Բրազիլիայի հավաքականի նախկին լավագույն պաշտպաններից մեկն իր կարծիքն է հայտնել «Լիվերպուլի» պաշտպան Ալեքսանդր-Առնոլդի մասին.

«Նրան ինձ հետ են համեմատու՞մ: Նա անհավանական տաղանդ ունի: Եթե նա շարունակի նույնկերպ խաղալ, ապագայում կդառնա աշխարհում լավագույններից մեկը: Նա մեծ պոտենցիալ ունի The Best մրցանակն ապագայում հաղթելու համար:

Նրա խաղաոճը նման է բրազիլականին, և ինձ դուր է գալիս նրա խաղին հետևելը: Նրան օգնում է նաև այն փաստը, որ «Լիվերպուլում» է խաղում»,-ասել է Կաֆուն:

Բրազիլիայի հավաքականի նախկին պաշտպան Կաֆուն բարձր է գնահատել իր հայրենակից, ՊՍԺ-ի հարձակվող Նեյմարի խաղամակարդակը.

«Վարպետությամբ ոչ մի ֆուտբոլիստ չի գերազանցի Նեյմարին: Նույնիսկ Մեսսին, չնայած ես նրա մեծ երկրպագուն եմ: Նա խաղացող է, որը տարբերություն է ստեղծում բրազիլական ֆուտբոլում:

Բրազիլիային պակասո՞ւմ է առաջատարը. Նեյմարը պետք է իր վրա պատասխանատվություն վերցնի: Նրա մոտ բացակայում են առաջատարի որակները, բայց նա առաջվա պես Բրազիլիայի հույսն է: Ձեր դուր գալիս է, թե ոչ, բայց Նեյմարի հետ դաշտում մրցակցի 8 ֆուտբոլիստներն իրար մեջքով կանգնած կլինեն: Սա լրացուցիչ տարածություն է բացում ու ցույց է տալիս, որ նա վերերկրային ունակություններով ֆուտբոլիստ է»,- Կաֆուի խոսքերն է փոխանցում Mundo Deportivo-ն:

Անցած տարվա աշնանը Նեյմարը 100 խաղի ցուցանիշին հասավ Բրազիլիայի հավաքականի հետ: 28-ամյա հարձակվողը դարձել է հավաքականի պատմության ամենաերիտասարդ խաղացողը, որը կարողացել է գրանցել այս ցուցանիշը: Բրազիլիայի հավաքականի կազմում անցկացրած խաղերի քանակով ռեկորդակիրը Կաֆուն է (142):

Բրազիլիայի հավաքականի նախկին պաշտպան Կաֆուն խոսել է Նեյմարի մասին.

«Հիմա եկել է ժամանակը, երբ Նեյմարը պետք է փոխի իր վերաբերմունքը: Նա ունի աշխարհում լավագույնը լինելու հնարավորությունը: Բոլորն ակնկալում էին, որ նա ավելի հասուն կդառնա: Հենց դա է, որ պետք էր թույլ տար, որ նա դառնա աշխարհի լավագույն ֆուտբոլիստներից մեկը: 

Նեյմարը, նույնիսկ խաղալով ՊՍԺ-ում, կարող է հասնել Մեսսիի և Ռոնալդուի մակարդակի: Նրա տրանսֆերը ֆրանսիական ֆուտբոլի պատմության մեջ լավագույն տրանսֆերներից մեկն է: Ամեն ինչ կստացվի, եթե նա պատասխանատվություն ստանձնի որպես առաջնորդ»,- Կաֆուի խոսքերն է մեջբերում Daily Mail-ը: :

Ավելի վաղ Կաֆուն կիսել էր իր կարծիքը Ալեքսանդր-Առնոլդի վերաբերյալ:

Բրազիլացի նախկին ֆուտբոլիստ Կաֆուն խոսել է «Լիվերպուլի» պաշտպան Տրենտ Ալեքսանդր-Առնոլդի մասին.

«Ալեքսանդր-Առնոլդը լավագույններից է աշխարհում, դրանում ոչ մի կասկած չկա: Նա հիանալի խաղացող է, ունի նույն որակները, ինչ՝ ես: Նա մեծ պոտենցիալ ունի: Տրենտն ուժեղ ու ունակ խաղացող է, խաղն առաջ է տանում ու «Լիվերպուլին» օգնում է գոլ խփել:

Իմ ու նրա միջև շատ ընդհանրություններ եմ տեսնում: Կասեի, որ նա բրազիլական բնազդ ունի: Պարզ խորհուրդ նրա համար՝ շարունակի՛ր անել այն, ինչ անում ես վերջին մի քանի տարում: Կարիք չկա, որ նա փոխի իր խաղաոճը: Նույնիսկ եթե նա սխալներ է թույլ տա, պետք է շարունակի անել այն, ինչ անում է:

Կարծում եմ՝ Ալեքսանդր-Առնոլդն ունի ամեն ինչ, որպեսզի հաղթի «Ոսկե Գնդակը»: Մենք պետք է փոխենք այն կարծրատիպը, որ «Ոսկե Գնդակ» միայն հարձակման գծի խաղացողներն են ստանում: Մարդիկ պետք է տեսնեն, որ պաշտպանները նույնքան կարևոր են, որքան՝ հարձակվողները»,- Կաֆուի խոսքերն է փոխանցում Mirror-ը:

Իսպանական AS հեղինակավոր պարբերականը կազմել է բոլոր ժամանակների խորհրդանշական հավաքականը։

Գործող ֆուտբոլիստներից ցանկում է միայն Լիոնել Մեսսին։

Ընտրանին ունի այս տեսքը․

Լև Յաշին, Կաֆու, Բոբի Մուր, Ֆրանց Բեկենբաուեր, Պաոլո Մալդինի, Յոհան Կրույֆ, Զինեդին Զիդան, Դիեգո Մարադոնա, Ալֆրեդո դի Ստեֆանո, Լիոնել Մեսսի, Պելե

Բրազիլիայի հավաքականի նախկին պաշտպան Կաֆուն պատմել է որդու մահվան մասին.

«Սեպտեմբերի 5-ին ընկերներով որոշել էինք ֆուտբոլ խաղալ, բայց ես գորրծուղման պետք է մեկնեի ԱՄՆ, այդ իսկ պատճառով ավելի շուտ սկսեցինք: Դանիլոն ինձ հետ միևնույն թիմում էր խաղում: Ընդմիջմանը նա գնաց, իսկ ես շարունակեցի խաղալ, բայց մոտ 3 րոպե անց իրարանցում նկատեցի դաշտի սահմաններից դուրս: Հետաքրքրությունից դրդված մոտեցա՝ տեսնելու, թե ինչ է կատարվում, ու տեսա որդուս՝ ցնցումների մեջ:

Խուճապի մատնվեցի, քանի որ նա սրտի հետ կապված խնդիրներ ուներ: Մենք շտապ օգնություն զանգահարեցինք, նրանք ասացին, որ 10 րոպեից նոր կժամանեն, բայց ես ասացի, որ տղաս չի կարող սպասել: Բոլորին խնդրեցի իրենց երեխաներին հեռացնել այդտեղից, որպեսզի նրանք չտեսնեին այն, ինչ կատարվում էր տղայիս հետ:

Գրկեցի որդուս, հասցրի մեքենայի մոտ ու 5 րոպե անց մենք արդեն հիվանդանոցում էինք: Նրա վիճակն աստիճանաբար ավելի էր վատանում: Բժիշկները գործադրեցին բոլոր ջանքերը, բայց նա ոչ մի կերպ չէր արձագանքում: Աղոթում էի Աստծուն, որ տղայիս չխլի ինձնից, բայց դա անհնար էր:

Երեխայի հուղարկավորությունը տարբերվում է այն ամենից, ինչ դու զգացել ես ամբողջ կյանքիդ ընթացքում: 5 օրը մեկ գնում եմ նրա գերեզմանին: Դեռ հավատս չի գալիս, որ նման բան է տեղի ունեցել: Դեռ քաջություն չեմ ունեցել նրա սենյակը մտնելու համար: Մյուս տղաս՝ Վելինգտոնը, հավաքել է Դանիլոյի բոլոր իրերն ու դրանք տվել բարեգործությանը: Չեմ վերադարձել այն խաղադաշտ, որտեղ եղավ սրտի կաթվածը:

Նույնիսկ չեմ կարող բացատրել այն զգացողությունը, որն ունենում ես, երբ հող ես լցնում տղայիդ շիրիմին՝ իմանալով, որ նա այլևս չի վերադառնա: Տղայի մահը մնում է նրա հոր և մոր հետ՝ մինչև կյանքի վերջ: Լացը հանգստացնում է ինձ: Զանգում եմ ընկերներիս, որպեսզի պարզապես լաց լինեմ: Նրանք դա գիտեն ու լռում են»,- Կաֆուի խոսքերն է փոխանցում Record-ը:

Կաֆուի որդին՝ Դանիլոն, 30 տարեկան հասակում մահացել է սրտի նոպայից:

Բրազիլիայի կազմում աշխարհի երկակի չեմպիոն Կաֆուն մեղադրվում է երկրի խոշորագույն հանցավոր խմբավորման՝ PCC-ի հետ կապեր ունենալու մեջ։ Այս մասին հաղորդում է Football Italia-ն։

Աղբյուրի տեղեկացմամբ՝ իրավապահ մարմինները ուսումնասիրում են ֆուտբոլիստի ու խմբավորման կապը։ Մասնավորապես, ոստիկանությունը հետաքննում է գործը, ըստ որի՝ նախկին ֆուտբոլիստը հանցավոր խմբավորման հաշվապահին գումար է փոխանցել Սան-Պաուլու նահանգում շինության ու հողի վաճառքի համար։ Կաֆուն արդեն հերքել է մեղադրանքը՝ հայտնելով․ «Այդ ամենը սուտ տեղեկություն է։ Չգիտեմ՝ որտեղից է եկել այն, որովհետև այդ տարածքում ես սեփականություն չունեմ»։

Հիշեցնենք, որ ամռանը տեղեկություն էր տարածվել, որ Կաֆուն մի քանի միլիոն եվրոյի պարտք է կուտակել։ Աշնան սկզբում մահացել էր նախկին ֆուտբոլիստի որդին՝ Դանիլոն։