Հայաստանի Fastex Պրեմիեր լիգայի վերջին՝ 27-րդ տուրում կայացած երկու հանդիպումներով վերջնական տեսք ստացավ մրցաշարային աղյուսակի որոշակի հատվածը։

«Ալաշկերտը» սեփական հարկի տակ ընդունեց Գյումրիի «Շիրակին» և հարցերը լուծեց դեռևս առաջին խաղակեսում՝ հաղթելով 2։0 հաշվով։

Խաղի հաշիվը բացվեց արդեն 5-րդ րոպեին, երբ հյուրերի պաշտպան Ալեքսա Վիդիչը գնդակն անզգուշաբար ուղարկեց սեփական դարպասը, իսկ քսան րոպե անց Յարոսլավ Մատյուխինը Կարեն Նալբանդյանի փոխանցումից հետո կրկնապատկեց տանտերերի առավելությունը։

Այս վստահ հաղթանակի շնորհիվ Վահե Գևորգյանի գլխավորած թիմը վաստակեց 53 միավոր, զբաղեցրեց երկրորդ հորիզոնականը և նվաճեց ՈւԵՖԱ-ի Կոնֆերենցիաների լիգայի որակավորման առաջին փուլի ուղեգիր։

Զուգահեռաբար ընթացող մյուս խաղում ուժերը չափեցին «Արարատն» ու ԲԿՄԱ-ն, որտեղ գրանցվեց մարտական ոչ-ոքի՝ 1։1 հաշվով։

Երկրորդ խաղակեսի սկզբում՝ 47-րդ րոպեին, Դավիթ Հարությունյանն առաջ մղեց բանակայիններին, սակայն 64-րդ րոպեին Կալիֆալա Մամադու Դումբիան անվրեպ իրացրեց 11-մետրանոց հարվածը և փրկեց իր թիմին պարտությունից։

Այս վաստակած մեկ միավորը փրկարար նշանակություն ունեցավ երևանյան ակումբի համար. «Արարատը» 13 միավորով հավասարվեց «Շիրակին» և լրացուցիչ ցուցանիշների շնորհիվ բարձրացավ 9-րդ հորիզոնական՝ խուսափելով վերջին տեղից։ Գյումրիի թիմն իր հերթին մրցաշրջանն ավարտեց աղյուսակի հատակում՝ 10-րդ տեղում, իսկ ԲԿՄԱ-ն 23 միավորով հանգրվանեց 7-րդ հորիզոնականում։

Հիշեցնենք, որ Հայաստանի չեմպիոնի տիտղոսն արդեն իսկ ապահովել է «Արարատ-Արմենիան»։ Առաջնության վերջին տուրի մնացած երեք հանդիպումները կկայանան մայիսի 27-ին՝ միաժամանակյա մեկնարկով. ժամը 19:00-ին խաղադաշտ դուրս կգան «Արարատ-Արմենիան» ու «Գանձասարը», «Փյունիկն» ու «Վանը», ինչպես նաև «Ուրարտուն» ու «Նոան»։

Տեսանյութերը՝ ստորև․

Մրցաշարային աղյուսակը

Հայաստանի Պրեմիեր լիգայի ավարտից մեկ տուր առաջ Երևանի «Փյունիկը» կարևոր արտագնա հաղթանակ տոնեց։ Առաջնության նախավերջին խաղադաշտում «Գանձասարը» սեփական հարկի տակ ընդունեց մայրաքաղաքային թիմին և զիջեց 0:2 հաշվով:

Հանդիպման հաշիվը բավականին արագ բացվեց. արդեն 16-րդ րոպեին հյուրերին առաջ մղեց իսպանացի հարձակվող Խավիեր Մորենո Սանչեսը՝ եզրափակելով թիմի գրոհը:

Երկրորդ կեսում մայրաքաղաքային ակումբն ամրապնդեց իր հաջողությունը: 65-րդ րոպեին գվինեացի գոլահար Մոմո Յանսանեն խփեց «Փյունիկի» երկրորդ գնդակը՝ փաստացի վերջակետ դնելով այս դիմակայությունում և հյուրերին ապահովելով երեք միավորով:

Այս վստահ հաղթանակից հետո «Փյունիկը» 25 հանդիպումից վաստակած 51 միավորով շարունակում է զբաղեցնել մրցաշարային աղյուսակի երկրորդ հորիզոնականը։ Ինչ վերաբերում է «Գանձասարին», ապա թիմն իր ակտիվում ունի 21 միավոր և հանգրվանել է 8-րդ տեղում:

Տեսանյութը՝ ստորև․

Մրցաշարային աղյուսակն այս պահին

Հայաստանի Պրեմիեր լիգայի ավարտից ընդամենը մեկ տուր առաջ գործող չեմպիոն «Նոան» կարևորագույն և տպավորիչ հաղթանակ տոնեց։ Հյուրընկալվելիս ուժերը չափելով մրցաշարային աղյուսակը գլխավորող «Արարատ-Արմենիայի» հետ՝ հյուրերը մրցակցին ոչ մի շանս չտվեցին և վստահ առավելության հասան 4:0 հաշվով:

Խաղի հաշիվն արդեն 13-րդ րոպեին բացեց բոսնիացի հարձակվող Նարդին Մուլահուսեյնովիչը, իսկ ընդամենը յոթ րոպե անց պորտուգալացի Հելդեր Ֆերեյրան կրկնապատկեց «Նոայի» առավելությունը։ Հանդիպման վերջնամասում իր խոսքն ասաց բրազիլացի գոլահար Մատեուս Այասը։ Նա նախ 85-րդ րոպեին հաշիվը դարձրեց խոշոր, ապա մրցավարի կողմից հիմնական ժամանակին ավելացված 4-րդ րոպեին ձևակերպեց հանդիպման վերջնահաշիվը՝ դառնալով դուբլի հեղինակ։

Այս դիմակայությունից հետո «Արարատ-Արմենիան» իր ակտիվում ունի 54 միավոր (25 խաղ) և շարունակում է պահպանել առաջին հորիզոնականը։ «Նոան», որը մեկ հանդիպում պակաս է անցկացրել (24 խաղ), վաստակել է 49 միավոր և հաստատվել է երկրորդ տեղում՝ առավելագույնս թեժացնելով պայքարը ոսկե մեդալների համար։

Առաջնության եզրափակիչ տուրի շրջանակում կայանալիք խաղերում «Արարատ-Արմենիան» ուժերը կչափի ԲԿՄԱ-ի հետ (արտագնա հանդիպում), իսկ «Նոան» սեփական հարկի տակ կընդունի «Արարատին»։

Բացի այդ, գործող չեմպիոնը մայիսի 23-ին կանցկացնի նաև 13-րդ տուրից հետաձգված հանդիպումը՝ հյուրընկալվելով Երևանի «Փյունիկին»։

Տեսանյութը՝ ստորև․

Մրցաշարային աղյուսակն այս պահին

Fastex Պրեմիեր լիգայի 25-րդ տուրում «Ալաշկերտը» սեփական հարկի տակ 3։1 հաշվով պարտության մատնեց «Գանձասարին» և բարձրացավ երկրորդ հորիզոնական:

Հանդիպման հաշիվը 13-րդ րոպեին 11-մետրանոցից բացեց Կարեն Նալբանդյանը այն բանից հետո, երբ հյուրերի տուգանային հրապարակում արձանագրվեց ձեռքով խաղ: Առաջին կեսի վերջնամասում Նալբանդյանը կրկնապատկեց տանտերերի առավելությունը՝ կրկին աչքի ընկնելով նշանակետից և խփելով ընթացիկ առաջնությունում իր 13-րդ գոլը։

Երկրորդ խաղակեսի մեկնարկում Նարեկ Ալավերդյանը հեղինակեց «Գանձասարի» միակ գնդակը՝ կրճատելով հաշվի տարբերությունը: Խաղի վերջնահաշիվը հիմնական ժամանակին ավելացված առաջին րոպեին ձևակերպեց Կայո Էնրիկեն՝ վերականգնելով երկու գնդակի առավելությունը։

Այս հաղթանակի շնորհիվ Վահե Գևորգյանի գլխավորած «Ալաշկերտը» իր ակտիվում գրանցեց 47 միավոր և մրցաշարային աղյուսակում զբաղեցրեց 2-րդ տեղը։ «Գանձասարը» 21 միավորով եզրափակում է լավագույն ութնյակը։

Տեսանյութը՝ ստորև․

Մրցաշարային աղյուսակն այս պահին

«Արարատ-Արմենիան» հանդես է եկել պաշտոնական հայտարարությամբ՝ տեղեկացնելով, որ Հայաստանի ֆուտբոլի ֆեդերացիան արգելել է Fastex Հայաստանի Պրեմիեր Լիգայի 25-րդ տուրի՝ «Նոայի» դեմ վաղը կայանալիք խաղից առաջ նախատեսված շոու-ծրագրի անցկացումը։

Ակումբի մամուլի ծառայությունը նշում է, որ հանդիպմանն ընդառաջ նախատեսված է եղել երկրպագուական երգի կենդանի կատարում, հրավառություն և այլն։ «Արարատ-Արմենիան» արտասահմանյան հայտնի խմբի հետ բանակցությունների արդյունքում ձեռք էր բերել երգի տեղայնացման և կատարման իրավունքը։ Ծրագիրը համաձայնեցվել էր նաև մրցակցի՝ «Նոայի» հետ, որն արագ արձագանքել և տվել էր իր համաձայնությունը։

«ՀՖՖ-ին ներկայացվել էր ամբողջ երաժշտական ծրագիրը և նախագծի բոլոր դետալները։ Սակայն տևական քննարկումից հետո ակումբը ստացավ ՀՖՖ Մրցումների բաժնի մերժումը։ Որպես պատճառաբանություն նշվել է, որ նման լայնածավալ միջոցառման անցկացումը նպատակահարմար չէ՝ հաշվի առնելով լարված հանդիպումների մեծ քանակը»,- ասված է հայտարարության մեջ։

Ակումբում, սակայն, համաձայն չեն այս հիմնավորման հետ՝ հիշեցնելով, որ օրեր առաջ նույն թիմերի միջև կայացած գավաթային կիսաեզրափակիչում կողմերը միմյանց նկատմամբ առավելագույն հարգանք են ցուցաբերել, և խաղում որևէ անախորժ դրվագ չի գրանցվել:

«Ստացվում է, որ իրական պատճառը ոչ թե լարված հանդիպումներն են, այլ փոխվստահության բացակայությունը և այլ չփարատված կասկածներ։ «Արարատ-Արմենիա» ակումբն առհասարակ և հատկապես այս մրցաշրջանի ընթացքում եղել է կառուցողական աշխատանքի կողմնակից: Միջոցառումն արդեն հանրային էր դարձել, և չեղարկումը ենթադրում է նաև բացատրություն»,- ընդգծում են «Արարատ-Արմենիայում»՝ երկրպագուներին հրավիրելով մարզադաշտ և վստահեցնելով, որ հայկական ակումբային ֆուտբոլը կենդանի է անգամ առանց նախախաղային շոուների։

Հիշեցնենք, որ «Արարատ-Արմենիա» – «Նոա» հանդիպումը կկայանա մայիսի 10-ին՝ Աբովյանի Վահագն Թումասյանի անվան մարզահամալիրում: Խաղի սկիզբը՝ 18:00-ին:

Հայաստանի առաջնությունում կայացան 16-րդ տուրից տեղափոխված վերջին երկու հանդիպումները, որոնք զգալիորեն փոխեցին մրցաշարային աղյուսակի վերին հատվածի դասավորվածությունը։

Օրվա գլխավոր դիմակայությունում առաջատար «Արարատ-Արմենիան» տանը նվազագույն՝ 1:0 հաշվով պարտության մատնեց «Փյունիկին»։ Խաղի ելքը վճռեց 9-րդ րոպեին կիսապաշտպան Զիդան Բանջաքիի խփած միակ գոլը։

Զուգահեռաբար ընթացող խաղում գործող չեմպիոն «Նոան» հյուրընկալվելիս 4:1 հաշվով վստահ առավելության հասավ «Գանձասարի» նկատմամբ։ Թեև 66-րդ րոպեին դաշտի տերերին հաջողվեց չեղարկել Արտյոմ Ավանեսյանի խփած գնդակը (աչքի ընկավ Ժոաո Նոբրեգան), սակայն փոխարինման դուրս եկած Նարդին Մուլահուսեյնովիչը դուբլով արագ վերականգնեց հյուրերի առավելությունը, իսկ ավելացված ժամանակում Գուստավո Սանգարեն դրեց հանդիպման վերջակետը։

Այս արդյունքներից հետո «Արարատ-Արմենիան» 54 միավորով շարունակում է վստահորեն գլխավորել աղյուսակը։ «Նոան» վաստակեց 46 միավոր և բարձրացավ 2-րդ հորիզոնական՝ նախորդելով «Փյունիկին» ու «Ուրարտուին», որոնք 45-ական միավորով կիսում են 3-4-րդ տեղերը:

Հատկանշական է, որ 2-րդ և 3-րդ տեղերում ընթացող «Նոան» ու «Փյունիկը» առաջատարի համեմատ մեկ խաղ պակաս ունեն։ Այս թիմերը կմրցեն մայիսի 23-ին՝ 13-րդ տուրից հետաձգված առանցքային դիմակայությունում։

«Գանձասար» — «Նոա» հանդիպման տեսագրությունը

«Արարատ-Արմենիա» — «Փյունիկ» հանդիպման տեսագրությունը

Մրցաշարային աղյուսակն այս պահին

Fastex Պրեմիեր լիգայի հերթական՝ 24-րդ տուրի շրջանակում կայացավ «Գանձասար» — «Վան» հանդիպումը, որն ավարտվեց չարենցավանցիների արտագնա հաղթանակով:

Խաղի միակ և վճռորոշ գնդակը խփվեց 37-րդ րոպեին. աչքի ընկավ Բենիկ Հովհաննիսյանը:

Տոնած հաղթանակից հետո «Վանն» ունի 28 միավոր և զբաղեցնում է 6-րդ տեղը, մինչդեռ «Գանձասարը» մնաց 21 միավորով՝ հանգրվանելով 8-րդ դիրքում:

Մրցաշարային աղյուսակն այս պահին

Հայաստանի Պրեմիեր լիգայի 24-րդ տուրի շրջանակում Գյումրիում կայացավ «Շիրակ»-«Արարատ» դիմակայությունը:

Հանդիպումն ավարտվեց հյուրերի վստահ հաղթանակով՝ 2:0 հաշվով։

Խաղի ելքը վճռվեց երկրորդ կեսում, իսկ հանդիպման հերոս դարձավ երևանյան թիմի հարձակվող Կալիֆալա Դումբիան։ Նա կարողացավ երկու անգամ գրավել դաշտի տերերի դարպասը՝ ձևակերպելով դուբլ:

Տեսանյութը՝ ստորև․

Մրցաշարային աղյուսակն այս պահին

Fastex Պրեմիեր լիգայի 16-րդ տուրից մնացած և հետաձգված հանդիպումում «Ուրարտուն» սեփական հարկի տակ ուժերը չափեց «Վանի» հետ։ Տանտերերը վստահ հաղթանակ տարան՝ մրցակցին պարտության մատնելով 2։0 հաշվով։

​Երևանյան թիմը կարողացավ արագորեն առաջ անցնել հաշվի մեջ. արդեն 11-րդ րոպեին գոլի հեղինակ դարձավ Նիկոլաս Կալուկյանը։ Առաջին կեսի միջնամասում՝ 29-րդ րոպեին, Օլեգ Պոլյակովը կրկնապատկեց «Ուրարտուի» առավելությունը՝ ձևակերպելով նաև խաղի վերջնահաշիվը։

​Այս հաջողությունից հետո Ռոբերտ Արզումանյանի գլխավորած թիմն իր ակտիվում գրանցեց 45 միավոր և մրցաշարային աղյուսակում բարձրացավ 2-րդ հորիզոնական։ «Վանը» վաստակած 25 միավորով շարունակում է զբաղեցնել 6-րդ տեղը։

Fastex Հայաստանի Պրեմիեր լիգայի 23-րդ տուրում «Ալաշկերտը» սեփական հարկի տակ 1։1 հաշվով մարտական ոչ-ոքի գրանցեց «Նոայի» հետ։

Հանդիպման հաշիվը բացվեց խաղավարտին մոտ. 80-րդ րոպեին Կարեն Նալբանդյանի անհատական անցումից և արդյունավետ փոխանցումից հետո դաշտի տերերին առաջ մղեց Մոմո Տուրեն։

Սակայն հյուրերին հաջողվեց խուսափել պարտությունից. հիմնական ժամանակի ավարտից մեկ րոպե առաջ Իմրան Ուլադ Օմարը դիպուկ հարվածով վերականգնեց հաշվի հավասարությունը։

Այս ոչ-ոքիով ընդհատվեց Հայաստանի առաջնությունում «Նոայի»՝ վեց խաղից բաղկացած հաղթական և անառիկ դարպասով շարքը։

Հանդիպման տեսանյութը՝ ստորև․

Մրցաշարային աղյուսակն այս պահին