«Բարսելոնան» պաշտոնապես հայտարարեց թիմի 22-ամյա հենակետային կիսապաշտպան Մարկ Կասադոյի տեղափոխության մասին։ Իսպանացի ֆուտբոլիստը վարձակալական հիմունքներով միացել է Լա Կորունյայի «Դեպորտիվոյին»։

Կողմերի միջև կնքված պայմանագիրը նախատեսված է մինչև 2027 թվականի հունիսի 30-ը և ներառում է ֆուտբոլիստի տրանսֆերը 30 միլիոն եվրոյով գնելու իրավունք։ Կասադոյի գործող հիմնական պայմանագիրը կատալոնական ակումբի հետ ուժի մեջ է մինչև 2028 թվականի ամառ։ Transfermarkt պորտալի տվյալներով՝ նրա շուկայական արժեքը գնահատվում է 18 մլն եվրո։

Մարկ Կասադոն «Բարսելոնայի» համակարգում էր 2015/16 մրցաշրջանից։ Նա գլխավոր թիմում իր նորամուտը նշել է 2022/23 մրցաշրջանում՝ Չեմպիոնների լիգայի՝ «Վիկտորիա Պլզենի» դեմ խաղում, իսկ 2024 թվականի ամռանը Հանսի Ֆլիկի գլխավորությամբ դարձել է առաջին թիմի լիարժեք անդամ։

Ընդհանուր առմամբ, 22-ամյա ֆուտբոլիստը «կապտանռնագույնների» կազմում անցկացրել է 75 հանդիպում՝ դառնալով 1 գոլի և 7 գոլային փոխանցման հեղինակ։ Միայն նախորդ՝ 2025/26 մրցաշրջանում նա բոլոր մրցաշարերում մասնակցել էր 34 հանդիպման, սակայն ընթացիկ մրցաշրջանում դեռ խաղադաշտ դուրս չէր եկել։ «Բարսայի» հետ Կասադոն նվաճել է 5 տիտղոս՝ դառնալով Լա Լիգայի կրկնակի չեմպիոն (2024/25, 2025/26), Իսպանիայի գավաթակիր (2024/25) և Սուպերգավաթի կրկնակի հաղթող (2024/25, 2026)։

Նոր թիմում իսպանացի կիսապաշտպանը կփնտրի կանոնավոր խաղային պրակտիկա՝ որպես ֆուտբոլիստ էլ ավելի զարգանալու և աճելու նպատակով։

«Մեզ միացել է մեծ ներուժով և ունիվերսալությամբ աչքի ընկնող ֆուտբոլիստ, ով արդեն իսկ ապացուցել է իր բարձր կարգը և ունի ինչպես ներքին, այնպես էլ միջազգային հանդիպումների հարուստ փորձ»,— ասված է «Դեպորտիվոյի» տարածած պաշտոնական հաղորդագրության մեջ։

Հավելենք, որ Լա Լիգայում հանդես եկող «Դեպորտիվոն» այժմ զբաղեցնում է մրցաշարային աղյուսակի 8-րդ հորիզոնականը։ Առաջիկա հանգստյան օրերին՝ Պրիմերայի 4-րդ տուրի շրջանակում, թիմն արտագնա խաղում ուժերը կչափի «Վիլյառեալի» հետ, որտեղ հնարավոր է կայանա Կասադոյի նորամուտը նոր ակումբի կազմում։

Անգլիական «Սանդերլենդը» բանակցություններ է սկսել կատալոնական «Բարսելոնայի» հետ՝ 22-ամյա կիսապաշտպան Մարկ Կասադոյի տրանսֆերի շուրջ։ Այս մասին հայտնում է Mundo Deportivo-ն։

Աղբյուրի համաձայն՝ երիտասարդ ֆուտբոլիստը չի մտնում «Բարսելոնայի» գլխավոր մարզիչ Հանս-Դիտեր Ֆլիկի ծրագրերի մեջ, ուստի նրա գործակալ Ժորժե Մենդեշն արդեն նոր տարբերակներ է փնտրում կարիերան շարունակելու համար:

Բացի «Սանդերլենդից», Կասադոյի ծառայություններով հետաքրքրված են Անգլիայի Պրեմիեր լիգան ներկայացնող ևս մի քանի ակումբներ՝ «Ասթոն Վիլան», «Նյուքասլը», «Բրայթոնն» ու «Նոթինգհեմ Ֆորեստը»: Սակայն նշված հավակնորդներից միայն «սև կատուներն» են առաջին քայլն արել տրանսֆերի ուղղությամբ։

Ավելի վաղ Մարկը հնարավորություն ուներ տեղափոխվելու Սաուդյան Արաբիա և վաստակելու ահռելի գումարներ, սակայն ֆինանսական կողմն այնքան էլ չի հետաքրքրում Կասադոյին. նրա բացարձակ առաջնահերթությունը եվրոպական ֆուտբոլն է։

Տեղեկությունների համաձայն՝ «Բարսելոնան» իր խաղացողի դիմաց պահանջելու է 30-ից 40 միլիոն եվրո։ Նման բարձր գինը կարող է լուրջ խոչընդոտ դառնալ և վանել պոտենցիալ գնորդներին:

Կատալոնական ակումբը լիովին պատրաստ է Կասադոյի հեռանալուն։ «Կապտանռնագույնները» նույնիսկ մրցաշրջանի հայտացուցակում խաղահամար չեն հատկացրել կիսապաշտպանին՝ նրա 17 համարի մարզաշապիկը փոխանցելով թիմի նորեկ Էնթոնի Գորդոնին։

Կատալոնական «Բարսելոնան» դիտարկում է մինչև ամառային տրանսֆերային պատուհանի փակվելը միանգամից հինգ ֆուտբոլիստի հետ բաժանվելու հավանականությունը։ Հնարավոր վաճառքների կամ վարձակալությունների վերաբերյալ վերջնական որոշումը կկայացնի ակումբի մարզական տնօրեն Դեկուն:

Ինչպես հայտնում է լրագրող Խոսե Ալվարեսը, պոտենցիալ հեռացողների ցուցակում հայտնվել են Ֆրենկի դե Յոնգը, Մարկ Կասադոն, Էկտոր Ֆորտը, Ալեխանդրո Բալդեն և Ժյուլ Կունդեն։ Նշվում է, որ այս բոլոր ֆուտբոլիստների նկատմամբ էլ այլ ակումբների կողմից կա հստակ պահանջարկ:

Խաղացողներից յուրաքանչյուրն ունի կարիերան շարունակելու իր տարբերակները.

Ֆրենկի դե Յոնգի ծառայություններով ակտիվորեն հետաքրքրվում էր «Մանչեսթեր Սիթին», թեև հոլանդացի կիսապաշտպանի վնասվածքը փոխել է անգլիական ակումբի ծրագրերը։

Մարկ Կասադոյի անունը կապվում է Սաուդյան Արաբիա հնարավոր տեղափոխության հետ։

Երիտասարդ պաշտպան Էկտոր Ֆորտին հավակնում են ձեռք բերել իսպանական «Ռեալ Սոսյեդադն» ու Դորտմունդի «Բորուսիան»:

Ալեխանդրո Բալդեն գտնվում է «Մանչեսթեր Յունայթեդի» դիտակետում. ավելի վաղ հաղորդվում էր, որ անգլիական ակումբն արդեն կապ է հաստատել ֆուտբոլիստի ներկայացուցիչների հետ:

Ժյուլ Կունդեի տրանսֆերով հետաքրքրված են Անգլիայի Պրեմիեր լիգան ներկայացնող մի քանի ակումբներ:

Հիշեցնենք, որ Հանս-Դիտեր Ֆլիկի գլխավորությամբ «Բարսելոնան» Լա լիգայի նոր մրցաշրջանը մեկնարկել է տպավորիչ հաղթանակով՝ արտագնա խաղում 5:0 հաշվով ջախջախելով «Էլչեին»:

«Բարսելոնայի» շվեդ եզրային հարձակվող Ռունի Բարջին ծնկի լուրջ վնասվածք է ստացել և տևական ժամանակով շարքից դուրս մնացել, ինչի պատճառով ֆուտբոլիստը չի լքի ակումբն այս ամառային տրանսֆերային պատուհանի ընթացքում։

Ինչպես հաղորդում է իսպանական Mundo Deportivo պարբերականը, Հանս-Դիտեր Ֆլիկը մտավախություն ունի, որ նման իրավիճակը կարող է կրկնվել նաև այն խաղացողների դեպքում, որոնք հնարավոր է՝ հեռանան ակումբից։ Երեքշաբթի՝ օգոստոսի 11-ին «Բարսելոնայի» գերմանացի մասնագետը վեց ֆուտբոլիստի զերծ է պահել ընդհանուր խմբի հետ մարզումներից։

Այդ ֆուտբոլիստների ցանկում ընդգրկվել են Մարկ Կասադոն, Էկտոր Ֆորտը, Ջոֆրե Տորենցը, Տոմի Մարկեսը, Տոնի Ֆերնանդեսը և Գիլյե Ֆերնանդեսը։

Նշվում է, որ Ֆլիկը չի ցանկանում, որ այդ խաղացողներից որևէ մեկը վնասվածք ստանա և չկարողանա հեռանալ «Բարսելոնայից», քանի որ նման սցենարը կարող է խախտել տրանսֆերային շուկայում կատալոնական ակումբի ունեցած ծրագրերը։

Կատալոնական «Բարսելոնան» մտադիր չէ Մադրիդի «Ատլետիկոյի» հարձակվող Խուլիան Ալվարեսի տրանսֆերի դիմաց վճարել 100 միլիոն եվրոյից ավելի։ Այս մասին հայտնում է Mundo Deportivo-ն։

Աղբյուրի համաձայն ակումբը պատրաստ է բարելավել առաջարկը միայն լրացուցիչ բոնուսների կամ գործարքում իր ֆուտբոլիստներից որևէ մեկին ներառելու դեպքում։

«Բարսան» կարող է «Ատլետիկոյին» զիջել հետևյալ խաղացողներից մեկին՝ Մարկ Կասադո, Ֆերան Տորես կամ Ռոնալդ Արաուխո, սակայն այն պայմանով, որ ֆուտբոլիստն անձամբ համաձայնի տեղափոխությանը։

Transfermarkt պորտալն Ալվարեսի տրանսֆերային արժեքը գնահատում է 100 միլիոն եվրո։ Ավարտված մրցաշրջանում 26-ամյա հարձակվողը մադրիդյան ակումբի կազմում անցկացրել է 49 հանդիպում՝ դառնալով 20 գոլի և 9 արդյունավետ փոխանցման հեղինակ։ Ֆուտբոլիստի գործող պայմանագրի ժամկետը նախատեսված է մինչև 2030 թվականի կեսերը։

Աշխարհի ընթացիկ առաջնությունում Արգենտինայի հավաքականի կազմում Ալվարեսն անցկացրել է 6 հանդիպում և խփել 1 գոլ։

Կատալոնական «Բարսելոնայի» 22-ամյա կիսապաշտպան Մարկ Կասադոն վճռական է տրամադրված կարիերան մեկ այլ իսպանական ակումբում շարունակելու հարցում։

Ինչպես հայտնում է Mundo Deportivo պարբերականը, ֆուտբոլիստը ցանկանում է տեղափոխվել Մադրիդի «Ատլետիկո», քանի որ նպատակ ունի կանոնավոր խաղաժամանակ ստանալ։ «Ներքնակագործների» մարզական դեպարտամենտը Կասադոյին համարում է թիմի կազմն ուժեղացնելու իդեալական տարբերակ, սակայն մադրիդցիների գլխավոր մարզիչ Դիեգո Սիմեոնեն դեռևս իր վերջնական համաձայնությունը չի տվել այս տրանսֆերին։

«Բարսելոնան» պատրաստ է վաճառել իր խաղացողի տրանսֆերը 25-30 միլիոն եվրոյի դիմաց։ Հատկանշական է, որ «Ատլետիկոն» կիսապաշտպանի համար պայքարում միակ հավակնորդը չէ. նրա ծառայություններով հետաքրքրված են նաև «Մանչեսթեր Յունայթեդը», Լևերկուզենի «Բայերը», «Ալ-Հիլալն» ու «Մոնակոն»։

Ավարտված մրցաշրջանում Կասադոն բոլոր մրցաշարերում մասնակցել է 34 հանդիպման և դարձել 1 արդյունավետ փոխանցման հեղինակ։

Կատալոնական «Բարսելոնայի» կիսապաշտպան Մարկ Կասադոն վերջնական որոշում է կայացրել իր ապագայի վերաբերյալ։ Իսպանացի ֆուտբոլիստը մտադիր է ընթացիկ մրցաշրջանի ավարտից հետո հեռանալ կատալոնական ակումբից։

Ինչպես հաղորդում է իսպանական Diario Sport պարբերականը, Կասադոն այլևս չի ցանկանում ելույթները շարունակել «Կամպ Նոուում»։ Նրա նման կտրուկ որոշման հիմնական պատճառը Հանս-Դիտեր Ֆլիկի գլխավորությամբ հիմնական կազմում իր տեղը կորցնելն է։ Նշվում է, որ մրցաշրջանի եզրափակիչ հատվածին ընդառաջ կիսապաշտպանը խաղադաշտում անցկացրել է ընդհանուր առմամբ շուրջ 1200 րոպե, ինչը չի գոհացնում խաղացողին։

Բացի խաղաժամանակի սղությունից, ֆուտբոլիստի դժգոհության ևս մեկ լուրջ առիթ է դարձել այն հանգամանքը, որ ակումբի ղեկավարությունը կասեցրել է գործող պայմանագրի երկարաձգման շուրջ բանակցությունները։

Աղբյուրի տեղեկություններով՝ Կասադոյի կարիերայի շարունակության ամենահավանական տարբերակը Սաուդյան Արաբիան է։ Ընդգծվում է, որ կիսապաշտպանը հաստատապես չի մնա իսպանական Լա լիգայում և չի տեղափոխվի եվրոպական որևէ այլ ակումբ։

Կատալոնական «Բարսելոնայի» մարզական տնօրեն Դեկուն առանձնացրել է այն երկու ֆուտբոլիստներին, որոնց ակումբը կարող է վաճառել առաջիկա ամռանը՝ ֆինանսական կայունություն ապահովելու և կազմն ուժեղացնելու նպատակով: Ինչպես հաղորդում է Fichajes-ը, խոսքն իսպանացի կիսապաշտպան Մարկ Կասադոյի և հարձակվող Ֆերան Տորեսի մասին է:

Աղբյուրի տեղեկություններով՝ ակումբում դիտարկում են խաղացողներից բաժանվելու տարբերակը՝ մաքուր շահույթ ստանալու և աշխատավարձային ֆոնդը կրճատելու նպատակով: Հենց բարձր աշխատավարձերն են մնում այն հիմնական գործոններից մեկը, որը սահմանափակում է «կապտանռնագույնների» մրցունակությունը եվրոպական տրանսֆերային շուկայում: Բացի այդ, նշվում է նաև, որ վերջին ամիսներին երկու ֆուտբոլիստների դերակատարությունը թիմի խաղում զգալիորեն նվազել է, ինչն էլ լրացուցիչ պատճառ է դարձել նրանց հնարավոր հեռանալու համար:

Թեև ակումբի սանի՝ Կասադոյի վաճառքը բարդ որոշում է, այն կարող է անհրաժեշտ քայլ դառնալ ապագա գործարքների համար: Մասնավորապես, «Բարսելոնան» ակնկալում է միջոցներ ազատել համաշխարհային մակարդակի հարձակվողի ձեռքբերման համար: Հավանական թեկնածուների թվում է Մադրիդի «Ատլետիկոյի» և Արգենտինայի ազգային հավաքականի հարձակվող, աշխարհի չեմպիոն Խուլիան Ալվարեսը:

Ընթացիկ մրցաշրջանում 22-ամյա Մարկ Կասադոն բոլոր մրցաշարերում անցկացրել է 29 հանդիպում՝ դառնալով 1 գոլային փոխանցման հեղինակ: Transfermarkt պորտալի գնահատմամբ՝ նրա տրանսֆերային արժեքը կազմում է մոտ 20 միլիոն եվրո:

Ինչ վերաբերում է Ֆերան Տորեսին, ապա նա մասնակցել է 42 հանդիպման, դարձել 16 գոլի և 1 ասիստի հեղինակ: Նրա տրանսֆերային արժեքը գնահատվում է շուրջ 50 միլիոն եվրո:

«Բարսելոնայի» հենակետային կիսապաշտպան Մարկ Կասադոն կարող է կարիերան շարունակել Սաուդյան Արաբիայում։

Ինչպես հաղորդում է Diario AS պարբերականը, 22-ամյա ֆուտբոլիստը դրական է տրամադրված սաուդյան ակումբներից մեկը տեղափոխվելու հարցում՝ նպատակ ունենալով բարելավել իր ֆինանսական պայմանները։ Կասադոյի ծրագրի համաձայն՝ նա մտադիր է որոշ ժամանակ հանդես գալ Արաբական թերակղզում, որից հետո կրկին կվերադառնա եվրոպական բարձրակարգ ֆուտբոլ։

Նշենք, որ Կասադոն կատալոնական ակումբի սան է, իսկ նրա գործող պայմանագրի ժամկետը «Բարսելոնայի» հետ նախատեսված է մինչև 2028 թվականի հունիսի 30-ը։

Ընթացիկ մրցաշրջանում երիտասարդ կիսապաշտպանը «կապտանռնագույնների» կազմում մասնակցել է 24 հանդիպման՝ դառնալով 1 գոլային փոխանցման հեղինակ։ Այս պահին Transfermarkt-ը ֆուտբոլիստի տրանսֆերային արժեքը գնահատում է 25 միլիոն եվրո։

«Բարսելոնայի» կիսապաշտպան Մարկ Կասադոն անդրադարձել է Լա Լիգայի չեմպիոնության համար Մադրիդի «Ռեալի» հետ մղվող պայքարին:

Կիրակի օրը կատալոնացիները 3:0 հաշվով հաղթել են «Ռեալ Օվյեդոյին» և վերադարձել մրցաշարային աղյուսակի առաջին հորիզոնական, թեև «սերուցքայիններին» գերազանցում են ընդամենը մեկ միավորով:

BarcaTimes-ի փոխանցմամբ՝ Կասադոն մասնավորապես ասել է.

«Մրցակցությունը «Ռեալի» հե՞տ… Մեկ միավոր ենք առաջ, թե՞ չորս՝ այնքան էլ կարևոր չէ: Ամենակարևորն այն է, որ մենք գիտենք՝ ինչ է պետք անել: Քաջ գիտակցում ենք, որ պարզապես պետք է շարունակենք կատարել մեր աշխատանքը, եթե ցանկանում ենք հաղթել Լա Լիգան և մյուս մրցաշարերը»:

Նշենք, որ հունվարի 31-ին Հանս-Դիտեր Ֆլիկի սաները 22-րդ տուրի շրջանակում արտագնա խաղ կանցկացնեն «Էլչեի» դեմ: Իսկ դրանից երեք օր առաջ «կապտանռնագույնները» Չեմպիոնների լիգայում կմրցեն «Կոպենհագենի» հետ: