Անգլիական «Մանչեսթեր Սիթին» և Գերմանիայի գործող չեմպիոն «Բավարիան» բացարձակ առաջատարներն են աշխարհի 2026 թվականի առաջնությանը մասնակցող ֆուտբոլիստների քանակով։

​«Քաղաքայինների» կազմից աշխարհի գլխավոր ստուգատեսին կմասնակցի աննախադեպ թվով՝ 19 ֆուտբոլիստ։ Մյունխենյան գրանդն այս ցուցանիշով զիջում է ընդամենը մեկ խաղացողով՝ մունդիալ գործուղելով 18 ֆուտբոլիստի։

​Առաջատարների եռյակը եզրափակում են Չեմպիոնների լիգայի 2025/26 մրցաշրջանի եզրափակիչի մասնակիցները՝ ՊՍԺ-ն ու Լոնդոնի «Արսենալը», որոնք աշխարհի առաջնությունում կունենան 16-ական ներկայացուցիչ։

​Ներկայացնում ենք ԱԱ-2026-ի հայտացուցակներում ամենաշատ ֆուտբոլիստներ ունեցող ակումբների ամբողջական ցանկը․

• «Մանչեսթեր Սիթի» – 19
• «Բավարիա» – 18
• ՊՍԺ, «Արսենալ» – 16
• «Բարսելոնա» – 15
• «Ատլետիկո Մադրիդ», «Ալ-Հիլալ», «Քրիստալ Փելաս», «Մանչեսթեր Յունայթեդ» – 12
• «Բորուսիա Դորտմունդ», «Լիվերպուլ», «Գալաթասարայ» – 11
• «Սլավիա Պրահա», «Միլան», ՊՍՎ, «Ռեալ Մադրիդ», «Ֆեներբախչե» – 10

Հիշեցնենք, որ աշխարհի 2026 թվականի առաջնությունը կմեկնարկի հունիսի 11-ին և պատմության մեջ առաջին անգամ կանցկացվի միանգամից երեք երկրում՝ ԱՄՆ-ում, Կանադայում և Մեքսիկայում։ Մրցաշարին կմասնակցի ռեկորդային՝ 48 ազգային հավաքական։

Դանիացի հարձակվող Ռասմուս Հոյլունդը վերջնականապես հեռացել է «Մանչեսթեր Յունայթեդից» և մշտական հիմունքներով համալրել իտալական «Նապոլիի» շարքերը։ Այս տրանսֆերի մասին պաշտոնապես հայտարարել է անգլիական ակումբի մամուլի ծառայությունը։

​Ավարտված մրցաշրջանը հարձակվողն արդեն իսկ անցկացրել էր նեապոլյան թիմում՝ վարձակալական հիմունքներով։ Այդ ընթացքում նա բոլոր մրցաշարերում հասցրել է մասնակցել 44 հանդիպման՝ դառնալով 16 գոլի հեղինակ և ամրապնդելով իր դիրքերը իտալական ակումբում։

​Ավելի վաղ եվրոպական մամուլում շրջանառվող տեղեկությունների համաձայն՝ «Նապոլին» ֆուտբոլիստի լիարժեք տրանսֆերի դիմաց կվճարի շուրջ 44 միլիոն եվրո։

​Հիշեցնենք, որ Հոյլունդը «Մանչեսթեր Յունայթեդ» էր տեղափոխվել 2023 թվականի ամռանը՝ իտալական «Ատալանտայից»։ Մանկունիացիների կազմում անցկացրած երկու մրցաշրջանների ընթացքում հարձակվողն ընդհանուր առմամբ մասնակցել է 95 հանդիպման՝ դառնալով 26 գոլի հեղինակ։

«Միլանի» պորտուգալացի հարձակվող Ռաֆայել Լեաուն հայտարարել է, որ պատրաստվում է առաջիկա ամռանը հեռանալ իտալական ակումբից և իր ուժերը փորձել այլ առաջնությունում։

26-ամյա ֆուտբոլիստը, որը «ռոսոներիի» գույները պաշտպանում է 2019 թվականի օգոստոսից, Sport TV-ին տված հարցազրույցում հաստատել է ակումբային գրանցումը փոխելու իր մտադրությունը.

«Ես հպարտ եմ, որ իմ անունը գրել եմ «Միլանի» պատմության մեջ, բայց ես նոր էջ եմ ուզում սկսել: Զգում եմ, որ պատրաստ եմ խաղալ այլ լիգայում: Ես արել եմ հնարավոր ամեն ինչ «Միլանի» համար, սակայն եկել է նոր մարտահրավեր փորձելու ժամանակը»,- նշել է պորտուգալացին:

«Միլանի» համար 2025/26 մրցաշրջանը չարդարացրեց սպասելիքները, քանի որ թիմն Իտալիայի առաջնությունում բավարարվեց միայն 5-րդ տեղով և մնաց առանց Չեմպիոնների լիգայի ուղեգրի։ Ինչ վերաբերում է Լեաուի ելույթներին, ապա Ա Սերիայում անցկացրած 29 խաղում նա դարձել է 9 գոլի և 3 արդյունավետ փոխանցման հեղինակ, իսկ Իտալիայի գավաթի երկու հանդիպումներում աչքի է ընկել մեկ անգամ։ Այսպիսով, մրցաշրջանի ընդհանուր կտրվածքով ֆուտբոլիստը մասնակցել է 31 հանդիպման՝ դառնալով 10 գոլի և 3 գոլային փոխանցման հեղինակ։

Լեաուի գործող պայմանագիրը «Միլանի» հետ նախատեսված է մինչև 2028 թվականի հունիսի 30-ը: Transfermarkt պորտալը ֆուտբոլիստի տրանսֆերային արժեքը գնահատում է 50 միլիոն եվրո: Ըստ Football Insider-ի՝ հարձակվողի տեղափոխության գործարքը կարող է կազմել մոտ 43 միլիոն եվրո:

Թեև դեռևս հստակ տեղեկություն չկա, թե որտեղ կշարունակի կարիերան պորտուգալացին, ավելի վաղ հաղորդվում էր, որ նրա ծառայություններով ակտիվորեն հետաքրքրված են եվրոպական այնպիսի գրանդներ, ինչպիսիք են Մադրիդի «Ռեալը», «Մանչեսթեր Սիթին» և «Մանչեսթեր Յունայթեդը»: Բացի այդ, ֆուտբոլիստի նկատմամբ հավակնություններ ունեն նաև թուրքական հսկաները՝ «Գալաթասարայը» և «Ֆեներբահչեն»:

Ամերիկյան հեղինակավոր Forbes հանդեսը հրապարակել է աշխարհի ամենաթանկ ֆուտբոլային ակումբների նոր վարկանիշային աղյուսակը։ Ցուցակը գլխավորում է Մադրիդի «Ռեալը». չնայած այն հանգամանքին, որ «արքայական ակումբը» 2025/2026 մրցաշրջանն ավարտել է առանց նվաճած տիտղոսների, ակումբի շուկայական արժեքը գնահատվում է ռեկորդային՝ 9,5 միլիարդ դոլար։

Աշխարհի ամենաթանկ ակումբների լավագույն տասնյակը․

1․ «Ռեալ Մադրիդ» (9,5 միլիարդ դոլար)

2․ «Բարսելոնա» (7,5 միլիարդ դոլար)

3․ «Մանչեսթեր Յունայթեդ» (7,2 միլիարդ դոլար)

4․ «Լիվերպուլ» (6,2 միլիարդ դոլար)

5․ ՊՍԺ (5,8 միլիարդ դոլար)

6․ «Բավարիա» (5,7 միլիարդ դոլար)

7․ «Մանչեսթեր Սիթի» (5,5 միլիարդ դոլար)

8․ «Արսենալ» (5,4 միլիարդ դոլար)

9․ «Չելսի» (4,2 միլիարդ դոլար)

10․ «Տոտենհեմ» (3 միլիարդ դոլար)

Ինչպես տեսնում ենք, լավագույն տասնյակում միանգամից վեց ակումբ ներկայացնում է Անգլիայի Պրեմիեր լիգան, սակայն ֆինանսական վարկանիշի բացարձակ առաջատարները իսպանական Լա լիգայի գլխավոր գրանդներն են:

Չեմպիոնների լիգայի խաղարկության եզրափակիչից առաջ հեղինակավոր Goal պորտալը թարմացրել է 2026 թվականի «Ոսկե գնդակ» մրցանակին հավակնող ֆուտբոլիստների վարկանիշային աղյուսակը։

Աղյուսակը շարունակում է գլխավորել Մյունխենի «Բավարիայի» անգլիացի հարձակվող Հարի Քեյնը։ Երկրորդ հորիզոնական է բարձրացել մրցանակի գործող դափնեկիր, ՊՍԺ-ի ֆրանսիացի հարձակվող Ուսման Դեմբելեն։ «Բարսելոնայի» իսպանացի հարձակվող Լամին Յամալը նահանջել է մեկ աստիճանով և այժմ եզրափակում է լավագույն եռյակը։

Goal-ի վարկածով 2026 թվականի «Ոսկե գնդակի» 20 գլխավոր հավակնորդները․

1. Հարի Քեյն («Բավարիա»)
2. Ուսման Դեմբելե (ՊՍԺ)
3. Դեկլան Ռայս («Արսենալ»)
4. Լամին Յամալ («Բարսելոնա»)
5. Մայքլ Օլիսե («Բավարիա»)
6. Կիլիան Մբապե («Ռեալ Մադրիդ»)
7. Խվիչա Կվարացխելիա (ՊՍԺ)
8. Վիտինյա (ՊՍԺ)
9. Լուիս Դիաս («Բավարիա»)
10. Գաբրիել Մագալյես («Արսենալ»)
11. Էրլինգ Հալանդ («Մանչեսթեր Սիթի»)
12. Լիոնել Մեսի («Ինտեր Մայամի»)
13. Կրիշտիանու Ռոնալդու («Ալ-Նասր»)
14. Բրունո Ֆերնանդեշ («Մանչեսթեր Յունայթեդ»)
15. Բուկայո Սակա («Արսենալ»)
16. Ռաֆինյա («Բարսելոնա»)
17. Լաուտարո Մարտինես («Ինտեր»)
18. Վինիսիուս Ժունիոր («Ռեալ Մադրիդ»)
19. Պեդրի («Բարսելոնա»)
20. Խուլիան Ալվարես («Ատլետիկո Մադրիդ»)

Բրիտանական BBC հեռարձակող կորպորացիան ամփոփել է Անգլիայի Պրեմիեր լիգայի 2025/2026 մրցաշրջանի արդյունքները՝ ներկայացնելով լավագույն ֆուտբոլիստին, մարզչին, տարվա հայտնությանն ու խորհրդանշական հավաքականը:

ԱՊԼ-ի լավագույն ֆուտբոլիստ է ճանաչվել Լոնդոնի «Արսենալի» անգլիացի կիսապաշտպան Դեկլան Ռայսը: Ավարտված մրցաշրջանում նա մասնակցել է ԱՊԼ-ի 36 հանդիպման՝ դառնալով 4 գոլի և 7 գոլային փոխանցման հեղինակ։ Ներկայումս ֆուտբոլիստի տրանսֆերային արժեքը գնահատվում է 120 մլն եվրո (ըստ Transfermarkt-ի):

Քվեարկության արդյունքում երկրորդ տեղն զբաղեցրել է «Մանչեսթեր Յունայթեդի» պորտուգալացի կիսապաշտպան Բրունու Ֆերնանդեշը, որն ասիստների քանակով նոր ռեկորդ է սահմանել, իսկ լավագույն եռյակը եզրափակել է «Բրենթֆորդի» հարձակվող Իգոր Տիագոն (22 գոլ):

Լավագույն մարզչի մրցանակին արժանացել է «Արսենալը» գլխավորող Միկել Արտետան, որը լոնդոնյան թիմի ղեկին է 2019 թվականի դեկտեմբերից։ Նրա գլխավորությամբ «զինագործները» 22 տարվա դադարից հետո հռչակվեցին Անգլիայի չեմպիոն՝ 38 տուրում վաստակելով 85 միավոր և 7 միավորով գերազանցելով մոտակա հետապնդողին՝ «Մանչեսթեր Սիթիին»:

