Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանն օրերս Երևանում մասնակցել է Հայաստանի ընտրանու նախկին ֆուտբոլիստ Արտյոմ Սիմոնյանի և նրա ընտրյալի՝ Լիլիթի հարսանեկան արարողությանը:

​Երևանյան խնջույքը համախմբել է հայկական ֆուտբոլային աշխարհի բազմաթիվ հայտնի դեմքերի, որոնց թվում էր նաև Մխիթարյանը: Միջոցառումից ուշագրավ տեսանյութ է հրապարակել Երևանի «Փյունիկի» ռուս պաշտպան Միխայիլ Կովալենկոն՝ իր տիկտոկյան էջում: Կադրերում երևում է, թե ինչպես են ֆուտբոլիստները ջերմ զրույցի բռնվում ռեստորանում. Մխիթարյանը հետաքրքրվում է, թե ինչպես է Կովալենկոն իրեն զգում Հայաստանում և հաջողություն է մաղթում նրան:

​Նշենք, որ Արտյոմ Սիմոնյանն իր կարիերայի ընթացքում պաշտպանել է հայկական և ռուսական մի շարք ակումբների գույները, իսկ ներկայումս հանդես է գալիս Ռուսաստանի Առաջին լիգան ներկայացնող Վոլգոգրադի «Ռոտորի» կազմում:

@mixakovalenko15 Армянская свадьба 🇦🇲🤩😍 часть 1. Как долго я ждал чтобы мой братишка Артем Симонян женился , и наконец это случилось 😍 И еще рад познакомиться с Генрихом Мхитаряном 🔥 #армянскаясвадьба #armenianwedding #yerevan #mkhitaryan #armenia ♬ оригинальный звук — Mikhail Kovalenko

«Ինտերի» կիսապաշտպան Հենրիխ Մխիթարյանը շարունակում է վստահ ելույթները Իտալիայի նորընծա չեմպիոնի և գավաթակրի կազմում:

Միլանյան ակումբի պաշտոնական աղբյուրները հրապարակել են մայիս ամսվա լավագույն ֆուտբոլիստի կոչմանը հավակնող խաղացողների անվանացանկը, որում պատվավոր տեղ է զբաղեցրել նաև Հայաստանի ազգային հավաքականի նախկին ավագը:

Անցած ամսվա հանդիպումներում գրանցած արդյունքների հիման վրա՝ 37-ամյա հայ կիսապաշտպանի հետ մեկտեղ այս մրցանակի համար կպայքարեն նաև թիմի առաջատարներից արգենտինացի գոլահար Լաուտարո Մարտինեսը, ֆրանսիացի հարձակվող Մարկուս Թուրամն ու խորվաթ կիսապաշտպան Պետար Սուչիչը:

Հատկանշական է, որ Մխիթարյանի բարձրակարգ խաղը աննկատ չի մնացել ակումբի ղեկավարության կողմից: Ինչպես հայտնի էր դարձել ավելի վաղ, «ներաձուրիները» գոհ են հայ ֆուտբոլիստի ֆիզիկական մարզավիճակից և պատրաստվում են ևս մեկ մրցաշրջանով երկարաձգել նրա հետ գործող աշխատանքային պայմանագիրը:

Միլանի «Ինտերը» սոցիալական ցանցերի իր պաշտոնական էջերում հերթական հատուկ հրապարակումն է կատարել՝ անդրադառնալով թիմի կիսապաշտպան Հենրիխ Մխիթարյանին:

Իտալական ակումբի մամուլի ծառայությունը տեսանյութ է ներկայացրել, որտեղ պատկերված է հայ ֆուտբոլիստի նախավարժանքը: Հատկանշական է, որ կադրերն ուղեկցվում են հայկական երաժշտությամբ:

Հրապարակման մեջ ուշագրավ է նաև այն փաստը, որ միլանյան ակումբը տեսանյութին կից գրառումը կրկին կատարել է հայերենով:

Պաշտոնական էջում մասնավորապես նշված է. «Հետևում ենք Հենրիխ Մխիթարյանի տաքացմանը։ Հետևեք մեզ՝ Հայաստանից ավելի շատ բովանդակության համար»։

Հայաստանի ազգային հավաքականի նախկին դարպասապահ Ռոման Բերեզովսկին «РБ Спорт»-ի հետ զրույցում մեկնաբանել է շրջանառվող տեղեկությունն այն մասին, որ ազգային թիմի նախկին ավագ Հենրիխ Մխիթարյանը կերկարաձգի պայմանագիրը Միլանի «Ինտերի» հետ։

ԶԼՄ-ների տեղեկություններով՝ 37-ամյա հայ ֆուտբոլիստը նոր համաձայնագիր կկնքի իտալական ակումբի հետ մինչև 2027 թվականը՝ չնայած կարիերան ավարտելու մասին մտքերին։

«Իհարկե, ես շատ ուրախ եմ, որ Հենրիխը կերկարաձգի պայմանագիրն «Ինտերի» հետ։ Ոչ մի կասկած չկա, որ նա ևս առնվազն մեկ տարի կուրախացնի բոլորիս այս մեծագույն իտալական ակումբում իր խաղով: Ինձ թվում է՝ այս նորությունն էլ ավելի կմեծացնի հետաքրքրությունը ֆուտբոլի նկատմամբ Մխիթարյանի անհատական երկրպագուների շրջանում, որոնք շատ են ոչ միայն Հայաստանում, այլև ամբողջ աշխարհում»,- հայտարարել է Բերեզովսկին։

Նշենք, որ ավարտված մրցաշրջանում հայ ֆուտբոլիստը «սև-կապույտների» կազմում մասնակցել է 39 հանդիպման՝ դառնալով 4 գոլի և 3 գոլային փոխանցման հեղինակ։ Խաղացողի գործող պայմանագիրը «ներաձուրիների» հետ ավարտվում է այս տարվա հունիսի 30-ին։

Հիշեցնենք, որ 2025/26 մրցաշրջանի արդյունքներով միլանյան թիմը հռչակվել է Իտալիայի չեմպիոն։

Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանն Իտալիայի առաջնության ավարտից հետո ժամանել է Հայաստան։

37-ամյա ֆուտբոլիստին նկատել են Երևանում. համացանցում տեսանյութ է տարածվել, որտեղ երևում է փորձառու կիսապաշտպանը Հայաստանի մայրաքաղաքում։

Հիշեցնենք, որ հայ կիսապաշտպանի գործող պայմանագիրն իտալական ակումբի հետ նախատեսված է մինչև ընթացիկ տարվա հունիսի 30-ը, սակայն նա մոտ է այն երկարաձգելուն։ Ինչպես ավելի վաղ հայտնել էր հեղինակավոր ինսայդեր Ջանլուկա Դի Մարցիոն, Մխիթարյանն արդեն տվել է իր համաձայնությունը՝ ևս մեկ մրցաշրջանով միլանյան ակումբում մնալու համար։ Մխիթարյանին թիմում պահպանելու գլխավոր նախաձեռնողը «Ինտերի» գլխավոր մարզիչ Քրիստիան Կիվուն է եղել, և այժմ կողմերը պետք է նստեն բանակցությունների սեղանի շուրջ՝ քննարկելու համաձայնագրի ֆինանսական պայմաններն ու աշխատավարձի չափը։

Չնայած այն հանգամանքին, որ հունվարին լրացավ ֆուտբոլիստի 37-ամյակը, Մխիթարյանը շարունակում է առանցքային դեր խաղալ թիմի կազմում։ Ավարտված մրցաշրջանում նա բոլոր մրցաշարերում մասնակցել է 39 հանդիպման՝ դառնալով 4 գոլի և 3 գոլային փոխանցման հեղինակ։

Տեսանյութը՝ Factor TV-ի

Միլանի «Ինտերի» կիսապաշտպան Հենրիխ Մխիթարյանը մոտ է ակումբի հետ գործող պայմանագրի ժամկետը երկարաձգելուն։

Ինչպես հայտնում է հեղինակավոր ինսայդեր Ջանլուկա Դի Մարցիոն, 37-ամյա ֆուտբոլիստն արդեն տվել է իր համաձայնությունը՝ ևս մեկ մրցաշրջանով միլանյան ակումբում մնալու համար։ Նշվում է, որ հայ կիսապաշտպանը մեծ ոգևորությամբ է ընդունել «ներաձուրիների» շարքերում ելույթները շարունակելու հեռանկարը:

Մխիթարյանին թիմում պահպանելու գլխավոր նախաձեռնողը «Ինտերի» գլխավոր մարզիչ Քրիստիան Կիվուն է, ով ցանկանում է ֆուտբոլիստին անպայման տեսնել իր տրամադրության տակ։ Քանի որ Մխիթարյանն արդեն ասել է իր «այո»-ն, այժմ կողմերը պետք է նստեն բանակցությունների սեղանի շուրջ՝ քննարկելու համաձայնագրի ֆինանսական պայմաններն ու աշխատավարձի չափը։

Չնայած այն հանգամանքին, որ հունվարին լրացավ ֆուտբոլիստի 37-ամյակը, Մխիթարյանը շարունակում է առանցքային դեր խաղալ թիմի կազմում: Ավարտված մրցաշրջանում նա բոլոր մրցաշարերում (Ա Սերիա, Չեմպիոնների լիգա, Իտալիայի գավաթ և Սուպերգավաթ) մասնակցել է 39 հանդիպման՝ դառնալով 4 գոլի և 3 արդյունավետ փոխանցման հեղինակ։ Միայն Ա Սերիայում կիսապաշտպանն անցկացրել է 30 հանդիպում՝ իր ակտիվում գրանցելով 4 գոլ և 1 ասիստ:

Իտալիայի առաջնության վերջին` 38-րդ տուրի «Բոլոնիայի» դեմ խաղից (3-3) հետո «Ինտերի» գլխավոր մարզիչ Քրիստիան Կիվուն մեկնաբանել է թիմի հայ կիսապաշտպան Հենրիխ Մխիթարյանի ապագայի շուրջ ստեղծված իրավիճակը:

Ռումինացի մասնագետն առանձնահատուկ ընդգծել է փորձառու ֆուտբոլիստի նվիրվածությունն ու մասնագիտական բարձր պրոֆեսիոնալիզմը։

​Անդրադառնալով Մխիթարյանին ու ապագայի հնարավոր զարգացումներին՝ Կիվուն արել է հետևյալ հայտարարությունը.

​«Մխիթարյանի պես ֆուտբոլիստը շատ բան է նշանակում թիմի համար՝ իր պրոֆեսիոնալիզմի, կենտրոնացվածության և գործի հանդեպ վերաբերմունքի շնորհիվ։ Այն ֆուտբոլիստների համար, որոնց պայմանագրի ժամկետը մոտենում է ավարտին, ստեղծված իրավիճակը հեշտ չէ, հատկապես՝ նման տարիքում, բայց նրանք ներդրեցին իրենց ողջ ուժերը և լիովին նվիրվեցին թիմին։ Ակումբի ղեկավարության հետ համատեղ մենք դեռ չենք զրուցել նրա հետ, ուստի հաջորդ շաբաթ նման հնարավորություն կունենանք»,- Կիվուի խոսքերն է մեջբերում Football-Italia-ն։

Հիշեցնենք, որ Հենրիխ Մխիթարյանի գործող պայմանագիրն «Ինտերի» հետ նախատեսված է մինչև ընթացիկ տարվա հունիսի 30-ը: Փաստացի, պաշտոնական համաձայնագրի ավարտին մնացել է ընդամենը մեկ ամսից մի փոքր ավելի ժամանակ, սակայն կողմերը դեռևս նոր փաստաթուղթ չեն ստորագրել:

Այս պահի դրությամբ Հայաստանի ազգային հավաքականի նախկին ավագի ապագան շարունակում է մնալ անորոշ, և սպասվում է, որ հաջորդ շաբաթ նախատեսված հանդիպումը վերջնական հստակություն կմտցնի նրա կարգավիճակի հարցում։

Միլանի «Ինտերի» հայ կիսապաշտպան Հենրիխ Մխիթարյանը սոցիալական ցանցերի իր էջերում անդրադարձել է իր նախկին ակումբի՝ Դորտմունդի «Բորուսիայի» կատարած հրապարակմանը:

Ֆուտբոլիստն ինստագրամյան իր էջի «Սթորի» բաժնում վերահրապարակել է գերմանական ակումբի պաշտոնական էջի տեղադրած տեսանյութը, որտեղ ցուցադրվում է Գերմանիայի առաջնությունում իր մասնակցությամբ խաղային դրվագներից մեկը:

​Բուն տեսանյութը համատեղ հրապարակվել է «Բորուսիայի» և Բունդեսլիգայի ինստագրամյան էջերի կողմից։ Կարճ հոլովակում ներկայացված են հայ կիսապաշտպանի ուշագրավ գործողությունները խաղադաշտում։

​Տեսանյութին կից գերմանական ակումբի մամուլի ծառայությունը կատարել է «Մաքուր տեխնիկա» գրառումը՝ հատուկ նշելով ֆուտբոլիստի պաշտոնական էջը։

 

View this post on Instagram

 

Հիշեցնենք, որ Մխիթարյանը Դորտմունդի «Բորուսիայի» գույները պաշտպանել է 2013-ից 2016 թվականներին, որից հետո տեղափոխվել է անգլիական Պրեմիեր լիգա։ Ներկայումս փորձառու ֆուտբոլիստը հանդես է գալիս միլանյան ակումբի կազմում, որի հետ վերջերս նվաճել է Իտալիայի առաջնության 21-րդ չեմպիոնական տիտղոսը։

Ֆուտբոլային փորձագետ Ալեքսանդր Բուբնովը խոսել է այն մասին, թե եվրոպական որ առաջնությունները կարող են լավագույնս համապատասխանել «Կրասնոդարի» և Հայաստանի ազգային հավաքականի կիսապաշտպան Էդուարդ Սպերցյանին։

​«Նա ստեղծված է Իսպանիայի համար։ Անգլիայում նրա համար նույնիսկ ծանր կլինի։ Հնարավոր է՝ Գերմանիայում ավելի հեշտ լինի, բայց այնտեղ թիմերը բաց ֆուտբոլ են խաղում։

​Եթե ելնենք առաջնությունում պայքարի, ֆիզիկական մենամարտերի ու պրեսինգի մակարդակից, ինձ թվում է՝ Իտալիայի առաջնությունն ավելի մեղմ է:

Այստեղ համեմատելու բան կա։ Ունենք երկու ականավոր հայ ֆուտբոլիստ՝ Մխիթարյանն ու Սպերցյանը։ Մխիթարյանն այժմ խաղում է և վատ հանդես չի գալիս։ Նա մտածում է՝ երկարաձգե՞լ պայմանագիրը Իտալիայի չեմպիոն «Ինտերի» հետ, թե՞ ոչ։

​Իմ կարծիքով՝ Սպերցյանն ավելի ուժեղ է Մխիթարյանից։ Եթե մենք նրան «Ինտեր» ենք տեղափոխում, ստացվում է, որ նրան կարելի է տանել իտալական ցանկացած թոփ ակումբ»,- Բուբնովի խոսքերն է մեջբերում «Коммент.Шоу» յութուբյան ալիքը։

​Հիշեցնենք, որ ընթացիկ մրցաշրջանում Սպերցյանը «Կրասնոդարի» կազմում բոլոր մրցաշարերում անցկացրել է 41 հանդիպում՝ դառնալով 14 գոլի և 18 գոլային փոխանցման հեղինակ։

Հայ ֆուտբոլիստի պայմանագիրն ակումբի հետ նախատեսված է մինչև 2029 թվականը։ Transfermarkt պորտալի համաձայն՝ կիսապաշտպանի տրանսֆերային արժեքը գնահատվում է 25 միլիոն եվրո։

Միլանի «Ինտերը» սոցիալական ցանցերի իր պաշտոնական էջերում հատուկ հրապարակում է կատարել՝ անդրադառնալով թիմի կիսապաշտպան Հենրիխ Մխիթարյանին:

Իտալական ակումբի մամուլի ծառայությունը տեսանյութ է ներկայացրել, որտեղ պատկերված է հայ ֆուտբոլիստի մուտքը խաղադաշտ Ա Սերիայի ընթացիկ մրցաշրջանում նվաճած չեմպիոնական տիտղոսի տոնակատարության ժամանակ:

​Հրապարակման մեջ ուշագրավ է այն փաստը, որ միլանյան ակումբը տեսանյութին կից գրառումը կատարել է հայերենով:

Պաշտոնական էջում մասնավորապես նշված է. «Ուշադրությո՛ւն՝ մտնում է Իտալիայի չեմպիոնը: Հետևեք մեզ հայկական բովանդակության համար»:

​Հիշեցնենք, որ Իտալիայի առաջնության 37-րդ տուրում չեմպիոնությունն արդեն ապահոված «Ինտերը» ոչ-ոքի էր խաղացել «Վերոնայի» հետ, իսկ հանդիպման լավագույն ֆուտբոլիստ էր ճանաչվել Մխիթարյանը:

Խաղից հետո հայ կիսապաշտպանը նշել էր, որ դեռ խաղալու քաղց ունի, և հունիսին սպառվող պայմանագրի ֆոնին իր ապագան առաջիկա օրերին կքննարկի ակումբի ղեկավարության հետ: