Ռիո-2016-ի օլիմպիական չեմպիոն, աշխարհի եռակի ու Եվրոպայի քառակի չեմպիոն, հունահռոմեական ոճի ըմբիշ Արթուր Ալեքսանյանն այսօր Հռոմում կգոտեմարտի ԵԱ-ի 5-րդ չեմպիոնության համար:

97 կգ քաշայինների եզրափակչում Ալեքսանյանը երեկոյան կգոտեմարտի Իտալիայի ներկայացուցիչ Նիկոլոզ Կախելաշվիլիի հետ:

Գոտեմարտն ուղիղ հեռարձակմամբ կցուցադրի Առաջին ալիքը:

Հիշեցնենք` Ալեքսանյանը պայքարը սկսել էր 1/8 եզրափակչից, որտեղ 7:1 հաշվով առավելության էր հասել թուրք Ջենք Իլդեմի նկատմամբ: Քառորդ եզրափակչում Ալեքսանյանը 2 րոպեում 9-0 հաշվով հաղթել էր բուլղարացի Կիրիլ Միլենով Միլովին, որը 2018 թ-ի ԱԱ փոխչեմպիոնն է, իսկ արդեն կիսաեզրափակչում 8:1 հաշվով ջախջախեց ֆին Կուոսմանենին :

ALEKSANYAN (ARM) cruises into the semi finals with an 9-0 victory over MILOV (BUL) 🇦🇲 #uww #unitedworldwrestling #wrestling #olympicwrestling #wrestle #wrestler #koshti #کشتی #борьба pic.twitter.com/E9XHxAJpry

— United World Wrestling (@wrestling) February 11, 2020

Այսօր երեկոյան ոսկե մեդալի համար կպայքարի նաև Հայաստանի մեկ այլ ներկայացուցիչ` 60 կգ քաշային Գևորգ Ղարիբյանը: ԵԱ-ի եզրափակչում նրա մրցակիցը կլինի Թուրքիայի ներկայացուցիչ Քերեմ Քեմալը:

Ղարիբյանը տպավորիչ հաղթանակներով հասավ մինչև եզրափակիչ: Նա պայքարը սկսել էր 1/8 եզրափակչից, որտեղ 9:1 հաշով հաղթել էր Բուլղարիայի ներկայացուցիչ Ավգուստին Սպասովին:Քառորդ եզրափակչում Ղարիբյանը 8:0 հաշվով գեղեցիկ հաղթանակ էր տարել ադրբեջանցի Մուրադ Բազարովի նկատմամբ, իսկ կիսաեզրափակչում նույն` 8:0 հաշվով առավելության էր հասել Էստոնիայի ներկայացուցիչ Հելարի Մաեգիսալուին:

Հունահռոմեականների պայքարի վերջին օրը գորգ դուրս կգա Հայաստանի ևս մեկ ներկայացուցիչ` 67 կգ քաշային Կարեն Ասլանյանը: Նա կպայքարի բրոնզե մեդալի համար, իսկ մրցակցին կիմանա ավելի ուշ:

Հիշեցնենք` հունահռոմեական ոճի ըմբշամարտի Հայաստանի հավաքականի համար դեռևս միակ մեդալը նվաճել է 77 կգ քաշային Կարապետ Չալյանը`արժանանալով բրոնզե մեդալի:

Հռոմում ընթացող ըմբշամարտի Եվրոպայի առաջնությունում, Հայաստանի ներկայացուցիչ 67 կգ քաշային Կարեն Ասլանյանը պարտություն կրեց կիսաեզրափակիչ գոտեմարտում՝ պարտվելով Ռուսաստանի ներկայացուցիչ  Նազիր Աբդուլաևին:

Լարված գոտեմարտը ավարտվեց՝ 3:4 հաշվով:

Հիշեցնենք, որ Ասլանյանը 1/8 եզրափակչում ընդամենը 1 րոպեում՝ 9:0 հաշվով վստահ հաղթանակ տարավ Վրաստանի ներկայացուցիչ Գեորգի Շոտաձեի նկատմամբ

Այսպիսով, մեր մարզիկը վաղը կպայքարի բրոնզե մեդալի համար: Նրա մրցակցի անունը դեռ հայտնի չէ:

Հռոմում ընթացող Եվրոպայի առաջնությունում շարունակում է փայլել 67 կգ քաշային Կարեն Ասլանյանը:

Ասլանյանը 1/8 եզրափակչում 1 րոպեում 9:0 հաշվով վստահ հաղթանակ տարավ Վրաստանի ներկայացուցիչ Գեորգի Շոտաձեի նկատմամբ ու դուրս եկավ քառորդ եզրափակիչ: Քառորդ եզրափակչում հաղթանակը պակաս փառահեղ չէր՝ 10-1: Առաջին խաղափուլից հետո հաշիվը 2-1 էր՝ հօգուտ Ասլանյանի, իսկ երկրորդում Ասլանյանը գնաց գրոհի ու մի քանի գլորումով ժամանակից շուտ ավարտեց գոտեմարտը:

Եզրափակիչ դուրս գալու համար Ասլանյանը կգոտեմարտի Ռուսաստանի ներկայացուցիչ Նազիր Աբդուլաևի հետ: Գոտեմարտը կմեկնարկի երեկոյան:

Հռոմում ընթացող ըմբշամարտի Եվրոպայի առաջնության 1/8 եզրափակչում 67 կգ քաշային Կարեն Ասլանյանը 1 րոպեում 9:0 հաշվով վստահ հաղթանակ է տարել Վրաստանի ներկայացուցիչ Գեորգի Շոտաձեի նկատմամբ ու դուրս եկել քառորդ եզրափակիչ:

Ասլանյանը պայքարը սկսել էր որակավորման փուլից, որտեղ 3:1 հաշվով հաղթել էր շվեդ Օսկար Էրլանդսոնին:

Քառորդ եզրափակչում Ասլանյանի մրցակիցը կլինի Մատե Նեմեսը Սերբիայից:

Հռոմում ընթացող ըմբշամարտի Եվրոպայի առաջնությունում 67 կգ քաշային Կարեն Ասլանյանը պայքարը սկսել է որակավորման փուլից ու 3:1 հաշվով հաղթել է Շվեդիայի ներկայացուցիչ Օսկար Էլրանդսոնին:

Ասլանյանը դուրս եկավ 1/8 եզրափակիչ, որտեղ կմրցի Վրաստանի ներկայացուցիչ Գեորգի Շոթաձեի հետ:

Մեկնարկում ցավալի պարտություն է կրել 72 կգ քաշային Մալխաս Ամոյանը: Հայ ըմբիշը 1:5 հաշվով զիջել է Խորվաթիայի ներկայացուցիչ Դոմինիկ Էտլինգերը:

Հիշեցնենք` այսօր ավելի վաղ ԵԱ-ում հաղթանակով էր մեկնարկել նաև 60 կգ քաշային Գևորգ Ղարիբյանը:

Հռոմում ընթացող ըմբշամարտի Եվրոպայի առաջնությունում այսօր` փետրվարի 11-ին, պայքարի դուրս կգա Հայաստանի 5 ներկայացուցիչ:

60 կգ քաշային Գևորգ Ղարիբյանը պայքարը կսկսի որակավորման փուլից, որտեղ իր մրցակիցը կլինի Բուլղարիայի ներկայացուցիչ Ավգուստին Սպասովը:

67 կգ քաշային Կարեն Ասլանյանը ևս կսկսի որակավորման փուլից, որտեղ կգոտեմարտի շվեց Օսկար Էրլանդանի հետ:

72 կգ քաշային Մալխաս Ամոյանի մրցակիցը որակավորման փուլում կլինի Խորվաթիայի ներկայացուցիչը Դոմինիկ Էտլինգերը:

82 կգ քաշային Ռուբեն Ղարիբյանը ԵԱ-ում կմեկնարկի 1/8 եզրափակչից` գոտեմարտելով Իսրայելի ներկայացուցիչ Իգոր Պետրիշինի հետ:

97 կգ քաշային Արթուր Ալեքսանյանն էլ ԵԱ-ում պայքարը կսկսի 1/8 եզրափակչից. նրա մրցակիցը կլինի թուրք Ջենք Իլդեմը:

Հունահռոմեական ոճի ըմբշամարտի Հայաստանի հավաքականի գլխավոր մարզչի ժամանակավոր պաշտոնակատար Էդուարդ Սահակյանը և՛ գոհ և՛ դժգոհ է մեր ըմբիշների ելույթներից Նուր-Սուլթանում կայացած աշխարհի առաջնությունը: Հայաստանի հավաքականը 2 մեդալ նվաճեց ԱԱ-ում և Տոկիո-2020-ի 2 ուղեգիր ապահովեց:

«Ե՛վ գոհ ենք, և՛ դժգոհ:

Գոհ ենք, որ օլիմպիական 2 ուղեգիր ունեցանք, բայց մի քանի քաշային կարգերում տղաները կարող էին ավելի լավ մասնակցել, բայց ինչ-ինչ պատճառներով չստացվեց: Թույլ մրցակիցներ չկային, մրցավարության տեսանկյունից էլ դժգոհություններ ունենք, քանի որ 63 կգ քաշային կարգում մեր ըմբիշին կարող էինք եզրափակչում տեսնել, 55 կգ քաշային կարգում ևս մեզնից միավորներ խլեցին, 57 կգ քաշային կարգում դարձյալ մրցավարական սխալներ եղան:

Հույսեր էինք կապում Արթուր Շահինյանի, Մաքսիմ Մանուկյանի և Գևորգ Ղարիբյանի հետ, որոնք չարդարացվեցին»,- լրագրողների հետ զրույցում ասել է Էդուարդ Սահակյանը:

Հավաքականի մարզիչ Սամվել Գևորգյանն էլ նշել է, որ մրցավարության հետ կապված դժգոհություններից բացի, իրենց չի գոհացրել նաև վիճակահանությունը.

«Սա ամենաուժեղ աշխարհի առաջնությունն է վերջին 4 տարվա ընթացքում: Մասնակցում են ուժեղագույն ըմբիշները, որովհետև այն վարկանիշային է Օլիմպիական խաղերի համար: Կարող եմ ասել, որ շատ վատ էր վիճակահանությունը: Այն կարծես ստեղծված լիներ մի քանի երկրի համար: Այնպես էր ստացվել, որ Արթուր Ալեքսանյանը 5 գոտեմարտ անցկացրեց իր գլխավոր հակառակորդների հետ ու հասավ եզրափակիչ: Նույնը կարելի է ասել նաև 67, 60 կգ քաշային կարգերում, որոնք օլիմպիական քաշեր են:

Մրցավարությունը ևս ահավոր վատն էր: Մրցավարները ևս լարված էին, քանի որ իրենք էլ իրենց ստուգատեսն էին անցկացնում ու արդարացնելու դեպքում պետք է դառնան Օլիմպիական խաղերի մրցավարներ: 67 կգ քաշային կարգում Կարեն Ասլանյանի գոտեմարտում այնպիսի միավոր տվեցին, որ ընդհանրապես չհասկացանք՝ ինչու: Չգիտեմ մեդալի կհասներ թե ոչ, բայց վստահաբար ևս մեկ ուղեգիր կունենայինք:

Ինչ վերաբերում է Արթուր Ալեքսանյանին, նա այնպիսի մարզավիճակում էր, որ կարող էր ևս 5 մենամարտ անցկացնել ու չհոգնել, եթե վնասվածքը չլիներ», -ասել է Սամվել Գևորգյանն ու ևս մեկ անգամ ընդգծել, որ Արթուր Ալեքսանյանը ցանկանում էր վնասվածքով մասնակցել եզրափակիչ գոտեմարտին.

«Ամեն ինչ արեցինք, լավագույն մասնագետներ կային, գերմանացի բժիշկն էր զբաղվում, ինչքան ներարկեցին, միևնույն է ՝ ցավը կար: Կարող էր այդ պահին չզգալ, ու թոքերին վնաս լիներ: Մենք՝ մարզչական շտաբով ու ֆեդերացիայով, որոշեցինք, որ նա մեզ դեռ պետք է, չէինք կարող առողջության հետ խաղալ: Երկար զրուցեցինք Արթուրի հետ, համառորեն ցանկանում էր գոտեմարտել եզրափակչում: Առողջությունն ավելի կարևոր է: Այսօր պետք է հետազոտվի, ինչից հետո կհասկանանք, թե ինչպես պետք է բուժվի: Ամեն ինչ կանենք, որ  Օլիմպիական խաղերին պատրաստ լինի: Մի քանի ամիս պետք է անշարժ մնա»:

Էդուարդ Սահակյանը կարծիք է հայտնել նաև Սլավիկ Գալստյանի՝ Օլիմպիական քաշ տեղափոխվելու հավանականության մասին.

«Ամեն ինչ էլ հնարավոր է: Մենք ոչ մեկին չենք կարող արգելել: Բայց դեռ պետք է կարգավորել այդ հարցերը, քանի որ դա միայն Սլավիկին չի վերաբերում, քանի որ այլ ըմբիշներ էլ կլինեն, ովքեր գուցե քաշ փոխելու ցանկություն կունենան:

Մինչև Հայաստանի առաջնության մեկնարկը այդ հարցերին պատասխան կունենանք: Նոյեմբերի վերջ դեկտեմբերի սկիզբ կկազմակերպվի Հայաստանի առաջնությունը, որից հետո էլ կհստակեցվի հավաքականի կազմը ու կպլանավորվի մեր հետագա աշխատանքները: Ըմբիշներին հնարավորություն կտրվի ընտրելու, թե որ քաշային կարգում են իրենք ցանկանում հանդես գալ»,- ասել է հավաքականի գլխավոր մարզչի ժամանակավոր պաշտոնակատարը:

Հավաքականի մարզիչները խոսել են նաև 77 կգ քաշային կարգում Հայաստանը ներկայացրած Կարապետ Չալյանի մասին, որն ԱԱ-ում անմասն մնաց մեդալից, բայց Օլիմպիական ուղեգիր ապահովեց.

«Չալյանը նախքան մրցումները, հիվանդ էր, անգինա ուներ: Այդ վիճակում մասնակցեց ու տեսաք՝ ինչպիսի պայքարի մեջ մտավ: Ինքը պայքարող տղա է, ուղղակի տակտիկական սխալ ցույց տվեց ու զրկվեց մեդալից: Կարող էր ցանկացած գույնի մեդալ նվաճել: 38 աստիճան տաքությամբ էր մասնակցում կիսաեզրափակչին»:

Հավաքականի մարզիչները վստահություն են հայտնել նաև, որ հունահռոմեական ոճի Հայաստանի հավաքականը Տոկիո-2020-ին կմասնակցի առավելագույն 6 ուղեգրով: