Օգոստոսին Տոլյատիի «Ակրոնը» պայմանագիր կնքեց Հայաստանի ազգային հավաքականի կիսապաշտպան Կառլեն Հովհաննիսյանի հետ, որը դարձավ ակումբի ամենաթանկ տրանսֆերը ամառային պատուհանի ընթացքում։

21-ամյա ֆուտբոլիստը «Евро-Футбол.Ру» պարբերականին տված հարցազրույցում խոսել է ռուսական ակումբում ադապտացիայի, իր մեծ երազանքի, Էդուարդ Սպերցյանի հետ խաղալու և Հայաստանի հավաքականի մասին։

– Ինչպե՞ս է ընթանում ադապտացիադ «Ակրոնում»:

– Շատ լավ: Ծանոթացել եմ տղաների հետ, քայլ առ քայլ հարմարվել եմ թիմին: Ինձ շատ լավ ընդունեցին, բոլորի հետ ջերմ հարաբերությունների մեջ եմ:

– Տոլյատիում զբոսնելու հասցրե՞լ ես:

– Այո, շատ տեղերում եմ եղել, բայց դեռ ոչ ամենուր: Զբոսնել եմ Վոլգայի երկայնքով, տեսել եմ մի քանի խորհրդանշական վայրեր: Քաղաքը հանգիստ է ու հարմարավետ:

– Մինչև տրանսֆերն ի՞նչ գիտեիք ակումբի և քաղաքի մասին:

– Գիտեի միայն, որ Տոլյատին հանգիստ քաղաք է, ոչ ավելին։ Տեղում արդեն համոզվեցի, որ այն իսկապես շատ հաճելի վայր է:

– Մեկ տարի առաջ «Ակրոնում» խաղում էր Էդգար Սևիկյանը, նրանից առաջ՝ Արթուր Գալոյանը: Նրանց հետ խորհրդակցե՞լ ես:

– Անձամբ ոչ մեկի հետ չեմ խոսել: Լսել էի, որ ակումբում լավ կոլեկտիվ է, և տղաներն ամեն ինչից գոհ են, բայց կոնկրետ խորհրդի համար չեմ դիմել:

– Քո տրանսֆերն այս ամռանն ամենաթանկն էր «Ակրոնի» համար: Ի՞նչ զգացողություններ ունես՝ պատասխանատվությո՞ւն, թե՞ հպարտություն:

– Շատ հաճելի էր, որ «Ակրոնն» ինձ այդքան բարձր գնահատեց: Դա և՛ հպարտություն է, և՛ շատ մեծ պատասխանատվություն: Պետք է անեմ հնարավոր ամեն ինչ, որպեսզի արդարացնեմ այս տրանսֆերը:

– Գործակալդ պատմել է, որ ակումբների միջև բանակցությունները երկու ամիս են տևել: Ե՞րբ հասկացար, որ տեղափոխությունդ հաստատ կկայանա:

– Այն բանից հետո, երբ զրուցեցի գլխավոր մարզիչ Սրջան Բլագոևիչի և սպորտային տնօրեն Ալեքսեյ Բուրտովի հետ: Այդ ժամանակ հասկացա, որ արժե փորձել: Նրանք պատմեցին, թե ինչպիսի ֆուտբոլ են ուզում խաղալ, ինչ նպատակներ ունի թիմը և որ դերում են տեսնում ինձ: Դա ինձ շատ հետաքրքրեց:

– Այդ պահին «Ակրոնը» դեռ հաղթանակ չուներ ՌՊԼ-ում: Դա քեզ չէ՞ր վանում:

– Յուրաքանչյուր որոշում ունի իր դրական և բացասական կողմերը: Հասկանում էի, որ «Ակրոնի» արդյունքներն այնքան էլ լավը չեն, բայց ղեկավարության հետ զրույցից հետո պարզ դարձավ, որ անհաջողությունների շարքը ժամանակավոր է:

– Խոսվում էր նաև այն մասին, որ ակումբի հետ պայմանավորվածություն կա ապագայում քեզ ավելի բարձր գնով այլ թիմ վաճառելու մասին: Որտե՞ղ ես քեզ տեսնում երկու տարուց:

– Հիմա խաղում եմ «Ակրոնում» և չեմ ցանկանում այլ ակումբների մասին մտածել կամ ապագայի պլաններ կառուցել: Իհարկե, հիանալի կլինի, եթե կարողանամ այնպես դրսևորել ինձ, որպեսզի հետաքրքրեմ մեծ թիմերին ու առաջարկ ստանամ: Բայց այս պահին իմ բոլոր մտքերը կապված են միայն այս ակումբի հետ:

– Ներսից ինչպիսի՞ մարզիչ է Բլագոևիչը:

– Նա ունի իր հստակ փիլիսոփայությունն ու խաղային գաղափարները, որոնք հետևողականորեն իրագործում է խաղադաշտում: Ես դեռ նոր եմ ծանոթանում նրա մոտեցումներին, բայց առաջին տպավորությամբ տեսնում եմ, որ ուժեղ մասնագետ է և լավ մարդ:

– Ո՞րն է քո ֆուտբոլային երազանքը:

– Մանկուց երկրպագում եմ Լոնդոնի «Արսենալին» և մինչ օրս հետևում եմ նրանց խաղին: Իմ գլխավոր նպատակներից ու երազանքներից մեկը «զինագործների» կազմում խաղալն է: Կներդնեմ առավելագույն ջանքեր նման մակարդակի հասնելու համար:

– Որքանո՞վ է իրատեսական Ռուսաստանից նման քայլ անելը:

– Միանգամայն իրատեսական է: ՌՊԼ-ի առաջատար հնգյակը բավականին բարձր մակարդակի վրա է խաղում, և այնտեղից հաճախ են տրանսֆերներ լինում Եվրոպա:

– Քո դիրքում լուրջ մրցակցություն կա՝ Խոսոնով, Բիստրովիչ, Լոնչար և Մարադիշվիլի: Չէի՞ր վախենում ռիսկերից:

– Ես չեմ վախենում մրցակցությունից: Իմ դիրքում խաղացող բոլոր ֆուտբոլիստները շատ ուժեղ են և ինձանից փորձառու: Բայց հենց մրցակցությունն է ստիպում ֆուտբոլիստին առաջադիմել: Երբ տեսա, թե որքան ուժեղ մրցակիցներ կան թիմում, դա ինձ միայն ոգևորեց:

– Ինչո՞վ է ռուսական ֆուտբոլը տարբերվում հայկականից: Ի՞նչ է պետք ավելացնել՝ ՌՊԼ-ում կայուն խաղալու համար:

– Ավելացնել պետք է գրեթե ամեն օր՝ և՛ մարզումների ժամանակ, և՛ խաղերում: Առաջին բանը, որ աչքի է զարնում Ռուսաստանում, արագություններն են, բացի այդ՝ այստեղ ֆուտբոլն ավելի ուժային է։

– ԲԿՄԱ-ում և «Փյունիկում» դու խաղում էիր զույգ հենակետայինով, իսկ «Ակրոնում» սխեման մեկ հենակետայինով է: Որքանո՞վ է հարմար վերադասավորվելը:

– Պատրաստ եմ ցանկացած սխեմայի: Մեկ հենակետայինով խաղալու փորձ ունեցել եմ դեռևս Հայաստանի Մ-19 հավաքականում, ուստի ծանոթ եմ այդ դասավորությանը: Իսկ նոր դիրքերին ադապտացվում եմ մարզումների միջոցով:

– Կարծիք կա, որ հայ ֆուտբոլիստները մենթալիտետի և հոգեբանության հետ կապված խնդիրներ ունեն, բայց դու կարծես տարբերվում ես: Համաձա՞յն ես:

– Ես դա չեմ կարող հայկական ֆուտբոլի գլոբալ խնդիր համարել: Ամեն ոք յուրովի է հասնում իր նպատակին: Դա զուտ անհատական հարց է. մեկը կարող է ունենալ հոգեբանական բարդույթներ, մյուսը՝ ոչ:

– Դու «Փյունիկի» հետ պայքարում էիր եվրագավաթների համար, անցկացրիր որակավորման ողջ փուլն ու տեղափոխվեցիր մի առաջնություն, որտեղ եվրագավաթներ չկան: Ինչո՞ւ նման ընտրություն կատարեցիր:

– Եթե նայենք միայն եվրագավաթների առկայությանը, ապա, իհարկե, ավելի լավ է խաղալ այնտեղ, որտեղ դրանք կան: Բայց եթե համեմատենք ռուսական և հայկական ֆուտբոլը, ապա ՌՊԼ-ն օբյեկտիվորեն ավելի ուժեղ է՝ ոչ միայն թիմերի մակարդակով, այլև ընդհանուր առմամբ՝ ստադիոններ, մթնոլորտ, ենթակառուցվածքներ:

– Նախկինում նման մարզադաշտերում չէի՞ր խաղացել:

– Երիտասարդական հավաքականի կազմում խաղացել ենք Իտալիայում՝ Ջովանի Ձինիի մարզադաշտում, եղել է նաև հանդիպում «Դեբրեցենի» հետ: Բայց այնպիսի անշլագ, ինչպիսին «Կրասնոդարի» հետ խաղում էր, կարիերայումս առաջին անգամ տեսա: Դրանք բոլորովին այլ էմոցիաներ են:

– Ինչպե՞ս կգնահատես «Կրասնոդարի» մարզադաշտը:

– Իդեալական: Խոտածածկն անթերի էր, ամեն ինչ շատ գեղեցիկ էր կազմակերպված: Ինձ համար մեծ պատիվ էր այնտեղ խաղալը:

– «Ակրոնը» հավաքականների խաղերով պայմանավորված դադարից առաջ տարավ իր առաջին հաղթանակը ՌՊԼ-ում: Ինչո՞ւ էր մրցաշրջանի մեկնարկը այդքան ծանր:

– Այս հարցին դժվար թե կարողանամ պատասխանել, դա ավելի շատ մարզչական շտաբի տիրույթում է: Բայց շատ ուրախ եմ, որ կարողացանք հաղթել, և կրկնակի ուրախ եմ, որ հենց այդ խաղում խփեցի իմ առաջին գոլը թիմի կազմում:

– «Կրասնոդարից» կրած պարտությունից հետո ի՞նչ էր կատարվում հանդերձարանում: Մարզիչն ասում էր, որ տղաներից ոմանք արտասվել են:

– Չեմ բացահայտի թիմի «ներքին խոհանոցը», բայց տրամադրությունն իսկապես ծանր էր: Բոլորը տխուր էին, քանի որ զգում էինք՝ կարող էինք հաղթել:

– Քո հեռանալուց անմիջապես հետո «Փյունիկ» եկավ Դմիտրի Սելյուկը և աշխատանքից ազատեց գլխավոր մարզիչ Արտակ Օսեյանին: Զարմացա՞ր:

– Չէի ցանկանա մեկնաբանել այս թեման, քանի որ այն ինձ ուղղակիորեն չի վերաբերում:

– Աջակցեցի՞ր Օսեյանին նրա հեռանալուց հետո:

– Օսեյանը ոչ միայն լավ մարզիչ է, այլև իմ ավագ ընկերը, և այդպիսին էլ կմնա: Մենք միշտ կապի մեջ ենք եղել և կշարունակենք շփվել:

– Նա պատմել էր, որ տրանսֆերից առաջ դու նրա հետ զրուցել ես: Որքանո՞վ էր կարևոր նրա խորհուրդը:

– Ինձ համար շատ կարևոր էր: Մենք շատ հարցեր քննարկեցինք, տարբեր դրվագներ վերլուծեցինք: Որոշումը միայնակ չեմ կայացրել, և Օսեյանի կարծիքն ինձ համար մեծ կշիռ ուներ:

– Հայ ֆուտբոլիստներից էլ ո՞վ է պատրաստ հաջորդ մեծ քայլն անելուն:

– Իմ տրանսֆերից հետո Նարեկ Հովհաննիսյանն ու Արթուր Սերոբյանն արդեն արեցին այդ քայլը՝ տեղափոխվելով Լեհաստան: Ընդհանուր առմամբ, մենք շատ տղաներ ունենք, ովքեր ի զորու են խաղալ ՌՊԼ-ում և ուժեղ այլ լիգաներում:

– Առջևում Ազգերի լիգայի խաղերն են: Ի՞նչ սպասելիքներ ունես:

– Ուզում եմ առավելագույնս ներդնել ուժերս և անել ինձնից կախված ամեն ինչ, որպեսզի թիմը հնարավորինս լավ հանդես գա:

– Երբ Հայաստանի հավաքականը հաղթեց Ազգերի լիգայի իր խմբում, դու դեռ դեռահաս էիր: Պատրա՞ստ է ներկայիս հավաքականը կրկնել այդ հաջողությունը:

– Վստահ եմ՝ հավաքականի յուրաքանչյուր ֆուտբոլիստ ջանք չի խնայի դրա համար: Մենք բոլորս ցանկանում ենք հասնել այդպիսի արդյունքի և պատրաստ ենք շատ աշխատել հանուն դրա:

– Ղազախստանի և Մոլդովայի դեմ խաղերում դաշտի կենտրոնում խաղում էիր Էդուարդ Սպերցյանի հետ: Ի՞նչ նկատեցիր ավագի հետ խաղում:

– Սպերցյանն ամենաուժեղ ֆուտբոլիստներից մեկն է, որի հետ երբևէ խաղացել եմ: Նա շատ փորձառու է, խաղադաշտում անընդհատ հուշում էր, օգնում կողմնորոշվել դրվագներում: Նրա կողքին խաղալը մեծ արժեք ու լավ փորձ է ինձ համար:
– Որքանո՞վ էր տարբերվում Սպերցյանի և Թիկնիզյանի մակարդակը մարզումների ժամանակ:
– Երկուսն էլ խաղում են թոփ լիգաներում, և հավաքականի մակարդակում դա անմիջապես զգացվում է: Նրանք աչքի են ընկնում բարձր խաղային կարգապահությամբ, դրվագների հիանալի ընթերցմամբ: Նման ֆուտբոլիստների կողքին մարզվելն ու խաղալը հիանալի դպրոց է:
– Ինչո՞ւ Հայաստանի հավաքականը տևական ժամանակ չի կարողանում հաղթանակ տոնել:
– Մենք ամբողջ ուժերով նվիրվում ենք յուրաքանչյուր խաղի: Թե ինչու հաղթանակներ չկան՝ այս հարցին պարզ պատասխան չկա: Բայց մենք շարունակում ենք աշխատել՝ վերջապես ցանկալի արդյունքի հասնելու համար:

Հայաստանի հավաքականն իր հաջորդ հանդիպումը կանցկացնի աեպտեմբերի 28-ին՝ մրցելով Մոնտենեգրոյի հավաքականի հետ:

Ռուսաստանի Պրեմիեր լիգայի 9-րդ տուրում Տոլյատիի «Ակրոնը» «Սոլիդարնոստ Սամարա Արենա» մարզադաշտում 2։0 հաշվով հաղթել է Գրոզնիի «Ախմատին»։ Տանտերերի կազմում գոլերից մեկը հեղինակել է Կառլեն Հովհաննիսյանը, ում համար սա առաջին գոլն էր թիմի կազմում:

Խաղից հետո հայ կիսապաշտպանը խոսել է իր նորամուտի, ակումբում հարմարվելու և Հայաստանի հավաքականից ստացած հրավերի մասին։

— Կառլե՛ն, շնորհավորում ենք հաղթանակի կապակցությամբ։ Շատ տպավորիչ խաղ էր: Ինչպե՞ս կմեկնաբանես հանդիպման ելքը:

— Մենք հաղթեցինք: Դա ամենակարևորն է:

— Ինչպե՞ս կգնահատես փոխարինման դուրս գալդ և անդրանիկ գոլդ «Ակրոնի» կազմում:

— Կարծում եմ՝ խաղադաշտ մտնելս հաջող ստացվեց: Նաև գոլ խփեցի, նորմալ խաղացինք: Գլխավորն այն է, որ հաղթեցինք:

— Ըստ քեզ՝ հաջողվե՞ց թիմին հաղթահարել հոգեբանական բարդությունները, քանի որ երկար ժամանակ չէր ստացվում հաղթել:

— Մենք ընդհանրապես բարդություններ չենք ունեցել: Քայլ առ քայլ գնում էինք դեպի հաղթանակ: Ահա և արդյունքը:

— Ինչպե՞ս է ընթանում ադապտացիադ «Ակրոնում»:

— Լավ է ընթանում, արդեն ամեն ինչ նորմալ է: Գոլ էլ խփեցի, այնպես որ ամեն ինչ իր հունով է գնում:

— Ինչպե՞ս կգնահատես Տոլյատին. արդեն հասցրե՞լ ես շրջել քաղաքում:

— Այո, արդեն տեսել եմ: Լավ քաղաք է, լավ մարդիկ են ապրում:

— Որևէ մեկն անձամբ օգնո՞ւմ է քեզ հարմարվել նոր թիմին:

— Դե, բոլորն էլ օգնում են:

— Ի՞նչ ծրագրեր ունես հավաքականների խաղերով պայմանավորված դադարի համար:

— Ես հրավիրվել եմ ազգային ընտրանի, մեկնում եմ Հայաստանի հավաքականի ճամբար:

Հավելենք, որ «Ակրոնն» իր հաջորդ հանդիպումը կանցկացնի հոկտեմբերի 9-ին՝ ՌՊԼ 10-րդ տուրի շրջանակում հյուրընկալվելով «Ռոստովին»: Հանդիպումը կմեկնարկի 20:30-ին:

Ռուսաստանի Պրեմիեր լիգայի 9-րդ տուրի շրջանակում «Ակրոնը» սեփական հարկի տակ ընդունեց «Ախմատին» և հաղթեց 2-0 հաշվով։

Հայաստանի հավաքականի ֆուտբոլիստ Կառլեն Հովհաննիսյանը տանտերերի կազմում փոխարինման դուրս եկավ 70-րդ րոպեին, իսկ 87-րդ րոպեին խփեց իր թիմի երկրորդ գոլը։

Գոլը՝ ԱՅՍՏԵՂ։

Այս գոլն առաջինն էր Կառլենի համար ՌՊԼ-ում։

Այս խաղից հետո «Ակրոնը» ութ միավորով 13-րդ տեղում է Ռուսաստանի Պրեմիեր լիգայի մրցաշարային աղյուսակում։

Հայ ֆուտբոլիստն արդեն երեք հանդիպում է անցկացրել Տոլյատին ներկայացնող թիի կազմում, մեկ հանդիպում էլ անցկացրել է Գավաթի շրջանակում։

Հայաստանի ազգային հավաքականի 21-ամյա կիսապաշտպան Կառլեն Հովհաննիսյանն իր առաջին պաշտոնական հանդիպումն անցկացրեց ռուսական «Ակրոնի» կազմում։ Ռուսաստանի գավաթի խաղարկության շրջանակում Տոլյատին ներկայացնող ակումբը մրցում էր Մոսկվայի «Լոկոմոտիվի» հետ։

Հայ ֆուտբոլիստը փոխարինման մտավ երկրորդ խաղակեսում՝ խաղադաշտ դուրս գալով 69-րդ րոպեին։ Հանդիպման հիմնական ժամանակն ավարտվեց գոլազուրկ ոչ-ոքիով՝ 0-0 հաշվով։ Հաղթողին պարզելու համար թիմերն իրացրեցին հետխաղյա 11 մետրանոց հարվածաշար, որտեղ «Ակրոնն» առավելության հասավ 5-4 հաշվով։ Հատկանշական է, որ Տոլյատիի թիմի չորրորդ հարվածը վստահորեն իրացրեց հենց Հովհաննիսյանը՝ անմիջական մասնակցություն ունենալով իր նոր թիմի հաղթանակի գործում։

«Ակրոնն» իր հաջորդ հանդիպումը կանցկացնի Ռուսաստանի Պրեմիեր լիգայի շրջանակում՝ սեպտեմբերի 6-ին ուժերը չափելով «Օրենբուրգի» հետ։

Հիշեցնենք, որ հենց այսօր՝ սեպտեմբերի 1-ին «Ակրոնն» ու Երևանի «Փյունիկը» պաշտոնապես հաստատեցին կենտրոնական կիսապաշտպանի տրանսֆերը։ Ռուսական ակումբը երիտասարդ ֆուտբոլիստի տեղափոխության համար վճարել է 70 միլիոն ռուբլի՝ նրա հետ կնքելով հինգ տարվա պայմանագիր, որը նախատեսված է մինչև 2031 թվականի ամառը։

Տոլյատիի «Ակրոնն» ու Երևանի «Փյունիկը» համաձայնության են եկել կենտրոնական կիսապաշտպան Կառլեն Հովհաննիսյանի տրանսֆերի շուրջ։

21-ամյա ֆուտբոլիստի հետ ռուսական ակումբը կնքել է հինգ տարվա պայմանագիր:

Հովհաննիսյանը «Փյունիկի» սան է, որի գլխավոր թիմի կազմում անցկացրել է 38 հանդիպում՝ դառնալով 2 գոլի և 1 գոլային փոխանցման հեղինակ։

Կիսապաշտպանն ունի նաև եվրագավաթային փորձ. նրա ակտիվում Կոնֆերենցիաների լիգայում անցկացրած 5 խաղ կա: Վարձավճարով հանդես գալով ԲԿՄԱ-ի կազմում՝ նա մասնակցել է 53 հանդիպման, խփել 4 գոլ և կատարել 1 ասիստ։ Հայաստանի ազգային հավաքականի կազմում երիտասարդ խաղացողն արդեն հասցրել է անցկացնել երեք հանդիպում:

«Մենք տևական ժամանակ աշխատում ենք տրանսֆերային շուկայում, և Կառլեն Հովհաննիսյանի հետ պայմանագրի կնքումը այդ քրտնաջան աշխատանքի տրամաբանական արդյունքն է։ Ուրախ ենք, որ նա միացավ մեզ և սպասում ենք արդյունավետ ու վառ խաղի»,- նշել է «Ակրոնի» գլխավոր տնօրեն Կոնստանտին Կլյուշևը։

Ակումբի սպորտային տնօրեն Ալեքսեյ Բուրտովոյն իր հերթին ընդգծել է հայ ֆուտբոլիստի խաղային որակները․

«Կառլենը Հայաստանի ամենատաղանդավոր ֆուտբոլիստներից է, ով չնայած երիտասարդ տարիքին, արդեն ազգային հավաքականի մեկնարկային կազմում է խաղում։ Նա արագաշարժ ու տեխնիկապես գրագետ կիսապաշտպան է, ով կարողանում է կառավարել թիմի խաղը դաշտի կենտրոնում։ Այս տրանսֆերը հիանալի տեղավորվում է մեր ակումբի ռազմավարության մեջ, որտեղ շեշտը դրվում է երիտասարդ տաղանդների վրա։ Կարևոր է նաև, որ ֆուտբոլիստն ազատ տիրապետում է ռուսերենին և լեգեոներ չի համարվում, ինչը մեզ լրացուցիչ հնարավորություններ կտա կազմի ընտրության հարցում»։

Նշվում է, որ Հովհաննիսյանն արդեն միացել է նոր թիմին։

Երևանի «Փյունիկի» և Հայաստանի ազգային հավաքականի 21-ամյա կիսապաշտպան Կառլեն Հովհաննիսյանը մոտ է Ռուսաստանի Պրեմիեր լիգա տեղափոխվելուն: Ռուս հայտնի ինսայդեր Իվան Կարպովի հաղորդմամբ՝ ֆուտբոլիստն արդեն Տոլյատիում է և այժմ բուժզննում է անցնում տեղի «Ակրոն» ակումբ տեղափոխությունն ավարտին հասցնելու նպատակով:

Ըստ աղբյուրի՝ տրանսֆերի դիմաց ռուսական ակումբը կվճարի 70 միլիոն ռուբլի: Կողմերը նախատեսում են կնքել երկարաժամկետ համաձայնագիր, որը նախատեսված կլինի մինչև 2031 թվականի ամառը: Հատկանշական է, որ Ռուսաստանի Պրեմիեր լիգայում և Ռուսաստանի գավաթի խաղարկությունում Հովհաննիսյանը լեգեոներ չի համարվի:

Հիշեցնենք, որ ավելի վաղ ռուսական մամուլում տեղեկություններ էին շրջանառվում առ այն, որ «Ակրոնը» վերջնական համաձայնության է եկել հայ ֆուտբոլիստի տեղափոխության շուրջ:

Ընթացիկ մրցաշրջանում 21-ամյա կիսապաշտպանը «Փյունիկի» կազմում բոլոր մրցաշարերում մասնակցել է 7 հանդիպման՝ իր ակտիվում գրանցելով 1 գոլ և 1 գոլային փոխանցում: Transfermarkt պորտալը Հովհաննիսյանի տրանսֆերային արժեքը գնահատում է 250 հազար եվրո։

Երևանի «Փյունիկի» 21-ամյա կիսապաշտպան Կառլեն Հովհաննիսյանը կարիերան կշարունակի Ռուսաստանի Պրեմիեր լիգայում։ Евро-Футбол.Ру-ի տեղեկություններով՝ Տոլյատիի «Ակրոնը» վերջնական համաձայնության է եկել հայ ֆուտբոլիստի տրանսֆերի շուրջ։

Աղբյուրի փոխանցմամբ՝ արդեն այսօր Հովհաննիսյանը կժամանի ռուսական ակումբի ճամբար՝ բուժզննում անցնելու և տեղափոխությունը պաշտոնապես ավարտին հասցնելու նպատակով։

21-ամյա կիսապաշտպանը «Փյունիկի» սան է և գլխավոր թիմի կազմում հանդես է գալիս 2022/23 մրցաշրջանից։ Ընթացիկ մրցաշրջանում նա երևանյան թիմի մարզաշապիկով բոլոր մրցաշարերում մասնակցել է 7 հանդիպման՝ իր հաշվին գրանցելով 1 գոլ և 1 գոլային փոխանցում։ Transfermarkt հեղինակավոր պորտալի տվյալներով՝ հայ ֆուտբոլիստի շուկայական արժեքը գնահատվում է 250 հազար եվրո։

Նշենք, որ Սրջան Բլագոևիչի գլխավորած «Ակրոնն» առայժմ դժվարությամբ է հարմարվում Ռուսաստանի բարձրագույն խմբի առաջնության տեմպին և անցկացրած մեկնարկային տուրերից հետո գտնվում է մրցաշարային աղյուսակի հետնապահների թվում։ Ակնկալվում է, որ հայ կիսապաշտպանի տրանսֆերը կօգնի թիմին ուժեղացնել կենտրոնական գոտին։

Ռուսական «Ակրոնը» լրջորեն հետաքրքրված է Երևանի «Փյունիկի» և Հայաստանի ազգային հավաքականի 21-ամյա կիսապաշտպան Կառլեն Հովհաննիսյանի ծառայություններով։ Այս մասին հայտնում է հայտնի ռուս ինսայդեր Կարպովը։

Ըստ աղբյուրի՝ Տոլյատին ներկայացնող ակումբը հայ ֆուտբոլիստի տրանսֆերի դիմաց «Փյունիկին» առաջարկել է 70 միլիոն ռուբլի (845 հազար դոլար), իսկ անձամբ խաղացողի հետ բանակցություններ են ընթանում 5 տարվա պայմանագիր կնքելու շուրջ։ Նշվում է, որ երևանյան ակումբը դեռևս վերջնական պատասխան չի տվել և ժամանակ է խնդրել մտածելու համար։ Զուգահեռաբար «Ակրոնը» դիտարկում է նաև այլ թեկնածուների տարբերակներ։

Կառլեն Հովհաննիսյանը «Փյունիկի» սան է և իր կարիերայի մեծ մասն անցկացրել է հարազատ ակումբում։ Երևանյան ակումբի համակարգի բոլոր թիմերի կազմում նա ընդհանուր առմամբ մասնակցել է 81 հանդիպման, հանդես է եկել Կոնֆերենցիաների լիգայում՝ դառնալով 6 գոլի և 3 արդյունավետ փոխանցման հեղինակ։

2023 թվականին կիսապաշտպանը տեղափոխվել է ԲԿՄԱ, որտեղ անցկացրել է իր պարտադիր զինվորական ծառայությունը։ Բանակային ակումբի կազմում 2 մրցաշրջանի ընթացքում նա անցկացրել է 53 խաղ՝ դառնալով 4 գոլի և 1 ասիստի հեղինակ։

2025 թվականի հունիսին Հովհաննիսյանը վերադարձել է «Փյունիկ», գրեթե անմիջապես ամրապնդվել հիմնական կազմում և շուտով հրավիրվել Հայաստանի ազգային հավաքական։ Գլխավոր թիմի մարզաշապիկով նա արդեն հասցրել է մասնակցել Բելառուսի, Ղազախստանի և Մոլդովայի ընտրանիների դեմ կայացած հանդիպումներին։

Մոսկվայի «Լոկոմոտիվն» ամառային տրանսֆերային պատուհանի ընթացքում դիտարկել է Երևանի «Փյունիկի» և Հայաստանի ազգային հավաքականի կիսապաշտպան Կառլեն Հովհաննիսյանին թիմ հրավիրելու տարբերակը:

Ինչպես հայտնում է «Евро-Футбол.Ру»-ն, մոսկովյան ակումբը 21-ամյա ֆուտբոլիստի տրանսֆերը գնելու նպատակով պաշտոնական հարցում է կատարել։ Այնուամենայնիվ, գործարքը ձախողվել է. «Փյունիկը» ցանկություն չի հայտնել վաճառել իր սանին ռուսական ակումբին։ Բացի այդ, ինքը՝ ֆուտբոլիստը, նույնպես պատրաստ չի եղել նման տեղափոխության։

Հիշեցնենք, որ ընթացիկ մրցաշրջանում անցկացրած 6 հանդիպումներում Կառլեն Հովհաննիսյանն արդեն հասցրել է դառնալ 1 գոլի և 1 արդյունավետ փոխանցման հեղինակ։ Նախորդ մրցաշրջանում նա «Փյունիկի» մարզաշապիկով մասնակցել էր 27 խաղի՝ աչքի ընկնելով 1 խփված գնդակով։

Հեղինակավոր Transfermarkt պորտալը Հայաստանի հավաքականի երիտասարդ կիսապաշտպանի տրանսֆերային արժեքը գնահատում է 250 հազար եվրո։

Հայաստանի ազգային հավաքականը Երևանում կայացած ընկերական խաղում 1:1 հաշվով մարտական ոչ-ոքի է գրանցել Ղազախստանի ընտրանու հետ։

Հանդիպման ավարտից հետո գրանցված արդյունքի, բաց թողած հնարավորությունների և առաջիկա անելիքների մասին իրենց մեկնաբանություններն են տվել ազգային թիմի պաշտպան Նաիր Թիկնիզյանն ու հավաքականի նորեկ, կիսապաշտպան Կառլեն Հովհաննիսյանը։

Հովհաննիսյանի համար սա առաջին հանդիպումն էր ազգային թիմի մեկնարկային կազմում։ Խոսելով իր նորամուտի և խաղի որակի մասին՝ կիսապաշտպանը նշել է.

«Առաջին անգամ էի խաղադաշտ դուրս գալիս մեկնարկային րոպեներից։ Ընդհանուր առմամբ, խաղը նորմալ կգնահատեմ, սակայն քանի որ չկարողացանք հաղթել, նշանակում է՝ ինչ-որ տեղ թերացել ենք և ոչ բոլոր առաջադրանքներն ենք կատարել։ Անշուշտ, մարզչական շտաբի հետ կվերլուծենք մեր դրական ու բացասական կողմերն ու կաշխատենք սխալների վրա։ Կարծում եմ՝ եզրափակիչ հատվածում մեզ պարզապես բախտը չժպտաց: Կանենք առավելագույնը հաջորդ հանդիպմանն ավելի լավ հանդես գալու համար»։

Անդրադառնալով գոլային պահերի իրացմանն ու երկրպագուների աջակցությանը՝ ավելի ինքնաքննադատական դիրքորոշում է հայտնել Նաիր Թիկնիզյանը.

«Շատ ցավալի է խաղն ավարտել առանց հաղթանակի։ Առանձնահատուկ ուզում եմ շնորհակալություն հայտնել այն երկրպագուներին, որոնք այսօր մարզադաշտում էին. նրանց աջակցությունն անգնահատելի է։ Հասկանում ենք, որ բարդ ժամանակներ են, բայց մարդիկ գալիս ու սատարում են մեզ։ Շատ կցանկանայինք խաղն ավարտել հաղթական էմոցիաներով, և անկախ արդյունքից՝ մենք մեր ողջ ուժերը թողեցինք դաշտում։ Այսօր մեր խաղում վառ ընդգծվեց պահերի իրացման խնդիրը. ես ինքս ունեի մի քանի նպաստավոր դրվագ, որոնք, հավանաբար, դեռ երազումս էլ կտեսնեմ։ Անպայման կարվեն համապատասխան հետևություններ: Հիմա անհամբերությամբ սպասում ենք Մոլդովայի դեմ խաղին։ Հուսով եմ՝ հաջորդ մրցավեճում կկարողանանք շտկել սխալներն ու շատ գոլեր հեղինակել»։

Հիշեցնենք, որ Եղիշե Մելիքյանի գլխավորած թիմն իր հաջորդ ընկերական հանդիպումը կանցկացնի օրեր անց՝ հունիսի 9-ին՝ Երևանում հյուրընկալելով Մոլդովայի ազգային հավաքականին: