ՊՍԺ-ի վինգեր Խվիչա Կվարացխելիայի տրանսֆերային արժեքն ավելացել է ավելի քան 1,5 անգամ՝ ըստ Transfermarkt հեղինակավոր պորտալի վերջին թարմացումների:

Եթե մինչ այս վրացի ֆուտբոլիստի տրանսֆերային արժեքը գնահատվում էր 90 միլիոն եվրո, ապա այժմ այն կազմում է 140 միլիոն եվրո։ Այս տպավորիչ աճի շնորհիվ Կվարացխելիան ներառվել է աշխարհի ամենաթանկարժեք ֆուտբոլիստների լավագույն տասնյակում։

Հիշեցնենք, որ վերջերս Կվարացխելիան ճանաչվել է ՈւԵՖԱ-ի Չեմպիոնների լիգայի 2025/26 մրցաշրջանի խաղարկության լավագույն ֆուտբոլիստ։

Աշխարհի ամենաթանկարժեք ֆուտբոլիստների լավագույն տասնյակն ունի հետևյալ տեսքը.

1. Լամին Յամալ («Բարսելոնա») — 200 մլն եվրո
2. Էռլինգ Հալանդ («Մանչեսթեր Սիթի») — 200 մլն եվրո
3. Կիլիան Մբապե («Ռեալ Մադրիդ») — 200 մլն եվրո
4. Պեդրի («Բարսելոնա») — 150 մլն եվրո
5. Մայքլ Օլիսե («Բավարիա») — 150 մլն եվրո
6. Վինիսիուս Ժունիոր («Ռեալ Մադրիդ») — 150 մլն եվրո
7. Ժոաու Նևեշ (ՊՍԺ) — 140 մլն եվրո
8. Ջուդ Բելինգեմ («Ռեալ Մադրիդ») — 140 մլն եվրո
9. Խվիչա Կվարացխելիա (ՊՍԺ) — 140 մլն եվրո
10. Վիտինյա (ՊՍԺ) — 140 մլն եվրո

Մադրիդի «Ռեալի» ֆրանսիացի հարձակվող Կիլիան Մբապեն արձագանքել է իր նախկին ակումբի՝ ՊՍԺ-ի Չեմպիոնների լիգայում երկրորդ տարին անընդմեջ տարած հաղթանակին։

Ֆրանսիացի աստղը փարիզյան թիմի գույները պաշտպանել է յոթ մրցաշրջան, սակայն այդպես էլ չի կարողացել նվաճել ակումբային ամենահեղինակավոր տիտղոսը։ Նրա հեռանալուց հետո ՊՍԺ-ն արդեն երկրորդ անգամն է հաղթանակ տոնում Չեմպիոնների լիգայում։

Փարիզցիների պաշտպան և Մբապեի մտերիմ ընկեր Աշրաֆ Հաքիմին այս նվաճման առիթով գրառում է կատարել Ինստագրամի իր էջում։ Ֆուտբոլիստը լուսանկար է հրապարակել գավաթի հետ և կից գրել՝ «Երկու անգամ անընդմեջ = 3»՝ դրանով իսկ ակնարկելով հաջորդ մրցաշրջանում ևս Չեմպիոնների լիգայում հաղթելու ցանկության մասին։ Մբապեն Հաքիմիի հրապարակմանն արձագանքել է սրտիկի երեք էմոջիով։

 

Посмотреть эту публикацию в Instagram

 

Публикация от Achraf Hakimi (@achrafhakimi)

Մադրիդի «Ռեալի» նախագահ Ֆլորենտինո Պերեսը կտրականապես համաձայն չէ այն շրջանառվող կարծիքների հետ, թե թիմի հարձակվողներ Կիլիան Մբապեն և Վինիսիուս Ժունիորը ֆուտբոլային դաշտում անհամատեղելի են։

Իսպանական El Pais պարբերականին տված հարցազրույցում «արքայական ակումբի» նախագահը մեկնաբանել է ֆուտբոլիստների շուրջ ստեղծված իրավիճակը.

– Ի՞նչ եք մտածում, երբ լսում եք, որ Վինիսիուսն ու Մբապեն անհամատեղելի են։

– Որ դա կատարյալ անհեթեթություն է։ Նրանք երկուսն էլ լավագույնն են աշխարհում։ Վինիսիուսը մեզ համար Չեմպիոնների լիգայի երկու գավաթ է նվաճել։ Բայց պետք չէ գոռոզանալ։ Այն միտքը, թե Չեմպիոնների լիգան կարելի է հաղթել ամեն տարի, պարզապես ծիծաղելի է։ Ոչ ոք երբեք չի հաղթել այն 10 տարում վեց անգամ, – նշել է Պերեսը։

Հավելենք, որ ավելի վաղ El Mundo պարբերականը տեղեկություն էր տարածել, որ Մադրիդի «Ռեալի» ղեկավարությունը մտադիր չէ հրաժեշտ տալ ո՛չ Կիլիան Մբապեին, ո՛չ Վինիսիուսին, և ո՛չ էլ թիմի կիսապաշտպան Ջուդ Բելինգեմին. աստղային եռյակն անձեռնմխելի է ակումբի համար։

Չեմպիոնների լիգայի խաղարկության եզրափակիչից առաջ հեղինակավոր Goal պորտալը թարմացրել է 2026 թվականի «Ոսկե գնդակ» մրցանակին հավակնող ֆուտբոլիստների վարկանիշային աղյուսակը։

Աղյուսակը շարունակում է գլխավորել Մյունխենի «Բավարիայի» անգլիացի հարձակվող Հարի Քեյնը։ Երկրորդ հորիզոնական է բարձրացել մրցանակի գործող դափնեկիր, ՊՍԺ-ի ֆրանսիացի հարձակվող Ուսման Դեմբելեն։ «Բարսելոնայի» իսպանացի հարձակվող Լամին Յամալը նահանջել է մեկ աստիճանով և այժմ եզրափակում է լավագույն եռյակը։

Goal-ի վարկածով 2026 թվականի «Ոսկե գնդակի» 20 գլխավոր հավակնորդները․

1. Հարի Քեյն («Բավարիա»)
2. Ուսման Դեմբելե (ՊՍԺ)
3. Դեկլան Ռայս («Արսենալ»)
4. Լամին Յամալ («Բարսելոնա»)
5. Մայքլ Օլիսե («Բավարիա»)
6. Կիլիան Մբապե («Ռեալ Մադրիդ»)
7. Խվիչա Կվարացխելիա (ՊՍԺ)
8. Վիտինյա (ՊՍԺ)
9. Լուիս Դիաս («Բավարիա»)
10. Գաբրիել Մագալյես («Արսենալ»)
11. Էրլինգ Հալանդ («Մանչեսթեր Սիթի»)
12. Լիոնել Մեսի («Ինտեր Մայամի»)
13. Կրիշտիանու Ռոնալդու («Ալ-Նասր»)
14. Բրունո Ֆերնանդեշ («Մանչեսթեր Յունայթեդ»)
15. Բուկայո Սակա («Արսենալ»)
16. Ռաֆինյա («Բարսելոնա»)
17. Լաուտարո Մարտինես («Ինտեր»)
18. Վինիսիուս Ժունիոր («Ռեալ Մադրիդ»)
19. Պեդրի («Բարսելոնա»)
20. Խուլիան Ալվարես («Ատլետիկո Մադրիդ»)

Ֆրանսիայի հավաքականի և Մադրիդի «Ռեալի» հարձակվող Կիլիան Մբապեն 2025/26 մրցաշրջանի արդյունքներով ճանաչվել է «արքայական ակումբի» լավագույն ֆուտբոլիստ:

Ինչպես պաշտոնապես հայտարարել է ակումբի մամուլի ծառայությունը, 27-ամյա ֆրանսիացին այս պատվավոր մրցանակին արժանանում է արդեն երկրորդ տարին անընդմեջ:

Ավարտված մրցաշրջանում Մբապեն գրանցել է տպավորիչ վիճակագրություն՝ դառնալով Իսպանիայի առաջնության լավագույն ռմբարկու։ Լա Լիգայի 31 խաղում նա հեղինակել է 25 գնդակ։ Բացի այդ, ֆրանսիացին գլխավորում է Չեմպիոնների լիգայի ընթացիկ խաղարկության ռմբարկուների ցուցակը՝ իր ակտիվում ունենալով 15 գոլ:

Ընդհանուր առմամբ, մրցաշրջանի ընթացքում նա «Ռեալի» կազմում մասնակցել է 44 հանդիպման՝ խփելով 42 գոլ և կատարելով 7 արդյունավետ փոխանցում։ Հատկանշական է, որ տարվա ընթացքում նա չորս անգամ ճանաչվել է ակումբի ամսվա լավագույն ֆուտբոլիստ, թեև վնասվածքի պատճառով ստիպված է եղել բաց թողնել մրցաշրջանի վերջնամասի որոշ հանդիպումներ: Ի դեպ, հեղինակավոր Transfermarkt պորտալի գնահատականներով՝ Մբապպեի տրանսֆերային արժեքն այժմ կազմում է 200 միլիոն եվրո:

Սակայն, չնայած հարձակվողի անհատական փայլուն ելույթներին, Մադրիդի «Ռեալը» այս մրցաշրջանն ավարտեց առանց տիտղոսների։ Իսպանիայի առաջնությունում մադրիդցիները վաստակեցին 86 միավոր՝ զբաղեցնելով միայն երկրորդ հորիզոնականը:

Եվրոպական գլխավոր ակումբային մրցաշարում՝ Չեմպիոնների լիգայում, թիմի առաջխաղացումը կանգ առավ քառորդ եզրափակիչում, որտեղ «սերուցքայինները» երկու խաղերի ընդհանուր 4:6 հաշվով զիջեցին Մյունխենի «Բավարիային»:

Ակումբի շուրջ ստեղծված այս իրավիճակի և մրցաշրջանի ավարտի ֆոնին՝ մայիսի 27-ին հայտնի դարձավ նաև, որ «Ռեալի» նախագահի հերթական ընտրությունները նշանակված են հունիսի 7-ին:

Մյունխենի «Բավարիայի» հարձակվող Հարի Քեյնը կդառնա 2025/2026 մրցաշրջանի «Ոսկե խաղակոշիկի» դափնեկիր։

32-ամյա անգլիացին Բունդեսլիգայի 31 հանդիպումներում դարձել է 36 գոլի հեղինակ (72 միավոր)՝ ճանաչվելով Եվրոպայի լավագույն ռմբարկու։ Վարկանիշային աղյուսակի երկրորդ հորիզոնականը զբաղեցրել է «Մանչեսթեր Սիթիի» նորվեգացի հարձակվող Էրլինգ Հալանդը, ով Անգլիայի Պրեմիեր լիգայում խփել է 27 գնդակ (54 միավոր)։ Լավագույն եռյակը եզրափակել է Մադրիդի «Ռեալի» հարձակվող Կիլիան Մբապեն՝ Լա Լիգայում խփած 25 գոլով (50 միավոր)։

Քեյնի համար սա արդեն երկրորդ «Ոսկե խաղակոշիկն» է։ «Բավարիայում» իր նորամուտի՝ 2023/2024 մրցաշրջանում նա նույնպես դարձել էր 36 գոլի հեղինակ և արժանացել այս մրցանակին։

Ընդհանուր առմամբ, ընթացիկ մրցաշրջանում Հարի Քեյնը բոլոր մրցաշարերում մասնակցել է 51 հանդիպման՝ դառնալով 61 գոլի և 7 արդյունավետ փոխանցման հեղինակ։

ՊՍԺ-ի պաշտպան Աշրաֆ Հակիմին ներկայացել է Վերսալի դատարան՝ բռնաբարության մեղադրանքները հանելու միջնորդությամբ։ Նրան աջակցել և դատարանում ցուցմունք է տվել Կիլիան Մբապեն։ Այս մասին հայտնում է RMC Sport-ը։

«Կիլիան Մբապեն պարզաբանում է, որ Աշրաֆ Հակիմին իրեն պատմել է, թե ինքն ու տվյալ աղջիկը փոխադարձ շոյել են միմյանց ինտիմ հատվածները, ինչը, ըստ երևույթին, տարբերվում է տուժողի ներկայացրած վարկածից»,- նշված է դատական փաստաթղթերում։

Մբապեն ոստիկաններին հայտնել է նաև հետևյալը.

«Կարծում եմ՝ նա ցանկանում էր քնել աղջկա հետ, համենայն դեպս ես այդպես մտածեցի՝ հաշվի առնելով, որ հանդիպումը շատ ուշ էր կայացել։ Աշրաֆն ինձ ցույց տվեց նամակագրությունը, և ես հասկացա, որ հենց աղջիկն էր ցանկացել գնալ նրա մոտ։ Հակիմին ասաց, որ իրենք համբուրվել են։ Ես հարցրի նրան՝ արդյոք նա որևէ սխալ բան արել է։ Նա պատասխանեց, որ ինտիմ հատվածներում փոխադարձ շոյանքներ են եղել, և ինքը աղջկա կողմից որևէ մերժում չի զգացել»։

Հիշեցնենք, որ 2023 թվականին 24-ամյա մի աղջիկ Հակիմիին մեղադրել էր բռնաբարության փորձի մեջ։ Նա ուշ երեկոյան տաքսիով գնացել էր ֆուտբոլիստի տուն։

Վերջին օրերին ակտիվացել են խոսակցությունները Մադրիդի «Ռեալի» հարձակվող Կիլիան Մբապեի՝ լոնդոնյան «Չելսի» հնարավոր տեղափոխության վերաբերյալ։ Նշվում էր, որ անգլիական ակումբում ֆրանսիացին կարող էր վերամիավորվել Խաբի Ալոնսոյի հետ, որն ընթացիկ մրցաշրջանը սկսել էր Մադրիդում, իսկ ամռանից կմարզի «կապույտներին»։

Այս տեղեկատվությանն արձագանքել է «արքայական» ակումբի նախագահ Ֆլորենտինո Պերեսը՝ հստակ ընդգծելով, որ Կիլիան Մբապեն ենթակա չէ վաճառքի։

Ընթացիկ մրցաշրջանում 27-ամյա հարձակվողը «Ռեալի» կազմում անցկացրած 43 խաղում դարձել է 41 գոլի և 7 գոլային փոխանցման հեղինակ։ Մբապեն աշխարհի երեք ամենաթանկ ֆուտբոլիստներից մեկն է, որի տրանսֆերային արժեքը գնահատվում է 200 միլիոն եվրո։

Նշվում է, որ վերջին շրջանում ֆրանսիացու հարաբերությունները թիմակիցների և հատկապես երկրպագուների հետ վատթարացել են, սակայն նրա գործող պայմանագիրը մադրիդյան ակումբի հետ նախատեսված է ևս երեք մրցաշրջանի համար։

«LEGO Group» կորպորացիան ներկայացրել է 2026 թվականի աշխարհի առաջնությանն ընդառաջ նկարահանված տեսահոլովակի կադրերից դուրս մնացած հատվածը:

Գովազդային հոլովակում նկարահանվել են ֆուտբոլի գլխավոր աստղեր Կրիշտիանու Ռոնալդուն, Լիոնել Մեսսին, Կիլիան Մբապեն և Վինիսիուս Ժունիորը:

Ավելի վաղ հայտնի բրենդը թողարկել էր ԱԱ-2026-ի համար նախատեսված իր նոր հավաքածուների գովազդը։ Դրանում մասնակից ֆուտբոլիստները փորձում էին իրենց մինի-ֆիգուրները տեղադրել սպասվելիք մրցաշարի գլխավոր գավաթի վրա:

Հիշեցնենք, որ 2026 թվականի աշխարհի առաջնությունը կանցկացվի հունիսի 11-ից հուլիսի 19-ը՝ միանգամից երեք երկրում՝ ԱՄՆ-ում, Կանադայում և Մեքսիկայում:

Օրեր առաջ` մայիսի 17-ին Լոնդոնի «Չելսիի» գլխավոր մարզչի պաշտոնում պաշտոնապես նշանակված Խաբի Ալոնսոն արդեն իսկ սկսել է թիմի կազմավորման աշխատանքները։

Թեև իսպանացի մասնագետն իր պարտականությունների կատարմանը կանցնի միայն հուլիսի 1-ից (կողմերի միջև կնքվել է 4 տարվա պայմանագիր), նա անգլիական ակումբի սեփականատերերին խնդրել է գնել Մադրիդի «Ռեալի» ֆրանսիացի հարձակվող Կիլիան Մբապեի տրանսֆերը։ Այս մասին հայտնում է Football 365-ը։

Աղբյուրի տեղեկություններոբ` լոնդոնյան ակումբն ընդառաջել է նոր մարզչի խնդրանքին և արդեն կապ է հաստատել Մբապեի մոր հետ, որը նաև հանդիսանում է նրա գործակալը։ Ալոնսոն պնդում է այս գործարքի իրականացման հարցում, քանի որ մադրիդյան թիմում աշխատելու ժամանակահատվածում լավ հարաբերություններ է ունեցել ֆրանսիացու հետ և այժմ ցանկանում է վերամիավորվել նրա հետ «Սթեմֆորդ Բրիջում»։ Իր հերթին, «արքայական» ակումբը ամենևին էլ մտադիր չէ վաճառել թիմի գլխավոր աստղերից մեկին։

​Հիշեցնենք, որ Մբապեն ՊՍԺ-ից որպես ազատ գործակալ «Ռեալ» էր տեղափոխվել 2024 թվականի ամռանը՝ մադրիդցիների հետ պայմանագիր կնքելով մինչև 2029 թվականի հունիսը։

Ընթացիկ մրցաշրջանում հարձակվողը բոլոր մրցաշարերում անցկացրած 43 հանդիպումներում դարձել է 41 գոլի և 7 արդյունավետ փոխանցման հեղինակ։ Ներկայումս ֆուտբոլիստի տրանսֆերային արժեքը գնահատվում է 200 միլիոն եվրո։