Իսպանիայի գավաթի խաղարկության 1/8-րդ եզրափակիչում «Բարսելոնան» հյուրընկալվելիս դժվարին հաղթանակ տարավ Սանտանդերը ներկայացնող «Ռասինգի» նկատմամբ (2:0)՝ նվաճելով քառորդ եզրափակիչ ուղեգիր։

Հանդիպման առաջին կեսն անցավ հավասար պայքարում, որի ընթացքում տանտերերը կարողացան դիմակայել կատալոնացիների գրոհներին, ինչի արդյունքում թիմերը ընդմիջման գնացին առանց խփված գոլերի։

Խաղի ելքը վճռվեց երկրորդ խաղակեսում։ 66-րդ րոպեին Ֆերմին Լոպեսի փոխանցումից հետո Ֆերան Տորեսը դիպուկ հարվածով բացեց հաշիվը։ Գոլից հետո Հանս-Դիտեր Ֆլիկը թարմ ուժեր մտցրեց դաշտ՝ կատարելով միանգամից երեք փոփոխություն, որոնց թվում էին Ռոբերտ Լևանդովսկին, Ռաֆինյան և Պեդրին, ինչը թույլ տվեց վերահսկել խաղի ընթացքը։ Հիմնական ժամանակին ավելացված 5-րդ րոպեին Լամին Յամալը Ռաֆինյայի փոխանցումից հետո գրավեց դատարկ դարպասը՝ ձևակերպելով հանդիպման վերջնական հաշիվը։

Խաղի վերջնամասում Սեգունդայի առաջատարին երկու անգամ հաջողվեց գրավել «կապտանռնագույնների» դարպասը, սակայն երկու դեպքում էլ արձանագրվեց խաղից դուրս իրավիճակ։

Մադրիդի «Ռեալի» դարպասապահը Տիբո Կուրտուան կարծում է, որ իր թիմն արժանի չէր պարտության «Բարսելոնայի» դեմ Իսպանիայի Սուպերգավաթի խաղարկության դրամատիկ եզրափակիչում, որն ավարտվեց կատալոնացիների հաղթանակով՝ 3-2 հաշվով։

Հանդիպման ընթացքում մադրիդյան թիմը ցուցաբերեց կամային որակներ՝ առաջին խաղակեսի վերջնամասում երկու անգամ վերականգնելով հաշվի հավասարակշռությունը։ Մադրիդցիների կազմում աչքի ընկան Վինիսիուս Ժունիորը և Գոնսալո Գարսիան։ Սակայն ընդմիջումից հետո «Բարսելոնայի» հարձակվող Ռաֆինյան դուբլ ձևակերպեց՝ հաղթանակ պարգևելով «կապտանռնագույններին»։

«Հնարավոր է՝ առաջին խաղակեսում չափազանց զգուշավոր ու փակ էինք գործում, սակայն երկրորդ կեսում մենք արժանի էինք հաղթանակի։ Մենք բոլոր հնարավորություններն ունեինք դրա համար։ Ցավալի է եզրափակիչում զիջելը սկզբունքային մրցակցին, բայց այժմ հարկավոր է կենտրոնանալ Լա Լիգայի և Իսպանիայի գավաթի վրա։ Այսօր հանգամանքները մեր դեմ էին․ մենք պահեր էինք ստեղծում, սակայն գնդակը համառորեն չէր հայտնվում դարպասում»։

Բելգիացի դարպասապահն առանձնահատուկ ջերմությամբ է խոսել թիմակից Վինիսիուս Ժունիորի մասին՝ ընդգծելով բրազիլացու կարևորությունը թիմի համար․

«Թիմում նրա հանդեպ լիակատար վստահություն կա։ Վինիսիուսը հրաշալի ֆուտբոլիստ է, և «Ռեալում» բոլորը գիտեն նրա ներուժը։ Նա հերթական անգամ ի ցույց դրեց իր բարձր կարգը։ Եզրափակիչում Վինին շքեղ գոլի հեղինակ դարձավ և իսկական մղձավանջ էր կատալոնացիների համար, բայց մենք չօգտվեցինք դրանից։ Սա հիանալի հանդիպում էր նրա կատարմամբ», — Կուրտուայի խոսքերն է մեջբերում «սերուցքայինների» մամուլի ծառայությունը։

Հարկ է նշել, որ սա «Ռեալի» արդեն երրորդ պարտությունն է «Բարսելոնայից» եզրափակիչներում՝ վերջին մեկուկես տարվա ընթացքում։

Սաուդյան Արաբիայի Ջիդդա քաղաքի «Քինգ Աբդուլա Սպորտս Սիթի» մարզադաշտում կայացած Իսպանիայի 2026 թվականի Սուպերգավաթի խաղարկության եզրափակիչը, որտեղ «Բարսելոնան» 3-2 հաշվով հաղթեց Մադրիդի «Ռեալին», խաղն ավարտվեց աղմկահարույց միջադեպով։

Հանդիպման ավարտից անմիջապես հետո սոցիալական ցանցերում տարածվեցին կադրեր, որոնք վկայում են «Ռեալի» հարձակվող Կիլիան Մբապեի էմոցիոնալ պահվածքի մասին։ Ըստ աղբյուրների՝ ֆրանսիացի ֆուտբոլիստը խանգարել է թիմակիցներին ավանդական «չեմպիոնական միջանցք» կազմել հաղթողի՝ «Բարսելոնայի» համար։

Տեսախցիկները ֆիքսել են, թե ինչպես է վրդովված Մբապեն դիմում խաղընկերներին և նրանց ուղեկցում դեպի պահեստայինների նստարան՝ հեռացնելով խաղադաշտի կենտրոնից։ Թեև «Ռեալի» գլխավոր մարզիչ Խաբի Ալոնսոն փորձել է միջամտել և խնդրել ֆուտբոլիստներին վերադառնալ, արարողությունն այդպես էլ չի կայացել։

💥 MAL PERDRE DE MBAPPÉ

🤬 El francès del Reial Madrid no ha volgut que els seus companys fessin el passadís al Barça

❌ Els altres jugadors l’han seguit i els blaugranes no han tingut passadís de campions#ElClàssic

📲 https://t.co/xhB56dlluh pic.twitter.com/ezq5yRCuuN

— Esport3 (@esport3) January 11, 2026

Միջադեպի վերաբերյալ պարզաբանում է տարածել լրագրող Ալֆրեդո Մարտինեսը։ X սոցիալական ցանցի իր էջում նա ներկայացրել է «արքայական» ակումբի դիրքորոշումը, որը հերքում է ֆուտբոլիստների կողմից դիտավորյալ անհարգալից վերաբերմունքը։

««Ռեալում» պնդում են, որ հենց ֆեդերացիան է կարգադրել իրենց տեղափոխվել այլ գոտի, քանի որ թիմը հայտնվել էր տեսախցիկների տեսադաշտում և խանգարում էր եթերին։ Այդ իսկ պատճառով նրանք չեն ձևավորել չեմպիոնական միջանցքը», — գրել է Մարտինեսը։

Նշենք, որ այս հաղթանակով «Բարսելոնան» պատմական ռեկորդ սահմանեց՝ 16-րդ անգամ նվաճելով Իսպանիայի Սուպերգավաթը։ Մադրիդի «Ռեալը» մրցաշարի հաղթող է դարձել 13 անգամ։ Հատկանշական է նաև, որ սա կատալոնացիների վեցերորդ հաղթանակն էր «Ռեալի» նկատմամբ վերջին յոթ հանդիպումներում։

«Բարսելոնայի» կիսապաշտպան Պեդրին կիսվել է տպավորություններով Իսպանիայի Սուպերգավաթի խաղարկության եզրափակիչում Մադրիդի «Ռեալի» նկատմամբ տարած հաղթանակից հետո (3-2)։

Հանդիպման գլխավոր հերոս դարձավ բրազիլացի հարձակվող Ռաֆինյան որը իր հաշվին դուբլ գրանցեց։ Ինքը՝ Պեդրին, նույնպես անմասն չմնաց արդյունավետ գործողություններից՝ առաջին խաղակեսի վերջնամասում գոլային փոխանցում կատարելով Ռոբերտ Լևանդովսկուն։

Երիտասարդ կիսապաշտպանը խոստովանել է, որ մրցակցի ընտրած մարտավարությունն իրենց համար անակնկալ էր․

««Ռեալն» իրեն հարմարավետ է զգում, երբ նահանջում է և գործում հակագրոհների մարտավարությամբ։ Սակայն մենք չէինք սպասում, որ նրանք կխաղան այսչափ պաշտպանողական ոճով և նման «ցածր բլոկով»։ Երկրորդ խաղակեսում մենք վերահսկում էինք իրավիճակը և հասանք ցանկալի արդյունքի Ռաֆինյայի գոլի շնորհիվ», — խաղից հետո լրագրողների հետ զրույցում նշել է Պեդրին։

Նշենք, որ կատալոնական ակումբը նախորդ մրցաշրջանի մեկնարկից ի վեր նվաճել է Իսպանիայի բոլոր չորս հնարավոր տիտղոսները։

«Բարսելոնայի» գլխավոր մարզիչ Հանս-Դիտեր Ֆլիկն ամփոփել է Իսպանիայի Սուպերգավաթի խաղարկության եզրափակիչը, որում կատալոնացիները դրամատիկ պայքարում 3-2 հաշվով առավելության հասան Մադրիդի «Ռեալի» նկատմամբ։

«Սա կարևոր եզրափակիչ էր, իսկ «Ռեալի» դեմ խաղերը միշտ էլ բարդ են ստացվում։ Հպարտ եմ թիմով, քանի որ մենք գործեցինք հստակ ծրագրի համաձայն։ Դեռ հանդերձարան չեմ մտել, բայց տեսա, որ տղաները պարում են և տոնում հաղթանակը։

Գոհ եմ, որ կարողացանք վերահսկել գնդակն ու խաղի ընթացքը․ արդյունքում թիմն արեց այն, ինչ պահանջվում էր։ Հեշտ չէր, բայց ֆուտբոլիստները պայքարեցին մինչև վերջ և խաղացին որպես մեկ միասնական կոլեկտիվ՝ դա ակնհայտ էր։ Ինչպես տեսաք, մեր նկատմամբ լուրջ ճնշում էր գործադրվում, սակայն մենք հաղթահարեցինք այն», — Ֆլիկի խոսքերն է մեջբերում Marca-ն։

Հավելենք, որ «կապտանռնագույնները» Սուպերգավաթի շրջանակում արդեն 7-րդ անգամ են հաղթում «սերուցքայիններին»։ «Բարսելոնան» շարունակում է մնալ այս մրցաշարի ամենատիտղոսակիր ակումբը՝ նվաճելով մրցանակը ռեկորդային 16-րդ անգամ։ Մադրիդի «Ռեալը» 13 տիտղոսով զբաղեցնում է երկրորդ հորիզոնականը։

Մադրիդի «Ռեալի» գլխավոր մարզիչ Խաբի Ալոնսոն ամփոփել է Իսպանիայի Սուպերգավաթի եզրափակիչը, որում «արքայական» ակումբը պարտվեց «Բարսելոնային» (2-3)։

«Շնորհավորում եմ «Բարսելոնային»։ Հանդիպումը չափազանց լարված ստացվեց, և մենք գիտակցում էինք, որ լինելու են հատվածներ, երբ ստիպված կլինենք համբերատար գործել առանց գնդակի։ Առաջին 30 րոպեների ընթացքում մենք մրցակցին գրեթե ոչինչ թույլ չտվեցինք, սակայն շատ կարճ ժամանակահատվածում իրադարձությունները կտրուկ զարգացան։

​Երկրորդ խաղակեսում մենք հաջողությամբ էինք դուրս գալիս պաշտպանությունից՝ օգտագործելով ձախ եզրն ու Վինիի արագությունը։ Նույնիսկ երրորդ գնդակը բաց թողնելուց հետո, երբ հաշիվը դարձավ 3-2, ես 100 տոկոսով վստահ էի, որ դեռ հնարավորություն կունենանք հավասարեցնելու այն և խաղը տեղափոխելու 11-մետրանոցների հարվածաշար։ Այդ պահերը եղան, սակայն գնդակը համառորեն չէր հայտնվում դարպասում։

Ես գոհ եմ թիմի տրամադրվածությունից ու բարձր ինքնանվիրումից, սակայն վերջնամասում խաղը փրկելու համար մեզ պարզապես չբավականացրեց դիպուկությունը։ Թիմն ուներ ուժեր վճռորոշ գրոհի համար, սակայն վնասվածքներն ու ֆիզիկական վիճակը ներկայումս խոչընդոտում են կայունության ձեռքբերմանն ու ծանրաբեռնվածության հավասարաչափ բաշխմանը», — Ալոնսոյի խոսքերն է մեջբերում AS-ը։

Մադրիդի «Ռեալը» իր հաջորդ հանդիպումը կանցկացնի հունվարի 14-ին՝ Իսպանիայի գավաթի խաղարկության 1/8-րդ եզրափակիչում ուժերը չափելով «Ալբասետեի» հետ։

Սաուդյան Արաբիայի Ջիդդա քաղաքի «Քինգ Աբդուլահ Սպորտս Սիթի» մարզադաշտում Իսպանիայի Սուպերգավաթի խաղարկության եզրափակիչում «Բարսելոնան» գոլառատ խաղում հաղթանակի հասավ Մադրիդի «Ռեալի» նկատմամբ (3-2)։

Առաջին խաղակեսում թիմերը փոխանակվեցին երկուական գոլով։ Նախ 36-րդ րոպեին հանդիպման հաշիվը բացեց Ռաֆինյան՝ առաջ մղելով կատալոնացիներին։ Առաջին խաղակեսի հիմնական ժամանակին ավելացված երկրորդ րոպեին Վինիսիուսը վերականգնեց հաշվի հավասարակշռությունը՝ 1-1։ Րոպեներ անց՝ 45+4-րդ րոպեին, «Բարսելոնան» կրկին առաջ անցավ հաշվի մեջ. աչքի ընկավ Ռոբերտ Լևանդովսկին, որի գոլին էլ 45+6-րդ րոպեին պատասխանեց Գոնսալո Գարսիան։

«Կապտանռնագույնների» հաղթանակը ամրագրեց Ռաֆինյան, որը 73-րդ րոպեին կրկին գրավեց Տիբո Կուրտուայի պաշտպանած դարպասը՝ դառնալով դուբլի հեղինակ։

Խաղի վերջում կատալոնացիները մնացին 10 հոգով․ ուղիղ կարմիր քարտով խաղադաշտից հեռացվեց Ֆրենկի դե Յոնգը։

Այսպիսով, Հանս Դիտեր Ֆլիկի գլխավորած թիմը երկրորդ մրցաշրջանն անընդմեջ եզրափակիչում առավելության է հասնում Մադրիդի «Ռեալի» նկատմամբ՝ դառնալով Իսպանիայի Սուպերգավաթակիր։

Հանդիպման գոլերը՝ ԱՅՍՏԵՂ

Կկարողանա՞ արդյոք Ֆլիկի թիմը ռևանշի հասնել աշնանային Էլ Կլասիկոյում կրած պարտության դիմաց:

Այսօր՝ հունվարի 11-ին, Ջիդայի «Քինգ Աբդուլա Սպորտս Սիթի» մարզադաշտում կկայանա Իսպանիայի Սուպերգավաթի եզրափակիչը՝ լեգենդար Էլ Կլասիկոն։ Հանդիպումը կմեկնարկի Երևանի ժամանակով 23:00-ին։ Մեծ է հավանականությունը, որ երկու թիմերի գլխավոր աստղերը՝ Լամին Յամալն ու Կիլիան Մբապեն, խաղադաշտ դուրս կգան հենց առաջին րոպեներից։

Գրեթե ուղիղ մեկ տարի առաջ «Բարսելոնան» Սուպերգավաթի համար պայքարում ջախջախեց «Ռեալին» 5:2 հաշվով։ Կկարողանա՞ «Արքայական ակումբը» վրեժ լուծել, թե՞ «կապտանռնագույնները» կրկին կնվաճեն ձմեռային տիտղոսը։

«Բարսելոնան»՝ զարգացման գագաթնակետին

«Բարսելոնան» տարբեր մրցաշարերում տարել է 9 անընդմեջ հաղթանակ՝ ձմռան կեսին հասնելով մարզական մարզավիճակի գագաթնակետին։ Հանս-Դիտեր Ֆլիկը բացահայտեց Ռունի Բարդղջիի տաղանդը, Ժերար Մարտինից կերտեց կենտրոնական պաշտպան և լիովին օգտագործեց Ֆերմին Լոպեսի առաջընթացը։ Նրա «Բլաուգրանան» կենդանի օրգանիզմի պես անընդհատ զարգանում է և տեղում չի դոփում։ Այս փուլում «Բարսելոնան» կրկին եվրոպական թոփ-5 լիգաների ուժեղագույն թիմերից մեկի տեսքն ունի։

Կիսաեզրափակչում կատալոնացիները 5:0 հաշվով ջախջախեցին «Ատլետիկին»։ Սա «Բարսելոնայի» հինգերորդ անընդմեջ «չոր» հաշվով հաղթանակն էր։ Թեպետ բասկերը xG-ով (սպասվող գոլեր) 1.75 ցուցանիշ ունեին, արդյունքն օրինաչափ էր։ Ժոան Գարսիան փայլուն է պաշտպանում դարպասը, իսկ Պաու Կուբարսին պաշտպանության կենտրոնում ցանկացած խաղընկերոջ հետ գործում է ավելի ու ավելի վստահ՝ վերածվելով իր դիրքում աշխարհի լավագույններից մեկի։ Նման պաշտպանությամբ «Բարսելոնան» կփորձի գոլ բաց չթողնել նաև «Ռեալից»:

«Ատլետիկի» դեմ ֆանտաստիկ խաղ ցուցադրեց Ռաֆինյան՝ ստանալով առավելագույն գնահատականներ։ Լավ տպավորություն թողեց 19-ամյա Ռունի Բարդղջին, իսկ Ֆերմին Լոպեսի ունիվերսալությունը՝ կիսապաշտպանությունում և հարձակման գծում, պարզապես տպավորիչ է։ Եզրափակչին պատրաստ կլինի նաև Լամին Յամալը, որը պատրաստ է անցկացնել ամբողջ 90 րոպեն։ «Բարսայի» գլխավոր աստղը երկրորդ ամիսն անընդմեջ ճանաչվում է Լա Լիգայի լավագույն ֆուտբոլիստ։

«Ռեալ». Մբապեի վերադարձը և պաշտպանության խնդիրները

Խաբի Ալոնսոն՝ որպես մարզիչ, իր առաջին Էլ Կլասիկոն հաղթել է անցած աշնանը, սակայն այդ հանդիպումը կայացել էր «Սանտիագո Բեռնաբեուում»։ Առաջիկա եզրափակիչը չեզոք դաշտում է, իսկ «Բարսելոնան» վերջին ամիսներին զգալիորեն ավելացրել է։ Ուստի կարելի է ենթադրել, որ այս անգամ «Ռեալի» համար շատ ավելի բարդ է լինելու։

Մադրիդցիների համար կարևորագույն նորությունը Կիլիան Մբապեի շարք վերադառնալն է։ Ֆրանսիացի աստղը պատրաստ է խաղադաշտ դուրս գալ մեկնարկային կազմում։ Նրա պակասը շատ էր զգացվում «Ատլետիկոյի» դեմ խաղում, բայց այժմ նա պատրաստ է օգնել Ալոնսոյին նվաճել մրցաշրջանի առաջին տիտղոսը։

«Ռեալն» ունի 5 հաղթանակից բաղկացած շարք, սակայն խաղային մարզավիճակով զիջում է մրցակցին։ Ալոնսոյի սաները գոլ են բաց թողել վերջին 7 խաղերից 6-ում։ Կիսաեզրափակչում «Ատլետիկոն» xG-ով հավաքել էր 2.29 միավոր՝ կատարելով 22 հարված Տիբո Կուրտուայի դարպասին։ Ինչքան էլ հրաշալի գործի բելգիացի դարպասապահը, սեփական դարպասի մոտ նման խաղով դժվար կլինի դիմակայել «Բարսելոնայի» հզոր գրոհներին։ Հատկանշական է, որ կիսաեզրափակչի ընթացքում Ալոնսոն միանգամից փոխարինեց երկու կենտրոնական պաշտպաններին։ Իսպանացի մասնագետը լուրջ մտածելու տեղիք ունի պաշտպանական գծի կազմի վերաբերյալ։

Վիճակագրություն և կանխատեսում

«Բարսելոնան» հաղթել է նախորդ 6 Էլ Կլասիկոներից 5-ում։ Սակայն Խաբի Ալոնսոյի գալուստը փոխեց միտումը. նա ընդհատեց անհաջողությունների շղթան և մարզչական դուելում հաղթեց Ֆլիկին։ Կստացվի՞ կրկնել այդ հաջողությունը Ջիդայում:

Հարկ է նշել, որ նախորդ 12 դիմակայություններում թիմերը ապահովել են գոլառատ ֆուտբոլ (Բուքմեյքերական «վերին» շեմը)։ Վերջին 5 հանդիպումներում գրանցվել են խոշոր հաշիվներ (2:1, 4:3, 3:2, 2:5, 0:4)։

«Բարսելոնան» այս պահին ավելի ուժեղ է տեսք ունենում, քան «Ռեալը»։ Մրցաշրջանի այս հատվածում Ալոնսոն ավելի շատ խնդիրներ ունի, քան Ֆլիկը։ Հաշվի առնելով կատալոնական ակումբի պաշտպանության մակարդակը, նույնիսկ ապաքինված Մբապեի առկայության դեպքում «Ռեալին» դժվար կլինի գրավել մրցակցի դարպասը։ Այս անգամ Էլ Կլասիկոն, ամենայն հավանականությամբ, այդքան արդյունավետ չի լինի, որքան մեկ տարի առաջ։ «Բարսելոնան» լավ շանսեր ունի կրկին նվաճելու այս տիտղոսը և վրեժխնդիր լինելու Լա Լիգայում կրած պարտության համար։

Մադրիդի «Ռեալի» եզրային հարձակվող Ռոդրիգո Գոեսի մասնակցությունն Իսպանիայի Սուպերգավաթի խաղարկության՝ «Բարսելոնայի» դեմ կայանալիք եզրափակիչին հարցականի տակ է։ Այս մասին հայտնում է COPE-ը։

Ըստ աղբյուրի՝ բրազիլացի ֆուտբոլիստն անհանգստություն ունի ծնկատակի ջլի շրջանում, ինչը ուղեկցվում է ցավային զգացողություններով։ Այսօր՝ հունվարի 10-ին, ֆուտբոլիստը բուժզննում կանցնի, որի արդյունքներով պարզ կդառնա՝ կկարողանա՞ արդյոք նա դուրս գալ խաղադաշտ։

Իսպանիայի Սուպերգավաթի վճռորոշ հանդիպումը նախատեսված է հունվարի 11-ին և կմեկնարկի Երևանի ժամանակով 23:00-ին։

Հիշեցնենք, որ մրցաշարի կիսաեզրափակիչում «արքայական» ակումբը պայքարից դուրս թողեց Մադրիդի «Ատլետիկոյին» (2-1), իսկ «Բարսելոնան» խոշոր հաշվով առավելության էր հասել Բիլբաոյի «Ատլետիկի» նկատմամբ (5-0)։

Մադրիդի «Ռեալում» հուսով են, որ Կիլիան Մբապեն կկարողանա մեկնարկային կազմում խաղալ «Բարսելոնայի» դեմ Իսպանիայի Սուպերգավաթի խաղարկության եզրափակիչում։

Վնասվածքից դեռևս լիովին չապաքինված ֆրանսիացին արդեն ժամանել է Սաուդյան Արաբիա, սակայն դեռևս պարզ չէ՝ պատրաստ կլինի՞ նա մեկնարկային կազմում խաղալուն, թե՞ ոչ։

L’Équipe-ի տվյալներով՝ Մբապեի մեկնարկային կազմում ընդգրկվելու հավանականությունը բավականին բարձր է։ Նշվում է, որ «Ռեալը» կանի ամեն ինչ դա ապահովելու նպատակով։ Մադրիդյան ակումբը քննարկում է Կիլիանի համար ցավազրկողներ կիրառելու տարբերակը։

Ավելին, շատ հավանական է, որ խաղացողը կհանգստանա «Ալբասետեի» և «Լևանտեի» դեմ հաջորդ երկու հանդիպումներում, եթե կարողանա խաղադաշտ դուրս գալ «Բարսելոնայի» դեմ կարևոր մրցավեճում։

«Բարսելոնա» – «Ռեալ Մադրիդ» հանդիպումը կկայանա վաղը՝ հունվարի 11-ին, Երևանի ժամանակով՝ 23։00-ին։