Մադրիդի «Ատլետիկոն» պաշտոնապես հայտարարել է ՊՍԺ-ի և Հարավային Կորեայի հավաքականի կիսապաշտպան Լի Կան Ինի տեղափոխության մասին։

25-ամյա ֆուտբոլիստի հետ կնքվել է երկարաժամկետ պայմանագիր, որը նախատեսված է մինչև 2031 թվականի հունիսի 30-ը։

Իսպանական ԶԼՄ-ների տեղեկություններով՝ տրանսֆերի արժեքը կազմել է 35 միլիոն եվրո, ևս 5 միլիոն եվրո փարիզյան ակումբը կարող է ստանալ որպես բոնուս։ Հատկանշական է, որ հեղինակավոր Transfermarkt պորտալը ֆուտբոլիստի շուկայական արժեքը գնահատում է 28 միլիոն եվրո։

Լի Կան Ինը ՊՍԺ-ի գույները պաշտպանում էր 2023 թվականի ամառվանից։ Փարիզյան թիմի կազմում նա հասցրել է անցկացնել 124 հանդիպում բոլոր մրցաշարերում՝ դառնալով 16 գոլի և 16 գոլային փոխանցման հեղինակ։

Ֆրանսիայում անցկացրած տարիների ընթացքում նա գրանցել է տպավորիչ տիտղոսային շարք.

• Չեմպիոնների լիգայի գավաթակիր (2 անգամ)
• Ֆրանսիայի չեմպիոն (3 անգամ)
• Ֆրանսիայի գավաթակիր (2 անգամ)
• Ֆրանսիայի Սուպերգավաթակիր (2 անգամ)
• ՈւԵՖԱ-ի Սուպերգավաթակիր
• ՖԻՖԱ-ի Միջմայրցամաքային գավաթակիր

Կորեացի կիսապաշտպանի համար իսպանական ֆուտբոլը խորթ չէ։ Նա «Վալենսիայի» սան է, որի գլխավոր թիմում հանդես գալուց հետո տեղափոխվել էր «Մալյորկա»՝ հենց այնտեղից էլ համալրելով ՊՍԺ-ի շարքերը։

Ազգային հավաքականի կազմում Լի Կան Ինն անցկացրել է ընդհանուր առմամբ 50 հանդիպում և դարձել 11 գոլի հեղինակ։ Նա մասնակցել է նաև ԱԱ-2026-ին՝ անցկացնելով խմբային փուլի բոլոր երեք հանդիպումներն ու դառնալով մեկ գոլային փոխանցման հեղինակ։

Ինսայդեր Ֆաբրիցիո Ռոմանոն հաստատել է, որ հարավկորեացի վինգեր Լի Կան Ինը ՊՍԺ-ից կտեղափոխվի Մադրիդի «Ատլետիկո»։

«Ամեն ինչ որոշված է։ Գործարքը համաձայնեցված է բոլոր կողմերի միջև: Տրանսֆերի արժեքը կկազմի 40 միլիոն եվրո։ Կան Ինը վաղուց էր ցանկանում տեղափոխվել «Ատլետիկո», իսկ անձնական պայմանները համաձայնեցվել էին դեռ ամիսներ առաջ»,- տրանսֆերի մանրամասներն է պարզաբանել Ռոմանոն։

Կորեացի վինգերը վերջին երեք տարիներին հանդես էր գալիս ՊՍԺ-ի կազմում։ Նա իսպանական «Վալենսիայի» սան է, որտեղ էլ 2017 թվականին սկսել է իր պրոֆեսիոնալ կարիերան: 2021-ից 2023 թվականներին ֆուտբոլիստը պաշտպանել է իսպանական մեկ այլ ակումբի՝ «Մալյորկայի» գույները:

Փարիզյան ակումբի կազմում Կան Ինը երեք անգամ հռչակվել է Ֆրանսիայի չեմպիոն, երկու անգամ հաղթել Չեմպիոնների լիգայում և նվաճել ևս մի քանի տիտղոս:

Հավելենք, որ այս ամառ Լի Կան Ինը Հարավային Կորեայի ազգային հավաքականի կազմում մասնակցել է Հյուսիսային Ամերիկայում ընթցող աշխարհի 2026 թվականի առաջնությանը, սակայն ասիական թիմին չի հաջողվել դուրս գալ խմբից։

Հարավային Կորեայի հավաքականի և ՊՍԺ-ի կիսապաշտպան Լի Կան Ինը հնարավոր է տեղափոխվի ԱՊԼ։

Լոնդոնի «Արսենալը» հետաքրքրված է 23-ամյա ֆուտբոլիստի ծառայություններով, հայտնում է The Athletic-ը։

Անգլիական ակումբը դիտարկում է Լիին վարձակալելու տարբերակը։ Ամբողջական տրանսֆերը ձևակերպելու համար անհրաժեշտ կլինի վճարել 40 միլիոն ֆունտ։

Նա այս մրցաշրջանում ՊՍԺ-ի երրորդ ամենաարդյունավետ ֆուտբոլիստն է 6 գոլով՝ Բարկոլայից ու Դեմբելեից հետո։ Նա դարձել է նաև երկու գոլային փոխանցման հեղինակ։

ՊՍԺ-ն ցմահ որակազրկել է իր ֆան ակումբից երկրպագուին, որը թիմի հարավկորեացի ֆուտբոլիստ Լի Կան Ինին չինացի է անվանել, հայտնում է ֆրանսիական ակումբի մամուլի ծառայությունը։

Միջադեպը տեղի է ունեցել անցած կիրակի՝ հոկտեմբերի 27-ին «Մարսելի» դեմ խաղից առաջ ՊՍԺ-ի մարզման ժամանակ։ Snapchat-ում հրապարակված տեսանյութում երկրպագուներից մեկը ողջունում է ՊՍԺ-ի խաղացողներին, երբ նրանք մոտենում են իրեն: Երբ Լի Կան Ինը մոտեցավ նրան, նա բղավեց. «Առաջ, իմ չինացի»։

ՊՍԺ-ն չի հանդուրժում ռասիզմի որևէ դրսևորում. Լի Կանգ Ինի հետ միջադեպի մասնակից երկրպագուն ընդմիշտ հեռացվել է ֆան ակումբից և խաղից անմիջապես հետո ներողություն է խնդրել հարավկորեացուց։

«Նապոլին» ցանկանում է համալրել իր թիմի կազմն հայտնի ասիացի ֆուտբոլիստներով, որպեսզի մեծացնի ակումբի հեղինակությունն ասիական տարածաշրջանում:

Այդ մասին հայտնում են TriballFootball-ը և իտալական Tuttomercato-ն։

Ակումբի տրանսֆերային ցուցակում են ընդգրկվել ճապոնացի վինգերներ Տակեֆուսա Կուբոն («Ռեալ Սոսյեդադ») և Կաորու Միտոման («Բրայթոն»)։ Երկու ֆուտբոլիստների տրանսֆերների համար իտալական ակումբը պետք է վճարի ավելի քան 100 մլն եվրո։ Նշվում է, որ վերոնշյալ ֆուտբոլիստների տրանսֆերները Դե Լաուրենտիսի ակումբը կփորձի ձևակերպել, երբ առաջիկա տրանսֆերային պատուհանների ընթացքում բաժանվի թիմի ներկայիս ֆուտբոլիստներից մի քանիսից (օրինակ՝ Օսիմհենից)։

Այս ցուցակում է նաև ՊՍԺ-ի կիսապաշտպան Լի Կան Ինը, սակայն իտալական ակումբը հասկանում է, որ այս տրանսֆերը հեշտ չի լինի իրականացնել, քանի որ ֆրանսիական ակումբը չի պատրաստվում բաժանվել հարավկորեացի ֆուտբոլիստից։

Նշենք, որ «Նապոլիի» կազմում ժամանակին հանդես է եկել հարավկորեացի Կիմ Մին Ջեն, ով այժմ հանդես է գալիս «Բավարիայում»։

«Վալենսիայի» հարձակվողական ոճի կիսապաշտպան Լի Կան Ինը հնարավոր է կարիերան շարունակի «ՌԲ Զալցբուրգում»։ Այդ մասին հայտնում է Transfermarkt-ը:

Վերջերս ավստրիական ակումբի կորեացի ֆուտբոլիստ Հվանգ Հի Չանը տեղափոխվեց «ՌԲ Լայպցիգ» և «Զալցբուրգը» որպես նրան փոխարինող դիտարկում է «չղջիկների» կորեացի ֆուտբոլիստին։

Սակայն ավստրիկան ակումբին լուրջ մրցակցություն է սպասվում, քանի որ «Յուվենտուսը» և Դորտմունդի «Բորուսիան» ևս հավակնում են ֆուտբոլիստին։ Լի Կան Ինի պայմանագրում նշված է 80 մլն եվրո փոխհատուցման գումար, սակայն աղբյուրը հայտնում է, որ իսպանական ակումբը պատրաստ է վաճառել իր ֆուտբոլիստի տրանսֆերը 40 մլն եվրոյով։

Մեր՝ Ֆուտբոլային սկաուտ շարքի մասերից մեկում մենք արդեն անդրադարձել էիք 5 ճապոնացի ֆուտբոլիստների, ովքեր արժանի են առավելագույն ուշադրության: Մեր այսօրվա հերոսներին ընտրել ենք նույն տարածաշրջանի ֆուտբոլիստների դեսանտից՝ Հարավային Կորեայի ներկայացուցիչներին, ովքեր արդեն ելույթ են ունենում Եվրոպայում։

Հվան Յի Ջոու

🇰🇷 Հարավային Կորեա
27 տարեկան
«Բորդո»

«Բորդոն» վերջին տարիներին համարվում է Լիգա 1-ի «ամուր ընկույզներից» մեկը․ ակումբը կայուն զբաղեցնում է ամեն տարի միջին հորիզոնականներ, հաճախ էլ կրակում է՝ հայտնվելով եվրագավաթային գոտում, իսկ հազվադեպ էլ փորձում է նաև չեմիոնության համը (վերջին անգամ 2009-ին)։ Ֆրանսիայի 6-ակի չեմպիոնի կազմում ամեն տարի փայլում է նվազագույնը գոնե մեկ ֆուտբոլիստ, ինչպես մեր շարքի նախորդ մասերից մեկի հերոսը՝ Կունդեն, ով բավականին հաջող մրցաշրջան անցկացրեց նախորդ տարի և տեղափոխվեց «Սևիլյա»։

Հվան Յի Ջոուն ֆրանսիական ակումբ է տեղափոխվել այս մրցաշրջանում, և ընդհանրապես, սա նրա համար առաջին մրցաշրջանն է Եվրոպայում․․․ ու միանգամից, մերվելով ֆրանսիական լիգայի խաղաոճին, դարձավ ժիրոնդինացիների առաջատարներից մեկը։ Հարձակվողն ունի յուրահատուկ խաղաոճ, տիրապետում է բավականին ուժեղ հեռահար հարվածների և զգացվում է, որ ավելի բարձրակարգ թիմում նա կարող է հասնել մեծ նվաճումների։ Միգուցե հաջորդ մրցաշրջանում ուժերը փորձել Բունդեսլիգայո՞ւմ․․․

Կվոն Չան Հուն

🇰🇷 Հարավային Կորեա
25 տարեկան
«Ֆրայբուրգ»

Բունդեսլիգա․․․ Գերմանական ֆուտբոլային էլիտայում արևելաասիացի ֆուտբոլիստները բավականին հարմարավետ են իրենց զգում․ ճապոնացիների հաջող ելույթները դրա վկայությունն են։ Նույնն էլ վերաբերվում է նաև կորեացիներին․ չմոռանանք, որ ներկայիս ամենահայտնի կորեացի ֆուտբոլիստը՝ Սոն Հին Մինը, ևս մինչ ԱՊԼ տեղափոխվելը խաղում էր այս լիգայում։ Ինչ վերաբերվում է Կվոն Չան Հունին, ապա նա իր զգալի ներդրումն ունի «Ֆրայբուրգի» նման համեստ ակումբի բավականին լուրջ հաջողություններում։ Կիսապաշտպանը հիմնականում հանիդսանում է ռոտացիայի ֆուտբոլիստ․ դուրս է գալիս խաղադաշտ հիմնականում երկրորդ խաղակեսում և մրցակցի ֆուտբոլիստների հոգնածության ֆոնի վրա թարմություն մտցնում իր թիմի առջևի գծում։ Եվ դա նրա մոտ բավակին լավ է ստացվում։

Վու Յուն Չուն

🇰🇷 Հարավային Կորեա
20 տարեկան
«Բավարիա»

Կորեացի կիսապաշտպանը նախորդ մրցաշրջանում նույնիսկ հասցրել է մեկ հանդիպում անցկացնել գերմանական սուպերգրանդի կազմում, իսկ այս մրցաշրջանի առաջին հատվածը նա արդեն սկսեց Կվոնին մոտ․ երիտասարդ ֆուտբոլիստը վարձավճարով տեղափոխվեց «Ֆրայբուրգ», ակումբի երիտասարդական թիմում աչքի ընկավ երկու գոլով, իսկ ձմանը մյունխենցիները որոշեցին նրան վերադարձնել ետ՝ ավելի նպատակահարմար գտնելով, որ կորեացին արագ առաջընթաց կգրանցի «Բավարիայի» երկրորդ թիմում։ Չունը բավականին աշխատասեր ֆուտբոլիստ է, և այն փաստը, որ գերմանացիները չեն ցանկանում բաժանվել նրանից, խոսում է այն մասին, որ ֆուտբոլիստի հետ մյունխենյան գրանդում հույսեր են կապում։

Հի Չան Հվան

🇰🇷 Հարավային Կորեա
24 տարեկան
«ՌԲ Զալցբուրգ»

Հվան, Մինամինո, Հոլանդ․․․ Այդ եռյակը կազմում էր աշնանը ՉԼ-ում մեծ իրարանցում առաջացրած «ՌԲ Զալցբուրգի» հարվածային ուժը։ Մինամինոն և Հոլանդը արդեն մեծ ակումբներում են, իսկ Հվանը դեռևս շարունակում է հանդես գալ «ցլերի» կազմում, սակայն ոչ մեկի համար գաղտնիք չէ, որ ամենայն հավանականությաբ, առաջիկա տրանսֆերային պատուհանի ընթացքում մենք կտեսնենք Հարավային Կորեայի հավաքականի եզրային հարձակվողին առաջատար լիգաներից մեկում։ Արագավազ ու համառ բնավորությամբ ֆուտբոլիստը, ճիշտ թիմում ու ճիշտ մարզիչի գլխավորությամբ, կարող է շատ մեծ բարձունքների հասնել ֆուտբոլային Եվրոպայում։

Լի Կան Ին

🇰🇷 Հարավային Կորեա
19 տարեկան
«Վալենսիա»

Լի Կան Ին․․․ կամ պարզապես՝ Լի։ Մտապահեք այս անունը, քանզի շատ շուտով նրա անունը հաճախ կլսեք հեռուստատեսությամբ կամ կկարդաք մարզական նորություններում։ Լին «չղջիկների» կազմում լիովին տարբերվում է մնացած երիտասարդ ֆուտբոլիստներից։ Ֆերան Տորես, Գոմես, Գուեդեշ․․․ երիտասարդ տաղանդները շատ են իսպանական ակումբի կազմում, սակայն կորեացին տարբերվում է նրանցից․ լինելով ավելի երիտասարդ վերը նշված ֆուտբոլիստներից՝ Լին աչքի է ընկնում իսկական առաջատարի հատկանիշներով, ֆուտբոլային ինտելեկտով, չի վախենում իր վրա վերցնել խաղը, երբ ամբողջ թիմի խաղը չի ստացվում։ Փորձ․․․ այս ֆուտբոլիստին պակասում է միայն փորձը, չնայած վերջերս նա բավականին հաճախ էր ընդգրկվում թիմի մեկնարկային կազմում․ 11 խաղ, մեկ գոլ՝ վատ արդյունք չէ 19-ամյա երիտասարդի համար, այն էլ նման ուժեղ լիգայում։ Հիշո՞ւմ եք Ջի Սուն Պարկին ՄՅՈւ-ից, Լին ասես Պարկի և Սոն Հին Մինի միքսը լինի․ աշխատասեր, արագավազ, տեխնիկապես հիանալի պատրաստված։ Գումարենք վերը նշված հատկանիշները, և կարելի է հույս ունենալ, որ Հարավային Կորեան առաջիկա 10-12 տարին զուրկ չի լինի աստղային ֆուտբոլիստի առկայությունից համաշխարհային ֆուտբոլում։

Կանխատեսումներն, իհարկե, ոչ ցանկալի հաճախականությամբ և ոչ միշտ են իրականանում, սակայն այս դեպքում, Լին ունի ամեն ինչ՝ նվազագույնը Սոնի կամ Պարկի անցած ճանապարհը կրկնելու համար։ Պարզպես պետք է շարունակել աշխատել, ձգտել միմիայն առաջընթացի և նաև մի քիչ էլ ֆուտբոլայի ֆորտունան չի խանգարի։

Քեյ-փոփ (K-Pop)․․․ Քեյ-ռոք (K-Rock)՝ երաժշտական ուղղություններ, որը ծագել են Հարավային Կորեայում։ Ժանրեր, ուղղություններ, որոնք գրավել են ամբողջ աշխարհը, շատերը ճանաչում են Հարավային Կորեան Քեյ-փոփի շնորհիվ, շատերի համար BTS, BIGBANG, EXO, Girls’ Generation երաժշտական խմբերը, և նույնիսկ PSY-ը («Գանգնամ սթայլ») համարվում են կուռքեր։ Իսկ ֆուտբոլիստներից․․․ Միայն՝ Սո՞նը։ Միգուցե՞ մեր այսօրվա հերոսներից ոմանք մի օր ամբողջ աշխարհին կկարողանան հրամցնել Քեյ-Ֆուտբոլը․․․ ինչո՞ւ և ոչ․․․

Վար Բաբայան

Շարքի նախորդ մասերը

Երիտասարդ աղվեսների ոդիսականը շարունակվում է

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)

Սամուրայների նոր սերունդը Եվրոպայում

Բրազիլիայի առաջնության ամենահեռանկարային ֆուտբոլիստները (Մաս 2)

Բրազիլիայի առաջնության ամենահեռանկարային ֆուտբոլիստները (Մաս 1)

MLS-ի 7 ֆուտբոլիստներ, ովքեր կարող են փայլել Հին աշխարհում

Նոր անուններ Արգենտինայից