Չեմպիոնների լիգայի երկրորդ տուրի հանդիպումներից հետո Goal-ը թարմացրել է մրցաշարի ֆավորիտների իր վարկանիշը։

ՊՍԺ-ն գլխավորում է վարկանիշային աղյուսակը։ Երեկ Լուիս Էնրիկեի թիմը 4-2 հաշվով հաղթեց «Մանչեսթեր Սիթիին»։ Փարիզեցիները հաղթել են Չեմպիոնների լիգայի նախորդ երկու խաղարկություններում և ձգտում են դա անել երրորդ անգամ անընդմեջ՝ կրկնելով «Ռեալ Մադրիդի» նվաճումը։

«Բարսելոնան» երկրորդն է վարկանիշում, իսկ «Արսենալը» եզրափակում է լավագույն եռյակը։

Լավագույն տասնյակում են ըստ հերթականության՝ «Բավարիան», «Ռեալ Մադրիդը», «Մանչեսթեր Սիթին», «Լիվերպուլը», «Ատլետիկո Մադրիդը», «Աստոն Վիլան» և «Ինտեր Միլանը»։

«Մանչեսթեր Սիթիի» նորվեգացի հարձակվող Էրլինգ Հալանդը Չեմպիոնների լիգայի լիգայի փուլի 2-րդ տուրի՝ «Պարի Սեն Ժերմենի» դեմ խաղում (2:4) դարձել է դուբլի հեղինակ և միանգամից երկու պատմական ռեկորդ սահմանել՝ գերազանցելով Լիոնել Մեսսիի նվաճումները։ Այս մասին X սոցիալական ցանցի իր էջում հայտնում է Actu Foot-ը։

Աղբյուրի փոխանցմամբ՝ Հալանդը դարձել է մրցաշարի պատմության ամենաարագ ֆուտբոլիստը, ով հասել է 60 գոլի շեմին։ Այդ ցուցանիշին հասնելու համար նորվեգացի ռմբարկուին պահանջվել է ընդամենը 60 հանդիպում։ Նախորդ ռեկորդը պատկանում էր Լիոնել Մեսսիին, ով Չեմպիոնների լիգայում իր առաջին 60 գնդակը խփել էր 80 խաղում։

Բացի այդ, «քաղաքայինների» հարձակվողը դարձել է եվրոպական գլխավոր ակումբային մրցաշարում 60 գոլի սահմանագծին հասած ամենաերիտասարդ ֆուտբոլիստը։ Հալանդն իր հոբելյանական՝ 60-րդ գնդակը հեղինակել է 26 տարեկան և 85 օրական հասակում՝ այս ցուցանիշով Մեսսիին գերազանցելով ընդամենը մեկ օրով․ արգենտինացին այդ նվաճմանը հասել էր 26 տարեկան և 86 օրականում։

Ընդհանուր առմամբ, ընթացիկ մրցաշրջանում Էրլինգ Հալանդը բոլոր մրցաշարերում մասնակցել է 9 հանդիպման՝ դառնալով 10 գոլի հեղինակ։

Հավելենք, որ Չեմպիոնների լիգայի լիգայի փուլի 3-րդ տուրում՝ հոկտեմբերի 20-ին, «Մանչեսթեր Սիթին» ուժերը կչափի հունական ԱԵԿ-ի հետ, իսկ ՊՍԺ-ն նույն օրը կմրցի կատալոնական «Բարսելոնայի» դեմ։

Չեմպիոնների լիգայի խաղարկության 2026/27 մրցաշրջանի լիգայի փուլի երկրորդ տուրում անգլիական «Մանչեսթեր Սիթին» սեփական հարկի տակ զիջեց գործող գավաթակիր ՊՍԺ-ին (2-4):

Հյուրերը հիանալի մեկնարկեցին հանդիպումը և արդեն առաջին խաղակեսում երեք գնդակի առավելություն ստացան. աչքի ընկան Դզիրե Դուեն (13-րդ րոպե), Ուսման Դեմբելեն (15-րդ րոպե) և Վիտինյան (32-րդ րոպե): Երկրորդ կեսում՝ 53-րդ րոպեին, Էրլինգ Հալանդը կրճատեց հաշվի տարբերությունը, սակայն 63-րդ րոպեին Մագնես Ակլիուշը խփեց փարիզեցիների չորրորդ գնդակը: 75-րդ րոպեին Հալանդը դուբլ ձևակերպեց, բայց նորվեգացի հարձակվողի ջանքերը բավարար չեղան տանտերերին պարտությունից փրկելու համար:

Լիգայի փուլի հաջորդ տուրում «Մանչեսթեր Սիթին» հոկտեմբերի 20-ին՝ ժամը 23:00-ին, սեփական հարկի տակ կընդունի հունական ԱԵԿ-ին, իսկ ՊՍԺ-ն նույն օրը և նույն ժամին Փարիզում ուժերը կչափի կատալոնական «Բարսելոնայի» հետ:

Գոլերը` ԱՅՍՏԵՂ

Չեմպիոնների լիգայի մրցաշարային աղյուսակը՝ ստորև․

«Մանչեսթեր Սիթիի» նախկին գլխավոր մարզիչ Խոսեպ Գվարդիոլան անգլիական ակումբից հեռանալուց հետո առաջին անգամ հայտնվել է հարազատ «Էթիհադ» մարզադաշտում։

Կատալոնացի մասնագետը տրիբունայից հետևում է Չեմպիոնների լիգայի 2026/2027թթ․ մրցաշրջանի լիգայի փուլի 2-րդ տուրի՝ «Մանչեսթեր Սիթի» – «Պարի Սեն Ժերմեն» դիմակայությանը։

Սակայն լեգենդար մարզչի վերադարձը մթագնել է «քաղաքայինների» ձախողված խաղով․ հանդիպման առաջին խաղակեսի ընթացքում փարիզյան գրանդը 3:0 հաշվով ջախջախիչ առավելություն է ստացել տանտերերի նկատմամբ, իսկ տեսախցիկները ֆիքսել են Գվարդիոլայի խոսուն և մտահոգ արձագանքը լուսատախտակին արձանագրված հաշվին։ Հավելենք, որ մանչեսթերյան մարզադաշտում կայացող հանդիպումը սպասարկում է գերմանացի մրցավար Սվեն Յաբլոնսկին։

Հիշեցնենք, որ Գվարդիոլան «Մանչեսթեր Սիթին» գլխավորել է 2016-ից 2026 թվականներին՝ ակումբի հետ նվաճելով մի շարք հեղինակավոր տիտղոսներ, այդ թվում՝ Չեմպիոնների լիգայի գավաթը։

Նշենք, որ մրցաշարի գործող գավաթակիրը հենց ՊՍԺ-ն է, որը տիտղոսը նվաճել է վերջին երկու մրցաշրջաններում անընդմեջ (2024/2025 և 2025/2026)։ Նախորդ խաղարկության եզրափակչում փարիզյան ակումբը հետխաղյա 11-մետրանոցներով առավելության էր հասել լոնդոնյան «Արսենալի» նկատմամբ (1:1, 4:3՝ 11մ․)։ Լիգայի փուլի 3-րդ տուրում՝ հոկտեմբերի 20-ին, «Մանչեսթեր Սիթին» կմրցի ԱԵԿ-ի, իսկ ՊՍԺ-ն՝ «Բարսելոնայի» հետ։

Անգլիայի հավաքականի նախկին պաշտպաններ, իսկ այժմ ֆուտբոլային փորձագետներ Գարի Նևիլն ու Ջեյմի Կարագերը մեկնաբանել են «Մանչեսթեր Սիթիի» ֆինանսական խախտումների գործով անկախ հանձնաժողովի մեղադրական վճիռը։

«Մենք նստած ենք ստուդիայում և նույնիսկ չենք հասկանում, թե այս ամենն ինչ է նշանակում։ «Սիթիի» երկրպագուներն այժմ ուրախ են «Էնֆիլդում» տարած հաղթանակի համար, բայց ինձ թվում է՝ նրանք դեռ չեն գիտակցում այն խարանը, այն անջնջելի բիծն ու ահռելի վնասը, որն արդեն հասցվել է իրենց ակումբին։

«Լիվերպուլի» ֆանատները նրանց ուղղությամբ երգում են՝ «Դուք դուրս եք թռչելու», գնդակին ամեն հպման ժամանակ բղավում են՝ «խարդախներ», և այս խարանից այլևս փախչելու տեղ չկա։

Տրիբունաների հեռավոր անկյունում մի պաստառ էր կախված, որն ինձ պարզապես ապշեցրեց. «Երկրպագուների մի ամբողջ սերունդ խաբված է եղել»։ Եվ հավատացեք, հենց այսպիսի տրամադրություններ են տիրելու ողջ երկրում»,- Նևիլի խոսքերն է մեջբերում Sky Sports-ը։

«Որոշակի առումով «Մանչեսթեր Սիթիի» շուրջ ստեղծված այս տոքսիկ մթնոլորտը միայն ուժեղանալու է նրանց յուրաքանչյուր նոր հաղթանակի հետ։ Բացասական ալիքն ամբողջ երկրում կշարունակի աճել։ Մեզ անհրաժեշտ է վերջնական իրավաբանական լուծում որքան հնարավոր է շուտ։ Մենք դիտում ենք այսօրվա սուպերխաղը, բայց ո՞րն է դրա իրական արժեքն այս ամենի ֆոնին»,- հավելել է Կարագերը։

Հիշեցնենք, որ կիրակի օրը «Մանչեսթեր Սիթին» արտագնա խաղում հաղթել է «Լիվերպուլին» և վերադարձել Անգլիայի Պրեմիեր լիգայի մրցաշարային աղյուսակի առաջին հորիզոնական։

«Մանչեսթեր Սիթիի» հարձակվող Էրլինգ Հալանդը «Լիվերպուլի» դեմ խաղից հետո կատակել է լուսանկարչի հետ։

Կիրակի օրը Հալանդի թիմը «Էնֆիլդում» հաղթեց Պրեմիեր լիգայի 6-րդ տուրի խաղում՝ 3-0 հաշվով։ Հալանդը բացեց հանդիպման հաշիվը 65-րդ րոպեին։

Հանդիպումից հետո Sky Sports-ը հեռարձակեց նորվեգացի հարձակվողի և «Big Weekend» հաղորդման լուսանկարիչներից մեկի զրույցը։

«Դու ամենուր ես։ Ես քեզ ավելի շատ եմ տեսնում, քան կնոջս։ Դա իսկապես այդպես է», — ժպիտով ասել է Հալանդը։

Նշենք, որ Հալանդը 6 գոլ է խփել ԱՊԼ-ի այս մրցաշրջանի 6 հանդիպումներում։

Շվեդիայի հավաքականի լեգենդար նախկին հարձակվող Զլատան Իբրահիմովիչը կանխատեսել է եվրոպական մի շարք խոշոր մրցաշարերի հաղթողներին, ինչպես նաև նշել է, թե ով կարժանանա տարվա լավագույն խաղացողի կոչմանը։

Շվեդ լեգենդար հարձակվողի կանխատեսումն է մեջբերում The Touchline պարբերականը՝ հղում անելով ESPN-ին։

Ըստ Իբրահիմովիչի՝ Անգլիայի Պրեմիեր լիգայի չեմպիոն կդառնա «Մանչեսթեր Սիթին», երկրի գավաթը կնվաճի «Չելսին», իսկ Իսպանիայի Լա լիգայում և Չեմպիոնների լիգայում հաղթող կճանաչվի կատալոնական «Բարսելոնան»։

Ինչ վերաբերում է ֆուտբոլային աշխարհի գլխավոր անհատական մրցանակին, ապա Զլատանը համոզված է, որ «Ոսկե գնդակը» կստանա «Բարսելոնայի» և Իսպանիայի ազգային հավաքականի 19-ամյա հարձակվող Լամին Յամալը։

Հիշեցնենք, որ «Ոսկե գնդակի» հանձնման հանդիսավոր արարողությունը կկայանա հոկտեմբերի 26-ին՝ Լոնդոնում։ Նախորդ տարի մրցանակին արժանացել էր Ուսման Դեմբելեն, իսկ Լամին Յամալը քվեարկության արդյունքներով զբաղեցրել էր երկրորդ հորիզոնականը։

«Լիվերպուլի» գլխավոր մարզիչ Անդոնի Իրաոլան մեկնաբանել է Պրեմիեր լիգայի 6-րդ տուրում «Մանչեսթեր Սիթիից» կրած 3-0 հաշվով տնային պարտությունը։

«Կարծում եմ՝ պարտության պատճառն ակնհայտ է. մենք այսօր երկու հանդիպում անցկացրեցինք։ Մեկը՝ մինչև 60-րդ րոպեն, իսկ երկրորդը՝ հեռացումից հետո։ Առաջին խաղակեսոմ մենք ավելի լավ թիմ էինք, իսկ դրանից հետո նրանք ավելի լավ խաղացին։

Առաջին պահին դեղին քարտ չկար։ Անդերսոնը մի քանի քայլ էլ արեց՝ շարունակելով իր շարժումները. նա (մրցավարը) նույնիսկ չէր մտադիր խախտումը գրանցել։ Ես պատկերացում չունեմ, թե ինչու նա դեղին քարտ ցույց տվեց։

Դժվար է նրանց վրա ճնշում գործադրել նույնիսկ այն ժամանակ, երբ խաղում ես 11-ը 11-ի դեմ, բայց երբ մեկ խաղացող պակաս ունես, խաղը բոլորովին այլ է դառնում։ Եվ այդ ժամանակ մենք անմիջապես զիջում ենք հաշվի մեջ՝ նախքան նույնիսկ փոխարինում կատարելը։ Երբ դու պարտվում ես 1-0 հաշվով, դու պետք է արդեն այլ կերպ խաղաս», — ասել է Իրաոլան Sky Sports-ին։

62-րդ րոպեին «կարմիրները» մնացին տասը խաղացողով՝ Ռայան Գրավենբերխի հեռացման պատճառով, որից հետո «քաղաքաբնակները» խփեցին երեք գոլ։

Անգլիայի Պրեմիեր Լիգայի 6-րդ տուրի շրջանակում «Լիվերպուլը» սեփական հարկի տակ՝ «Էնֆիլդում», ընդունեց «Մանչեսթեր Սիթիին» ։

Առաջին խաղակեսում թիմերը չգտան մրցակիցների դարպասների բանալին։ Իսկ ահա երկրորդ խաղակեսում գոլային հրավառություն էր՝ մեկ թիմի դարպասում։

Նախ 62-րդ րոպեին տանտերերը մնացին 10 հոգով՝ Գրավենբերխի հեռացումից հետո։ Քիչ անց Հալանդը բացեց հանդիպման հաշիվը. Էրլինգը 5-րդ խաղում անընդմեջ գոլ է խփում ԱՊԼ-ում և արդեն 6 գնդակ ունի իր ակտիվում նույնքան խաղից հետո։ Եվս երեք րոպե անց աչքի ընկավ արդեն Դոկուն, իսկ 78-րդ րոպեին Ռայան Շերկին էլ ավելի խոշոր դարձրեց հյուրերի առավելությունը։ 3-0, և Էնցո Մարեսկայի թիմը շարունակում է տպավորիչ հաղթարշավն ԱՊԼ-ում։

Հանդիպման գոլերը՝ ԱՅՍՏԵՂ։

Այս հանդիպումից հետո «Ման Սիթին» 18 միավորով միանձնյա գլխավորում է ԱՊԼ-ի մրցաշարային աղյուսակը՝ հարյուր տոկոսանոց արդյունքով (6 հանդիպու, 6 հաղթանակ)։ «Լիվերպուլը» 9 միավորով 9-րդ տեղում է։

Մրցաշարային աղյուսակը

«Մանչեսթեր Սիթիի» հարձակվող Էրլինգ Հալանդը խոսել է ակումբի շուրջ ստեղծված բարդ իրավիճակի, առաջիկա կարևոր հանդիպումների և թիմի ներսում միասնականություն պահպանելու անհրաժեշտության մասին։

«Քաղաքաբնակները» առաջիկա օրերին երկու լուրջ փորձության առջև են կանգնելու։ Հոկտեմբերի 11-ին «Սիթին» Էնֆիլդում կհյուրընկալվի «Լիվերպուլին», իսկ երեք օր անց սեփական հարկի տակ Չեմպիոնների լիգայի շրջանակում կմրցի մրցաշարի գործող հաղթող ՊՍԺ-ի հետ։

Հալանդը, որը Նորվեգիայի հավաքականի կազմում միջազգային դադարից հետո վերադարձել է «Մանչեսթեր Սիթի»՝ վերջին չորս խաղում երեք գոլ խփած, ընդգծել է, որ նման պահերին թիմն առավել քան երբևէ պետք է միասնական լինի։

«Մենք պետք է միասին մնանք։ Պետք է պահպանենք դրական տրամադրվածությունը։ Ինչ էլ որ պատահի կյանքում, մենք միշտ պետք է ժպտանք, առաջ նայենք, փորձենք հաղթել խաղերում և վայելենք այս ընթացքը։

Պետք է միասին մնանք և սեր փոխանցենք միմյանց։ Պետք է վայելենք ճանապարհը և ժպտանք», — ասել է Հալանդը։

Նորվեգացի հարձակվողն անդրադարձել է նաև «Մանչեսթեր Սիթիի» նկատմամբ իր ունեցած հատուկ վերաբերմունքին։ Հալանդի կապը ակումբի հետ սկսվել է դեռ մանկուց․ նրա հայրը՝ Ալֆի Հոլանդը, 2000-2002 թվականներին հանդես է եկել «Սիթիի» կազմում։

«Ես շատ եմ հոգում այս վայրի՝ ընդհանուր առմամբ Մեծ Բրիտանիայի մասին։ Մայրս և հայրս այստեղ ապրել են տասը տարի՝ Նոթինգհեմում և Լիդսում։ Ես այստեղ անցկացրել եմ կյանքի առաջին չորս տարիները, եղբայրս՝ ինը, իսկ քույրս՝ վեցը։ Սա մեզ համար յուրահատուկ վայր է։

Ես շատ եմ հոգում «Սիթիի» մասին։ Պետք է ասեմ, որ ինձ շատ են հետաքրքրում նաև երկրպագուները, որովհետև ես ինքս երկրպագու եմ։ Ես նույնպես ապրում եմ նրանց զգացմունքներով», — նշել է ֆուտբոլիստը։

Հալանդը նաև առանձնացրել է «Լիվերպուլի» դեմ առաջիկա հանդիպման նշանակությունը։

««Լիվերպուլի» դեմ խաղալը միշտ յուրահատուկ է։ Ես այնտեղ հաղթել եմ, ոչ-ոքի խաղացել և պարտվել։ Պրեմիեր լիգայի յուրաքանչյուր խաղ տարբեր է, իսկ «Լիվերպուլի» դեմ յուրաքանչյուր հանդիպում առանձնահատուկ է», — ասել է նա։

Հալանդի հայտարարությունները հնչել են այն ժամանակ, երբ «Մանչեսթեր Սիթին» շարունակում է բարդ իրավական գործընթացը՝ կապված ակումբին ներկայացված ֆինանսական կանոնների խախտումների մեղադրանքների հետ։

Անկախ հանձնաժողովը ակումբին մեղավոր է ճանաչել ներկայացված 115 դրվագներից 114-ում։ Գործի շրջանակում խոսքը, մասնավորապես, ֆինանսական տեղեկատվության տրամադրման, ֆուտբոլիստներին և մարզիչներին կատարված վճարումների, ինչպես նաև ֆինանսական վերահսկողության պահանջների պահպանման հետ կապված հարցերի մասին է։

«Սիթին» վիճարկում է որոշումները և հոկտեմբերի սկզբին բողոքարկել է գործընթացի արդյունքները։
Հալանդը, սակայն, իր խոսքում չի մտել իրավական մանրամասների մեջ՝ փոխարենը շեշտը դնելով ակումբի, խաղացողների և երկրպագուների միասնականության վրա։

Հալանդը «Մանչեսթեր Սիթիում» հանդես է գալիս 2022 թվականից։ Այդ ընթացքում նա թիմի կազմում նվաճել է ինը խոշոր տիտղոս և բոլոր մրցաշարերում անցկացրած 205 խաղում դարձել 169 գոլի հեղինակ։