Եվրոպական բարձրակարգ առաջնություններում ամառային տրանսֆերային պատուհանը պաշտոնապես փակվել է, սակայն որոշ առաջնություններում պայմանագրեր կնքել դեռ հնարավոր է:

Բացի այդ, ակումբները կարող են ցանկացած պահի անվճար ձեռք բերել ազատ գործակալի կարգավիճակ ունեցող խաղացողների: Բրիտանական BBC պարբերականը կազմել է ներկայումս առանց թիմի մնացած ամենաաստղային ֆուտբոլիստների ցանկը:

Պոլ Պոգբա, 33 տարեկան (նախորդ ակումբը՝ «Մոնակո»)

«Մանչեսթեր Յունայթեդի» նախկին կիսապաշտպանը 2025-ի մարտին դոպինգի պատճառով 18-ամսյա որակազրկման ավարտից հետո շատ քիչ է խաղացել: Նախորդ ամառ միանալով «Մոնակոյին»՝ նա անցկացրել է ընդամենը 6 հանդիպում։ Վնասվածքների շարքի պատճառով ֆրանսիական ակումբը նախորդ ամիս խզեց նրա պայմանագիրը՝ ժամկետի ավարտից մեկ տարի առաջ:

Կարիմ Բենզեմա, 38 տարեկան (նախորդ ակումբը՝ «Ալ-Հիլալ»)

2023-ին «Ռեալից» հեռանալուց հետո Բենզեման երեք տարի անցկացրեց «Ալ-Իթիհադում», ապա տեղափոխվեց «Ալ-Հիլալ»: Սակայն ընդամենը վեց ամիս անց «Ոսկե գնդակի» դափնեկրի պայմանագիրը խզվեց։ Պատճառը թերևս Կրիսենսիո Սամերվիլ-Օլի Ուոթկինս-Գաբրիել Մարտինելի հարձակվողական եռյակի ժամանումն էր, և, չնայած այս մրցաշրջանում նրա անցկացրած 3 հանդիպումներին, օգոստոսի 31-ին ֆրանսիացին հեռացավ ակումբից:

Ռիյադ Մահրեզ, 35 տարեկան (նախորդ ակումբը՝ «Ալ-Ահլի»)

Պրեմիեր լիգայի հնգակի չեմպիոնի պայմանագիրը նույնպես վաղաժամ խզվել է: 2023-ին «Մանչեսթեր Սիթիից» տեղափոխվելուց հետո Մարեզը 122 խաղում դարձել էր 37 գոլի հեղինակ: Սպասվում է, որ նա կմնա Սաուդյան Արաբիայում և կմիանա «Ալ-Շաբաբին»:

Ռահիմ Ստերլինգ, 31 տարեկան (նախորդ ակումբը՝ «Ֆեյենորդ»)

Ստերլինգը հեռացավ «Ֆեյենորդից» ընդամենը երեք ամիս և ութ խաղ անց։ Հաջորդ ամիս նա կկանգնի դատարանի առաջ՝ մայիսին վտանգավոր վարման և արգելապատնեշին բախվելու մեղադրանքով: Ըստ աղբյուրների՝ անգլիացի վինգերը «չափազանց բարդ տարիներ» է ապրում։

Ֆիլիպե Կոուտինյո, 34 տարեկան (նախորդ ակումբը՝ «Վասկո դա Գամա»)

Բրազիլացին փետրվարին հեռացավ հարազատ ակումբից՝ նշելով, որ «հոգեպես հոգնած է»: Նա պաշտոնապես չի ավարտել կարիերան, իսկ նախկինում լուրեր էին շրջանառվում MLS հնարավոր տեղափոխության մասին:

Ջեյդոն Սանչո, 26 տարեկան (նախորդ ակումբը՝ «Մանչեսթեր Յունայթեդ»)

2021-ին 73 մլն ֆունտով ՄՅՈւ տեղափոխվելուց հետո Սանչոյի կարիերան անկում ապրեց: Վերջին 2,5 տարիներին նա վարձավճարով խաղացել է «Չելսիում» և «Ասթոն Վիլայում»: Պրեմիեր լիգայում ընդամենը 30 խաղ անցկացրած վինգերը, ըստ լուրերի, համաձայնության է եկել բրազիլական «Պալմեյրասի» հետ:

Դանիել Կարվախալ, 34 տարեկան (նախորդ ակումբը՝ «Ռեալ Մադրիդ»)

Իր սերնդի լավագույն աջ պաշտպաններից մեկը հունիսին «Ռեալի» հետ պայմանագրի ավարտից հետո մնացել է առանց ակումբի։ 13 տարվա ընթացքում նա Մադրիդում անցկացրել է 451 հանդիպում: Ամռանը Կարվախալը մարզվել է Իսպանիայի ֆուտբոլի ֆեդերացիայի բազայում՝ հայրենակից Խոսելուի հետ:

Ջեյմի Վարդի, 39 տարեկան (նախորդ ակումբը՝ «Կրեմոնեզե»)

«Լեսթերում» 13 տարի անցկացնելուց հետո Վարդին նախորդ մրցաշրջանն անցկացրեց իտալական «Կրեմոնեզեում», սակայն թիմի՝ Սերիա Բ տեղափոխվելուց հետո հեռացավ։ Նրա ծառայություններով հետաքրքրված են անգլիական «Ռեքսեմը», «Շեֆիլդ Ուենսդեյն» ու «Վեսթ Հեմը»:

Դավիդ Ալաբա, 34 տարեկան (նախորդ ակումբը՝ «Ռեալ Մադրիդ»)

Ալաբան մադրիդյան ակումբից հեռացավ մայիսին՝ 5 տարի այնտեղ անցկացնելուց հետո։ Նրա տպավորիչ կարիերան ներառում է 12 չեմպիոնական տիտղոս և Չեմպիոնների լիգայի 4 գավաթ: Չնայած ՄՅՈւ-ի և այլ ակումբների կողմից հետաքրքրությանը, ավստրիացին դեռ նոր թիմ չի գտել:

Սերխիո Ռամոս, 40 տարեկան (նախորդ ակումբը՝ «Մոնտերեյ»)

Իսպանացի լեգենդար պաշտպանն առանց ակումբի է 2025-ի դեկտեմբերից՝ մեքսիկական «Մոնտերեյից» հեռանալուց ի վեր: Նա չի ավարտել կարիերան և իրեն բավականաչափ լավ մարզավիճակում է զգում։ Այս տարվա սկզբին Ռամոսը փորձել է գնել իր նախկին ակումբի՝ «Սևիլյայի» բաժնետոմսերի վերահսկիչ փաթեթը, սակայն գործարքը ձախողվել է:

Այլ հայտնի ազատ գործակալներ

1. Ալեքսանդր Զինչենկո (29 տ., նախորդ ակումբը՝ «Այաքս»)
2. Խամես Ռոդրիգես (35 տ., նախորդ ակումբը՝ «Մինեսոտա Յունայթեդ»)
3. Անտոնի Մարսիալ (30 տ., նախորդ ակումբը՝ «Մոնտերեյ»)
4. Դելե Ալի (30 տ., նախորդ ակումբը՝ «Կոմո»)
5. Խոսելու (36 տ., նախորդ ակումբը՝ «Ալ-Գարաֆա»)
6. Ուիլֆրիդ Զահա (33 տ., նախորդ ակումբը՝ «Գալաթասարայ»)
7. Իվ Բիսումա (30 տ., նախորդ ակումբը՝ «Տոտենհեմ»)
8. Ժորժինյո Վեյնալդում (35 տ., նախորդ ակումբը՝ «Ալ-Իթիֆաք»)
9. Քոնոր Քոուդի (33 տ., նախորդ ակումբը՝ «Ռեքսեմ»)
10. Տայրել Մալասիա (27 տ., նախորդ ակումբը՝ «Մանչեսթեր Յունայթեդ»)
11. Ջորդան Այու (34 տ., նախորդ ակումբը՝ «Լեսթեր»)
12. Սոլի Մարչ (32 տ., նախորդ ակումբը՝ «Բրայթոն»)

Սաուդյան «Ալ-Հիլալն» ու ֆրանսիացի հարձակվող Կարիմ Բենզեման երկկողմանի համաձայնությամբ խզել են գործող պայմանագիրը։ Այս մասին պաշտոնապես հաղորդել է ակումբի մամուլի ծառայությունը։

Ակումբը շնորհակալություն է հայտնել 38-ամյա ֆուտբոլիստին թիմի ելույթներում ունեցած ավանդի, դրսևորած բարձր պրոֆեսիոնալիզմի, նվիրվածության և առաջնորդական որակների համար՝ հաջողություն մաղթելով նրան կարիերայի հաջորդ փուլում։

Հիշեցնենք, որ Բենզեման «Ալ-Հիլալին» էր միացել 2026 թվականի հունվարին՝ «Ալ-Իթիհադից» հեռանալուց հետո։ Այս ընթացքում նա հասցրել է մասնակցել 16 հանդիպման՝ իր ակտիվում գրանցելով 10 գոլ և 5 արդյունավետ փոխանցում։

Ավելի վաղ ֆրանսիացի աստղային հարձակվողը պաշտպանել է նաև ֆրանսիական «Լիոնի» և Մադրիդի «Ռեալի» գույները։

«Ալ-Հիլալի» ֆրանսիացի հարձակվող Քարիմ Բենզեման որոշել է լքել Սաուդյան Արաբիայի ակումբը, ըստ լրագրող Սանտի Աունայի։

«Ոսկե գնդակի» դափնեկիրը, ինչպես սպասվում է, առաջիկա օրերին կավարտի իր կարիերան սաուդյան ակումբում։

Բենզեման պաշտոնապես միացել է «Ալ-Հիլալին» 2026 թվականի փետրվարին՝ «Ալ-Իթթիհադից» հեռանալուց հետո։

Նա իր պրոֆեսիոնալ կարիերան սկսել է «Լիոնում», ապա 2009 թվականին պայմանագիր է կնքել «Ռեալ Մադրիդի» հետ, որտեղ անցկացրել է 14 մրցաշրջան և նվաճել 25 տիտղոս, այդ թվում՝ Չեմպիոնների լիգայի հինգ տիտղոս։ 2022 թվականին Բենզեման նվաճել է «Ոսկե գնդակը»։ 2023 թվականի ամռանը նա լքել է Մադրիդը և շարունակել իր կարիերան «Ալ-Իթթիհադում», որի հետ նա հաղթել է Սաուդյան Արաբիայի առաջնությունը և գավաթը, նախքան «Ալ-Հիլալին» միանալը։

Մադրիդի «Ռեալի» նախկին հարձակվող Խավիեր Էռնանդեսը (Չիչարիտո) պատմել է, թե ինչով է «Ալ-Հիլալի» հարձակվող Կարիմ Բենզեման տարբերվում դասական կենտրոնական հարձակվողներից։

«Ես կցանկանայի նրա հետ ավելի երկար խաղալ։ Նա ապացուցեց, որ ունակ է լինելու «Ռեալի» կենտրոնական հարձակվողը, բազմաթիվ գոլեր խփեց և նվաճեց «Ոսկե գնդակը»։

Այնուամենայնիվ, չեմ կարող նրան սովորական ինը համար անվանել։ Սա անհարգալից վերաբերմունք չէ, ընդհակառակը։ Ինձ համար նա միշտ ավելի շատ տասը համար էր՝ Զիդանի էությամբ և հարձակվողի մտածելակերպով։ Ես Կարիմին կանվանեի «իննուկես համար»։ Նրա խաղը դիտելն աներևակայելի հաճելի էր։

Ռոնալդուն ու Բեյլը նման էին նրանով, որ գործում էին շատ արդյունավետ, կտրուկ ու կայծակնային. նրանք ընդամենը երկու վայրկյանում կարող էին ոչնչացնել մրցակցին։

Իսկ Կարիմի դեպքում ամեն ինչ այլ էր։ Անգամ մարզումների ժամանակ հաճելի էր հետևել, թե ինչպես է նա փոխանցումներ կատարում, տեղաշարժվում և զգում խաղի ռիթմը։ Այդ իմաստով ես նրան համեմատում եմ Զիդանի հետ»,- ասել է Չիչարիտոն Ռիո Ֆերդինանդի փոդքասթում։

Հիշեցնենք, որ մեքսիկացի հարձակվողը «սերուցքայինների» կազմում հանդես է եկել 2014/15 մրցաշրջանում՝ վարձակալական հիմունքներով։

Հեղինակավոր Forbes ամսագիրը հրապարակել է 2026 թվականի աշխարհի ամենաբարձր վարձատրվող մարզիկների ամենամյա վարկանիշային աղյուսակը, որը գլխավորել է «Ալ Նասրի» և Պորտուգալիայի հավաքականի հարձակվող Կրիշտիանու Ռոնալդուն։ «Ոսկե գնդակի» հնգակի դափնեկիրն արդեն չորրորդ տարին անընդմեջ պահպանում է առաջատարի դիրքը։

Ռեյտինգը կազմվել է՝ հաշվի առնելով ինչպես մարզիկների մրցելույթներից ստացված եկամուտները (աշխատավարձ, բոնուսներ, մրցանակային հիմնադրամներ), այնպես էլ սպորտից դուրս կնքված գովազդային և հովանավորչական պայմանագրերը։

41-ամյա Ռոնալդուի ընդհանուր տարեկան եկամուտը կազմել է ֆանտաստիկ 300 միլիոն դոլար, որից 235 միլիոնը նա վաստակել է խաղադաշտում, իսկ 65 միլիոնը՝ դրա սահմաններից դուրս։

Երկրորդ հորիզոնականը զբաղեցրել է մեքսիկացի անվանի բռնցքամարտիկ Սաուլ «Կանելո» Ալվարեսը (170 մլն դոլար), իսկ լավագույն եռյակը եզրափակել է ամերիկյան «Ինտեր Մայամիի» հարձակվող Լիոնել Մեսսին, ում տարեկան եկամուտը գնահատվել է 140 միլիոն դոլար։

Ստորև ներկայացնում ենք Forbes-ի վարկածով 2026 թվականի ամենաբարձր վարձատրվող մարզիկների լավագույն տասնյակը (միլիոն դոլար).

• Կրիշտիանու Ռոնալդու (Պորտուգալիա, ֆուտբոլ) – 300 (235 սպորտում + 65 սպորտից դուրս)
• Սաուլ Ալվարես (Մեքսիկա, բռնցքամարտ) – 170 (160 + 10)
• Լիոնել Մեսսի (Արգենտինա, ֆուտբոլ) – 140 (70 + 70)
• Լեբրոն Ջեյմս (ԱՄՆ, բասկետբոլ) – 137.8 (52.8 + 85)
• Սյոհեյ Օտանի (Ճապոնիա, բեյսբոլ) – 127.6 (2.6 + 125)
• Ստեֆեն Քարի (ԱՄՆ, բասկետբոլ) – 124.7 (59.7 + 65)
• Ջոն Ռամ (Իսպանիա, գոլֆ) – 107 (97 + 10)
• Կարիմ Բենզեմա (Ֆրանսիա, ֆուտբոլ) – 104 (100 + 4)
• Քևին Դյուրանտ (ԱՄՆ, բասկետբոլ) – 103.8 (54.8 + 49)
• Լյուիս Հեմիլթոն (Մեծ Բրիտանիա, Ֆորմուլա-1) – 100 (70 + 30)

Անգլիական հեղինակավոր BBC պարբերականը կազմել և հրապարակել է 21-րդ դարի 10 լավագույն կենտրոնական հարձակվողների ցանկը։

​Վարկանիշային աղյուսակը գլխավորում է Բրազիլիայի ազգային հավաքականի լեգենդար նախկին հարձակվող Ռոնալդո Նազարիոն։

​Լավագույն տասնյակն ունի հետևյալ տեսքը․

1. Ռոնալդո (ավարտել է կարիերան)
2. ​Հարի Քեյն («Բավարիա»)
3. ​Էրլինգ Հալանդ («Մանչեսթեր Սիթի»)
4.  ​Թիերի Անրի (ավարտել է կարիերան)
5.  ​Ռոբերտ Լևանդովսկի («Բարսելոնա»)
6.  ​Դիդիե Դրոգբա (ավարտել է կարիերան)
7.  ​Կարիմ Բենզեմա («Ալ-Հիլալ»)
8.  ​Զլատան Իբրահիմովիչ (ավարտել է կարիերան)
9.  ​Լուիս Սուարես («Ինտեր Մայամի»)
10. ​Միրոսլավ Կլոզե (ավարտել է կարիերան)

Սաուդյան Արաբիայի Պրո լիգայի 20-րդ տուրում առաջատար «Ալ-Հիլալը», հյուրընկալվելիս, ջախջախեց «Ալ-Օխդուդին» (6-0)։

Հանդիպման գլխավոր հերոսը դարձավ թիմի աստղային նորեկ Կարիմ Բենզեման՝ առաջին իսկ խաղում դառնալով հեթ-տրիկի հեղինակ։ Հյուրերի կազմում դուբլ գրանցեց Սալեմ Ալ-Դաուսարին, մեկ անգամ էլ աչքի ընկավ Մալկոմը։

Այս հաղթանակից հետո Ֆիլիպո Ինձագիի գլխավորած թիմը վաստակած միավորների քանակը հասցրեց 50-ի՝ շարունակելով գլխավորել մրցաշարային աղյուսակը։ «Ալ-Օխդուդը» 10 միավորով նախավերջինն է։

Մրցաշարային աղյուսակն այս պահին

Transfermarkt վիճակագրական պորտալը հրապարակել է ձմեռային տրանսֆերային պատուհանի վերջին օրը կայացած ամենաթանկ տեղափոխությունների ցանկը։

Վարկանիշային աղյուսակը գլխավորել է նորվեգացի հարձակվող Յորգեն Ստրանդ Լարսենը, որի տեղափոխությունը «Վուլվերհեմփթոնից» «Քրիստալ Փելաս» գնահատվել է 49,7 միլիոն եվրո։

Ամենաթանկ գործարքների եռյակում ընդգրկվել են նաև նիգերիացի ֆուտբոլիստները․ Ադեմոլա Լուկմանը, որը 35 միլիոն եվրոյի դիմաց «Ատալանտայից» տեղափոխվել է Մադրիդի «Ատլետիկո», և նրա հայրենակից Ջորջ Իլենիկենան, ում տրանսֆերը «Մոնակոյից» «Ալ-Իթիհադ» արժեցել է 33 միլիոն եվրո։

Հիշեցնենք, որ առաջնությունների մեծ մասում տրանսֆերային պատուհանը փակվել է երկուշաբթի՝ փետրվարի 2-ին։

2025/2026 ձմեռային տրանսֆերային պատուհանի ամենաթանկ գործարքների տասնյակը՝ ըստ Transfermarkt-ի.

1. Յորգեն Ստրանդ Լարսեն («Վուլվերհեմփթոն» → «Քրիստալ Փելաս») — 49,7 միլիոն
2. Ադեմոլա Լուկման («Ատալանտա» → «Ատլետիկո Մադրիդ») — 35 միլիոն
3. Ջորջ Իլենիկենա («Մոնակո» → «Ալ-Իթիհադ») — 33 միլիոն
4. Կարիմ Բենզեմա («Ալ-Իթիհադ» → «Ալ-Հիլալ») — 25 միլիոն
5. Սիմոն Բուաբրե («Նեոմ» → «Ալ-Հիլալ») — 23 միլիոն
6. Նիլսոն Անգուլո («Անդերլեխտ» → «Սանդերլենդ») — 17,34 միլիոն
7. Ռոդրիգո Մենդոսա («Էլչե» → «Ատլետիկո Մադրիդ») — 16 միլիոն
8. Ռուդի Մատոնդո («Օսեր» → «Փարիզ») — 15 միլիոն
9. Ադրիան Լահդո («Համարբյու» → «Կոմո») — 11,94 միլիոն
10. Իսմայել Կոնե («Մարսել» → «Սասուոլո») — 10 միլիոն

Սաուդյան Արաբիայի ֆուտբոլային առաջնությունում հերթական աղմկահարույց իրավիճակն է ձևավորվում։ Ֆրանսիացի կիսապաշտպան Նգոլո Կանտեն հրաժարվել է մասնակցել «Ալ-Իթիհադի» մարզումներին՝ բողոքելով իր տրանսֆերի ձախողումից։

Ինչպես հայտնում է ինսայդեր Բեն Ջեյքոբսը, 34-ամյա ֆուտբոլիստը մոտ էր տեղափոխվել թուրքական «Ֆեներբահչե», սակայն գործարքը տապալվել է «Ալ-Իթիհադի» ղեկավարության թույլ տված կոպիտ սխալների պատճառով։ Փաստաթղթային անփութությունը հանգեցրել է նրան, որ Սաուդյան Արաբիայում տրանսֆերային պատուհանը փակվել է՝ անհնարին դարձնելով Կանտեի փոխանակումը «Ֆեներբահչեի» հարձակվող Յուսեֆ էն-Նեսիրիի հետ։

Չնայած Թուրքիայում տրանսֆերային հայտերի ընդունումը դեռ շարունակվում է մինչև փետրվարի 6-ը, սաուդյան ակումբն արդեն չի կարող նոր խաղացող գրանցել, ինչն էլ դարձել է տրանսֆերը կասեցնելու հիմնական պատճառը։ Կանտեն, որն այս մրցաշրջանում մասնակցել է 26 հանդիպման, խորը հիասթափություն է ապրում և մտադիր չէ հրաժարվել բոյկոտի իր որոշումից։

Այս իրավիճակը ևս մեկ անգամ փաստում է սաուդական ֆուտբոլում, առավելապես «Ալ-Իթիհադի» ներսում, տիրող կազմակերպչական քաոսը, որն ավելի վաղ հանգեցրել էր Կարիմ Բենզեմայի դժգոհությանը և նրա տեղափոխությանը «Ալ-Հիլալ»։

Հիշեցնենք, որ «Ալ-Նասրի» և Պորտուգալիայի հավաքականի հարձակվող Կրիշտիանու Ռոնալդուն ևս հրաժարվում է մասնակցել մարզումներին և խաղերին՝ քննադատելով երկրի պետական ներդրումային հիմնադրամի (PIF) կողմից ակումբների զարգացման համար ներդրվող անհամաչափ ջանքերը։

«Ոսկե գնդակի» դափնեկիր Կարիմ Բենզեման սաուդյան «Ալ-Իթիհադից» տեղափոխվել է «Ալ-Հիլալ»: Այս մասին սոցիալական ցանցերում հայտնել է «Ալ-Հիլալի» մամուլի ծառայությունը:

Ինչպես հաղորդում է L’Equipe-ը, 38-ամյա ֆրանսիացին որոշում է կայացրել լքել «Ալ-Իթիհադը»՝ առաջարկված նոր պայմանագրի հետ անհամաձայնության պատճառով: «Ալ-Հիլալը» Բենզեմայի հետ պայմանագիր է կնքել մինչև 2027 թվականի հունիսի 30-ը:

Հիշեցնենք, որ Բենզեման «Ալ-Իթիհադում» հանդես էր գալիս 2023 թվականից: Ջիդան ներկայացնող ակումբի կազմում նա դարձել է Սաուդյան Արաբիայի 2024/25 մրցաշրջանի չեմպիոն: