«Բարսելոնան» «խորամանկ պլան» է մշակել՝ նպատակ ունենալով ստիպել «Մանչեսթեր Յունայթեդին» ընդունել հարձակվող Մարկուս Ռեշֆորդի տրանսֆերի գնման առաջարկը խիստ նվազեցված արժեքով:

Այս մասին հայտնում է TEAMtalk պարբերականը՝ հղում անելով Daily Mail-ին: Հիշեցնենք, որ 2025/2026 մրցաշրջանում անգլիացի ֆուտբոլիստը կատալոնական ակումբի կազմում հանդես էր գալիս վարձավճարով:

Աղբյուրի տեղեկություններով՝ «կապտանռնագույնները» մտադիր են միտումնավոր կերպով ձգձգել Ռեշֆորդի ձեռքբերման շուրջ բանակցությունները ողջ ամառային տրանսֆերային պատուհանի ընթացքում: Կատալոնացիները հույս ունեն, որ ժամանակի սղությունը կստիպի «կարմիր սատանաներին» զիջումների գնալ ֆինանսական հարցերում։

«Բարսելոնան» ծրագրում է 28-ամյա վինգերի տրանսֆերային իրավունքների ամբողջական գնման շուրջ բանակցությունների ակտիվ փուլին վերադառնալ միայն տրանսֆերային պատուհանի վերջնամասում՝ երբ Լա Լիգան պաշտոնապես կտեղեկացնի ակումբի նկատմամբ ֆինանսական սահմանափակումների ամբողջական վերացման մասին։

Ըստ շրջանառվող լուրերի՝ իսպանական գրանդը ցանկանում է «Մանչեսթեր Յունայթեդին» առաջարկել մոտ 15 մլն եվրո, մինչդեռ անգլիացիները խաղացողի դիմաց պահանջում են առնվազն 30 մլն եվրո:

«Նյուքասլի» եզրային հարձակվող Էնթոնի Գորդոնի սպասվող տեղափոխությունը «Բարսելոնա» ուղղակիորեն ազդեցություն չի ունենա «Մանչեսթեր Յունայթեդից» Մարկուս Ռեշֆորդի տրանսֆերը գնելու՝ կատալոնական ակումբի հնարավորությունների վրա։ Այս մասին X սոցիալական ցանցի իր էջում հայտնել է Sky Sports-ի լրագրող Դանիալ Խանը։

Աղբյուրի տեղեկություններով՝ «կապտանռնագույնները» դեռևս ունեն բավարար ֆինանսական միջոցներ՝ անգլիացի վինգերի գնման իրավունքն ակտիվացնելու համար, որը կազմում է 30 միլիոն եվրո։

Միևնույն ժամանակ, «Մանչեսթեր Յունայթեդը» մտադիր չէ վերանայել կատալոնական ակումբի հետ կնքված գործարքի պայմանները և հաստատապես չի դիտարկում ֆուտբոլիստին կրկին վարձավճարով տրամադրելու տարբերակը:

Մանկունիացիները վստահ են, որ անհրաժեշտության դեպքում կարող են Ռեշֆորդին շատ ավելի բարձր գնով վաճառել մեկ այլ ակումբի:

​«Բարսելոնայի» գլխավոր մարզիչ Հանս-Դիտեր Ֆլիկը անդրադարձել է կատալոնական ակումբի հարձակվողներ Ռոբերտ Լևանդովսկու և Մարկուս Ռեշֆորդի ապագային։

​«Մրցաշրջանի ավարտին մենք ամեն ինչ կվերլուծենք և կհասկանանք մեր հետագա քայլերը։ Մարկուսը մեծ աշխատանք է կատարել մեզ համար, նրա վիճակագրությունը բավականին լավն է։ Ես ուրախ և երախտապարտ եմ նրան իր նվիրվածության համար։

​Ինչ վերաբերում է Ռոբերտին, էլ ի՞նչ կարող եմ ասել։ Ես նրա հետ տիտղոսներ եմ նվաճել և անչափ հպարտ եմ, որ մարզում եմ նման ֆանտաստիկ ֆուտբոլիստի: Սակայն ունենք այն, ինչ ունենք, և կտեսնենք, թե ինչ կլինի հաջորդ մրցաշրջանում»,- գերմանացի մասնագետի խոսքերն է մեջբերում իսպանական AS պարբերականը։

​Նշենք, որ ընթացիկ մրցաշրջանում Լևանդովսկին «կապտանռնագույնների» կազմում բոլոր մրցաշարերում անցկացրել է 43 հանդիպում՝ դառնալով 18 գոլի և 2 արդյունավետ փոխանցման հեղինակ։

Մարկուս Ռեշֆորդն իր հերթին մասնակցել է 47 հանդիպման՝ իր ակտիվում գրանցելով 13 գոլ և 12 արդյունավետ փոխանցում։

«Բարսելոնայի» նախկին ֆուտբոլիստ և գլխավոր մարզիչ Ռոնալդ Կումանն իր կարծիքն է հայտնել եզրային հարձակվող Մարկուս Ռեշֆորդի ապագայի վերաբերյալ։

​Ընթացիկ մրցաշրջանը Ռեշֆորդը վարձավճարով անցկացնում է կատալոնական ակումբում, մինչդեռ ֆուտբոլիստի տրանսֆերային իրավունքները պատկանում են «Մանչեսթեր Յունայթեդին»։

​«Եթե վարձակալության ժամկետի ավարտից հետո «Բարսան» թույլ տա նրան վերադառնալ «Մանչեսթեր Յունայթեդ», կարծում եմ՝ նրանք խիստ կզղջան դրա համար։ Ներկայիս տրանսֆերային շուկայում 26 միլիոն եվրոն նման տվյալներով, ցուցանիշներով և փորձով ֆուտբոլիստի համար պարզապես իդեալական գործարք է»,- Կումանի խոսքերն է մեջբերում Transfer News Live-ը։

​Նշենք, որ այս մրցաշրջանում 28-ամյա Ռեշֆորդը բոլոր մրցաշարերում միասին անցկացրել է 47 հանդիպում՝ դառնալով 14 գոլի և 14 արդյունավետ փոխանցման հեղինակ։

«Բարսելոնայի» հարձակվող Մարկուս Ռեշֆորդը մեկնաբանել է գլխավոր մարզիչ Հանս-Դիտեր Ֆլիկի որոշումը՝ հոր մահվանից հետո թիմի կողքին մնալու և «Էլ Կլասիկոն» չբաց թողնելու վերաբերյալ։

Հիշեցնենք, որ կիրակի՝ մայիսի 10-ի վաղ առավոտյան, հայտնի էր դարձել 61-ամյա մասնագետի հոր մահվան մասին, սակայն, չնայած ընտանեկան ողբերգությանը, գերմանացի մարզիչը որոշել էր մնալ թիմի հետ։

Այդ նույն օրը «Բարսելոնան» սեփական հարկի տակ 2:0 հաշվով հաղթեց Մադրիդի «Ռեալին»՝ ժամանակից շուտ նվաճելով Իսպանիայի չեմպիոնի տիտղոսը։ Հատկանշական է, որ այդ խաղում հաղթական գոլի հեղինակ դարձավ հենց 28-ամյա անգլիացի հարձակվողը։

«Նա ցույց տվեց իր ամուր բնավորությունը՝ այս չափազանց ծանր պահին մնալով այստեղ՝ թիմի կողքին։ Մեզ համար չափազանց կարևոր էր խաղադաշտում հարյուր տոկոսով նվիրվել, քանի որ նա ամեն օր նման բարդ որոշումներ է կայացնում։ Ես ամենայն բարիք եմ մաղթում նրան և նրա ընտանիքին»,- Ռեշֆորդի խոսքերը մեջբերում է BBC-ն։

«Ռեալ Օվիեդոյի» երկրպագուն, որը ռասայական հողի վրա վիրավորել էր Մարկուս Ռեշֆորդին, դատապարտվել է ինն ամսվա ազատազրկման։ Այս մասին X սոցիալական ցանցում հայտնում է The Touchline պարբերականը։

Միջադեպը տեղի էր ունեցել խաղի ընթացքում, երբ անգլիացի ֆուտբոլիստն անկյունային հարված էր իրացնում. այդ պահին ֆանատը ռասիստական վիրավորանքներ է հնչեցրել նրա հասցեին, ինչն էլ ֆիքսվել է տեսախցիկների կողմից։

Աղբյուրի փոխանցմամբ՝ երկրպագուն հնարավորություն ունի խուսափելու ճաղերի հետևում հայտնվելուց, սակայն դրա համար պետք է կատարի մի քանի խիստ պայման։ Մասնավորապես, նա պետք է վճարի 2 հազար եվրո տուգանք, անցնի ռասիզմի դեմ պայքարի պարտադիր վերականգնողական ծրագիր, ինչպես նաև համակերպվի ֆուտբոլային մարզադաշտեր մուտք գործելու եռամյա արգելքի հետ։

Հիշեցնենք, որ Մարկուս Ռեշֆորդը 2025 թվականի ամառվանից վարձավճարով հանդես է գալիս կատալոնական «Բարսելոնայում»՝ տեղափոխվելով անգլիական «Մանչեսթեր Յունայթեդից»։

«Բարսելոնայում» վստահ չեն, որ կկարողանան թիմում պահել «Մանչեսթեր Յունայթեդից» վարձավճարով հանդես եկող եզրային հարձակվող Մարկուս Ռեշֆորդին։ Ստեղծված իրավիճակում կատալոնական ակումբի մարզական տնօրեն Դեկուն սկսել է այլ տարբերակներ ուսումնասիրել։ Այս մասին հաղորդում է իսպանական AS պարբերականը։

Աղբյուրի տեղեկություններով՝ «կապտանռնագույնների» ուշադրության կենտրոնում է հայտնվել ակումբի նախկին սան, «Բետիսի» մարոկկացի ֆուտբոլիստ Աբդե Էզալզուլին։ Բացի այդ, «Բարսելոնան» հետաքրքրություն է ցուցաբերում նաև Լիսաբոնի «Բենֆիկայի» եզրային հարձակվող Անդրեաս Շելդերուպի նկատմամբ։

Ընդգծվում է, որ Դեկուն իր ծրագրերում չի դիտարկում իսպանացի հարձակվող Անսու Ֆատիին, որը ներկայումս վարձավճարով հանդես է գալիս «Մոնակոյում»։ Ամենայն հավանականությամբ, մոնեգասկները կգնեն ֆուտբոլիստի տրանսֆերային իրավունքները։ Վերջնական որոշում կայացնելուց առաջ Դեկուն մտադիր է մանրամասն գնահատել ակումբի ֆինանսական դրությունը։

Ընթացիկ մրցաշրջանում 28-ամյա Ռեշֆորդը կատալոնական ակումբի կազմում մասնակցել է 43 հանդիպման՝ դառնալով 12 գոլի և 13 գոլային փոխանցման հեղինակ։

Կատալոնական «Բարսելոնան» շարունակում է աշխատել «Մանչեսթեր Յունայթեդից» վարձավճարով տեղափոխված հարձակվող Մարկուս Ռեշֆորդի լիարժեք տրանսֆերը գնելու ուղղությամբ:

Ակումբների միջև ընթացող բանակցությունների մանրամասներով կիսվել է հայտնի ինսայդեր Ռեշադ Ռահմանը։

««Բարսելոնան» ու Հանսի Ֆլիկը գոհ են Ռեշֆորդից և կցանկանային նրան պահել թիմում. ֆուտբոլիստը նույնպես ցանկանում է մնալ: Սակայն «Յունայթեդը» շարունակում է վերջնագիր ներկայացնել «Բարսելոնային»՝ վճարել 30 մլն եվրո, հակառակ դեպքում նա կվերադառնա «Օլդ Թրաֆորդ»:

«Բարսան» առաջարկել է կրեատիվ լուծումներ, սակայն «Յունայթեդը» հրաժարվում է»,- գրել է Ռահմանը X սոցիալական ցանցի իր միկրոբլոգում։

Հիշեցնենք, որ Մարկուս Ռեշֆորդը «Բարսելոնայի» կազմում հանդես է գալիս 2025 թվականի ամառվանից։ Ընթացիկ մրցաշրջանում բոլոր մրցաշարերում «կապտանռնագույնների» մարզաշապիկով անցկացրած 43 հանդիպումներում անգլիացին դարձել է 12 գոլի և 13 արդյունավետ փոխանցման հեղինակ։

Անգլիական «Մանչեսթեր Յունայթեդը» մերժել է կատալոնական «Բարսելոնայի» խնդրանքը՝ հարձակվող Մարկուս Ռեշֆորդի վարձակալության պայմանագիրը երկարաձգելու վերաբերյալ։ Այս մասին հաղորդում է Diario SPORT-ը։

Աղբյուրի տեղեկություններով՝ կատալոնական ակումբը ցանկանում էր ևս մեկ մրցաշրջանով վարձակալել անգլիացի ֆուտբոլիստին, որպեսզի 2027 թվականին կարողանար վերջնականապես գնել նրա տրանսֆերային իրավունքները: Սակայն «կարմիր սատանաները» կտրուկ մերժել են այս առաջարկը:

Անգլիական գրանդը հստակ հասկացրել է, որ մտադիր չէ նոր բանակցություններ վարել։ Եթե կապտանռնագույնները ցանկանում են պահպանել Ռեշֆորդին, ապա ստիպված կլինեն առաջիկա ամռանը գնել նրան 30 միլիոն եվրոյով՝ ճիշտ այնպես, ինչպես ամրագրված է վարձակալության գործող պայմանագրում:

Ընթացիկ մրցաշրջանում 28-ամյա խաղացողը «կապտանռնագույնների» կազմում մասնակցել է 38 հանդիպման՝ դառնալով 10 գոլի և 13 գոլային փոխանցման հեղինակ։

«Բարսելոնայում» ուսումնասիրում են թիմի եզրային հարձակվող Մարկուս Ռեշֆորդին փոխարինելու հնարավոր տարբերակները։ Անգլիացի ֆուտբոլիստը կատալոնական ակումբում հանդես է գալիս վարձավճարով՝ «Մանչեսթեր Յունայթեդից» տեղափոխվելուց հետո։

«Կապտանռնագույնները» հետաքրքրված են 28-ամյա խաղացողի տրանսֆերային իրավունքների ամբողջական ձեռքբերմամբ, սակայն «կարմիր սատանաների» հետ վերջնական համաձայնություն դեռևս ձեռք չի բերվել։

​Ինչպես հաղորդում է իսպանական Marca պարբերականը, եթե Ռեշֆորդի տրանսֆերը գնել չհաջողվի, «Բարսելոնան» կարող է կենտրոնանալ Աբդե Էզալզուլիի տարբերակի վրա, որը տպավորիչ մրցաշրջան է անցկացնում «Բետիսի» կազմում։

​Նշենք, որ մինչև «Բետիս» տեղափոխվելը Էզալզուլին պաշտպանում էր հենց «Բարսայի» գույները, և կատալոնացիները պահպանել են ֆուտբոլիստի տրանսֆերը հետ գնելու առաջնահերթ իրավունքը։

Transfermarkt-ը 24-ամյա մարոկկացու տրանսֆերային արժեքը գնահատում է 20 միլիոն եվրո։