Մրցանակի համար պայքարում էին նաև Անդոնի Իրաոլան («Բորնմութ»), Կիտ Էնդրյուսը («Բրենթֆորդ») և Ռեժիս Լե Բրիսը («Սանդերլենդ»):

Մրցաշրջանի «Լավագույն երիտասարդ ֆուտբոլիստ» անվանակարգում հաղթող է ճանաչվել «Մանչեսթեր Սիթիի» անգլիացի պաշտպան Նիկո Օ՛Ռայլին։ Ընթացիկ մրցաշրջանում նա ԱՊԼ-ում անցկացրել է 34 հանդիպում՝ աչքի ընկնելով 5 գոլով և 3 ասիստով: Նրան հաջորդել են «Բորնմութի» ֆրանսիացի հարձակվող Էլի Կրուպին և «Արսենալից» Մաքս Դոումենը:

ԱՊԼ-ի 2025/2026 մրցաշրջանի խորհրդանշական հավաքականը՝ ըստ BBC-ի.

• Դարպասապահ. Դավիդ Ռայա («Արսենալ»):
• Պաշտպաններ. Վիլյամ Սալիբա, Գաբրիել Մագալյաես, Յուրիեն Թիմբեր (բոլորը՝ «Արսենալ»), Նիկո Օ՛Ռայլի («Մանչեսթեր Սիթի»):
• Կիսապաշտպաններ. Դեկլան Ռայս («Արսենալ»), Բրունու Ֆերնանդեշ («Մանչեսթեր Յունայթեդ»), Էլիոթ Անդերսոն («Նոթինգհեմ Ֆորեսթ»):
• Հարձակվողներ. Էրլինգ Հալանդ («Մանչեսթեր Սիթի»), Անտուան Սեմենյո («Բորնմութ» / «Մանչեսթեր Սիթի»), Իգոր Տիագո («Բրենթֆորդ»):

Մանրամասները՝ ԱՅՍՏԵՂ

«Նյուքասլի» եզրային հարձակվող Էնթոնի Գորդոնի սպասվող տեղափոխությունը «Բարսելոնա» ուղղակիորեն ազդեցություն չի ունենա «Մանչեսթեր Յունայթեդից» Մարկուս Ռեշֆորդի տրանսֆերը գնելու՝ կատալոնական ակումբի հնարավորությունների վրա։ Այս մասին X սոցիալական ցանցի իր էջում հայտնել է Sky Sports-ի լրագրող Դանիալ Խանը։

Աղբյուրի տեղեկություններով՝ «կապտանռնագույնները» դեռևս ունեն բավարար ֆինանսական միջոցներ՝ անգլիացի վինգերի գնման իրավունքն ակտիվացնելու համար, որը կազմում է 30 միլիոն եվրո։

Միևնույն ժամանակ, «Մանչեսթեր Յունայթեդը» մտադիր չէ վերանայել կատալոնական ակումբի հետ կնքված գործարքի պայմանները և հաստատապես չի դիտարկում ֆուտբոլիստին կրկին վարձավճարով տրամադրելու տարբերակը:

Մանկունիացիները վստահ են, որ անհրաժեշտության դեպքում կարող են Ռեշֆորդին շատ ավելի բարձր գնով վաճառել մեկ այլ ակումբի:

Հայտնի են դարձել Չեմպիոնների լիգայի 2026/27 մրցաշրջանի ընդհանուր փուլի 29 մասնակիցները։ Լիգայի փուլում ամենաշատ ներկայացուցիչներ կունենան Անգլիան և Իսպանիան՝ 5-ական ակումբով։

• Անգլիա. «Արսենալ», «Մանչեսթեր Սիթի», «Մանչեսթեր Յունայթեդ», «Ասթոն Վիլա», «Լիվերպուլ»։
• Իսպանիա. «Բարսելոնա», «Ռեալ», «Վիլյառեալ», «Ատլետիկո», «Բետիս»։
• Իտալիա. «Ինտեր», «Նապոլի», «Ռոմա», «Կոմո»։
• Գերմանիա. «Բավարիա», Դորտմունդի «Բորուսիա», «Լայպցիգ», «Շտուտգարտ»։
• Ֆրանսիա. ՊՍԺ, «Լանս», «Լիլ»։
• Նիդերլանդներ. ՊՍՎ, «Ֆեյենորդ»։
• Պորտուգալիա. «Պորտու», «Սպորտինգ»։
• Բելգիա. «Բրյուգե»։
• Չեխիա. «Սլավիա»։
• Թուրքիա. «Գալաթասարայ»։
• Ուկրաինա. «Շախտյոր»։

Ընդհանուր առմամբ՝ Չեմպիոնների լիգայի 2026/27 մրցաշրջանի լիգայի փուլում հանդես կգա 36 թիմ։ ՉԼ-ի մնացած 7 ուղեգրերը կխաղարկվեն որակավորման փուլերում, որոնք կանցկացվեն ամռանը։ Մրցաշարի հիմնական փուլը կմեկնարկի 2026 թվականի սեպտեմբերի 8-ին և կեզրափակվի 2027-ի հունվարի 27-ին։

Հիշեցնենք, որ Չեմպիոնների լիգայի ընթացիկ մրցաշրջանի հաղթողը հայտնի կդառնա մայիսի 30-ին՝ ՊՍԺ — «Արսենալ» եզրափակիչ դիմակայությունում։ Հանդիպումը կկայանա Բուդապեշտի «Պուշկաշ Արենա» մարզադաշտում։

Անգլիայի Պրեմիեր լիգայի 2025/26 մրցաշրջանը մոտեցավ իր հանգուցալուծմանը։

Վերջին՝ 38-րդ տուրը հարուստ էր ինտրիգներով, անսպասելի արդյունքներով, հրաժեշտներով և պատմական ռեկորդներով։

​«Տոտենհեմի» հրաշք փրկությունն ու «Վեսթ Հեմի» ողբերգությունը

Գոյատևման պայքարում ամենադրամատիկ հանգուցալուծումը ստացավ լոնդոնյան թիմերի ճակատագիրը։ «Տոտենհեմը» սեփական հարկի տակ 1:0 հաշվով կարևորագույն հաղթանակ տարավ «Էվերտոնի» նկատմամբ։ Միակ ու փրկարար գոլը 43-րդ րոպեին խփեց Ժոաու Պալինյան։ Այս հաղթանակի շնորհիվ «Խթանները» վաստակեցին 41 միավոր, զբաղեցրեցին 17-րդ հորիզոնականը և հրաշքով պահպանեցին իրենց տեղը անգլիական ֆուտբոլի էլիտայում։

​Այս արդյունքը ճակատագրական եղավ մեկ այլ լոնդոնյան ակումբի՝ «Վեսթ Հեմի» համար։ Չնայած «Լիդսի» նկատմամբ տոնած վստահ հաղթանակին (3:0)՝ «Մրճահարները» 39 միավորով մնացին 18-րդ տեղում և նահանջեցին Չեմպիոնշիփ։

Նրանց հետ բարձրագույն խմբին հրաժեշտ տվեցին նաև հետնապահներ «Բարնլին» (22 միավոր) և «Վուլվերհեմփթոնը» (20 միավոր), որոնք վերջին խաղում խաղաղ դաշտ կնքեցին (1:1)։

​Գվարդիոլայի հրաժեշտն ու առաջատարների արդյունքները

«Մանչեսթեր Սիթիի» համար երեկոն հուզառատ էր. «Քաղաքայինները» «Էթիհադում» 1:2 հաշվով անսպասելիորեն զիջեցին «Ասթոն Վիլային»: Սա Խոսեպ Գվարդիոլայի վերջին հանդիպումն էր թիմի ղեկին՝ ակումբում անցկացրած փառահեղ 10 տարիներից հետո (Անտուան Սեմենյոյի գոլին հյուրերը պատասխանեցին Օլլի Ուոթքինսի դուբլով): «Սիթին» մրցաշրջանն ավարտեց 2-րդ տեղում (78 միավոր), իսկ «Վիլան» (65 միավոր) գրավեց 4-րդ տեղը. երկուսն էլ կխաղան Չեմպիոնների լիգայում:

​Առաջնության չեմպիոն «Արսենալը», որն արդեն ապահովել էր տիտղոսը, վերջին տուրում ևս մեկ հաղթանակ գրանցեց՝ արտագնա խաղում 2:1 հաշվով կոտրելով «Քրիսթալ Փելասի» դիմադրությունը (գոլերը՝ Գաբրիել Ժեզուս, Նոնի Մադուեկե)։

