Հայազգի մասնագետ Հայկ Միլկոնը նշանակվել է Երևանի «Ուրարտուի» գլխավոր մարզիչ։ Այս մասին հայտնի է դարձել նոյեմբերի 3-ին։

Մարզչի նշանակման պայմանների, պայմանագրի ժամկետի և մարզչական շտաբի կազմի վերաբերյալ մանրամասներ դեռևս չեն հաղորդվում։

33-ամյա մասնագետը ծնվել է 1993 թվականի օգոստոսի 24-ին՝ Լիբանանի մայրաքաղաք Բեյրութում։ Նա իր մարզչական կարիերան կառուցել է Բելգիայում՝ աշխատելով այդ երկրի մի շարք հայտնի ակումբների համակարգերում։

Միլկոնն աշխատել է «Լևենի», «Անտվերպենի», «Մեխելենի» և «Գենտի» երիտասարդական թիմերում։ 2021 թվականին նա միացել է «Բրյուգեին», որտեղ մարզել է տարբեր տարիքային թիմեր, այդ թվում՝ Club NXT-ը։ Հետագայում ընդգրկվել է նաև ակումբի հիմնական թիմի մարզչական շտաբում։

2025 թվականի սեպտեմբերին Միլկոնը գլխավորել է բելգիական «Դենդերը»։ Դա նրա առաջին նշանակումն էր Բելգիայի բարձրագույն դիվիզիոնի ակումբի գլխավոր մարզչի պաշտոնում։ Մասնագետը «Դենդերում» աշխատել է մինչև 2026 թվականի փետրվարը։

Հատկանշական է, որ Միլկոնը տիրապետում է ինը լեզվի, ինչպես նաև հետաքրքրվում է օպերային երգեցողությամբ։

Հիշեցնենք, որ «Ուրարտուն» հոկտեմբերի 28-ին հայտարարել էր Ռոբերտ Արզումանյանի հետ համագործակցության ավարտի մասին։ Դրանից հետո թիմի գլխավոր մարզչի պարտականությունները ժամանակավորապես կատարում էր Ֆրանսիսկո Կոմպանը։