Հայտնի են ֆուտզալի Հայաստանի հավաքականի մրցակիցներն Աշխարհի 2028թ-ի առաջնության որակավորման հիմնական փուլում։ Այս մասին տեղեկացնում է ՀՖՖ մամուլի ծառայությունը։

Մեր թիմն ընդգրկված է առաջին խմբում, որտեղ կհանդիպի Հունգարիայի ու Շվեդիայի հավաքականներին։

Որակավորման փուլում ընդգրկված է 36 թիմ, որոնք բաժանվել են 12 խմբի՝ յուրաքանչյուրում 3 թիմ։

Հանդիպումները կմեկնարկեն 2026թ-ի հոկտեմբերից և կշարունակվեն մինչև 2027թ-ի մարտ։ 

Ֆուտզալի Հայաստանի ազգային հավաքականը ՖԻՖԱ-ի թարմացված վարկանիշային աղյուսակում բարձրացել է 8 հորիզոնականով և այժմ 15-րդն է։ Այս մասին տեղեկացնում է ՀՖՖ-ի պաշտոնական կայքը։ 

Մեր ընտրանին այժմ ունի 1255.16 միավոր։

Լավագույն տասնյակն ունի հետևյալ տեսքը․

• 1․ Բրազիլիա — 1684.97 միավոր
• 2․ Պորտուգալիա — 1575.32 միավոր
• 3․ Իսպանիա — 1574.39 միավոր
• 4․ Արգենտինա — 1513.38 միավոր
• 5․ Իրան — 1507.71 միավոր
• 6․ Մարոկկո — 1486.53 միավոր
• 7․ Ռուսաստան — 1430.32 միավոր
• 8․ Ղազախստան — 1403.8 միավոր
• 9․ Ուկրաինա — 1400.89 միավոր
• 10․ Ֆրանսիա — 1397.25 միավոր

Վլադիմիր Սանոսյանը սոցիալական ցանցերում հուզիչ գրառմամբ անդրադարձել է ֆուտզալի Հայաստանի ազգային հավաքականի մրցելույթներին Եվրոպայի առաջնությունում։

Ֆուտբոլիստը շեշտել է, որ թեև մրցաշարն ավարտված է, սակայն գրանցված արդյունքը ոչ թե պարտություն է, այլ մեծագույն ձեռքբերում, քանի որ մեր ընտրանին ընդգրկվել է Եվրոպայի լավագույն ութնյակի կազմում։

«Սա պարտություն չէ, այլ ձեռքբերում։ Մենք Եվրոպայի լավագույն ութնյակում ենք։

Թեև մրցաշարը մեզ համար ավարտվեց, սակայն մեծ պատիվ էր ազգային հավաքականի հետ մասնակցել նման խոշոր մրցաշարի և արժանի նորամուտ նշել։ Մենք պատմություն կերտեցինք։

Հպարտ եմ իմ թիմով։ Շնորհակալություն բոլորին, ովքեր մեր կողքին էին և աջակցում էին մեզ»,- գրել է Սանոսյանը սոցիալական ցանցերում։

Հիշեցնենք, որ Ռուբեն Նազարեթյանի գլխավորած թիմի համար սա նորամուտային մասնակցություն էր Եվրոպայի առաջնությանը, որն իսկապես ստացվեց տպավորիչ։ B խմբում վաստակելով 7 միավոր՝  ֆուտզալիստները զբաղեցրել էին առաջին հորիզոնականը և դուրս եկել քառորդ եզրափակիչ։ Մեդալների համար պայքարը կանգ առավ միայն փլեյ-օֆֆ փուլում, որտեղ Հայաստանի հավաքականը 0:3 հաշվով զիջեց Խորվաթիայի ընտրանուն։

Ֆուտզալի Հայաստանի ազգային հավաքականն ավարտեց իր պատմական ելույթը Եվրոպայի 2026 թվականի առաջնության եզրափակիչ փուլում։ Մրցաշարին առաջին անգամ մասնակցող մեր ընտրանին քառորդ եզրափակիչում ուժերը չափեց Խորվաթիայի հավաքականի հետ և պարտություն կրեց 0:3 հաշվով։

Լիտվայի Կաունաս քաղաքի «Ժալգիրիս Արենա» մարզապալատում կայացած հանդիպման ճակատագիրը վճռվեց առաջին խաղակեսում։ Խորվաթ ֆուտզալիստներն ավելի վստահ մեկնարկեցին՝ երեք անպատասխան գնդակ ուղարկելով Հայաստանի դարպասը։ Ռուբեն Նազարեթյանի սաները նույնպես ստեղծեցին իրական գոլային պահեր, սակայն եզրափակիչ հարվածներում չբավականացրեց դիպուկությունը։

Ընդմիջումից հետո Հայաստանի հավաքականը տիրեց նախաձեռնությանը՝ ավելի շատ վերահսկելով գնդակը և ակտիվություն ցուցաբերելով առջևի գծում։ Հանդիպման վերջին 10 րոպեներին մեր թիմը անցավ «5-րդ դաշտային խաղացողի» մարտավարությանը՝ փոխարինելով դարպասապահին, սակայն հաշվի մեջ փոփոխություն մտցնել այդպես էլ չհաջողվեց։

Այսպիսով, Հայաստանի հավաքականը լքում է մրցաշարը՝ գրանցելով տպավորիչ արդյունքներ խմբային փուլում։ Հիշեցնենք, որ B խմբում մեր թիմը գրավել էր առաջին տեղը՝ 2:1 հաշվով հաղթելով 2024թ. աշխարհի առաջնության բրոնզե մեդալակիր Ուկրաինային, 5:4 հաշվով առավելության հասնելով Չեխիայի նկատմամբ և 3:3 հաշվով ավարտելով խաղը Լիտվայի հետ։

Կիսաեզրափակիչում Խորվաթիան կմրցի Իսպանիա – Իտալիա զույգի հաղթողի հետ։ Մյուս կիսաեզրափակիչի ուղեգիրն արդեն նվաճել է Ֆրանսիան, որը լրացուցիչ ժամանակում 4:2 հաշվով պայքարից դուրս է թողել Ուկրաինային։

Ֆուտզալի Հայաստանի ազգային հավաքականն այսօր՝ հունվարի 28-ին, կանցկացնի իր երրորդ և վերջին հանդիպումը Եվրոպայի առաջնության խմբային փուլի շրջանակում։

Կաունասում կայանալիք խաղում մեր ընտրանին ուժերը կչափի մրցաշարի տանտերերի՝ Լիտվայի հավաքականի հետ։ Հանդիպման մեկնարկը նախատեսված է Երևանի ժամանակով 22:30-ին։ Խաղը կցուցադրվի Առաջին ալիքի եթերում։

Հիշեցնենք, որ Հայաստանի հավաքականը B խմբում գրանցած տպավորիչ արդյունքների շնորհիվ արդեն իսկ ապահովել է իր տեղը Եվրոպայի առաջնության քառորդ եզրափակիչում՝ պատմության մեջ առաջին անգամ նվաճելով փլեյ-օֆֆի ուղեգիր։

Հայաստանի ֆուտզալի ազգային հավաքականի ավագ և Չեխիայի դեմ խաղում կարևորագույն գոլի հեղինակ դարձած Վլադիմիր Սանոսյանը մեկնաբանել է ԵՎՐՈ-2026-ի խմբային փուլում տոնած փառահեղ հաղթանակը։

​Հիշեցնենք, որ մեր ընտրանին կամային պայքարում 5:4 հաշվով առավելության հասավ Չեխիայի նկատմամբ՝ պատմության մեջ առաջին անգամ նվաճելով Եվրոպայի առաջնության 1/4 եզրափակիչի ուղեգիր։

​Հետխաղյա մեկնաբանությունում Սանոսյանն ընդգծել է թիմի միասնականության գործոնը․

​«Սա պատմական հաղթանակ է։ Խաղը շատ բարդ ստացվեց, բայց հիանալի է, որ մենք չընկճվեցինք։ Կարողացանք վերադառնալ խաղի մեջ և հաղթանակ կորզել։
​Թիմում հիանալի մթնոլորտ է տիրում, մենք երկար ենք քրտնաջան աշխատել այս արդյունքի համար։ Մենք մեկ ընտանիքի պես ենք, և հենց դա է պատճառը, որ կարողանում ենք հասնել նման նվաճումների։

​Որո՞նք են այս թիմի սահմանները․ մենք սահմաններ չունենք։ Շարունակելու ենք զարմացնել ֆուտզալի երկրպագուներին և մեր երկրին»։

​Հիշեցնենք, որ B խմբի վերջին տուրում Հայաստանի հավաքականը հունվարի 28-ին ուժերը կչափի Լիտվայի ընտրանու հետ։

Հայաստանի ֆուտզալի ազգային հավաքականը պատմական հաջողություն գրանցեց Լիտվայի Կաունաս քաղաքում ընթացող ԵՎՐՈ-2026-ի եզրափակիչ փուլում։ B խմբի երկրորդ տուրում մեր ընտրանին դիտարժան և կամային պայքարում 5:4 հաշվով առավելության հասավ Չեխիայի հավաքականի նկատմամբ՝ ապահովելով իր տեղը մրցաշարի քառորդ եզրափակիչում։

​Հանդիպման ավարտից հետո Հայաստանի հավաքականի գլխավոր մարզիչ Ռուբեն Նազարեթյանը ՈւԵՖԱ-ի պաշտոնական կայքի հետ զրույցում կիսվել է իր տպավորություններով․

​«Դա հիանալի զգացողություն է, լավագույնն՝ արդեն երկար ժամանակ։ Հուսով եմ՝ կշարունակենք ուրախություն պարգևել մեր ազգին։ Մենք շատ վստահ ենք. այդ վստահությունը բերել ենք դեռ որակավորման փուլից և կպատրաստվենք Լիտվայի դեմ խմբային փուլի վերջին խաղին»։

​Տանելով երկրորդ անընդմեջ հաղթանակը՝ Հայաստանի հավաքականը ժամկետից շուտ լուծեց խմբից դուրս գալու խնդիրը։
​Խմբային փուլի վերջին տուրում մեր ընտրանին ուժերը կչափի դաշտի տերերի՝ Լիտվայի հավաքականի հետ։ Հանդիպումը կկայանա հունվարի 28-ին՝ Երևանի ժամանակով 22:30-ին։

Ուկրաինայի ֆուտբոլի ասոցիացիան պաշտոնապես դիմել է ՈւԵՖԱ-ի Վերահսկիչ, էթիկայի և կարգապահական մարմնին՝ կապված ֆուտզալի Եվրո-2026-ի որակավորման փուլի Հայաստան — Ուկրաինա հանդիպումից հետո տեղի ունեցած միջադեպի հետ։

Ուկրաինական կողմի դժգոհության պատճառը Հայաստանի հավաքականի և ռուսական «Տյումենի» ֆուտզալիստ Դենիս Նևեդրովի էմոցիոնալ արձագանքն է եղել եզրափակիչ սուլիչից հետո, ինչպես նաև Instagram-ում նրա կատարած գրառումը (էմոջին):

Armsport.am-ի տեղեկություններով՝ իրավիճակը շատ ավելի խորքային է, և լարվածությունը մինչև մեկնարկը առաջացրել է հենց ուկրաինական կողմը: Թեև ֆուտզալում ընդունված կարգ է մարզիչների և խաղացողների նախախաղային ձեռքսեղմումը, ուկրաինական կողմը հրաժարվել է սեղմել այն ֆուտզալիստների ձեռքը, ովքեր հանդես են գալիս Ռուսաստանի առաջնությունում:

Ստեղծված իրավիճակից ելնելով՝ թիմերը նախապես համաձայնության են եկել, որ ձեռքսեղմման արարողություն տեղի չի ունենա։ Նման բան ֆուտզալում երբեք տեղի չէր ունեցել:

Ի դեպ, ամբողջ հանդիպման ընթացքում լարվածությունը հրահրվել է հենց ուկրաինական կողմից՝ տարատեսակ վանկարկումներով և ժեստերով: Հայաստանի հավաքականի հաղթանակից հետո Դենիս Նևեդրովի ժեստը եղել է պատասխան, որը վիրավորանք չի պարունակել:

Հայաստանի ֆուտբոլի ֆեդերացիան արդեն իսկ պատասխան նամակ է ուղարկել ՈւԵՖԱ՝ ներկայացնելով իրավիճակի իրական պատկերը։ Սպասվում է, որ մոտ ժամանակներս ՀՖՖ-ն հանդես կգա նաև պաշտոնական հայտարարությամբ։

Հայաստանի ֆուտբոլի ֆեդերացիայի նախագահ Արմեն Մելիքբեկյանը և ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր այցելել են ՀՖՖ Տեխնիկական կենտրոն/ֆուտբոլի ակադեմիա։ Այս մասին տեղեկացնում է ՀՖՖ մամուլի ծառայությունը։

Այցի շրջանակում նրանք հանդիպում են ունեցել ֆուտզալի Հայաստանի ազգային հավաքականի անդամների հետ։

Հանդիպումը կայացել է Եվրոպայի 2026 թվականի առաջնությանը ընդառաջ, որին նախապատրաստվում է ընտրանին։

Հայաստանի ֆուտզալի ազգային թիմը 100 տոկոսանոց ցուցանիշով նվաճեց Երևանում անցկացված «Unibank Cup» միջազգային մրցաշարի հաղթողի տիտղոսը։

​Մրցաշարային վերջին օրը Ռուբեն Նազարեթյանի թիմն ուժերը չափեց Վրաստանի հավաքականի հետ։

Երկրորդ խաղակեսում բեկելով խաղի ընթացքը՝ հայ ֆուտզալիստները կամային հաղթանակ կորզեցին (3:1)։ Գոլերի հեղինակ դարձան Արսեն Պետրոսովն ու Նիկիտա Խրոմիխը, գրանցվեց նաև մեկ ինքնագոլ մրցակցի կողմից։

​Մինչ այդ մեր ընտրանին պարտության էր մատնել Մոլդովայի (2:1) և Ղրղզստանի (5:1) թիմերին՝ ընդհանուր առմամբ վաստակելով 9 միավոր։

​Պարգևատրման հանդիսավոր արարողությունը տեղի ունեցավ ՀՖՖ Տեխնիկական կենտրոնում, որտեղ պատվավոր հյուր Եղիշե Մելիքյանը հանձնեց հաղթական գավաթը Հայաստանի հավաքականին։