հովհաննես-հովսեփյան — Armsport.am

Բոլորը հասկացան, որ Հայաստանը տեր է կանգնում իր մարզիկին․ Հովհաննես Հովսեփյանը՝ Բաչկովի մենամարտի բողոքարկման մասին

Նարե Հովհաննիսյան — Fri, 05 Nov 2021 16:10:29 +0000

Բռնցքամարտի աշխարհի առաջնության առաջին իսկ օրվանից մրցավայրում հայ բռնցքամարտիկների կողքին է Հայաստանի բռնցքամարտի ֆեդերացիայի նախագահ Հովհաննես Հովսեփյանը։ Եզրափակչից առաջ ՀԲՖ մամուլի ծառայությունը զրուցել է Հովհաննես Հովսեփյանի հետ:

-Աշխարհի առաջնությունում մենք ունենք նաև բրոնզե մեդալ: Հովհաննես Բաչկովը դարձավ բրոնզե մեդալակիր: Ընդ որում մենք բրոնզը վերցրեցինք ¼ եզրափակիչում մենամարտի արդյունքը բողոքարկելուց հետո: Աշխարհի առաջնությունում 50-ից ավելի բողոքարկումներից ընդամենը երկուսն են բավարարվել : Ի՞նչպես հաջողվեց հասնել դրան: Ընդ որում սա մեդալի արժեք ունեցող պայքար էր:

-Բռնցքամարտը սուբյեկտիվ մարզաձև է: Այստեղ միշտ չէ, որ մրցավարական որոշումները համընկնում են բոլորի կարծիքին, բայց ես միշտ նշել եմ, որ պայքարելու եմ, որպեսզի հայ մարզիկից հաղթանակ չգողանան ու մենք տեր լինենք մեր արդար հաղթանակներին: Հայսատնի բռնցքամարտի ֆեդերացիան ոչինչ չի խնայում դրա համար: Մենք բոլոր հնարավոր ու անհնարին միջոցներով փորձում ենք պաշտպանել մեր մարզիկներին: Իհարկե աշխարհի առաջնությունում եղան մի քանի մենամարտեր նույնպես, որոնց արդյունքի ու մրցավարական որոշումների հետ ես համաձայն չէի, բայց ցավոք սրտի չստացվեց այնտեղ նույնպես շահել բողոքարկումը, բայց բոլորը հասկացան, որ Հայաստանը տեր է կանգնում իր մարզիկին ու մրցավարները այսուհետ ավելի ուշադիր կլինեն, որովհետև եթե կա բողոքարկում, դա արդեն իսկ նրանց հեղինակություն չի բերում: Նշեմ, որ այն մարզիկները, որոնք այս առաջնությունում արդյունք չգրանցեցին ,հետագայում իրենց խոսքն անպայման ասելու են: Ես տեսնում եմ , որ ունենք շատ լավ հավաքական, շատ լավ բռնցքամարտիկներ, որոնք կարող են պայքարել ամենաբարձր հարգի մեդալների համար:

-Հովհաննես Բաչկովի ելույթից գո՞հ եք, սա այս առաջնությունում նրա ուժերի սահմանագի՞ծն էր:

-Ոչ սահմանագիծը չէր: Հովհաննես Բաչկովը կարող էր պայքարել նաև ոսկե մեդալի համար: Նրա բռնցքամարտը կիսաեզրափակիչում կուբացի մարզիկի հետ չստացվեց: Մեր մրցակիցը իր մարտաոճը թելադրեց և հենց դրա շնորհիվ էլ առավելություն ստացավ: Մյուս առումներով Բաչկովը նրան չզիջեց:

Հովհաննես Հովսեփյան. Չալոյանն ունի չեմպիոն դառնալու բոլոր հնարավորությունները

Նարե Հովհաննիսյան — Fri, 05 Nov 2021 15:36:52 +0000

Հիշեցնենք՝ Դավիթ Չալոյան — Մարկ Պետրովսկի մենամարտը կկայանանա Երևանի ժամանակով ժամը 22:30-ից 23-ն ընկած ժամանակահտվածում:

-Պարոն Հովսեփյան աշխարհի առաջնությունում մենք ունենք եզրափակչի մասնակից և ևս մեկ բրոնզե մեդալ: Հայկական բռնցքամարտում այսպիսի արդյունք ավելի քան 12 տարի չէր եղել: Երբ գալիս էինք աշխարհի առաջնության հավատու՞մ էիք, որ նման արդյունքի կհասնենք:

-Իհարկե հավատում էի, նաև ավելին էինք սպասում, բայց որոշ բռնցքամարտիկների մոտ չստացվեց, ունեցանք նաև վնասվածք: Թեպետ երկու մեդալն էլ վատ արդյունք չէ, նույնիսկ Ուկրաինայի պես հարուստ ավանդույթներ ունեցող երկիրը կիսաեզրափակիում երկու մասնակից չուներ, իսկ Անգլիան, որը համարվում է բռնցքամարտի ուժեղագույն երկրներից մեկը, առհասարակ ոչ մի մասնակից չուներ կիսաեզրափակչում: Աշխարհի այս առաջնությունը շատ ուժեղ ու շատ բարդ էր, ուստի ես գոհ եմ արդյունքից, թեպետ սա դեռ մեր սահմանը չէ: Ես վստահ եմ, որ Դավիթ Չալոյանը կարողանալու է հաղթել : Նա բոլոր հնարավորություններն ունի հաղթելու և հայ ազգին չեմպինոական տիտղոս պարգևելու: Ամբողջ հայ ժողովուրդը սպասում է դրան:

-Հատկապես ո՞ր հատկանիշների շնորհիվ Դավիթ Չալոյանը հասավ եզրափակիչ, ու ի՞նչն է է Ձեզ այդքան վստահություն տալիս, որ նա կարող է հաղթել, չէ որ նա առաջնության էր եկել ոչ ֆավորիտի կարգավիճակով:

-Էական չէ նա առաջնության է եկել ֆավորիտի, թե ոչ ֆավորիտի կարգավիճակով: Ես միշտ նշել եմ, որ ցանկացած բռնցքամարտիկի էլ հնարավոր է հաղթել, անգամ ֆավորիտներին: Եթե մարզիկն ունի կամային որակներ, տեխնիկատակտիկապես գրագետ է ու լսում է ռինգի անկյունում նստած մարզիչներին, նա կարող է հաղթել ցանկացած մրցակցի: Դավիթն այդ մարզիկն է: Նա լավագույնս իրեն դրսևորեց ռինգում և ցույց տվեց ինչպես կարելի է հաղթել ֆավորիտներին՝ այդ թվում օլիմպիական խաղերի մասնակիցներին, բանակայինների աշխարհի չեմպիոնին: Ընդ որում նա ռևաշի հասավ Մոսկվայում կրած պարտության դիմաց, իսկ դա խոսում է նրա կամային բարձր որակների մասին:

-Իսկ ավելի մասնագիտորեն ին՞չ պետք է անի ռինգում չեմպիոնական մենամարտում հաղթելու համար:

-Պետք է անի այն, ինչ արեց նախորդ 4 մենամարտերում: Չնկճվի, պայքարի մինչև վերջ: Վստահ եմ՝ մարզիչների հետ նա կուսումնասիրի, կգնահատի մրցակցին, որի արդյունքում մենք շատ մեծ հնարավորություններ կունենանք:

Կարեն Գիլոյանն ու Հովհաննես Հովսեփյանը հանդիպել են աշխարհի առաջնությանը մասնակցող բռնցքամարտիկների հետ

Նարե Հովհաննիսյան — Mon, 25 Oct 2021 14:12:21 +0000

Բռնցքամարտի Հայաստանի ֆեդերացիայի նախագահ Հովհաննես Հովսեփյանի և ԿԳՄՍ փոխնախարար Կարեն Գիլոյանի գլխավորությամբ այսօր Բելգրադում բռնցքամարտիկների ու մարզիչների հետ կայացել է ժողով քննարկում, որի ընթացքում արծարծվել են աշխարհի առաջնությանն ու առհասարակ բռնցքամարտին վերաբերող բազմաթիվ հարցեր։

Այս մասին հայտնում է ՀԲՖ մամուլի քարտուղարությունը:

Կարեն Գիլոյանն ուրախությամբ ընդգծել է,որ այսօր բռնցքամարտի հավաքականում լավ մթնոլորտ է և բոլորը միասնական ու թիմային աշխատանքով գնում են դեպի հաղթանակ։

Ֆեդերացիայի նախագահ Հովհաննես Հովսեփյանն էլ իր հերթին նշել է, որ արվել է հնարավորը, որ մեր մարզիկները հաջող հանդես գան աշխարհի առաջնությունում։

Հավաքականի գլխավոր մարզչիչ Կարեն Աղամալյանի խոսքով տղաները պատրաստ են և մեծ ցանկություն ունեն կռվելու ու հաղթանակներ տոնելու։

Արթուր Գևորգյանն ու նախկին ղեկավար կազմը կանգնած են լինելու հայկական բռնցքամարտի կողքին. ՀԲՖ-ի հայտարարությունը

Նարե Հովհաննիսյան — Thu, 29 Apr 2021 18:49:19 +0000

Հայաստանի բռնցքամարտի ֆեդերացիան հայտարարությամբ է հանդես եկել կապված ֆեդերացիայի նախագահի՝ այսօր կայացած ընտրությունների հետ.

«Չնայած մեր բազմաթիվ հորդորներին` ՀԲՖ նախագահի ընտրությունների հետաձգման և օրինական անցկացման, ընտրությունն այնուամենայնիվ կայացավ։

Ֆեդերացիայի նախկին նախագահ Արթուր Գևորգյանն ու ամբողջ անձնակազմը շնորհավորում և հաջողություն են մաղթում Հայաստանի բռնցքամարտի ֆեդերացիային և հայկական բռնցքամարտի աշխարհի ներկայացուցիչներին։

Ինչպես ղեկավարման տարիներին, այդպես էլ ապագայում Արթուր Գևորգյանն ու նախկին ղեկավար կազմը կանգնած են լինելու հայկական բռնցքամարտի կողքին»,- ասվում է հայտարարության մեջ:

Հիշեցնենք՝ Արթուր Գևորգյանն ArmSport-ի հետ զրույցում ավելի վաղ հայտնել էր, որ ֆեդերացիայի 4 թեկնածուներից և ոչ մեկը չեն համապատասխանում գործող կանոնադրության պահանջներին, իսկ առանց 2020 թվականին ԱԻԲԱ-ի հետ համաձայնեցված փոփոխությունների պետական գրանցման անհնարին է ընտրություններ անցկացնել: Ընդ որում, անցկացվելու դեպքում, ըստ Գևորգյանի, դրանք անվավեր կլինեն:

Այդուհանդերձ, ընտրությունները կայացան ու ֆեդերացիայի նոր նախագահ ընտրվեց Հովհաննես Հովսեփյանը:

Հովհաննես Հովսեփյան. Սա բռնցքամարտի միասնականության ընտրությունն էր

Erik — Thu, 29 Apr 2021 11:00:46 +0000

Ինչպես արդեն տեղեկացրել էինք, բռնցքամարտի Հայաստանի ֆեդերացիան նոր նախագահ ունի: Ընտրվելուց հետո լրագրողների հետ զրույցում իր խոսքն ասաց նորընտիր նախագահ Հովհաննես Հովսեփյանը.

«Գոհ եմ ընտրությունների արդյունքից: Սա բռնցքմարտի միասնականության ընտրությունն էր: Կապ չունի, թե ով է ինձ ձայն տվել: Այսօր բոլորը բռնցքամարտին են ձայն տվել: Աշխատելու ենք համախմբված՝ բռնցքամարտի զարգացման համար:

Մենք Օլիմպիական խաղերի նախապատրաստման փուլը չենք դադարեցրել, շարունակում ենք պատրաստվել Տոկիո 2020-ին, ու ես կրկին ասում եմ, որ ակնկալում եմ 4-5 օլիմպիական ուղեգիր»,-ասաց նորընտիր նախագահը:

Հովհաննես Հովսեփյան. Չեմ հիասթափեցնի

Erik — Thu, 29 Apr 2021 09:37:05 +0000

ՀԲՖ նորընտիր նախագահ Հովհաննես Հովսեփյանը առաջին մեկնաբանությունը տվեց նոր պաշտոնում.

«Շնորհակալ եմ Ձեր վստահության համար: Թույլ չեմ տա, որ մի վայրկյան կասկածեք Ձեր ընտրության մեջ: Ամեն ինչ կանեմ, որ հին ու բարի ավանդույթները վերականգնվեն, որոնք եղել են Իսրայել Հակոբկոխյանի ու մյուսների օրոք»,-ասաց Հովսեփյանը:

Հովհաննես Հովսեփյանը՝ ՀԲՖ նոր նախագահ

Erik — Thu, 29 Apr 2021 09:20:57 +0000

Ավարտվեց Հայաստանի բռնցքամարտի ֆեդերացիայի նախագահի ընտրությունները, որն անցկացվեց ֆեդերացիայի 15-րդ հաշվետու ընտրական համաժողովի շրջանակներում։

Քվեարկեց ընտրության հնարավորություն ունեցող 95 պատվիրակներից 92-ը:

Հովհաննես Հովսեփյան-Իսրայել Հակոբկոխյան պայքարում բացարձակ առավելությամբ ֆեդերացիայի նոր նախագահ ընտրվեց Հովհաննես Հովսեփյանը:

Ընտրության ձայները.

15 ձայն՝ անվավեր

10 ձայն՝ Իսրայել Հակոբկոխյան

67 ձայն՝ Հովհաննես Հովսեփյան

Մինչ նախագահի ընտրության անցնելը համաժողովը գործող կանոնադրության փոփոխություն կատարեց, ըստ որի ՀԲՖ նախագահի պաշտոնին կարող է առաջադրվել ՀՀ ցանկացած քաղաքացի՝ առանց պարտադիր վերջին 3 տարում գործադիր կոմիտեի անդամ լինելու: Բացի այդ քվեարկությամբ որոշվեց լուծել ևս 24 պատվիրակի՝ ֆեդերացիայի անդամակցություն տալու հարցը, որից հետո նախկին 73-ի փոխարեն քվերակության իրավունք ստացավ 95 պատվիրակ։

ՀԲՖ նախագահի պաշտոնին նախօրոք իրենց թեկնածությունն առաջադրած 4 անձերից մնացին 2-ը՝ Հովհաննես Հովսեփյանն ու Իսրայել Հակոբկոխյանը։ ՀԲՖ գլխավոր քարտուղար Էդգար Կարապետյանը հրաժարվեց թեկնածությունից և հայտարարեց, որ չի մասնակցի ընտրությանը, քանի որ առանց նոր հաստատված կանոնադրության գրանցման ընթացիկ քվեարկությունն անօրինական է համարում։ Իսկ ինքնաառաջադրված Իլյա Վարովը չէր ներկայացել։ ԿԳՄՍ փոխնախարար Կարեն Գիլոյանը տեղեկացրեց, որ Իլյա Վարովը չի ներկայացրել 5 տարվա զարգացման ծրագիր։

Ի դեպ համաժողովին չմասնակցեց նաև ֆեդերացիայի փոխնախագահ Ռուստամ Բաղդասարյանը, որը բացման խոսքից հետո լքեց համաժողովը։

Նախագահի թեկնածուներ Իսրայել Հակոբկոխյանն ու Հովհաննես Հովսեփյանը ներկայացրեցին իրենց ծրագրերը, որից հետո մեկնարկեց փակ քվեարկությունը։ Եվ ինչպես արդեն նշեցինք, Հովհաննես Հովսեփյանը ստացած 67 կողմ ձայների արդյունքում ընտրվեց ՀԲՖ նախագահ։

Ի դեպ համաժողովին ներկա էր նաև ԱԻԲԱ-ի երկու ներկայացուցիչ:

Հակոբկոխյանն ու Հովսեփյանը ներկայացրեցին զարգացման իրենց ծրագրերը

Erik — Thu, 29 Apr 2021 08:16:06 +0000

Այս րոպեներին բռնցքամարտի համաժողովի ընթացքում կատարվում է բռնցքամարտի ֆեդերացիայի նոր նախագահի ընտրություն:

Նախագահի թեկնածուներ Իսրայել Հակոբկոխյանն ու Հովհաննես Հովսեփյանը նախնական խոսքի իրավունք ստացան ու կարճ ներկայացրեցին իրենց ծրագրերը:

Հովսեփյանը շեշտեց, որ ընտրվելու դեպքում կարճ ժամկետում կանցկացնի սեմինարներ՝ փորձի փոխանակման նպատակով:

Հակոբկոխյանը շեշտեց, որ գլխավոր նպատակը պատանի ու երիտասարդների համար տարեկան առնվազն 15 միջազգային մենանարտի հնարավորություն ստեղծելն է:

Լինելու եմ Ստրանջային մեկնած բոլոր բռնցքամարտիկների կողքին՝ անկախ, թե որ ֆեդերացիայից են. Հովհաննես Հովսեփյան

Նարե Հովհաննիսյան — Wed, 17 Feb 2021 11:16:24 +0000

«Ստրանջայի միջազգային մրցաշարին մեր մասնակցությունը չի կասեցվել. ՀԲՖ-ն նամակով դիմել է Բուլղարիայի բռնցքամարտի ֆեդերացիային՝ խնդրելով չեղարկել ազգությամբ հայ այն բռնցքամարտիկների մասնակցությունը, ովքեր չեն հանդիսանում ՀԲՖ-ի անդամ, բայց այդ խնդրանքն իհարկե չի բավարարվել»,-Armsport-ի հետ զրույցում ասում է բռնցքամարտի հայկական ազգային ֆեդերացիայի նախագահ Հովհաննես Հովսեփյանը:

Փետրվարի 21-28-ը Բուլղարիայի մայրաքաղաք Սոֆիայում կայանալիք Ստրանջայի 72-րդ բռնցքամարտի հեղինակավոր մրցաշարին, ինչպես ավելի վաղ հայտնել էինք, բռնցքամարտի հայկական ազգային ֆեդերացիայի կողմից կմասնակցի 7 մարզիկ:

Հովսեփյանի խոսքով, առաջիկա մրցաշարից սպասելիքները շատ մեծ են.

«Շատ մեծ սպասելիքներ ունենք: Ուզում եմ հաջողություն մաղթել մեր բոլոր տղաներին, ովքեր մեկնելու են Ստրանջային: Տարբերություն չկա, թե որ ֆեդերացիայի կողմից են մեկնում: Մենք բոլորին հաջողություն ենք մաղթում, ու անձամբ ես բոլորի կողքին եմ լինելու, աջակցելու ու ոգևորելու եմ, և բոլորի հաղթանակների համար ուրախանալու եմ:

Առհասարակ, մեր տղաներից շատերն այս տարի օլիմպիական վարկանիշի հույսեր ունեն, լավ մարզավիճակում են, լավ պատրաստվել են ու մտադիր են օլիմպիական վարկանիշ նվաճել: Աստծուց առաջ չընկնենք, բայց պետք է, որ ամեն ինչ շատ լավ լինի»:

Հիշեցնենք՝ բռնցքամարտի հայկական ազգային ֆեդերացիայի կողմից Ստրանջայի 72-րդ բռնցքամարտի հեղինակավոր մրցաշարի 57 կգ քաշային կարգում ներկայացված կլինի երկու բռնցքամարտիկ Ժորժիկ Մարությանն ու Արթուր Բազեյանը: 63 կգ քաշային կարգում հանդես կգա Բենիկ Նիկողոսյանը, 69-ում՝ Արմեն Մաշակարյանն ու Գուրգեն Մադոյանը: 81 կիլոգրամ քաշային կարգում Հայաստանը կներկայացնի Եվրոպական խաղերի բրոնզե մեդալակիր Գոռ Ներսիսյանը, իսկ 91 կգ քաշային կարգում մինչև 22 տարեկանների Եվրոպայի բրոնզե մեդալակիր Նարեկ Մանասյանը:

Ավելի վաղ հայտնել էինք, որ Հովսեփյանը կմասնակցի առաջիկայում կայանալիք Հայաստանի բռնցքամարտի ֆեդերացիայի նախագահի ընտրություններին: Խոսելով իր ծրագրերից՝ որոշակի մանրամասներ է հայտնում.

«Բռնցքամարտի զարգացման հետ կապված մեր՝ ի սկզբանե ունեցած ծրագրերը չեն փոխվել: Ինչ՝ արել ենք մինչև այսօր, շարունակելու ենք անել: Աստծո հաջողությամբ, եթե ես ընտրվեցի ՀԲՖ նախագահ, ամեն ինչ անելու եմ, որ ուշադրությունն ուղղվի մարզերում բռնցքամարտի զարգացմանը, գույքով ապահովելուն և մասսայականացմանը: Հիմա էլ ենք պատրաստ անել, բայց քանի որ բռնցքամարտի հայկական ազգային ֆեդերացիան ճանաչված չէ նախարարության կողմից, նախարարության կողմից ֆինանսավորումը ստանում է Հայաստանի բռնցքամարտի ֆեդերացիան, բայց օլիմպիական վարկանիշային մրցաշարերին, Եվրոպական խաղերին մասնակցելու հետ կապված ֆինանսական ամբողջ ծախսերը մենք ենք հոգացել՝ ֆեդերացիայի ու մեր անձնական միջոցներով: Մեր գումարները ծախսել ենք այնտեղ, որտեղ պետք է ծախսվեին պետական միջոցները: Հետևաբար, եթե մենք հետագայում ստանանք պետական աջակցություն՝ մրցաշարերի մասնակցելու համար, ֆեդերացիայի միջոցներն էլ արդեն կուղղենք բռնցքամարտի զարգացմանն ու մասսայականացմանը, մարզերում մրցաշարերի կազմակերմանը ու մի շարք այլ խնդիրների լուծմանը»,- ասում է Հովսեփյանը:

Հովսեփյանի խոսքով, արդեն իսկ հանդիպում է եղել նախարարության և երկու ֆեդերացիաների ներկայացուցիչների մասնակցությամբ.

«Կլոր սեղանի շուրջ հավաքվել են երկու ֆեդերացիաների, Օլիմպիական կոմիտեի և նախարարության ներկայացուցիչները: Ունեցել ենք շատ կառուցողական քննարկում: Պետք է նշեմ, որ այս 2 տարվա ընթացքում նման հանդիպում չէր կազմակերպվել: Առաջին անգամ տեսանք, որ նախարարությունը, անձամբ Կարեն Գիլոյանը, ևս մտահոգված է ստեղծված իրավիճակով և նախկինի պես չի ասում ՝ մենք չենք կարող միջամտել: Այո, նախարարությունը ՀԿ-ների գործունեությանը չի կարող միջամտել, բայց չէ որ նախարարությունն է ֆինանսավորում ու որոշ դեպքերում պետք է նաև հետևողական լինի: Հիմա տեսնում ենք, որ պարոն Կարեն Գիլոյանը շատ ճիշտ ճանապարհ է ընտրել: Ի սկզբանե ասաց, որ կողմ է արդար ընտրություններին: Ես 2 տարի է՝ ասում եմ, որ պետք է արդար ընտրություններ լինեն, բայց ամեն կերպ ուզում էին խաբեբայությամբ ընտրություններ անցկացնել: Մեզ խաբելով չի ստացվելու ընտրություններ անցկացնել»:

Հովհաննես Հովսեփյանը նշեց, որ ընտրությունների անցկացման օրը դեռևս հայտնի չէ, բայց հավանաբար այն կանցկացվի ամենասեղմ ժամկետներում:

Հովսեփյանն ասում է՝ տարբերություն չի դնում երկու ֆեդերացիաների միջև.

«Այսօր ինչ կա՝ մեկ ֆեդերացիա է, մեկ հայրենիք, ամեն ինչ անում ենք մեր երկրի ու դրոշի համար: Ես այդպիսի հասկացողություն չգիտեմ ՝ մյուս ֆեդերացիա…դա կարող են փաստել նաև մարզիկները, որոնց հետ ես մեկնել եմ Եվրոպական խաղերին որպես թիմի ղեկավար: Շատերի մոտ կարծիք կա, թե մեկը մյուսի ընկերն է եղել, բարեկամ է եղել, ու երբ ընտրությունները լինեն, ֆեդերացիան միավորվի, վերջ, մեկը մյուսից պետք է վրեժխնդիր լինի, ո՛չ, նման բան չկա: Իմ ղեկավարած ֆեդերացիայում ոչ մի բաժանում ու տարբերություն չի դրվի երբեք: Եթե մարզիչն ու մարզիկը քրտինք են թափում, աշխատում են, դա պետք է գնահատվի»:

Խոսելով 2021 թվականից ունեցած սպասելիքների մասին՝ Հովսեփյանն ընդգծում է, որ շատ արդյունավետ տարվա ակնկալիքներ ունի.

«Եթե ամեն ինչ լավ լինի, կարծում եմ՝ այս տարի կկարողանանք մեր երկրին ուրախացնել նաև օլիմպիական մեդալով, ինչը վերջին անգամ 2008 թվականին ենք նվաճել»:

Ո՞վ է ֆինանսավորում բռնցքամարտիկների մասնակցությունը Լոնդոնի վարկանիշային մրցաշարին. իրարամերժ հայտարարություններ երկու ֆեդերացիաներից

Նարե Հովհաննիսյան — Tue, 03 Mar 2020 07:18:36 +0000

Հայ բռնցքամարտիկները շարունակում են նախապատրաստությունն Անգլիայում կայանալիք օլիմպիական վարկանիշային մրցաշարին: Մարզիկները պատրաստվում են, իսկ բռնցքամարտի երկու ֆեդերացիաներն իրարամերժ հայտարարություններով են հանդես եկել` կապված վարկանիշային մրցաշարի մասնակցության ֆինանսավորման հետ:

Հայաստանի բռնցքամարտի Ֆեդերացիայի մամուլի քարտուղարությունը հայտարարել է, որ մրցաշարին մասնակցելու ամբողջ ծախսերը հոգում է ՀԲՖ նախագահ Արթուր Գևորգյանը.

«Այն քաշային կարգերում, որոնցում չհաջողվի առաջիկա մրցաշարում նվաճել Տոկիո-2020-ի ուղեգիր, հաջորդ վարկանիշային մրցաշարում, ամենայն հավանականությամբ, հանդես կգան այլ բռնցքամարտիկներ»,- ասվում է ՀԲՖ-ի տարածած հաղորդագրության մեջ:

«Բռնցքամարտի հայկական ազգային ֆեդերացիա» ՀԿ-ն պատասխան հայտարարությամբ է հանդես եկել` ընդգծելով ,որ «Արթուր Գևորգյանի գլխավորած բռնցքամարտի Հայաստանի ֆեդերացիան կրկին խեղաթյուրում է իրողությունը»:

Բռնցքամարտի հայկական ազգային ֆեդերացիայի մամուլի քարտուղարության հաղորդմամբ, օլիմպիական վարկանիշային մրցաշարին մասնակցելու ծախսերը բացառապես հոգում է Հայաստանի Հանրապետությունը՝ ի դեմս ԿԳՄՍ նախարարության.

«Այդ գումարները հատկացվում է բացառապես պետական բյուջեից, իսկ ահա վարկանիշային մրցաշարերի նախապատրաստական ընթացքին՝ մասնավորապես Ծաղկաձորի երկշաբաթյա հավաքի, Աբովյանի մարզաբազայում կայացաած մեկ շաբաթյա հավաքի, նաև Ուկրաինայի Իվանո ֆրանկովսկ քաղաքում կայացած 17-օրյա միջազգային հավաքի ու այս պահին ընթացող վերջին հավաքի ամբողջ ծախսերը հոգում է բռնցքամարտի Հայկական Ազգային ֆեդերացիայի նախագահ Հովհաննես Հովսեփյանը, որը ոչ միյայն հավաքների ընթացքում էր մեր բռնցքամարտիկների կողքին, այլև բռնցքամարտիկների հետ մեկնելու է Լոնդոն նրանց սատարելու համար»,- ասվում է բռնցքամարտի հայկական ազգային ֆեդերացիայի տարածած հաղորդագրության մեջ:

Հիշեցնենք` հավաքականի մարզիչ Ռաֆայել Մեհրաբյանի գլխավորությամբ օլիմպիական ուղեգրի համար կպայքարեն Եվրոպայի չեմպիոն, 63 կգ քաշային Հովհաննես Բաչկովը, 52 կգ քաշային Կորյուն Սողոմոնյանը, 57 կգ քաշային Արթուր Բազեյանը, 69 կգ քաշային Գուրգեն Մադոյանը, 75 կգ քաշային Արման Դարչինյանը, 81 կգ քաշային Գոռ Ներսիսյանը, 91 կգ քաշային Նարեկ Մանասյանն ու գերծանր քաշային Գուրգեն Հովհաննիսյանը: