Հնդկաստանի Կալկաթա քաղաքում ապամոնտաժվել է «Ինտեր Մայամիի» և Արգենտինայի ազգային հավաքականի հարձակվող Լիոնել Մեսսիի 21-մետրանոց արձանը։ Սոցիալական ցանցերում արդեն լայն տարածում են գտել տեսանյութեր, թե ինչպես են հսկայական կառույցը հատուկ հարթակի վրա տեղափոխում դեպի պահեստարան։

Արձանը հեռացնելու որոշումը կայացվել է տեղի բնակիչների բազմաթիվ բողոքներից հետո։ Տեղացիները նկատել են, որ ուժեղ քամիների ժամանակ հսկա մոնումենտը սկսում է վտանգավոր կերպով տատանվել ու օրորվել՝ սպառնալիք ներկայացնելով անցորդների անվտանգությանը:

Այս հուշարձանը կանգնեցվել էր նախորդ տարվա դեկտեմբերին՝ արգենտինացի լեգենդար ֆուտբոլիստի՝ Հնդկաստան կատարած տուրնեի ընթացքում: Արձանի հավաքման աշխատանքների վրա աշխատել էր 45 հոգուց բաղկացած մասնագետների թիմ, որից պահանջվել էր 27 օր։

Հիշեցնենք, որ Լիոնել Մեսսին ընդգրկվել է Արգենտինայի ընտրանու վերջնական հայտացուցակում՝ մասնակցելու 2026 թվականի աշխարհի առաջնությանը։ Արգենտինացիները, որոնք այս մրցաշարում պաշտպանելու են գործող չեմպիոնի տիտղոսը, խմբային փուլում ուժերն են չափելու Ալժիրի, Ավստրիայի և Հորդանանի հավաքականների հետ։

Իտալիայի ազգային հավաքականի և Մադրիդի «Ռեալի» նախկին հարձակվող Անտոնիո Կասանոն Viva el Futbol շոուի եթերում աղմկահարույց և ինքնավստահ հայտարարություններ է արել՝ համեմատելով իրեն ֆուտբոլային լեգենդների և ժամանակակից աստղերի հետ։

Կասանոն առանձնացրել է այն ֆուտբոլիստներին, որոնց մակարդակին, իր իսկ խոստովանությամբ, երբեք չի կարողացել հասնել.

«Ինիեստան գերազանցում է ինձ. նա ֆուտբոլի պատմության ամենաուժեղ կիսապաշտպանն է, որին երբևէ տեսել եմ։ Նույնը վերաբերում է Ռոնալդինյոյին, որը 5-6 տարի խաղաց այնպիսի մակարդակով, որին ես չէի ձգում։ Ռոմարիոն ինձանից ուժեղ էր, ինչպես և Ֆենոմեն Ռոնալդոն, Նեյմարը և, իհարկե, Մեսսին։ Ես նույնիսկ երեք կյանքի դեպքում չէի կարողանա մոտենալ Լիոնելին։ Նա միակ խաղացողն է, ում տեղը կցանկանայի ծնված լինել։ Միակ բանը, որ մեզ միավորում է, այն է, որ ես կարող էի նրա հետ խաղալ այն մեծագույն «Բարսելոնայում»»,- ասել է իտալացին։

Խոսելով բրազիլացի լեգենդների և ժամանակակից աստղերի մասին՝ նախկին հարձակվողը նշել է, որ որոշ ասպեկտներով գերազանցում է նրանց.

«Ռիվալդոյի հետ համեմատության մեջ ես ընտրում եմ ինձ. վարպետությամբ և հանճարեղությամբ ես ավելի լավն էի, թեև նա կախարդական ձախ ոտք ուներ։ Կակա՞ն. տեխնիկայի և հանճարեղության առումով երկու դեպքում էլ ես ավելի լավն եմ։ Նա պայթյունավտանգ արագացում ուներ, բայց իմ դրիբլինգն ու վերջին փոխանցումն ավելի որակյալ էին։ Նույնը վերաբերում է Բատիստուտային և Դեմբելեին։

Ինչ վերաբերում է Լամին Յամալին՝ նա շատ ուժեղ է, խաղում է այլ դիրքում, բայց ես ինձ չափազանց շատ էի սիրում. իմ բոլոր խենթություններով հանդերձ, առանց նորմալ մարզվելու և մշտապես ավելորդ քաշով, ես խաղացել եմ անհավանական ուժեղ թիմերում»։

Անդրադառնալով իտալական ֆուտբոլի խորհրդանիշներին՝ Ռոբերտո Բաջոյին, Ֆրանչեսկո Տոտիին և Ալեսանդրո Դել Պիեռոյին՝ Կասանոն կրկին նախապատվությունը տվել է իրեն.

«Ռոբերտո Բաջոն փայլուն անցկացրեց ԱԱ-1994-ը, բայց ի տարբերություն ինձ, մեծ ակումբներում քիչ բանի հասավ։ «Յուվենտուսում» սկզբում վատ չէր, բայց «Ինտերում» և «Միլանում» նրա մոտ չստացվեց, թեև հրաշալի էր խաղում «Բոլոնիայում» և «Բրեշիայում»։ Նա ավելի շատ գոլեր էր խփում, բայց վերջին փոխանցման և հանճարեղության տեսանկյունից ես նախընտրում եմ ինձ։

Տոտիի հետ համեմատած՝ ես ավելի հանճարեղ եմ, թեև նա ֆիզիկապես ավելի լավ էր պատրաստված։ Եթե կարողանայի նորից ծնվել, կընտրեի լինել Կասանոն, ոչ թե Տոտին։

Դել Պիեռոյի հետ ինձ համեմատել են ողջ կյանքիս ընթացքում։ Ես նրանից լավն էի շատ առումներով՝ դրիբլինգով, ֆիզիկական ուժով, երկրորդ հարկում խաղով և ավելի լավ էի կատարում վերջին փոխանցումը։ Նրա խաղի մեջ ավելի շատ կայունություն կար, բայց պակասում էր հանճարեղությունն ու սեփական դեմքը, թեև նա, անկասկած, թոփ-ֆուտբոլիստ է»,- եզրափակել է Կասանոն։

Արգենտինայի ֆուտբոլի ասոցիացիան իր պաշտոնական կայքում հրապարակել է ազգային հավաքականի կազմը 2026 թվականի աշխարհի առաջնության համար։

26 ֆուտբոլիստներից բաղկացած ցուցակում ընդգրկվել է նաև «Ոսկե գնդակի» ութակի դափնեկիր, «Ինտեր Մայամիի» հարձակվող Լիոնել Մեսսին։ Նրա համար սա կլինի կարիերայի վեցերորդ Մունդիալը:

Արգենտինայի հավաքականի հայտացուցակը.

• Դարպասապահներ. Էմիլիանո Մարտինես, Խերոնիմո Ռուլի, Խուան Մուսո։
• Պաշտպաններ. Նաուել Մոլինա, Նիկոլաս Օտամենդի, Կրիստիան Ռոմերո, Նիկոլաս Տալյաֆիկո, Լիսանդրո Մարտինես, Գոնսալո Մոնտիել, Ֆակունդո Մեդինա, Լեոնարդո Բալերդի։
• Կիսապաշտպաններ. Վալենտին Բարկո, Ջովանի Լո Չելսո, Լեանդրո Պարեդես, Ռոդրիգո Դե Պաուլ, Էնցո Ֆերնանդես, Ալեքսիս Մակ Ալիստեր, Էքսեկիել Պալասիոս։
• Հարձակվողներ. Նիկո Պաս, Խոսե Մանուել Լոպես, Լիոնել Մեսսի, Լաուտարո Մարտինես, Ջուլիանո Սիմեոնե, Նիկոլաս Գոնսալես, Տիագո Ալմադա, Խուլիան Ալվարես։

Հիշեցնենք, որ աշխարհի գործող չեմպիոն Արգենտինայի հավաքականն ԱԱ-2026-ի խմբային փուլում կմրցի Ալժիրի (հունիսի 16), Ավստրիայի (հունիսի 22) և Հորդանանի (հունիսի 27) ընտրանիների հետ:

Արգենտինայի ազգային հավաքականի գլխավոր մարզիչ Լիոնել Սկալոնին խոսել է «Ինտեր Մայամիի» աստղային հարձակվող Լիոնել Մեսսիի առողջական վիճակի մասին՝ նշելով, որ վնասվածքի լրջությունը պարզ կդառնա միայն խորացված բուժզննումից հետո։

​Հիշեցնենք, որ արգենտինացի հարձակվողը վնասվածք էր ստացել MLS-ի կանոնավոր առաջնության՝ «Ֆիլադելֆիա Յունիոնի» դեմ գոլառատ խաղում (6:4) և ստիպված էր լքել խաղադաշտը 73-րդ րոպեին։

«Ինտեր Մայամիի» մամուլի ծառայության փոխանցմամբ՝ 38-ամյա ֆուտբոլիստի նախնական ախտորոշումը ձախ ազդրի մկանային գերհոգնածություն և ծանրաբեռնվածություն է։

​«Նախնական արդյունքներն այնքան էլ հիասթափեցնող չեն։ Այժմ մենք պետք է հետևենք նրա ապաքինման ընթացքին և սպասենք լրացուցիչ հետազոտությունների պատասխաններին՝ հասկանալու համար, թե արդյոք դրանք հաստատում են նախնական բժշկական եզրակացությունները։ Բնականաբար, մենք բոլորս կցանկանայինք, որ Լեոն հավաքականի ճամբար ժամաներ 100 տոկոսանոց պատրաստվածությամբ, սակայն այս պահին իրականությունն այլ է»,- Սկալոնիի խոսքերն է փոխանցում ESPN-ը՝ վկայակոչելով DSports-ին։

​Նշենք նաև, որ Արգենտինայի հավաքականն առաջիկայում հանդես է գալու J խմբում, որտեղ աշխարհի գործող չեմպիոնների մրցակիցները կլինեն Ալժիրի, Ավստրիայի և Հորդանանի ընտրանիները։

MLS-ի կանոնավոր առաջնության հերթական խաղում «Ինտեր Մայամին» սեփական հարկի տակ ընդունել էր «Ֆիլադելֆիային»։ Հանդիպումն աչքի ընկավ անհավանական արդյունավետությամբ և ավարտվեց տանտերերի հաղթանակով՝ 6:4 հաշվով, սակայն խաղը մթագնվեց Լիոնել Մեսսիի վնասվածքով։

«Ինտեր Մայամիի» կազմում փայլեց Լուիս Սուարեսը՝ դառնալով հեթ-տրիկի հեղինակ: Դուբլ իր ակտիվում գրանցեց Խերման Բերտերամեն, ևս մեկ անգամ աչքի ընկավ Ռոդրիգո Դե Պաուլը։ Հյուրերի կազմում պատասխան հեթ-տրիկի հեղինակ դարձավ Միլան Իլոսկին (երկուսը՝ 11-մետրանոցից), մեկ գոլ էլ խփեց Բրունո Դամիանին։

Արգենտինացի հարձակվող Լիոնել Մեսսին դարձավ երկու գոլային փոխանցման հեղինակ՝ ընդհատելով 4 խաղ անընդմեջ գոլ խփելու իր շարքը։ Ավաղ, 38-ամյա աստղային ֆուտբոլիստը չկարողացավ մինչև վերջ անցկացնել հանդիպումը։ 73-րդ րոպեին արգենտինացին փոխարինվեց։ TNT Sports-ի հաղորդմամբ՝ Մեսսին փոխարինում է խնդրել ձախ ազդրի վնասվածքի պատճառով։ «Ինտեր Մայամիի» բժշկական շտաբն առաջիկայում կգնահատի հարձակվողի վիճակը և վնասվածքի լրջության աստիճանը։

Այս խաղից հետո «Ինտեր Մայամին» վաստակեց 31 միավոր և զբաղեցնում է Արևելյան կոնֆերենցիայի մրցաշարային աղյուսակի 2-րդ հորիզոնականը: «Ֆիլադելֆիան» 7 միավորով եզրափակում է աղյուսակը (15-րդ տեղ):

Նշենք, որ սա թիմերի վերջին հանդիպումն էր ԱՄՆ-ում, Կանադայում և Մեքսիկայում կայանալիք աշխարհի առաջնությունից առաջ: MLS-ի կանոնավոր առաջնությունը 7-շաբաթյա դադար է վերցնում և կվերսկսվի հուլիսին։

Հեղինակավոր Forbes ամսագիրը հրապարակել է 2026 թվականի աշխարհի ամենաբարձր վարձատրվող մարզիկների ամենամյա վարկանիշային աղյուսակը, որը գլխավորել է «Ալ Նասրի» և Պորտուգալիայի հավաքականի հարձակվող Կրիշտիանու Ռոնալդուն։ «Ոսկե գնդակի» հնգակի դափնեկիրն արդեն չորրորդ տարին անընդմեջ պահպանում է առաջատարի դիրքը։

Ռեյտինգը կազմվել է՝ հաշվի առնելով ինչպես մարզիկների մրցելույթներից ստացված եկամուտները (աշխատավարձ, բոնուսներ, մրցանակային հիմնադրամներ), այնպես էլ սպորտից դուրս կնքված գովազդային և հովանավորչական պայմանագրերը։

41-ամյա Ռոնալդուի ընդհանուր տարեկան եկամուտը կազմել է ֆանտաստիկ 300 միլիոն դոլար, որից 235 միլիոնը նա վաստակել է խաղադաշտում, իսկ 65 միլիոնը՝ դրա սահմաններից դուրս։

Երկրորդ հորիզոնականը զբաղեցրել է մեքսիկացի անվանի բռնցքամարտիկ Սաուլ «Կանելո» Ալվարեսը (170 մլն դոլար), իսկ լավագույն եռյակը եզրափակել է ամերիկյան «Ինտեր Մայամիի» հարձակվող Լիոնել Մեսսին, ում տարեկան եկամուտը գնահատվել է 140 միլիոն դոլար։

Ստորև ներկայացնում ենք Forbes-ի վարկածով 2026 թվականի ամենաբարձր վարձատրվող մարզիկների լավագույն տասնյակը (միլիոն դոլար).

• Կրիշտիանու Ռոնալդու (Պորտուգալիա, ֆուտբոլ) – 300 (235 սպորտում + 65 սպորտից դուրս)
• Սաուլ Ալվարես (Մեքսիկա, բռնցքամարտ) – 170 (160 + 10)
• Լիոնել Մեսսի (Արգենտինա, ֆուտբոլ) – 140 (70 + 70)
• Լեբրոն Ջեյմս (ԱՄՆ, բասկետբոլ) – 137.8 (52.8 + 85)
• Սյոհեյ Օտանի (Ճապոնիա, բեյսբոլ) – 127.6 (2.6 + 125)
• Ստեֆեն Քարի (ԱՄՆ, բասկետբոլ) – 124.7 (59.7 + 65)
• Ջոն Ռամ (Իսպանիա, գոլֆ) – 107 (97 + 10)
• Կարիմ Բենզեմա (Ֆրանսիա, ֆուտբոլ) – 104 (100 + 4)
• Քևին Դյուրանտ (ԱՄՆ, բասկետբոլ) – 103.8 (54.8 + 49)
• Լյուիս Հեմիլթոն (Մեծ Բրիտանիա, Ֆորմուլա-1) – 100 (70 + 30)

«Մանչեսթեր Յունայթեդի» և Անգլիայի հավաքականի նախկին ավագ Ուեյն Ռունին ընտրություն է կատարել «Ինտեր Մայամիի» արգենտինացի հարձակվող Լիոնել Մեսսիի և «Ալ-Նասրի» պորտուգալացի հարձակվող Կրիշտիանու Ռոնալդուի միջև։

​Խոսելով այն ֆուտբոլիստի մասին, հանուն որի ինքը միացնում է հեռուստացույցը, Ռունին առանձնացրել է արգենտինացուն։ Անգլիացու խոսքով՝ Մեսսին իր համար նման է Դիեգո Մարադոնային, և նա միակ խաղացողն է, ում ինքը սիրում է։ Նախկին հարձակվողը նշել է, որ մի քանի անգամ խաղացել է նրա դեմ և Մեսսիին համարում է լավագույնը, քանի որ անգամ տարիքի հետ նա մնում է միակը, ում խաղն իրեն ստիպում է ժպտալ։

​Անդրադառնալով այն թեմային, թե արդյոք Մեսսին ավելի լավն է Կրիշտիանու Ռոնալդուից, Ռունին առանց վարանելու նախապատվությունը տվել է արգենտինացուն։

​«Իմ կարծիքով՝ այո։ Մեսսին և Կրիշտիանուն լավագույնն են այս սերնդում, բայց խաղից ստացած հաճույքի, վարպետության և դրիբլինգի տեսանկյունից՝ ինձ համար Մեսսին լավագույնն է»,- Ռունիի խոսքերն է մեջբերում Romario TV-ն։

​Հիշեցնենք, որ Ուեյն Ռունին և Կրիշտիանու Ռոնալդուն «Մանչեսթեր Յունայթեդում» միասին հանդես են եկել 2004-ից 2009 թվականներին։

«LEGO Group» կորպորացիան ներկայացրել է 2026 թվականի աշխարհի առաջնությանն ընդառաջ նկարահանված տեսահոլովակի կադրերից դուրս մնացած հատվածը:

Գովազդային հոլովակում նկարահանվել են ֆուտբոլի գլխավոր աստղեր Կրիշտիանու Ռոնալդուն, Լիոնել Մեսսին, Կիլիան Մբապեն և Վինիսիուս Ժունիորը:

Ավելի վաղ հայտնի բրենդը թողարկել էր ԱԱ-2026-ի համար նախատեսված իր նոր հավաքածուների գովազդը։ Դրանում մասնակից ֆուտբոլիստները փորձում էին իրենց մինի-ֆիգուրները տեղադրել սպասվելիք մրցաշարի գլխավոր գավաթի վրա:

Հիշեցնենք, որ 2026 թվականի աշխարհի առաջնությունը կանցկացվի հունիսի 11-ից հուլիսի 19-ը՝ միանգամից երեք երկրում՝ ԱՄՆ-ում, Կանադայում և Մեքսիկայում:

ՄԼՍ-ի կանոնավոր առաջնության հերթական տուրում «Ինտեր Մայամին» սեփական հարկի տակ 2-0 հաշվով վստահ հաղթանակ տոնեց «Պորտլենդ Թիմբերսի» նկատմամբ:

Հանդիպման հերոսը կրկին Լիոնել Մեսսին էր, որը դարձավ գոլի ու գոլային փոխանցման հեղինակ՝ խփելով իր պրոֆեսիոնալ կարիերայի 910-րդ գնդակը, իսկ տանտերերի կազմում մյուս գոլն իր ակտիվում գրանցեց Հերման Բերտերամեն:

Հատկանշական է, որ սա ֆլորիդյան ակումբի առաջին հաղթանակն էր նորակառույց «Nu Stadium» մարզադաշտում, որին հասնելու համար պահանջվեց հինգ հանդիպում. նախորդ չորս խաղերում թիմը երեք ոչ-ոքի էր խաղացել («Նյու Ինգլենդ Ռևոլյուշնի», «Նյու Յորք Ռեդ Բուլզի» և «Օսթինի» հետ) ու կրել մեկ պարտություն («Օռլանդո Սիթիից»):

Ավելին, արգենտինացի հարձակվողը մայիսյան չորս հանդիպումներում արդեն իսկ իր ակտիվում գրանցել է 10 արդյունավետ գործողություն՝ 5 գոլ և 5 գոլային փոխանցում՝ նախկինում աչքի ընկնելով նաև «Օռլանդո Սիթիի» (1+1), «Տորոնտոյի» (1+2) և «Ցինցինատիի» (2+1) դեմ կայացած խաղերում:

ՄԼՍ-ի կանոնավոր առաջնության հերթական տուրում «Ինտեր Մայամին» արտագնա խաղում 5-3 հաշվով դրամատիկ հաղթանակ տարավ «Ցինցինատիի» նկատմամբ:

Հանդիպման ընթացքում Մայամիի թիմը պարտվում էր 2-3 հաշվով, սակայն կարողացավ բեկել խաղի ընթացքն ու կամային հաղթանակ տոնել:

​Հյուրերի կազմում փայլեց թիմի ավագ Լիոնել Մեսսին, որը դարձավ դուբլի և գոլային փոխանցման հեղինակ: Այս գոլերը հարձակվողի պրոֆեսիոնալ կարիերայում 908-րդն ու 909-րդն էին: «Ինտեր Մայամիի» կազմում աչքի ընկան նաև Մատեո Սիլվետին ու Հերման Բերտերամեն, իսկ Ռոդրիգո Դե Պաուլը կատարեց արդյունավետ փոխանցում: Հատկանշական է, որ Մեսսին մոտ էր հեթ-տրիկի ձևակերպմանը, սակայն նրա հարվածներից մեկը վերջնական արդյունքում գրանցվեց որպես մրցակցի դարպասապահի ինքնագոլ: Տանտերերի կազմում գոլերը խփեցին Կևին Դենկին, Պավել Բուխան և Էվանդերը:

​Այս հաղթանակից հետո «Ինտեր Մայամին» 13 խաղից հետո վաստակած 25 միավորով զբաղեցնում է Արևելյան կոնֆերենցիայի երկրորդ հորիզոնականը: «Ցինցինատին» 16 միավորով մնաց 8-րդ տեղում: