (կարատե)

Հաշմանդամություն ունեցող լավագույն մարզիկ՝ Սարգիս Սարգսյան (շախմատ)

Լավագույն մարզիչ՝ Փաշիկ Ալավերդյան (ծանրամարտի հավաքական)

Տարվա լավագույն թիմ՝ Հայաստանի ֆուտզալի ազգային հավաքական

ՀՀ-ն լավագույնս հանրահռչակած մարզիկ՝ Համլետ Մանուկյան (մարմնամարզություն)

Իտալացի մարմնամարզիկին կոմայի մեջ են գցել Ունիվերսիադայում ընկնելուց հետո

Gevorg Martirosyan — Fri, 25 Jul 2025 11:00:52 +0000

Իտալացի մարմնամարզիկ Լորենցո Բոնիչելին դեղորայքային կոմայի մեջ է Գերմանիայի Էսեն քաղաքում անցկացվող Ունիվերսիադայի ժամանակ օղակների վրա վարժություն կատարելիս անհաջող ընկնելու հետևանքով: Այս մասին Facebook-ում հայտնել է Միջազգային մարմնամարզական ֆեդերացիայի (FIG) տեխնիկական համակարգող Սթիվ Բուչերը:

23-ամյա Բոնիչելին տղամարդկանց թիմային մրցումների ժամանակ ընկել է օղակների վրա վարժություն կատարելիս՝ վայրէջք կատարելով պարանոցի վրա: Նա անմիջապես հոսպիտալացվել է:

«Լորենցոն այժմ դեղորայքային կոմայի մեջ է՝ երեկոյան կատարված վիրահատությունից հետո: Նրա վիճակը պարզելու համար առնվազն տասը օր կպահանջվի: Մարմնամարզության ողջ համայնքն աղոթում է և ցանկանում նրա լիարժեք ապաքինումը»,- գրել է Բուչերը:

Ունիվերսիադան Էսենում կանցկացվի մինչև հուլիսի 27-ը:

ԿԳՄՍ նախարարի տեղակալն ընդունել է մարմնամարզության Եվրոպայի առաջնության մեդալակիրներին

Նարե Հովհաննիսյան — Fri, 06 Jun 2025 15:37:45 +0000

ՀՀ կրթության, գիտության, մշակույթի և սպորտի նախարարի տեղակալ Հասմիկ Ավագյանն ընդունել է Հայաստանի սպորտային մարմնամարզության հավաքականի անդամներին, որոնք 2 ոսկե, 1 արծաթե և 1 բրոնզե մեդալով վերադարձել են Գերմանիայում անցկացված Եվրոպայի առաջնությունից: Այս մասին տեղեկանում ենք ԿԳՄՍՆ պաշտոնական կայքից:

Հանդիպմանը ներկա է եղել նաև Հայաստանի մարմնամարզության ֆեդերացիայի գլխավոր քարտուղար Սահակ Անտոնյանը:

Ողջունելով մարզիկներին՝ նախարարի տեղակալ Հասմիկ Ավագյանը շնորհավորել է սպորտային կարևորագույն հաջողությունների կապակցությամբ և ընդգծել՝ առաջին անգամ հայ մարմնամարզիկները Եվրոպայի նույն առաջնությունում երկու ոսկե մեդալ են նվաճել: Նա երախտագիտություն է հայտնել միջազգային հարթակներում Հայաստանի պատիվը բարձր պահելու համար․ «Ձեր յուրաքանչյուր հաղթանակ շատ ոգևորիչ է և մեծ հպարտություն է պարգևում բոլորիս: Ամբողջ ազգն է ուրախանում ձեր հաջողություններով և, անկասկած, հեռուստաէկրաններից այն կողմ փոխանցում իր ամենաջերմ մաղթանքներն ու զգացողությունները»։

Հասմիկ Ավագյանը նաև շեշտել է՝ մարզիկների մարդկային արժանիքները, մարզիչների և ֆեդերացիայի ամբողջ անձնակազմի անգնահատելի ներդրումը կարևոր են մարզաձևի զարգացման և նոր հաջողությունների կերտման ճանապարհին:

Հիշեցնենք՝ Գերմանիայի Լայպցիգ քաղաքում կայացած Եվրոպայի առաջնությունում ոսկե մեդալակիրներ էին դարձել Արթուր Դավթյանն ու Համլետ Մանուկյանը, արծաթե մեդալը նվաճել էր Մամիկոն Խաչատրյանը, իսկ Արթուր Ավետիսյանը դարձել էր բրոնզե մեդալակիր:

Հայաստանի մարմնամարզության ֆեդերացիայի գլխավոր քարտուղար Սահակ Անտոնյանի խոսքով՝ մարզիկներն այս առաջնությունում արել են անհնարինը հաղթանակի հասնելու համար:

Մարմնամարզիկ Համլետ Մանուկյանի համար Եվրոպայի առաջնությունը մեծահասակների պայքարում նորամուտի մրցաշար էր, որտեղ նա ոսկե մեդալ նվաճեց։ Նորընծա չեմպիոնը շնորհակալություն է հայտնել ընդունելության և գնահատանքի համար՝ նշելով, որ ուրախ է ոչ միայն իր մեդալի, այլև ամբողջ թիմի գրանցած արդյունքների համար:

«Առաջին անգամ էի մասնակցում մեծահասակների առաջնությանն ու անբացատրելի զգացողություններ ունեցա, երբ ես և ընկերս կանգնեցինք պատվո հարթակի առաջին երկու աստիճաններին: Շատ ուրախ եմ, որ կարողացանք բարձրացնել մեր երկրի դրոշն ու հնչեցնել օրհներգը»,- ասել է Համլետ Մանուկյանը՝ ընդգծելով նաև հավաքականի ավագ մարզիկների աջակցության կարևորությունը:

ԵԱ-ի արծաթե մեդալակիր Մամիկոն Խաչատրյանը նշել է՝ մեծահասակների առաջնությունում նորամուտը կրկնակի մեծացրել էր պատասխանատվության զգացումը. «Մեծահասակների պայքարում մրցակցությունն ու զգացողությունները բոլորովին այլ են: Ներդրել ենք մեր ամբողջ ուժերը, և ուրախ եմ, որ հաջողության հասանք: Առանց մեր ավագ ընկերների աջակցության՝ գուցե այս ամենը չլիներ»:

Եվրոպայի առաջնության բրոնզե մեդալակիր Արթուր Ավետիսյանն էլ հույս է հայտնել՝ սա նոր հաջողությունների սկիզբ կդառնա. «Իսկապես, շատ ուրախ եմ այս մեդալի համար: Մինչ այս անընդհատ չէր ստացվում մեդալ նվաճել: Վիրահատությունից հետո տարիներ շարունակ չէի կարողանում լիարժեք վերականգնվել: Աշխարհի, Եվրոպայի առաջնություններում, ինչպես նաև Ուսանողական խաղերում 4-րդ տեղն էի զբաղեցրել և շատ ուրախ եմ, որ վերջապես սառույցը կոտրվեց: Հուսով եմ՝ սա նոր հաջողությունների սկիզբ կլինի»:

Հանդիպման ընթացքում քննարկվել են մարզաձևի զարգացմանն ուղղված տարաբնույթ հարցեր: Մարմնամարզիկներն առաջիկայում կմասնակցեն World Challenge Cup-ին, իսկ հոկտեմբերին կանցկացվի տարվա կարևորագույն ստուգատեսը՝ մարմնամարզության աշխարհի առաջնությունը: ԿԳՄՍ նախարարի տեղակալ Հասմիկ Ավագյանը հաջողություններ է մաղթել մարմնամարզիկներին առաջիկա մրցելույթներում և վերահաստատել ՀՀ կառավարության՝ մարզաձևի շարունակական զարգացմանն աջակցելու պատրաստակամությունը:

📸Հայ մարմնամարզիկների փայլուն ելույթներն ու պարգևատրումը ԵԱ-ում

Նարե Հովհաննիսյան — Fri, 30 May 2025 19:08:13 +0000

Գերմանիայի Լայպցիգ քաղաքում Հայաստանի մարմնամարզության հավաքականի անդամներն այսօր 1 ոսկե, 1 արծաթե և 1 բրոնզե մեդալ են նվաճել։

Մեծահասակների Եվրոպայի իրենց առաջին առաջնությունում Համլետ Մանուկյանը դարձել է ոսկե, իսկ Մամիկոն Խաչատրյանը՝ արծաթե մեդալակիր։ Նրանք հանդես են եկել նժույգ-թափեր վարժությունում։

View this post on Instagram

A post shared by European Gymnastics (@europeangymnastics)

Հայաստանի մյուս ներկայացուցիչ Արթուր Ավետիսյանն էլ Եվրոպայի առաջնություններում իր առաջին մեդալն է նվաճել՝ կանգնելով պատվո հարթակի երրորդ աստիճանին։

Մարմնամարզության Եվրոպայի ֆեդերացիան ներկայացնում է պարգևատրման լուսանկարները։

Վաղը՝ մայիսի 31-ին, ԵԱ-ի հենացատկի վարժության եզրափակչում հանդես կգա Օլիմպիական խաղերի արծաթե և բրոնզե մեդալակիր, աշխարհի ու Եվրոպայի չեմպիոն Արթուր Դավթյանը։

Մարմնամարզության ԵԱ․ Արթուր Ավետիսյանը՝ բրոնզե մեդալակիր

Նարե Հովհաննիսյան — Fri, 30 May 2025 17:54:44 +0000

Գերմանիայի Լայպցիգ քաղաքում ընթացող սպորտային մարմնամարզության Եվրոպայի մեծահասակների առաջնությունում Հայաստանի հավաքականի անդամ Արթուր Ավետիսյանը բրոնզե մեդալ է նվաճել։

Հայ մարմնամարզիկը օղակների վարժության եզրափակչում հավաքել է 14.366 միավոր և կկանգնի պատվո հարթակի երրորդ աստիճանին։

Այս վարժության եզրափակչում հանդես է եկել նաև Վահագն Դավթյանը։ Նա 14,166 միավորով 7-րդն է։

Հիշեցնենք՝ այսօր ավելի վաղ Եվրոպայի մեծահասկաների առաջնությունում առաջին անգամ չեմպիոն էր դարձել Համլետ Մանուկյանը, իսկ Մամիկոն Խաչատրյանը նվաճել էր արծաթե մեդալը։

Համլետ Մանուկյանը՝ մարմնամարզության Եվրոպայի չեմպիոն, Մամիկոն Խաչատրյանը՝ արծաթե մեդալակիր

Նարե Հովհաննիսյան — Fri, 30 May 2025 16:28:40 +0000

Հայաստանի ներկայացուցիչներն առաջին մեդալներն են նվաճել Գերմանիայի Լայպցիգ քաղաքում ընթացող սպորտային մարմնամարզության Եվրոպայում առաջնությունում։

Մանուկյանը կարիերայում առաջին անգամ հռչակվել է Եվրոպայի մեծահասակների չեմպիոն` նժույգ-թափերի եզրափակչում հավաքելով 14.766 միավոր։ Խաչատրյանը նույն վարժությունում 14.733 միավորով նվաճել է փոխչեմպիոնի կոչումը։

Եվրոպայի առաջնության եզրափակչում հանդես կգան նաև Արթուր Դավթյանը (հենացատկ), Արթուր Ավետիսյանը (օղակներ) և Վահագն Դավթյանը (օղակներ)։