«Զինագործները» վաստակեցին 85 միավոր:
​«Լիվերպուլը» 1:1 խաղաց «Բրենթֆորդի» հետ (աչքի ընկավ Քերթիս Ջոնսը) և 60 միավորով զբաղեցրեց 5-րդ տեղը, ինչը մերսիսայդցիներին ևս իրավունք կտա հաջորդ մրցաշրջանում հանդես գալ Չեմպիոնների լիգայում։

Տեսանյութը` այստեղ

​Ֆերնանդեշի պատմական ռեկորդը և «Չելսիի» ձախողումը

Փայլուն ավարտ ունեցավ «Մանչեսթեր Յունայթեդը»՝ հյուրընկալվելիս 3:0 հաշվով ջախջախելով «Բրայթոնին»։ Խաղի գլխավոր հերոսը Բրունու Ֆերնանդեշն էր, որը դարձավ գոլի և գոլային փոխանցման հեղինակ։

Պորտուգալացին կատարեց իր 21-րդ ասիստը այս մրցաշրջանում՝ սահմանելով ԱՊԼ-ի նոր բացարձակ ռեկորդ։ ՄՅՈւ-ն (71 միավոր) գրավեց 3-րդ տեղն ու նվաճեց ՉԼ-ի ուղեգիր։

​Իսկ ահա տուրի գլխավոր հիասթափությունը մատուցեց «Չելսին»։

Լոնդոնցիները 10 հոգով (կարմիր քարտ ստացավ Ֆոֆանան) 1:2 հաշվով զիջեցին «Սանդերլենդին» (միակ գոլը խփեց Քոուլ Պալմերը, իսկ Մալո Գյուստոն դարձավ ինքնագոլի հեղինակ)։ Այս պարտության արդյունքում «Ազնվականները» նահանջեցին 10-րդ հորիզոնական (52 միավոր) և զրկվեցին հաջորդ մրցաշրջանում եվրագավաթներում հանդես գալու իրավունքից։

​Եվրագավաթների ուղեգրերի ամփոփում
​Չեմպիոնների լիգա: Արսենալ (1), Մանչեսթեր Սիթի (2), Մանչեսթեր Յունայթեդ (3), Ասթոն Վիլա (4), Լիվերպուլ (5)
​Եվրոպա լիգա: Բորնմութ (6), Սանդերլենդ (7)

​Կոնֆերենցիաների լիգա: Բրայթոն (8)

​38-րդ տուրի մյուս հանդիպումների արդյունքները.

​«Ֆուլհեմ» — «Նյուքասլ»՝ 2:0
​«Նոթինգհեմ Ֆորեսթ» — «Բորնմութ»՝ 1:1

Մրցաշարային աղյուսակն այս պահին

Լոնդոնի «Վեստ Հեմի» երկու ֆուտբոլիստ ամառային տրանսֆերային պատուհանի ընթացքում կարող է տեղափոխվել «Մանչեսթեր Յունայթեդ»։ Այս մասին հայտնում է Football Insider-ը։

​Աղբյուրի տեղեկություններով՝ «կարմիր սատանաների» հետաքրքրությունների շրջանակում են հայտնվել կիսապաշտպան Մատեուշ Ֆերնանդեշն ու վինգեր Ջարոդ Բոուենը։ Մանկունիանցիները կարող են քայլեր ձեռնարկել խաղացողներին ձեռք բերելու ուղղությամբ այն դեպքում, եթե «մրճահարները» դուրս մնան Պրեմիեր լիգայից։

​Անգլիայի առաջնության վերջին տուրից առաջ «Վեստ Հեմը» վաստակած 36 միավորով զբաղեցնում է մրցաշարային աղյուսակի 18-րդ հորիզոնականը՝ գտնվելով վտանգավոր գոտում։

Պրեմիեր լիգայի ընթացիկ մրցաշրջանի վերջին խաղում լոնդոնյան թիմն իր հարկի տակ կընդունի «Լիդսին»։ Այդ վճռորոշ հանդիպումը կկայանա այսօր՝ մայիսի 24-ին։