Այսօր կայացավ Իսպանիայի և Իրաքի միջև ընկերական հանդիպումը, որը տեղի ունեցավ Լա Կորունիայի մարզադաշտում և ավարտվեց 1-1 հաշվով։

Տանտերերի հարձակվող Ֆերան Տորեսը բացեց հաշիվը 16-րդ րոպեին։ 27-րդ րոպեին հյուրերի պաշտպան Մերհաս Դոսկին վերականգնեց հավասարությունը։

Երկու ազգային հավաքականներն էլ կմասնակցեն 2026 թվականի Աշխարհի առաջնությանը։

Հանդիպման գոլերը՝ ԱՅՍՏԵՂ

Opta վերլուծական հարթակը թարմացրել է աշխարհի 2026 թվականի առաջնության կանխատեսումը և որոշել մրցաշարում հաղթելու գլխավոր հավակնորդին։

Սուպերհամակարգչի հաշվարկներով՝ տիտղոսը նվաճելու ամենամեծ շանսերն ունի Իսպանիայի հավաքականը։ Իսպանացիների հաղթանակի հավանականությունը գնահատվում է 16,1 տոկոս։

Մրցաշարի երկրորդ ֆավորիտը Ֆրանսիայի հավաքականն է՝ 13 տոկոս ցուցանիշով։ Հավակնորդների լավագույն եռյակը եզրափակում է Անգլիան՝ 11,2 տոկոսով։

Գլխավոր ֆավորիտների հնգյակում ընդգրկվել են նաև աշխարհի գործող չեմպիոն Արգենտինան և Պորտուգալիան։

ԱԱ-2026-ում հաղթելու հավակնորդների լավագույն տասնյակն ըստ Opta-ի ունի հետևյալ տեսքը.

1. Իսպանիա — 16,1 տոկոս
2. Ֆրանսիա — 13 տոկոս
3. Անգլիա — 11,2 տոկոս
4. Արգենտինա — 10,4 տոկոս
5. Պորտուգալիա — 7 տոկոս
6. Բրազիլիա — 6,6 տոկոս
7. Գերմանիա — 5,1 տոկոս
8. Նիդերլանդներ — 3,6 տոկոս
9. Նորվեգիա — 3,5 տոկոս
10. Բելգիա — 2,4 տոկոս

Հիշեցնենք, որ աշխարհի 2026 թվականի առաջնությունը կմեկնարկի հունիսի 11-ին և պատմության մեջ առաջին անգամ կանցկացվի միանգամից երեք երկրում՝ ԱՄՆ-ում, Կանադայում և Մեքսիկայում։ Մրցաշարին կմասնակցի ռեկորդային՝ 48 ազգային հավաքական։

Իսպանիայի ազգային հավաքականը շարունակում է նախապատրաստվել 2026 թվականի աշխարհի առաջնությանը։ Երկուշաբթի օրը Իսպանիայի ֆուտբոլի արքայական ֆեդերացիայի պաշտոնական կայքը հրապարակել է այն խաղահամարները, որոնցով ֆուտբոլիստները հանդես կգան սպասվող Մունդիալում։

ՖԻՖԱ-ի կանոնակարգի համաձայն՝ մրցաշարի հայտացուցակում ընդգրկված ֆուտբոլիստները պետք է կրեն 1-ից մինչև 26 համարի մարզաշապիկներ։

«Կարմիր ֆուրիայի» խաղացողների համարներն ունեն հետևյալ տեսքը.

1. Ռայա
2. Պուբիլ
3. Գրիմալդո
4. Էրիկ Գարսիա
5. Լյորենտե
6. Մերինո
7. Ֆեռան Տորես
8. Ֆաբիան Ռուիս
9. Գավի
10. Օլմո
11. Երեմի Պինո
12. Պոռո
13. Ժոան Գարսիա
14. Լապորտ
15. Բաենա
16. Ռոդրի
17. Նիկո Ուիլյամս
18. Սուբիմենդի
19. Յամալ
20. Պեդրի
21. Օյարսաբալ
22. Կուբարսի
23. Սիմոն
24. Կուկուրելյա
25. Մունյոս
26. Բորխա Իգլեսիաս

Հիշեցնենք, որ ԱԱ-2026-ի խմբային փուլում Իսպանիայի հավաքականն ուժերը կչափի Կաբո Վերդեի, Սաուդյան Արաբիայի և Ուրուգվայի ազգային ընտրանիների հետ։

Իսպանիայի ազգային հավաքականի գլխավոր մարզիչ Լուիս դե լա Ֆուենտեն մեկնաբանել է աշխարհի 2026 թվականի առաջնության վերջնական հայտացուցակում Մադրիդի «Ռեալի» ֆուտբոլիստներին չընդգրկելու իր որոշումը։

«Ի տարբերություն երկրպագուների՝ ես չեմ նայում, թե ֆուտբոլիստի ակումբային պատկանելիությանը: Ինձ համար դա նշանակություն չունի: Ես չունեմ այն լոկալ մտածելակերպը, որն ունեն երկրպագուները։ Ես ոչ մեկին խորհուրդ տալ չեմ կարող, պարզապես խնդրում եմ ֆուտբոլիստներին զգալ այս երկրի գույները, ինչն արդեն իսկ անում են նրանք»,– դե լա Ֆուենտեի խոսքերն է մեջբերում The Touchline-ը։

Նշենք, որ ԱԱ-2026-ում Իսպանիայի հավաքականի կազմում մադրիդյան ակումբից կարող էին հանդես գալ Դին Հաուսենը, Ալվարո Կարերասը, Ֆրան Գարսիան, Դանի Կարվախալը և Գոնսալո Գարսիան: Միևնույն ժամանակ, կատալոնական «Բարսելոնան» ազգային թիմում ունի միանգամից ութ ներկայացուցիչ:

Աշխարհի 2026 թվականի առաջնությունը կանցկացվի ԱՄՆ-ում, Կանադայում և Մեքսիկայում՝ հունիսի 11-ից հուլիսի 19-ը: Իսպանիայի հավաքականն ընդգրկվել է նույն խմբում, որտեղ հանդես են գալիս Կաբո Վերդեի, Սաուդյան Արաբիայի և Ուրուգվայի հավաքականները: Մրցաշարում իրենց անդրանիկ հանդիպումը իսպանացիները կանցկացնեն հունիսի 15-ին՝ մրցելով Կաբո Վերդեի ընտրանու հետ:

Իսպանիայի ազգային հավաքականը պաշտոնապես հրապարակել է այն ֆուտբոլիստների անվանացանկը, որոնք կմասնակցեն 2026 թվականի աշխարհի առաջնությանը։ Այս ամառ գլխավոր ֆուտբոլային ստուգատեսը կհյուրընկալեն ԱՄՆ-ն, Կանադան և Մեքսիկան:

​«Ֆուրիա Ռոխայի» գլխավոր մարզիչ Լուիս դե լա Ֆուենտեի վերջնական ցանկում ընդգրկվել են 26 ֆուտբոլիստներ՝ 13 տարբեր ակումբներից։

​Իսպանիայի հավաքականի հայտացուցակն ունի հետևյալ տեսքը.

​Դարպասապահներ. Ունաի Սիմոն («Ատլետիկ»), Դավիդ Ռայա («Արսենալ»), Ժոան Գարսիա («Բարսելոնա»):

​Պաշտպաններ. Պեդրո Պոռո («Տոտենհեմ»), Մարկոս Լյորենտե, Մարկ Պուբիլ (երկուսն էլ՝ «Ատլետիկո»), Էմերիկ Լապորտ («Ատլետիկ»), Պաու Կուբարսի, Էրիկ Գարսիա (երկուսն էլ՝ «Բարսելոնա»), Մարկ Կուկուրելյա («Չելսի»), Ալեխանդրո Գրիմալդո («Բայեր»):

​Կիսապաշտպաններ. Ռոդրի («Մանչեսթեր Սիթի»), Մարտին Սուբիմենդի, Միկել Մերինո (երկուսն էլ՝ «Արսենալ»), Գավի, Պեդրի, Դանի Օլմո (բոլորը՝ «Բարսելոնա»), Ֆաբիան Ռուիս (ՊՍԺ):

​Հարձակվողներ. Ալեքս Բաենա («Ատլետիկո»), Ֆեռան Տոռես, Լամին Յամալ (երկուսն էլ՝ «Բարսելոնա»), Նիկո Ուիլյամս («Ատլետիկ»), Երեմի Պինո («Քրիսթալ Փելաս»), Միկել Օյարսաբալ («Ռեալ Սոսյեդադ»), Վիկտոր Մունյոս («Օսասունա»), Բորխա Իգլեսիաս («Սելտա»):

​Հիշեցնենք, որ ԱԱ-2026-ի խմբային փուլում Դե լա Ֆուենտեի սաները կմրցեն Կաբո Վերդեի (հունիսի 15), Սաուդյան Արաբիայի (հունիսի 21) և Ուրուգվայի (հունիսի 27) հավաքականների հետ։

​Մինչ բուն մրցաշարի մեկնարկը՝ իսպանացիները երկու ստուգողական հանդիպում կանցկացնեն՝ ուժերը չափելով Իրաքի (հունիսի 4) և Պերուի (հունիսի 9) հետ։

Հայտնի է դարձել Անդրես Ինիեստայի մարզչական կարիերայի առաջին ակումբը։

«Բարսելոնայի» և Իսպանիայի հավաքականի նախկին ֆուտբոլիստ Անդրես Ինիեստան կդառնա ԱՄԷ-ն ներկայացնող «Գալֆ Յունայթեդի» գլխավոր մարզիչը։ Այս մասին X սոցիալական ցանցում հայտնում է հայտնի լրագրող և ինսայդեր Ֆաբրիցիո Ռոմանոն։

Աղբյուրի համաձայն՝ կողմերն արդեն համաձայնեցրել են համագործակցության պայմանները, և առաջիկայում պայմանավորվածությունները պաշտոնապես կհաստատվեն։

Իր խաղային կարիերայի ընթացքում Անդրես Ինիեստան երկար տարիներ հանդես է եկել «Բարսելոնայում», որի կազմում 9 անգամ դարձել է Իսպանիայի չեմպիոն, ինչպես նաև նվաճել է երկրի 6 Գավաթ և 6 Սուպերգավաթ։ Միջազգային ասպարեզում կատալոնացիների հետ ֆուտբոլիստը դարձել է Չեմպիոնների լիգայի քառակի հաղթող, երկու անգամ նվաճել է ՈւԵՖԱ-ի Սուպերգավաթը և երեք անգամ՝ Ակումբային աշխարհի առաջնության գավաթը։

Բացի այդ, լեգենդար կիսապաշտպանը հանդես է եկել ճապոնական «Վիսել Կոբեում» և էմիրաթական «Էմիրեյթսում»։ Իսպանիայի ազգային հավաքականի կազմում Ինիեստան դարձել է Աշխարհի չեմպիոն և կրկնակի Եվրոպայի չեմպիոն։

Հավելենք, որ «Գալֆ Յունայթեդը» հանդես է գալիս ԱՄԷ-ի առաջնության երկրորդ դիվիզիոնում և ներկայումս մրցաշարային աղյուսակում զբաղեցնում է 10-րդ հորիզոնականը։

Իսպանիայի ազգային հավաքականի գլխավոր մարզիչ Լուիս դե լա Ֆուենտեն անդրադարձել է Մադրիդի «Ռեալի» կազմում իսպանացի ֆուտբոլիստների սակավությանը։ Մասնագետը նշել է, որ կցանկանար «արքայական ակումբում» ավելի շատ տեղացի խաղացողների տեսնել։

«Ես լիովին կողմ եմ սեփական տաղանդների զարգացմանը։ Իմ կարծիքով՝ նրանք բոլորը պետք է հանդես գան Լա Լիգայում, քանի որ սա լավագույն առաջնությունն է։ Շատ ափսոս, որ այսօր այդքան ֆուտբոլիստներ նախընտրում են խաղալ արտասահմանում։

Որքան շատ խաղացողների մենք կարողանանք հրավիրել ազգային հավաքական, այնքան լավ մեզ համար, հատկապես, եթե նրանք հանդես գան այնպիսի բարձրակարգ թիմում, ինչպիսին Մադրիդի «Ռեալն» է»,- նշել է Լուիս դե լա Ֆուենտեն AS-ին տված հարցազրույցի ժամանակ:

«Բարսելոնայի» և Իսպանիայի հավաքականի վինգեր Լամին Յամալը վնասվածքի պատճառով բաց կթողնի 2026 թվականի աշխարհի առաջնության մեկնարկը։ Այս մասին հայտնում է The Athletic պարբերականը։

18-ամյա ֆուտբոլիստն ազդրի ենթածնկային ջլի վնասվածք էր ստացել ապրիլի 22-ին՝ Լա Լիգայի՝ «Սելտայի» դեմ խաղում (1:0) 11-մետրանոց հարված իրացնելիս։ Խնդրի պատճառով Յամալը ստիպված էր բաց թողնել ակումբային մրցաշրջանի վերջնահատվածը, և, ինչպես հաղորդվում է, նրա վերականգնողական գործընթացը նախատեսվածից ավելի է ձգձգվում։

Աղբյուրի համաձայն՝ ազգային թիմի բժշկական շտաբը խաղացողի՝ խաղադաշտ դուրս գալու շանսերը նվազագույն է գնահատում։ Յամալը հաստատապես բաց կթողնի ԱԱ-2026-ի H խմբի առաջին տուրի՝ Կաբո-Վերդեի դեմ հանդիպումը, որը կկայանա հունիսի 15-ին։ Մեծ հարցականի տակ է նաև նրա մասնակցությունը հունիսի 21-ին կայանալիք Սաուդյան Արաբիայի դեմ երկրորդ խաղին։ Նշենք, որ խմբում Իսպանիայի երրորդ մրցակիցն Ուրուգվայի ընտրանին է։

Իսպանիայի թագավորական ֆուտբոլի ֆեդերացիան մշտական կապի մեջ է «Բարսելոնայի» և ֆուտբոլիստի հետ: Ազգային հավաքականի բժշկական շտաբի ներկայացուցիչները պարբերաբար այցելում են ակումբի ճամբար՝ անձամբ հետևելու վինգերի ապաքինման ընթացքին:

Հիշեցնենք, որ 2025 թվականին Յամալը երկրորդն էր աշխարհի լավագույն ֆուտբոլիստի՝ «Ոսկե գնդակի» քվեարկությունում՝ զիջելով միայն ՊՍԺ-ի հարձակվող Ուսման Դեմբելեին։ Transfermarkt պորտալը նրա տրանսֆերային արժեքը գնահատում է 200 միլիոն եվրո։

2023 թվականին Իսպանիայի ազգային թիմում նորամուտը նշելուց ի վեր՝ Յամալն անցկացրել է 25 հանդիպում և դարձել 6 գոլի հեղինակ՝ օգնելով թիմին հաղթել Եվրո-2024-ում և հասնել 2025թ․ Ազգերի լիգայի եզրափակիչ:

2026 թվականի Աշխարհի առաջնությունը կկայանա ԱՄՆ-ում, Մեքսիկայում և Կանադայում՝ հունիսի 11-ից հուլիսի 19-ը:

Հեղինակավոր ESPN մարզական պարբերականը հրապարակել է ֆուտբոլի աշխարհի 2026 թվականի առաջնության գլխավոր ֆավորիտների թարմացված վարկանիշային աղյուսակը։

​Եթե վարկանիշի նախորդ տարբերակում միանձնյա առաջատարը Ֆրանսիայի ազգային հավաքականն էր, ապա այժմ աղյուսակի առաջին հորիզոնականն զբաղեցնում է Իսպանիայի ընտրանին։

​ESPN-ի վարկածով աշխարհի առաջնության ֆավորիտների լավագույն տասնյակն ունի հետևյալ տեսքը.

1. Իսպանիա
2. Ֆրանսիա
3. Արգենտինա
4. Անգլիա
5. Բրազիլիա
6. Պորտուգալիա
7. Գերմանիա
8. Նիդերլանդներ
9. Մարոկկո
10. Նորվեգիա

​Հիշեցնենք, որ ԱԱ-2026-ը կհյուրընկալվի միանգամից երեք երկրում՝ ԱՄՆ-ում, Կանադայում և Մեքսիկայում։ Մունդիալը կանցկացվի հունիսի 11-ից հուլիսի 19-ը։

Մադրիդի «Ռեալի» պաշտպան Դանիել Կարվախալը և իտալական «Կոմոյի» հարձակվող Ալվարո Մորատան բաց կթողնեն 2026 թվականի Աշխարհի առաջնությունը։ Ֆուտբոլիստները չեն ընդգրկվել Իսպանիայի ազգային հավաքականի գլխավոր մարզիչ Լուիս դե լա Ֆուենտեի կազմած՝ 55 հոգուց բաղկացած ընդլայնված հայտացուցակում։ Այս մասին հայտնում է հեղինակավոր AS պարբերականը։

Ըստ աղբյուրի՝ որոշումն արդեն կայացված է, և այն, ամենայն հավանականությամբ, չի փոխվի։ Դե լա Ֆուենտեն տևական ժամանակ հետևել է Կարվախալի և Մորատայի խաղին, սակայն վատ մարզավիճակի և հաճախակի ստացած վնասվածքների պատճառով նախընտրել է նրանց չներառել ցուցակում՝ նախապատվությունը տալով այն ֆուտբոլիստներին, որոնք իրենց ակումբներում ավելի լավ վիճակում են գտնվում։

Նշենք, որ նախկինում Կարվախալն ու Մորատան ազգային թիմի ավագների թվում էին։ Իսպանիայի հավաքականի վերջնական կազմը, որում կընդգրկվի 26 ֆուտբոլիստ, կհրապարակվի մայիսի 25-ին։

Ընթացիկ մրցաշրջանում 33-ամյա Մորատան անցկացրել է 28 հանդիպում (983 րոպե)՝ դառնալով ընդամենը 1 գոլի և 2 գոլային փոխանցման հեղինակ։ Մրցաշրջանի մեծ հատվածում Ալվարոն բացակայում էր մկանային պատռվածքի պատճառով։

34-ամյա Կարվախալը նույնպես այս մրցաշրջանում բոլոր մրցաշարերում 1000 րոպեից պակաս է խաղացել (885 րոպե)։ Նրա ակտիվում կա 20 հանդիպում, որոնցում արդյունավետ գործողություններով աչքի չի ընկել։

Ֆուտբոլային տարվա ընթացքում Դանիելը մի շարք խաղեր բաց է թողել մկանային և ծնկի վնասվածքների պատճառով։ Այժմ խաղացողը վերականգնվում է աջ ոտնաթաթի ճկույթի ճաքից հետո։