Հեղինակավոր Forbes ամսագիրը հրապարակել է 2026 թվականի աշխարհի ամենաբարձր վարձատրվող մարզիկների ամենամյա վարկանիշային աղյուսակը, որը գլխավորել է «Ալ Նասրի» և Պորտուգալիայի հավաքականի հարձակվող Կրիշտիանու Ռոնալդուն։ «Ոսկե գնդակի» հնգակի դափնեկիրն արդեն չորրորդ տարին անընդմեջ պահպանում է առաջատարի դիրքը։

Ռեյտինգը կազմվել է՝ հաշվի առնելով ինչպես մարզիկների մրցելույթներից ստացված եկամուտները (աշխատավարձ, բոնուսներ, մրցանակային հիմնադրամներ), այնպես էլ սպորտից դուրս կնքված գովազդային և հովանավորչական պայմանագրերը։

41-ամյա Ռոնալդուի ընդհանուր տարեկան եկամուտը կազմել է ֆանտաստիկ 300 միլիոն դոլար, որից 235 միլիոնը նա վաստակել է խաղադաշտում, իսկ 65 միլիոնը՝ դրա սահմաններից դուրս։

Երկրորդ հորիզոնականը զբաղեցրել է մեքսիկացի անվանի բռնցքամարտիկ Սաուլ «Կանելո» Ալվարեսը (170 մլն դոլար), իսկ լավագույն եռյակը եզրափակել է ամերիկյան «Ինտեր Մայամիի» հարձակվող Լիոնել Մեսսին, ում տարեկան եկամուտը գնահատվել է 140 միլիոն դոլար։

Ստորև ներկայացնում ենք Forbes-ի վարկածով 2026 թվականի ամենաբարձր վարձատրվող մարզիկների լավագույն տասնյակը (միլիոն դոլար).

• Կրիշտիանու Ռոնալդու (Պորտուգալիա, ֆուտբոլ) – 300 (235 սպորտում + 65 սպորտից դուրս)
• Սաուլ Ալվարես (Մեքսիկա, բռնցքամարտ) – 170 (160 + 10)
• Լիոնել Մեսսի (Արգենտինա, ֆուտբոլ) – 140 (70 + 70)
• Լեբրոն Ջեյմս (ԱՄՆ, բասկետբոլ) – 137.8 (52.8 + 85)
• Սյոհեյ Օտանի (Ճապոնիա, բեյսբոլ) – 127.6 (2.6 + 125)
• Ստեֆեն Քարի (ԱՄՆ, բասկետբոլ) – 124.7 (59.7 + 65)
• Ջոն Ռամ (Իսպանիա, գոլֆ) – 107 (97 + 10)
• Կարիմ Բենզեմա (Ֆրանսիա, ֆուտբոլ) – 104 (100 + 4)
• Քևին Դյուրանտ (ԱՄՆ, բասկետբոլ) – 103.8 (54.8 + 49)
• Լյուիս Հեմիլթոն (Մեծ Բրիտանիա, Ֆորմուլա-1) – 100 (70 + 30)

Անգլիական հեղինակավոր BBC պարբերականը կազմել և հրապարակել է 21-րդ դարի 10 լավագույն կենտրոնական հարձակվողների ցանկը։

​Վարկանիշային աղյուսակը գլխավորում է Բրազիլիայի ազգային հավաքականի լեգենդար նախկին հարձակվող Ռոնալդո Նազարիոն։

​Լավագույն տասնյակն ունի հետևյալ տեսքը․

1. Ռոնալդո (ավարտել է կարիերան)
2. ​Հարի Քեյն («Բավարիա»)
3. ​Էրլինգ Հալանդ («Մանչեսթեր Սիթի»)
4.  ​Թիերի Անրի (ավարտել է կարիերան)
5.  ​Ռոբերտ Լևանդովսկի («Բարսելոնա»)
6.  ​Դիդիե Դրոգբա (ավարտել է կարիերան)
7.  ​Կարիմ Բենզեմա («Ալ-Հիլալ»)
8.  ​Զլատան Իբրահիմովիչ (ավարտել է կարիերան)
9.  ​Լուիս Սուարես («Ինտեր Մայամի»)
10. ​Միրոսլավ Կլոզե (ավարտել է կարիերան)

Սաուդյան Արաբիայի Պրո լիգայի 20-րդ տուրում առաջատար «Ալ-Հիլալը», հյուրընկալվելիս, ջախջախեց «Ալ-Օխդուդին» (6-0)։

Հանդիպման գլխավոր հերոսը դարձավ թիմի աստղային նորեկ Կարիմ Բենզեման՝ առաջին իսկ խաղում դառնալով հեթ-տրիկի հեղինակ։ Հյուրերի կազմում դուբլ գրանցեց Սալեմ Ալ-Դաուսարին, մեկ անգամ էլ աչքի ընկավ Մալկոմը։

Այս հաղթանակից հետո Ֆիլիպո Ինձագիի գլխավորած թիմը վաստակած միավորների քանակը հասցրեց 50-ի՝ շարունակելով գլխավորել մրցաշարային աղյուսակը։ «Ալ-Օխդուդը» 10 միավորով նախավերջինն է։

Մրցաշարային աղյուսակն այս պահին

Transfermarkt վիճակագրական պորտալը հրապարակել է ձմեռային տրանսֆերային պատուհանի վերջին օրը կայացած ամենաթանկ տեղափոխությունների ցանկը։

Վարկանիշային աղյուսակը գլխավորել է նորվեգացի հարձակվող Յորգեն Ստրանդ Լարսենը, որի տեղափոխությունը «Վուլվերհեմփթոնից» «Քրիստալ Փելաս» գնահատվել է 49,7 միլիոն եվրո։

Ամենաթանկ գործարքների եռյակում ընդգրկվել են նաև նիգերիացի ֆուտբոլիստները․ Ադեմոլա Լուկմանը, որը 35 միլիոն եվրոյի դիմաց «Ատալանտայից» տեղափոխվել է Մադրիդի «Ատլետիկո», և նրա հայրենակից Ջորջ Իլենիկենան, ում տրանսֆերը «Մոնակոյից» «Ալ-Իթիհադ» արժեցել է 33 միլիոն եվրո։

Հիշեցնենք, որ առաջնությունների մեծ մասում տրանսֆերային պատուհանը փակվել է երկուշաբթի՝ փետրվարի 2-ին։

2025/2026 ձմեռային տրանսֆերային պատուհանի ամենաթանկ գործարքների տասնյակը՝ ըստ Transfermarkt-ի.

1. Յորգեն Ստրանդ Լարսեն («Վուլվերհեմփթոն» → «Քրիստալ Փելաս») — 49,7 միլիոն
2. Ադեմոլա Լուկման («Ատալանտա» → «Ատլետիկո Մադրիդ») — 35 միլիոն
3. Ջորջ Իլենիկենա («Մոնակո» → «Ալ-Իթիհադ») — 33 միլիոն
4. Կարիմ Բենզեմա («Ալ-Իթիհադ» → «Ալ-Հիլալ») — 25 միլիոն
5. Սիմոն Բուաբրե («Նեոմ» → «Ալ-Հիլալ») — 23 միլիոն
6. Նիլսոն Անգուլո («Անդերլեխտ» → «Սանդերլենդ») — 17,34 միլիոն
7. Ռոդրիգո Մենդոսա («Էլչե» → «Ատլետիկո Մադրիդ») — 16 միլիոն
8. Ռուդի Մատոնդո («Օսեր» → «Փարիզ») — 15 միլիոն
9. Ադրիան Լահդո («Համարբյու» → «Կոմո») — 11,94 միլիոն
10. Իսմայել Կոնե («Մարսել» → «Սասուոլո») — 10 միլիոն

Սաուդյան Արաբիայի ֆուտբոլային առաջնությունում հերթական աղմկահարույց իրավիճակն է ձևավորվում։ Ֆրանսիացի կիսապաշտպան Նգոլո Կանտեն հրաժարվել է մասնակցել «Ալ-Իթիհադի» մարզումներին՝ բողոքելով իր տրանսֆերի ձախողումից։

Ինչպես հայտնում է ինսայդեր Բեն Ջեյքոբսը, 34-ամյա ֆուտբոլիստը մոտ էր տեղափոխվել թուրքական «Ֆեներբահչե», սակայն գործարքը տապալվել է «Ալ-Իթիհադի» ղեկավարության թույլ տված կոպիտ սխալների պատճառով։ Փաստաթղթային անփութությունը հանգեցրել է նրան, որ Սաուդյան Արաբիայում տրանսֆերային պատուհանը փակվել է՝ անհնարին դարձնելով Կանտեի փոխանակումը «Ֆեներբահչեի» հարձակվող Յուսեֆ էն-Նեսիրիի հետ։

Չնայած Թուրքիայում տրանսֆերային հայտերի ընդունումը դեռ շարունակվում է մինչև փետրվարի 6-ը, սաուդյան ակումբն արդեն չի կարող նոր խաղացող գրանցել, ինչն էլ դարձել է տրանսֆերը կասեցնելու հիմնական պատճառը։ Կանտեն, որն այս մրցաշրջանում մասնակցել է 26 հանդիպման, խորը հիասթափություն է ապրում և մտադիր չէ հրաժարվել բոյկոտի իր որոշումից։

Այս իրավիճակը ևս մեկ անգամ փաստում է սաուդական ֆուտբոլում, առավելապես «Ալ-Իթիհադի» ներսում, տիրող կազմակերպչական քաոսը, որն ավելի վաղ հանգեցրել էր Կարիմ Բենզեմայի դժգոհությանը և նրա տեղափոխությանը «Ալ-Հիլալ»։

Հիշեցնենք, որ «Ալ-Նասրի» և Պորտուգալիայի հավաքականի հարձակվող Կրիշտիանու Ռոնալդուն ևս հրաժարվում է մասնակցել մարզումներին և խաղերին՝ քննադատելով երկրի պետական ներդրումային հիմնադրամի (PIF) կողմից ակումբների զարգացման համար ներդրվող անհամաչափ ջանքերը։

«Ոսկե գնդակի» դափնեկիր Կարիմ Բենզեման սաուդյան «Ալ-Իթիհադից» տեղափոխվել է «Ալ-Հիլալ»: Այս մասին սոցիալական ցանցերում հայտնել է «Ալ-Հիլալի» մամուլի ծառայությունը:

Ինչպես հաղորդում է L’Equipe-ը, 38-ամյա ֆրանսիացին որոշում է կայացրել լքել «Ալ-Իթիհադը»՝ առաջարկված նոր պայմանագրի հետ անհամաձայնության պատճառով: «Ալ-Հիլալը» Բենզեմայի հետ պայմանագիր է կնքել մինչև 2027 թվականի հունիսի 30-ը:

Հիշեցնենք, որ Բենզեման «Ալ-Իթիհադում» հանդես էր գալիս 2023 թվականից: Ջիդան ներկայացնող ակումբի կազմում նա դարձել է Սաուդյան Արաբիայի 2024/25 մրցաշրջանի չեմպիոն:

Ինսայդերական նոր տեղեկությունների համաձայն՝ Սաուդյան Արաբիայի «Ալ-Հիլալը» պայմանագիր է կնքել ֆրանսիացի անվանի հարձակվող Կարիմ Բենզեմայի հետ։ Այս մասին հայտնում է հայտնի ինսայդեր Յագիզ Սաբունջուօղլուն՝ X սոցիալական ցանցի իր էջում։

Ըստ աղբյուրի՝ «Ոսկե գնդակի» նախկին դափնեկիրը նոր ակումբի հետ կնքել է մեկուկես տարվա պայմանագիր։

Ավելի վաղ լուրեր էին շրջանառվում, որ Բենզեման հրաժարվել էր մասնակցել «Ալ-Իթիհադի» հանդիպումներին՝ դժգոհ լինելով առաջարկվող նոր պայմանագրի կետերից։

Թեև ֆուտբոլիստը դիտարկում էր Եվրոպա վերադառնալու տարբերակը, սակայն սաուդյան նախագծի առաջարկն, ըստ ամենայնի, ավելի գրավիչ է գտնվել։

Մամուլում տեղեկություններ էին հայտնվել նաև, որ «Ալ-Նասրի» առաջատար Կրիշտիանու Ռոնալդուն դեմ է արտահայտվել Բենզեմայի տեղափոխությանը մրցակից թիմ, սակայն դա չի խոչընդոտել գործարքին։

Հիշեցնենք, որ Սաուդյան Արաբիայի Պետական ներդրումային հիմնադրամը (PIF) հանդիսանում է երկրի առաջատար չորս ակումբների՝ «Ալ-Նասրի», «Ալ-Իթիհադի», «Ալ-Հիլալի» և «Ալ-Ահլիի» սեփականատերը, ինչն էլ հեշտացնում է աստղային ֆուտբոլիստների տեղաշարժը լիգայի ներսում։

«Ալ-Իթիհադի» ֆրանսիացի հարձակվող Կարիմ Բենզեման պետք է որոշում կայացնի իր ապագայի վերաբերյալ։ Ֆուտբոլիստը հստակորեն որոշել է լքել իր ներկայիս թիմը, սակայն, ամենայն հավանականությամբ, կշարունակի ելույթները Սաուդյան Արաբիայի առաջնությունում։

Foot Mercato-ի լրագրող Սանտի Աունայի տեղեկություններով՝ Բենզեման լրջորեն հետաքրքրված է «Ալ-Հիլալ» տեղափոխությամբ։ Չնայած ֆուտբոլիստի ցանկությանը, գործարքը դեռևս հեռու է ավարտին հասցվելուց։

Նշվում է, որ տրանսֆերի իրականացման համար անհրաժեշտ է Սաուդյան Արաբիայի ինքնիշխան հիմնադրամի (PIF) համաձայնությունը, որը դեռևս «կանաչ լույս» չի վառել 38-ամյա հարձակվողի տեղափոխության համար։

Եթե տեղափոխությունը կայանա, Բենզեման կմիանա առաջնության միանձնյա առաջատարին։ «Ալ-Հիլալը» ներկայումս գլխավորում է Սաուդյան Արաբիայի առաջնության մրցաշարային աղյուսակը՝ իր մոտակա հետապնդողներին՝ «Ալ-Նասրին» և «Ալ-Ահլիին», գերազանցելով երեք միավորով։

«Ալ-Իթիհադի» հարձակվող Կարիմ Բենզեման հնարավոր է կարիերան շարունակի թուրքական «Բեշիկթաշում»։ Այս մասին սոցիալական ցանցերում հայտնել է լրագրող և ինսայդեր Էքրեմ Կոնուրը։

Ըստ աղբյուրի տվյալների՝ կողմերի միջև առկա են հետևյալ մանրամասները.

Թուրքական ակումբը պատրաստ է «Ալ-Իթիհադին» վճարել 3 միլիոն եվրո՝ ֆուտբոլիստի պայմանագիրը խզելու դիմաց։

Ավելի վաղ հայտնի էր դարձել, որ Բենզեման որոշել է լքել սաուդյան ակումբը՝ նոր պայմանագրի առաջարկված կետերը համարելով «նվաստացուցիչ»։

Ընթացիկ մրցաշրջանում ֆրանսիացի հարձակվողն իր թիմի կազմում անցկացրել է 21 հանդիպում բոլոր մրցաշարերում և դարձել 16 գոլի հեղինակ։

Կարիմ Բենզեման խիստ դժգոհ է սաուդյան «Ալ-Իթիհադի» կողմից պայմանագրի երկարաձգման վերաբերյալ ստացած նոր առաջարկից։ Ակումբը ֆրանսիացի հարձակվողին առաջարկել է ֆինանսական պայմանների զգալի վատթարացում՝ գործող տարեկան 108 միլիոն դոլար աշխատավարձի համեմատ։

Հեղինակավոր L’Equipe պարբերականի փոխանցմամբ՝ Բենզեման այս առաջարկը որակել է որպես վիրավորանք և նվաստացուցիչ վերաբերմունք իր անձի նկատմամբ։

Լարված հարաբերությունների ֆոնին ֆրանսիացի աստղն արդեն իսկ բոյկոտել է թիմի վերջին հանդիպումը՝ հրաժարվելով դաշտ դուրս գալ «Ալ-Ֆատեհի» դեմ խաղում (2-2), ինչի պատճառով դուրս էր մնացել հայտացուցակից։ Ստեղծված իրավիճակը հանգեցնում է նրան, որ ամռանը 38-ամյա հարձակվողը, ամենայն հավանականությամբ, կլքի ակումբը՝ ազատ գործակալի կարգավիճակով։

Հիշեցնենք, որ Կարիմ Բենզեման, որը 2009-2023 թվականներին հանդես է եկել Մադրիդի «Ռեալում», 2022 թվականին արժանացել է ֆուտբոլային աշխարհի անհատական ամենահեղինակավոր մրցանակին՝ «Ոսկե գնդակին»։