Ամստերդամի «Այաքսը» պաշտոնապես հայտարարել է կատալոնական «Բարսելոնայի» և Գերմանիայի ազգային հավաքականի դարպասապահ Մարկ-Անդրե տեր Շտեգենի տեղափոխության մասին։

Ակումբները համաձայնության են հասել, ըստ որի՝ 34-ամյա գերմանացին հոլանդական գրանդի կազմում հանդես կգա վարձակալական հիմունքներով. պայմանագիրը նախատեսված է մինչև 2027 թվականի հունիսի 30-ը։

Տեր Շտեգենը, ով իր պրոֆեսիոնալ կարիերան սկսել է հարազատ Մյոնխենգլադբախի «Բորուսիայում» (127 հանդիպում), «Բարսելոնայի» գույները պաշտպանում էր 2014 թվականից։ Կատալոնական ակումբի կազմում նա անցկացրել է 423 պաշտոնական հանդիպում՝ դառնալով ակումբի պատմության մեջ ամենաշատ խաղեր անցկացրած 11-րդ ֆուտբոլիստը, իսկ արտասահմանցիների շարքում զիջում է միայն Լիոնել Մեսսիին: «Բլաուգրանայի» հետ նա նվաճել է 21 տիտղոս, այդ թվում՝ 2015թ․ Չեմպիոնների լիգայի գավաթը և Լա լիգայի 7 չեմպիոնական տիտղոս։

Գերմանիայի հավաքականում 44 հանդիպում անցկացրած դարպասապահը նախորդ մրցաշրջանի երկրորդ հատվածը վարձավճարով անցկացրել էր իսպանական «Ժիրոնայում»՝ գլխավոր մարզիչ Միչել Սանչեսի ղեկավարությամբ։ Թեև վնասվածքի պատճառով նա այնտեղ սահմանափակվեց ընդամենը 2 հանդիպմամբ, այժմ Տեր Շտեգենը կրկին կաշխատի Միչելի հետ արդեն «Այաքսում»՝ փորձելով վերագտնել իր լավագույն մարզավիճակը Եվրոպայի քառակի գավաթակիր և Նիդերլանդների 36-ակի չեմպիոն ակումբում։

Տրանսֆերի վերաբերյալ իր մեկնաբանությունն է տվել Յորդի Կրոյֆը.

«Մարկն ակնառու նվաճումներ ունի, և նրա բարձր որակները համընդհանուր ճանաչում են գտել։ Նա անմիջապես կուժեղացնի մեր կազմը։ Ես և Մարկը լավ ենք ճանաչում միմյանց, և ես անհամբերությամբ եմ սպասում նրա հետ կրկին աշխատելուն։ Մենք բավականին երկար ժամանակ աշխատում էինք նրան այստեղ բերելու ուղղությամբ, ուստի շատ ուրախ ենք, որ պայմանագիրը ստորագրված է, և նա կարող է անցնել գործի»։

«Ժիրոնա» ֆուտբոլային ակումբը պաշտոնապես հայտարարել է «Բարսելոնայի» դարպասապահ Մարկ-Անդրե տեր Շտեգենի տեղափոխության մասին։

Կողմերը համաձայնության են եկել գերմանացի դարպասապահի տեղափոխության հարցում, որը «Ժիրոնայի» կազմում հանդես կգա վարձավճարային հիմունքներով՝ մինչև ընթացիկ մրցաշրջանի ավարտը։

33-ամյա դարպասապահը «Բարսելոնայում» ելույթ էր ունենում 2014 թվականից։ Այդ ընթացքում նա կատալոնական ակումբի կազմում անցկացրել է 423 պաշտոնական հանդիպում՝ նվաճելով հնարավոր բոլոր ակումբային տիտղոսները, այդ թվում՝ Չեմպիոնների լիգայի գավաթը և 6 անգամ՝ Լա Լիգայի չեմպիոնությունը։

«Բարսելոնայի» գերմանացի դարպասապահ Մարկ Անդրե Տեր Շտեգենը տեղափոխվում է «Ժիրոնա». վարձակալության մասին պաշտոնապես կհայտարարվի առաջիկա ժամերին։ Այս մասին գրում է Sport.es-ը։ 

Այն, ինչ վաղուց սպասելի էր, այսօր ստացավ իր հաստատումը։ Մարկ-Անդրե տեր Շտեգենը վարձավճարով կտեղափոխվի Միչելի գլխավորած «Ժիրոնա»՝ մինչև ընթացիկ մրցաշրջանի ավարտը։ Տեղափոխության հիմնական նպատակը խաղաժամանակ ստանալն է, ինչը թույլ կտա դարպասապահին պայքարել 2026 թվականին ԱՄՆ-ում, Մեքսիկայում և Կանադայում կայանալիք Աշխարհի առաջնությունում Գերմանիայի հավաքականի հիմնական դարպասապահի դիրքի համար։

«Բարսելոնայի» ավագն այսօր առավոտյան մարզաբազայում արդեն հրաժեշտ է տվել թիմակիցներին։ Այս տեղեկությունը Չեմպիոնների լիգայի շրջանակում Պրահայի «Սլավիայի» դեմ կայանալիք խաղից առաջ հաստատել են Ալեխանդրո Բալդեն և Հանսի Ֆլիկը։

Հատկանշական է, որ «կապտանռնագույնների» գլխավոր մարզիչը սկզբում փոքր-ինչ զարմացավ դարպասապահի ապագայի վերաբերյալ հարցից՝ ճշտելով, թե արդյոք տեղափոխությունն արդեն պաշտոնապես հաստատվել է։ Լրագրողները հայտնեցին, որ րոպեներ առաջ նույն մամուլի սրահում այդ մասին հայտարարել է Ալեխանդրո Բալդեն, ով ընտրվել էր որպես մամուլի հետ շփվող ֆուտբոլիստ։

Առաջինը լուրը հաստատեց Ալեխանդրո Բալդեն.

«Այս առավոտ նա խոսեց ամբողջ թիմի հետ՝ հրաժեշտ տալու համար։ Նա ինձ համար ուղենիշ է, ես մեծացել եմ՝ հետևելով նրան, նա իմ ավագն է։ Հաջողություն եմ մաղթում նրան, սա լավ կլինի նրա ինքնավստահության համար»։

Այս խոսքերից հետո գերմանացի դարպասապահի տեղափոխությունը «Մոնտիլիվի» կարելի էր փակված համարել, ուստի Հանսի Ֆլիկին ուղղված հարցն անխուսափելի էր։

Տեղեկանալով, որ ձախ պաշտպանն արդեն բացահայտել է իրավիճակը, Ֆլիկը ծիծաղելով արձագանքեց.

«Եթե Բալդեն հաստատել է, ուրեմն հաստատված է»։

Այնուհետև գլխավոր մարզիչը անդրադարձավ իր հայրենակցի ապագային՝ մաղթելով նրան լավագույնը.

«Մարկն այս առավոտ մեզ ասաց, որ գնում է «Ժիրոնա»։ Նա ֆանտաստիկ դարպասապահ է, բայց մենք որոշեցինք այլ ճանապարհով շարժվել։ Կարծում եմ՝ սա ճիշտ որոշում է։ Նա փայլուն անձնավորություն է»։

Ֆլիկը նաև կարծիք հայտնեց, որ Տեր Շտեգենը մեծ հնարավորություններ ունի դառնալու Գերմանիայի հավաքականի հիմնական դարպասապահը գալիք Մունդիալում։ Նա հաջողություն մաղթեց իր երկրի հավաքականին, որը ոչ վաղ անցյալում ինքն էր գլխավորում, թեև այն ժամանակ «Բունդեսթիմը» չկարողացավ հաղթահարել խմբային փուլը՝ մրցելով Իսպանիայի, Ճապոնիայի և Կոստա Ռիկայի ընտրանիների հետ։

Վերջին օրերին իսպանական մամուլը «Բարսելոնայի» դարպասապահ Մարկ-Անդրե տեր Շտեգենի անունը կապում է «Ժիրոնայի» հետ: Mundo Deportivo-ի տեղեկություններով՝ փորձառու գերմանացի դարպասապահը կարող է վարձակալությամբ միանալ «Ժիրոնային», եթե կատարվի երկու պայմանից մեկը:

Աղբյուրի համաձայն՝ Տեր Շտեգենը պետք է կամ հրաժարվի իր աշխատավարձի զգալի մասից վարձակալության ընթացքում, կամ «Բարսելոնան» պետք է ստանձնի նրա աշխատավարձի մեծ մասի վճարման պարտականությունը։

«Ժիրոնան» ֆինանսապես կայուն է, բայց փորձում է իմաստուն կերպով կառավարել իր ռեսուրսները։ Մարկ-Անդրե տեր Շտեգենը 33 տարեկան է: Transfermarkt-ը գերմանացու տրանսֆերային արժեքը գնահատում է 7 միլիոն եվրո:

«Բարսելոնայի» գլխավոր մարզիչ Հանս-Դիտեր Ֆլիկը անդրադարձել է դարպասապահ Մարկ-Անդրե տեր Շտեգենի ապագային, որը կարող է լքել ակումբը ձմեռային տրանսֆերային պատուհանի ընթացքում։ Մարզիչը նշել է, որ որոշումը կախված է բացառապես ֆուտբոլիստից։

«Դա նրա ընտրությունն է։ Մենք քննարկել ենք նրա իրավիճակը։ Ես շատ եմ գնահատում Մարկին, քանի որ նա բացառիկ դարպասապահ է։

Նա իսկապես հիանալի խաղացող է և հրաշալի անձնավորություն թիմի համար, սակայն վերջին հաշվով դա նրա որոշումն է, և նա պետք է այն կայացնի»,- Ֆլիկի խոսքերն է մեջբերում ESPN-ը։

Նշենք, որ 33-ամյա դարպասապահն այս մրցաշրջանում բախվել է առողջական խնդիրների։ Նախորդ մրցաշրջանում Տեր Շտեգենը ծնկի վնասվածքի պատճառով մասնակցել է ընդամենը 9 հանդիպման, իսկ ընթացիկ մրցաշրջանի մեկնարկը բաց է թողել մեջքի վիրահատության պատճառով։

Ավելի վաղ հաղորդվում էր, որ գերմանացի դարպասապահի ծառայություններով հետաքրքրված են թուրքական ակումբները, մասնավորապես՝ «Բեշիքթաշը»։

Մարկ-Անդրե տեր Շտեգենը «Բարսելոնայում» հանդես է գալիս 2014 թվականի ամառվանից։ Կատալոնական ակումբի հետ նրա գործող պայմանագիրը նախատեսված է մինչև 2027/2028 մրցաշրջանի ավարտը։ Transfermarkt-ը դարպասապահի տրանսֆերային արժեքը գնահատում է 7 միլիոն եվրո։

«Բարսելոնան» պատրաստվում է Չեմպիոնների լիգայի շրջանակում այսօր կայանալիք կարևորագույն հանդիպմանը Ֆրանկֆուրտի «Այնտրախտի» դեմ։ Կատալոնական ակումբի համար օրվա գլխավոր նորությունը թիմի հիմնական դարպասապահ Մարկ-Անդրե տեր Շտեգենի վերադարձն է։

33-ամյա գերմանացի դարպասապահն այս մրցաշրջանում առաջին անգամ է ընդգրկվել թիմի հայտացուցակում։ Նա բաց էր թողել մրցաշրջանի մեկնարկը մեջքի վնասվածքի պատճառով, սակայն այժմ ապաքինվել է և մարզվում է ընդհանուր խմբում։

«Spotify Camp Nou» մարզադաշտում կայանալիք հանդիպումը լուրջ քննություն է Հանսի Ֆլիկի թիմի համար։ Լավագույն ութնյակում տեղ զբաղեցնելու և փլեյ-օֆֆի ուղեգրի իրական հույսերը պահպանելու համար «Բարսելոնային» այս խաղում միայն հաղթանակ է անհրաժեշտ։ Լիգայի փուլի ավարտին մնացել է ընդամենը երկու հանդիպում՝ արտագնա խաղ Պրահայի «Սլավիայի» (հունվարի 21) և տնային խաղ «Կոպենհագենի» (հունվարի 28) դեմ։

Հանսի Ֆլիկը հրապարակել է այն ֆուտբոլիստների ցանկը, ովքեր նախապատրաստվում են երեկոյան կայանալիք խաղին.

Տեր Շտեգեն, Բալդե, Կուբարսի, Ֆերան, Պեդրի, Լևանդովսկի, Լամին Յամալ, Ռաֆինյա, Ժոան Գարսիա, Ռեշֆորդ, Քրիստենսեն, Ֆերմին, Կասադո, Ժերար Մարտին, Ֆ․ դե Յոնգ, Բեռնալ, Կունդե, Էրիկ, Շչենսնի, Ժոֆրե, Դրո և Ռունի։

Այս պահի դրությամբ «Բարսելոնան» վստահորեն գլխավորում է Լա Լիգայի մրցաշարային աղյուսակը՝ 16 խաղում վաստակած 40 միավորով։

ԱՊԼ-ի երեք ակումբներ՝ «Մանչեսթեր Յունայթեդը», «Տոտենհեմը» և «Նյուքասլը», դիտարկում են «Բարսելոնայի» դարպասապահ Մարկ-Անդրե Տեր Շտեգենին վարձակալությամբ ձեռք բերելու տարբերակը՝ հետագայում գնման իրավունքով, հայտնում է TeamTalk-ը:

Աղբյուրի տվյալներով՝ կատալոնական ակումբի ղեկավարությունը մտածում է 33-ամյա գերմանացուց բաժանվելու հնարավորության մասին, քանի որ թիմի նորեկ Ժոան Գարսիան հիանալի է դրսևորել իրեն Լա Լիգայի ընթացիկ մրցաշրջանի մեկնարկում: Վեց խաղում 24-ամյա իսպանացին բաց է թողել ընդամենը չորս գոլ և երեք անգամ պահել է դարպասը անառիկ:

Տեր Շտեգենը «Բարսելոնա» է տեղափոխվել 2014 թվականի հուլիսին և այդ ժամանակից ի վեր անցկացրել է 422 խաղ: Նա օգնել է ակումբին դառնալ Լա Լիգայի վեցակի չեմպիոն, վեց անգամ նվաճել Իսպանիայի գավաթը և հաղթել Չեմպիոնների լիգայի 2014/15 մրցաշրջանում:

Transfermarkt պորտալի տվյալներով՝ Տեր Շտեգենի տրանսֆերային արժեքը կազմում է 8 միլիոն եվրո:

Կատալոնական «Բարսելոնայում» սկանդալային իրավիճակ է հասունանում։ Թիմի ավագ և հիմնական դարպասապահ Մարկ-Անդրե տեր Շտեգենը հրաժարվել է ստորագրել իր վնասվածքի վերաբերյալ բժշկական եզրակացությունը, որը ակումբը պետք է ներկայացներ Լա Լիգայի բժշկական հանձնաժողովին։ Այս մասին տեղեկացնում է Mundo Deportivo-ն։ 

Հաղորդվում է, որ «Բարսելոնան» ցանկանում էր ապացուցել, որ գերմանացի դարպասապահի ապաքինումը կտևի չորս ամիս, ինչը թույլ կտար նոր խաղացող գրանցել։ Սակայն տեր Շտեգենը հաշտվելու մտադրություն չունի, ինչի պատճառով ակումբը դիմել է իրավաբանական բաժնին՝ պարզելու, թե արդյոք հնարավոր է կարգապահական միջոցներ կիրառել ֆուտբոլիստի նկատմամբ։ Ակումբը համարում է, որ այս որոշումը վնասում է թե՛ մարզական, թե՛ ֆինանսական շահերին։

Թեև «Բարսելոնան» գիտակցում է, որ տեր Շտեգենն իրավունք ունի չստորագրելու եզրակացությունը, ակումբում կարծում են, որ պայմանագրով նա ստանձնել է նաև որոշակի պարտավորություններ։ Սպորտային տնօրեն Դեկուն նախատեսում էր այս շաբաթ քննարկել հարցը դարպասապահի հետ, սակայն վերջինս հստակ հայտնել է, որ չի ստորագրի փաստաթուղթը։

Կողմերի լարված հարաբերությունները սկսվել են ավելի վաղ։ Ակումբի ղեկավարությունը տեր Շտեգենին տեղեկացրել է, որ այլևս նրան չի դիտարկում թիմում, նույնիսկ որպես փոխարինող դարպասապահ, և առաջարկել է նոր ակումբ փնտրել։ Սակայն գերմանացին, հաշվի առնելով 2026 թվականի աշխարհի առաջնությունը, մտադիր չէ հեռանալ։

Նշենք, որ տեր Շտեգենը վերջերս մեջքի վիրահատության է ենթարկվել։ Նրա այս քայլը խոչընդոտում է ակումբին նոր խաղացող գրանցել Լա Լիգայում, ինչը, «Բարսելոնայի» կարծիքով, լուրջ խնդիր է ստեղծում թիմի համար։

Օգոստոսի 5-ին «Բարսելոնայի» սպորտային տնօրեն Դեկուն հանդիպելու է թիմի դարպասապահ և ավագ Մարկ-Անդրե Տեր Շտեգենի հետ՝ հայտնելու, որ ընթացիկ մրցաշրջանում նա այլևս չի համարվի հիմնական կազմի դարպասապահ։ Այս մասին հայտնում է Sport.es-ը։

Աղբյուրի տվյալներով՝ չնայած այս որոշմանը, կատալոնական ակումբի ղեկավարությունը ցանկանում է խուսափել Տեր Շտեգենի հետ կոնֆլիկտից և մտադիր է համատեղ լուծում գտնել նրա ապագայի հարցում։ Նշվում է, որ գերմանացի դարպասապահը դժգոհ է ակումբից, քանի որ կարծում է, թե «Բարսելոնան» տարածել է իր մասնագիտական համբավը վնասող տեղեկություններ։

Ավելի վաղ հայտնի էր դարձել, որ Տեր Շտեգենը կարող է զրկվել նաև ավագի թևկապից։ Հաջորդ շաբաթ նախատեսվում է ավագի ընտրության քվեարկություն, սակայն աղբյուրը նշում է, որ գերմանացին դեռևս մեծ հնարավորություններ ունի վերընտրվելու։

«Բարսելոնայի» դարպասապահ Մարկ-Անդրե տեր Շտեգենը վիրահատվել է մեջքի ստորին հատվածի խնդիրների պատճառով։

Վիրահատությունն իրականացվել է Ֆրանսիայի Բորդո քաղաքի Sports Clinic Bordeaux Mérignac կլինիկայում՝ բժիշկ Ամելի Լեգլիզի կողմից, ակումբի բժշկական ծառայության հսկողությամբ։

Կատալոնական ակումբի հայտարարության համաձայն՝ գերմանացի դարպասապահը ներկայումս չի կարող վերադառնալ խաղադաշտ, և նրա ապաքինման ընթացքը կորոշի վերադարձի ժամկետները։

Ըստ լրատվամիջոցների՝ տեր Շտեգենը կարող է բաց թողնել մոտ 3-4 ամիս։ 2024/25 մրցաշրջանում նա Լա Լիգայում մասնակցել է 8 հանդիպման։